☆Mr. BAD(ZAWLAIDI NEITUPA)☆ - 19 By Dingdi Pachuau

☆Mr. BAD(ZAWLAIDI NEITUPA)☆ - 19 By Dingdi Pachuau

Duh lo teh mah ila a rawn kal leh thut ka hlauh tawh avàngin a message ka chhiar loh châng pawhin a call hi chu ka chhâng zat zat a, min rawn biak hian thil pawimawh tak rawn sawi tùr hriat avànga min rawn bia a ni lo ka tih tawh kha, min biak tàwp dâwn apianga," Ka Nunui ngei kha i nih leh thuai ka ring tlat a ni," a ti ziah chuan ka nuih tiza viau lo mah se ka țhen sak ziah thung. A awl-ai dâwn lo, kha Nunui kha chu a bona a rei tawh a, ko chhuak leh meuh tùr chuan a beih ve fé chu a ngai ngèi ang. Ka ngaihtuahnaa a rawn lan zin avàng ringawt hian ka rilru a hneh leh ta vek tihna lah a ni lo va, lo lang zing pawh ni se a taka ka lantîr chuan loh chuan awmzia a nei dâwn chuang lo tih ka hre ve kar e, tleirãwl ã mai kha ka ni tawh bîk lo.

Chhùn lamah hian message min rawn thawn ngai loh bâkah biak pawh hi min rawn be ngai lo va, min biak hi chu zàn lam a nih bâkah message pawh hi zànah leh zîngah a ni ziah. Chhùn lamah hi chuan a buai a ni ka ring, zu a in tawh rih loh chuan hna pawh a thawk ve ang a, tlangvâla pumpa, ina awm reng thu a awm bîk lo, lo a nei ve tihna em ni ang? Hetiang lam hi ka zâwt ngai miah lo va, ani pawhin a sawi ngai hek lo, min hrilh lo chu zawh pawh ka zâwt duh bík lo. 

Mahse, ni khat chu chhùn chawlha phone ka khawih laiin a message pakhat hi a lo awm ve vàng a, zàn leh zîngkâra min thawn kha chu ka chhiar vek tawh ngei a, 'chhùn lama min rawn thawn ve teh tlat chu' ti rilruin ka han chhiar a.

*Vawiin chu ka hre chhuak zual che, lo-ah ka kal a, Vid-ate lo kan zawh țum kha mitthlaah a lang uai uai a*   a rawn ti a, ka chhiar zo chu kei pawh ka mitthlaah chiang fiah êm êmin kha hun kha a rawn lang nghâl ut mai. Khatih hun lai kha chuan U Valpuia pawh kha ka la hre chiang lo va, ka rilru luahtu tùr leh min la tinatu tùr a ni ang tih pawh ka la ngaihtuah chhin eih lo a nih kha, ka Vangvat kai min lâksak zui bawk a... Chhanchhuaktu ropui. Pasalțha. Superman. Ka țhiantehovin U Valpuia hming an phuahsak kha a nia, khatih hun laia an nuihpui nasatzia leh min fiam nasatzia kha, chhàn vak ngaihna ka hre si lo, min tirethei ngawih ngawih a ni. Aw, hun kal chakzia hi, nimin ang maia la rei lo niin ka hre hial mai; mahse, kum tam a lo liam ve ta reng si a.

Zànah a thawnthu ziah min rawn thawn leh a, a taka thil thleng ngei a nih ka ring tawh a; mahse, ama thil tawn leh chanchin chu a ni lo, tu tak ni ang maw ka ti rilru vang vang a. A   changtupa (ti tawh mai ang) chu zirtîrtu a ni a, a hma kha chuan a sual ve deuh țhìn bawk a, a nihna hre lo lêk khân; ka țan lovin ka ngei dâwn lek lek a; mahse, a changtupa ngang a ni a, țan loh viau dâwn pawhin a rûk tak chuan ka țan ru tho. Zu a in hmaa a nun chhoh dàn kha khawngaihthlâk ka ti a, zu in chhovin a hringnun kawng kha a bumboh ve bawk a, tlûk leh din fàwmin a hringnun a chhiar chho a; mahse, tunah chuan vànneihna a tawng tawh a, zirtîrtu niin nupui a nei a, fa pawh pathum lai a nei tawh a nia, a vànnei chho viau chu ka lawmpui a ni. Engtin tak an nun chu kal chho zêl ang maw, a tàwp dàn tùr ka hre châk reuh mai mai, engtikah nge a tihtàwp ang? A thuhrimah, tu chanchin nge tih te tal pawh min hrilh ve se...

Thu tam tak sawi ngai lo mah se inbe ve reng ta chu rilruah a chĕng tam telh telh a, min biak loh hlek chuan khua a har mai dâwnin ka hre tawh mai. Zu a nghei chho zêlin ka hre bawk a, a lama ka thinlung inhawn tum leh țan mêk pawh chu thunun viau ka tum hran lo, zu nghei a tumna kawnga amah ka țanpui ve theihna niin ka hre deuh bawk nèn, min be țhìn pawh chu pawi ka ti lo a ni.

"I thawnthu ziah hi i chanchin a ni si lo va, tu chanchin nge ni rêng rêng a? A ngaihnawm ka tih bâkah a tàwp dàn tùr ka hre châk ngawt mai," tiin, min rawn biak leh hmasak berah chuan ka zâwt ta nge nge a, ani chuan," Ka chanchin a ni lo tih engtin nge i hriat?" a rawn ti ve thung a, kei chuan," Hei a hriat reng hi, nupui i la nei lo va, zirtîrtu i ni bawk lo va. Chuan, fa pawh i la nei lo bawk a, ni lo'm ni?" ti fuh inti tak hian ka ti a.

"Chhiar zêl phawt rawh," tia min rawn chhàn chuan," Min hrilh țha duh lo vei a... Sum siam nân ka hmang hmak ang! Tûnlaiah thawnthu chhiar an ngaithla suau suau a, youtuber lam lahin chhiar tùr an lo duh êm êm bawk a, ka tlângzarh dâwn a ni," fiamthu deuh hian ka ti ve leh a, ka rin loh deuhin a rawn nui hawk mai.

"I duh lo ang," a rawn tih lai pawh chuan a nuih a la zã a ni ang, a aw ațang chuan a nui tih a la hriat. Ka ner sak ringawt a, ka chhâng lo. Amah vêk chuan," Nula sum ngah i nih kha, i ti tak tak lo tih ka hria, kan khaw nulaah nang aia sum ngah tùr an awm lo, thla tina sum la lût thei, sum i thawh chhuah hnuah phei hi chuan i hmêl a țha zual sawt sawt," a rawn ti leh duah a.

Sum. A thil rawn sawi chhuah chuan ngaihtuahna thar min neihtîr thut a, thutak zet hian," Chu vàng chu a ni ti raw min bêm thar leh chhan hi?" ka ti ve ta thung a, rawn sawi fuh ka ti lutuk. Ka lu ka thing nar nar a, a dik ngei ang; mahse, sum ka ngah loh teh rêng nèn, he thil a duh vàng hi a lo nih dâwn chiah hi min hnaih leh a tum ni. Hmêl țha pawh min lo ti vak lo hrim hrim tihna a nia, sum thawk chhuak thei ka nih hnuah erawh.... a tum loh deuhin a inpuang ta si a, min chhàn ngaihna pawh a hriat miah loh hi, a ngawi reng alawm. Min hnaih rawn tum leh teh se... a hre khawp ang.

"Khatiang ngaihtuahna kha paih bo vang vang rawh!" a rawn ti sup a, kei pawh chuan," Nang pawh khân khatiang ngaihtuahna kha paih bo vang vang rawh!" a sawi zawh rual deuhthawh chuan ka lo ti ve zat a, ka thin a rim rualin ka thinlung a na nghâl vawng vawng lo thei lo. Min la duh reng vànga min rawn hnaih leh tum a ni emaw ka lo ti a; mahse, a lo ni si lo, sum vàng chauhin a lo ni si a. Sum ka thawh chhuah ve hnu ațanga 'nula sum ngah' tih avànga min rawn hnaih tumte ka huat theihzia kha... 

"I ngaihtuahna kha a hrisêl lo a nih kha," a rawn tih leh chuan," Nang deuh kha," nghal fê hian ka ti leh a," Thil suangtuah vak vak suh. Hrisêl lo taka i ngaihtuahna ang rilru kha min puttîr nghâl ngawt zêl bawk suh," a rawn tih leh pawh chuan dang duh hauh lo hian," Eng rilru nge ka puttîr che chu? I ngaihtuahna kha a hrisêl lo fê zâwk! Sum..sum..sum," thinrim tak chuan ka ti a, ka rilru a na takzet a ni. Eng rilru nge ka puttîr 'ngawt zêl' chu? Engtik laiin nge ka lo puttîr a? Kan inkawp laite khân rilru hrisêl lovin a țha lo lamin ka puh chhin tawh em? Teuh lo mai, puh chhin ahnêkin min duh ve kumtluan tùrah ngaiin rilru țha tak pu tùrah ka ngai zâwk a nih kha. Amah hi a ni lo'm ni kan inkawp nâna hma la hmasatu? Min duh thu min hrilh a, ka nute duh loh tùr a ni tih pawh hre sa vekin ka pawm a, min nin hnuah min thlauhthla leh tawp a, tunah sum vàng liau liauin min rawn hnaih leh a tum a... a thil tum hi a va tenawm tak!!!

Ka tih ngai miah loh angin a number chu ka block ta hmak a, hetiang mi hi chuan min hnaih miah lo se ka duh, sum ringawt mai hmachhuan zawng, a tenawm, a daih rei dâwn lo lutuk! Hetiang rêng hi em ni a lo nih a? A insawi fiah theih miah loh kha, ka lo hre chiang lo hlê a lo ni.

Ruatsaka nupui neihna tùrah ka kal zui ta daih a, Aizawl ka thlen veleh Mampuii'n min rawn bia a," I phone hi a țha tiraw?" a rawn ti teh ngawt a," Țha lo se kan inbe dâwn em ni?" ka ti ve thung a, ka nui pah hak a. Min lo nghâk rengtu Mala ka hmuh chuan ka ko zui nghâl a, Mampuii chuan," Mala maw?!! A lo kal elo? Eu, a va nuam àwm ve?" tiin min fiam zui a.

"Ni lo, hei kan țhianpa ințâwm Ruatsaka nupui neihna tùrah ka kal zâwk, Mala'n min lo hmuak a nih hi, a fel a nia," tiin nui chung hian ka hrilh a, Mala'n nui sâng chunga," I bag?" tia min rawn biakna chu ka chhâng leh rih a, Mampuii chuan," I buai êm mai, nakinah kan la inbe țha dâwn nia. Englo, U Valpuia'n a be tlang thei lo che a," a rawn ti leh ta a, kei pawh chuan," Aw, nakinah kan la inbe leh dâwn nia," ka ti a, phone chu ka dah ta nghâl a. Ho mai mai, U Valpuia min biak tlang theih loh thu rawn sawi mai mai. Be tlang thei rĕng nâng, ka block alawm le!

U Puiite ina thleng àwm tak ka nih vei nèn, Ruatsakate vêng nèn an inhlat deuh si a, bâkah, Mala'n a remti tlat lo va," Kan inah le, i ute in zawng kâr a hlâ, ka rawn hruai hman dâwn bawk si lo che a, hun a duh rei dâwn bâkah i pawisa a hek mai mai," a ti deuh tlat a, an in lam min panpui nghâl daih. A hmain kan sawi ri deuh tawh a, chutah pawh chuan an ina innghat tùrin min ti a, ka hnial zo tawh lo bawk, min lo hmuak tlat bawk si nèn, ka hnial zui zêl duh ta lo a ni.

A naute hmun dangah lehkha zir leh hna thawka an awm daih avàngin a nu leh pate chauh an lo awm a, kan thlen chuan min lo làwm thiam khawp mai, a nuin thingpui min lo pe vat a, a pa erawh chuan nui var var chungin min lo fiam hlut thung, a nu chuan," I tizak ang e, nuam lo a tih vaih chuan..." tiin fiamthu hian a lo khap a, Mala chuan," Ni e, duh tâwk rih ila... Nunui pawh a chàu ang, inbual se, chaw ei kham lamah in la titi țha leh dâwn nia," a lo ti ve a, mikhual room lamah ka bag a dah lût a, ka zui ve nghâl a. A hma kha chuan an ina thlengah min sâwm mah se thlen kha ka tum hran miah lo kha a nia; mahse, thil a danglam a, tunah hi chuan pawi ka ti tawh lêm lo.

Zanriah ei khamah țhut khâwmnaah țhuin kan titi a, a nu leh pa chu an nèlawmin an fel a, an țawng duh barh barh viau mai. Mala pawh kan bulah chuan a tâp ve reng a, țawng ve vak lêm lo chuan kan titi-ah a lo nui sak sak thung. Ruatsaka puih a ngai lo em maw ni ka ti rilru deuh a; mahse, dâr 8 rîk hma hretin min chhuahpui a, Ruatsakate inah chuan kan va kal a ni.

Kan rei hran lo, kan haw thuai a, a nu leh pate pawh an lo la meng a; mahse, an mu har lo. Mala pawh chuan," I chau dâwn si a, mu hma rawh khai. I mut tam loh chuan i harhvãng thei lo ang a, naktûkah mawi tâwkin i ding thei lo palh ang," nui chung hian a ti a, min en vang vang hnuah," Mang țha mut tui," ti sapin min kalsan zui ta nghâl a.

Mut hmuna phone ka en chuan missed calls a lo awm nual tawh a, mi pawimawh ber ang maia țhiante nèn awm laia phone chhàn kha ka duh loh vàngin ka 'mute' daih kha a nia, ka en dan dan a, Mampuii ka ngaih pawimawh ber avàngin a hming zâwnah chuan ka tàwp ta chat a.

"Kan chhuak daih a, an bula phone khawih ka duh loh vàngin ka 'mute' bawk a. Haw hnuah tihian ka khawih chauh a nih hi, Zara first copy chu a muhìl tawh em ni?" ka ti a, ka nui pah bawk a.

Min rawn chhângtu erawh amah a ni miah lo, U Valpuia aw ngei maiin," A nuam bawk ang chu maw?" a rawn tih dût chuan," Nang..!! Engah nge mi dang phone i lo chhàn ve ngawt?" tiin ka chhuahchhàl zat a," Phone kha Mampuii pe rawh," ka ti zui hlar bawk a, ani chuan," Engati nge --" phone chu ka off zui ta hmak a, ani hi ka biakna chhan tùr ka hre lo va, sawi leh tùr pawh a awm lo, Mampuii alawm biak ka tum. Ani hi, U Valpuia a phone a kawltîr em maw ni teh rêng ni!! Missed call pawh hi U Valpuia min rawn call tumna vek a ni ang maw. Block ka tum deuh thut thut a, ka en vang vang a; mahse, 'êm a' ka ti leh ta deuh, ka chêt duh loh dàn ang deuha chêt ka hmang ta riau hi tu thiam loh nge? U Valpuia vàng vek.

Ruatsaka nupui neih nî chu a nuam khawp mai. Hlim nî a nih angin kei pawhin U Valpuia laka ka thinrimna ngaihtuah chhuak duh lovin hlim tak leh enghelh nei lo ang maiin hun ka hmang a. Inneite leh an țhiante an mawi a, hmuh an nuam a, lawmpuitu pawh an tam. Ka țhiante berin hmun pawimawh lai an chan ve ve avàngin min ngaihtuah viau mah se min ngaihtuahna an ti lang thei rih si lo va, ka mal lutuk a hlauh vàngin Mala'n a nu nèn min inkawptîr a, puitling ka ni ve tawh a, ngaihtuah ngai lo leh mahni pawha tlei rual ka nih tawh nèn, min la ngaihtuah viau chu ka lãwm hlê a ni, mi tam tak kârah mal miah lovin ka awm theih phah si a.

Mite tih dàn angin kan thlalâkho chu story-ah ka hmang a, a hun laia hman hi a hlu ve a, ka chìn țhin chu a ni miah lo. Mak mai mai chu ka tih țhin ni miah lo ka ti ve ta zauh zauh mai hi a ni, social media-a eng eng emaw tàrlan leh thlalâk tàr chhuah hi ka duh ngai lo a nia, a mak ve ngawt mai.

Rini'n ka story chu a lo screenshot a, țhianho group-ah a lo post a, an lo khel nasa mai lo niin. Zàn ka mut dâwnah ka hmu ve lehpek chauh mai. Mala chu min lo dem leh nasa tawh mai a, ka bialpa atân min pawmpui thlap thute, kan din dàn leh Mala min en dàn hrim hrim pawh chu bialpa atân a dik thlap a ni tihte an lo sawi kûr dup mai. Rini chuan Mala din dàn leh a taksa ken kawh dàn hrim hrim, a mit mai ni lo a kut awm dàn thlengin min care-na a tilang a ni tiin, inla detective zet hian a lo sawi bawk a, nuih hi a tiza bâng lo a nia.

Mala pain haw vat a phal loh avàng leh Inrinni a nih tawh tho avàngin ka châm ta rih a, Ruatsakate in lamah hun kan va hmang a, chaw pawh kan va ei leh nghe nghe. Haw thuai an phal loh avàng chuan kan awm deuh reng a, Ruatsaka'n," I lo zin har leh tawh dâwn si a, awm ve reng rih rawh u," a ti tlat a, kei erawh chuan," A âwihawm loh, ka rawn zin leh vat dâwn alawm. Hei i țhianpa hi a hna exam-ah khân a tling dâwn chiang a, kan làwm hup hup ang chu," ka lo ti ve thung a.

"Ni dâwn tak! Ni e, kan làwm nasa ang. Chuan, Țhiana'n hna țha tak a hmu bawk ang a, chumi hnuah ka hnung in rawn zui ang," nui chung hian Ruatsaka chuan a ti a, Mala chuan," Written result êm pawh a la chhuah loh hi maw, chumi hnuah personal interview hmachhawn leh a la ngai dâwn a nia," a lo ti ve thung a, kei chuan," A, chûng te mai mai, i tân chuan a huphurhawm loh thlerh thlerh êm mai, i tling dâwn chiang. I tling ngei ngei ang," ka lo ti ve vat a.

A tûk Pathianni chawhma inkhâwm bànah muangchângin Serchhîp lam panin kan inkhalh chhuak ta a, a hma ațang tawhin min thlah a tum sa hrim hrim a, sumo ticket pawh ka cut duh ta lo a ni, a pain min lo chelh zui ve bawk nèn, ka tifuh viau chuan ka hria.

Ruatsakate nupa chanchin sawiin kan titi dùn a, Mala chuan a nupui nèn an intawn dàn chu min hrilh dap dap a, inkawp lutuk lova an inkawmna chu a lo rei tawh viau ni àwm a ni, nikum  kumtìr lam khân Ruatsaka chuan a duh thu a hrilh ta a, a hmeichhia pawh chuan a lo duh ru ve tho a ni chêk ang chu, an ni chho ta ngar ngar a, tûn hun hi an thleng ta a ni.

"A mak khawp a! Innei tùrte hi chu Pathian hian a lo ruat lâwk thlap ka ti mai, inkawp rei êm êm lo pawh hian an innei mai zêl," ka lo ti a, ani chuan," Pathian ruat han tih ngawt mai hi hriat thiam a har țhìn ka tia; duh deuhte emaw hmangaih deuhte emaw han neih hi chuan kan tâna Pathianin a ruat ni vek tùrah kan ngai a; mahse, a lo ni leh țhìn lo nge ni, kan ințhen leh țhìn bawk si a," a lo ti thung a. Ka han ngaihtuah a, a dik riauin ka hria, Pathian ruat ni ngei tùrah kan inkawp lai kha chuan ka ngai ve tho; mahse, a lo ni meuh lo nge ni, kan boruak chu heti hi a ni ta si a.

Kan thleng har hran lo ve. Mala pawh a awm ve deuh reng rih a, zànriah ei ve tùra ka sàwm erawh chuan min hnialin," Ka awm rei chuan riah maite kha ka duh ang a, a fuh vak lo ang. Ka riah chuan i bula mut phêt kha ka tum bawk ang a," nui chung hian a ti a, ka ner khum zauh ringawt a.

Zànah Mampuii phone call ka dawng a; mahse, U Valpuia a lo ni zâwk a," Engati nge min rawn biak a? Sawi tùr ka nei lo," ka ti hmak a, ani chuan," Nunu, i awm dàn hi i inhmeh ve miah lo aw--" a la tih lai mêk chuan," Hetia awm tùra min siamtu hi tu nge? Min rawn biak chu tum tawh lo mai teh, min bum tawh dáwn chuang lo," ka lo ti leh hmak hmak a, ka hmet tàwp zui nghâl daih bawk. A rawn ri leh a; mahse, ka la duh tawh lo, sawi tùr ka nei lo va, a thu sawi ka ngaithla peih tawh lo bawk. Min la duh reng leh min la hmangaih reng nia ka hriatna khân amah min ngaihtuahtîr leh țan veng veng tawh kha a nia; mahse, ka suangtuahna mai mai a lo ni si, tunah chuan nat nawn leh ka tum tawh lo.

A tûk tlaia ka haw chuan in chung dàwra a hmêl hmuh leh thut inring deuhin ka hawi phwi a; mahse, ka hmuh loh tâkah chuan ka thaw huai mai. Tihian, reh chhunzawm vang vang se, min rawn be tawh lovin a hmël pawh hmu chhunzawm tawh lo ila, a chanchin rêng rêng hre lo ila ka na tawh lo mai ang.

Ka țhianteho lah chuan ka chanchin hre miah lo chuan Mala min rawn dem zauh zauh reng a, a chanchin ka hrilh ve vek tho si a, 'hna țha tak a neih hunah chuan in innei thei tawh ang a' tiin an duhthusàm an rawn sawi a, Mampuii erawh a rawn lang tam lutuk lo, message erawh a en ve vek zêl thung. Ka zâwt ngai lo nain kan message-te hi U Valpuia a chhiartîr ve țhìn ka ring rilru hial a, a bulah pawh U Valpuia chanchin lam rêng rêng ka sawi ngai lo tawp, ani pawhin min sawipui ngai lo, ka ring chhe viau a ni tih hi hria se min ngei ngawt ang chu!

Mahse, reh rei zawng a tum awzâwng lo lo niin, Zirtàwpni tlaia ka haw, ina ka luh hnu deuh chiahah a rawn lût ve ta mai a nih chu! Ka lo melh rulh ringawt a, biak pawh ka be lo, amah zâwk chuan," Thil sawi dun a ngai," a rawn ti sup a, țhutna lam a pan zui nghâl a. Kei chuan," Sawi dun tùr kan nei lo," ka lo ti ve thung a.

"Ka sawi tawh kha, i lakah hian beidawn ka tum lo, engtia rei pawh beih ngai se ka bei ang a, engtia rei pawh nghah ngai la ka nghâk mai ang che," a ti dap dap a, insehruh țeuh hian ka en reng a, chhàn erawh ka tum lo, țawng ka tum lo a ni ber mai. Ani hian sum vàng mai maiin min kawp leh a tum a nia, a pawi thui hmain ka hre chhuak ta hlauh zâwk a...

"Eng ka sawi ber khân nge i thin tirim viau? Min han hrilh teh, i sawi chian loh chuan ka hre mai lo a nia, bâkah, i lakah hian ngaihdam dìl a  ngaih chuan dìl che ka hreh rêng rêng lo. Han sawi la, ka lo ngaithla ang," a tih leh pawh chuan ka ngawi reng a, sawi ka tum lo, a duh leh kal daih se, a pawi lo.

"I ngawih reng chuan ka hre thei dâwn lo a nia, thil rêng rêng hi hriat sual a awm ve thei a, sawia fel thei tam tak a awm bawk a ni. Han sawi rawh le, i fel kha," a rawn ti leh a, ka va han ngei duam duam tak!! A han hre lo der vêl a nia.

Ţawng loh ringawt chu dikin ka hre lo leh ta deuh a, "Rawn kal tawh suh," ti chauhin ka chhâng ve ta a, en pawh ka en duh lo, hetia a duh duh huna min rawn chingphùl tùr hi a ni lo hrim hrim, ka bialpa pawh a ni lo va, a duh duha rawn kal tum ringawt mai, ka ngaih dàn a ni lo.

Thinrim awka hriat tùr awm miah lo hian," I thinrim tlat si a, a chhan zawh dâwn che lahin phone-ah lah min biak i duh bawk si lo va," a ti dam thlap a, kei chuan," Sawi dun tùr nei lo miau hek," ka lo ti nghat thung a. Ka la inthlâk fel loh vàng chuan inthlâk ka duh tawh viau mai a; mahse, inthlâka kal daih chu a fuh ka ti chiah si lo, min rawn luhchilh ve ta se...

"Nunu, a chhan ka hre lo a ni, min hrilh loh chuan hetia i awm chhan hi ka hre lo."

Sual zet hian," I hriat kher a ngai lo, hria pawh ni la awmzia a awm ngai dâwn chuang lo, engtikah mah. Chu vàng chuan, haw vang vang la, rawn kal ngai tawh suh," ka ti ta khawl khawl a, hetiang tak hian ka lo țawng ngeiawm thiam tih ka inhre thar ve chiah, a dawngtu tân chuan a hrehawm duh ngawt ang le.

A ngawi ta rauh rauh a, tlêm chuan nuam lo ka ti ve deuh. Ka nun hi a lo rãwng ve thei viau chu a lo nih hi, ka țawng chhuak khân a tawk ve a ni ngei ang, a ngawih reng dànah. Ni e, na ve rawh se, kei pawh min tikeh chhe vek a, ka nat dàn tùr kha hre thiam ve rawh se.

Rei tâwk tak kan ngawi dùn a, amah zâwk chu rawn țawng chhuak hmasaa țangin," I ti tak tak em?" tia ka lam a rawn hawi chuan țawngkaa chhâng lovin ka lu ka lo bu ringawt a, thovin min rawn pan hnai a, ka lo en reng a, ka bulah chuan dingin," Thil pakhat chiah ka zâwt ang che aw. Chumi hma chuan hria la ka duh chu... ka hmangaih reng che tih hi," tiin a ngawi dat phawt a, chutah," Dik takin min chhâng dâwn nia, chumi hnuah chuan ka chhuak vang vang tawh ang a, ka rawn tibuai ngai tawh lo ang che. I thinlungah hmun ka la chang em?" zàwi sap hian a ti leh a, min en chhuk ràn mai si a, ka mitmeng ațang chuan min hriat chhuah ka hlauh avàng chuan hnuai lam enin," Bialpa dang ka nei tawh," tiin ka chhâng ta daih a.

A hmêl leh mitmeng ka en loh miau avàngin a rilru tùr ka hre thei lo va, chutia ka hrilh teh khawl pawh chu hrehawm a ti ve maithei, a din ngai chuan a ding deuh reng a, ka hmêl ațangin thu dik ka sawi nge sawi lo a en dik a ni ang chu, a din chhûng chuan ka che sawn duh bîk miah lo va, a hnu deuhah chuan," Ka tih palh aw, ka tihbuaina zawng zawng cheah min ngaidam hrâm dâwn nia," a ti sup a, inherin a helmet a la a, a chhuak zui ta nghâl a.

Che lovin ka ding reng a, tunah chuan a tàwp ta, ka duh ang ngeiin engkim a tàwp ta vek e; mahse, ka va hlim êm êm si lo ve! Hetiang tùr hi em ni dâwn? Engati nge ka hlim viau si loh?

*I HLAWHTLIN THEIH NÂN  VÀNNEIHNAA INNGHAT LOVIN NASA TAKIN BEI LA, PUMPELHNA TÙR KAWNG ZAWNG BAWK HEK SUH*