☆Mr.BAD(ZAWLAIDI NEITUPA)☆ - 32 By Dingdi Pachuau

☆Mr. BAD(ZAWLAIDI NEITUPA)☆ - 32 By Dingdi Pachuau

Kâr tàwpah chuan Lungleiah ka phei ta ngei a, U Vid-a'n a awmpui tih hriain ka phone lâwk thlap a, an awmna ka zawng buai lo. U Valpuia chu ka phei tùr thu ka hrilh lâwk lo va, U Vid-a pawhin a lo hrilh duh bîk lo a ni ang chu, min hmu thut mai chu, a mitmeng ațang chuan mak a ti tih ka hre chiang ngang mai! 

Zàn chu ka riahpui a, U Vid-a erawh a riak chhuak ta daih thung. A ke chu nâ a tih chiam loh avàngin zia ka ti hlê a, ama kâ ngei ațang chuan a inhliam dàn pawh chu ka hre thei ta a, ka khawngaih a, chutih rual chuan ka hmangaihna a zual sauh bawk a. A nat laia chhûngkhat laina awmpuitu a nei lo chu ka lainat êm êm a, U Vid-a hi chu a țhian țha a ni a, a chhûngkhatte aia a pawh leh a tâna awm reng a ni tih chu ka hria, a unaute kha a ni ka tih ber zâwk chu. Khati chen a lo chènpui tawh leh a unau pianpui ang hiala a lo en țhinte hmêl hmuh tùr awm lo leh an rawn ngaihsak miah lo hi mak ka ti a ni. 

U Vid-ate chu in lama an buai ve tho thu sawiin chutia a awmpui tlat chu inthlahrunawm a tih thu a sawi sup sup a, awmpui a ngaih loh thu a hrilh pawha a awmpui luih tlat thu a sawi chuan," I țhianpa kha a ni tlat mai a, eng ang pawhin hnial mah la a hawsan hauh lo ang che," ka lo ti a. Ani pawh chuan," Ni e, ka hnar haw zo lo chu a nih hi. Hliam na tak tuar, awmpui ngai tak, che thei lo chu ni ila chuan ka hnial hauh lo ang a; mahse, chutiang chu ka ni si lo va, chu vàng tak chuan a zahthlâk ka ti a ni," a ti leh a.

"Zahthlâk loh e, țhian țha chét hun a nia, a țanpui che a ni mai. Eng thilah mah inthlahrung suh, a awmpui ta sa sa che a, i tîr kual char char mai dâwn nia, i tirh theih hun lai a nih hi," tiin ka han nui a, ani erawh chuan," Ka tîrh kual ngai lo hian a kal zung zung zâwk, a bengvâr riau a," a lo ti ve leh a.

Damlo na tak leh chêt theih loh vànga damdawi ina awm a ni lo bawk a, kan hun neih dun chu ãm takin kan hmang dùn a, chumi zàn chu tui takin ka muhìl ve thei mai a, mut țhanna lova mu ka nih avàng erawh chuan harh zauh zauh chu ka nei tho a, U Valpuia pawh a mu țha thei chuan ka hria.

A tûk chhùna inthiarna pindana ațanga ka chhuak chu ni lum ka ai zuai a, U Valpuia awmnaa ka va luh leh chuan ka pa ka va hmu ta hlawl mai, ani pawh chuan min rawn hmu ve nghâl vat a, a țhutna ațangin a rawn ding zui nghâl bawk. Min hauh loh hrâm ka beisei, U Valpuia ka en vat a, ani pawh chuan min lo en ve a, a hmêlah chuan inthiam lohna leh hrehawm ti hmêl ka hmu zui bawk.

"Bawihte, i lo awm ve reng a...!!!"

"Aw... nimin khân ka lo phei a, tu nèn nge in rawn kal a?" ka ti sap a, ani chuan," Keimahin mamawh lam tùrin ka rawn kal a, Lunglei rawn kal tâkah chuan Valpuia tlawh a țha êm mai ka tia, ka rawn tlawh a nih hi," a ti dam duam a, a awka chhuakah chuan thinrimna emaw lungawi lohna emaw a awm pawhin ka hre lo; mahse, min hmu thut kha chu mak a ti tih ka hre thung.

U Vid-a pawh a rawn thleng ve leh tawh a, ka pate nèn kan han inhmu khâwm ral ral chu eng emaw kawng zâwng tak chuan a thlamuanthlâk a, eng emaw kawng zâwng tak erawh chuan boruak chu a țang ru deuh tho bawk a, U Valpuia phei chuan nuam a ti fahran lo a ni ang, ka pa awm chhûng chuan en pawh min en tawh lo hrim hrim, a inthlahrung a ni ngei ang chu, a ho thei siah!

Ka pa chhuak tùr chu ka zui chhuak a, pâwnah chuan ding dùnin kan ngawi dùn vang vang phawt a," Pa, i thin ka tirim lo tiraw?" ka ti ta sap a, ka lo awm ve avàng chuan a thinrim loh hrâm ka beisei a ni. Ani chuan," Thinrim lo ve, kan hmangaihte chu manganna leh hrehawmna an tawh chângin an kianga awma hnem kan duh a, kan theihnaah zâwnah țanpui kan duh țhìn a ni. Ka hre thiam viau che a nia; mahse, fîmkhur la, nupa ni lovin nula tlangvâl in ni tih kha hre reng la aw. Chuan, hei hi ka kanna ni rawh se, i lo pe dâwn nia, amah ka pêk chuan a la duh àwm si lo va," tiin, pawisa fai chêng sâng khat hi min pe a, kei chuan," Pa, ka lãwm lutuk e, min hre thiam tak pa ka nei che hi chu khawvêla fanu vànnei ber ka ni ngei ang," ka lo ti ve a.

Damdawi in chhûnga ka lût leh chu U Vid-a chuan min lo fiam nasa mai. U Valpuia erawh chu a nui țha duh miah lo va," A zia lo tak tak a ni," a ti leh ringawt țhìn a, kei chuan," Engah vak ngai duh suh, a mâkpa țhelh a rawn kan ve che a ni mai a," fiamthu hian ka ti a, U Vid-a nuih a za ngang mai; mahse, U Valpuia ve thung chu za lo deuh hian a țhen ve sak chauh a, a ngaihtuahna a kal thui a ni ang, ka pa a zah chu thuhran ni se, min ngaihtuah vàngin chutiang chuan a awm tih ka hria.

'Kanna atân' tia ka pa pawisa ka pêk chuan a la duh miah lo va," Min rawn kan mah a làwmawm rualin zah tawh nâklaia, a pawisa lâksak lehzêl zawng a tihchi hauh loh," a ti deuh tlat a, U Vid-a chuan," La mai mai la aw... A mâkpa țhelh a rawn kan che a, pawisa a rawn pe phal mah che a nia; i lâk duh loh chuan ka lo nei daih ang ti nia," a lo ti a, kei pawh chuan," A tihchi lohna a awm lo rêng rêng! Țangkai takin i hmang dâwn nia, i Puzawn țhelh pawisa pêk che a nih hi, a hlut dàn a dang bîk zaih ang aw," ka ti ve leh a, U Vid-a nuih a lo za leh tawh a, a nui leh kur kur tawh mai.

Awmpui rei thei hek lo le, ka hawsan leh ta thuai a; mahse, ani pawh a awm rei ta lo, a chhuak zui thuai a, kan khuaah Health Worker a awm ve a, chu chuan dressing vêl a tihsak thei dâwn tho a, ka ngaihtuah lutuk lêm lo ve; mahse, dam țha vak lovin hna a thawhpui ringawt ang tih erawh ka hlau a, amah pawh ka hrilh chàmchî tho nain U Vid-a leh Mampuii hnênah a dam chian tak tak hma chu hna a thawk tùr lo khap rih tlat tùrin ka hrilh bawk.

Ka pa khân damdawi ina min hmuh thu kha ka nu a hrilh ka ring chiah lo va, a dik ngei bawk a ni ang, min rawn hau miah lo va. Biak chu kan inbe leh tawh ngei a; mahse, eng mah chutiang lam chu kan sawi lo hrim hrim, puan chanchin lam hlîr a ni kan sawi, Tĕțani'n a tlàwmna a lo hria ni àwm tak a ni. Ka nuin duh lo viau rih mah se pa berin U Valpuia chu min duhpui lo hran lo tih ka hre chiang tawh a, min hre thiamin ka chungah pawh a thinrim lo tih lah a tilang reng tawh bawk a, ka lama a țan zêl ngei pawh ka ring, a țan zêl theih nân a duh loh zâwnga awm erawh ka hlau hlê a, a thu min hrilh zawng zawngte kha ngaihtuah lêtin zawm ngei pawh ka tum hlê a ni.

Hruaii pawh nau nei tùrin damdawi inah a lût ve tawh a, a huphurh ve ngang mai. Kan han hnèm ve liam liam a, a chin lo hre tawh Mampuii chuan," A, a na lo ka tih chuan dâwt ka sawi dâwn si a, na êm êm tùrah khân dah tawp phawt mai teh; mahse, i lo awl phian thei tho a nia, huphurh viau mah la i tawn tùr tho a nia, huaisen tak khân hmachhawn tawp mai rawh, huphurh vàngin a nat loh phah chuang lo va; mahse, naute lo pian chhuah hnuah erawh zawng i nâ zawng zawng chu a reh vek mai ang," a ti a, a dikin ka ring khawp mai. Zai ni lova a hrina hring chhuak ngatte rêng rêng chuan nâ ti lo an awm ka la hre lo, Pathianin Evi hnêna a sawi kha a ni rêng rêng a, na êm êm tùrah ka ngai hmiah a ni.

An pain nau a har viau a hlauhpui êm avàngin Sakuh sa rêp leh a pumpui rêp a hmain a lo zawng kual chiam tawh a, a neih dâwn tak takah chuan a sa chu a chhumsak a, chutiangin a pumpui pawh, a tui a hàwptîr vak bawk a, tluang têa neiin a har viau lo tùrah ngai ve phawt ang.

Damdawi in a luh ațanga a ni thumna zàn dâr 11:38 - ah chiah fapa kg 3.700-a rit a hring chhuak ta tih Pa Zuia hnên ațangin kan hria a, kan lãwm dar dar viau mai. A vei tih kan hriat ațangin chanchin kan ngaichäng reng tawh a, a nuin a awmpui a, pâwn lamah Pa Zuia a awm ve reng bawk a, a hnên ațangin Hruaii chanchin engkim pawh kan hre thei zêl a ni. Naute kutke kimin a piang a, a nu a inhliam ve viau tho nain an nufain an țha a, a làwmawm viau e. Kutke kim lo piangsuala an rawn pian chhuah a hlauhawm si a, nu tân rilru a hah duh viauin ka ring.

A tûkah naute thlalâk chu kan hmu ve thei ta, a hmai a hlai phak mai a, a sam pawh a pa sam a chhùn a ni, a tamin a dum hlap reuh a, ka rin aiin a ngo daih bawk. A pa a ang ka ti nghâl khawp a; mahse, nakinah a hmêl chu a rawn țhang danglam ve zêl ang a, a pa a ang tak tak ang em maw le?

U Valpuia pawh chanchin ka zâwt fo a, ka rin aiin a dam chak lo tlat mai a, a buaithlâk ka ti ru riau. Damdawi in ațang khân a chhuak hma mah mah a ni ang a te ka tih phah fo a ni; mahse, rei lo tê awm pawhin awm man a sâng hma êm êm a, damlo na ngawih ngawih pawh ni bawk si lo tân chuan han awm reng pawh kha a buaithlâk ve êm bawk a ni. A bulah chuan," A va dam har ve!" chu ka ti duh chuang miah lo va, a ning vein hrehawm a ti daih zâwk dâwn tih ka hria a, a rilru ka tihhnual zual ka hlau ve a ni. " A na êm mai a, dam nân hun a duh deuh a nih dâwn kha, dìm la, enkawl țhain hahdam tak khân awm la, i indim thiam viau chuan a dam thuai mai ang," ka ti ve țhìn.

U Valpuia'n natna a tawrha hna pawh a thawh theih loh lai chuan a farnute chuan an rawn tlawh leh a, in leh huan loram chu neihsak an rawn tum leh ni àwm a ni. U Vid-a hnên ațangin ka hre hmasa zâwk a, an rawn sawi dàn tak chuan," Sawi buai lovin ka pain thurochhiah a ziah kha min pe la, in hi chu i chang ve dâwn nia, kan thisen zawmpui ni lo mah la ka nu leh pate zah vàngin in chu i chang ve thei ang," an rawn ti a; mahse, U Valpuia chuan lehkha thurochhiah inziahna chu pêk a tum lo va, chu vàng chuan a farnute chu an thin a rim leh ta a, an àn khum hrep hrep ni àwm a ni.

Khawtlângin chu thil chu an hre leh ta vek a, ka nu ngei pawhin min rawn biain," Ka hrilh tawh che kha, Valpuia hi neih chi a ni lo. Hetiang chhûngkaw buai nuai mai hi zawng, a râpthlâk a ni. I la theih lai hian inthiarfihlìmsan hmak rawh, chhûngkua ber a buai tawh hi chuan thil a dik thei tawh lo țhìn. Eng vànga palai kha remna thu sawipui lo nge ka nih? A chhan chu i hma lam hun ka ngaihtuahpui vàng che a ni, hêng buaina tùr hi ka hmu lâwk vek, ka hmangaih che a, ani hi pasalah i nei a nih chuan hlim takin i awm thei lo ang tih ka hria a ni, a farnute hian an kiansan mai mai lo bawk ang. Chhûngkaw pângngai tak leh pianpui unau tak tak nei leh thisen zawmpuite neia chéngho  chu ni se ka hre thiam ang a, ka kaltîr phal maithei bawk che a ni; mahse, a ni si lo, a tìr tê ațangin ka hria, a nungchang leh khawsak dàn thlengin ka hre ve alawm. Pasal țha tak neiin hlim takin fate nei la ka ti a, ka duhpui che; mahse, ani kher hi zawng, a theih loh hi a ni tawp mai, pasal țha tak a ni lo ang, a nunhlui engkim lah khawtlâng hriat a ni bawk," a rawn ti a.

"Nu, mi rêng rêng hi an nunhlui ațanga kan teh chuan kan teh tling thei ngai lo ang---" ka la sawi lai mêk chuan," Engtin pawhin sawi mah la, ani nèn kher hi chuan ka rem ti ngai dâwn chuang lo," a rawn ti leh nghâl vat a, a luhlul ve bawk sia maw, ka thaw hawk ringawt.