☆Mr. BAD(ZAWLAIDI NEITUPA(☆ - 28 By Dingdi Pachuau

☆Mr. BAD(ZAWLAIDI NEITUPA)☆- 28 By Dingdi Pachuau

Tûn țum ka haw chu engkim kan sawi fel ti ila a dikin ka ring, kan insawi fel thut a, kan hma hun tùr pawh kan sawi tel nghâl vek a ni. Kan kum ni se a tlêm êm êm tawh bîk lo va, nupui pasal nei rual kan ni ve tawh, ani phei chu thingtlângah chuan tlangvâl senior a ni pha tawh hial mai a, hun tam nghâk tawh lova inneih thuai a rawt pawh chuan ka 'Amen' thlap.

"Ka nihna zawng zawng leh ka dinhmun i hre vek a; mahse, chuti chung chuan min hnar chuang lo va, ka lãwm tak tak a ni, ka phû loh ni mah la... Mite pawhin chutiang chuan sawi ngei dâwn mah se ka beng ka chhu ngawng tlat dâwn thung, ka tawn tùr a ni miau a. Nangin min hmangaih a, keiin ka hmangaih hi mi dang tân ka kaltîr phal ngai dâwn bawk si lo a ni."

Ngaihthlâk nuam ka va ti tak! Ama kâ ngei ațanga chutiang thu han ngaihthlâk chu a nuam danglam êm asin, ka ngaithla kham thei lo, a duh duh sawi se, lo inrawlh ka duh lo va, ngaihthlâk lama ramțan ka duh zâwk a ni.

"Kan lo inhre chiang ve tawh a, tûn ang kumah hi chuan inzui rei viau pawh ngaiin ka hre tawh lo," a ti leh sup sup a, kei pawh chuan dik ka ti tih lantîr nân ka lu ka lo bu nghat a, a sam chu tuaisakin," Boss berin i tih tlatte chuan," ka ti a, ka nuih sak bawk a. A pindanah awmin hun thâwl kan nei ve a, khumah țhuin kan inkuah a, kan infâwp leh țhìn bawk. Tu dang mah kan ngai lo, in chhûngah Mampuiite nufa an awm ve a, tunah tak hian mitmei vèn tùr a awm lo nain kan pahnih chauhin kan awm lo tih leh nupa kan la ni lo tih erawh ka hre ve kar a, Pathian duh loh zâwnga awm ka tum chuang lo. 

"Hma lam hun ngaihtuah lâwk hi chu a ţha reng mai; mahse, chutih rual chuan ngaihtuah lâwk nasat lutuk leh harsatna awm thei zawng zawng pawh ngaihtuah kim veka chumi enghelh rùna nun hman hi a țha lo a ni, inneihna dàltîrtu atân hlauh phei chuan hman rêng rêng loh tùr," a tih leh sup sup chuan sawi dik ka va ti leh thlap thlap tak! Ngun takin ka lo ngaithla a," Kan induhin kan inhmangaih a, tunah hian rilru puitling lo i lo inti rih pawh a ni thei, mite pawh rilru puitling sa khapin nupui pasal an nei kher lo a nia, an innei a, an rilru chu a puilting chho ve tial tial mai țhìn a ni. Kan awm dun theihna tùr a nih phawt chuan eng mah hi tawn huphurh ka nei lo va, eng harsatna pawh tawng dâwn ila, ka inhuam vek a ni, chhûngkaw dinpui tùr che chuan," a ti leh malh malh a, a sawi chhuah ka rin phâk ngai loh thleng thlengin a sawi chhuak mial mial mai si a, a thil sawi tinrêng mai chu hriat hmaih neih ka hlau a, ngun takin ka ngaithla a ni, a sawi chhuak zen zen dâwn hauh si lo.

"Ka thu sawi i ngaithla ngar ngar a, sawi ve tawh rawh, ka lo ngaithla ve tawh ang e," tia min enin a hnârin ka hnâr a rawn tawktîr zoh a, kei erawh chuan a beng tuaisak pah hian" A, pa ber thu sawi laiin nu ber ka lo inrawlh ve a dik hlei nem, pa ber thu sawi kha ngaihnawm ka ti a, dik ka ti vek bawk, sawi zêl rawh," ka lo ti thung a. Min en reng chung hian," Pa ber.." a ti sup a, nui suk chung hian," Hriat a hrehawm miah lo," tiin a rawn kûn hnai zui zat a.

Ka phone riin kan induat lai chu min rawn tibuai pek a, ka ngei tak tak a ni. "A va hun lo tak!" tiin ka phun sap a, ani chuan," A pawimawh viau lo a nih teh chuan..." a lo ti ve bawk a, ri mai mai se han tih dâwn lahin a lo bengchheng ve tho bawk si nèn, ka han en chuan Mala a lo ni a, U Valpuia ka en leh a, ani pawh chuan ka phone-a Mala hming lang kalh chu a hmu chiang khawp mai; mahse, min kuahna chu a thlah phah chuang hauh lo.

"Krismas i hmang nuam bawk a ni ang, i reh êm mai," a rawn ti a, kei chuan," Nuam ve bawk ang chu, kan khuaah ka hmang miau a," nui chung hian ka ti a, U Valpuia'n min kuah ngheh sauh avàng chuan ka nuih chu a duh lo a nih ka ring deuh a, kan inbiakna a hriat ve theih nân loud-speaker ka on zui ta daih a.

"A làwmawm a nih chu. Chuan, in pa nèn pawh in inkâr a fel tawh ngeiin ka ring a... a dik em?" a rawn ti leh a, U Valpuia chu ka en phawt a, ani chuan mit khap hauh lo hian min lo en reng a, a hmuiah fawhsak zohin," I ring em?" tiin Mala chu ka chhâng leh a, ani chuan," I awka chhuak a zãngkhai êm mai, a dik a nih ka ring," a rawn ti leh a," Nangmah i nia, ka hrilh ang che, a dik aw," ka han ti a, a rawn nui hak a.

"A tihzia nasat chu, ka lawmpui hlê mai che; mahse, min biak țhat duh loh phah chuang lo la aw, ka riang êm hi," a rawn tih leh chuan," Engah nge ka biak țhat duh loh ngawt ang che le? Ka țhian țha tak i nia, biak duh loh ti ang zâwng kha chuan sawi tawh miah suh. Thu dang daih, Aizâwlah chuan em ni Krismas chu i hman tâk?" tia chhângin ka zâwt ve thung a, chutiang lam hawia kan inbiak tâk avàng chuan sawi tùr a rawn awm chho ta zêl a, kan inbiak tâk zêlah chuan U Valpuia nèn a hmaa kan awm ang khân awm theih tawh hek loh le, ka chala a fawh zoh hnuah khumah min nghat a, hmui phuna," Inbe r'u," tiin pindan ațang chuan a chhuak zui ta nghâl a, ka en zui reng a, thinrim hmêl a pu pawhin ka hre lo.

Minute 20 vêl zet kan inbiak hnu chuan kan duh tâwk ta chauh a, ka chhuah hma chuan a rizai leh a mutphah chu ka pawt mar leh te te a, chumi hnuah ka chhuak ta chauh a. U Valpuia chu Mampuii nèn lo țhu dùnin thingpui an lo in a, Mampuii chuan," Nopuiah khân siam sa a awm, inthlit ve mai rawh," a lo ti vat a; mahse, U Valpuia chuan min lo thlitsak vat a.

*******

Ka ngaihtuah lêt țhìn a, U Vid-a khân Urlâwk zàna dàwr kan kalnaah khân chance min pe lo ta ang se, tûn hun hi kan thleng ang em ka ti țhìn, ka ngaihtuah lo thei lo. Anni unau hi an lo awm lo ang tih ka hlau, ka tân mai ni lovin U Valpuia tân pawh an țangkai si a, an unau hian kan tân chuan țhian țha mai piah lamah kan engkim an ni deuh mai. Kan nih loh chhûngin U Vid-a'n a chhawmdãwl char char a, keiin ka ngaihtuah theih loh lai hun, a ruih buai êm êm lai leh a pa a chàn lai pawhin U Vid-a a tân a awm a, a buaipui vek a, U Valpuia tân a thil tihsak zawng zawngah hian Pathian malsàwmna tam tak dawng lêt ngei se tih hi ka duh a, ka beiseina a ni bawk.

Kum a thara Serchhipa ka kal leh hnuah pawh ni tinin kan inbia a, thil ho tê tê nia ka ngaih thleng pawha ka chanchin leh thil tihte hriat zél a duh avàngin min rawn be lo thei lo. Mite chuan 'over' pawh an lo ti a ni maithei a; mahse, kei chuan ka ti ve lo, min ngaihtuahna a ti langah ka ngai a, ka tân a inpumpêknaah ka ngai lo thei lo, hetiang tak hian ka unaute leh ka nu leh pa pawhin min ngaihsakna an tilang ve lo ka ti ve tlat. Ka tân a hun hlu tak min pe a, a hun hlutzia ka hria alawm, a buai ve thei êm asin, a buai țhinzia hretu tân chuan a làwmawm ngawih ngawih. Chubâkah, ka chanchin ngaihsak miah lote ai chuan min ngaihven êm êmtu chu kei pawhin ka ngaihsak lo thei nâng, zàn lamah hian ka be hmasa ve țhìn bawk.

"Tûn kâr tàwp hian ka rawn kan lawk ang che aw, hmuh che ka châk  leh tawh si a," a rawn tih chuan," A ni maw? I hman ang maw?" ka lo ti vat a, ka rilru chu hlimnain a rawn tuam nghâl zat bawk. Ani chuan," Hman e, i tâna hun ka neih loh te'n, tu tân nge ka neih chuan ang," a rawn ti ve ngei a, ka nui hak a," Va sweet roh tak! Muah muah muah... I rawn kal loh vaih, chawhmeh tui tâwkin ka lo buatsaih ang!" ka ti a, ka phùrzia chu, phûr tak hi ka ni ringawt.

Inrinni tûkțhuan ei khamah a rawn chhuak a, U Vid-a'n min rawn be nghe nghe a," Kha, a rawn kal kha aw, in pahnih chauhin in awm dâwn sia, ka ngaihtuah riau mai che u, in chesual hlauh ang e!" a rawn ti pek a, patling ve tawh thu sawi atân chuan a va ho thei tak! He pa hi chu a puitling hlei thei dâwn lo a nih hi.

Nimin tlai lamah in chhûng ka tifai vek a, zànah thuamhnaw leh eng eng emaw bàl ka su fai a, tukinah tukverh dârthlalang leh furnitures ka neih vete ka tifai leh a, khual țha lo thleng tùr chuan ka inpeih thawkhat ta viau mai, nakinah chhùn thingpui hmeh tùr leh chawhmeh leiin ka chhuak zawk ang chu.

A rawn thleng har deuh hlek a, nge ka lo nghahhlelh lutuk tawh vàng zâwk, ka lo awm hlè hlé thei tawh lo a ni ber mai. In chung dàwr kawtah ka lo nghâk a, a lo thleng a, mi hmuh laia lo kuah chûk chûk thu awm hek lo, in chhûng kan luh hnuah chauh ka kuah ngam!! Phone-a inbiak leh video call-a inbiak hi chuan kan inkuah thei mang si lo va, a tak ngeia inhmuh a châkawm sauh țhìn a ni.

"Lo țhu rawh, thingpui ka'n siam ang e," ka ti a, țhu ve mai tùrah ka ngai a; mahse, ka hnung lam ațanga ka kâwnga min rawn kuah tâkah chuan ka thil tih lai chu ka tàwp chawt a, ka kokia a khabe rawn nghah pah hian," Heti hian rei lo tê awm lawk ang," a ti sup a, a thu chu âwihin a bekah chuan ka fawhsak zoh a.

A hnuah thingpui chu ka siam a, a ril pawh a țâm tawh viauin ka ring a ni. Thingpui tui tak leh a hmeh tùr cake tui tâwk tak chu ka chhawp bawk a, heta a awm chhûng na nâ nâ chuan ka lei phâk tâwka tui ber ber chi ngeia hrai puar  ka duh a ni.

"Ei țeuh rawh aw, i ril a țâm tawh ngawt ang chu," ka ti a, a bulah chuan ka țhu zui ve nghâl a. Ani chuan," Țam hran lo ve; mahse, hei i siam tui hmèl lutuk a, ril a tițâm thei hial dâwn a nih hi," a lo ti ve a, ni e, tui thei tùr ang berin ka siam ve a, a tui ngeiin ka ring bawk.

Tui lumsakin inbual tùrin ka ti a, ani pawh chuan a lo hnial bîk lêm lo; mahse, tui lum chu a la duh lo va; mahse, bucket-ah ka dah luihsak tho a, a duh dàn dánin hmang teh se, inbual nân a hman duh loh leh inthiar nân pawh hmang se a pawi lo. Kei pawh muangchângin nakinah ka inbual ve ang chu.

Innghèng chialin țhutthlèngah kan țhu a, kan inen a, ka hlim êm avàng chuan ka nui leh ringawt țhìn bawk. Duat takin min kuah a, khua a vawh avàngin ka ke ka hlâng chho ãt a, ka lang tê ngawtin ka ring. Kan țawng vak lo va, a ngai lêm lo kan ti a ni mahna! Tunah chuan kan inhnaih leh tawh a, țawng chiam ai chuan hetia awm hi a nuam daih zâwk ka ti.

A hnu deuhah erawh," Thil ka zâwt mai mai ang che aw," ka ti a," Umm," a lo ti mai a, a khabe hmul tuaisak nauh nauh pah chuan," Zu i nghei daih chhan leh i nghei dàn ka hre châk a," ka han ti a, min chhàn hma chuan thâwk a la hawk phawt a, chumi hnuah chuan," Zu in reng kha ka nin ve tho rualin ka harhfìm kha chuan thil ka ngaihtuah kual nasa țhìn a, țangkai lo tak tak thlengin. Chumi lak ațanga ka fihlìm theihna chu zu kha niin ka ngai a, ruih chhum hmawk kha ka duh ber țhìn a ni; mahse, zàn khat chu ka mumangah ka lo hmu che a, i lo țap nghe nghe a. Rùi pai țuang țuang chung hian ka lo pan che a; mahse, ka khawih thei miah lo che a nih chu. Ka thinrim chu ka lo âng tuar tuar a, ka ruih êm bawk si avàng chuan ka tlu sawp hnawk a, chutah chuan ka pa hian min rawn kuah thawh pahin,' Bawiha, duh tâwk tawh la, i hlimna tùr emaw i tih kha i lungngaihna tùr a nih zâwk kha, i hmu a ni lo'm ni? Nunui kha, a țah chhan kha i hria em? I ngaihtuah lo em ni? Bawiha, khawngaihin duh tâwk tawh rawh aw, i tlin lo thuai mai ang tih a hlauhawm. Khawhar leh mal tak niin i inhria a ni thei; mahse, i mal lo aw, ka kalsan ngai lo che, i sim theih hun hi dawhthei takin ka nghâk reng a ni, ka fapa i nia, ka hmangaih êm êm che a ni,' a lo ti a, harh kâwkin ka pa hmêl chu ka han en chho a, a mitmengah chuan min hmangaihna chiang taka ka hmuh rualin lungngaihna eng emaw tak a nei tih ka hmu tel bawk a, kha a mitmeng khân min hneh tak zet a ni. Chuan, khami tûk ațang khân zû hi ka kâah a lût leh ta miah lo va, ka nghei chho a nih tâk ber chu, nghei kha tum lovin ka nghei tawp mai a ni ber," a ti duah a, kei chuan," I pa chu Pathianin a hmuhtîr che a ni ngei mai, Pathian pawhin a khawngaih tawh che a, nghei tùrin a duh tawh che a nih ka ring. I nghei hnua i hmêl țhat zualzia hi maw, i inhre kher lo maithei a; mahse, zû i in țhin lai boruak leh tuna i boruak hi chu inthlau tak a ni ringawt, engkimah a inthlau ti ila a dik ang. Chuan, zu i nghei hi i làwm tluk zetin ka lãwm bawk a ni," ka lo ti ve a.

Zànah chuan chhuatah a mutna tùr lum nuam tâwk tùrin ka phahsak a, vâwt a tih ka hlauh avàngin rizai leh blanket pawh pahnih ve ve ka dah chhuak bawk. Ani erawh chuan a ngaih loh thu a lo sawi ve a," Pakhat kha a tâwk," a lo ti tlat a; mahse, ka dah lût tawh chuang lo. Kan mut hnuah phone-in kan in-text leh a! Tleirãwl tê ngaihzâwng nei thar hi kan nih duh hmèl ka tia, Rinite'n kan thil tih dàn hi hre ta se, 'over' min ti mai mai ngawt ang chu.

A tûkah chuan min lo thawh khalh a, tui lo lumin thingpui pawh a lo chhuang diam tawh nghe nghe. Ka tho tlai hran bîk miah si lo va, a tho hma leh lutuk chu ka khawngaih a, a mutna ni se a lo thlep fel diam bawk. Pasal fel tak chu a nih dâwn hi te han ti ila...

Ka inkhâwm bîk lo, tlai lamah haw leh mai a tum si a, zîngkâr khaw vâwt tak hnuaia haw ai chuan ka duhpui zâwk a; mahse, la awm rei thei deuh se chu ka ti tho bawk a, a duh dàn dah lal zâwk teh ang.

Chhùn inkhâwm bàn hun vêlah țhiante'n min rawn video call a, an rawn dâk far ka hmuh chuan ka nuih an tiza angreng khawp a. Rini chuan," Kan pasalțha chu a hmêl rawn tilang ve la," a rawn ti a, a rawn nui var var pah bawk. A rawn kal tih an lo hre leh vek tawh a ni ngei mai, ka hrilh miah si lo va, thil hi an hre rang thei teh e.

"Ni lo, Superman-a zâwk maw le," Hruaii chuan a lo ti a, an nui ta dar dar a, kei chuan," Tu chu maw?" tiin ka haider lui tlat a, U Valpuia lah chu ka bul lawkah țhuin kan țawng a hre ve vek sia, a lo nui ve suk suk mai.

"In over êm mai aw, mi dangte khân an lo hre rêu rêu ang e!" tiin ka han vau khar khar hlawm a, anni lah chuan," Hre mah se eng nge pawi? Tikhân tlãn dùn daih nghe nghe teh u," an ti a, Feli chuan," Hruaii hi pasal neih khalh thut teh a!" a rawn ti leh a, an nui tak vak vak a, chhe hèl hùl hlawm lutuk mai. An nui ring si, an thãwm hre pha an lo awm vaih chuan aw...

A hnuah erawh kan titi a pãngngai thei ta deuh a, U Valpuia hmêl pawh ka hmuhtîr ve ta hlawm a," Nupa tak tak in nih duh hmèl lutuk! Nizàn lam chu, ngaihtuah zui ngaiin in awm lo maw?" Zmi chuan a rawn ti leh zauh a," In rilru hi a va thianghlim lo țhìn tak êm!! Pathianni a nih hi hre ve ta che u, in inkhâwm bâng chiah a ni lo'm ni?" ka han tih lah chuan," A, rilru hi chu lo thianghlim vak lo mah se a taka kan va chêt chhuahpui lêm loh hi chuan a pawi lo," te an rawn ti vêl mai mai a, thu tak hla tak pawhin a inbiak theih loh.

Engtin nge U Valpuia rawn kal chu ka nute'n an lo hriat theih ka hre lo, min rawn biakin," Valpuia a rawn kal a ni maw? Nula tân chuan fîmkhur tluk hi a awm lo asin, hmingchhiat hi a hlauhawm a, sawi zeuh i kai tawh chuan, chumi tireh tùr pawh chuan hun tam a duh țhìn," a rawn ti kalh kalh a, sawi tùr a vâng duh teh asin. Chu mai la duh tâwk lo chuan," In lo inzui leh țan a nih phei chuan, ka duh miah lo, in kal thui hmain bànsan vat ang che," a rawn ti leh a, hei hi ka rin lâwk dàn deuh chu ni tho mah se a taka han tawn meuh chuan a dàn a dang khawp mai.

*MI, A NUN HLUIA CHHUAN TÙR NEI MIAH LO HIAN NUN THAR A NEI THEI A, A NUN NGAI RENGIN A NUNG BÎK LO. A ȚHA LO TIH A HRIA A, HMA LAM PANA A KAL VE BEK BEK LAIIN LO NUIHSAWHTU LEH LO ENTLÊUTU NI SUH ANG CHE*