☆Mr. BAD(ZAWLAIDI NEITUPA)☆ - 27 By Dingdi Pachuau

☆Mr. BAD(ZAWLAIDI NEITUPA)☆ - 27 By Dingdi Pachuau

"In inneih hun chu ka hman ve lo ang tih ka hlau, ka hman ve theih ngei tùr hun ruat r'u aw, i nu leh pate bulah lo sawi chiang la," ka ti a, ani chuan," Sawi ve mai la, ka sawi aiin an ngai pawimawh daih zâwk ang chu. A thuhrimah, lo lèn ve pawh hi i tum lo hrim hrim em maw ni, min rawn tlawh ve tawh êm êm teh," a lo ti thung a. Ni e, a sawi dik chiah, ka haw ve chhunah pawh hian mi dang inah hian ka kal tam lo, Mampuiite inah hian ka kal tlut tlut ringawt a, ka tidik bîk lo.

A sawi ni la la chuan an inah chuan ka lêng ta ngei a, a nu, Nu Rami chuan min lo chiau-au chùl a, ka hna chungchângte min zâwt zui nghâlin nuam ka tih leh tih lohte min zâwtin a titi nghâl bawrh bawrh mai, Hruaii ve thung chuan min melh rulh rulh ringawt, a che chimawm tak tak a ni. Pa Zuiate nèn ințhenawm lawk an ni bawk a, ani pawh an in chhûnga a vei thuak thuak chu ka va hmu pha reng, ka hmuh apiangin a rawn hawi ziah zui lehnghâl a, rawn lèn ve a châk a ni ngei ang. Hruaii ka va melh leh țhìn a, ani pawh chuan a hmu ve țhin chiang, a nuih leh sak țhin dàn ațang chuan. An va tenawm dùn tak, ni tin zan tuna inhmu thei an nia, innin ve tawh àwm...

"Ti leh ta daih ila, Nunu, hei i țhiannu chuan pasal neih a tum dâwn chu a ni ta mai si a, nang hian engtikah nge neih i tum ve ang le?" tia Hruaii nuin min zawh tâkah chuan ka suangtuahna ram ațanga harh chhuak vatin amah chu ka en vat a," A, kan hmuh zawh ve hunah a ni mai ang chu," nui deuh chung hian ka ti a. Hruaii chuan," I hmuh zawh nasat kha aw, Officer nupui ngat lo chu..." a ti a, sawi zawm lo chuan a ngawi zui ta daih a. A nu chuan," A ni maw? A țha lutuk tlat. Nunui hi zawng i ngaihtuahawm loh êm mai. Sawrkâr hna thawk i ni a, i nu ni se zirtîrtu pension a ni bawk. Chu vàng chuan thingtlâng mi hi chu pasal atân chuan neih tum duh miah suh, i milpui tâwk mi țha i zawng dâwn nia. Mahni milpui, khawsak inphû tawk zawn thiamte hi a pawimawh, chét dàn leh chhûngkaw khawsak inang lo lutukte hi chu a fuh duh lo a nia," a ti dap dap a. 

Ka lèn chhûng chuan chutiang lam hlîr chu kan sawi ta mai a, zilhna thu min hrilh a nih deuh ber chu, ka kal chhan ber pawh chu ka sawi lang ta lo; mahse, Nu Rami sawi dàn ațang chuan ka rin hriat thuak thei tho a, ka sawi chhuak duh ta lo a ni.

Ka haw lamah 'țhiante dang tlawh pah a remchâng êm a' tiin ka tlawh pah a, nilêngin in thum chauh ka tlawh hman a nih chu; mahse, a țha tho tho. Kum danga ka haw aiin ka hlâwk ka inti a, keia tlawh ve mai maia min lo làwm hmêl hmuh kha nuam ka ti a, ka beisei phâk miah loh a ni bawk, tlawh chhuak hman lo mah ila ka thinlung a hlim êm êm tho a ni.

Tunah chuan U Valpuia biak pawh ka hreh tawh lo va, be hmasatu-ah pawh ka țang ta hial mai. Amah ka va beisei vàng a ni lo va, tlângnêl tak leh nuam ti takin a hun hmang se, min be hreh lovin min hmu hreh lo bawk se ka tih vàng a ni. Dàwra ka hmuh țumin," I âr vulhte chu an lian tawh bawk em? Urlâwk zàna kan tham an ni tawh ang maw?" tiin ka fiam zauh a, ani chuan," An tâwk chiah," a lo ti ve mai bawk a. Dàwr kan chhuahsan dâwn chuan," Kan in duh phawt chuan ka vulh tam a, ka ui miah lo a nia," a ti leh a, kei pawh chuan," Kang dâwn chiang lutuk! Kan sawi 'hot' nasa tawh teh a nia," 

tiin ka chhâng ve leh a.

Kei aiin țhiante an phûr a, Hruaii nulat hun chhûng a rei tawh dâwn loh vàngin amah thlah pah nân an ti a, chhuak ve thei lo ber Mampuiite inah bawk chuan kan kan rawt leh ta. Ani pawh a lo phúr ve khawp a, âr man tùr chungchângte sawi nghâlin thawh khâwm den den an han rawt erawh chuan a hminga hlawh nei ve ta ber chuan," Ka lo tum ang e," ka han ti a, an lo Yes' rang hlawm nasa mai.

Zànah chuan kan inkhâwm phawt a, inkhâwm bànah Mampuiite inah chuan kan kal khâwm ta chauh a. Âr kan dah sa tawh a, kan rîk lai lai lai chuan Nu Zotei chuan," Nangniho tak hi chu aw... tleirãwl hawklak mai mai rual pawh in ni tawh si lo va," a ti vang vang a, Rini chuan," Nu Zote, min hre chiang viau tawh em maw ka tia, tleirãwl hawklak rual ai pawh hian kan la hawklak zâwk asin," a lo ti a, a nui sûng a, Nu Zotei chuan," A nih ngei dâwn hi, fa nei tawh ber lah hian 'nu ka nih tawh hi' tih a tum bîk chuang lo," a ti leh a, Mampuii chu kan en a, kan nui țhû hlawm a.

"Min en kher s'u, eng nge fa nei tawh mah ila Âr sa chu a tui tho alawm," a lo ti a, kan nui ta vek mai. A nu chuan," Hmm... a ngaihna hi a awm thlâwt lo, Âr sa chu tui deuhin kang ula, kan ei țeuh dâwn nia," a ti ve leh a, a kal sawn tùr chu enin kan nuih zui var var a.

"I nu hi chu a phakar ve reuh ngawt mai, kha, ei a tum ve tho kha," zàwi deuh sap hian Feli chuan nui chung hian a han ti a, Mampuii chuan," Ka sawi tawh kha, fa neih hnuah pawh sa hi chu a tui dàn ngai rengin a la tui tho, ani pawhin tui a la ti ve reng a," a lo ti leh mai a, a fanu muhìl en lawk tùrin a pindanah a lüt zui ve nghâl a, a thil sawi chu kan sawi chhunzawm a, kan nui leh dar dar țhìn.

U Vid-a leh U Valpuia an rawn lût ve hlawl mai a," Eu, nulaho âr kan chu a va tui dâwn êm! Ei ve lawk ang aw," U Vid-a chuan a rawn ti a, Feli pek chuan lo fiamin," Kan la kang lo, kan la buaipui chauh," a lo ti zauh a, ani chuan," In buaipuina a rei tawh nèn, a tui lo zo vek dâwn a nih kha," a lo ti leh a, Rini chuan," U Vid, lènna tùr in hre nange?" a lo ti zauh a, ani chuan," Hre tuk e a! Zaikháwmna ațangin kan rawn haw zâwk, kan zai nasa tawh a, hrawk a kham bâkah Âr sa ei tùrin kan rawn haw rih a nih hi," a ti ve leh a, a thil sawi kan âwih lo lutuk chuan kan lo nuih a.

'"Âr kan ringawt buaipui lo hian zaikhâwm ve záwk ta che u, da hlawm lutuk mai, tlêm lai deuh khân camp-ahte in lût a ni lo'm ni?" a hnu deuha a rawn ti leh thur thur chuan Hruaii chuan," Camp luh pawhin Âr sa chu a tui tho," a lo ti sap a, a nui pût pût lehnghâl. Mampuii chuan," A, 'an ril a țâm tawh dâwn êm mai a, an zai nasa àwm si a' tiin Feli hian,' Kansak ang u,' a tia," pindan ațanga lo chhuah pah chuan a rawn ti ve a, U Vid-a chuan," Um... ani hi chuan a hming hi a pu zo tak tak a ni, a lo fel ber mai," a ti leh a, Feli nuam ti lo meng kual vêl chu kan nuih zui vak vak a.

Coffee in an châk deuh tlat avàng chuan lei tùrin kan chhuak a, U Vid-a chuan pâwna kan chhuak tawh chu min rawn ko ding leh rihin," Zàna nula chhuah a mawi lo, Țhiana nèn hian kan lo kal ang e," a rawn ti a," A țha hlauh," tiin Ruatpuii chu a lêt leh vut a, ka lêt dáwn chiah tihah U Vid-a chu rawn chhuak lehin," Nula hlawh nei khân min kalpui se, thil dang pawh leitîr țeuh ka duh dâwn a," a rawn ti leh kher a, kei chuan," E, i duh apiang a ni mai," ka lo ti a, in chhûng ațang chuan Rini chuan," Lo lei țeuh rawh u," a rawn ti làng láng a, ka nui hak mai, U Valpuia nèn kan pathum chuan kan kal ta a.

 

Khawpui hnaihah awm ve tho mah ila thingtlâng khua ngang kan ni a, naupang lam pawh pâwnah an la pawnto a, an lo ri nak nak mai. Street light awm lo mah se thla a êng ruai a, in kawta êng chhiho An chhûngte tân pawh han khuahkhirh viau hi a lo harsa a ni ang e, bâkah, a hun hian a keng ve hrim hrim tawh a, an zalen theih hun a ni bawk si nèn, dem viau theih pawh an ni lo.

Titi mawlh mawlh chunga kalin ka kal hmasa ber a, ka ke bula hàlpuah a rawn puah tâk țhuaiah chuan ka phu nasa lutuk a, ka au chhuak țhat a, ka bul chiaha kal U Valpuia'n min rawn chelh hman lo se chuan ka tlu chiang ngawt ang! Khùr zawih zawih chung chuan U Valpuia bân chu ka țhãm țâwk mai a, U Vid-a chuan kan piaha naupangho chu auin," Hàlpuah kha in hãl duh a nih pawhin mi bulah chuan hãl suh u, mi awm lohna lai zêlah hãl rawh u," a han ti lùng lúng a, pakhat chuan," Kan tihpalh lutuk!" a rawn ti a, khùr dar dar chung chuan ka han che sawn a, U Valpuia pawh chuan min thlah ve nghâl mai bawk a.

Kan kal țan leh chiah tihah chuan," U Lianmawii meizial ka'n lei ang e, lo va kal ula, in haw lam ka lo chäng dâwn che u nia," U Vid-a chuan a ti a, kawng thlang lamah chuan a kal zui nghâl ta daih a. U Valpuia chuan," A va ti ho mai mai e aw," a ti sup a, kei chuan," I pêng ve duh em? Ka kal ngam tho alawm," ka lo ti a, ani erawh chuan," Duh lo ve. Bâkah, nangmah chauha kaltîr che chu ka tum hauh lo," a lo ti thung a.

Ngawi rengin kan kal a, dàwr thlen hma deuh chuan tlangvâl pathum kan tâwk a, an rùi deuh nia ka hriat avàng chuan U Valpuia chu ka hnaih hret hret a, amah si deuhthawin, a phènah ka kal titih a nih chu; mahse, țha takin kan inpèl a, ka thaw huai a.

"I hlau a ni maw?" a rawn tih chuan," Aw, dik tak chuan rùi hi chu ka nêl thei țhìn lo va," ka lo ti vat a, a ngawi deuh vang vang a, chutah," A zia lo ngawt mai," a rawn ti chhuak sup a, a thil sawi mak ka tih deuh avàng chuan ka en deuh hâ a; mahse, a hmêl hmu chiang tùrin êng a awm hran lo va, eng ang hmêl puin nge chu thil chu a sawi ka hre thei lo.

Kan duhte kan lei hnu chuan kan lêt leh a, muangchânga a kal avàng chuan ka tàwi ve hret hret a," Nunu, zâwt ngam tùr che ka ni lo tih chu ka hria a; mahse, ka zâwt tho ang che, tunah hian kawp lai i nei em?" a rawn tih chhuah sup chuan ka ding dat a, a lam erawh ka en lo, hetiang lam hi a sawi chhuah ka ring deuh rêng a ni, ka nghâk chhuak ta hrâm e. 

Che lo chuan ka ding reng phawt a, U Vid-a'n chance min pe ta rau rau, huaisen takin ka duh ka sawi ang. Ka ngawih deuh reng vàng chu nge, a inthiam lo leh deuh si a ni ang," Ka tih palh," a ti leh sup a, a kal țan leh chiah tihah chuan," Ka nei lo," ka ti ve ta a, a thil min zawhah hian ani tân inthiam lohna chhan tùr a awm lo, min zâwt ve a ni mai.

A ding leh dat a," Engati nge i neih loh?" a rawn ti leh ringawt a, ka nui hak a," Hmangaih dang ka neih loh vàng a ni ang chu," tiin dik tak hian ka chhâng leh a. A pawi lo, thu dik tak hi hriattîr ka duh, ka la duh reng a ni tih pawh hi hre mah se pawi tihna ka nei lo rêng rêng, ka la duhin ka la hmangaih reng miau si a, ani bâk hian ka thinlung an luah si lo.

Kan lam pana mi lo kal thãwm a awm avàng chuan muangchângin kan kal leh ta a, țawng lovin kan kal zêl a, U Lianmawiite in bul thlen hma deuh chuan," Nunu...??" tiin a ding leh rih a," Ka la hmangaih reng che a ni, hmân ațang tawh khân," a rawn ti leh sup sup a, he thil hi ka lo nghah rûk reuh reuh, hriat hlàn ka nghahhlelh êm êm țhin chu a ni, ka hre ta chiah e; mahse, a aw chu a khùr thâm deuh tlat, he pa hi, a zãm ve tihna maw? A zãm dâwn em ni? Mipa, pà ve tâwk tak kha a ni țhìn si a; mahse, ka hre sual lo, a khùr tlat a ni, vâwt a tih vàngin em ni a khurh deuh le?

Inchhuan hun leh dâwt sawi hun a ni lo va, induh khum hun ni lovin hun țha, thu dik tak sawi hun a ni tih ka hria, bawhpelh tum bîk lovin," Kei pawhin hmân ata tawh tûn thleng hian ka la hmangaih reng che a ni," ka ti lêt ve ta a, khùr miah lova ka sawi chhuak thei chu mak ka inti zâwk! 

Ka kut chu a rawn vuan a, ka lo vuan lêt ve nghâl chat. Ka thinlung chu sawi hleih theih loh hlimna hian a rawn tuam nghâl hlup hlup a, ka thin a phu rang a, ka thisen kalte chu chak zet zetin an insûl pèl zut zut ni maiin ka hre bawk. Nuam ka va ti tak! Ka mumang mai a ni ang tih hlauin U Valpuia kut chu ka hmer nghet salh a, ani pawh chuan min rawn hmer nghet ve salh bawk a.

Mampuiite in kan thlen chuan min lo fiamin," In va rei tak! In rawn lêt thei dâwn tawh lo emaw kan lo ti alawm," an lo ti hlut a, kan thil lei an hmuh erawh chuan," A, a àwm hliah hliah a nih hi, in lei tam êm mai," an ti leh a, U Vid-a leh U Valpuia erawh an chhuak leh rih a, eng an ti dâwn chu ni maw ka ri rilru deuh a; mahse, ka ngaihtuah rei lo, an rawn lût leh thuai a.

Mut hnuah kan in-text a, rei vak lo chhûng chauh. A chhan pawh zàn a rei tawh a, khua a váwt bawk nèn, rei tak meng tùrin ka duh lo va, ani pawhin meng rei lo tùrin min ti ve tho bawk a, inmangțha hmasatu nih erawh kan hreh dùn khawp mai.

A fâla kan inhmuha kan awm dun lehna hmasa ber chu ruai țheh zawhah Mampuiite inah bawk a ni a, Mampuii room-a ka hmui hnawih țhat laiin a rawn lût a," I lo awm ka ring rêng a!" ti supa kawng khàr a rual a, min rawn panin min rawn kuah zui ta nghâl a, eng mah sawi lo chuan ka lo kuah lêt ve zui nghâl bawk. He hun hi ka va nghâk rei tak! Thlamuang tak leh pangchang tak si a a áwma bei hlè hlé hi ka thlahlel a, ka ngai a, ka suangtuah fo țhìn a nih kha.

Kan inkuah vawng vawng hnu chuan," Zaikhâwm tùra i kal hmain in kawmchhak Saron buk hnuaiah khân inhmu lawk ang aw, ka lo nghâk ang che," tiin min kuahna chu a thlah a, min en leh vang vang hnu chuan a chhuak ta chauh a. Min va tihrilhhai mai mai tak! Kan infâwp dâwn emaw tih laiin min chhuahsan leh daih a... A hma ang khân min thlahlel tawh lêm lo a ni ngei ang; mahse... min la hmangaih reng tal a, min hrilh kha.

Zaikhâwm tùra ka insiam lai chuan ka nuin," Zanin chu ka peih lo riau mai, a vâwt bawk si a," a tih chu ka pa chuan," I nuamsam lo em ni?" a lo ti vat a, ani chuan," Nuamsam lo lo e; mahse, zanin chu Bawihtei'n min kêp mai teh se, ka ke a hit êm mai," a ti leh a. Room țang chuan an titi chu ka hre thei vek a, ka mit ka hnawih lai chuan ka pa chuan," Sikri ka chhêm ang a, i ke chu i hem lum dâwn nia, i kal loh chuan kei pawh ka kal peih bîk lo," a ti leh a, ka nu chuan," Nakzànah Pathian zâra dam chuan kan kal leh mai dâwn nia," a lo ti ve leh a.

In ațanga chhuakin chhak lamah chuan a rûkin ka chho ta zàl zál a, a lo awm reng tawh nghe nghe. A bulah țhuin," Min lo nghâk rei tawh em? Ka hman----" ka la sawi zawh hma chuan min kuah nghâlin duhthawh tak hian min fâwp zui ta a. Ka lo nghah reng, nimin lam ațang tawha ka lo suangtuah tawh a nih avàng chuan hun khawhral ka tum bîk lo, amah anga duhthawh chuan ka chhâng lêt ve tàwn táwn a. Kan duhthawh bawk a ni ang, kan inthlah meuh chuan thâwk kan la dùn ham ham a, kan inkuahna erawh kan la inthlah chuang lo.

Zawh tùr tam tak ka nei nain tunah hi chuan a la hun rih lo, tûn ang hun hi ka tawng khât tawh a, eng mahin a tihbuai ka phal lo. A țawng bîk loh avàng chuan ka țawng duh bîk lo va, inpawm chialin a chângin kan infâwp zauh zauh a, tuna ka hlimna hi zawng eng mahin ka thleng phal lo a ni.

Chutah, hre chhuak thutin," Ka lipstick!" ka ti sap a," A pherh kual vek tawh ngei ang," ka ti leh a, ani erawh chuan," Ka ei zo vek tawh zâwk ang, i hnawih țha leh mai dâwn nia," a lo ti mai a, a khabe hmul tlêm tuaisak nauh nauh pah chuan," Hei hi tuai nuam ka ti," ka ti leh sap a, ani chu a lo nui hak a.

*MI DANGTE NUN EN DIK RÊNG RÉNGA I HUN I HMAN CHUAN HMANGAIHNA HUN I NEI THEI NGAI LO ANG*