☆Mr. BAD(ZAWLAIDI NEITUPA)☆- 23 By Dingdi Pachuau

☆Mr. BAD(ZAWLAIDI NEITUPA)☆ - 23 By Dingdi Pachuau

Ka taksa a dam țha chho ve zêl a, ka tâna damdawi țha tùr nia a hriat apiang hi Mala chuan min rawn hrilh loh leh min rawn leisak a, min tlawh pahin a rawn keng mai a, min leisak tawh lo tùra ka hrilh lah chuan," I dam țhat thuai thuai ka duh alawm," a ti mai țhìn a, min ngaihtuahna leh min ngaihsakna chu a làwmawm viau rualin a zahthlâk deuh ka ti țhìn a, a rûkin ka inthlahrung thei viau a ni. 

Ni khat chu ka hnaa ka kal ka haw lamah pitar èm phur, chawhmeh zuar ni àwm tak hi ka hmu a, a tar ve tawh viau a ni ang, a kal pawh chu a kûn tawh khawp mai; mahse, chuti chung chung chuan èm phurin chawhmeh a la zuar kual chu a ni àwm si a, scooty tiding meuhin ka en zui zêl a, a hmêl ka hmuh chian theih hnu chuan kan khuaa Mual vêng hmeithai Pi Bûki ang ka ti ta riau a nih chu. Ka en reng a, a hralh zo țêp tawh tih a hriat a, mamawh êm êm lo mah ila a khawngaihthlâk reuh ka tih vàng leh kan khaw mi ang ka tih vàng chuan a chawhmeh zawrh têl thum lai chu ka leisak ta nghe nghe a, ka lei zawhsak tihna a nih chu. Têl thum chêng 150 man a nih laiin chêng 200 ka pe a, min kìr a tum teh nain," I zuar hah êm mai, kìr ka ngai lo a nia," ka ti tlat a, min en há hâ pah chuan làwm thu min hrilh malh malh a.

Kan têt deuh lai khân kan khuaa mi harsa deuhin thlai emaw thei emaw an rawn zawrh rêng rêng hian ka pa hian," Kan mamawh viau loh pawhin a zuartute dinhmun azirin leisak zêl tùr," a ti țhìn a, keini aia harsa ve lehchhâwngte, harsa ve tak takte thil rawn zawrh hi chu lei lohin kan chhuah ngai lo ti ila a dik ang. Bazár vêla chawhmeh ka en pawh hian a zuartute, berh ve hmèl deuh ber tã kher hi ka lei ve țhìn, kan țanpui ve theihna a ni ka ti țhìn.

Inrinniah ka thuamhnawte ka su ve a, sa ka ei châk ve deuh avàngin lei tùrin ka chhuak a, chawhmeh dang phei chu ka lei tawh lo, nimin lamah ka lei tawh tho a, Alu, Dãl leh Artui ka la nei bawk nèn, ka ei tam si lo va, thlai hnah lam phei chu dah țhatna tùr Fridge ka nei ve bawk si lo va, ka inlei khâwl ngai meuh lo. Zanriah ka ei hma deuh hlek a, ka sa siam chu ka ei châk ang chiahin ka ei tui bawk. Ka ei kham deuh chiah tihah Mampuii'n min rawn bia a," En teh, mi bo kan nei!" a rawn ti teh tawl a, kei chuan," Eng maw?!! Tu nge bo? Hruaii em ni? Awiii, an va hmanhmawh ve!" ka lo ti vat a, ani chuan," Ni lo ve, vawiin chhùn vêla bo kha ni àwm tak a ni, naupang a nia, Mual vênga Pi Bûki tupa kha a nia," a rawn ti leh a, ka meng phâwk nghâl hrú mai. Niminah ka ngaihtuah ngai lêm loh kan khuaa mi Pi Bûki ang deuh pitar pakhat ka hmu a, ka hmuh vawi khatna a ni nghe nghe, tunah Pi Bûki tak tak tupa bo thu ka hre leh a, eng nge a awmzia ni ang? Thil intawng fuh palh mai mai a ni ang em? Ni dangah hetiang thil hi ka la tawng ngai si lo.

Mi hrilh dàn chuan Pi Bûki tupa Lalchungnunga chu a țhiante nèn sava an veh a, kan khua ațanga hla lo tê Chite lui bulah a ni nghe nghe. Mi dài dar loh ram a ni lo va, thing rah tlàn sava a tam țhin avàngin mipa naupang hian an tlawh nasa bîk țhìn; mahse, a hmun hi a áwih ve deuh bâkah khàm pawh a awm ve nual a, a tla palh a nih an ring deuh fur nghe nghe tiin min hrilh. Tunah hian zawng tùrin tlangvâl an inhàwr khâwm mêk a, a țhente phei chu an kal tawh a ni àwm e. U Valpuia chu a kal leh daih tawh ang chu, ani hi zawng tlàwmngai ngang hi a ni a, hmeithai tupa ber kher a lo ni zui nèn, kan khuaah laina hnaivai tak tak an nei àwm si lo va, chu chu a hre ve kar dâwn. Tunah phei chuan amah pawhin laina hnai tak tak nei lovin a inhre tawh ngei dâwn a, mi bo a hmuh hma chuan a beidawng duh hauh lo ang le.

Kan khuaa awm ve ang mai ka ni, zàn ka muhìl thei bîk lo va, chanchin chu ka ngaichãng reng a; mahse, an la hmu rih chuang lo. Țhutthlèngah chanchin ngaichàngin ka țhu mu a, zankhuaa an zawn pawhin an hmu thei rih chuang lo a ni. 

Hnaa ka kal pawh chuan kan mi bo chu ka ngaihtuah zui reng a, rilruah thil dang a awm thei chuang lo. Mimal takin amah ka va hria pawh a ni chuang lo; mahse, kan khuaa mi bo a ni a, a pi lah kan khaw mi dik tak a ni si a, rilruah a riak ve reng lo thei lo a ni.

Tûnlaiah social media a chak tawh a, eng emaw thil thleng hlek hi chu a darh nghâl zêl a, kan khua chu thingtlâng khua mah ni se chanchin thar lamah pawh mi bo awm thu chu ka hmu ta chuai chuai mai. Ka pate pawh ka bia a, ani pawh chuan a chesual palh a nih a ring a, ka nu erawh chuan Khawmu chawi a nih a rin thu a lo sawi thung a, ka nu thil rawn sawi ațang chuan ka harh kuar mai, chu chu a ni ngei ngei ang. 

Mala pawhin a lo hre ve a, min rawn zâwt chiang ve ngei a, ka nu sawi ang chuan Khawmu chawi a nih ka rin thu chu ka hrilh ve a, ani lah chuan," Tûnlaiah chutiang an awm tawh lo ang," a lo ti deuh tlat thung a, kei erawh chuan," A la awm ve thei tho aw. A sava vehpuite'n a sava perh thlâk a chharna nia an sawina hmunah pawh a hnuhma hmuh tùr pakhat mah a awm lo, an dai dar vrk tawh. Lo chesualin emaw khàmah emaw tla palh pawh ni se a au ri hriat tal tùr a nia, tu mahin an hre bawk si lo a ni," inti hre tak chuan ka ti ve thung a.

Zàn ka mutnaah ka hlau ta deuh tlat pek a nih chu!! Ka hawi kual deuh hrek hrek a, Khawmu chu a rawn kal ve ka hlau a ni ang chu, ĕng pawh ka tithim ngam lo va, zàn danga ĕnga muhìl thei ngai lo kha thimah ka mu ngam ta lo a ni. Ka hlau tih sawi chu ka hreh ve deuh si a, Mala ka be deuh reng phawt a, a hnuah Mampuii ka be leh bawk.

Chanchin min rawn hrilh zêl a, ka rin ang ngeiin U Valpuia chu a lo hah leh viau rêng a ni. Chawlh pawh a chàwl ve meuh lo va, khaw hrang hranga tlangvâl, rãwlthar leh pa chenin, tlàwmngaia thawk chhuakte nèn zàn lamah pawh an la zawn zêl avàngin a chàwl thei bîk lo va, mutna hun pawh a la nei lo. U Vid-a nèn an inkawp a, khàm leh hmun biru lai deuh pawh an dap kim ve viau tawh a, sava a chharna hmun nia an sawi phei chu an chîl phùl viau tawh; mahse, chuti chung pawh chuan a hnuhma àwm an hmu thei chuang lo. Sawi vak lo mah se mite pawh chuan Khawmu chawi a nih an ring deuh fur tawh niin a sawi a, amah ngei pawh chuan a ring ve tawh a ni.

Thawhpuite pawhin min han zâwt ve a, youtube lamahte an lo en ve a lo ni a; mahse, anni aia ka hriat tam bîk chuan loh avàng chuan rin dànte kan sawi khâwm ta mai mai a, sain a seh a nih ring an awm a, ru botu an awm a nih ring an awm leh a, Khawmu chawi bo a nih ring kan awm leh bawk a, thu dik la hre thei hek lo, kan rin dàn chu dik ber ni àwmin kan sawi vek mai a ni.

Thil dangin rilru luah thei hek lo le,  kâr tàwpah ka haw ve ta ringawt a, a kárleh Thawhțanni chawlh a ni tho si a ka ti a ni, ka pa lah chuan min lo làwm êm êm a," Khaw lam i rawn ngaihsak a, a țha, hetiang tùr hi a ni," tiin min lo fak a, ka nu erawh chuan engtin mah min lo ti hran lo.

Zànah țhiante nèn Pi Bûkite inah kan kal khâwm ve a, lêng pawh an awm țeuh mai. Pi Bûki tê chu a țap keuh keuh reng a, a khawngaihthlâk ka ti khawp a ni, Lalchungnunga nu leh pa pawh lo awm ve tawhin anni chuan inlêng min lo chhàwn a, an rilru a hrehawm ve ngawtin ka ring a ni. In chhûnga kan len ve loh avàngin kawta Silpauline zàr hnuaiah chuan kan țhu phawt a, a hnuah thingpui lum kan pui leh ta daih a. Tlangvâl tawh phawt, dam țha chin chu mi bo zawnga an chhuah vek avàngin thingpui lum tùr pawh an awm lo a ni.

Pathianniah pawh kan inkhâwm lo va, nulaho pawh mi bo zawngtute ei tùr leh in tùr buatsaihsak tùrin Chite luiah kan kal vek ti ila a dik ang. Miin tlàwmngaih chhuah takmeuha hah pawh sawi lova mi bo an zawn laia an ei tùr lo siamsak chu kan tih ngei tùr a nia, YMA member kan ni a, miin harsatna leh manganna an tawh laia kan theih ang anga lo țanpui hi kan tih tùr a ni.

U Valpuia pawh ka hmu ve ta. A lang pawr ngang mai a, mut hmu lo tih hriat tak hian a mit chu a sen deuh rûm a, a lang bui lek lek bawk. A hma kha chuan a hmêl kha a fai vêk vâwkin a hrisèl hmèl leh viau tawh kha a nia; tunah erawh chuan a hmui hmul bâkah a biang hmul leh khabe hmul pawh a rawn lawr deuh fur mai a, mehna hun leh ziahna hun pawh a nei hlei thei lo a ni tih a hriat mai.

Min rawn hmuh ve chuan mit khap hauh lo hian min rawn en deuh reng a, chutah, mut chhuah hmêl tak hian a han khap zauh a, a khap cool ruih mai. A chauh hmèl êm avàng chuan ka khawngaih rilru khawp mai a, ka en reng phah nghe nghe; mahse, a hnuah inngaihtuah harhin ka nuih deuh sak a, ka hawi sawn zui ve ta nghâl bawk a.

Youtuber tu tu emaw leh news-a tàr lan tùr rawn beiseia lo kal pawh an awm ve nual a, keini pawh kan lang ve luau luau ang chu, Feli chuan," Ai, hmêl a chhe fê duh dâwn lutuk! Kan lan chhiat lai tak, hna thawh kawr nèna kan awm lai takin thla min lâksak a, kan lan zia ve deuh lai, kan inchei laite pawh min lâksak ve tùr a nia, powder ka lo pai lo chu aw..." a ti sur sur a, Rini'n," Lipstick ka pai alawm, hmui a sen tal chuan a zia," a lo ti ve bawk a, a rûkin, an bula țhute phènah lipstick chu an intât diat diat a, an rawn hawi chhuak chu duh aiin an lo sen deuh a ni ang, an innuih a, an intuai reh leh rih thùl, chûng chuan nuih a tizã a, nui ring ngam chiah si lovin kan nui khùr dat dat hlawm a, kan insik ru thùl, an bulah hi chuan nuih insùm hi a har țhìn a ni.

Mizo dànah chuan ni sarih an zawng țhìn a, Inrinnia hmasaa bo kha a nia, vawiin Pathianni a ni tawh a, nizàn khân tihtàwp thu an sawi em ka hre chiah lo va, vawiina an hmuh loh chuan a YMA ang zâwng phei chuan zawn chu an titàwp ngei ngei tawh ang, mi tlàwmngai zual deuhte leh mi bo lainate'n an zawn chhunzawm lehte a nih ngawt loh chuan. A lo thi tawh a nih pawhin a ruang tal hmu se ka ti, a chhûngte an khawngaihthlâkin hrilh a hai duh dâwn êm asin.

Chutiang lam sawi chuan kan titi sap sap hlawm a, chutih lai chuan au rî ni àwm tak hi kan hria a, kan han ngaihthlâk chian chuan," An hmu ta a nih chu," tih hi a lo ni a," Amah pawh a la dam a ni àwm e," a rawn ti leh lauh lauh a, mak ti si, lãwm bawk siin kan inen hâ hâ hlawm a, chutah, kan piah deuha țhu pa upa lam ve tawh deuh chu rawn ding chhuakin," A làwmawm e, Pathianin kan țawngțaina a rawn chhâng ta e," tiin, kut a rawn bêng a, mi dang chuan kan lo pui ve nghâl vat a.

Khua kan thlen chuan an in lam kan pan nghâl a, an in leh a vêlah chuan mi an lo awm khat vek tawh a, Pi Bûki, làwm avànga țap ri chu chiang takin kan hre thei, a àwm reng mai, a làwmawm êm asin, keini pawh kan lãwm a nia, a chhûngte tân zawng a làwmawm zual dâwn êm a ni. A rem lai laiah chuan kan awm ve tawp a, chumi hnu rei vak loah chuan Kohhran upa Pu Fîma rawn dingin Pathian hnênah làwm thu sawiin a țawngțai a, chumi zawhah YMA lam ațangin hruaitu rawn ding vein Lalchungnunga hmu hmasa bertu U Valpuia chu Lalchungnunga a hmuh dàn sawi tùrin a han ko leh a, U Valpuia'n a lo hmu hmasa ber a ni tih kan hre ve chiah! 

A thu sawi chu ngun takin kan lo ngaithla a, hre châk vek kan lo ni hlawm bawk a, a sawi lai chuan thãwm ri hlek pawh a awm lo rêng rêng! Rei a sawi lo va, a sawi hnuah Pi Bûki chu lo ding ve lehin a tupa zawngtute, kan khuaa mi mai ni lo khaw danga mite leh khawtlâng mi zawng zawng chungah làwm thu a sawi a, an chunga khawtlâng mite mai bâka tlàwmngaih chhuaha a tupa zawngtute zawng zawng chu an țhatna leh tlàwmngaihna an rulh lêt ve theih ngai dáwn loh thu leh Pathianin malsàwmnain a lêt tam taka vûr tùra a duh thute chu a sawi ve mawlh mawlh a, a duhthawh ve bawk si a, a hnuk a ulh pah bawk nèn, kei pawh ka mittui a lo tling leh pùr tawh mai.

Lalchungnunga chu a la harh chhuak lo nain kan khaw Health Worker-in a vil reng a, a chauh rih êm avàng leh chaw țha ei lo a nih vàngin thisen chaw a khaisak a, a dinhmun chu ngaihtuahawm tak a nih hran tawh loh avàngin kan haw darh ta hlawm a, haw kawngah chuan Khawmu chawi a nih ngei a nih kan rin thu chu kan la sawi zêl a, amah a rawn harha a awm dànte a sawi a nih ngawt loh chuan kan tân chuan hriat a har ve êm bawk a ni.

"U Valpuia khân a sawi chiang viau tho a; mahse, khâng hmunahte kha chuan an kal zing viau si a, an hmu ngai bawk si lo, a mak êm mai," Feli chuan a ti malh malh a, Hruaii pawh chuan," Dik chiah, a hmuhna nia a sawi kha hmun biru tak leh hmuh mai pawh harsa tak tùr a ni lo, dap kim kha an inti viau tawh hlawm si a, an hmu awlsam leh viau bawk si a," a ti ve nang nang a. Ruatpuii chuan," A, Khawmuin a chawi te chuan an zawn chiam tawhna hmunahte alawm awlsam taka an hmuh leh mai țhin, mihring hmuh theih loh tùrin a dâwi bo a ni ang," a lo ti ve a, chutiang lam hlîr chu sawi loh theih pawh a ni lo.

In ka thlen chuan Mala ka bia a, naupang bo kan hmuh tawh thu chu ka hrilh ve a," I haw phei meuh chuan awlsam takin an hmu ta mai alawm, malsàwmna kengtu i ni ang," a rawn ti a, kei pawh chuan," Ni mai rêng ang, dàwi hi ka thiam deuh roh a; nang pawh tunah tak khân phone hmangin mi i be mêk," ka han ti fiamthu ve a, ani lah chuan," E, min hmu vek thei elo?!! A colour-in em ni min hmuh?" a rawn ti lêt ve zat a. A hnuah phei chuan," Ka rilrua ka thil ngaihtuah pawh hi i hre vek thei ang ka ti, han sawi chhin teh," a rawn ti leh a, nui chung hian," 'A hre miah lo ang,' i ti," ka han ti ve leh a, kan nui dùn hawk hawk a.

Kan inbual a, ka nute lèn chhuah ve an duh dáwn avàngin hma takah chaw kan ei a, chaw ei lai chuan ka nu chuan Mala chungchâng chu a rawn sawi chhuak a, tlangvâl fel leh hawihhâwm tak, innghahna tlâk tak tùr nia a hriat thu leh a nupui tùr chu mi vànnei tak a nih ngei tùr thute chu a sawi malh malh a, ka rilrua ka lo dawnsawn dàn chuan," I pasal atân a țha, hmeichhe vànnei tak nih tum la, chhuah miah suh ang che," ti angin ka hria; ka pa erawh chuan eng tin vak a sawi ve lo thung a, a sawi chhun chu," Mi fel tak nei thei tùr pawh hian keimahni pawh hi kan fel a ngai," tih zawng a ni mai.

Ka nute an lèn daih avàngin kei pawh Mampuiite inah ka phei a, ka va thlen lai tak chuan U Vid-a chuan Lalchungnunga an zawn dàn leh an hmuh dàn chu a lo sawi mêk a, ka rin ang chiah a ni. U Valpuia nèna inzui deuh reng an ni a, U Valpuia'n a hmuhna lai hmun tak pawh kha vawi hnih vawi thum lai an en nawn tawh a lo ni, an beidawng tawhin 'Vawi khat na reng reng chu' tiin U Valpuia'n a en nawn leh kher a, tah chuan a hmu ta chiah a ni. Chutah chuan U Vid-a pawh a ko ta vak a, an pahnihin an bâwihsâwm a, paw hawtu pawh U Valpuia tho a lo ni àwm e.

"In chàu àwm mang e!" ka ti sap a, ani chuan," Chàu ve tho mai. Țhiana a chàu khawpin ka ring, kâr khat vêl chiah chiah kan zawng a nia, zànah a mu tlêm si, chhùnah mutna hun a nei bawk si lo, zanin erawh chu tui taka a mut beisei ila," a ti leh dap dap a. An nu U Latei chuan," Nang pawh zanin chu mu hma rawh, i țhianpa i sawi ang kha i ni ve tho a nia," a lo ti a," Nia, in hahin in chàu dâwn êm mai, mu hma rawh, in hna țha takin in hlen chhuak tawh a, rilru dam siaiin in mu thei tawh ang," ka lo ti ve bawk a.

Ka mumangah U Valpuia ka lo hmu a, kan lo la inkawp nghe nghe. Hlim takin high school tlângah kan lo lêng a, inkuah rial hian kan țhu dùn a, ka beng bulah," Innei tawh mai ang, ka pa bulah pawh ka sawi vek tawh a, ani pawhin a phal vek tawh," a lo ti a, kei erawh chuan," A, a la hma êm mai, College ka chhuak âwrh chauh a nia, hna pawh ka la nei si lo," ka lo ti thung a, ani lah chuan," Hna a pawimawh ber hlei nem, inhmangaih hi a pawimawh daih zâwk," a lo ti leh a, min kuah nghet sauhin min lo fâwp vang vang a. Thil rî eng emawin min tiharh a, ka mumang chu a tàwp daih mai, ka ui tak tak a ni. Ka muthilh leh hnu chuan mumang dang, a hrang daih neiin hmun hranah kan lo awm leh daih a, Chite luiah a lo ni nghe nghe. Chakai khawrhin țhiante nèn kan lo râk chùl a, Chakai khawrh e ti lo chuan tui chu kan lo chĕng pah bawk a. Zmi'n Chakai lian zet mai pakhat hi a man a, intithei deuhin, nui var var chung hian min han hmuh a, Tabawng chu hlim taka ràk chèl chúl chung hian ka lo pe a; mahse, a dah luh hma chuan Chakai bawppui lian țha zet chuan a kutah a chehsak a, nâ tiin a lo țê chiam a,  ka harh zui nghâl daih mai, Zawhte hur hrãm rî lo niin. Ka harh chian hnu chuan ka mumangte chu ka ngaihtuah zui mai mai a, U Valpuia ka hmuhna zâwk kha ka ngaihtuah lêt țha leh a, tunah zawng thil a danglam zo tawh, mumangah chauh kan infâwp thei tawh a, chutah pawh duh dànin kan awm thei chuang bawk si lo.

*I HLIMNA CHHANAH TU MAH RUAT NGAI SUH, NANGMAH NGEI KHA I HLIMNA, LÀWMNA LEH LUNGNGAIHNAA MAWHPHURTU CHU I NI*