☆Mr. BAD(ZAWLAIDI NEITUPA)☆- 22 By Dingdi Pachuau

☆Mr. BAD(ZAWLAIDI NEITUPA)☆ - 22 By Dingdi Pachuau

Mala chuan ei tùr min rawn lei țeuh a, ei tùr hrisêl leh man to tak tak a ni hlawm bawk a, a insêng țeuh ngei ang. Amah lah chuan," I ei châk zâwng a nih leh nih loh ka hre si lo va, ka rawn lei risk tawp a nih kha. I duh loh leh mi dang pe mai la, i ei châk zâwng chu sawi la, kan lei leh mai dâwn nia," a ti a, ka duh zâwng chu ni hlawm vek lo mah se sawi chi ni nâng, man to takin duhsak takin min rawn lei țàng țáng a, ka ei țeuh mai ang chu.

Kan inah innghat lo thei lo le, room tùr pawh a nei thei lo, thingtlângah chuan in kan neih zau ve viau pawhin mikhual room tùr hi kan nei thei ngai meuh lo va, ka ute pahnih nèn lah khân room kan ințâwm vek a, khum hranah vek erawh kan mu thung. Tunah awm tawh lo ve ve mah se mikhual room tùrin kan la ping dang si lo va, chhuata a mut mai loh chuan... țhutthlèngseia tawngchham deuha muttîr ai chuan tiin chhuatah mutna ka nuin a phahsak a, a lo pui ve vat a, a  inthlahrunawm duh khawp mai. An phah zawh chuan," A va nuam dâwn tak! Khum ațanga tlâk a hlauhawm dâwn lo va," a ti mai a, ka nu chuan," A hrehawm deuh dâwn lo thei lo a nih hi. I rawn kal leh hunah chuan khuma i mut theih ngei tawh beisei ang," a lo ti thung a. 

Ka mut hnuah Mala chuan min rawn text a, *Hmâna Ruatsaka nèn kan rawn riah lai kha ka hre chhuak, a lunglènthlâk reuh mai mai*  tiin, an rawn riak a, chhuatah tho an mu dùn a nih tak kha. Dam chuan hun hi a lo kal chak hlê mai, hmànni deuh lawk kha ni maiin ka hria asin.

Kan țhianho group-ah chuan *A changtupa a rawn lang hlawl mai alawm*  Ruatpuii chuan a ti a, Rini chuan *Loh theih nâng, Officer hmêl țha deuh bialpa tùr ka zawng ve țan dâwn*  a rawn ti ve thung a, Rini vêk chuan *A changtupa a ni bawk a, a rawn intithu râp*  a ti leh a, ka nui sak sak a. Mala chungchâng deuh hlîr mai chuan an titi a, ka inrawlh ve peih lo. Zmi ve thung chuan  *U Valpuia ka khawngaih êm mai* a lo ti ve thung a, Mampuii pawh a lo la meng niin *Khuanu ruat loh tùr hi chu dan theih a ni si lo a*  a rawn ti ve a, U Valpuia chungchâng hi an rawn sawi chhuah kha chu ka ring sa rêng a, an rawn sawi ta rêng a.

*Vawiinte khân in hmu ve lo a nih kha, U Valpuia'n Mala a hmu kha a mittui a tla alawm, a hnâwl hnu khân amah aia țha fê bialpa a rawn nei ta si a, a rilru a nâin a inchhîr a*  Rini'n a rawn ti chu ka nuih a va'n za tak! Ka nui chhuak hawk hawk lo chauh a ni, Zmi lah chuan *A va sad ve! Hnûp hnûp mai dâwn a!*  tiin mittui tla lai lem chu a rawn dah tlar tuar a, Feli chuan *Tunah tak hian a mut hmunah a inchhîr mêkin ka ring. Chuan, a țap maithei bawk*  a rawn ti ve a, zĕldin titi an vawrh chho a, ka duh aiin ka men rei phah lehnghâl zui, a ho tak tak a ni.

Mala chu awm rei thei hek lo le, a tûk chawhnuah a haw phei leh ta lo thei lo va, Thawhțannia Office a kai hman ngei a ngai si a, awm rei thei lo mah se min rawn tlawh chu a ti làwmawm êm êm tho a ni. Ka nu lah chuan a han fak khawp mai a," A fel ka ti êm mai, Officer ni mah se a hawihhâwmin kan level angin min titipui thiam a, a inngaitlâwm bawk si a, mi fel tak leh puitling tak a ni," a ti a, kei pawhin dik ka ti khawp a ni. Sawisèlna tùr ka hre lo, mi fel nih a tling a, a nupui tùr chu hmeichhe vànnei berte zînga mi a ni ngêi ang.

A haw zàn chuan ka nute inkhâwm hlànin Mampuiite nufa an rawn lêng a, naute chhaiha nuihpuiin eng eng emaw kan sawi a, Mala chanchin chu kan sawi chhuak leh ta a, ani pawh chuan," A fel ka ti! Khatiang mipa fel kha pasalah nei la ka tihpui khawp mai che, tûnlaiah hi chuan ani ang kha chu an tam lo ngawt ang, thlah miah suh," a ti ve sap sap a, ka lo nui hak a.

"I ti takzet maw?" ka lo ti a, ka nui pah sûng a, ani chuan," Ti tak tak e a! A duh che tih a hriat reng mai si a, hmeh pawh in inhmeh ka ti," a lo ti leh a, kei chuan," Ka la chhâng lêt miah lo asin, kan la inkawp lo tihna a nih chu. Mãwl min ti em?" ka ti ve thung a, makti meng phâwka min rawn enin," Eng maw?!! I la chhâng lo maw?!! Engtizia nge? In inkawp tawh emaw ka ti char char asin," a ti hluai a, chutah," Engati nge a? A la nghâk reng che tihna...!! Engtia rei nge i innghahtîr dâwn a?" a ti leh zat a, kei chu ka lo thaw hak a," Ka la hmanhmawh duh lo mai mai maw le, bâkah, ka țhianpa ngang kha a ni ve a, ka bialpa a ni thut tùr chu rilru put dàn thiam a har ve dâwn êm asin, thil hmanhmawhthlâk a ni êm êm chuang bawk si lo va," ka lo ti ve thung a.

"I va mãwl tak!! Ti ila, keia lo sawi tùr chu a awm miah lo mai a. U Valpuia vàng kha em ni? I rilru a la dam kim thei lo tihna a ni thei em? Hun a rei ve tawh alawm, i thei êm ëm ang, chhâng ve tawp la, ani chu U Valpuia ang kha a ni ve nâng, i tân pawh hian damdawi țha tak a lo ni thei asin," min duhsak tak chuan a ti a, a thil sawi hi ka hre thiam lutuk tlat. A țhiannu ka ni a, min duhsak a, bialpa țha tak neia pasal țha tak nei tùrin min duh a, ka hre thiam, kei pawhin hetiang rilru hi ka țhiante chungah ka pu rêng a ni.

Ka zia chho viau tawh a; mahse, ka nuin min ngaihtuah êm avàngin hna ka zawm a la phal lo va, 'ni li ni nga ral leh phawt se' a ti deuh tlat a ni.  Kei pawhin a thu chu ka âwih a, ei tùr min pêk ang apiang chu châk êm êm lo chung chung pawhin ka ei ti ila a dik ang, chak chhuah thuai ka duh ve tho si a. Mahnia awma mahni chauha thil ei ai chuan nu leh pa leh țhiante bula thil ei chu a tui duh deuh bawk a, ka Bp pawh a zia chho viau tawh a, ka Hb ber hi a la sâng tâwk hlei thei lo a ni.

Nilaini zànah U Vid-a a rawn lêng ve teh tlat a, ka pate chu an inkhâwm a, an rawn bâng țêp tawh nghe nghe ang. Damdawi ina min rawn kan bâk kha chu a hmêl ka hmu leh tawh lo va, ani pawh hian zu a nghei ve tawh a, Mampuii min hrilh dànin. A làwmawm khawp mai, Mampuii'n min hrilh tirh pawh khân lawmpuina thu ka hrilh nghe nghe a nih kha, a ning ve thei êm mai a, zu a nghei hnuah hi chuan a nupui fanaute tân pawh pa nih a tling thei sawt tawh ang chu.

Țhian dangte an rawn lang rih lo bawk a, ka chanchinte chu min zâwt a, chutiangin kei pawhin zu a nghei chhoh dànte chu ka zâwt a, kan titi dùn nasa viau mai. Thingpui ka pêk a in zawh chuan no chu ka sil a, a bula ka lêt phei leh chuan," Țhianpa hi a reh riauin ka hria, a rawn tlawh tawh che em?" a rawn ti ta a. Min rawn tlawh tawh thu ka hrilh chuan a lu a lo bu nghat a," Eng angin nge i hmuh?" a ti leh a. Zawhna min zawh dàn hre thiam lo deuh hlek chuan ka en deuh reng a, ani chuan," Zu a nghei hnua a hmêl lan dàn hi a nia ka tih chu," a rawn ti leh ta a.

"A lang faiin a hrisèl hmèl khawp mai, a inenkawl țhain ka ring bawk," ka lo ti a, ani chuan," A taksa tichak țha thar tùr khân hna a thawh nasat bâkah exer a la nasa êm a ni. Zîng hma takah thoin a tlãn țhìn a, ngeih pawh hi a ngeih asin, zu in nasa țhìn a ni tih pawh a hriat tawh miah loh hi," tiin, a țhianpa chanchin chu min hrilh a, sawi nuam pawh a ti viauin ka hria.

"Nupui lam hi a ngaihsak vak lo em ni? Mahni chauha awm chu a țha lo e, nupui nei se, a khua pawh a har lo deuh ang a. U Lynn-i nèn khân engti tiha ințhen nge an nih rêng rêng a? An inneih mai ka lo ring a," tiin ka hriat châk chu ka zâwt chho ta a, amahin a sawi chhuak hmasa a, a chanchin kan sawi avàngin kan inkawp leh dâwn tihna pawh a ni lo va, hriat ve hrim hrim ka châk a ni.

"Lynn-ite chu neih chi nâng!"

Ka ngaihtuah a, U Vid-a hriat chian ang tho hian U Valpuia pawh khân a ngaihzàwn țantirh lai vêl khân a hre chiang ve àwm tho si a; mahse, a ngaizâwng duh tho si lai tak kha a mak a ni, U Lynn-i hi chu chhiat chu a chhe lo alawm; mahse, sawi ve sep sep hi a kai deuh tlat mai a, a khawngaihthlâk angreng zâwk asin.

"Țhianpain a țhen chhan che kha i hria em? I ngaihtuah ngai em?" a rawn tih leh chuan ka lo nui hak a," Ngaihtuah vak ngai lovin amah ngeiin min hrilh kha, min ning tawh a," tiin ka chhâng a, ka nuihzat vàng ni miah lovin ka nui lui a ni. Tunah hi chuan nuih luih pawh a har vak  tawh hlei nem, ka thiam ve viau tawh asin.

"Kha kha a chhan a ni lo, kha kha chu chhuanlam mai mai a nih kha, a chhan dik tak záwk chu--" a tih lai chuan kawngkhàr a rawn rì a, ka nu leh pa chu an rawn lût zui ta nghal a, a sawi zawm thei ta lo, awmzia awm tawh lo mah se ka hre châk mai mai asin le. Kan boruak hre hauh lo hian ka pa chuan," E, Vid-a chu i rawn lêng ve ta maw? I rawn lêng khât lutuk a, min haw ta emaw ni ka lo ti rum rum mai asin," tiin a be nghâl bawrh bawrh a.

"A, Mampuii a rawn lang reng reng tho a ka ti deuh maw le, bâkah, ka rawn lan zut chuan Nunui hian min lo nin mai ka hlau deuh bawk a," nui chung hian U Vid-a chuan a lo ti a," A âwihawm loh e! Ninte chu khawi lamah, i lo lèn hi chuan kan phuisui sawt zâwk a ni," ka lo ti ve thung a. Chutiang mai mai sawi chuan kan titi chho leh a, ka nuin thingpui a rawn thli leh a, U Vid-a chuan," Kan lo in tawh asin le, zun zung tùrin ka tho leh sek dâwn a nih hi," a ti a, kei chuan," A ho mai mai, zun tam te chu a țha alawm," ka lo ti leh a.

A fâla awm duna sawina hun awm tawh hek lo le, min hrilh lovin a haw ta a, ka ngaihtuah zui deuh reng a, amah U Valpuia'n min hrilh chhun kha chu min nin tawh thu kha a ni mai a, mi dang chuan ho mai mai pawh an lo ti maithei a; mahse, min țhen chhan a ni miau a, thu tlingah a pawm loh theih loh a, kan ințhen ta rêng a ni. U Vid-a lahin a chhuanlam siam mai mai a nih thu min hrilh leh bawk si a, ngaih dàn siam dàn pawh ka thiam tawh lo; mahse, min hrilh pawh ni se min hrilh a ni ve mai, eng mah a siam țha thei lo va, hun kal tawh lah a ko kîr leh dâwn tawh chuang lo, hria pawh ni ila awmzia a awm lo tihna a nih chu.

Kan khuaa ka awm chhûngin U Valpuia chu a lo lêng leh tawh lo va, kei chhuak ngai lo ta chuan hmuh pawh ka hmu chhunzawm tawh hek lo. Pathianniah erawh ka inkhâwm ve hrâm hrâm a, mite țhatna ka hre chiang chho zêl bawk. Ka biak ngai lêm lohte pawhin," E, kha i țha tawh maw? A làwmawm hlê mai," tiin min  be thei zêl a, an bengvâr ka tih rualin mak ka ti a, zahthlâk ka ti ru viau bawk, ka fel loh tehlul nèn, miin min lo ngaihven viau chu mak ka ti lo thei lo, ka tluk loh hlawmzia ka hre chiang viau tawh a ni.

Thawhțannia ka phei tawh dâwn avàngin chawhnu lamah țhiante an rawn kal khâwm a, min thlahna hun an rawn hmang a nih deuh chu. Ei tùr kan siam a, ka phone camera a rim malh malh viau mai. Hruaii chu Pa Zuia'n a rawn phone ve ngei a, loud-speaker kan on-sak a, kan lo ngaithla ve vek pek a! Tu mah kan țawng ri lo, Pa Zuia chuan lènpuiah a rawn sâwm ve ngei a lo ni.

"Naktúkah Nunui a phei tawh dâwn si a, inthlahna hun kan hmang a, ka hman àwm lo, lo kal ve zâwk la?" a tih chuan ani chuan," In țhianho bula awm ve kur chu a zahthlâk àwm êm mai a," a rawn ti phawt a, chutah," Thil pawimawh deuh sawipui pah che ka duh asin le," a rawn ti leh a, Hruaii chuan," A nih tak chu maw le, a hmanhmawhthlâk viau em?" a ti ve a, ani chuan," A, i hman remchàn loh chuan..." a rawn ti ve mai a, "A hmanhmawhthlâk viau loh chuan hun dangah min sawipui mai la tiraw? Hun kan nei dùn tawh dâwn lo tihna pawh ni hlei lo," Hruaii chuan a ti a, kan lo nui țha hlawm a, Pa Zuia chuan," Nia... mahse, ka hmuh loh rei deuh hlek che hi chuan ka ngai veng veng zêl che a, tunah tak pawh hian ka ngai leh tawh che a," a rawn ti ta a nih chu! Meng zau kâwk kâwk hlawmin kan hmui kan hup a, tlangvâl senior lunglêng thu sawi zet chuan a va thawk țha tak! Hruaii lah chuan," Min ngaih vàng a lo nih chiah chu ka hnute hmùr a thak ni!" a'n ti leh zui a, kan insûm thei ta lo, kan inbêng ta awk awk hlawm a, nuih leh țè vak erawh kan la ngam lo. A thil sawi chu a inhmeh lo êm lah tak a, a, a inhmeh lo hi a ni tawp mai! A han țawng over lui ve deuh bawk a, hun remchângah innei thuai teh se.

Nui var var chung hian loud-speaker chu a off a, a off hnu chuan an inbe rei tawh lo, an inbiak tàwp dâwna," Um... min lo sâwm la aw, Chhe-lo-pa, muah..." a tih chuan kan va khĕk ring tak! Over mai sia maw, Zmi chuan uak der tuar tuar pah hian," Ka va han ten ber mai tak!!" a lo ti a, Rini pawh chuan," Over dùn lutuk mai! In țawng hriat pawh khân ka lo zak!" ten hmèl taka ner nâng nâng chung hian a lo ti ve bawk a.

"In ninawm, ka awhthîk che u a nih kha, nei ve lo hi chu khati mai ang," Hruaii lah chuan a lo ti mai a, hnial tuma Zmi àn zuau lai chuan," I star khân bialnu nghet a neih kha aw, i chang lo," a lo tih khalh leh a, Rini chuan," Ui...a țawngkamte hi, mi zawng zawng Pa Zuia, kan têt lai ațanga tlangvâl tawh leh tûn thlenga la tlangvâl tho, nula kawp tùr a hmuh zawh loh vànga tlangvâl senior over, nula kawp tùr a hmuh theih nâna kohhrana inhmang der leh inla fel chawp a kawp tâk ațang hian a over mah mah chu a ni. Tu mahin kan chuhpui dâwn lo che, ani angte hi chu e duh ila chuan khaw tinah, vêng tinah kan hûng fer fur ang chu!" a rawn ti ta zêk a, a sawi duhthawh bawk si a, kan va nuihpui nasa tak! Dulthuar na ûrhin a ni kan nuih ni, Hruaii lah chu a làwm ber berah a la țang zui bawk a, kan nui thãwm lo hretu awm ngat se chuan kan nui nasa lutuk chu mak an ti hial zâwk ang.

Zànah U Vid-a a rawn lang leh nawlh a, a rawn kal hma bawk si a, mak ka ti deuh hlek, inkhâwm ka tum rilru ve deuh a nia; mahse, ka țhulh zui leh ta nghâl a, ani chuan," Ka rawn lèn hma deuh loh chuan ka lêng rei hman dâwn si lo va. Naktûk lamah i phei daih tawh dâwn bawk si a, ka hman laia rawn thlah che ka duh a," a ti mai a, ka pa chuan," E, i va fel ve! Lo awmpui tak rawh, kan va inkhâwm ang e, lo lêng reng la aw," a lo ti ve a, rei lo te hnuah inkhâwm tùr chuan an chhuak zui ta nghâl a.

Chaw ei kham thingpui hâng pawh a la in ka rin loh avàng chuan ka han thlit a, ka va pêk chuan," I phei ang a, Krismas-ah chuan i rawn haw leh thei ang chu tiraw?" tiin min lo zâwt a, kei chuan a epa țhut pah chuan," Dam chuan thei tùrah ngai ang," tiin nui chung hian ka chhâng a, a lu bu nghatin thingpui chu a in hlek a.

"I zia chho zêl tùrah ngai ang. Nang hi chu ka nau anga ka ngaih i nia, Mampuii ang maiin, ka nau ang tak takin ka en che a ni. E, Mampuiite nufa chunga i thil tihte vàng pawh khân làwm thu ka la hrilh miah lo che, a làwmawm lutuk, țawngkam hi ka thiam ve vak lo va; mahse, kan lãwm takzet a ni, engtikah mah kan theihnghilh ngai lo ang," a ti dap dap a, kei chuan," A, khatiang kha chu sawi chhuak lo ang, ka lo remchàn lai tak a nih vàng mai a nih kha. Han sawi chhuah pawh hi a zahthlâk," ka lo ti a, sawi chhuah nuam ka ti lo tak tak a ni. 

"Um, ka sawi chhuak tawh lo ang; mahse, kan lãwm êm êm a ni tih erawh ka'n sawi lang leh hrâm ang e. Kha lam kha chu duh tâwk ila, hmân zàn ka rawn lèn zàna ka thil sawi ûk, ka sawi hman leh tâk si loh kha, Țhianpain a țhen chhan che kha ka'n hrilh ang che," tiin thingpui chu a dût leh hlak a, kei pawh chuan amah chu ngun taka enin ka beng chu ka lo chhi kar nghâl a.

A sawi hma chuan thâwk a la huai phawt a," Hun kal tawh chu ni mah se i hriat ngei hi țha ka ti a, bâkah, i phû ka ti bawk. Ka hrilh che avàng hian inzui ula, inkawp leh rawh u ka tihna lam erawh a ni lo a nia, kawp lai pawh i nei tawh ang a, kha lam kha chu eng mah buaina a awm lo," tiin a han chàwl dat a, sawi zawm lehin," A ning tawh che tih thu kha chu a hrilh ngei mai che a; mahse, kha kha chu chhuanlam tùr a hriat chhun takmeuh a nih vàng a ni. Zàn khat a rùi haw khân a nu leh pa fa dik tak a nih ve loh thu a hre chhuak ta tlat a, ama sawi dàn takin a rui a reh nghâl vek a ni àwm e; mahse, eng mah min hrilh nghâl lo, in ințhen  tih ka hriat hnuah daih min hrilh a ni. Chumi zàn chuan phone pawh min rawn phone nghe nghe a; mahse, eng vak a sawi lo,' Țhianpa, engmah ngaihtuah lova ruih hnâp ka duh,' tih zawng hi a rawn sawi a, in inhnial buai deuh ang a, a rilru a nâ deuh a ni ang ka ti mai a, a rawn kal a, ka pe ta nghe nghe. Haw pawh haw lovin ka bulah a riak ve ta ringawt a; mahse, a muhìl hauh lo tih erawh ka hria. Eng mah min hrilh loh avàngin ka zâwt duh lo va, min hrilh hun a tihah chuan min hrilh mai ang ka ti tlat a. Chuta țang chuan zu a in nasa zual ta sauh a, Lynn-i nèn ka hmu dùn ta zauh zauh, mak ka ti viau nain eng mah erawh ka zâwt lo."

"Zàn khat chu a rui sual deuh nge, Lynn-i chu rûkpuiah min sâwm ta tlat a, a awm dàn chu ka hre thiam lo viau a ni. In la inkawpin ka hre bawk si a, Lynn-i rûk a duh chhan chu ka zâwt ta nghe nghe a, eng danga min chhâng lovin,' Nakinah i hre mai ang,' a ti ringawt a, in ințhen tawh a nih ringin chutia min sâwm ta chu ka kalpui ve mai bawk a; mahse, inrù pawh ni chiah lovin zàn khat chu thlâmah a tawmpui niin a sawi. Lynn-i chu neih duh tak tak chi ni hek lo, inkawp ang chuan an awm chho ta tho a; mahse, inneih lam chu sawi rîk a awm lo va, palai tirh pawh a awm hek lo."

A ngawih vang vang lai chuan ka lo thaw dèp dêp a, a nu leh pa fa dik tak a ni lo tih a hriat chhuah zàn chuan hrehawm a tiin a rilru a buai vek dâwn tihna a ni a. Kum kha leh chen a nu leh pa leh chhûngte anga a lo neihte chu a thisen zawmpuite an lo ni dâwn hauh si lo. Engtin tak nge a chungchâng an sawi dàn chu a hriat ang le? 

A rawn sawi zawm leh a," In ințhen hnu daihah thil awmzia chu min hrilh ta a, a țhian țha ber ka ni a, a thurûk chu min hrilh ta chauh a ni. A țhen che tih min hrilh a, a chhan ka zawh chuan i tân tling lo, ngaihzàwn tlâk lo niin a inhria a, tu fa nge, tu nge a nu leh pa pawh hriat loh a nihna chu nakinah hriat chhuah hun a la awm dâwn tho thoin a hre si a, chu a mualpho hunah chuan zahna a thlensak dâwn che a, chu vàng chuan chumi hun a thlen hma ngeia bànsan theih che chu a tum ta a ni, bâkah, i nu leh pate'n amah chu an pawm thei ngai lo ang tih a ring tlat bawk. Chu chuan a rilru a awp bet tlat a, eng thil dang mah ngaihtuah thei lovin hma hun êng nei thei ni pawhin a inhre thei lo. Lynn-i a lo birh tlut tlut chhan leh a lo tawmpui chhan pawh kha mi sawi hre ngei la a tih vàng a lo nia, nangin i lo hriat chuan i țhen vang vang thei dâwn tih a hriat vàng a ni. Ama ngaih chuan rem a lo ruat ve thlap a nih chu."

A ngawi leh deuh vang vang a, U Valpuia tak chu aw... chutiangte chu a țantìrah khân sawi se emaw lo hria emaw ila chuan ka hriat thiam dâwn tehlul nèn, min țhen pawh lo tum eng ang mah se ka vuan tlat tùr hi a nia...

"A țhen tawh miau che avàngin sawi buaisak ka tum lo va; mahse, ka khawngaih ve ve tho si che u a, a bulah pawh,' Thu dik tak i hrilh mai lo va,' ka ti nghe nghe a, ani erawh chuan,' A, tikhân a țha, a rilru a na dâwn lutuk tih ka hre tho a; mahse, ka kalsan ngei a ngai, eng mah sawi lova kalsan tawp ai chuan tikhân a țha, a tân eng mah ka lo ni si lo va, khawi ațanga rawn piang chhuak ve nge ka nih hriat a ni ve si lo,' a ti a, amah a inkiltawih a, a inhmu hniam a, mi zînga awm ve tlâk lo hialah a inngai niin ka hria, a nu leh pate duh loh kha a ni tlat bawk si a, han sawi ve sateh mah ila thu dik a nihna chu a bo thei chuang lo. Ka khawngaih khawp a; mahse, tih theih rêng ka nei bawk si lo."

"Zu a in nasa telh telh a, kei pawhin ka in tho a; mahse, ka zilh ve zauh zauh, zilh ve tho țhìn mah ila a sâwt lêm lo. A rilru natna ril tak kha ka hriat thiam phâk loh leh ka zu hnem phâk loh thil ka ti mai, khuareiin a tidam mai ang chu ka ti ta ringawt nghe nghe a. A pa khân a duatin a hmangaih țhìn hlê a, ani pawhin a hmangaih tih ka hria; mahse, khami hnu ațang khân a inla hrang ru ta viau a ni tih ka hria a, ka zilh nghe nghe a ni. A pa thih hnu, tlêm lai deuh lawk khân a unaute'n a in hi rawn chuhpui an tum deuh niin ka hria, mak ka ti asin aw.  Chuan, a sawitu a sawi fak lo nain ka rin dànah chuan an unau zînga upa ber sawi a hriat a nih ka ring, a nu leh pa fa tak tak a ni lo tih kha maw, a chhan pawh khatih hun lai khân a rawn zin tlat a ni. Țhianpa pawh thiam a inti chuang lo, a rui ve reng a, a pa thu pawh a âwih zo thei bîk lo va. Khami denchhen khân a u chuan a pa bulah,' Kan unau tak tak a ni lo va, kan thisen zawmpui lah a ni hek lo, tu fa nge tih pawh hriat loh leh a nu leh pa lah tute nge tih pawh hriat loh kha khawngaihin fa atân leh nuța atân kan la a, hetianga zu in reng mai leh chhúngkaw tihmingchhetu ni ta reng mai chu, zilh hrep la, a nihna dik tak pawh hrilh hmiah mai rawh, a țùl phei chuan in ațanga hnawh chhuah daih pawh a pawi lo,' a ti niin a sawi a, a zak a, hrehawm a tiin zu pawh nghei chu a duh ve țhìn; mahse, a rilruah a nu leh pate fa tak tak a nih lohna chuan a ngaihtuahna a luah zêl a, thil dang a ngaihtuahnaah a awm thei lo, chu vàng tak chuan harhfîma awm kha a hlau a ni. A pa kha chuan a boral nî thleng pawh khân a fapa a ni lo tih leh a thisen zawmpui a ni lo tih a sawi chhuak miah lo va, sawi ahnêkin hmangaih takin a fapa dik tak angin a pawm a, a hmangaih a, a duat a, a zu in erawh a țhat loh thu a hrilh ve fo thung," a ti leh dap dap a.

Ka rilruah zawhna tam tak a awm a; mahse, chhàn theih a ni lo, U Valpuia chuan min chhâng thei maithei a; mahse, zawh chi a ni lo. Bâkah, tunah chuan inbiakna chhan tùr kan nei tawh lo va, thu dik ka hriat tâk avàngin thil awm dàn a danglam thei tawh chuang lo, a nih tùr ang ang a ni vek tawh a, koh kìr theih lah a ni tawh hek lo. A haw dâwna," Țhianpa chuan ka hrilh che tih hi a hre miah lo ang, hria se chuan hmuh leh che pawh a duh tawh lo hial maithei a ni," a tih chu ka ngaihtuah chhunzawm leh a, eng ang fakauah nge min ngaih ni? Mi pângngai, mihring, Pathianin duh taka a siam tho a ni a, inen hniama inkiltawih viau tùr leh inthlahrung ëm êm tùr a ni bîk em ni? Eng nge ka zahawmna chu, engah nge min hmuh a duh tawh loh ang?

Serchhîpa ka phei hnu pawh chuan chu chuan ka ngaihtuahna a luah zui zêl a, min luh ngut ngut a ni ber mai. Zîng ka thawh hlim leh zàn ka muthilh hma zawnga ka ngaihtuah a ni, thil dang ka ngaihtuah thei lo. 

Mahse, ka ti mai mai a, chutiang chu lo ni ta se, min kalsan kha ngai a ti a, min țhen ta a, chumi hnuah min rawn hnaih kha a tum leh bawk si a, kha kha eng nge a chhan ni ang? Khatiang thu tlûkna harsa tak a siam rup tawh hnuah min rawn hnaih leh a tum a ni si, kha kha sum vàng kha a ni tak tak ang em? Mahse, min hnaih kha a duh tawh bawk si lo va... a, ka ning êm mai, ka buai zo vek, U Vid-a khân min lo hrilh lo tawp zâwk se ka va ti tak!

*I HUN KAL TAWH KHA I NUN RENG DÀN TÙR A NI LO VA, TUNA NANGMA NIHNA TEHNA TÙR PAWH KHA A NI HEK LO*