☆Mr. BAD(ZAWLAIDI NEITUPA)☆ - 30 By Dingdi Pachuau

☆Mr. BAD(ZAWLAIDI NEITUPA)☆ - 30 By Dingdi Pachuau

Pa Zuiate in lamah kan kal leh a, an lo buai lutuk tawh bîk lo, Feli leh Mampuii pawh an lo la awm a, titiin kan han awm ve leh rèn ràwn a, inkhâwm bàn hnua inlêng an neih leh tâkah chuan haw zai kan rêl ve ta a, haw kawngah Mampuii chuan," A dawtah chuan nangni pahnih hi in tih ve a hun tawh a ni, in innghâk rei ve tawh bawk a," a han ti a, nui deuh chung hian kei chuan," Lo lungngai lo phawt la," ka lo ti vat a, U Valpuia pawh chuan," Rei kan rial lo anf," a lo ti ve leh a, chutiang lam sawi chuan kan haw lam chu kan titi a.

Inah ka nute pawh an lo awm tawh a, Mampuii a lo pêng ve zawk a, a haw hnuah ka nu chuan," I inkhâwm lo va, Hruaiite inah awmin i buaipui ve reng em ni?" a ti a," Aw... an buai ve sia," ka ti thla rawk a, ka rilru tak chuan dáwt ka sawi chu ka inthiam lo ru angreng khawp mai a; mahse, U Valpuia nèn kan awm dun a ni tih thu han hrilh chu a tihchi bawk si loh.

"Ni e, inkhâwm zàn a lo ni kher bawk si a, a buaithlâk ve bawk a ni. Țhiante chétpui hi chu tih ngei ngei tùr a ni, an buai hun laiin kan pui a, thil țha kan ti a, inkhâwm erawh kan dam chhûngin kan ti thei a," ka pa chuan a lo ti a, min man chhuak lo mah se nuam erawh ka va ti lo tak! A fanu hian a țhiannu pui lovin a bialpa nèn an awm dùn a ni tih hre ngat se zawng hetiang thu hi ka pa hian a sawi àwm hauh si lo.

"Ka sawi tawh kha, nula i ni a, kan vênga i awm tam loh vàng pawh a ni ang a, nula leh tlangvâlte enthlâk i ni a, uan thu suhah, a hminga thla tin hlawh nei, sawrkâr hna thawk i nih vàngte pawh a ni tel thei tho ang chu; chu vàng tak chuan, fîmkhur taka i hun leh i nun hi i hman a ngai a ni, min tizak tùr leh kan duh loh zâwnga awm tùr hi chuan kan ring phal ngai dâwn miah lo che a nia," ka nu chuan a ti leh charh charh a, ka pa pawh chuan lu lo bu nghat nghatin," I nu thu sawi chu a pawimawhin a dik hlê mai, i nu leh pate hian kan hmangaih êm êm che a, thu țha tak tak kan hrilh țhìn rêng che a ni. I nuin a han sawi chhuah tâka zârah chuan, sawrkâr hna i thawha thla tina sum la lût i nih vàng hian induh phah leh mite hmusit zâwngin i khawsa tùr tihna a ni lo a nia; i lo khawsa ang tih lah ka ring hek lo. I hmaah, he hna i thawh hma hian mi tam takin an lo thawk tawh a, an thawk mêk a, an la thawk reng dâwn bawk. A malsàwmna kan dawnte hian Pathian hmêl min hliahtîr anga, mal min sàwmtu lam ai hian a malsàwmna kan dawnah hian kan buai zâwk ang tihte hi a hlauhawm êm êm a ni. Ka fanu i nih vàng nge, hetiang lamah hi chuan i ngaihtuahawm lo viauin ka hria a, i felin kan thute hi i âwih țhìn ka ti, a rûkin ka lo chhuang țhìn che a, mi zîngah pawh 'mawi' ka ti țhìn che; mahse, i nu leh pate hi chuan i tâna thil țha ber kan duh țhin vàng hian zilh chea thu țha tinrêng hrilh che hi kan tih tùr a ni a, nang pawhin ninah lo la lo la, mihring hi chu inzilh ngai leh thil țha inhrilh reng ngai kan nih avàngin keini i nu leh pate pawh hian ka hmangaih che vàngin kan hrilh reng zêl dâwn che a ni," a lo ti ve leh dap dap a.

Hrilh duh viau mah ila ka nuin U Valpuia a duh lo viau a ni tih hre reng chung chuan han hrilh chu a huphurhawm ve det chu a ni. Min hringtu ka nu leh pate mah ni se,' Chu mi nèn chuan kan inngaizâwng a,' tia han sawi chhuah chu thih hrehin ka hreh, hrilh chu ka tum ve zuau zuau alawm; mahse, ka thei thlâwt lo a ni. U Valpuia pawhin min dem maithei a; mahse, ka hrilh nî la la ațangin chhûngkuaah hlim lohna ka thlen nghâl ang tih ka hre bawk si a, chu chuan min titîm sî a ni.

Pathianni chawhnuah U Valpuia nèn chuan hun thâwl kan nei leh thei a, a tûk maia kan ințhen leh tawh dâwn avàng chuan inthlahlel takin kan țhu dùn a, kan innghèng rial a, thu tam kan sawi lo, kan kutah kan inchelh a, a chângin kan inen a, kan nui leh ringawt țhìn. Zàn lamah chuan kan inhmu thei tawh lo va, inhmu thei tawh lo ti mai ila, a fâlin ka tihna a nia. Hruaiite inah kan țhianho kan lêng a, Hruaiite in han ti ila a pasal Pa Zuiate inah khân a nia, mi dang lêng pawh an awm ve nak nak tho a, thil ei rep rep uar ta chuan wai wai man tùr kan thawh khâwm a, kan han bâwl leh a, Zmi'n," Nunui kan thlah pah a ni mai," a ti a, ka duh aia tam ka ei leh tâk kha.

Kan lêng rei ve deuh a, kan haw lamah U Valpuia leh U Vid-a lêng haw tùr ve thote nèn kan inhmu a, a tlai tawh avàngin U Valpuia nèn pawh kan inhmu fâl tawh lo va, kan in pêng thleng erawh min zui thung. Mut hmunah kan in-text a, naktûk lama ka phei hun tùrte ka hrilh a, ani pawhin min thlah liam ngei chu a tum ve; mahse, a hma dâwn êm mai a, ka khawngaih lâwk, ka be ngamin ka ring bawk si lo.

A tûk zîng vàrțianah kan tho a, ka pa chu min thlah tùr a nih avàngin a tho hma ve bawk a, ka nu pawh a tho ve tho. Thingpuite in hnuah ka nu a țawngțaia a, ka pa nèn chuan kan chhuak ta a, Office kai hman ngei ka duh si avàngin kan chhuak hma a ni. U Valpuia pawh chu kan hmu ta ngei a, hna thawh kawr a lo ha hman tawh a nih chu! Khua a la vawt ve tho si a, ka khawngaih tak tak a ni. Kan inen zui vang vang a, ka be ngam lo, ka pa a tlàn muan phah bawk si lo va. 

"A va tho hma ve a?!! A hna lâk a nâ an tih țhin kha ka lo ring ngai lêm lo va, a lo dik a nih dâwn hi a," ka pa chuan a ti zui vang vang a, kei chuan," Tu maw? U Valpuia maw?" ka lo ti vat a. Ani chuan," Aw, ni e, a pa boral hnu ațang khân a ni ang chu, a hna thawk hi ka hmu ve ta fo a, 'Chhiatni țhatniah a tlàwmngai' an tih hi chu ka hre ve fo a, ka mit ngei pawhin ka hmu fo bawk. Anmahni hna țha taka a thawh erawh hi chu ka hmu ngai meuh lo va; ka hmuh loh lamah a lo thawk viau a nih chuan le, chu chu ka va hre tawh lo. Tûn kum hnih khat chho, zu ruih leh insual buai lama a hming a reh tâk hnu hi chuan hna a thawk hi ka hmu ve ta reng a, thingtlânga awm ve ta chu hna thawh pawh a chakin a zei fû roh mai. A pa boral kha insiam țhat nân a hmanpui ti ila ka sawi sual tampui àwm lo ve a," a ti duah a, ngaihthlâk nuam ka lo ti khawp a; mahse, tlêmin ka lo zak deuh a, min sawi chhan a nihte ka ring rilru deuh hial a, ka ngawi rauh rauh mai.

Mahse, a hnuah chuan hrilhna hun remchâng a nih ringin zak ru tak chung chuan U Valpuia nèn kan nih chungchâng chu ka hrilh ve ta rãwih a, mahni pate bula bialpa chanchin sawi chu thil nuam tak a va ni lo chiang tak! A hmêl pawh ka en ngam lo, ka kut a pahnihin ka hûm ruh ngawt ngawt a, ka țhu nghîl auh a, kawng kãwiah pawh ka àwn loh nân a rûkin ka țang nasa kher asin, ka biang ni se a sa hut hut bawk si. Ka pa lah chu a rawn țawng chhuak lawk si lo va, ka inthlahrung khawp mai, a rilru puthmang àwm ang hre tùrin a hmêl ka en ngam bawk si lo, ka hmui chu ka pet ka pet a, ka lo hrilh ta kher kher chu ka inchhîr a, khûk chem chema khûk ral daih theih ka châk takzet a ni.

Mahse, dam duaia," In chanchin min hrilh a, a țha e. In induh tawna, in inhmangaih tawnte chuan chu tluka hlû a awm hlei nem, 'Ani hi duh suh, ngaizâwng suh,' ka ti dâwn miah lo che. Puitling i ni tawh a, i tâna țha hre rual niin chhia leh țha engkim i hria a, i thu tlûkna a ni e," a rawn tih chuan ka hahdam huai huai a," Ka lãwm e," ka ti sap a, tunah chuan rilru buaina pakhat chu a veng huai e.

Kawng tluanin U Valpuia chanchin chu kan sawi ta a, a chanchin zawng zawng chu ka pa pawh chuan mi sawi rûk ațangin a lo hre ve tho tawh chu lo niin; mahse, chuti chung chung pawh chuan," In inhmangaiha in induh a nih chuan hnialna che u ka nei lo; mahse, nula i ni a, fîmkhur la, 'fîmkhurnaah hian hlimna hian zung a kaih' tih hre reng ang che," a ti leh tho a, ka làwm dàn a thuah hnih thuah thum viau mai. Mi hriat thiamna a ngah ka ti a, hetiang rilru hi ka nuin pu ve se ka ti takzet a ni.

"Ka lo va hre thiam har tak!! Tukina kawnga a lo din chhan pawh kha i phei leh tawh dâwn tih hriain a thlah liam duh vàng che a lo ni maw? Han mangțha che pawh a duh ve àwm tehlul nèn, min lo hrilh hma deuh lo a ni..." a ti vang vang a, a rawn chek zui tlak tlak chuan ka lo nui sak a," A pawi lo... ni e, khatih lai kha chuan i la hre lo miau mai a, ka hre thiam mai ang che," ka lo ti ve a, ka pa nèn zêp nei lova inpawh taka U Valpuia chanchin kan sawi dùn thei chu nuam ka ti a, ka hlim veng veng mai a ni.

"Ka nu ka la hrilh lo va, ani chuan nang anga rilru zau hi a pu ve kher lo maithei a ni. U Valpuia lahin a hmain nunhlui chhuan tlâk lêm loh ve tak a nei bawk si a; mahse, mi rêng rêng hi nunhlui țha lo takah kan chêng reng duh bîk lo va, hma lam panin kan kal vek a ni. A țhen kan kal muang deuh a, a țhen kan kal chak deuh a; kan nunhlui hmanga inteh tùr ni ta ila tling lo tùr kan kat nukin ka ring, i ring ve lo maw?" tiin ka pa chu ka han zâwt a, ani chuan," A dik khawp mai, kei ngei pawh hian nunhlui duhawm lêm lo tak chu ka nei ve tho a nia, i hre miah lo ang, ka tleiràwl chhuah chhoh lai khân zu ka in a; mahse, a ngawl vei hman lovin ka sim thei ta hlauh a, i nu pawh ka nei thei ta chauh a ni. Sim lovin la in reng ni ta ila chuan i nu nèn pawh kan innei tawp nâng," a lo ti ve leh a.

"A ni maw? U Valpuia ang deuhin zu i lo in ve țhìn tho maw?" mak ti tak hian ka lo ti a, ani chuan," Ani ang êma nasa chuan in lo ve, insual buai ka chîng ve lo bawk a," nui chung hian a lo ti a, min fiam pah a ni tih hre tho mah ila ka zak rilru khawp mai, a sawi dik ve bawk si a.

A haw dâwnah ka pa chuan," I rilru lo tihrehawm lo la, i nu pawh i hrilh hreh chuan ka lo hrilh dâwn nia," a ti a, ka lãwm tak tak a ni. Hetianga min hre thiamtu pa ka nei hi ka vànnei takzet ka ti a, a thu min hrilh anga awm reng pawh ka tum thar sauh sauh a ni.

Ka pain ka nu chu a hrilh ta ngei a, min rawn biain," Ka hlauhthàwn ang ngeiin thil a thleng ta. Kawp lo tùra ka hrilh che i hria a, țhen tùrin ka ti bawk che; mahse, ka thu hnialin i kawp lui zêl tho a, ka rilru i tina hlê a ni," a rawn ti a, a thinrim àwm si a, chhàn dàn tùr ka hre lo, ka chhâng ngam lo a ni zâwk mah ang chu.

"I cho chhuah a ni a, hrilh lâwk lo che ka ni lo. Ka duh lohzia pawh i hria a; mahse... hetiang hi i ute kha an ni lo asin, nang phei chu ka duat chein țawngka vîn pawhin ka be ngai lo che a ni, hetiang hian min rùl lêt dâwn a ni tih lo hria ila..." tiin a ngawi daih a, hrehawm ka tihzia mai chu, ka tâwt up up maiin ka hria. Ka nu duh loh zâwng takin ka awm si a, a thin a rim ngei ang tih kha chu ka hre sa reng a; mahse, a taka ka nu thinrim țawng ri han hriat chuan awm a nuam lo takzet a ni.

Hun a ral a, U Valpuia nèn erawh kan inbe reng a, kan chunga ka nu rilru puthmang erawh chu ka hrilh ngai lo. A hriat ve kher ngai ka ti lo a ni, rilru hrehawmna tam tak a tuar tawh a, tawrhtîr belhchhah ka duh lo, hunin rawn herpui mai rawh se ka ti tawp mai a, kan inkâra rem lohna awm thei tùr zâwng pawhin țawngkam ka nei ngai lo a ni.

July thla a rawn inher chhuak ta a, kan tum dàn chuan tûn thla hian U Valpuia'n palai a rawn tîr dâwn a ni. An rem tih nghâl chu a ring lo nain tirh hrim hrim a duh si a, ka hnialsak duh lo, ka nuin a phal ka ring lo sa ngawt a, a dik ngei pawh ka ring. U Valpuia chu ka khawngaih dâwn êm mai, chhànna a hriat hunah hrehawm a ti ve àwm si a.

Hruaii pawh a rai ve tawh a, thla hnih lai a ni ve tawh nghe nghe. A chĕr viau an ti lehnghâl a, amah erawh chuan," Ka chĕr viau loh hi," a ti mai țhìn thung, a hmêl en erawh chuan raino a haw ve viau a nih hmèl, ka khawngaih reuh mai mai mang e. Pa Zuia erawhin a duat thiam viau chu an ti a, a dik pawhin ka ring. Nia, duat rawh se, ràino chhûng hi chuan duat a phû alawm, a thuhrimah, a pasal berin a duat lohte chuan tuin nge maw duat chuang ang le?

July ni 7 zànah palai chu a tîr ta ngei a, palaiah pawh U Vid-a pa leh a pute Hmaa, Hnahthiala awm a tîr a ni àwm e. Țha ka ti, kan chanchin mi dang vakin an hre lo thei ang a, kan rem dâwn pawhin, rem dâwn loh pawhin; miin an hre luai luai tùr kha kan pumpelh thei rih dâwn a ni.

Mi tih dàn ngaiin a zàn khatnaah chuan," Kan lo inrâwn ang e," an lo ti mawi ve ngei a, ka rilru erawh a nawm phah chuang miah lo. Ka nuin a duh lohzia hre reng chung chuan rilru nuam deuha awm zawng a har ve hret chu a ni; mahse, U Valpuia'n min rawn biak erawh chuan țha tak leh hlim takin ka lo chhàwn thung a, a rilru tihhah ka duh lo, ka phal lo a ni zâwk ang chu.

Ka nu hian ka pa thu hi kan hriat lai chuan a hnial ngai hauh lo va, a duh loh zâwng takah pawh hian kan hriatah chuan a kalh zâwngin țawngkam a nei ngai lo; mahse, ka nu hi a fing a, nu fing tak a ni ka ti ve tlat. A dawhthei a, ka pa rilru hneh theih dàn a hria ka ti mai, kan chungchângah hian engtin nge maw țan a lâk ang tih ka ngaihtuah a, a chhan pawh ka pain U Valpuia ka duh tih hriain inneih chu min phalsak maiin ka ring a; mahse, ka nuin a phal ve dâwn si lo.

U Puii leh Tĕțani an hrilh ve lo nge, min rawn be miah lo! An râwn ve lo zâwk nge ni ang, kan khuaah hian ka pa lam ațangin emaw ka nu lam ațangin emaw laina hnai tak kan nei lo ve ve a, țhenrual țha ve tak tak erawh kan nei ve tho. Chûngte chu an râwn ve ang em? Nge hmun danga kan chhûngte phone-a be kualin an râwn? Chu chu an tih ve ngei chu ka ring a, tih dàn phung pawh a ni ve a... Nge râwn chuang lovin rem loh an tum nghâl zâwk ni ang le? Ka pa lah ka záwt ngam dèr mai si lo.

Mahse, sawi chu an lo sawi ve ngei a ni ang, U Puii'n min rawn be ta a," Pasal neih i cho ve tawh a ni maw?" a rawn ti phawt a, a rawn nui zui ar ar a. Kei chuan," Lèn tar a hlauhawm ve tawh alawm, kum tinin kan upa zêl a," ka lo ti ve mai a, ani chuan," I la upa viau hlei nem. Bâkah, i va tum hniam rêng rêng ve?!! In inneih hlauh phei chuan thingtlângah asin in awm dâwn, tûnlaiah rualawh a nat tehlul nèn!" a rawn ti leh a, kei chuan," Khawiah pawh awm ang hmiang, kan inhmangaiha kan inneih tawh phawt ahnu," ka lo ti leh a, chutianga U Valpuia 'hniam' a ti chuan ka thin a tirim ve deuh phat a ni.

"Valpuia ka hriat chian tlat loh rualin ka rilru dik tak ka han sawi ang e. Ani neih atân chuan ka ui che a ni,  ani aia țha i hmuh dâwn tehlul nèn, i hmêl a chhiat loh bâkah sawrkâr hna i thawk a, in inhmangaih lo ang chu ka ti lo, inneih meuh in tum chuan in inhmangaih tihnaah ngai ila... mahse, ka ngaihtuah ka ngaihtuah hian ka ui che a ni, mi dang i hmu thlâwt lo hian ka ring bawk si lo," a rawn ti leh a, a sawi dik ve tho avàng chuan chhàn pawh ka tum lo va, han hnial viau pawh ka tum lo, U Valpuia tân chuan min ui a ni ve mai.

Tĕțani'n min rawn be ve leh a, ani erawh chuan," Innei hlauh teh tak u, kan chhûngkuain kan rawn zin thei dâwn tihna a ni mai a," a rawn ti thung. U Puii nèn chuan an dàwn chu inang lo haih haih tak a ni, chu mai la duh táwk lo chuan," Ka nu khân a duh lêm lo tih ka hre thei a; mahse,' Amahin a duh tlatte chuan nei rawh se, mi sual a nih loh chuan țha ka tihpui, ani meuhin neih a duh chu sual pawh a sual lo tawp ang,' ka tih kha," a rawn ti leh a, ka nui sak mai, thu hlimawm lam, min țanna thu a ni tlat si a, a thu sawi hi tûn hnaia min tihlim bertu a ni rih tlat.

Ka rin lâwk ang ngeiin ka chhûngte chuan palaite chu remna thuin an thlah ta lo va, U Valpuia'n min rawn biak pawh chuan sawi tùr ka hre lo va; mahse, hnem ve ngei chu ka duh si a," Âr talh dàn chi khat chauh a awm hlei nem tiraw?" ka han ti ve ngawt a, a rawn nui hawk nghe nghe.

"Hetiang ring sa tho hian alawm palai ka rawn tirh ni; mahse, min hnemna thu erawh kha chuan min tivâr hawk tho aw, ka lãwm e. Âr talh dàn chi khat dang chu min han hrilh la?" a rawn ti a, kei chuan," A, i hre daih zâwk ang, ka han ti ve mai mai a nih kha," ka ti leh hnuhnawh a, a nuih avàng chuan tlêm chuan ka rilru a nuam tawh tho tho.

"Um... min hnem avàngin ka lãwm tih ka sawi nawn leh e. Ka duh che tih leh nupui atân hial pawh ka duh che a ni tih i chhûngte'n an hre tawh tho a, hmasâwnna kawng khat chu kan zawh tawh tho a ni. Ka rilru a hrehawm i lo hlau a nih chuan min ngaihtuah suh aw, mipa puitling ka ni a, vawi khat hlawhchham vànga bànsan mai mai rual pawh ka ni tawh lo, ka upa ve tâwk tawh," a rawn tih leh chuan ka kut ka bêng a," A țha lutuk! Khatiang mipa kha a ni ka fate pa atâna ka duh chu," ka han ti ve a," Tunah tak hian ka bulah awm la chuan aw..." a rawn ti vang vang a.

Ka țhiante chuan U Valpuia'n palai a rawn tîr tih an hre vek a, kan khuaa mite erawh chuan an hre mang lo a ni àwm e. Rem thu kan sawi mang si lo va, tu vakin an hre mang lo chu ka lãwm takzet a ni, U Valpuia an nuihzat ang tih ka hlau a, amah hmusit zâwngin an țawng khum ang tih pawh ka hlau; mahse, kawng lehlamah ve thung chuan huaa mite'n hre vek se, kan induhin inneih hial pawh kan duh a ni tih hria se, U Valpuia lo beisei vetu nula dang dangte pawhin kiansan phah nân hmang ta se chu ka ti ve tho bawk.

Ka nuin," Ani kher hi chu i neih ka duh lo. Ka hmuhsit vàng a ni lo a nia, khawi ațanga rawn chhuak nge tih pawh hriat loh lehnghâl, pianpui unau a nei em tih leh a nu leh a pate pawh hriat loh a nih hi, a unau anga a neihte pawhin an ngeih theih miah loh chuan thil dik lo a awm a ni mai, nakin lawka i buaina tùr a ni tih ka hmu tlang sa vek. I nu hian ka hmangaih che a, i tâna țha ber tùr ka duh a, ka ngaihtuah thui bawk. Nang pawhin thil thui tak ngaihtuah la, a nunhlui zawng zawng pawh i hriat kha, nunhlui țha lo hian mi hi a la ûm a la ûm țhìn tih hria la, ani pawh hi a bãng dâwn lo. A remchàn lai hian kalsan ngèi ngéi ang che. Ka dam chhûng hi chuan i neih ka phal ngai dâwn chuang lo a ni," a rawn ti kalh kalh a, ka nu thu sawi hi chu a nè nè ral ve mai mai ngai lo va, a țawng chhuak rêng rêng hi a tak khak mai a, thil a sawi mai mai ngai lo bawk. Ni e, ka nu hi chuan a phal ngai lo maithei; mahse, duh dàn dánin thinlung a her danglam theih bîk loh hmangaihna kawngah kher kher hi chuan. Kei pawhin U Valpuia ka hmangaihna thinlung ka paih bo thei bîk hlei nem. Rilru hah takin ka han thaw hawk a, U Valpuia a ni ka khawngaih ni, tuna ka nu thil sawite kha hre ve ta se... mahse, ka bànsan thei lo ang, ani'n rilru dang a put hma chuan kalsan tumna ka nei lo va, rilru dang ka pu dâwn lo, ka hmaah eng pawh tâwk dâwn ila ka kalsan ngai dâwn lo hi a ni tawp mai. Ka nu thu ka âwih theih lohna leh fanu sual ka nihna tùr pawh ni se U Valpuia tân chauh ka awm ang. Chu chu ka dam chhûnga ka tih ve tùr a ni tlat. Thinlunga nufa indona hian eng chin nge a awh ang le?

*MALSÀWMNA A DAWNTE CHHIAR THIAM LO MI CHU MI Ã A NI A, A MALSÀWM DAWNTE CHU A TÂN TLÛKNA MAI A NI ȚHÌN*