☆Mr. BAD(ZAWLAIDI NEITUPA)☆ - 25 By Dingdi Pachuau

☆Mr. BAD(ZAWLAIDI NEITUPA)☆ - 25 By Dingdi Pachuau

"Lo țhu r'u, in rawn tlãn thui si a, in chauin in ril a țâm tawh ngawt ang. Thingpui ka siam nghâl e," tiin ka che nghâl vat vat a, U Vid-a chuan," I in luah chu a nawm reuh hi, hmeichhe luah a ni bawk a, i tinuam reuh khawp mai," a rawn ti a, kei chuan," Chuti maw? A làwmawm a nih chu," ka ti a, thingpui no hnih ka siam zo a, ka va pe zui nghâl a. U Vid-a chu a lo hawi kual nasa mai lo niin, ka hmuh chuan," A mak thei êm mai, hê hû che hian; thingpui hi in phawt mai teh, nakinah i la en kual dâwn nia," nui deuh chung hian ka ti a, ani lah chuan," Ka rin aiin i lo che nuam reuh! Tlangvâl chhe lo deuh deuh pawh i tawmpui țhìn lo maw?" a lo la ti zui a, chutia a ti kher chu ka ngei deuh a, rum deuha melhin," Min ngai lérh hlê mai maw?" ka ti a, ani chuan," Loh theih nâng! Nula mahni chauha khawsa ta chu, ngaihtuah a thui duh riau lo thei lo," a lo ti leh a, ka rûm nghat ringawt, ka chhâng peih tawh lo.

U Valpuia chu a ngawi reng a, ka biak loh chuan min be hmasa dâwn lo tih ka hria, a chhan pawh U Vid-a'n a sawi vek tawh kha, a inthlahrung vek tawh a, min țhentu zâwk kha a ni lehnghâl a, tunah pawh hian U Vid-a nèna kan inbiakna vêl vàng pawh khân nuam lo a ti ngawtin ka ring deuh ngawt a.

"U Valpui, i bike khalhah em ni i țhianpa hi a rawn chuan ve?" tiin ka be ve ta a, 'i bike khalhah' ka tih kher chhan pawh hi U Vid-a ka sawi el duh vàng a ni, bike khalh a thiam lo va, cycle khalh takngial pawh a thiam lo a nia, chu vàng tak chuan ka ti el ve hrâm a ni.

"Um..." muangchânga a lo tih lai chuan U Vid-a chuan rang zet hian," Ka chuang lo ang tih mah ka hlauh naklaiin, tihian kan rawn tlawh thei che a, tu nge lo tawmpui i nei em tihte thlengin ka rawn spy thei a, zia deuh mai asin," a lo ti leh zut zut a, ner nûng hian ka en a, hetiang êm êm hian U Vid-a hi a lo țawng thei ang tih ka lo hre ngai lo, engtizia nge ni hetiang kawng záwng hlîra min fiam mai ni.

"Zai-thiami min ûmsan daih tawhah ka lo ngai a... nge a lo duh lo zâwk che?" ka ti ve ta a, U Vid-a nuih chu a za ta ngang mai, a nui hawk hawk a, U Valpuia pawh a nui ve suk suk tho, chu thu ka sawi chhuak chu ka va tifuh tak! U Vid-a pawh nuiin min fiam chhunzawm tawh lo va, thil dang daih a rawn sawi chhunzawm ta a.

Ka ei siam chu min pui ve a, ka hnial viau nain an tilui tlat si a, kan indaih ta khawp mai. Kan zawh fel hnuah chuan inbual an duh leh duh lohte ka zâwt a, inbual tùra ka tih chuan U Vid-a chuan," I sawi râpthlâk êm mai aw, khua a vawh êm hi," a lo ti a. "Tui kan lum mai dâwn alawm," ka tih chuan U Valpuia chuan," Tui i harsat loh chuan tui vâwta intleuh zawk chu ka duh khawp mai," a lo ti thung a, U Vid-a chuan," Tlangvàl lai kha chuan tui vâwt kha ka ngam ve țhìn viau a; mahse, nupuite taksa lum ham ham bula zan tin mai mut tâk hnuah hi chuan thisen hian a ngam țha tawh miah lo," a lo ti lehpek a, a inla nupui nei vêl lutuk chu ka haw thar leh a," I va zuau tak! Ka lum mawlh mawlh dâwn che nia. U Valpui, tui lum ila, lo nghâk rawh, a lum har lo ang," ka ti a, ani erawh chuan," A ngai lo ve," a lo ti leh mai a, a duh dâwn chuang lo tih hriain," Bual inah khân inhrûkna tùr a awm sa aw," tia ka hrilh leh hnu chuan a lût zui ta nghâl a.

A inbual hlàn chuan khawiah nge an kal dâwn tih leh eng nge an tih dâwn tihte chu U Vid-a chu ka lo zâwt a, ani lah chuan," Țhianpa tân ranngo kan zawng dâwn maw le," a ti phawt a, min rawn enin," Nangni pawh hi in ti ve țêp tawh lo maw? Officer nupui i ni dâwn sia, in inneih hnuah chuan kan inhlat tawh àwm, biak pawh kan be phâk tawh lo ang che," uang zet hian a ti leh a. Heiha, huiha! Thu tak hla taka biak theih pawh a ni lo, a uang kual vêl mai mai zawng a nih hi.

"Be phâk lo tawp ang, boruakah ka awmsan daih ang che u," ka ti ve a, ka uan khum vêl a ni, ka dang duh bîk lo. Ani pawh chuan," Ka rin dàn vêl tho a ni, chu vàng tak chuan kan biak theih lai che hi chuan dim che ka tum lêm lo. Tui kha i lum chiang maw? Tui vâwt chuan ka peih miah lo a nia," a lo ti leh a," Lum chiang e, sa deuh i duh  hial lo maw? Khu vut vut khawpa sâin i inbual dâwn nia, a so vut vut hnuah chauh kan off ang," ka ti leh a, kan inhnehsawh dùn viau chu a ni.

U Vid-a inbual hlàn chuan in neitu zâwk leh thlengtu zâwk ka nihna angin ka biak hmasak ngei a ngai tih ka hria a, U Vid-a ka zawh hnu bawk kha U Valpuia chu ka zâwt leh a, ani chuan," Bûkpui mitthi-ah kan rawn kal a, nizàn khân Vid-a patea fa tlum ber a boral a," a ti a, chu pa mai mai chuh, a va che thawveng si tak!! A patea fapa boralnaa rawn kal pawh a ang lo, dâwt min la hrilh zui.

"A nih tak chu, a zia lo hlê mai. A zàn a zànin em ni in rawn kal a?" tiin ka zâwt leh a," Ni lo ve, tukin zîngah kan rawn chhuak a, vuì zawhah kan rawn haw leh a," a tih chuan," A nih chuan, chaw ei khamah hian haw in tum tihna maw?" ka ti leh a, ani lah chuan," Ni mai ang chu," a lo ti mai a.

"A vâwt dâwn asin! Bike-ah lehnghâl, a tihchi miah loh! Riak ve mai rawh u, naktûkah in haw mai dâwn nia," ka ti ve thung a, thlasik a ni tawh a, kâr a hla tham bawk si, ke pali nei pawh ni lovin ke hnih neiin haw an tum lehnghâl a, a tihchi loh rêng rêng! U Vid-a pawh sawipui a ngai a nih hi, a âwihawm loh êm mai. Ka in luah hi a phui reuh êm zâwk a, tunah hian vâwt an la ti lo mai mai a nih hi, kawnga tlàn tháwt zawngin e, nuam an sa lo ang.

Zanriah ei lai chuan haw lova riak ve mai tùr chuan ka han ti leh a, U Vid-a  chuan," I in a tê si, mutna pawh a awm dâwn em ni? Khum min ken dâwn erawh chuan kan riak thei ang a," a ti a, kei chuan," E, kian tuk e, min rawn tlawh ve hrâm hrâm a nia, ken chu i phû ngawih ngawih," ka lo ti a, ka chhàn dàn vàng chu em ni ka hre lo, a nui leh sûng a.

"Țhianpa thu thu hi a ni mai, bike khalhtu a nia, kei chu a phurh ve mai kha ka nia, ani hi sâwm la?" a tih leh chuan," Ka sâwm daih tawh! In riak dâwn, naktûkah in haw ang," ka lo ti vat a. U Vid-a chuan min en vang vang pah hian," I va fing reuh tak! A hnial ngam dâwn lo che tih hre rànin i lo sâwm hmasa a, fing phakar reuh lutuk mai!" a ti zui nang nang a, kei chuan," Zàna haw chu tûn ang hunah chuan a tihchi tawh loh alawm, khua a vâwt tawh a, in ngaihtuahawm dâwn êm asin," ka ti leh a, a dik chiah bawk a ni.

"'In ngaihtuahawm dâwn,' te i tih, kei chu min sawi tel ve hauh suh, min ngaihtuah tel ve dâwn teuh lo tih pawh ka hre sa vek!" a lo ti ve leh thung a, U Valpuia ka en zawk a, min lo en lo nain a hre ve tho tih ka hre si a, ka dang chiang takzet a ni! Sawi mai tùr ka hre lo chuan," U Latei hian engtin nge a lo duh theih zâwk che le?!" ka ti ta ringawt a, a nuih a za lehpek viau a ni ang, a lo nui leh hawk hawk a.

Riak tùra ka tih tlat avàng chuan an riak ta nge nge a. Țhutthlènga mut ai chuan tiin chhuatah an mutna tùr ka phahsak a, ha nawhna brush thar pahnih chu ka dah chhuahsak bawk a, an rawn keng àwm tawp si lo va,  vâwt an tih loh nân blanket leh rizai ka thuah ve ve a, a tâwk thei mai ang chu maw.

Mut hnuah U Valpuia'n, *I țhianpa Officer khân keini pahnih hi i inah kan riak a ni tih hre ta se, a lãwm lo viau lo ang maw?*  tiin message min rawn thawn a, a ngeiawm zek zuk tak tak a ni. Ka number a nei reng sia, U Valpuia phone ațang kherin vawiin te khân min rawn bia a, zek zuk mai.

*A fel lutuk, thil pawi tùr a awm hlei nem*  tiin ka chhâng lêt ve a, *Em ni? Thil pawi tùr a awm lo chiah ang maw? I muthilh hnuah Țhiana hi i khumah khân a rawn mu ve maithei asin*  a rawn ti leh a nih chu! A hming puma han koh vak ka va châk tak! 

*Tenawm suh! Ka rawn haw hunah chuan i ngaihtuahna tenawmzia hi U Latei ka hrilh vek ang*  tia ka chhàn lêt chuan a nui huk huk ri chu ka hre thei, ka in luah hi a zau lo ka tih tawh kha, ka mutna hmun pin dan nân ni se tile phëk hman mai kha a ni a, thãwm a hriat theih êm êm a ni.

A tûka ka harh chuan thawh hmain khumah chuan ka zi kual phawt a, ka mut lum lohna chin puan ka deh chuan ka tawm leh vat a; mahse, tui herh haw rî ang deuh ka hriat tâkah chuan 'tu nge le' ti rilruin ka han ngaihtuah a, chutah, hre chhuak thutin ka tho nghâl a, phone sana ka han en chuan dâr 6 a lo ri țêp tawh a, an pahniha min lo thawh khalh ve ve loh hrâm ka beisei.

U Valpuia a lo tho tawh a; U Vid-a erawh a lo la inkhuh țha khawp mai. U Valpuua chuan min lo en a," I va tho hmâ ve? I mu thei meuh nange?" tiin ka han zâwt sar sar a, ani chuan," Ka tiharh che a ni maw?" a lo ti sup thung a, lu thingin," Aih, tiharh lo ve. I mu thei zâwk em? I thawhna a rei tawh em? A vâwt viau lo maw?" ka ti a, thukah thingpui tùr ka chhuang nghâl a, ani chuan," Ka tho ve deuh chauh, mutna a nuam mah mah a, thawh pawh ka hai țêp a ni," a lo ti ve leh a, 

Ka inphih fai a, thingpui a so thuai a, ka siam rak rak laiin U Vid-a a rawn harh ve a," Mut a tui duh hlê mai a, ka rin aiin a lum nuam reuh bawk si a, thawh pawh a peihawm loh mai dâwn alawm le," a rawn ti a, kei chuan," A la hma alawm, la mu rih rawh, U Valpuia pawh hi a tho hma mai mai a, mut a nawm nèn, la mut reng rih tùr a nia," ka lo ti ve a, U Vid-a chu a lo nui hawk a," 'Mut a nuam e' a?!! I rilru tak hi chuh! Pasal i neih huna i awm dàn tùr hriat a va har lo tak êm!!" a rawn tih leh chuan ka rilrûk loh dàn lutuk a rawn sawi chu ka dang lek lek a, U Valpuia a lo awm ve kher bawk nèn, ka zak deuh a, ngei zet hian melhin," I rilru hmul dàn êm êm hi chu aw..." ka ti vang vang ringawt a, ani lah chuan," Ka rilru kher lo pawh a hmul," a lo ti leh a, ka melh nghek a, chhàn pawh ka chhâng peih tawh lo, rilru zahmawh lutuk mai!

Chaw ei khamah an haw a, kei pawh hna lamah ka kal a, U Vid-ate lo thlen tawh thu Mampuii'n min rawn hrilh chuan ka bu nghat a," A làwmawm e," tiin ka chhâng a, ani hian nizànah ka inah an riak tih a hria a; mahse, eng mah min zâwt lo,  Mala hnênah ka rilru dik tak ka hrilh tawh a ni tih pawh a hria a," A țha e," ti ringawtin min chhâng a nih kha. 

Hna thilah Aizawlah ka kal a, rei ka awm lo. Ka tih tùr ka tih zawh hnua muangchânga U Puiite in pana ka kal lai chuan," Nunui kha... i ni em?" tia min be ri ka hriat chuan ka ding dat a, chu lam chu ka hawi nghâl vat bawk. Min betu nèn chuan kan inen vang vang a, hostel-a ka awmpui țhin Rovi kha niin ka hria, a ni chiang mai. 

"Rovi kha i ni tiraw?" ka ti lêt ve a, ani chuan," Ni e, ka va hre lo teuh che ve le! I dam țha maw?" tiin a kut a rawn phar chhuak a, lo ban vatin kan inchibai a," Ka dam alawm, in dam zâwk em? Pasal i nei tawh a ni maw?" tiin ka nui a, a kuta inneih zungbun a bun chu ka hmu tlat a ni.

"Aw, nei daih tawh e, ka fanu pawh kum thum lai a tling tawh maw le. Engtin nge i awm zêl? I number ka neih kha ka phone a bo khân a bo lo thei si lo va, kan inneih tùr thu hrilh tùr che pawhin biakpawh ngaihna che ka hre tawh lo va," a ti siam siam a, kei chuan," A nih tak chu maw le; mahse, hlim taka inneiin fanu in nei tawh a, a làwmawm, ka lawmpui lutuk che. Kei chu hei, ka la single reng a nih hi," nui chung hian ka ti a, kan inhmuhna a rei tawh a, kan inkalsan thei lawk lo, chanchin inhrilh tùr kan ngah rih êm mai.

Number-te kan inpe țha leh a, rei ve tâwk tak kan titi hnuah kan ințhen ta chauh a, ani zawng a duh tak pasalah a nei thei a, a awhawm. A nuam ngawt ang chu, duh ber nèna inneiha chhûngkaw din chhoh chu a nuam lo thei lo, a pasalin a duat viau a ti lehnghâl a, a nuam dâwn lutuk.