☆Mr. BAD(ZAWLAIDI NEITUPA)☆- 26 By Dingdi Pachuau

☆Mr. BAD(ZAWLAIDI NEITUPA)☆- 26 By Dingdi Pachuau

U Puii'n," I lo zin khâtin thil pawh ka pe khât tawh si che a, hlawh nei zâwk ni tho mah la, ka puan zînga i duh ber hi thlang la, ka pe ang che, ka nu tã tùr nèn, Tĕțani ta tùr pawh ka thawn haw nghâl ang che," a ti a, ka lãwm tak tak a ni. A chhan chu puan nalh hi ka hre ve vak lo va, lei pawh ka lei ngai lo. U Puii hi chu a mit a lêrh a, a thuamhnawte rêng rêng hi a mawiin belhchian a dâwl țhìn a ni. Krismas puan thar ka nei leh dâwn tihna a ni a, lei a ngai lo dâwn tihna a ni, a țha e.

Puan sen tak hlar mai, a hma lama zeh thlâk awm hlek chu ka thlang a, ka nu erawh chu a hring duk lam ka thlansak a, Tĕțani erawh amahin a duh rawng a rawn thlang tawh a, a eng lam hi a ngaina a, tunah pawh a eng lam bawk a ni a rawn thlan ni. A mawi vek hlawm mai, U Puii nge nge upa ber nih a tlin țhìn e.

Zanriah ei laiin U Puii'n kan khaw naupang bo chanchin kha a rawn sawi chhuak a, a nu chuan," E, kha kha ka hre chiang châk asin, fiah takin min han hrilh teh, khuaa i haw lai a ni bawk a," a ti a, a hmun ngeia awm ka ni ve sia, ka thiam ang ang chuan fiah thei ang berin ka han sawi a, U Puii chuan," A hmu bertu Valpuia an tih kha ka hre chiang vak lo va," a lo ti a, ka han hrilh fiah a, ani chuan," A nu leh pate leh a ute chu ka hre mai a, amah tak kha ka lo hre chiang lo a nih chu," a lo ti leh a. Nia, hre chiang vak lo ang, an fa tak tak a nih loh bâkah U Puii pawh hi hmun dangah lehkha zirin a awm hma ve a, bâkah, lênglâm lo lutuk a ni ve bawk a, a hre viau pawh hi a àwm ve tho mai.

U Puiite in piah lawka dàwrah chuan thil leiin ka kal a, ka chhuah dâwn chuan tlangvâl pahnih hi an rawn lût ve chiah a, ka en chiang hlei lo va, pakhat chuan," Nu Lal, pawisa ka nei remchâng si lo va, kuhva pack khat leh cigarette pakhat ka lo ba leh lawk teh ang," thawveng zet hian a rawn ti a, dàwr nghâktu chuan," I ti ve ziah! Min pe har thei si," a lo ti hlak a, chu pa chu ka melh ru deuh a, 'tlangvâl pui tawhin kuhva leh cigarette man han bat dûk dûk chu, a thawven hmèl bawk si' ka ti rilru țêp a ni.

Pakhat chuan," Ka nei alawm, ka lo pe ang," a lo ti sup a, chu aw ri ka hriat chuan ka en ta vat a, helaiah hian hmuh ka inring lo lutuk! Amah ngei chu a ni si, eng a ti ve chu ni maw? Aizawlah pawh vêng hrang hrang a tamin a zau tehlul nèn, he dàwrah ber kher ka hmu chu a nia, a mak takzet a ni. A lam ka hawi miau avàngin ani pawh chuan min rawn hmu ve nghâl a, ani pawh chuan min hmu chu mak a ti ve a ni ang, a mit a meng zâu deuh tlat.

A kalpuipa lah chuan," U Valpui, ka lãwm e aw," tiin Kuhva leh zûk tùr chu a la sawk sawk a," Ka țhiante'n min lo nghâk reng tawh si a, ka kal nghâl a nia," a ti a, a chhuak zui nghâl daih a, kei pawh chu ka chhuak tho a; mahse, U Valpuia chu biak ka tum avànginn dàwr pâwnah chuan ka tàwi rih a.

A rawn chhuah chuan," Eng nge i tih a? Aizawlah hian ka tihna a nia," ka lo ti vat a, ani chuan," Nang pawh?" a lo ti ve thung a, kei chuan," A, thil pawimawhah ka kal lawk a," ka ti leh a, ani pawh chuan," Kei pawh," a lo ti ve leh a. Ka chhàn ang khera min chhàn lét avàng chuan ka melh ralh a, min en lovin kawng lam chu a thlîr vang vang a.

"Engtikah nge i haw dâwn?" ka ti leh a, "Naktûk khian ka tum a," a tih chuan," A ni maw? Kei pawh ka phei dâwn asin, phei tlâng thei hlauh ila," ka han ti chhuak hluai a. A ngawih tâk rengah erawh chuan ka thil sawi chu a ngaihtuah thui lohthlâk ka ti ta khawp mai, ani Lungleiah a nia, kei Serchhîpah, phei tlàn ngaihna a awm lo hrim hrim.

"Bike-in ka haw ang," a rawn ti ta sup a, bu nghatin," A nih tak chu," ka ti phawt a, chutah," A vâwt duh àwm mang e!" ka ti leh a, ani chuan," A la zia viau. Tu mah ka phur dâwn lo va, i phei ve duh chuan..." a ti leh a, ka en vat a, min lo la en lo hrim hrim. Min en duh lo leh a sawi zo duh lo vêl kher chu... țha tê têin min sâwm ve mai se, ka châk tehlul nèn!

Ticket pawh ka la lo va, U Puii hmêl hriatte, Lungleia phei tùr an awm a, ka bei ve mai ang chu ka ti deuh a ni.

"Bike lêrh deuh kha em ni i ken?" ka tih chuan a nui ta hawk a, lu thing nak nak pah chuan," A lêrh kher lo aw," a ti phawt a, min rawn enin," I duh phawt chuan ka thlah kual ang che," ka rin loh deuh chuan a rawn ti ve ta a, chutih lai tak chuan hlimna hi tehna awm ta se chuan ka hlimna chuan nambar sâng ber ber a hâwl zawk zawk ngei ang.

Ka haw chuan U Puii'n," Ka rin aiin i rei daih a!" a lo tih chuan," Nia, hmêl hriat pakhat ka hmu a, kan titi leh rih alawm le," ka ti ve mai a, tu nge tih erawh sawi kher ka tum lo. Ani chuan," E taka, naktûk chuan dâr 12-a chhuah an ti leh si aw, dâr 9-ah kha chuan an inpeih chhuak hman dâwn leh si lo va, i lo hriat loh palh tâkin," a ti leh a, kei chuan," A ni maw? A va tlai ta daih sî ve! Chuti a nih chuan.. ka'n zâwt kual leh teh ang, hmêl hriat mi dang hma deuh hleka chhuak thei tùr an awm tâkin," ka ti ve zaih a, anni rual kha chuan phei ka tum lo leh daih tawh a, chhuanlam țha tak a lo awm thei chu ka lãwm viau zâwk a ni.

Dâr 9-ah kan chhuak a, Airbag ka ken a lian lo bawk a, kan inkârah ka dah mai, han delh emaw țhut palh emaw pawha delh chhiat tùr a awm lo bawk a, a pawi lo. Bâkah, hnaih lutuk kha ka duh chiah lo va, a bike hi bike lêrh, hnung sâng er chi kha a nih avàngin amah ka zuk nghèng lutuk tùr kha a vêng ve dâwn hrim hrim bawk a ni.

A tlãn chak lutuk lo va, tlãn muang pawh a ni chuang lo. Ke hnih nei chi, mi khalhah hian ka chuang tam lo va, long run-ah chuan mahnia khalh ai chuan mi khalha chuan hi a lo nuam daih zâwk a nih hi. A ngawih theih êm avàng chuan ka be duh vak lo va, lìrthei khalh lai a ni bawk nèn, a lìrthei khalhah chuan a rilru pe se ka duh; mahse, dârkâr khat chuang kan tlàn hnu chuan," A hrehawm em?" tiin min rawn be ve a," Hrehawm lo ve," ka lo ti ve mai a, kan inbe lo leh ta vang vang a, kawng laka chawhmeh an lo zawrhna hmun kan tlàn pelh dâwnah erawh chuan," Lei tùr i nei em?" tiin min zâwt ve ziah thung. 

Serchhîp kan thlen chuan a la tlai lo khawp mai a, lo pênga thingpui in tùrin ka sâwm a, ani erawh chuan," Ka tlang zâwk mai ang," a ti ve thung a," Âwihawm loh êm mai! A la tlai loh hi, eng nge i hmanhmawh chiam a?" ka ti ve tlat a, pawisa pawh pêk ka duh alawm, bâkah, a ril a țâm ang, kawngah kan chàwl hlei nem.

Thingpui hmeh tùr chhang ka lei thla a, thingpui ka chhuan lai chuan,"  En teh, zàna dàwra i rawn kalpui kha, tlangvâl kha, a va la naupan hmèl ve a?" tiin ka zâwt a, ka tân hriat a țangkai lêm lo nain țawng ve se, titi bawrh bawrh se ka duh vàng a ni. 

"Ka hre chiah bîk lo," a lo ti mai a, en deuh hâ pah hian," I țhianpa a ni lo em ni? Ani lah khân a hriat hmèl viau si che a," ka lo ti vat a, ani lah chuan," Hre bîk lo ang, ka țhianpa pawh a ni lo, ka hming erawh chu min zawh miau avàngin a hre ngei ang," a ti leh mai a, mak ka ti nasa mai. A țhianpa ni bawk si lo chu a thil lâkna man a pêksak a, dàwrah an rawn lût tlâng bawk si a.

"I hmêl hriat a ni tal ang, a hming i hria em?" ka tih leh chuan," Ka hmêl hriat hran lo, kawngah kan rawn kal chho dùn a, lighter hman min dîl a, ka hming min zâwtin a hming pawh min hrilh nghâl a, chu zawng chu a ni mai," a lo ti a, chutah," A tân a nuam lovin a zahthlâk duh dâwn êm mai a, ka pe ta mai a nih kha," a tih zawm leh a.

Thingpui in zawha inthiarnaa a luh hlanin a jacket-ah chuan pawisa ka dahsak a, tam pawh a ni lo, petrol man daih vêl a ni, ka sawi chuan a duh dâwn lo tih ka hre chiang si a, a hriat lohah ka dah ru ta rêng a ni. Khaw thlen hunah chuan duh leh hre chhuak mah se a pawi lo, min pe kîr pha dâwn chuang lo va.

Inthiarna ațanga a rawn chhuah chuan," Ka chuan man hi ka pe ve ang che," tiin sumo rate chuan pêk ka tum ve chhin hrim hrim a, ani lah chuan," A zahthlâk e a!" a lo ti sup a, a jacket chu hain," Ka kal nghâl mai ang," a ti leh a, kei chuan," Min phur lo la chuan ka la thleng dâwn hauh si lo va, a chanve tal hi la la?" ka ti leh a, ani erawh chuan bengkhawn hauh lo hian," Krismas chu i nu leh pate bulah i hmang ang tiraw?" a ti leh daih a.

Zànah min rawn be ve teh tlat a! Ka chhàn hma, a number ka hmuh ațangin a sawi tùr àwm chu ka ngaihruat thiam nghâl a, zãngkhai tak hian ka chhâng a. Tah chuan a jacket iptea pawisa chungchâng chu a rawn sawi ta chiah a," Pawisa chawi tùrin ka phur lo che, mahnia lam hla tak tlàn a khawharthlâk duh avàngin ka sâwm che a ni, pawisa hi engtin nge ni dâwn?" a rawn ti a, kei chuan," Nei ta mai la," ka lo ti a.

"I lo haw hunah ka pe mai ang che," a tih leh chuan," Chithlum lei nân lo hmang daih rawh," ka ti ve leh a, a thaw halh ri chu ka hria, a hmêl lan dàn tùr mitthlà rauh rauh pah hian," Ka duh lo, nei mai mai teh, a nih loh pawhin âr chaw lei nânte khân lo hmang la, lo chãwm thau țha nasa rawh khai," ka ti leh a.

*******

Krismas hnaih tawh, ka la haw hma deuh si-ah chuan Pa Zuia'n palai a tîr a ni àwm a, tlaiah phone ka en loh avàngin zànah ka hre ta chauh a, țhianho group-ah an rawn sawi a, an sawi phûr nasa mai! Amah ber erawh chuan," Sawi lo teh u, rawn tîr rih lo tùrin ka ti ve reng a, kan sawi dunnaah pawh nakkum kum tìr lam ka ti reng. Lalmuana, hmán hmãna min star ve țhìntu kha Lungsen ațangin a rawn haw dâwn a, a thîk ta tlat a nih chu! Chu vàng chuan a rawn tîr lui a nih hi, ka thin a rim a, biak pawh ka la be duh lo," a rawn ti hmak hmak a, amah berin a rawn voice tâkah chuan tu mahin kan type peih bîk lo, group video call kan nei ta zâwk a.

"I ti mak êm mai a, be țha mai mai rawh, a rilru a hrehawm ve dáwn asin," Zmi'n a tih chuan Hruaii chuan," Hrehawm ve rawh se, a rilru ka tihrehawm khât ve êm mai," a ti deuh hmak hmak a, Rini chuan nui țhâ chung hian," I'n thinrim kual rih vêl a! A țha; mahse, niin tlâkpui suh se. In inneih hnuah chuan e, 'Paa, mu tawh ang' i ti deuh chhên mai ang," a rawn ti pek a, Ruatpuii chuan," I va ho tak! Hrãm tlahawlh viau suh," tiin a rawn khak a, thinrim vàng pawh a ni chuang lo. Ani lah chuan," Khawnge Mampuii kha? Ani khân a hre chiang ang, tawn hriat nei tawh a nia," a rawn ti leh ham ham a, Feli chuan," A rawn tîr ve a ni mai a, nupui atân pawh a duh tawh takzet che tihna a nia, bâkah, palai a rawn tirh avàngin in innei nghâl dâwn tihna pawh a ni chuang hlei nem," a lo ti ve leh a.

"A rawn call tluk tluk mai, ka chhâng dâwn chuang si lo va," Hruaii chuan a ti leh a, kei chuan," Ni e, Feli sawi kha a dik, a duh viauah che ngai mai la, Lalmuana a thîk pawh chu a hriat thiamawm tho, mipa a nia, thîkthu nei thei a nia, a thîk ve a ni mai. A rawn ngaizâwng leh lo ang che tih i sawi thei miah lo ang," ka lo ti ve a, Hruaii erawh chuan," Ngaihzàwn tum leh pawh ni se ka hawi loh miau te chuan... A, hrem ve deuh a ngai, nuthlawi Ramliani nèn pawh ka hmu dùn ve tho, thîk tho mah ila ka thîkna ka ti lang ngai lo," a lo ti leh a, sawipui dàn thiam a har. A lungawi lo ve rih a ni mai a, tuna lo sawipui chiam pawh awmzia a awm vak kher lo maithei, zàn hun ralin ni liam leh se, a lungawi lohna pawh a reh ve thei mai ang.

Ka rin ang deuhin Hruaii chuan Pa Zuia chu a be duh lo rei hran lo va, an induh a, Pa Zuia pawh hian a lo nawr deuh pawh chu a ni maithei a; mahse, intitau hlena ințhen êm tùr chuan an uiawm ka ti a, hlim takin awm dùn se, innei se, chhûngkaw țha tak din chho se ka duhpui a ni.

Ka haw hnuah palai chu an kal nawn leh a, chhûngkua leh țhenrual țhate an inràwn kual ve a, rem thu an sawi thei ta a ni. A hun erawh chu nakkum February thla an tin zâwn chhin a, a chhan pawh inrem tawh hnua hun rei tak rial leh chu kârah thu neuh neuh a tam duh si a, chu chu an ngaihtuah ve tho a ni.

*I CHAK LOHNA KHA SAWI CHHUAK ZEN LO TÙRIN FÎMKHUR RAWH, A CHHAN CHU MAW, REMCHÂNG LÁK TUM RÀNTE'N CHU CHU NANGMAH BEIH NÁN REMCHÂNGAH AN HMANG THEI TLAT A NI*