☆Mr. BAD(ZAWLAIDI NEITUPA)☆ - 33 By Dingdi Pachuau

☆Mr. BAD(ZAWLAIDI NEITUPA)☆ - 33 By Dingdi Pachuau

U Valpuia ka khawngaih. A unaute'n an lawm loh chu thuhran, a pain a hnutchhiah a in leh lo thlengin rawn neihsak an tum a ni si a, a hmain a nungchang leh khawsak phungin a lo zir lo ve deuh pawh a ni ang a, chu vàng tak chuan a unaute pawh hian ngaithei lovin an en hrang ta deuh ni pawhin a hriat; mahse, a têt tê ațanga nuțâ anga an lo enkawl chhoh tawh a ni ve a, a lo țhat vak loh pawhin tuna an tih ang êm êm hi chuan rawn ti lo se, țha taka rawn biain țha takin rawn dîl ni se an huante pawh chu U Valpuia chuan a sem țhen ve duh maiin ka lo ring deuh a. A thuhrimah, hmun dangah pasal neiin an awm ve ve tawh a, rethei bakberh tak an ni lo tih lah a lang reng a, rawn chuh an duhna thinlung hrim hrim chu a ngeiawm hrim hrim, an duhãm ka ti a ni.

U Valpuia chuan min hrilh duh miah loh avàng chuan ka zâwt duh bîk lo va, țûl a ti lo a ni ang ka ti mai a, lo zawh ve chhên kha țha ka ti lo a ni. A rilru a hrehawm ve dâwn nâklaiin, a harsatna ka sut kiansak thei dâwn pawh a ni bawk si lo, a ngawih theih chhûng chuan ka ngawi ang, țûl a tih hunah chuan min hrilh ve mai ang chu.

Zan khat chu a rawn sawi chhuak ve ta chiah a," A hmeichhe thuhlâ ka ti a, hrilh pawh ka hrilh duh lo che a nih kha. Mahni farnute chanchin mawi lo lam a ni bawk nèn, inneih kan lo rem lo pawh kha lehlam taka ngaihtuah chuan a tihzia phian ka ti ta. Lo innei ta ila chuan tuna kan boruak hi i tawng dâwn tihna a nia, i tawng lo hi ka lãwm tak tak a ni. A zahthlâk bâkah a mualphothlâk a, sawi chhuah pawh hi ka duh loh phah a ni," a rawn ti sup sup a. Kei chuan," Um, nia, a dik alawm, zawh pawh ka zâwt duh lo che a," ka lo ti ve a.

"Ka farnute an ni a, an chan tùr pêk hi ka tum lo ngai miah lo, pumbilh lah ka tum hek lo; mahse, thil hi a kal dik lo kual vêl vek a ni ber. Huan hi sem țhen ve ve ka tum reng a, in erawh hi chu nupui neih ka la duh ve dâwn avàngin ka nei ang a ka ti a ni; mahse, inang vek leh intiat veka ka sem pawhin an chanah an lungawi thei lo va, an thisen zawm ka nih lohna chu changchàwiin ka pa kha ka duh dàn thála thurochhiah ka ziahtîrah min puh tlat a, court-a min khinte an sawi ri thuak thuak maw le! A buaithlâk ka ti, ka lu an ti hai, rorèl fel dàn tùr pawh ka hre thiam tawh lo," a rawn ti leh a, a rilru a buai ve takzet a ni ngei ang.

"Thorochhiah ber i kawla i hming a chuan ngei si chuan court-ah khing che pawh ni se tih theih vak an nei chuang nâng," ka lo ti a, ani chuan," Ka farnute an ni a, a theih chuan thurochhiah avànga court hial thlen kha ka duh lo, a hmingchhiatthlâkin a mualphothlâk ka ti a ni, eng vànga ka chunga hetia duh chhe êm êm nge maw an nih le? Kei chuan ka pianpui, ka thisen zawmpui angin ka en ve ve si a," a ti leh a, a thâwk leh hak țhin dàn ațang chuan a rilru a hrehawm takzet a ni tih a hriat reng mai si a, ka khawngaih a, a tân tih theih leh thuràwn țha pêk tùr ka nei bawk si lo chu ka inhua a ni.

A ke chungchângah chuan ka thu a âwih viau a, a enkawl țha bawk a, a dam chho chak ta viau mai. In bul vêla chêt erawh loh theih loh a ni a, ka hre thiam lutuk, ram lama hna hrâm a thawh kha ka rem tih loh ber chu a nia, lo vah zawh vek tawh a ni bawk a, hna thawh tùr awm loh hun lai tak a ni chu a làwmawm ka ti.

Hruaiite fapa chu kan țhianho naute a ni leh ta, zàn tinin group video call kan nei ziah a, Hruaii'n a fapa a lo buaipui hman ziah avàng chuan," Kan țhianho fapa rangkachak chu eng nge vawiin lamah a lo an a?" tiin kan zâwt ziah a, a bulah lah hian a pa hi a lo țhu ve hman ziah bawk. Kan aia upa daih mah ni se kan țhiannu pasal a ni tawh miau a, kan rualpui biak ve hmiah hmiah mai țhìn. Kan țhianhovin fa pahnih kan lo nei ve ta reng mai, pakhat chu Mampuii fanu a nia, ani erawh chu a lian ve deuh tawh a, chhawnchhaih nuam rual ni tawhin phone-ah a nu ka biak pawhin min rawn ko ve lauh lauh țhìn, țawng a thiam hma viau nain a țawng erawh a fiah lêm hlei lo va; mahse, chu tak chu lawmawm ka ti țhìn a, ka biak rei phah fo reng țhìn.

Ka ngaihtuahna a kal thui châng hian U Valpuia nèn inneiin fa nei ve ta ang ila, an hmêl țhain an duhawm ve ang em tihte ka ngaihtuah țhìn a, U Valpuia hian a làwm ang em? Ka nu leh pate hi chuan an làwm viauin ka ring teh ngawt a, an tute (U Puii leh Tĕțani fate) an hmuh phâkah an awm hnai si lo va, an duh anga zing pawhin an hmu thei hek lo. Chuti a nih chuan kan fate chu an làwm lo thei lo, an duat viau ang. Kei pawh min duat a nia, ka fate hlauh phei chu an duat dâwn lutuk.

Kan khuaah ka haw lo ta vang vang a, ka insûm thei hi ka tia, haw châk viau țhìn mah ila hun rei lo tê tak tak hmang tùra haw kha ka peih ting tang lo a ni, tunah phei chuan ruah sùr thla kan thleng tawh lehnghâl a, khaw kâr hnai tê a ni bawk si lo nèn, scooty nèn zawng vei chhên a peihawm loh zual a ni. Ka haw châk chhan ber U Valpuia'n," I rawn haw chhên chuan i nu leh pa ngaih dàn a ni lo ang, bâkah i ngaihtuahawm, ngai tho che mah ila rawn haw duh suh," a tih țhin avàngin a thu ka âwih a, kum chanve deuhthaw chu hei ka haw ta lo a nih hi. A farnute pawh an reh ta rih niin a rawn sawi a, ka ngaih erawh a țha viau lêm lo, court lamah an kal ta a ni ang ka ti rilru a; mahse, chu êm chu thleng lo hrâm se chu ka ti, U Valpuia tih dàn takah a mualphothlâk dâwn êm mai. Ka țawngțaina lamah ka thlen reng a, a hun tawn mêk avànga nunhlui lama a kìr loh nân, hma lam pana a hun a hman zêl theih nân leh a ute nèn an inkâr a țhat theih nân ka dîl a, kan pahniha inkâr pawh ka thlen ziah, ka theihnghilh thei ngai lo. Ka nu thinlung tih nèma a awm theihna tùr pawhin ka dîl țhìn bawk, hei hi chu a hma daih ațang tawha ka lo dìl țhin a ni, mite tân chuan thil ho tak pawh a lo ni maithei a; mahse, a ho viau si lo, Pathian hnênah lo thlenna tùr ka hre lo va, Ani chu engkim ti thei a ni a, min chhàn ngei ka beisei a, ka ring a; mahse, chutih rual chuan ka duh anga ranga min chhàn erawh ka beisei ngam lo thung.

*******

August thla mah ni se vawiin chu ruah a sûr lo ve tlat mai, nî pawh rawn lan châkin chhûm kârah a rawn dâk leh dûk dûk țhìn a, a lo lang khât ta deuh a, a zak deuh nge ni, a pil leh nghâl thuai zél. Nî lo lan hi chu ka beisei phâk meuh lo chu a ni, nizàn lamah khân a la sûr ve tlar tlar bawk si a, khaw chin tàr lanah ni se vawiinah sûr tùrin an dah bawk a; mahse, a la sûr miah si lo, hawi vêl pawhin ruahkûng hmuh tùr a awm lo rêng rêng. Upate'n,' Khaw chin leh nau chin a hriat loh,' an lo tih hi chu a dik ve țhìn khawpin ka hria.

Calendar ka han thlêk a, E! Kârleh Thawhțanni chawlh kan nei dâwn! A va tihzia mai mai tak! Haw phei tum ve chhin teh ang, U Valpuia  hmuh pawh a châkawm tawh, ka hmuhna a rei tawh êm mai. Vawiin khua heti anga a awm tluan theih phei chuan thil làwmawm tak a ni. U Valpuia hrilh lâwk lovin haw phei thut ila, min hmuh thut hunah chuan... ka nui sak a, mak tiin a hlim ve ngawt ang chu.

Haw ka tum vàngin ka mood a fuh a, khuain a lo zir ve bawk nèn, ka che vêl pawh a zãng haih haih viau mai. Nilêngin ning hauh lovin ka hna chu ka thawk a, min dàwrtu an tlêm deuh a, bàn hun hma deuhin haw hma ka dîl a, ka haw hma ta daih nghe nghe a ni. Chhùnah khân ruah a rawn tla leh siar siar kha a nia; mahse, tunah erawh chutiang eng mah a awm lo, a tihzia tak tak a ni. Ka pa ka bia a, haw lawk ka tum tih ka hrilh chuan," E, lo haw rawh khai; mahse, rawn khalh fîmkhur viau la aw, lei a hmin tawh si a, chétsual a awl dâwn êm mai. Kawng pawh a nãl ngei dâwn a, hmanhmawhna rilru nei lovin fîmkhur takin i rawn tlãn dâwn nia. Lo hmuah i ngai ang em?" a rawn ti a, a ngaih loh thu ka hrilh hnuah chuan," A nih le, i rawn thlen tlai viau dâwn leh Tĕțanite inah i rawn riak mai ang a," a ti a," Ni mai e, khaw awm dàn azirte  pawh a ni ang chu," ka ti lêt a, kan duh tâwk ta thuai a. Ka pa hian fîmkhur tùrin min hrilh mai țhìn a, hmeichhia ka nih avànga nêp deuh leh min hlauthàwnpuina ang chi țawngkam erawh a chhâk chhuak tam lo, thil nih dàn dik takin a sawi mai a, thil rêng rêng a êng zâwnga thlîr tlat mi a ni țhìn bawk a, mi fuih phùr pawh hi a thiam viau țhìn bawk.

In thlen veleh ka insiam zung zung a, ruah a rawn sûr dâwn a nih pawha buai lo tùrin raincoat ka ha sa a, ruah sùr loh lai ngeia thui tak tlàn ka duh avàng chuan ka rilru a hmanhmawh a, ka insiam zo rang viau bawk a ni. 

Ka tlãn ta vang vang a, ruah a tla lo nain chhûm erawh a zîng ve deuh chuai a, nuam ka ti lo, a thaw ipikthlâk ka ti a, chhûm zîng chuai hi ka ngaina hlawl lo, thlahrâng a rawn inlàr duh hmèl ka ti țhìn a, chu vàng tak chuan ka ngaina ngai lo.

Ka tlãn chak lêm lo va, tlàn chak pawh tum mah ila a theih chuang loh ang, kawng a nãl a, ruah êm súr tawh rih lo mah se nãl ve tak a ni, scooty phei chu a zãng a, min paih dêrh dêrh ka ti mai; mahse, tlûk ka tum lo hrim hrim, ka khalh thiam ve tâwk tawh a, kawng chhe deuh laiah pawh ka confi ve tawh viau a ni.

Ka tlãn tluang angreng a, kawng a nãl viau chung pawhin ka chawlh loh vàngin ka thleng ve zung zung a, ka rilruin ka țawngțai reng a, làwm thu sawi pahin, hlim leh tluang taka in ka thlen theih nân ka dîl a. Pûkpui thlen hma, țawngțaina bulah Truck lian ka tlàn pèl a, chumi hnu rei vak lovah chuan car tlãn muang deuh tak hi ka tlàn pèl leh a; mahse, ka tlàn pèl thui vak lo, min rawn tâwk zâwnga Pik-up rawn tlän chuan min rawn pan tlatin min rawn sut a tum ni tlata hriatna ka nei pek a, chu vàng chuan sîr tâwkah ka tlän nghe nghe; mahse, ka side țha viau emaw ka tih lai chuan ka scooty lêng lawp khawp chuan min rawn su ta tho a, boruakah ka kãng lawp tih chu ka inhria a, ka au ruai ruaiin ka hria, eng berah nge ka intauh ka hre lo, a ri zui chhawk a, a na vawng vawng a, a thim ta vek mai.

Tunlai chu ka buai lutuk a, a thui thei hlawl lo, dah ve ngei ka dub si a, Krismas buaiin ka buai tawh a maw, chêtna tùr hlîr mai, sàwm ni thei ila...