☆Mr. BAD(ZAWLAIDI NEITUPA)☆ - 31 By Dingdi Pachuau

☆Mr. BAD(ZAWLAIDI NEITUPA)☆ - 31 By Dingdi Pachuau

Ka țhiantehovin kan chanchin an hre vek ka tih tawh kha, a țhenin min hnèm ve liam liam a, a țhenin," I pate hian an duhpui che ka ring lo rêng a ni," an ti a, Rini phei chuan," I hriat sa vek ka ring, mahni phû tâwk in hre lo dùn a ni, mahni zàwlpui ka tihna aw," a ti nghe nghe a. Eng nge U Valpuia chu ka phû tâwk a nih lohna? Tu chu nge ka zàwlpui? Amah chauha a awm tawh avàng maiin ka zàwlpui a ni lo ang maw? A ni thei lo, mihring chu Pathianin a duh taka a siam vek kan ni a, inphû lo kan awm thei lo, nunna pakhat nei țheuh țheuh tu nge inthlei thei awm chuang le? A hminga thla tin sum la lût ka nih vàng mai hian U Valpuia'n min phû lo ang maw? Hei hi chu thil dik a ni lo. Inhmangaihte inkârah inphû lo a awm thei lo ka ti ve tlat.

Mampuii'n a pa a lo zâwt chiang ve a, ka pate chuan," A, ani chauh hi kan nei tawh a, kan innghahna a ni ve rih a, ani a kal daih zawngin, kan la phal rih lo a ni," an lo ti a ni àwm e. Inhnarna mawihnai tak ni chuan a lang ngei mai, ka nu thu chhuak a nih ngei pawh ka ring, ka pa kha chuan min țan a, ka duh phawt chuan ka neih pawh a phal ngei ang; mahse, mi dang dang an han râwn ve ang a, U Puii pawh ka nu lamah a țang ngei dâwn tih ka hria, ka nuin U Valpuia chanchin țha  lo laite a han sawi darh ang a...

"Engtin nge in awm dâwn? Nangni pahnih hi, in dam dùn raih mai si a, thil eng emaw râpthlâk tak inmung ru hi a awm a ni lo maw? Inrûkte kha in lo tum ngawt ang e, a tihchi miah loh, i nu leh pate rilru tina tùr leh nangmah ngei pawhin hrehawm i tih leh tùr chuan thu tlûkna siam miah suh aw," Mampuii chuan a rawn ti a, ka lo nui hak mai.

"I sawi a, ka hre ve chiah. Inrûk lam kha, ka ngaihtuahnaah a awm pha lo hrim hrim a, U Valpuia pawhin a sawi lang lo hrim hrim bawk. Vawi khatna chauh a la nia, beidawn nân chuan a la hma mah mah, vawi hnih vawi thum hnuah le," ka lo ti a, ani pawh chuan," Aw, chutiang tùr chu a ni. Thil réng réng hi chu a ĕng lama thlìr tum zêl tùr. U valpuia pawh ka zilh char char a, ani pawh hi a dam raih mai a, a rilrute hi a hrehawm lo em maw ni ka ti hial asin; mahse, a hrehawm êm êm ang tih chu ka hre tho bawk si a; ani chu sawi loh, Au Vid-a tak pawh hi, a rilru hi a chàwl hlei thei lo niin ka hria. U Valpuia ai hian hrehawm a ti zâwk a nih duh hmèl te ka ti hial asin," a rawn ti ve leh a.

Țhian țha leh lenrual, min ngaihtuah ëm êmtute ka nei hi ka lãwm takzet a ni. An tân ka țangkai loh tehlul nèn hian, min ngaihtuah hlawm a, eng ka nih loh tehlul nèn hian. Ka tân hian an va hlu hlawm tak! An lo awm lo ang tihte hi ka hlau hliah hliah mai, U Vid-a tak pawh chu ka khawngaih zâwk e a, a țhianpa êm êm tân a rilru a hrehawm êm êm chu a ni si a.

Mala'n min rawn be ve leh hlawl a, zãngkhai tak hian," Ka biak loh che hi chuan i reh vang vang zêl mai si a, i la dam maw? Min la hria em?" a rawn ti a, a rawn nui zui hak hak a. A ni lah tak a, ka be miah lo va, U Valpuia palai rawn tirh vêl pawh ka hrilh miah loh avàngin a hre miah lo bawk ang. Chutia boruak zãngkhai tak a nei bîk chu ka awt ru deuh hial a ni.

"Ka hre lo lek lek che a ni. Officer fel deuh kha i ni em kha, Kolasib lama thawk kha?" ka han ti ve a, a rawn nui leh a," Fel deuh chu an ti lo deuh ang a... I dam țha maw? Eng nge in chanchin? In la inkawp tluang zêl em?" a rawn ti leh a, tunah chuan a rawn thutak ve ta.

"Aw, dam țha e. Kan la tluang ve zêl e, i dam țha zâwk em? Inhmuh a va khât ta ve tiraw?" ka ti ve leh a, kan mimal chanchin inzâwta kan inbiak rei deuh hnuah chuan U Valpuia nèna kan chanchin chu ka hrilh ve ta a. Lo inrawlh miah lovin ka thil sawi chu a ngaithla char char a, ka sawi tàwp dâwn chuan," Chutiang chu kan chanchin ni rih mah se beidawn mai kan la tum chuang lo va, 'bei la, bei nawn rawh' tih thute pawh kan chhiar tlauh tlauh țhin kha tiraw? Kan chhiar țhin ngei kha a taka han tih chhoh vete pawh a lo ngai dâwn a nih hi," ka ti a.

"A dik lutuk tlat! Chutiang rilru chu put tlat in tum dâwn nia, a tàwpah hlawhtlin nî hmêl chu in hmu ngei ngei ang. Beidawng lova bei hrâm hrâmtute, nghâk hrâm hrâmtute hian alawm hlawhtlin ni hmêl hmu țhìn le! Ka khawngaih dùn hlê mai che u, tih theih neih ka châk hlê mai," a rawn ti a, nui sak chung hian," I thu sawi chuan min tilãwm hlê mai, ka lãwm e aw, nang ang țhian ka lo tawng che hi chu ka vànnei takzet a ni," ka ti ve a.

U Valpuia nèn erawh kan inkâr boruak chu a danglam phah hauh lo va, a inkiltawih leh inthlahrun ka hlauh avàngin ka be hmasa zâwk deuh zêl a, ani'n zîngah min rawn text hmasa ziah thung. Kan tum dàn mai mai chuan kuminah inneih an rem ti lo a nih pawhin nakkum lamah palai tirh leh kan ti a," I tân hian ka beidawn a thiang lo," a ti tlat mai si a, amah ka vêngthãwng deuh zâwk mah a nia; mahse, chutianga a tih tlat avàng chuan kei pawhin a thu tlûkna chu țha ka tihpui thlap mai. 

"Hna ka thawk nasa sauh ang, i nu leh pate laka ka rilru ka tihtlàwm dâwn loh avàngin a tàwpah an rilru chu ka hneh tho tho ang. Nang ka hmangaihzia che hria hian kan inneih hi an la rem ti dâwn a ni," a ti sauh sauh a, sawi mai tùr ka hre lo. Ka khawngaih a, ka hmangaih zual sauh a, a tumruhna fakawm ka ti a, ka lainat ru êm êm bawk, chutih rual erawh chuan ka khawngaih a ni tih erawh a hriatah ka sawi lang duh lo. Khawngaihna thu ai chuan fuihna thuin a tichak ang tih ka ring a, chu vàng tak chuan a rilru tiduap thei tùr zâwng chuan țawngkam neih ka duh lo a ni.

Ka nuin min rawn be ngai meuh tawh lo va, a lungawi lo ve rih ang a, àwm ka ti tho, ka pa zâwkin min rawn be zauh zauh a. Kan chanchin lam erawh kha chu kan sawi chhuak ngai lo va, kan dam țha em tihte, kan ni tin chanchin, kan hun hman dànte inzâwtin kan inbia a, chumi kârah chuan fuihna thu țha tak tak a rawn sawi țhìn bawk; mahse, ni khat chu," Rilru hrehawm deuh khân i lo awm ang e, Pathianin i tân Valpuia hi a ruatsak che a nih ngai chuan inrem theih hun a la awm êm êm ang. Tunah khân rem thu kha sawi ta ila, i nu hlim hmêl i hmu dâwn lo va, rilru nuam takin pasal i nei thei lo ang. A hun dik tak nghâk la, kan biak lai hi tlai ngai lo Pathian a ni tih theihnghilh suh ang che, A duh loh zâwng thil ngaihtuahin pumpelh kawng zawng lo la, nakinah, nu leh pa pawmpui thlapin, rilru nuam tak leh hlim taka in inneih hun a la rawn hertîr mai ang,"  a rawn ti dap dap a, ka thla a va timuang siai siai tak! Ka sawi chhuah ngai miah lovin amah zâwkin a rawn sawi a, ni e, ka duhna lamah ka lo hmanhmawh deuh a ni ang e, dawhthei takin ka nu rilru nèm hun ka nghák ang, rilru sak tak Pharoa pawh a rilru A tihnèmsak theih chuan ka nu rilru sak tak pawh hi A tinêm thei ang tih ka ringhlel lo.

Ka nu chuan min be rih lo mah se ka haw lo va, min hringtu, min duat êm êmtu leh ka hrehawm hlau rêng rênga min ngaihtuahtu a ni a, tuna U Valpuia neih min phalsak lohna chhan pawh hi min ngaihtuah luat vàng a ni tih ka hria. Ani chuan thui tak a ngaihtuah a, mi min hmuhsit a hlau a, ka hma lam hunah hrehawm ka tih a hlau a ni. U Valpuia nunhlui leh an chhûngkaw chanchin hre tân chuan a àwm êm êm a, chuvàng chuan ka nu hi ka dem hran lo, an chhûngkaw thisen zawm dik tak a lo la ni lo zui bawk nèn, duh lotu tân chuan duh lohna chhan tùr hi chu a awm ve chiang êm mai a, vènthàwn tùr a tam thei dâwn êm a ni.

Hun a ral a, dam ve ta reng chuan kum tàwp kan thleng a, Krismas hmangin ka haw a; mahse, a nuam vak lo, ka nu hlim hmêl hmuh tùr a vâng a, a țawng tam lo viau bawk. Keimah vàng a ni tih ka hre reng mai si a; mahse, tih vak ngaihna ka hre chuang lo. U Valpuia ka thlah thei chuang bawk si lo va, boruak nuam viau țhìn kha tûn țum ka haw zet chu a dik thei tlat lo. Țhiante bula ka awm chuan nuam ka ti ve mai a, ina ka haw erawh hi chuan kan in ngei mah ni se a rûk takin ka inthlahrung lek lek hial a ni, chhûngkaw nu ber a hlim tlat loh chuan chhûngkhur nun hi a lo nuam mawh a lo nih hi. Kan boruak chu hai derin ka be lui zêl tho a, a hlim lo a ni tih hria angin ka awm duh lo lui tlat a ni; mahse, mahnia room-a ka awm châng hi chuan ka tâwt up upin ka hre țhìn.

"Inru daih ula."

"U Valpuia ka fuihpawrh dâwn."

"A tân a zahthlâk àwm sia, hei vàng hian mi zîngah pawh a awm tam loh phahin ka hria."

"U Valpuia hi chu ni ila chuan ka rawn luhkhung daih ang che maw le!"

"Mâkpa chhúngkhungte zawng, an khawngaihthlâk alawm."

"A khawngaihthlâk dâwn lutuk!"

Hêngte hi ka țhiante titi a ni. A châng hi chuan an fiamthu a, chumi kârah chuan thu tak an zep tho țhìn bawk a, innei se tih min duhpui vàng a ni tih ka hria a, huatah pawh ka la ngai lo. Min țana min ngaihtuahtute an ni a, ka tân thil țha lo min duhpui lo tih ka hria a ni.

Kum thar hnua Serchhîpa ka lêt leh hnu lawkah hritlâng ka chhar a, mak ka ti tak tak a ni. Kan khuaah khân hritlâng an awm si lo va, ka tlànna kawng khù vàng a ni ti dâwn ila chutiang tùr khawp chuan a khu mang si lo. Zàn mut a huphurhawm thei khawp mai, hnâr a ping a, hnâr ping e ti lo chuan hnapfîm a tla bawk a, rawmawl pahnih thum lai inchhawp a ngai. Ni tinin hna thawk tùr chuan ka chhuak tho a; mahse, mi zînga awm pawh a nuam lo, zàn ang êm chuan hnâr ping lovin hnapfîm tla lo mah se ka pik țûn tho a, mask ka hrêng a, tui lum nimbu tui pawlh ka in leh zauh zauh bawk a, tui lum hian min tizia deuh țhìnin ka hria a ni.

Kan khuaah pawh an lo awm ve tho chu niin, țhiante'n min rawn hrilh a, Feli pawh a lo ni ve tho a, inenkawl dànte kan han inhrilh a; mahse, a vànglai ve ngang a ni ang, enkawl chiam pawhin a zia phah viau hran lo. U Valpuia'n a tuar ve ang tih ka hlau ber mai, a chhan chu lo a vât leh duh ngei ang a, a hritlàn chuan a lu a na ngei ang a, nuam lo chung chunga thawh chhuah a ngai ngei dâwn si a ni. Ka țawngțaipui reng a, mi dang hnên ațanga a kai loh nân, kan khuaa mi zawng zawng tãn ka dìlsak a ni ber ang chu.

Hruaii pawh nau nei thei tùrin a inbuatsaih ve tawh a, a vawi khat neihna tùr a nih avàngin kan khuaa nei mai lova damdawi in ngeia nei tùr chuan kan ràwn a, ani pawh chuan," Ni e, kan tum ve chu a nia. A, hritlâng hi Pathian zârah kai lo phawt ila, a țha a ni mai," a lo ti a, Feli chuan," Ka rawn kài dâwn che, ka rawn lèn ngun deuh chuan i kai thei mai ang," fiamthu hian a ti a, ani lah chuan," Tunah hi chuan e, ka ngai hlawl lo che, ngaihna che pakhat mahin ka nei lo, rawn lêng miah suh ang che," a lo ti ve bawk a, an inchhâng tâwk riau mai.

U Valpuia lo vât chu U Vid-a'n a pui a, an inlâwm a ni ber zâwk ang chu. A lo tùr an vah zawh dâwnah a che chhe ta tlat mai, U Vid-a mau sah chhumin a khawh fuh palh ta hlauh ni àwm a ni. An sawi dàn ațang pawhin min râp lutuk a, ka țim uai uai thei a ni. Lunglei panpui nghâl a ni a, min hrilh chiang duh vak lo nain damdawi ina admit a nih avàngin ka rilru a hrehawm lo thei lo va, ka ngaihtuah lo thei lo a ni. Ka hritlâng ka zia ve viau tawh a, kâr tàwpah ka va kan ve ngei chu a ngai ang, tu pawhin min lo hmuin eng ang pawhin min sawi dâwn pawh ni se ka kan ngei ang a, a țùlchuan ka riahpui ve ang tiin ka rilru ka siam sauh sauh a.