☆Mr. BAD(ZAWLAIDI NEITUPA)☆ - 18 By Dingdi Pachuau

☆Mr. BAD(ZAWLAIDI NEITUPA)☆ - 18 By Dingdi Pachuau

Kan thil sawi chu message-in a rawn ûm zui leh vat a,  *Mite pawhin Lazai hmang mahin Thlà lâk pawh an inhuam alawm le, engah nge kei pawhin ka inhuam loh bîk ang?*  a rawn ti, ka nui hawk a, ka nuihzat êm êm vàng pawh a ni lo, a tum chhinna hi a ropui ve êm a ni.

Thenzawla kan lènna khân nghawng țha lo a nei chho a, U Zari leh U VLa an ințhen phah zui a, chutah chuan a la tàwp mai lo, U VLa zu rùi thinrimin U Zari chu an inah a kalchilh a, kut hial thlâk a tum a ni àwm e. Kan lo lêng chhuak kher kher kha a pawi ngawt mai, lêng chhuak lo ila chuan hêng thil hi a thleng àwm tawp si lo. U Zarite nèna kan sawiho pawhin kan lèn chhuah vànga an chunga thil thleng chu pawi ka tih thu ka sawi chhuak a; mahse, ani chuan," Pawi ti duh mah ta che, kan hma hunah kan la ințhen tho ang tih ka hria, zu a lo in nasa tawh a, ka thu sawi pawh a âwih hlei thei tawh lo a ni, kei aiin zu a duh zâwk miau a, a duh zâwk chu a thlang ta mai alawm," a lo ti ve thung a. Zu hi chuan buaina hi a thlen tam tawh teh e, inngaizâwng inkârah mai ni lovin chhûngkuaah, khawtlângah pawh a nghawng buai vek mai.

Ruatsaka'n nupui a nei dâwn a, a țhianoa Mala hnên ațangin ka hre phawt a; mahse," Hria angin lo awm rih suh aw, a rawn hrilh dâwn tho che a," a ti tlat a, chutah," An inneih hunah chuan i lo kal ang tiraw?" a tih zawm leh zat a. Kei chuan," Ka hre rih lo le, a hun azirte pawh a ni ang chu," tiin ka chhâng a, a thaw hawk a," Best-ah min hman a tum hmél si a, a buaithlâk dâwn khawp mai, ka exam zawh hnu lawkah a ni dâwn bawk nèn, țûlah ka chêtpui hman dâwn si lo va," a rawn ti leh a.

A sawi ang tak takin Ruatsaka chuan min rawn bia a, an inneih hun tùr a sawi chuan Calendar ka en vat a, ka hman ve maithei a ni, hman lo maithei bawk. A, a hun a la hla deuh a, thla tàwp lamah chuan ka hman theih dâwn leh theih dâwn loh chu a hriat chian theih ang.

"Keiin ka'n ti hmasa ang a, next-ah țhianpa nèn in ti ve ang, nupui ka neih tùr thu ka hrilh pawh khân,' I ti hmasa tùr chu aw,' a ti vang vang a, tu nei hmasa sa tiin kan inchàwi a,"  tiin a rawn nui hak hak a, kei chuan," Thil inchàwina chî pawh a nih loh hi, eng pawh ni se, ka lawmpui lutuk che, rawn tel theih ngei chu ka rawn tum ang," ka ti a, ani pawh chuan," Ni e, kan lo beisei tlat ang che, i tel loh chuan a kim lo ang a, hlim hmêl pawh kan pu lui thei lo palh ang," nui chung vêk hian a rawn ti leh a. Kan inbiak zawh chuan min fiamna chu ka ngaihtuah lêt a, ka phû loh lutuk maia Mala'n min duh ve tlat hi a làwmawm rualin a zahthlâk ka ti a, kei chu thingtlâng nula mai ka ni a, khawpui nula fel leh hmêl țha, tituai no nalh tak tak leh tlâwntlâi țha tak tak a tawn tam dâwn tehlul nèn, ani ni se tlangvâl fel tak, ngaihtuahawm loh lutuk mai a ni si a, ka ngaihtuah cheuh cheuh hian min duhna hi phû lo ka inti a, atân chuan khúta awm ang ka ni; mahse, min duh ve tlat si a.

U Valpuia hi tûnlai chhoah hian ngaihtuah loh ka tum leh tawh a, a message-a thawnthu pawh chhiar  châk viau țhìn mah ila ka en duh lo; mahse, a message ka en loh chuan zànah hian min rawn call țhìn a, thil dang vak a rawn sawi ngai lo," Thu ka rawn thawn che kha en teh," a rawn tih loh leh," Kan inkâr siam țha leh tùr hian ka beidawng dâwn lo, beidawn hi a thiang lo bur," a rawn ti a, a message ka en loh hi chuan min rawn call ngar ngar peih nia!! A message ka en loh chânga vawi hnih vawi thum min rawn call tawh hi chuan 'min rawn tur zêl dâwn tho' tiin a message pawh chu ka en leh nge nge țhìn. Min hre chiang tawh a, ka luhlul ve pângngai tih hre mah se kei aiin a luhlul ka tih tawh kha, ka chhàn lawk loh pawh hian min rawn call ngat ngat peih a, hetiang zâwnga luhlulah hi chuan tluk pawh ka tum lo.

A hnuah erawh 'thil pawimawhah min bia pawh ni hlei lo, min thununa min hneh a tumna hmanrua a ni' tiin ka chhâng tawh àwm lo êm mai ka ti rilru a, zanriah ei kham ațangin phone chu ka 'mute' sauh sauh a, lehkhabu ka chhiarsan ta daih a, mutnaah pawh ka en duh lo. A tûk zînga ka en chuan missed calls 30 a lo awm a nih chu! A hnên ațangin 29 a awm a, Mampuii hnên ațangin 1 a awm bawk. A message ni se 29 chiah chiah a lo awm bawk a, he pa tak hi chu mihring pakhat hi a va tling ve chiang tak!! Mahse, ka rilru ka tikhauh lui tlat a, ka call back lo va, a message pawh ka ensak duh chuang lo. A pawimawh dâwn lo tih ka hre chiang ve êm!!

Hnaa kal tùrin ka chhuak a, chhùn chawlh laiin U Zari'n," Tûnlai chu Alu Papawr ka ei châk huam huam reng mai, ka râwp huam huam a ni ber ang chu, tui taka an siam ka ei châk!" a tih chuan," Ka in luah thlen hma deuha dàwr têah khân an siam țhìn tlatin ka hria," ka lo ti vat a, min rawn en vatin," A ni maw? Vai siam nge Mizo siam?" a lo ti vat a, Mizo dàwr a nih thu ka hrilh chuan a lu a bu nghat a," Ka zui haw ang che," a ti zui zat a.

Scooty hi ka khalh chhuak zen zen lo va, kea kal hi țha ka ti a, exer a hranpain ka la ngai lo nèn, kea kal hian thil țûl lei pah remchâng ka tih bâkah exer-ah ka duh a, eng emaw thil tih dâwn leh hmanhmawh deuh châng tih lohah hi chuan ka khalh chhuak meuh lo. Vawiinah erawh ka khalh chhuak ve a, ka haw lamah U Zari'n a scooty-in min zui haw ve bawk a, dàwr tê bulah chuan dinpuiin chhùn lama a thil ei châk chu ka leipui a.

"Rawn lêng ve nghâl la?" tiin ka sâwm zui a, ani pawh chuan," Ni dâwn e, vawi khat chiah ka la rawn lêng tak asin! Zahthlâk zâwk hian!! Rei erawh ka lêng hman lo thung ang. Chuti a nih chuan.. ngawi lawk, ei tùr dang lei ang, nang eng nge i duh ve?" a ti zui zat a, eng mah lei a ngaih loh thu ka hrilh pawh chuan Paratha,  kan tharl tih hriat taka la lum vat vat chu a lei ta tho a, inah chhang lei sa ka neih avàngin ka ngaihsak vak lo kha a nia, amah zâwkin a lei leh tâkah chuan nuam ka ti lo va, pèr 4 chu ka lei ve leh a.

Titi luam pahin ka in luah lamah chuan kan phei dùn a, in chung dàwr kan kal pelh dâwn chuan eng ka hria chu ni maw, dàwr lam chu ka en kher a, chutah chuan U Valpuia ngei mai chu ka hmu ta, ani pawh chuan min rawn en ve chiah a, ka hawi lêt rang kher asin, ka en nawn tawh lo, eng nge he pa hian a rawn tih leh dâwn?!! Min rawn zui ve nghâl ang em? Lo kal lul suh se, U Zari hian hmu lo se ka duh; ani lah chu ka rilu puthmang hre thiam ve hauh lo chuan a la titi barh barh reng a.

Ina kan luh pawh chuan rilru phãwklĕk zek zekin ka awm a, inthunun erawh ka tum ve nasa. Kawngka lam chu ka hawi leh zawk zawk țhìn a, rawn kik thãwm a awm leh awm loh ka ngaichãng pah reng bawk. Engah mah ngaih loh chu ka tum ve nasa a; mahse, ka thei lo chu a nih hi. A rawn lût thut mai ang tih hlauthãwng rêng rêngin ka awm a, U Zari chu lêng reng se ka ti rilru viau bawk, a haw thuai chuan ani a rawn chhuk thla thuaiin ka ring si a.

Lèn rei tum lo ta na nâ nâ chu, a haw har lo ta rêng a. A chhuak deuh chiah tihah kawngkhàr a rawn ri zui ta zat a, U Valpuia chu a rawn lût ta. A thinrim hmêl hmuh ka inrin tehlul nèn, chutiang chu ka hmu lo va, min en deuh rùn rún thung.

"I phone a chhia em ni?" țhut pawh a la țhut hma chuan a ti a, kei pawh gas stove bulah ka la ding reng a, min melh reng avàng chuan nuam lo ti ru tak hian ka kut chu ka tuai nauh nauh a, U Zari ka ngaih ber țum a nih ka ring.

"Eng nge i rawn tih?" tiin a zawhna pawh chhâng lo chuan ka ti ve thung a, ani chuan rawn kal hnaih deuh pah hian," Ka phone i chhâng thei si lo va, eng nge thil awmzia tih hre tùrin ka lo kal," a lo ti mai a, âwih lo ru zet hian a mitah tak chuan ka en a, chumi vàng mai mai chuan a rawn kal lo tawp ang le, thil tih tùr pawimawh a nei ang a, a rawn pêng mai mai a ni ang. Dam chu hei a dam țhat viau tawh àwm hi, a hmêl hmuh pawh a zia tawh alawm.

"A nih tak chu, țhu rawh, thingpui ka siam ang che," tiin ka inher a, U Zari nèn thingpui kan in bãng chu flask ațangin noah ka thli chhuak a, chini bûr ka ban lai tak chuan ka beng bul chêtah hian," I phone chu... a chhe tak tak em ni?" a rawn ti sup a, ka phu zawk mai, chini búr pawh ka thlauh lo chauh a ni! Chutiang êm êma min lo hnaih chu...

"Sorry..." tih leh Chini búr chu rawn vawn ve nghâl zat a rual a, ka kut chhanah a ni a rawn vawn ni, ka hnung chiaha rawn ding niin a âwm leh ka hnung chu a insi ta ràn a, kawr chhana a taksa lum pawh ka hre thei, ka mawng leh a mal emaw ni pawh a insi chiang mai. Ka thin phut ran nghâlzia chu, ka chêt sawn thuai a ngai, ka dik dâwn lo.

"Lo va țhu rawh," tiin ka che sawn zui nghâl a, a sîr lamah ka ding daih. Ka aw a khùr lehnghâl a, a hriat loh beisei ang. A mitah tak ka en ngam tawh rih lo va, ka awm dàn  a hriat thiam ka hlauh vàng a ni.

Rin loh deuhin a kal sawn ve ta a, thâwk ka la huai huai mai. Ka bula a awm khân ka chêp a, thâwk pawh ka thaw țha ngam lo a ni. Khùr ru deuh dar dar chuan thingpui chu ka siam a, ka siam zawhah Paratha la awm zawng nèn chuan a bul dawhkànah ka va chhawpsak a.

"I phone chu a chhe tak tak em?" a lo ti leh a, chhàn tuma ka àn zuau laiin ka phone chu a rawn ri ta țang țang mai, ka ipte ațanga la chhuaka ka han en chuan Mampuii a lo la ni zui a, chhâng tùr chuan ka kal sawn deuh a.

"Nizàna ka rawn phone che khân min chhâng thei lo va, i mu tawh a ni ang ka ti deuh ngawt a; mahse, a la hma ve deuh tho bawk si; i hman lo emaw i phone a chhia emaw a nih ka ring ta deuh a, U Valpuia'n,' I țhiannu biak han tum chhin teh,' a rawn tih ngawt vàng a nia, nangni hi, in lo inbe leh țan deuh tawh em ni?" a rawn ti duah a, U Valpuia'n ka țawng a hriat phâk miau avànga țawng tam duh lovin," Teuh lo mai! Rin thu an sawi mai mai ngai lo," tiin ka chhâng a, min rawn betu chu tu nge tih a hriat pawh ka duh lo.

"A, rin thu pawh a ni hran lo, ka han sawi ve mai mai a nia. Ani zawng, han duh leh chî pawh a nih tawh loh hi. A innghahna tlâk àwm lo êm mai ti raw? Tu mahin hma lam hun chu kan hre chuang lo nain zu in mi ngaihzàwn hi zawng, a risky êm mai a. Han sim ve deuh reng mah se a hnuah a ngaiah bawk hian an tlu leh duh a ni, zu in țhìn hi zawng tu tân mah ka duhpui thei lo, nunphung a dik loh vek bâkah fate lo neih tawh phei chuan maw, rilru hi a hrehawm tlawk tlawk a ni mai. Chu vàng tak chuan, a chânga zu in hlek chauh pawh hi ngaihzâwngah pawh duh loh tùr, nakina buai ai chuan maw inlaichìnna siampui loha inthiar fihlìmsan hmak a țha ber," a rawn ti leh mawlh mawlh a. "Ni e, a dik alawm," ka lo ti ve a. A takin a tawng tawh a, a hre chiang. Chutih rual erawh chuan mihring hi kan inang vek lo va, tlangvàl laia zu in reng mai, nupui neih hnua nghei ta hmak an awm a, tlangvàl laia fel leh nungchang țha tak tak, nupui neih hnua zu báwiha tâng an awm ve leh tho bawk a, hringnun hi hetiang mai mai hi a lo ni a, thil chiang tak, ngei ngei tih ang chi hi a awm thei meuh lo; mahse, mihring ngaiha thil țha lo 'ti țhìn' ai chuan 'ti ngai lo' mi chu an thlanawm zâwk fo a ni.

Kan inbiak zawh hnua ka hawi chhuah chuan U Valpuia pawhin thingpui chu a lo in zo tawh a, min rawn enin," I phone chu a chhe lo niin a lang, nizàn khân vawi 29 ka rawn call che a, min chhâng lo va," a ti phawt a, a ngawi dat a, ka lo inrawlh loh avàng nge ni, sawi zawm lehin," A chhan ni thei àwm tùr ka ngaihtuah a, zankhuain ka mut theih loh phah a," a ti leh a, ka âwih chiah lo chuan ka mitko ka lo sàn ringawt a.

"Zïngkâra rawn kal tum ka ni zâwk a; mahse, YMA hnatlâng a lo awm a, ka rawn kal hman lo va. Chaw ei khamah rawn kalin chhùn lamah daih tawh khân ka rawn thleng tawh a, i lo haw hun ka lo nghâk ta char char a ni," a ti leh nghut nghut a, ã ka tih êm avàng chuan," I va ã tak!" ka lo ti ve thung a. Phone ka chhàn loh vàng mai maia rawn kal kher a ngai lo, ka chhâng duh lo a ni mai, a laka lo inhawng viau tùra min ngai a nih phei chuan... teuh lo lutuk! Na taka min siamtu hi ka nâ zawng zawng kha theihnghilhin phûr tak leh lungchim takin ka lo pawm leh nghâl ngawt ang maw? Nuih pawh a za lo ve.

"Ât ngaih châng pawh a awm ang chu, thil țha bîk duh chuan," a lo ti awlsam ĕt thung. Ã ka ti chu huatah pawh a la lo, thinrim hmël pawh a pu chuang lo, a insûm ve nasa ngawtin ka ring. Tu mahin ã intihte chu kan duh tawp nâng, min ti ve ta ang se chuan ka sa ngawt ang! 

"'Thil' ka ni lo, mihring ka nih hi,"  ka tih chuan," Ngai kàwi duh suh, i hre thiam tih ka hria," a lo ti a, a bân chu phar chhuakin a han zi mar a, chhîng vang vangin," Ka chau a ni, nizànah ka mu bawk si lo," a ti leh sup a, a țawng ring lo nain ka hre pha tho. 'Mu hahchàwl rawh,' ka tih a beisei a ni ang e, ka ti dâwn teuh lo, a ât man a tuar a nih saw.

"Ka phone a chhe lo tih i hre tawh a, a tâwk tawh a ni lo'm ni? Tunah chuan i kal thei tawh ang," nèlawm lo thei ang ber chuan ka ti a, ka kut hûm ruhin ka insehruh tlat bawk, a thang kamah ka tâng tùr a ni lo, a thil tih dàn hi, min tàl awhtîr a tum tlat a ni.

"Ka'n chhîng hlek ang e. Ngawi rawh lawk, chumi hma chuan ka thu rawn thawn che kha en nghâl teh, tunah khân," a rawn ti leh a, he pa hi chu aw, a lu-ah sâwn chhut fawk ka châk, a thuhnuaia min awmtîr phêt a tum hi ka ngai thiam thei lo.

"Ka hman rih lo, eirawng ka bâwl dâwn," ka ti ve ta tlat a, a nui chhuak ta hawk a," I luhlul dàn hi ka làwm reuh tlat che, ka luhlulna i kai ve tawh a nih dâwn hi," a ti a, a țhutna ben thak thak pah hian," Ka'n zâl lawk aw, a rei lo ang," a ti leh a, a awm dàn chu siam remin ka tâna țhutthlèngsei, sei ve tâwk takah chuan ke lawr zùlin a mu ta a, a muhìl zui nghâl thuai a nih ka ring, a thâwk dàn ațang chuan muhìl thaw a ni tlat.

Tihharh hlau ru takin, thãwm dìm takin eirawng chu ka bâwl a, ka rilru erawh chuan," Engah nge thãwm ka dim viau ni, a duh leh harh daih se, ani muthilh avànga a harh hlauh êm êm ringawt, thãwm ka dìm tawh dâwn lo," ka ti nghut nghut a, steel chawhmeh suahna ka neih pakhat chu chhuatah ka thlauh lui bur chhin dâwn em maw ni ka ti hial a ni.

A muhìl nghet viau a ni ang, tihpalh thila chemte ka thlauh rîk bawl pawh chuan a harh phah miah lo, harh chu sawi loh chêt pawh a che îk lo! Ani hi, a lo thi te hi a ni hial lo maw? Tlangvãl harh vãng tak kha a ni țhìn a, tunah hian a harh miah lo a nia. A bulah chuan dìm tê hian ka va kal hnai dên dên a, a hmêl chu ka han en chiang a, tui taka muhìl hmêl chauh a lang mai. 

"A mu tui tho bawk a' tiin a hmêl chu chîk takin ka en chhunzawm a, a bianga hmul rawn țo țan leh siar siar tawh avàng chuan a mehna a rei ve leh deuh tawh a ni ang. Tunah hi chuan zu rim namin a awm tawh rih lo va, a hmel hmai hrim hrim pawh hetia a lang bawrchhawr leh a nih chuan hna a thawk nasa a ni ang, a chèr dàn erawh a zia chho viau tawh a, a mit hnuai lam val phei kulh țhìn pawh kha tunah chuan a reh ta deuh alawm. 

Ka en reng lai chuan amah chu a rawn che ta țalh țalh mai, rang zetin ka kal sawn nghâl a; mahse, a harh phah lo a ni ang chu, a muhìl zawm leh tho si a. 

Zàn a riak ta teh rêng a nih chu! Ka phal lo chungin riah a tum thu a sawi tlat a, tihngaihna awm chuang hek lo, hmun danga riak tùra ka tih lahin hmêl hriat dang a neih loh thu min hrilh mauh mai si a, in pakhata riah dun kher hi chu ka duh lo, miin lo hre ta se... a fuh hlawl lo, engtin mah awm dùn lo mah ila țha ka ti lo; mahse, engtin nge ka tih chuan ang le? Ka hnial hneh lo, riah chhuahsan daih lah chu a tihchi meuh si lo. A tàwp a tàwpah chuan lungthlu lo zetin chhuatah a mutna ka phah a, țhutthlèngseia mut mai a tum laiin a tân chuan a täwi tlat a, a mu tui thei lo ang, bâkah, naktûk lamah a rawl vek mai ang tih ka hre sa a ni.

A tûk zîngah a haw a, a haw dâwna rawn kal tawh miah lo tùra ka hrilh chuan," Ka phone call chhâng tawh la aw, min chhàn loh chuan ka ngaih a țha lo ang a, rawn kal leh ngei ka tum dâwn a ni," a ti a, rawn kal tawh lo se tih ka duh êm avàng chuan ka 'aw' ta ringawt a, ani lah chuan," A țha, thu âwih hi a țha a ni," tiin min en rùn a," Thawnthu pawh kha a la tàwp lo a nia, a la thui deuh ang," a ti leh a, chutah, min rawn hnaihin ka samah chuan dìm tê hian a rawn chûl a, a chêt dàn teh thut chuan min tihamhaih lek lek a; mahse, a rei lo, ka sam a chùl chu duh lovin a áwmah ka lo nam thung a; mahse, ani chuan awlsam tê hian a âwma ka namna ka kut pahnih chu a kuta bawh thuahtîrin a âwmah chuan a dawm bet ve ta thung a.

"Ka thin phu rang dat dat chu i hre thei em? Nangmah vàng a nih hi," a ti sup a, en chho lo mah ila min rawn en chhuk reng tih ka hre chiang hlê a ni. Kan indin hnaih si a, ka thin phû ring lutuk pawh chu a rawn hre pha ve hial maithei, ka taksa deka a awm hian a ni zual, a taksain min deh hian a lo hre rang ber a lo nih dáwn hi, pângngai thei rêng rêng lo mai!

A chhuah dâwna ka chala a fawh zoh vàngin nilêngin ka pãngngai theih loh phah! Ka ngaihtuahnaah a awm chhunzawm reng a, paih bo ka tum pawhin ka thei lo. Hna ka thawh lai lehzêl hi chuan hriat chhuah loh ka duh asin, a phû lo. Engati nge hetia ka awm leh tlat tâk ni? Ngaihtuah loh ka tum tawh kha.

*MI PAHNIHTE INKÂRAH AN PAWIMAWHNA A INBÙK TÂWK CHIAH HIAN INLAICHÌNNA ȚHA A AWM ȚHÌN*