☆Mr. BAD(ZAWLAIDI NEITUPA)☆ - 17 By Dingdi Pachuau

☆Mr. BAD(ZAWLAIDI NEITUPA)☆ - 17 By Dingdi Pachuau

"Min hrilh rawh, thu dik tak min hrilh ngei ang tih pawh ka hria a ni, Nunui kha i ni tlat a," a ti leh a, min fak der nge min bâwl zâwk tih pawh ka hre thiam lo, a hmêlah lah chuan min nuihsawh hmêl a lang bawk si lo va.

"Hrilh ta che ila chu chuan eng nge i tân țangkaina a neih? A neih àwm rêng ka hre lo," ka ti ve ta a, ani lah chuan," Țangkai teh rêng mai, ka nunkhua hman chhoh zêl tùrah awmze pawimawh lutuk a nei a ni," a lo ti thung a, thingpui chu a dût hlak a; mahse, ka lak ațangin a mit a la sawn chuang lo.

Zak duh lovin a mitah tak chuan ka en lêt ve a, amahah engtin nge a thawh ve hre lo mah ila tunah tak hian kei chuan hmâna kan inkawp lai kha hre chhuakin amah ka duhna a la reh thei chuang lo va, mi tam zâwk hriat thiam theih loh leh duh loh zu a in țhinna leh insual a hrâtna lahin amah ka duhna a tikiam thei chuang hek lo. Min tina êm êmtu a ni tih pawh ka hre reng; mahse, ka thinlung a tân ka hawng tawh a, ka duh thuin ka khãr leh mai thei tawh lo va, mi dang tân hmun ãwl lah ka nei thei hek lo; mahse... hei hi chu ka hrilh kher lo ang.

"Tunah tak hi chuan ka nei lo chu a ni alawm; mahse--" ka la sawi zawh hma hma chuan," A tâwk e! Kha kha ka hriat duh ber chu a ni, ka lãwm e," tiin a ding nghâl hluai a," Min hrilh a, ka lãwm e," ti nawn lehin thil dang sawi tawh lo chuan in ațang chuan a chhuak zui nghâl a. A awm dàn teh thut chuan min tihamhaih a, auh zui nachâng pawh hre lo chuan ka thlîr liam zui ringawt a. Engati nge khatiang khân a awm a? Eng nge a hriat? Khawnge a kal dâwn?!!

Ka phone a rawn rîk tâkah chuan ngaihtuah zui lovin phone chu ka chhâng zui ta a, eirawng ka bâwl nghâl ta bawk nèn, U Valpuia pawh chu ka ngaihtuah zui hman ta lo, mahnia awma nilênga hna thawka chhuah chuan in awm chhun hun tlêm têah hi chuan buai a awl ve êm mai a, thil dang ngaihtuahna hun pawh hi a awm meuh țhìn lo, mut hmunahte a nih ngawt loh chuan.

Ka mutnaah chuan U Valpuia chu ka ngaihtuah zui leh ta a, eng ti tùr takin nge maw Serchhipah hian a rawn kal ni? Ka hmu thut a, mak ka tihna a la reh hmain min chhuahsan leh thut bawk a, a chêt dàn kha mak tih loh rual a ni lo a ni. A la damkawr hmèl tho bawk si a, inentîr tùrin a rawn kalte hi a ni lo maw? Lunglei ațangin Serchhip lamah, heta țangin Aizawlah kal a tum a ni ngei ang; mahse, kan inhmuh pawh khân a tlai tawh e, a nih leh, zàn tlàn a tum tihna em ni? A, he pa hi, min va tibuai mai mai tak! A chhànna ni se ka hre dâwn chuang si lo va, ka ngaihtuah peih tawh lo ve.

A tûk ațang chuan a message ka dawng nghâl ta pang a; mahse, thu pângngai ni lovin thawnthu a ni!! Bei maksak thei e, thui tehchiam a nih loh avàng chuan ka chhiar chhuak ve dap tho a, a tàwpah 'chhunzawm leh tùr' tih hi a ziak tel a, ka nui hak ringawt.

A thawnthu ziah chu min rawn thawn zêl a, words sãng khat bàwr vêl érh áwrh chauh  a nih avàngin ka chhiar chhuak zo hma thei khawp a,  a țantìr lamah phei chuan a ruih laia a type a ni ang ka ti hial, a kài tãwi lo nain hawrawp a kim lo zauh zauh a, nuihza chung chungin ka chhiar țhìn; mahse, a hnu deuhah chuan ngaihnawm ka ti chho ta riau a, a chhunzawmna pawh ka nghâkhlel zui ta viau bawk. Love story a ni nain chhûngkaw chanchin a tam a, a mipa lam chanchin hlîr a thlùrbing avàng chuan ama chanchin a nih ka ring deuh ngawt a, ka ngaihbel zêl bawk nèn, a chanchin ka lo hriat ngai miah loh pawh ka hre chho hret hret zêl e.

Mala nèn pawh kan la inbe chho zêl a, min duh thu sawi nawn tawh kher  lo mah se min ngaih thu a rawn sawi ve ziah a, a sawi zak ngai lo. "Min duh ve em? Min chhâng tawh la?" tih lam rêng rêng a rawn sawi ngai lo va, nêl takin min ngaih thu a sawi a, ka chanchin min zâwtin a chanchin a sawi leh mai țhìn. Exam lama insàwrbing a duh vàngin a hna lamah pawh a chàwl ta rih a, kei pawhin ka theih tâwkin ka fuih ve sauh sauh a, hlawhtlinna chang se, hna țha tak thawk se ka duhpui êm êm a ni.

U Valpuia chanchin ka zâwt ngai lo nain Mampuii'n a thuphungin min hrilh zauh zauh a, a dam țha ve viau tawh a, zu pawh a in ngai tawh rih lo ni àwm a ni. Hna pawh tlêm tlêmin a thawk chho ve țan tawh a, a in bula terrace pawh a enkawl chho țan leh tawh bawk. A dam țhat tak tak hnuah eng nge a an dâwn ni? Zu kha a duh ve khiah khiah a, a rùi ã la hmu miah lo mah ila insual a hrât dànah a thin a ram ve țhìn a nih ka ring. Zu-ah hian insùm theih lohna a awm tlat mai a, a zu in țhin vàng pawh a lo ni maithei bawk a, eng pawh chu lo ni se, rei lo te chhûng a nghei pawh chu a làwmawm tawh hrim hrim e.

A thawnthu min rawn thawna a mipa chu zirtîrtu a ni ta tlat mai, ama chanchin chu a ni lo a ni ang, bâkah, an khua pawh chu thingtlâng khua a ni lo. Tleiràwl sual nei chhovin zu pawh a in ve țhìn tih ka chhiar hma kha chuan amah a nih kha ka lo ring tawp mai kha a nia; mahse, ka lo ring dik chiah lo chu a nih dâwn hi. Thawnthu a ziah min lo thawn tih loha message pângngai min thawn hmasak ber chu  *Zu kha in lo tùr leh nghei tùr khân min hrilh ngai miah lo, eng nge a chhan?*  tih a ni. Ni dâwn tak, ka hrilh ngai lovin ka hria, insual chungchâng kha chu ka sawi chiang mai a, zu in lo tùr leh nghei tùr kha chuan ka hrilh pawhin ka hre lo, thil țha lo a ni tih hre reng chungin engati nge ka sawi rîk ngai loh?

A chhan chu kan inngaihzàwn hma ațanga in tawh a ni tih ka hria a, a in țhìn tih hre sain ka ngaizâwng a ni. Nula tam zâwk chuan ni e, nghei tùr leh in tawh lo tùrin an hrilh ngei ang, kei kha chuan a laka intihthu viau kha ka tum hran lo va, ngaihzâwng a nih vànga a laka thu neih viaua thunun chiam kha ka tum lêm lo. Kei aiin a upa a, zu in ngai lo ai chuan amah zu in țhìn ngei khân zu țhat lohna kha a hre chiang dâwn tih ka hriat bâkah amah hmangaih êm êmtu, ka hmangaih hma daih ațanga hmangaih tawhtu a pa leh mi dang dang hnên ațangin zilhna a dawng chàmchî dâwn tih pawh a chiang, têt tê ațanga hmangaiha dawmtu a pa zilhna mah a la zawm theih rih loh chuan hmãn nî lawk ațanga amah hmangaih ve chauhtu zilhna chu hmangaiha zilhna mah ni se a tân ninawm mai a ni dâwn tih ka hria. Chu vàng chuan ka inrawlh duh ve lo ta law law a, nakinah a pa ngei zilhna chuan rah țha chhuahin sim hun a neih ka ring tlat zâwk a ni.

*Mi pângngai i nia, hrilh kher ngai lovin i sim thei ang tih ka hria a ni*   tiin ka chhâng a, a tûkah min rawn chhâng lêt chauh.

*I danglam bîkna ka hriat chhuah belh zêl e*  tih tê chauh hian min rawn chhâng a, chu chuan ka rilru a luah zui leh ta tlat mai. A thu ziak mai bâkah amah ngaihtuah zui lo thei lovin min siam a, engtin hian nge maw a tih bîk ni? Hetianga tih theih dàn hi ka hre duh ve ngawt mai. A hma kha chuan ka ngaihtuah pawhin ngaihtuah ngut ngut lovin dam takin ka ngaihtuah chhuak ve mai tawh kha a nia, tunah hi chuan ka ngaihtuah leh ngut ngut tawh, min tibuai leh zo tawh chu a nih hi. Kan khuaa Krismas hmanga ka haw vàng vek; amah ni se ka hmu ka hmu a, a lakah beisei nei tawh lo mah ila ka hmangaihna ka tibo thei ngawt si lo, ka mitmeng leh awm dànah ni se mite angin ka inthup thiam ve bawk si lo va, min man chiang viau a nih ka ring. Bialpa ka neih leh neih loh chungchâng min zawh lai khân engati nge 'Nei' tia ka lo chhàn mai loh le? Ani kha chuan awlsam takin min țhen thei mai a, kei ve hi, mitmeng leh awm dàn chu thuhran, țawngka tal te chuan dâwt kha lo sawi ve mai tùr a nia. A thu min thawn sentence khat lekin min tibuai thei a, kei ve hi chu a lakah eng mah ka ni si lo, a duh loh leh sîra a hnâwl hnu mai kha ka nia...

Pathianni inkhâwm bànah U Zarite nèn inrawt phûrin Thênzâwlah kan lêng a, a nuam ve reng mai. Kan driver tih loh chu hmeichhia vek kan ni a, kan bengchheng hlawm viau bawk a ni. Mahnia ina awm ngawt ngawt ai chuan a nuamin rilru pawh a kal ding lo va, an fiamthu thawhah pawh ka nui ka nui mai. An fel hlawm a, an țawng duh a, rilruah enghelh pawh an nei lo a ni ang. U Zari nîte inah zanriah chu kan ei a, mi paruk lai mah ni ila vawi khat chaw ei na nâ nâ chu min dãwl zo khawp mai, ei siam pawh an thiam, ka ei țeuh nghe nghe, mahni chauha ei ai chuan chaw ei a tui duh deuh.

Haw lamah erawh kan driver VLa, U Zari bialpa chuan a lo lem sek niin, a țawng duh khawp mai a, a khalh chak deuh bawk nèn, ka hlau ru viau a ni. U Zari chuan a hau a," Engtik lai khân nge i lo in hman a? A mak thei e, Motor khalh haw tùr i ni tih i inhre reng si a, khalh muang deuh teh," a ti a, ani lah chuan," Motor tlãn a tam lo va, tlàn chak pawh a pawi lo, kan chesual lo ang," a lo ti deuh tlat a, a tlàn muan phah chuang lêm hlei lo va. Mi dangin kan sawi ve ngam si lo va, kan ngawi dâk hlawm a, kan hlau ru vek a nih ka ring. Kan tlàn chhûngin ka rilru a nuam thei lo va, kan chétsual loh rêng ka ring lo, ka rilruin kan chesual a nih pawha kan nat viau loh nân a rûkin ka țawngțai mawlh mawlh. Serchhip luh dâwnah kawng chhak lam kan su bur ta ringawt rêng a; mahse, ka vànneih asiamin ka lu ka tauh lo chiah chiah a, bûk erawh ka bu ve nghawng tho; ka bula țhute pahnih erawh chu kan hma seat hnung lamah an intauh a; mahse, an intauh na hran lo. U VLa ber chu steering -a a intauh avàngin a na deuh a, a chal pawh a thî nghe nghe, U Zari pawh a intauh ri bur a; mahse, a na viau lo, a chal erawh a pãwng ve maithei a ni.

In ka thlen hnuah ka ngaihtuah lêt a, ka hlauthãwng zual sauh a, kawng thlang lama liam lova kawng chhak kan sû kha kan vànnei ka ti lo thei lo, țawngțai chhànna a nih pawh ka ringhlel lo; mahse, ka hlauthãwng a ni. Ka ngaihtuah lêt lo thei si lo va, chhûngril lamah ka khùr der der thei hial a ni, thil țûl lo ka ngaihtuah kual vak vak a, lo chesual na deuh ta ang ila, chhûngte hial hrilh ngai ta se, ka nu leh pate rilru chu a va hrehawm dâwn tehlul êm!!! Chutiangin ka țhiante pawh. Pathianniah chuan țûl fê loah chuan ka chhuak tawh miah lo ang, tlêma tlêmah na takin kan chesual lo chauh a ni si a.

Kan țhianhovin thu thar làwmawm leh thin tiţhâwng zet si kan nei ta. Kan țhianho zîngah pawh țawng tam lo ber Hruaii'n bialpa a nei ve ta tlat mai a, a bialpa lah chu kan hriat chian êm êm, kan khuaa mi Pa Zuia, tlangvâl senior fel tak mai a ni a, tu pawh mai hian koh nân 'Pa Zui' kan ti vek, mi zawng zawng 'Pa Zuia' a nih deuh ber chu. Țhianho group-ah Rin-Detective-i'n a rawn post a, mak ka ti viau a; mahse, a hnuah chuan mak ka ti leh lo deuh. Hruaiite leh Pa Zuiate hi ințhenawm an ni a, an inhre chiang viau dâwn a, ni tina inhmu thei reng ta chu boruak a lo awm ta pawh hi a mak viau hran lo.

Group video call kan neihin an nih țan dàn chu ka zâwt a, Rini chuan," A, inkawp tùr hi chu sawi vak dàn a awm lo, a hunah hi chuan an inkawp chat mai," a ti a, Zmi chuan," Report pe rawh se, kimchang deuhin," a lo ti ve a, ka lo 'Amen' chiang ngang mai. Hruaii pawh chuan a rawn sawi ve mai bawk a," Tûn thla ni 3 chhùn khân, keimah chauha ka awm laiin a rawn kal a, chhuat ka nawh laiin a ni nghe nghe. Ni dangah pawh a rawn lût fo tho a, ani hi chu țhenawmpa ngang a nia, inlêngah pawh ka chhiar ngai lêm lo. Chhuat ka nâwt zo chu,' Thil hrilh lawk che ka duh,' a ti a, kohhran lam thil min hrilh leh mai tùrah ka ngai a, ka rin loh lam daih rawn sawiin,' Hruaite, ka zêp zo tawh lo, ka duh che a ni, ka zêp țàng țáng țhìn a; mahse, vawiin chu ka sawi chhuah ngei a ngai tlat tawh, i tleiràwl lai, kum 14 i nih chhoh lai ațang daih tawh khân ka duh tawh che a ni,' a ti a, mak ka ti teh asin! Chuta țang chuan message tãwi tê têin min chhu zui keuh keuh reng a, a laka ka rilru pawh a danglam chho ve hret hret a, ni 20 zàn dâr 8 chiah chiah khân ka chhâng lêt ve ta a ni," a rawn ti dap dap a, report pawh a pe kimchang thiam khawp e.

"Vawiin hi ni 29 zàn dâr 8: 45 a ni a, i chhàn ațanga ni 9 leh minute 45 chiah a ni. In inpedâk nasa tawh em?" Rini chuan a rawn ti leh kher a, kan lo nui hak hak hlawm a. Feli chuan," Dâk nasa ang, a hmui pawh tûnlai tak hian a da bui reng mai," a rawn ti ve a, Zmi chuan," Zei vak lo ang. Tlangvâl senior virgin a la ni àwm si a, duh erawh a duhthawh thei ngawt ang chu," a lo ti ve a, kan nui vak vak mai.

"A meizial ping fawh nghek nghek lo che maw?" Rini'n a tih leh phei chuan kan va nui nasa tak! Ka dul a na vek thei nia! Mampuii chuan," Ka ning e, naute a harh phah a nia!" a rawn ti a, Ruatpuii ve thung chuan," E, hriat thiam a ngai dâwn lutuk! Hruaii, hre thiam viau rawh aw, a la tichhin ve ngai dâwn bawk si lo, hmui rêng rêng a fawh loh chhûng, khâng kum zawng zawng kha tûn thla ni 20 hnu lamah hian a țan ve dâwn chauh sia maw, tûn ai hian an la dàn belh nasa dâwn a ni, Hruaii pawh hmui exer a lâk țhat a ngai, la char char mai rawh, a hahthlâk êm êm chuang lo va," a rawn ti a, a rawn sawi lai tak chuan Hruaii chuan a hmui chu a lo pet a lo pet bawk nèn, nuih bâwm a keh a ni ber mai.

"In rin aiin a zei ang, hetia a awm mulh mulh ang hi a ni lo. A nau fanu Baby-i nautelem ațangin infawhte chu a practice ziah alawm," Feli chuan a rawn ti leh a, fiamthu vek mah ni se ka nui nasa lutuk a, ka mittuite chu a tla pùr mai, ka nui țha hlei thei lo tawh zâwk a ni. Hruaii lah chuan," Eng mah lah hi in hre ve hlawm si lo va," a rawn ti leh ringawt a, chûngte hlei hlei chuan nuih a tiza zual a, țawng pawh ka țawng thei tawh lo, dul dawm meuhin ka țhen ka țhen ringawt mai a ni.

A tûk zînga ka harh chuan ka dulthuar chu a lo na ûrh mai a, nizàn lama ka nuih nasat vàng a ni tih ka hria. Ka ngaihtuah lêt a, nui sak chungin ka tho zui a, phone ka en chuan dâr 6 a lo ri țép tawh a, room ațanga chhuak ta mai lo chuan message lo awm vàng chu ka en leh rih a. Thawnthu chhunzawmna chu ka chhiar chhuak leh vek a, a hnuaiah chuan message dang 2 a lo awm leh a.

*Ka lam i hawi theih nân theihtâwp ka chhuah ang, chu chu ka thu tiam a ni*   tih hi a lo ni!! Vawi 5 zet ka chhiar nawn nia. Thawnthu nèn nizàn dâr 11: 30-a a rawn thawn a ni a, tukin lama mi chu  *Tûk chhuah nuam le*  tih a lo ni thung a, hei erawh hi chu tukin zîng dâr 5:10-a a rawn thawn a ni, a tho hma hlê mai.

Rilru hlim ru takin ka chhuak phei a, ka ke pên pawh a zãng vah mai. A thu min rawn thawnin heti khawp hian ka mood a tidanglam thei chu a ni tak si a, min hre chiang hlê a ni. Kei lahin a ti tak tak ngei em tih ka hre miah lo a nia, chuti chung chung pawh chuan ka hlim phah êm êm si. Tuna ka awm dàn hi ka țhiante'n hre ta se, ang angin nge min ngaih ang le? Nêp min ti viauin ka ring, an thin pawh ka tirim ang, heti tak maia ka rilru ka tikhauh thei lo hi mak pawh ka inti ve lek lek tho mai; mahse, ka hmangaih hmasa ber kha a ni ve a, hmangaih dàn min zirtîr tê tê a, lâk lêt dàn min zirtîr leh si lo lai takah hian ka tâng ta rêng a ni.

Tûkțhuan ka ei laiin U Valpuia chuan min rawn call ta chiah mai! Ka thin a phu rang dat dat a, chhâng mai lo chuan phone chu ka en reng phawt a, ka inchhuan khum ang nge țha tak leh pângngai takin ka be dâwn? A laka ka zawra ka lo pâk huam chuan ani pawhin nêp min tiin min zuam ngawt lo ang maw? Ni e, ka lo pâk huam tùr a ni lo, pângngai thei ang berin ka lo chhâng ang a, a zuam theih tùrin ka be lo ang.

"Hello?"

A ngawi deuh vang vang phawt a, a rùi lungpuamin ka number hmet chhuakin min rawn bia emaw ka ti hman țêp tihah chuan," A hmasa berin ngaihdam dìl che ka duh a, ka tihnatnaah che khân min ngaidam hrâm rawh," a rawn ti sup sup a, ka chaw țhial lai chu ka tàwp chiang kher mai.

"Nunu, khawngaih takin, kan inkâr siam țhat leh nân hun min hawnsak hrâm rawh, chu chauh chu ka ngèn ang che," a rawn ti leh a, a thil sawi chuan nunhlui min hriat chhuahtîrin a hun laia ka natna pawh kha a rawn kîr leh vek thei hialin ka hria!

"Thil harsa tak a ni," ka ti chhuak ve ta a, amah vànga ka natna zawng zawng ngaihtuah lui tlatin ka chhâng ve ngat a ni. Lo nêm viau tùrah min ngai ngawt ang e, teuh lo mai. Hmâna tleirãwl nunnêm tak, a duh duha a tihkàwi theih kha ka ni tawh bîk lo, nula puitling ka nih tawh hi.

"Harsa mah se ka tum ang, ka theihtâwp leh a bâk ka chhuah dâwn alawm, khawngaih takin chu chu min phalsak la?" a rawn ti leh a, a țawngkam lo tak taka 'khawngaih' a rawn dîl chhên chu inhmeh lo ka ti, ka rilru lâk pèn a tum dàn leh ka khawngaih hlawh chhuah a tumna a ni ngei ang chu.

"Thinlung keh sawm tawh siam țhat leh tum chu vàna arsi lâk tum ang vêl a nih ka ring," ka ti leh sak a, ka va sual thiam ve tak! Heti tak hian sual ka chhuah thiam hi ka lo ring pha miah lo asin, a tân pawh a na ve ngawt ang le.

"Tumna a awm chuan kawng a awm zêl alawm," zàwi sup hian a rawn ti ve leh a, ka lu ka thing nar nar a, țawngkamah chuan ka hneh dâwn lo tih ka hre chiang, min phet thla zêl dâwn a ni. 

"Kawng awm lo zawn chu a hahthlâk ve det ang," ka ti ve leh a, ani chuan," Hahthlâkin thahrui eng anga tam pawh sèn ngai mah se ka tum tho ang, i phal phawt chuan," a la rawn ti ve leh zêl a, chhàn dàn tùr pawh ka hre thiam tawh lo. A duhna lamah hi chuan a luhlulin a tihmawh si a, kei aiin a luhlul daih zâwk tih lah ka hre chiang tawh si.

"I thu thu," ka tih chuan," I phal tihna a ni em? A ni ti raw?" a rawn ti nghâl vat a, phùrna awka ka hriat chuan ka ner deuh nak a," Han tum la, kan hria ang chu," inrin tâwk hmêl tak chuan ka ti a, ka sawi zo chiah chu ka inchhîr zui zat, beiseina ka siamsak leh ringawt alawm le!

A rawn nui hawk a, min nuihzat niin ka hria. 

*A THIL TIH ȚHAT I HMUH CHIN AȚANG NGAWTIN MI TEH NGAI SUH, I HMUH LOH RUAM LAMAH ENG NGE A TIH I HRE SI LO*