☆Mr. BAD(ZAWLAIDI NEITUPA)☆ - 29 By Dingdi Pachuau

☆Mr. BAD(ZAWLAIDI NEITUPA)☆ - 29 By Dingdi Pachuau

Ka nuin chutiang thu chu min hrilh mah se U Valpuia biak chu ka țhulh phah chuang lo va, bànsan pawh ka tum chuang lo. Țawngthu chhe lovah, lo bànsan ta ang ila, engtin nge a awm ang? Laina hnai leh chhûngkua tak tak a nei lo va, kei lehzêlin ka phatsante chuan... a ni thei lo. Ka hmangaih a, ani pawhin min hmangaih a, ani bâk hi chu duh ka nei thei lo a ni.

"U Valpui, kan ințhen lai khân engtin nge i hun i hman țhin? Ka la naupan deuh lai kha a nia, kei chuan ka la hre chiang ngang mai," tiin ka zâwt chhin a, ani chuan," A tìrah kha ruih chhum hmawk tumin ni tin zan tin zû ka in a, ka rui țhìn rêng bawk a, a chhan chu harhfìm kha ka hlau, ka ngam lo a ni. Ka rilru a lo puitling lo viau tih tûn hnû hian ka ngaihtuah lêt țhìn, ka harhfìm chuan nangmah chauh ka ngaihtuahnaah i awm zêl si a, kan inkâr kha tihngaihna awm lo hmuhin ka hmu a, hma lam hun nei dùn thei niin ka inngai lo bawk," tiin min chhâng a, ama lam ațanga ngaihtuah chuan a dik thei viau ang. 

"Umm... a nih leh, thil pakhat chauh ka zâwt leh mai mai ang che aw, min chhàn duh loh pawhin a pawi chuang lo. Kan inkâr siam țhat leh i duh chhan kha ka hre châk mai mai a... kum khati chen kan ințhen tawh a, eng vànga hma la thar leh nge i nih?" tiin ka hriat châk chu ka zâwt leh ta a, min chhàn duh loh pawhin a pawi chuang lo.

"Ka phû loh i nihzia lam kha chu ka sawi lo ang ka tih tawh kha, kha kha chu dah țha ta ila; a țantìrah chuan ka duhna che kha ka hre thiam vak lo va, a rei telh telh a, ka hmangaih che a ni tih kha ka hre thiam chho ta a; mahse, ka țhen che kha a ngai ta thut a, a chhan chu i hriat tawh tho kha. Khatia ka nung chho reng mai kha Țhianate unau leh ka pa khân min zilh nasa țhìn a ni, Mampuii phei chuan,' Nunui'n a hmangaih êm êm a; mahse, chuti chung chung chuan na thei ang bera siamin i țhen a, bãwrãw takin i nun i hmang chho zui, a hmangaihna kha i lo phû hlawl lo, in ințhen kha a lo țha a nih hi,' tiin hmaichhanah min àn khum nghe nghe; mahse, engtin mahin ka chhâng lét lo, a tidik chiah si a a," a ti leh dap dap a, a ngawi deuh vang vang phawt a, thâwk la huaiin," Min hmangaih tih kha ka ringhlel ngai lo; mahse, na taka ka siam hnuah che kha chuan ka beisei ngam tawh lo che a, i rilru min pêk leh duh pawh ka ring tawh hek lo; mahse, ka hmangaihna che a reh thei si lo va, min hmangaih chuan i nih ve tho ka ring bawk a, ka nghâk reng che chu ka ti ngam chiah lo nain a rûk hian nghah chu ka nei țhìn alawm. Chu chuan chakna pawh min pe țhìn a, mi dang țha tak tak i hmu țeuh ang tih chu ka hre chiang viau nain ka tâna mi țha ber, min hmangaihtu leh ka hmangaih bawk si chu eng pawh tawrh huamin i hnênah ka rilru dik tak ka sawi ta a ni," a rawn ti leh a.

"Ka lãwm e, ka tâna i lo awm reng țhin avàngin," ka han ti sap a, ani chuan," Lãwm tùr dik tak chu kei hi ka ni, ka lãwm êm êm bawk. Chuan, a nih, kan ințhen lai pawh ti lovin ka țhen lai che khân engtin nge i awm? Rin hriat ruak mah ila a tak hriat a châkawm a," a rawn ti ve leh a. Kei erawh chuan," A, kan inhmuh leh hunah, hmaichhanah ngei ka hrilh zâwk ang che, a pawi lo tiraw?" ka ti ve thung a," I tih tlatte chuan," a rawn ti ve leh mai a.

U Valpuia chuan ka hmingchhiat a hlau ve nge ni, a rawn kal leh ta rih lo va,  Mala'n min rawn tlawh ve ta thung; mahse, a riak ve chuang lo va, U Valpuia hnênah Mala lo kal thu pawh chu ka hrilh ve vek tho a, kan inkârah thil zêp neih ka duh lo a ni, a chhan chu nakinahte engtin tin emaw lo hre chhuak leh ta se, buaina a awm thei si a, chu chu ka duh lo a ni.

February thlaah chuan ka haw leh ta a, chhûngkhat lainate kal kim theih nân tiin inneih hun atân Inrinni an ruahman miau a, kei pawh chawlh lâk ngai lovin ka haw ve thei a, a zia ka ti tak tak a ni.

Pa Zuia chu tlangvâl senior, kohhran lama an chhawr ve tak a nih vàngin kohhran țhalai lamin engkim an buaipui a, Hruaii lah țhalai lamah a rualpâwl tâwkin a lo inhmang ve tho bawk nèn, țhalai lam an buai viau pawh chu a àwm ve viau e. Biak ina pangpâr an khàwi a mawi a, kan khua ang tân chuan Biak in tuala photobooth an siam pawh a mawi tâwk ve viau mai. Thla pawh kan la ve nasa, kan țhiannu pasal neih ní, hlim nî a ni bawk a, hlim pawh kan hlim khawp mai. Pa Zuia pawh a hlim bawk a ni ang, a țhen reng mai a, a kaah pawh zensak ila min seh hauh lo ang tih tùr khawpin a hmui a chîp thei lo a ni.

Mo hruaina a hnai bawk a, a va awlsam tak! Lawichalin Pa Zuia Do Re Mi a han saktîr mai chu nui lo rêng hi kan awm lo, a uang ve pah deuh bawk a ni ang, a aw a țial nasa êm mai. Ruai kan han țheh a, vawk sa lah chu a'n hmui tui êm êm mai a, vawk sa ka ei tawhah chuan a la tui berin ka ring hial. 

Hruaiite room tùrah chuan kan han awm khâwm ve tal tal a, tukverha ka dah lai chuan U Valpuia pawh pâwn lamah ka va hmu, U Vid-ate nèn an lo țhu a, fiamthu an sawi a ni ang, a nui ve suk suk mai. A nui hmêl chuan kei pawh min tinui ve thei nia, hmuh nuam ka tih êm avàng chuan ka en deuh reng nghe nghe. He pa hi zawng ka hmangaih êm asin, ka kalsan thei ngai lo ang. Hun a tlêm lutuk a, tûn țum zet chu, hmuh pawh kan la inhmu fâl thei rih lo va, hun remchang dap chu a ngai a ni.

A inah kan awm dùn thei ta hlauh a, chu pawh U Vid-a remruatna vàng a nia, a țangkai khawp mai. Thingpui hâng a lum ve ngei a, in zawhah U Vid-a chu chhuanlam siamin a chhuak thuai a, kan pahnih chiahin kan awm ta.

"I țhiannu mah ni se, lo huatpui lo la, vawiin khân mo ai pawhin i nalh zâwk ka ti!"

Ka nui hak hak a," Engah nge ka huatpui teh ngawt ang? Ka tân a làwmawm tehlul nèn, ka nalh i ti tak tak maw?" tiin ka han chhaih kual vêl a, ani chuan," Um.. nula zawng zawng i dah 'nil' vek, thla pawh ka hmehsak nghe nghe che a," a ti a, phone phawrhin a han hmet nuap nuap a, min entîr chuan hlim taka kan nuiho lai, ka hmui hup pah deuha ka nui lai hi a lo ni a, ka lang țha ve reuh lutuk nghe nghe.

"I va la mawi ve!" ka tih chuan," I hmêlin a zir ve hrim hrim a," a lo ti mai a. Hlim taka nui chung hian," I ti tak tak maw, ka pu?" ka ti leh a, hetia a fakna dawn hi nuam ka ti a ni. Ani chuan meng zîm deuh san hian min en a," Tak tak e, ka ti tak tak! Chhe lo ka tih vàng chein a ni ka ûm zui char che che ni. Chuan, chuta țang chuan hmangaihna a lo piang leh a, tûn hi kan thleng ta a," a ti a.

Duh tak hian ka nuih sak a. Ani pawh hian ka duhin ka hmangaih a ni tih hi chu a hre chiang ve viauin ka ring, kum khati chen kha mi dang tu mah ka thinlung ka pe thei lo a nia.

"Kan dam a, Pathianin rem a ti a nih chuan Hruaiite chan ang kha kan chan ve tùr tho chu a ni si a, a nuam ngawt ang chu. Coat-ah eng rawng nge i duh ang? A dum, a pãwl, a pãwl duk, a buang, eng ber nge ni ang?" tiin ka zâwt chhin a, vawiina Pa Zuia coat hâk kha a pãwl duk lam a ni a, a mawi ka ti reng mai.

"A buang."

"I inhmeh dâwn lutuk!" tiin ka kutzungpui ka tipir vah a, ka zawhna min chhàn har loh dàn ațang khân a lo ngaihtuah lâwk vek tawh a nih ka ring, kei chuan ka la ngaihtuah ngai miah lo asin. Man hlan nîah leh Làwi kawrah eng nge ka hâk anga, eng puan nge ka bih ang tih pawh ka la ngaihtuah ngai miah lo. Ani pawhin a ngaihtuah lâwk tawhte chuan lo ngaihtuah lâwk ve tawh tùr hi ka ni asin le, zanin ațang chuan ka ngaihtuah ve tawh ang, nakina buai lo tùrin.

Ka sam a chûl hoh hoh a, sam khawih hi nuam a ti a, chutiangin kei pawhin a lu khawihsak hi nuam ka ti ve tho. A sam khawihsak emaw, a beng tuaisak emaw, a khabe hmul tuaisak emaw hi nuam ka ti a; mahse, tunah tak hi chuan ka khawihsak lo thung.

"Aw le, ka țhen lai chea i awm dàn leh i hun hman chhoh dàn chu min hrilh tawh la? Hun kal tawh mah ni se hriat ka châk ve hrim hrim a."

Ka țhut dàn chu ka insiam rem tê tê a, a mitah tak en lêt chung hian," Ka rilru a nâ a, hrehawm ka tih rualin zahthlâk ka ti bawk a. Chuan, ka tum viau nain ka thinlung ațangin ka paih chhuak thei lo che a, thil ka ei thei lo va, zànah ka muhìl thei bawk si lo, chutianga hun hmang reng ta chu ka taksain a tlin ta lo va," ka ti dap dap a, ngun taka min en chung hian," Damdawi inah i awm tih min hrilh miah suh," a ti sup a.

"Nge, ka awm miau a."

Duat tak hian min kuah a," Ka siam țhat theih tawh loh mah ni se, ka tih palh lutuk aw. Tûn hnuah erawh chuan rilru hrehawm taka i awm ka phal lo ang a, i hlimna chauh thlentu nih ka tum zêl tawh ang," a ti sup sup a. Nghet deuh hlek hian ka kuah lêt a, ka mitthlaa ka nu hmu rauh rauh pah hian," I nih loh vaih! Hun harsa pawh a lo thleng thei, kan hma hun kan hre si lo va, chutih huna min phatsan i tum vaih chuan aw..." ka han ti ve a, ani chuan," Ka phatsan ngai lo ang che, ka nunnain tuar dâwn mah se la ka kalsan ngai lo ang che," a ti leh a. Kan inkuahna thlahin kan inen dùn vang vang a, min en reng chung chuan a rawn kûn hnai hret hret a, chutah, a hmui chuan ka hmui chu a rawn si ta a. 

Hlim takin hun kan hmang dùn a, inkhâwm zàn mah ni se ka inkhâwm lo. Hun kan neih tam loh avàngin ãm takin kan hmang dùn a, nula leh tlangvâl, in khata tu ma dîp loha awm dùn ta chu țhutthlèngah chuan min mut ta riai riai a, kei pawh ka thâwk dàn a dik tawh bîk chuang lo va, min fawhnate chu ãm leh duhthawh takin ka lo chhâng ve zêl bawk si nèn, kan thaw pawh a ring dùn sâwt viau mai.

"Nunu..."

"U Valpui..."

Ka kawr a hlìm chhoh avànga ka taksa khuhtu nei lo laiin ka phone vâwt thler thlawr a tawk fuh tâkah chuan ka phu chiang kher mai, ka thil tih lai pawh ka tàwp nghâl chat a. Chutia ka tàwp ta chu ani pawh a tàwp zui ve tho a, che lovin eng emaw chen kan inen a, thâwk kan lâk hawk hawk hnu chuan," Ka tih palh!" a ti sup a, che sawn zui nghâlin," Tui ka'n in ang e," a ti leh sup a, filter awmna lam pan chuan a kal zui ta nghâl a. Kei pawh tho thuaiin ka kawr inhlîm chho tûng chu ka siam țha nghâl mawlh mawlh a, a rûkin ka khùr dar dar thei hial mai. Tlêma tlêmah kan thleng thui teuh viau a lo ni, tihchi loh lutuk. A rûkin ka inzilh a, 'hun fâl nei tih avànga hetiang thlentîr kher tum, i sihhnip deuh chu a ni, invêng ta che,' tiin ka inhrilh mawlh mawlh a.

*HUNIN A TIDAM ANG CHE' KAN TI ȚHÌN MAW? HUN HIAN A TIDAM CHE A NI LO, NANGMAH ZÂWK KHA I INTIDAM ȚHÌN A NI*