☆Mr. BAD(ZAWLAIDI NEITUPA)☆ - 24 By Dingdi Pachuau

☆Mr. BAD(ZAWLAIDI NEITUPA)☆- 24 By Dingdi Pachuau

Thawhțanni chawhnu dâr khat vêlah Serchhîpa phei tùr chuan ka chhuak ve leh ta a, ka dam țha ve tawh a, ka pate pawhin min thlah an tum tawh lo. Kan khua ka tlàn pèl țêp tihah chuan U Valpuia mau pu rawn haw lam ka tâwk a, ka thinphuin a hre rang ngang mai, a phu rang nghâl dawt dawt a nih chu! U Valpuia chu a chauh àwm tehlul nèn, engtiziaa hna thawka chhuak nge maw a nih le? Awm ve mai mai se aw...

Biak loh ringawt chu ka inthiam loh avàng leh induh chan chang ka nih theih dâwn vàng chuan ding rihin," I chauh àwm tehlul nèn, inah awm hahdam mai mai ta che," ka han ti a, ani erawh chuan," I ve phei leh hma dâwn ve?" a lo ti ve thung a," Nia, chawlh hi a rei lo thei êm a," tiin ka mask chu ka pawt phelh zui a, a mau put leia a nghah ve ka rin tehlul nèn, a nghah tâk loh avàng chuan ka biak rei a hlau a nih ka ring rilru deuh a, ka lo be ta kher kher chu aw ka ti leh hial a ni.

"I dam țha zêl a, a làwmawm," a rawn tih leh chuan," Ni e, Pathian zâr liau liau a ni e. Kha, i mau put chu eng tùr nge ni a? I pu tam bawk si," ka ti zui ta daih a, ka chanchin lam min zâwt lo se ka duh vàng a ni. Ani chuan," Broiler, Koiler âr in sakna tùr a nih hi, vulh ve chhin teh ang ka tia, Krismas a hnai ve tawh bawk si a," a lo ti a," A țha lutuk alawm, a êk ni se lei țha a ni a, i huan thlài chàwm nân i hmang keuh ang a, hlêp hlang a ni mai," nui chung hian ka ti a, ani pawh a nui ve suk mai.

A rilrua a ngaihtuah tùr àwm ka ngaihtuah ve a, U Vid-a thu min hrilhte hre chhuak thar lehin min biak pawh hi nuam a ti lo viau ang tih chu ka ring a; mahse, ka biak hmasak loh chuan min be hmasa dâwn lo tih ka hre ve tlat a, chu vàng tak chuan ka be hmasa hrâm hrâm a ni. Tih tak takah chuan ka bialpa hlui a ni ve a, mi dang anga biak bawrh bawrh chu a har ve det asin; mahse, a hun tawnte ka hre ve vek tawh a, biak chhiat ka tum lo.

"Krismas-ah i rawn haw leh ang chu tiraw?" a rawn ti leh a," Um, dam chuan," ka ti ve mai a, a ngawi leh vang vang a, en reng ka duh laiin dik meuh lovin ka hre bawk si a, ka hmui chu ka pet ka pet ringawt mai.

"Kal tawh rawh, i tlai phah ang," a rawn tih tâkah erawh chuan harh chhuak thutin," Ni dâwn tak e," tiin scooty chu ka han tinung nghâl a, mask ka vuah țhat hma chuan," Hna hi chu thawh zawh tak tak a awm thei lo a nia, i taksa kha duat thiam la," ka ti leh phawt a, mask ka vuah ta chauh. Ka thil sawi teh duah chu, ka bialpa ka zilhna a nih duh hmèl ka ti thar leh deuh thut a, amah ngaihtuah deuh angin ka lang tlatin ka hre bawk; mahse, ka sawi zo vek tawh si, amah ka ngaihtuah viauah leh beiseina la nei reng angah min ngaih loh hrâm ka beisei.

"Tluang takin i tlăn dâwn nia," a ti ve leh sup a," Aw le," ti ve sapin ka tlãn zui ta nghâl a, dârthlalang ațangin ka hnung lam chu ka en zauh zauh a, ka lan theih chhûng chu min thlîr zui reng a ni tih ka hre thei a ni. Eng tak ngaihtuah zui ang maw? Ka rilrua ka ngaihtuah ang hi a ngaihtuah ve ang em? Nge a Broiler âr in sak tùr zâwk chu a ngaihtuah daih ang? 

Lalchungnunga chanchin pawh chu ka hre chhunzawm ve zêl a, a harh chiang tawh a, thil awmzia an zawh pawhin fel takin a chhâng zêl a ni àwm e. A sawi dàn chuan khatia sava a perh thla a chhar dáwn khân a sava perh thlâk, thi tawh ni ngeia a hriat kha a lo la nung a, a thla pawh a lo la zâp phar phar ni àwm tak a ni. A man tho a; mahse, chu sava chu a kut ațanga pût chhuak lehin, a thlang deuha a fù chu a zu man leh dâwn a, chu sava tê chuan mihring țawng dik tak hian," Min man tawh suh, i piah lama kawngah khân kal rawh," tiin a hrilh a, mak tak maiin chu sava te thu chu hnial theih a ni miah lo, thu âwih tak chuan a  kal zui ta nghâl a, kawng nuam tak mai a lo ni nghe nghe. Zâwl àwm mang lohna hmun kha ani chuan zâwl zau nuam tak angin a hmu a nih chu. Amah rawn zuitu sava tê pawh chu a țhianpa Joel-a amgin a hmu a, an titi dùn mawlh mawlh bawk. A bo tih pawh a inhre miah lo va, sava a vehpui a țhiante nèn chuan thingah lãwnin, thing zârah chuan nuam ti takin an lâwn kual a, tu mah chu rilțâm pawhin an awm lo, a chhan pawh thing rah chu loin an ei ve mai a, chu thing rah lah chu a thlum tui êm êm mai si a.

A thil tawn nia a sawi ka hriat chuan mak hi ka ti khawp mai a, dâwt a sawi êm chu ka ring lo deuh bawk si. Mampuii sawi zêl dàn chuan thinga an làwn lai pawh chuan an khuaa mite, tlangvâlte pawh kha a hmu thei vek a, an ram chhuak ve hlawmah a ngai mai a; mahse, a biakna an hre thei lo erawh chu mak a ti deuh. A hnuah a țhianteho chu an bo ta dial a; mahse, naupang dang kawm tùr erawh an awm tho a, a hriat ngai lêm loh ni mah se an inbia a, an inkàwm thei vek tho. Chûngho chuan ei tùrte pein savate an veh tlâng leh a, sava sate rawh hminin an ei a, nuam a ti êm êm a ni; mahse, thing rah leh sava sa chu a ei tam poh leh a ril a țâm zual tlat mai a, a țhiante lah chu rilțâm angin an awm ve si lo, a chau ta telh telh a, U Valpuia'n a hmuh pawh khân a chau lutuk tawh a, a kal thei tawh lo a lo ni.

"Ramhuai hnathawh chu a ni chiang alawm," ka tih chuan ani pawh chuan," Ni ang, ramhuai kha savaah a chang phawt ang a, chumi hnuah mipa naupang angin an chang leh a ni ngei ang, a thil ei pawh kha thing rah leh sava sa pawh a ni lo ang, vut emaw changpãt emaw tih vêl a nih ka ring," a rawn ti ve a, chutiang lam chanchin hlîr chu kan sawi a, U Valpuia chanchin pawh han zawh ka châk viau nain min ringhlel ang tih ka hlau deuh si a, ka zâwt duh ta lo va.

Ka phei leh tâk hnu hian U Valpuia ka ngaihtuah zui nasa a. Ni e, ka zêp lo, amah chauh hi mipa ka ngaihtuah țhin awmchhun a ni. U Vid-a thil min hrilh zawng zawngte ngaihtuah lêtin hun ãwl ka neih hlek chuan ka ngaihtuah ka ngaihtuah lo thei lo, dik tak chuan rilru dang put tum viau mah ila ka thei lo tih ka hre chiang tawh a ni. U Valpuia ka beisei leh ang ka tihna ni lovin ka thinlung hi mipa dang hnêna hlan tùr ka nei tawh lo zâwk a ni, ani kha ka thinlung hi a pumin ka hlàn tawh a, mi dang tân hlan tùr ka nei tawh lo. Țhian ang chuan hmun an chang thei chiang, chutiang chiah chuan Mala pawh hi ka en a, U Valpuia ka en ang hian ka en ve thei ngai lo ang tih pawh ka hre chiang viau tawh bawk. Mala pawh hi ka rilru chiang taka ka hrilh a ngai tawh a ni, ka laka beisei nei thei tùr tingin heti chen hi ka lo siam tawh a, ka rilru hi a dik lo, ka thiam loh a ni, ka awm dàn hi mi nunrãwng ber awm dàn a ni tlat. A rilru ka tina takzet tawhin ka ring bawk; mahse, thu dik tak hrilh hi ka tih tùr a ni a, min rawn biak leh hunah emaw a rawn kal leh hunah emaw chiang taka ka hrilh a ngai ngei ngei tawh, hrilh chu a huphurhawm ka ti reng mai; mahse, a ngai tawh si a.

Kan kohhranah salvation camping buatsaih a ni dâwn a, țhianteho pawh luh an tum deuh vek sa a, an sawi dàn chuan. Awm ve theih ka châk viau a ni, țhianteho nèn hi chuan eng mah hi hrehawm leh peih loh hi a awm thei tak tak lo va, bâkah, a nuam ve hrim hrim bawk. Min lo hlimsànsan daih phei chuan Krismas zaikhâwm laiin ka ro bîk ngawt ang le.

Mala pawh kâr tàwpah a rawn phei ve leh ta a, a chhûngte inah riah a tum nain zanriah ei tùrin ka sâwm sa a, rilru nei rânin a ni ka sàwm ni, chaw ei khamah ka rilru put dàn dik tak ka hrilh ang, huphurh ru viau mah ila mi fel tak a ni a, a lo hriat thiam hrâm ka beisei bawk ang.

Ka rilrua ka ngaihtuah hre ve miah lo chuan hlim takin a titi a, a nui sâng reng a, hlim takin chawhmeh pawh min siampui vek bawk. A fel siam siam bawk si a, dik tak chuan ka thil hrilh tùr hi ka hrilh huphurh lâwk thlâwt a ni; mahse, ka tih ngei ngei a ngai si.

Chaw ei khamah chuan Nimbu ka bâwl thak a, a ei châk loh thu min hrilh nain ka han ei chiah chuan a rawn ei ve ta tho a, tui kan ti dùn hluam hluam khawp mai. Kan ei lai chuan ka sawi chhuak ta a, sawi dàn tùr ka lo ngaihtuah nasa ve tawh bawk a, a lo dawngsawngtu tâna na vak lo tùrin ka sawi chhuak ve chuan ka hre bawk.

A ngawi vang vang a, sawi chhuak hmasatu ka ni bawk nèn, thu làwmawm lam leh hlimawm lam ka hrilh bawk si lo chu nuam lo ka ti ru veng veng a; mahse, eng emawti záwng tak chuan ka thaw a veng deuh huai thung a, ka huphurh ve êm mai a, min kam rùntu han khen thlâkte chu ni ve deuh huai tùr chu ka ni rêng a ni.

"Hetiang lama rilru natna i lo tawn tawh vàng a ni tih ka hria, in khuaa mi vàng khân a ni em?" a rawn tih chhuah chuan a en vat a, min lo en reng a, engtin nge a lo hriat ni? A bulah ka la sawi ngai hauh si lo, tu nge lo hrilh ni?

"Tu nge hrilh che a?" mak ti zeta ka tih chuan a nui ta hawk a, a lu thing nar nar pah hian," Dâwp chhuah i va awl tehlul êm!" a ti hap a, ni e, dâwp chhuah ka awl êm avàng chuan mãwl ka inti leh hnuhnawh a, nuam lo ti ru tak chuan ka sam chu ka khawih neuh neuh ta ringawt a.

"Mipa ka ni ve a, ka elpui chu ka hre chat ang chu maw le!" tiin a ngawi leh rih a, chutah," A țha e, thu dik tak leh i rilru dik tak min hrilh a, hlimpui viau lo mah ila ka lãwm tho tho e. In chanchin zawng zawng min hrilh erawh i ba ta a nih hi," a tih zawm leh ta a, nuam ti vak lo chung chuan ka melh zak zak a, min ngei viau loh hrâm ka beisei.

"Eng ațangin nge ka hrilh țan ang che?" ka ti ta ringawt a, ani lah chuan țhut țhat sauh sauh pah hian," A bul tê ațangin, chuan, in ințhen thlengin," a rawn ti leh a. A bul tê ațanga ka hrilh chuan a va thui duh dâwn ve; mahse, hrilh chu bâ ka inti ru ve tho bawk si, kài tãwi deuh mai ang.

Ka mitthlaa kan nunhluite hmu rauh rauh pah chuan U Valpuia nèna kan chanchin chu ka hrilh ta vek a, kan ințhen dàn ka hrilh zawh hnu chuan," Khatia kan inkawp tâk loh ațang khân mipa hi ka hnaih lo tluk a ni a, ngaihzâwng tùr hlauh phei chuan. Nang hi chu U Valpuia nèn kan nih hma daih tawh ațanga ka țhian kha i nia, mi fel tak leh țhian nih tling tak i ni. Engkima min hre thiamtu leh ka mangan harsat lai pawha min thlahthlam ngai lotu ka țhian i ni bawk," ka ti duah a.

"Engkima hre thiamtu che i țhian," a lo ti sap a, a nihna ka sawi kha a sawi nawn ve leh a ni. A melh ngai melh reng pah chuan," I thinlung ka neihsak thei lo che tih ka hre reng tho nain zàwi záwia hneh theih che ka inbeisei a, i thinlung i khàr tawh kha tlêm tlêma min hawnsak ka beisei țhin vàng a ni. Ni e, ka beiseina vàng chauha khatiang thu pawh kha sawi ngam ka ni alawm, tuin nge mi thinlung chunga thu neihna nei le? Tu nge mi thinlung thunun thei? Ka theihna chu ni se chuan hmânah khân ka hneh tawh ang che; mahse, ka tih theih rual a ni lo, mi pakhatin a duhna thinlung ringawtin mi dang thinlung a va suih zawm thei lo. I duhna zâwnah i thinlung i thunun thei lo ang bawkin kei pawhin ka thunun thei lo a ni ve mai, hei hi hringnun chu a ni miau mai a, nunràwng châng a nei țhìn mah se kan chantâwk a nih miau avàng erawh chuan pawm thiam mai a ngai țhìn a ni," a ti sap sap a, ka khawngaih ve tho bawk si a, hrehawm ka ti rilru tak tak a ni.

"A pawi ka ti," ka ti ringawt a, sawi dàn tùr vak pawh ka hre lo a ni. Ka sawi tùr ka sawi zo tawh a, sawi leh tùr pawh ka hre tawh chuang lo, a zo vek tawh. A hnu deuhah amah zâwk chuan," Hrehawm ti duh mah ta che, hringnun a ni ka tih tawh kha. Pathian zârah kan dam ang a, kan hma lam hunah hlimna kan țâwmpui tùr leh min țâwmpui tùr chu kan la tawng dùn êm êm ang," a rawn ti leh ta a," Ni e, beisei ang," ka lo ti ve vat a.

"Țhian kan ni a, kan chanchin a chhia a țha pawh tûn ang hian kan inhrilh tawn zêl ang, min biak hreh phah lo la, kei chuan ka en dàn che a ngai reng ang a, ka biak hreh phah dâwn chuang lo che a ni, in khuaah pawh ka lo la zin leh lo ang tih pawh ka sawi thei lo," a ti leh sap sap a, kei pawh chuan," Hreh lo ve a, zin pawh i lo zin leh ngei ang chu," zãngkhai tak hian ka lo ti ve leh a.

Tunah chuan ka thaw a veng ta. Mala ka khawngaih lo a ni lo va, ka thinlung dik tak hrilh kha a phû a, ka tân leh a tân a țha ve ve a ni. Bialpa fel tak leh thlannahawm tak tùr chu a ni ngei mai; mahse, thinlung hi a pawimawh êm êm mai si a, ka bum thei lo a ni.

Țhianteho camp lût pawh chu an reh khawp mai a, Mampuii nèn kan inbe thei deuh ber a, ani chu riak lût ve lovin lângin a chhim a, boruak nuam a ti khawp mai, miin an hlut a, camp lût pawh an tam viau a ni àwm e. Kâr tàwpah chuan camp an chhuak a, an hlawhtling khawp tih sawiin Ruatpuii leh Feli phei chu khùr/țül pâwlah an tel ve zui a, an inbin bàl paw thûr reng mai niin a sawi nghe nghe. Krismas haw hun a nghahhlelhawm tawh mang e! Kei chu ka lâm ve ngai lo va, zai vak vak mai hi ka thiam leh theih ve tâwk chu a ni mai.

"En teh, kan vêng tlangvâlho leh paho chuan kan speaker-in nula zai thiam a rawn hruai kha an star hlawm lutuk a, ni leh lo, mipa tawh phawt chuan an star vekin ka hre zâwk mai! U Valpuia pawh a rawn inkhâwm ve ngei alawm, mi sawi a hre ve pawh a ni mahna!" nui deuh hawk hawk chung hian a rawn ti a, kei chuan," Mipa tawh phawt han tihah, i u leh i pa pawhin an star ve maw?!" nui chung hian ka ti lêt a, ani chuan," Star râpthlâk!! Au Vid-a phei chu... hei, nupui thlâk a tum deuh ut ut em maw ni kan ti, zai thiam mo thar kan nei thut lo ang tih pawh a sawi theih loh," nui hawk hawk chung vêk hian a rawn ti leh a.

"U Vid-a chu a va ti mak ve! U Latei lo chu a nupui atân ka pawm dâwn chuang lo tih kha lo hrilh teh, nula hmêl kêu deuh hlek lo star viau ringawt hlawm mai, tenawm dáw dáw hlawm lutuk!! Ka rawn haw phei hunah kan zai thiamnui chu ka  rawn dah nîl nasa ngawt ang!" ka han ti khar khar a, chumi ka thil sawi kher chu U Vid-a hriat tùrin a lo dah ring a ni ang chu, U Vid-a aw ngei mai chuan," Nang zawng kan chang pha dâwn chuang si lo che a, i lo haw phei hun pawh ka nghâk thleng lo mai ang che, ka ûm zui mai dâwn," a rawn ti a, fiamthu mah ni se ka thil sawi vàng khân ka zak leh deuh si a, ka ràk khum ta chiam ringawt a.

Hun a liam a, Mala nèn pawh kan inkârah inngaihzàwnna thleng lo mah se țhian kan ni chho zêl a, biak hmasak ka inthlahrun țhin avàngin amah zâwk hian min rawn be zêl a, a hna thawh dàn leh a hun hman dàn min rawn hrilh țhìn. Chutiang bâk han sawi tùr a vâng ve țhìn êm mai a, inngaizâwng chu ni ila chuan sawi tùr chu a rawn piang chawp zêl mai ang a; mahse, kan ni bawk si lo va, ka rilru dik tak ka hrilh tâk hnuah phei hi chuan han sawipui mai tùr pawh hi ka haihchham titih deuh tlat tawh a nih chu, a bulah mipa dang chanchin ka sawi lang ngai miah lo va; mahse, amah zãwk hian U Valpuia hming a rawn sawi chhuak zauh a, kan inbe leh tawh em tih leh a chanchin ka hriat leh hriat loh min zawh zauh châng a nei a, chutiangah pawh chuan ka hriat loh thuin ka chhâng mai țhìn. Dáwt ka sawi hlei nem, kan inbe ngai lo va, a chanchin ni se ka hre ngai lo tluk bawk a ni.

Ka in luahna piah lawkah mitthi an awm ve tlat mai a, ka kalka bera awm niin, borala ber phei chuan ka kal lam leh haw lam hi min lo be ve luam țhìn bawk a, ka hming phei chu a hre hauh lo ang, kei pawhin a hming tak ka hre chuang hlei law; mahse, min be ngai lo thi ai ngawt chuan ka uiin ka rilru a luah a, zànah pawh ka tlaivâr ve nghe nghe a, a tûk lamah erawh chuan hnaah kan chawlh ve si loh avàngin mitthi in hêl chuan ka tlãn kual chiam a, ka tlai țhelh nghe nghe a ni. Mitthi in leh kan hna thawhna hmun zawng a inhlat ve êm mai a, vêng hran a la ni zui bawk nèn, chawlh ringawt theih pawh a ni lo a ni.

Khua a vâwt ve tawh bawk a, ka mit pawh a kham ûrh mai. Tlaivàr hi chu ka hneh thlâwt lo a ni, ka nguai búr a, min dàwrtute nèlawm tak leh nui sâng chunga lo biak pawh a harsa lam hret chu a ni e. Chhùn chawlh laia ka mut chhuahzia chu, men luih harsa ka va ti tak! Ka phone rîin min tiharh thut a, ka phu zawk zui lehnghâl a. Peih lo zeta ka han en chuan number ringawt mah ni se tu number nge tih ka hriat chian êm avàng chuan ka thin a rawn phu rang nghâl dawt dawt a. Ka chhâng lawk lo, ka âwm dawmin thâwk ka la vang vang phawt a, chumi hnuah chauh chuan ka chhâng a.

"Hello?" Aw zãngkhai thei ang ber chuan ka han ti a, U Valpuia aw hriat ka inrin laiin U Vid-a aw ngei mai chuan," Nunu, kan rawn tibuai dâwn che, rawn tlawh ngei che ka duh si a, zanriah min lo bàwl kêp mai teh aw, Țhianpa nèn kan nia," a rawn ti a, Țhianpa a tih chu U Valpuia a ni a, a phone a hmansak bawk, khawiah nge an kal dâwn ni? 

"Aw le, aw le, a harsa hlei nem, min tihbuaina tùr pawh a awm lo, eng chawhmeh nge ka lo siam ang? Eng nge in ei châk?" ka ti a, tunah chuan ka harh chiang viau tawh a ni, U Vid-a leh U Valpuia rawn kalin chaw an rawn ei dâwn a, ka thinlung chu a phûr nghâl súrh mai a ni.

"Chawhmeh siam vak a ngai lo, rawn ei ve hrim hrim ka duh vàng a ni e," a rawn ti ve leh a," Sate kha lei buai kha a ngai lo ang. A, i lo buai phah zêk dâwn tlat mai; mahse, keini pawh kan rawn thleng har lo tùrah ngai ila, kan bàwlpui hman tho ang che maw," a rawn tihzawm leh a," Hmm...vêl a che, eirawng bàwlte chu ka hnehsawh ve tawh alawm, tluang takinin lo tlãn dâwn nia," ka ti ve a, rei inbe lovin kan inbe tàwp ta thuai a.

Sa lei ngai ti lo mah se ka lei haw ta tho a, Bâwng sa, a ti hlang ka lei a, kan khuaah ei tùr a awm khât deuh ka tih vàng a ni, Vawk sa chu kan ei ve zauh zauh thei a, Âr sa pawh chuti tho. An rawn kal khâtin mikhual ka thleng khât ve si a, tui taka chaw an ei ka duh a ni.

Phûr tak leh helhhawlh taka rawng ka bàwl lai chuan kawngka chu a rawn ri ta koh koh mai. Ka chhâng vat a, U Vid-a nui vur vur chunga a rawn luh chuan," In va lo thleng hma ve? Lo țhu r'u, thingpui ka lo siam vat ang che u," ka lo ti sawk sawk a, beisei nei tak chuan U Vid-a hnunga rawn lût tùr chu ka thlêk pah a, ka rilrua phùrna hre ve lo ni àwm takin muangchâng hian U Valpuia chu a rawn lût ve a, chu chu ka hmuh chuan ka thin chu a rawn phu rang zui nghâl zat a.

*HMANGAIHTE HI THÎKNA NÈN KAN THLÎR HMA BÎK, MI DANGIN MIN ȚÂWMPUI LO SE, KAN TA CHAUH NI SE KAN TI ȚHÌN*