☆Mr. BAD(ZAWLAIDI NEITUPA)☆ - 21 By Dingdi Pachuau

☆Mr. BAD(ZAWLAIDI NEITUPA)☆ - 21 By Dingdi Pachuau

Serchhipa ka phei hnu pawh chuan ka be chhunzawm reng a, damdawi in ațanga an chhuah dâwnah min rawn biain," A làwmawm viau rualin a zahthlâk ka ti, kan nufa tâna i thil tih hi ka hre reng tawh ang, ka lãwm tak tak a ni," a rawn ti a, kei chuan," Țhian țha kârah chutiang an sawi ngai lo, bâkah, kan ințanpui lohte'n, ințanpui tawn theia kan awm hi a țha," tiin ka chàwl dat a," Dam taka in chhuak thei chu a làwmawm e, enkawl zui țha la, mei zu khu luih luih bul ațang kha chuan thiarfihlîm hrâm hrâm la aw, ngaihthah chi a ni lo a nia," tiin ka chah zawm leh zat a. Ani pawh chuan," Aw le, ka nute pawh ka hrilh fiah ang a, anni pawh an insùm deuh a ngaiin ka ring. Ka lãwm lutuk tih ka'n sawi nawn leh teh ang, ka mangang leh mal lutuk tùr min rawn riahpuiin min rawn thlamuan a, chu pawh a man a tam tawh tehlul nèn, Bawihtei awm man zawng zawng nèn... A, ka lãwm hi a ni tawp mai, Pathianin a lêt tam takin malsàwmnain vûr mawlh mawlh che rawh se!" a rawn ti leh duah a, a aw chhuak ațang chuan a lãwm a ni tih a hriat ngawih ngawih, hriat nuam ka ti. Ka țanpui viauah ka inngai hran lo, ka țhiannu ve liau liau a ni a, ka tih theih tâwk atân ka ti ve a ni mai. Ka ngaihtuah thui zêl a, A malsàwmna dawnga hêng pawisa ka thawh chhuahte hi ka tân chauha hmang tùr ka lo ni bîk miah  lo a ni tiin, mite pawhin an sum sêngin phal takin mi harsa tak takte an țanpui țhìn a, inte an saksak a, sum tam tak leh tha tam tak an sêng țhìn. An neih lutuk vàng a ni bîk lo, an bula mi harsa leh țanpui ngai an hmu a, an tân malsàwmna nih an thlang a ni zâwk, an ti ropui țhìn ngawt mai. Kei chu ka tla vang vang, mite ka țanpui ve ngai si lo va.

Ka pate ka hrilh hauh lo nain tute emaw kâ ațangin an lo hre ve leh a ni ngei mai, min rawn biain ti țha min tih thu min rawn hrilh a," Mi țanpui thei dinhmuna kan ding hi Pathian malsàwmna a ni ngai, mi țanpui hi hreh miah loh tùr, țanpui ngai ni lova țanpui theitu zâwk dinhmuna din hi a ropui, Pathian malsàwmna ropui tak a ni," tiin min rawn fakin min zilh pah a, kei erawh chuan," Ka țhiannu a ni a, țanpui viauah pawh ka inngai lo, mi dang ni ta se ka ti kher lo maithei a nia," ka ti ve thung a. Ani chuan," E, a ti theitua țan hi a țha ngai, a zawng zawngah chuan kan thei kher lo ang; mahse, kan ban phâk kan bul hnaia țanpui ngai nia kan hriat hi chu țanpui hrâm hrâm a țha, kan Pathian thu nèn pawh a inzawm tlat a ni," a rawn ti leh dap dap a.

Mala lunglêng khawhar pawhin min rawn be kúr dup mai. A ngaihawm lo ka ti pawh a ni lo; mahse, han fiam kual vêl hi nuam ka ti a," Nula hmêl țha an awm lo'm ni? Tlangvâl officer ngat chuan duh duh thlan tùr i hmu țeuh ang," ka ti țhìn a, a duh lo thei viau a ni. Inhnem vak ngaihna awm hek lo le, hetiang zâwng hian ka fiam țhìn a," Rawn zin mai teh," a tih loh leh," Ka rawn zin lawk dâwn zâwk em maw ni?" a ti a, ka nuihpui nasa țhìn a ni. Rawn zin duh viau mah se a hman lo tih ka hre ve kar a, a hna chàwl meuh chuan a rawn lo ang tih pawh ka hria, mi rinawm a ni a, a hnaah pawh a thawk rinawm ngei ang tih ka hria a ni.

Tlai khat ka haw chu ka lu a nuam lo fek fek a, damdawi ei pawh tum lo chuan tui lum leh nimbu tui ka in a, vawiin lama ka mit a hah zual deuh vàng a nih ka ring, chaw ei kham hnu lawkah ka mu ta daih nghe nghe a.

Mahse, a reh mai thei miah lo. Ka lu chu shawl têin mar deuhin ka hrêng a, mut luih ka tum viau pawh chuan ka muhìl thei lo. Damdawi chu va lain ka ei ta nge nge a, puan luma inkhuh hlûnin ka mu leh ta a. Ka mumangah hlauhawm deuh ka hmuh vàngin ka harh a, ka khua a lo sik hluah niin, hei hian min tiharh zâwk a nih ka ring.

Damdawi eiin hnaah erawh ka kal lui tho a, chawlh hi ka hreh ve țhìn êm a ni; mahse, ka tilui thei hlawl lo, ka awm dàn leh mitmeng ațangin U Zari chuan a lo man a ni ang, chhùn chawlh lai chuan," I khua a sik a ni lo maw? I hmai a sen țûn a," a ti a, ka bu nghat a, ani chuan," Engtizia nge chutiangte chu i sawi loh? Khawi maw," tiin ka pang chu a rawn dek a," E! A va sa ve! Engtik ațangin nge a sik a?" a ti leh a, thil awm dàn chu ka hrilh a," Khawsik chung chungin engtin nge i rawn kal duh zâwk a? Haw daih rawh, a hrehawm dâwn êm mai," a ti a; mahse, haw chu ka sawimawi duh lo, ka haw lo ta rêng bawk a.

A tûk lamah erawh ka chàwl a, peih lo chung chungin inentîr tùrin ka chhuak a, ka rin aiin doctor chuan min lo en uluk ve a! Ka Hb a lo hniam deuh a, Ka bp pawh a lo hniam viau mai. Serious viau a nih loh vàngin amdawi min chawh a, kâr khat hnuah kal leh tùrin min ti a, a zo ta dèr mai.

Ka damloh thu chu ka chhûngte ka hrilh duh lo va, ka dam leh vat ka rin vàng leh min ngaihtuah lutuk ka rin vàngin ka hrilh lo a ni; mahse, ka rin aiin ka dam țha har a, ka lute a hai a, ka chau zawi ngawih ngawih ka ti mai, hnaah pawh kal thei lovin ka mu leh reng mai țhìn. Ka khawsik tak erawh hi chu a zia tawh a, ka lu hau leh chau ngawih ngawih hi a ni tawh ber. U Zarite pawhin min rawn kan ve a, ei tùrte min leisak a, an tilàwmawm khawp mai. Inentîr leh tùrin min ti a, ka aw liam ve mai bawk a; mahse, inentîr tùra chhuah pawh peihawm loh tak a ni.

Ka nute pawh ka hrilh lo thei ta lo va, min rawn bia a, ka aw ațangin an man thiam a ni chêk ang chu, ka hrilh chuan ka pa nèn an rawn tlãn ta vat a, Lungleiah min phur pheiin Serkawnah kan lût nghâl a, ka chau ngei mai. Ka bp a lo hniam nasa a, ka Hb pawh a hma aiin a lo hniam leh tawh niin. Kawchhûng lamah thisen pút a awm leh awm loh min check leh a, vànneihthlâk takin a lo awm lo va, thisen unit 2 erawh pêk phawt ka ngai dâwn thung.

Ka nute hi an tizahthlâk ka tia, kan khaw YMA-ah an lo thlen a ni chêk ang chu, member-te thisen min pe tùrin an rawn kal hlawm a lo ni! An ti zahthlâk chu ka ti; mahse, an fanu niin min hmangaihtute an ni a, an mangangin an remhriat dànin an ti ve a ni mai. Ka chhûngte bula ka awm tâk vàngin ka pangchang ta nge ni, a hma aiin ka chauin ka zuau ta zâwkin ka hre lehnghâl a, a zia lo tak tak a ni.

Damdawi inah chuan ka han awm ve rèn ràwn a, mite lo felzia ka hre chiang ta viau nghe nghe a ni. Ka thawhpuite pawhin min rawn kan hman lo nain min ngaihtuahin min rawn phone ve reng a, pawisate an thawh khâwm a, min kan nân an ti a ni. Kan khuaa ka țhiante'n min rawn kan vek a, Rini leh Feli phei chuan min riahpui ve nghe nghe a, mi dang pawhin an huam viau nain in lamah an buai ve tho si a, ka nute'n an hnar haw ta ringawt a ni. Ka rin phâk ngam chiah loh, rin rûk deuh reuh tho siin U Vid-a leh U Valpuia'n min rawn kan a, an rawn luh lai vêl tak erawh chuan ka lo muhìl niin, U Vid-a țawng ri chu ka mang hriat ruai a, a hnu deuhah ka harh ta a. Ka harh hnu chuan min biain nâ ka neih leh neih lohte, ei châk ka neih leh neih lohte pawh min zâwt a; U Valpuia erawh chuan ngawi a dawh a, a țawng àwm pawh ka hre lo. Ka en duh chiah lo va ti ila duh lo pawh a ni chiah lo, ngam chiah lo ti ila a dik zâwk ang chu, a mitah tak phei chuan. Damdawi ina ani kan ngaia ka han awm ta mai hi nuam lo ka ti a, ka bàlin ka hmêl a thû àwm chip chep bawk si a, hun hi kaltîr duak duak theih se ka ti viau a ni.

An chhuah dâwna an din tâkah erawh chuan ka en chho a, U Vid-a ka en phawt a, a dawtah U Valpuia. Ani pawh chuan min lo en ve reng a, a mitah chuan min khawngaihna, min lainatna leh min hmangaihna ka chhiar theiin ka hria!! Rawn kûn hniam deuhin," I lo dam vat dâwn nia," a ti sup a, ka kutah chuan rawn vuanin eng emaw hi a hmeh bel pah a, a kal sawn zui ta nghâl a. U Vid-a chu ka pa nèn inbe pahin an kal dùn a, an lan theih chhûng chu ka thlîr, ka hmuh theih tâk loh hnuah U Valpuia thil min pêk chu ka en a, pawisa a lo ni a, chêng za nga pahnih a lo ni nghe nghe. A ngai lo asin le, min rawn kan nân hun, tha leh pawisa an rawn sêng tawh a, chuta kâra pawisa min pêk leh kher, a làwmawm a; mahse, a zahthlâk, a ngai lo tak tak asin.

Kâr khat deuhthaw ka awm hnuah doctor hnênah chhuah ka dîl a, a la phal lutuk lo nain ka inenkawl țhat tùr thu leh damdawi pawh a hunbî chat chata ka ei tùr thu ka hrilh a, ka ngèn a ni ber ang chu, min phalsak ta hrâm a ni. Rei viau lo mah se damdawi in awm kha ka ning ngawih ngawih hman tho a, ina awma inbual fai har ka châk tawh êm a ni.

Kan khuaah ka haw ta rih a, ka nute'n Serchhipa ka phei nghâl an phal lo hrim hrim a ni. Dam țhat vak loh chuan mahni ina nu leh pa bula awm hi a lo nuam ber mai a nih hi, changkàng pawh ka changkãng chak ngawt ang. Min duat a, ka ei châk min siamsak a, min siamsak ve dûm nain ka ei tam thei chuang hlei lo va.

Ka chhuah zànah Mala'n min rawn bia a," Ka biak hmasak loh che hi chuan min rawn biak hi i tum ve lo rêng rêng, min ngai ve miah lo a nih kha," tiin a rawn vui fiam a," Em maw ni dâwn le?" tia chhângin ka nui a, ani pawh a rawn nui ve leh tho, eng eng emaw kan sawi a, kan inbe rei vak lo. Ka damloh thu leh damdawi ina ka awm thu erawh ka hrilh duh lo va, min ngaihtuahin rawn kal a tum ang tih ka hlauh vàng a ni.

Țhiante leh țhenawm khawvêngte an rawn lang țak țak a, ka țhiante phei chu chhùna an hman loh deuh pawhin zànah chuan ngei ngei hi a ni tawp, Mampuii phei chuan min awmchilh rãwt a, damdawi ina min riahpui theih loh vàng khân a inthiam lo ni berin ka hria. Ka hriat thiam thu ka hrilh viau pawh chuan nuam a ti thei tlat lo va, a haw duh chuang lo, a rilru nawm phahna a nih phawt chuan țha ka tihsak mai.

Tlàwmngaia thisen min petute kha U Mawitea leh Pa Zuiate an lo ni a, ka thisen milpui dangte erawh chu a țhen an Bp a lo dikhlel deuh a, pakhat a hniam êm êm a, pakhatin damdawi ei lai a lo nei bawk a ni àwm e. Pa Zuia leh U Mawitea chuan inah pawh min rawn tlawh leh nghe nghe a, làwm thu ka lo hrilh chiam mai, anmahni vàngin dam țha takin damdawi in ațangin ka chhuah theih phah si a.

U Valpuia pawhin min rawn kan ve leh a, kan in hi ka hriat chinah a rawn kal vawi khatna a ni hialin ka ring! Lo biak deuh chung chu ka inthlahrung deuh a; mahse, damlo zâwk leh kan ngai zâwk ka ni a, min rawn kantu chu ka lo chhawn țhat a ngai a ni, bâkah, min rawn kantu chunga a damlo zâwkin rilru chhe deuh lo putte chu a țha lo, kan inkâr chu eng pawh lo ni se lo biak țhat hi ka tih tùr chu a ni. 

Ka pate pawhin an lo be țha a, Vaimîm leh Nuhnùn hmin mawi deuh hi ka ei atân min rawn ken nghe nghe a, tûn ang laia Vaimîm la awm chu mak ka ti viau mai. A lo kal hnu lawkah Rini a rawn thleng ve leh a, U Valpuia a hmuh chuan a be chûl a. Mampuii nèn an fel a, kan inkâr hretu an ni a, biak dàn chin pawh an hre khawp mai. Rini chuan Vaimîm chu chhum tùrin a siam nghâl a, ka lo inbual fel diam tawh chu ka lãwm khawp mai, bàl pawr thû chip chep deuh kha chuan ka lang tawh dâwn bîk si lo va. Ka pate chu rei lo te hnuah damlo kan tùrin an chhuak ve zui bawk a, Rini fiamthu thawhah kan nui leh vur vur tawh mai, nuih vak tum lo teh mah ila mi tihnuih dàn a hre lutuk a, ka țhen ka țhen mai a ni.

U Valpuia chuan Serchhipa ka phei leh hun tùrte chu min zâwt ve a, ka rin thuin ka chhâng a, Rini chuan," Phei tawh lo ang, mahni chauha awm zawng damloh nikhuain a hrehawm dâwn êm mai," a lo ti a, chutia Rini'n a sawi chhuah tâkah chuan hun kal tawh ka ngaihtuah chhuak zawk mai. U Valpuia damloh lai vêl hun daih kha, ani pawh kha amah chauhin a awm kha a nia, hrehawm a lo ti ve ngawtin ka ring ta. Hetia ngaihtuah mai aia hrehawm hi a nih ngei ka ring, mipa a la ni zui a, awmpuitu nu leh pa a nei si lo, kei chu ka nu leh pate an la dam tal a, min awmpui thei a. 

Mampuii'n," Hawh u, thingpui in tawh ang u, in chhãwl a hãl tawh em?" a rawn tih chuan ka ngaihtuahna ațang chuan ka harh chhuak a, kan lo 'aw' avàng chuan siam tùrin a tho zui ta nghâl a; mahse, Nu Zotei rawn langin nau țap ri kan hre zui nghâl bawk a. Nau buaipui a ngaih tâkah chuan Rini chuan," Ka lo siam ang e, nang chuan ani kha lo buaipui mai la," a ti a, thingpui siam tùr chuan a kal sawn ve leh a.

Thingpui chu kan in a, Nu Zotei pawh chuan a in ve nghâl a, Vaimîm chu tui kan ti tlâng a ni, a tui thu kan sawi sap sap hlawm a. U Valpuia chu," Engtin nge i la neih theih? Tûn anga mi chu ei an tling duh tawh lo riau si a, a kâwm lah hi a țha reuh hlawm bawk si," Rini chuan a ti a, ani chuan," Tlai khawhnua kawm thlanga ka chìn leh hnuhnawh kha an nia, ka keh vawi khatna a ni nghe nghe, rin aiin a him ve reuh a," a lo ti ve mai a. 

U Valpuia chu a rûkin ka lo chîk khawp a, mi dang hmuh loh laiin a nia ka en chîk ni. A lan dàn ațangin a inenkawl țha a ni tih a hriat, a lang fai sar mai a, hàng lam aia ngo lam kha a ni sa hrim hrim a, tunah phei chuan a lang fai zual tawh a ni. Zû a in țhin lai pawh khân bàlin a awm ngai lo hrim hrim a, hna a thawh ve pawh khân a intibàl ve viau ngai lo; a pa kha a ngo vak si lo va, a nu kha a hàng lo a ni ngei ang ka ti rilru țhìn nghe nghe. A lu meh dàn chu a inhmeh ka tia, inhmeh lo tiin sawi lo awm mah se kei chuan a inhmeh ka ti tho ang, a lan dàn fel fai tak ațang hian zu a la nghei tluang zêl a nih pawh ka ring bawk.

Inrinni a ni ve bawk a, U Valpuia pawh chu a lêng ve reng a. Mak deuh maiin chawhnu dâr 2 pelhah Mala a rawn lang ve hlawl mai! "I damlo tih ka lo hre miah lo va, min ngaidam rawh," a rawn ti a nih chu! "Ka bengvâr lo ëm a ni, damlo nâin damdawi inah hial i lût a nia, ka lo hre miah si lo, min ngaidam mawlh mawlh rawh, ka thiam loh liau liau a ni," a ti leh mawlh mawlh a, chhàn dàn tùr min tihre lo zâwk, ka hrilh loh miau chuan ani chuan a hre tawp nâng! Mahse, min demna leh min thiam lohna thu a sawi miah lo.

Ka inlêngte bulah chuan Mala a nih thu chu ka hrilh a, Mala bulah pawh chuan an hming chu ka hrilh zêl a, Nu Zotei leh U Valpuia chu a la hre lo deuh a, Rini leh Mampuii erawh a hre tawh thung a, hlim nui hmêlin a chibai vek a," In fel hlawm hlê mai," te a ti vêl! Mampuii leh Rini'n awmze nei takin min rawn melh dùn ralh a.

U Valpuia chuan din pahin," Ka va haw ve tawh ang e, vawk chaw pêk pawh a hun mai dâwn e," a ti a, Rini chuan," A la hma e, kei pawhin pêk ka ngai ve tho," a lo ti a, kei pawh chuan," A la hma alawm," ka lo ti ve a; mahse, ani chuan," Hun dangah ka lo la lêng leh dâwn zâwk nia," a ti tlat a, kawngka thleng thlah ka duh deuh nain Rini leh Mampuiite ka zah deuh a, ka țhut hmun ațangin ka ding ta zâwk ringawt a.

*I HARSATNA TAM ZÂWK KHA CHU NANGMA INSIAM A NIA, NANGMAH VÊK KHÂN I TITÀWP THEI A NI*