☆Mr. BAD(ZAWLAIDI NEITUPA)☆ - 34 By Dingdi Pachuau

☆Mr. BAD(ZAWLAIDI NEITUPA)☆ - 34 By Dingdi Pachuau

Lu na êm êmin chiang lo ruai hian ka harh a, ka lu a nat êm avàng chuan ka rûm deuh kâwk kâwkin ka hria a, ka aw erawh ka hre chuang lo. Hmêl chiang lo ruai ni àwm tak hi ka hmu zui a; mahse, a rei lo, a bo leh zui daih a, ka hmu sual zâwk a ni maithei, khawiah nge ka awm tih hre tùr pawhin ka lu chu ka chêt thei lo va, hawi sawn ka tum pawhin ka thei thlâwt lo. Engati nge hetianga ka lu hi a nat êm êm le, ka mumang a ni em, nge a tak tak? A tak tak a ni zâwk ang, mumangah chuan nâ ka hre ve ţhìn tho nain tuna nâ ang hi chu ka hre ngai lo. Ka lu a nat êm avàng chuan ka thil hmuh a chiang lo ruai a, hmuh fiah tumin ka han khap dâwn a; mahse, ka mit chu ka khap chiah em tih pawh ka hre thiam lo. Ka khap a nih pawhin ka thil hmuh fiah thei bawk si lo chu mak tak a ni. Ka lu nat dàn chu sawi fiah thiam a harsa, a na tluk tluk a, a na leh vung vung a, tuboh lian deuh tak hian chhu tluk tluk se, chuti ang vêl chuan a nâin ka hria. Khawiah nge ka awma eng vànga ka lu chu na êm êm nge a nih pawh ka hre lo.

Ràlkhat hla taka țawng ni àwm tak, hriat țhat theih loha khãwk zêl hi ka hria a, eng nge a sawi phei chu ka hre thei lo hrim hrim. Lo hnai deuh se, a sawi pawh ka hre thei maithei asin le. Au vak ila, min rawn hre theiin min rawn chhâng lêt thei mai lo'ng maw? Mahse, ka au thei lo, ka hmui ka chêt theih loh chu thuhran, ka aw ri a chhuak thei lo hrim hrim bawk. Engati nge hetia ka awm? Ka thi em ni? Nge min phuar bet zâwk? A va hrehawm mai mai tak!

Ka taksa pêng khawi lai ber nge tih pawh ka hriat loh hi a rawn thîp vât a, hlîng chhun ang ni maiin ka hria; mahse, a thïp rei lo va, a zia deuh. Țawng khãwk rawih rawih pawh kha ka la hre thei reng a, mipa aw nge hmeichhe aw tih erawh ka hre thei lo, lo hnai se, min bia se ka va ti tak! Ka awm dàn hi ka zâwt chiang ang a, ka thï nge ka dam tihte tal pawh ka zâwt thei tùr hi a nia...

Ka lo chhîng sek nge, nikhaw hre lovin ka awm zâwk, țawng ri ka hre leh a, ka hriat chu a fiah ta viau thung. Ka ngaihthlâk chian deuh chuan U Valpuia aw niin ka hria a, ka rilru a hlim nghâl sawt mai. Han koh mai ka tum a; mahse, ka aw a ri chhuak thei lo, ka tum nasa viau a nia; mahse, a ri chhuak chuang lo a ni chêk ang chu, ka țawng hria ni se min rawn ngaihven êm êm ang chu. A țawng thûm bul bul reng a," Ani zawng hmeichhe nunnêm tak a nia, a tawrh atân chuan a na êm a ni, a tawrh ai tawrhsak thei ila..." a ti sup sup a, a thaw leh hawk hawk țhìn, tu chungchâng nge a sawia a chham sup sup ni? Kan pahnih hian kan thi dùn anga, hremhmun lamah kan awm dùn tihna em ni? Mahse, chu êm zawng a ni thei lo ang.

Ka harhfîm chho tial tial a, khumah ka mu tih ka hre ta, ka lo muhìl chu a nih chiah hi. A hmaa ka lu na ngut ngut kha chu a awm tawh bîk lo va, kha kha chu ka mumang pawh a lo ni maithei. Thil hmuh chian tumin ka mit ka han khap a, ka thil hmuh erawh a fiah thei lo, engtin nge ka tih ang aw tiin ka ngaihtuah a, ka theihtâwpa țangin ka kut chu chêttîr ka han tum a, tlëm chuan ka tiche thei ta, chutih rual chuan ka bula țawng bul bul ri chu a tàwp ta chat a," Nunu..!! I harh em? I kut i rawn chêt!! I harh chiang a ni tiraw?" a rawn ti ta mawlh mawlh a, ka kut a lo chelh reng a ni chêk ang chu, chutah, ka hmuh theih tùrin a hmêl chu a rawn lang zui ta a.

Kum hnih hnuah

~~~~~~~~~~

"Vawiin zet kha chuh! I thuam hâk inhmehzia leh i hmël țhatzia kha țawngka hian a sawi fiah phâk lo, en reng mai che kha ka duh a, a rûk tak chuan mi dangin an en ve che pawh kha ka phal lo va; mahse, i hmêl țhatzia leh ka nupui i nihzia hre tùr khân ka duh tho bawk si. An en duh viau che tih ka hmuhte khân thîkna rilru hlîrin ka lo khat," êng pângngai zâwk a ti thim zo ka bula rawn țhut pah chuan a ti sar sar a, min rawn kuahin a thaw zui ham ham a.

"Ka pasal ngei hnên ațanga chutiang thu làwmawm ka han hria chu a nuam dangdai ka ti hlë mai! Nang tak kha i chhe mawlh lo asin, ka vànnei takzet a ni, kum heti chen nula dang nei lo leh beidawng lova min nghâk char char thei hi ka lãwm bawk, ka hmangaih che, U Valpui. I hriat hnu mah ni se hrilh nawn reng che hi ka duh a," ka ti ve a, ka zak duh bîk lo. Zah hun pawh a ni hek lo, nupa kan ni tawh a, zahna chhan tùr a awm lo.

Ka nghâwng rawn nül thuak thuak pah chuan," Umm... ka hria; mahse, hriat nawn reng ka duh, ka thinlung lalnu hi kei pawhin ka hmangaih reng ang che. Ka lãwm e, ka nupui i nih avàngin, Pathian hnênah pawh làwm thu ka sawi mawlh mawlh e," a ti leh a, ka chhàn hma chuan ka bek tawn tawnah vuanin dìm dam tê hian min fâwp dà dá a, ka va duh khawp lo tak! "Tu emaw tê tê ka'n fiam lawk teh ang," tiin a la nui suk zui.

"Hm...i sual!" ka ti ve thung a, ka bân pahniha a nghãwnga kuahin keimah zâwk chuan duhthawh tak hian ka fâwp zui ta a, ka tàwpsan duh miah lo. A hmaa min fawh ang dà dà kha chuan ka fâwp ve duh teuh lo mai, min tivir ting tang ka ti mai; mahse, ani pawh keimah ang tho a lo ni, kan infâwp mawlh mawlh a, kan hmui insi reng chung chuan thuam kan inbel thêmhlêm dùn tak chu kan inphelhsak a, tu mah vènthàwn tùr leh zah tùr an awm lo bawk a, nupa ni ve tawh ta chuan nupa nun chèn tùrin hma kan la dùn sauh sauh a.

Zîngah eirawng bàwl ngai hek lo, thawh hma a phal tlat lo va, min zar buaitu tùr ni se hmun dangah an riak vek si a, a thu âwihin zîng dâr 7 pelh thleng kan mu a. A chhûngte lo kal ve chhun pawh hmun dangah an riak chhuak vek a, țhiante'n nachâng an hria a, fiamthu titakin an in lama riakah an sâwm vek a ni. 

Kan inpeih hnuah kan in lamah (ka pate in lamah ti tawh ang) tûkțhuan ei tùr chuan kan chhuak a, kan thlen veleh U Valpuia chuan fatute chu a han chêtpui ve nghâl a, an lo fiam nak nak ri chu ka hre nghe nghe. Chêtna tùr phei chu a awm tawh hran lo, an lo peih fel vek tawh zâwk a ni.

Chaw ei khama thlate kan lâkho leh nak nak hnuah U Puiite chu Aizawl lamah an haw phei ta a, Tĕțanite erawh naktûk lamah an haw thung ang, anni zawng an awmna a hnai a, ka pain a chelh rih a ni. U Valpuia puteate nupa pawh chawhnuah an haw a, niminah a farnute erawh an haw nghâl thung. An rawn lang ve hlawl kha a nia, mak kan ti deuh vekin ka ring, mi ngaiha mawi an rawn zawng ve mai mai nge ka hre lo; mahse, a farnute an nih miau avàngin puan pawh an hàwn ve ve a ni.

Nilêng deuhthawin ka in hlui ni ta lamah chuan kan awm ve a, țhiante pawh an rawn lêng nak nak a, U Vid-a pawh U Valpuia țhian ber a nih vàngin a rawn lêng ve bawk. Ruai sa a la bàn tam avàngin zanriah pawh kan ei leh dâwn a, țhiante rawn lêng pawh chu ka pain a sâwm leh vek a ni. Chaw kan chhum fel hnu, kan la ei hma si-ah U Valpuia chuan thlàn lama kal a rawt a, U Vid-a chuan," Ni e, va kal r'u, in pahnih ngei khân va kal rawh u khai," a ti a, mi dangte pawh chuan," Ni e, va fianrial tak teh u," an lo ti ve a.

Kawnga kan kal lai chuan U Vid-a chunga a làwmzia chu min hrilh ve sup sup a, kawng engkima a tân a awm țhinziate sawiin nimin thleng pawh ni lo, vawiin thleng pawha a la țàwiàwm zêl chu a tluk lohzia leh a tâna țhian țha tàwp a nih thu min hrilh tel zêl a. A dik chiah a ni, nimin khân kan inneihnaah khân U Vid-a khân U Valpuia kha a dinpui a, U Vid-a a dinpui miau avàngin keiin Mampuii dinpui ve kha a fuh chiah ta si lo va, Feli'n min dinpui ta kha a nia; mahse, mi dang pawh chu ka țhiante vek niin min dinpui vek ang tho an ni, kan inneihnaa an kawr tùr puanthãn rawng inang vekin ka lei a, an duh dànin an țhuitîr thung a, kan mawi țhât țhât viau a ni.

A pa thlànah chuan kan awm deuh reng a, thlànlung chu chelhin a pa chu a be mawlh mawlh a, a nupui ka nih tâk thu leh min lawmpui ve ngei a rin thute chu sawiin kan pahniha min lo thlîr reng țhìn tùrte chuan a hrilh mawlh mawlh a, keiin ngawi rengin a kut chu nghet takin ka lo chelhsak thung. A pa hi a ngai ve dâwn êm a ni, a khawhar rûk tùrzia chu ngaihtuah rauh rauhin a hlim nîa lawmpuitu tùr, amah hmangaih êm êmtu a pa a bula a awm ve theih tawh lohzia lah kan hre chiang a, chhûngkhat thisen zawmpui tu emaw tal chu la nei se chuan a zia deuh tùr hi a nia...

Kâr khat ang chauh tak tak chawlh ka neih theih avàngin kan khuaah chuan kan awm rei thei lo va, hna nei zâwk ka nih miau avàngin min zui phei mai a ngai si a. Ka pain," In leh a vêl leh huante chu kan lo ngaihsak thei a nia, rawn ngaihven duh miah suh u. Nupa in ni tawh a, nupa nih tawh chuan awm hran loh a țha, awm dun hrâm tum tùr a ni," a ti dap dap a, ka nu pawh chuan," Ni e, Valpuia pawh he lam rawn ngaihtuah rêng rêngin hunte kha i hmang ang e, in nupain hlim takin hun hman in tum tùr a ni," a lo ti ve a. Ni e, han phei phawt ila, hnate han zawm leh ila... ka hna ka bànsan mai a nih si loh chuan hetia tih hi a ngai si a ni.

Ka in luah chu kan pahnih tân pawh a tê chuang lo va, a thuamhnaw dah belh ve leh kha a ni mai a, a harsa lêm lo. Kan khua ațangin thlai hnah leh rah țhenkhat kan keng phei a, vawksa rêp nèn, chu chu zanriah hmeh atân kan siam a. Tunah chuan nupa dik tak kan ni tawh bawk a, kan pahniha eirawng kan han bâwl dùn rak rak chu nuam ka ti, rilru a hlim veng veng mai. 

Zànah kan phei tih hriain U Zarite nupa an rawn lêng a, bengvâr ka va ti tak! Ani hian nikum lawk khân Sèrchhipa mi tho pasalah a nei a, tunah hian a rai puar pùng tawh a, kan inneih nî khân a rawn kal ve thei lo va, a inthiam loh avànga rawn lêng vat an nih thute min hrilh siam siam a, kei pawh chuan hre thiam tak hian," E, i dinhmun angah kha chuan hmun danga kal chi pawh a ni tawh lo alawm, tunah pawh min ngaipawimawhin in la rawn lêng hrâm hrâm a, a làwmawm lutuk!" ka lo ti a.  Ni e, kan inneih nî khân ka thawhpuite an rawn kal vek thei bîk lo va, pahnih chu an rawn lang thei hrâm a, thilpêk hlu tak min la pe zui, ka lãwm hlê a ni. Chawlh lâk mai mai a harsatzia ka hre chiang a, thilpêk kha chu thuhran, anmahni an rawn lang thei kha mak ka ti hial zâwk a, an chungah ka lãwm bâng lo, min ngaihpawimawhna an rawn tilang hrâm kha ka lãwm êm êm a ni.

Zàn mutnaah chuan kan inkuah chial a, ina a khum zau duai mai leh tuna kan mutna khum hi a inang si lo va, hrehawm a tih leh tih lohte ka zâwt mai mai a, ani chuan," I bula ka mut phawt chuan khawi lai hmun pawh ni se hrehawm ka ti thei ngai lo ang," tiin thutak zet hian min lo chhâng a, nuih sakin," Nuam thei," ka ti sap a, a khabeah ka fawhsak zui zauh bawk, min chhàn dàn hi ka duh thei êm a ni.

"Naktûk chuan ka chhuahsan daih dâwn si che a, i khua a lo har àwm sia, lo kal ve mai la?" ka ti leh a, ani chuan," Har ang; mahse, i lo haw leh dâwn tho a. Chuan, ka ngaih tluk zet chein nang pawhin min ngai ve tho dâwn bawk a," mahni inringtâwk zet hian a ti phawt a, chutah," Ka thlah che i duh chuan ka thlah ang che a, ka lêt hunah car khi ka en fel ang," a ti leh a," Eng nge, dik lo lai a awm em ni?" ka tih chuan," Sound tlêm rawn awm tum khi maw le," a lo ti leh mai a.

Kan naupang chhe zawk zawk dùn tawh lo bawk a, a theih chuan fa pawh neih thuai kan duh, țan pawh kan la ve rĕng bawk a, fa neih kan duh zâtte sawiin an hming tùrte nèn lam kan sawi țhin. Keiin fa pathum neih ka duh laiin ani chuan a tlêm berah panga tal a duh thu a sawi thung a," Kei ka fahrah si a, fa kan neih tam tal loh chuan... bâkah, an chhùn ngèi dâwn che a, fa hmêl țha leh fel tak tak kan neih chuan kan khaw tân mai bâkah Mizoram tân kan thawhhlâwk dâwn a, Mizo ni se kan pun phah dâwn a, sawrkâr tân hna kan thawk țha tihna a ni dâwn bawk si. Țhianpate chhûngkua kha ka awt țhìn, hna thawk tùrin an unauza khân an chhuak dual thei a, kei kha chu keimah chauhin. Chu vàng chuan chhûng rual hi a țha, Pathian zârah kan châwm thei êm êm bawk ang," a ti ţhin. Keiin," Kan nei deuh pawp pawp a nih loh chuan ka kum lam hi min ngaihtuahpui ve la, chhang a khàt phei chuan kum 45 vêlah ka la puar pùng dâwn tihna a nia," ka ti ve thung a, nui hawk hawk chung hian," A pawi hlei nem, i hrisèl thote chuan  a tàwp rak thlengin i puar mai ang chu," a ti a, nûr deuh nunga ka en chuan ani erawh chu a lo nui sûng a.

Ni tinin ka chhuahsan lo thei si lo va, ka khawngaih țhìn viau a ni; ani erawh chuan," I awm loh hlànin hna thawh tùr ka lo dap a," tiin thil chhe siam tùr a lo dap khâwm a, tui lum nâna ka hman current hmang chi pawh chu a lo siam țha a, scooty dik lo lai pawh a siam țha vek tawh bawk. Thil chhe siam a thiam tih chu ka lo hre ngai miah lo va, hna a thawk lai erawh ka hmu ve fo tawh a, thil chhe siama a han tawlh hrut hrut tùr chu ka khawngaihin inhmeh lo ka ti deuh a; mahse, tih tùr nei lova awm mai mai ai chuan țha ka tihpui tho, nuam a tih phawt chuan. A thil siam lai hmuh erawh ka châk ve tho a; mahse, in ka thlen tawh hi chuan a lo khawih tawh ngai lo, a lo siam zo tawh țhìn nge phei chu ka hre lo. Eirawng ni se a lo bâwl diam tawh țhìn bawk a, ka tân chêt vena tùr a awm tawh țhìn lo. Lo bâwl tawh lo tùr chuan ka hrilhin ka chah ve fo a, awmzia erawh a awm lêm lo chu a nih hi.

Thil siam a thiam tih chu ka thawhpuite bulah ka sawi chhuak pek a, U Zari chuan," A țhat nasat chu, a remchâng hlauh dâwn e," a lo ti sauh sauh a, chumi ka sawi zàn chuan an pa nèn rawn lêngin an tui lumna chhia pathum ngawt mai an rawn keng tehrëng a!! "Kan ti chhe hnem tawh lutuk a, khawi lai nge chhia tih kan hre ve bawk si lo nèn, 'siam tùr a ni' kan tih chhûng hian a dang hi kan lei leh mai țhin a," a ti a, U Valpuia hnênah chuan," Vawiinah in nuin a sawi chhuak hlauh mai a, a tihzia ka lo ti khawp a! Zanina siam rum rum tùr ka ti pawh a ni chuang lo," a ti leh a, U Valpuia chuan," Ni e, naktûkah kan siam mai dâwn nia, in rawn lêng a, kan inkàwm ang chu maw le," a lo ti ve mai bawk a, thingpuite siamin kan titi zui ta a. Kan țawng kârah U Valpuia chu ka melh ru zauh zauh reng a, a tân hna ka siamsak ta țeuh si a, vawiin lama ka lo țawng tam mah mah chu ka inthiam lo deuh tlat; mahse, amah ka chhuan vàng zâwk kha a nia, a hre thiam lo ang tih ka hlau deuh, nuam lo tihna ka nei ru deuh veng veng mai.

Mut hmuna ka sawi chuan," Engah nge ka lung a awi loh ngawt ang aw?" a lo ti a, kei chuan," An bula ka sawi chhuah chhan kha chu ka chhuan vàng zâwk che a nia; mahse, hna ka siamsak ta țeuh si che a, nuam lo chu ka ti ve reng," inthiam lo ru deuh tak chuan ka ti leh a, ani erawh chuan," Ka nupui duh tak hian engah nge nuam lo a lo tih mai mai ni? I awm loh hlàna hna thawh tùr ka lo nei tùr chu a zia daih zâwk alawm," a lo ti leh a, ka sam chu a khawih pah niap niap a.

"I siam lai hmuh che ka châk a, ka rawn haw hi chuan i lo indah fel vek zêl tawh țhìn a," ka ti leh a, ani chuan," I awm loh laia siam atân chauh alawm ka tih, nang ber i awm tawhte chuan hun khawh ralna tùr zawn kha a ngai tawh lo va, ka bula i awm theih rih loh chânga hun khawh ral nâna ti chauh ka ni," a lo ti leh a, min chhàn dàn chu ka duh leh êm avàng chuan ka han fâwp leh rih bawk a.

Chutiang chuan ni tinin hun a lo hmang ral ve țhìn a, siam tùr an rawn dahho a siam țha ve zêl bawk si nen, thawhpuite pawhin mi dang an lo hrilh ve zêl a, siam man an pe lui zêl bawk a, kâr khat chhûng lek pawh chuan a hlawh chhuak ta nual mai. A lo hah lutuk ang tih erawh ka hlau țhìn a, ei tùr lamah duat zualin țan ka la a, ei tùr țha, tui leh hrisêl nia ka hriat chu ka lei hàwnsak ve ziah, ani lah chuan," Ka thau kûng kûng dâwn a nih hi," nui chung hian a ti țhìn a, kei chuan," A pawi lo, i dul erawh kiar vak lo se," ka lo ti ve ziah bawk a.

Serchhîpa awm tlawk tlawk lovin eng emaw chângin, kâr tàwpah kan haw ve a, kan haw dâwn hi chuan Mampuii'n in min lo tihfaisak țhìn a, a fanu tân leh an chhûngkaw tân ei tùr eng eng emaw hi kan hawnsak ve țhin bawk. Làwm thu sawi nân kan tih pawhin a pawisa lam hi chu a lâk duh ngai loh avàngin ei tùr eng eng emaw leh chawhmeh chi hrang hrangte hi 'Kan lo hawn kêp che u, lo ei ve rawh u' kan ti mai ţhìn.

Pathianni tlaiah kan nupain an inah zanriah ei tùrin min sâwm a, zîng lamah ka nute'n min sâwm tawh bawk a, kan luck viau a ni. A fate pawh an lian ve tawh a, an in chu naupang awm tih takah an ri laih laih reng mai. U Latei chuan," Keini chu kan heti laih laih reng mai a ni, min hriat thiam mai loh chuan," a ti a, ka chhàn hmain U Valpuia zâwk chuan," E, a ngaihnawm laih laih ka lo ti khawp a, keini pawhin hetiang boruak hi kan la tawng ve ngei tùrah ngai ila, ka nghâkhlel khawp mai, an bengchheng pawh ka ti phal lo," a lo ti vat a, U Vid-a chuan," Han țang mar deuh ula, pahnih pathumin an belh hunah che u zawng inremna thu in sawi ve reng tawh mai ang," nui chung hian a lo ti a. 

Chaw ei hma zawng tìtîin U Vid-a chuan U Valpuia nèn kan inneih hmaa kan boruak tawnte chu a sawi chhuak a," Țhianpa dawhtheihna leh luhlulna vàng liau liaua innei thei in ni ka ti lo thei lo, damdawi ina i awm laia a khawngaihthlâkzia mawlh kha, ka mitthlaah hian a la châm reng țhìn. Nang nikhaw hre lovin i let reng a, i bulah, nangmah hmu reng thei tùrin ani hi a awm tlat bawk a, kal sawn hlek pawh a duh lo. Pakhat nikhaw hre lo, pakhat lah awm hmun sawn tum lo; khami țuma ka țawngțai nasatzia kha chu aw..." a ti vang vang a. U Valpuia chuan," I țawngțai chhànna kan tân malsàwmna," a lo ti a. Mampuii chuan," Khami țum khân Nunui hi țawngthu chhe lovah lo boral ta se chuan U Valpui, i awm dàn tùr ka lo suangtuah nasa țhìn asin, ka'n sawi chhuak mai mai ang a... Nunui dam nân Pathian hnêna ka dìl rualin i tân, i hming lam meuhin ka țawngțaisak ţhìn bawk che a ni. Dik taka sawi chuan Nunui kha chu a dam chhuah leh kha ka ring tawh lo a ni ber ang chu, ani a kal chuan a dam zâwk nangmah kha i ngaihtuahawm ber dâwn si a ka ti a," a lo ti ve leh a.

"Um, kei pawh Pathian ka auh nasat ber țum chu a ni chiang alawm, rilru fîm put hrâm hrâm kha ka tum a; mahse, eng emaw châng kha chuan ka rilru hrehawm lutuk kha ka ã lek lek niin ka inhria! Ka rilru a fìm lai khân ka țawngțai reng a, inthiarna hmuna ka țawngțai phei kha chu ka lo bei ring deuh nge ni, ka chhuah khân pâwn lama awm pakhat khân mak min tih hmèl khawp mai a, min en dàn kha mi pângngai enin min en lo tih ka hre thei; a àwm ve tho, kei ngei pawhin ã lo chauh niin ka inhre ve tho a," U Valpuia chuan a ti a, ka kut dinglam chu a kut pahnih chuan a khàl pah nauh nauh reng a.

Kei pawh chuan," In țawngțainate, ka chhûngte leh țhian dangte leh kan khuaa kohhranhote țawngțaina Pathianin a chhâng a, dam takin ka chhuah theih phah a ni ka ti lo thei lo. Beidawnna thinlung nèn kan duh dîl țhin mah ila Ani chuan kan duhna thinlung a hre sa vek a, fel takin rem min ruatsak țhìn a lo ni, chu chu ka hre chiang tawh khawp mai," ka lo ti ve duah a, chutih lai chuan Nu Zotei dàwr kal haw a rawn lût chiah a," Ka rin loh deuhin ka va rei ta zêk a! In ril a lo țâm tawh ngawt ang chu, zànah inkhâwm a ngai leh dâwn si a, kan siam nghâl mai dâwn em ni ang?" a rawn ti nghâl barh barh a.

An sawi hi a dik. U Valpuia luhlulzia kha, khata țang khân ka hre chiang zual. Ka nat chhûng, damdawi ina ka awm chhûng khân min hawsan lo rêng rêng a, ka nat zual deuh lai phei kha chuan a muhìl ngai lo a ni ang, tûn hnua ka pa sawi dànin; ani erawh chuan pakhat tê mahin a sawi chhuak ngai lo thung. Eng min tihsak theih nei lo mah se ka bulah a awm tlat a, ka nuin kha kha a duh lo viau tih pawh mi ã ni lo ta chuan a hre chiang viau ang; mahse, min kalsan chuang lo. Khatih hun laia a rilru hrehawm tùrzia kha, mihring zahna nei leh chhia leh țha hria a ni a, a zak ve tho ang a, a rilru pawh a hrehawm ve êm êm bawk ang. Ka chhuah hnuah pawh ni se kan in lamah min rawn kan a țhulh lo va, ka ei theih tùr thil a rawn keng a, ka pa lo awm loh châng leh room lama ka lo awm chângte a awm lo thei lo va, chutih hun chuan ka nuin a lo be țha duh lo ngei a, lo be lo mah se ngawi rengin a lo ţhu ve mai a, ka nu hlim lo hmêl chuan a lo lèn tùr a țhulhtîr ngai chuang lo. A dam țha a, chhùn lamah hna a thawk nasa a, damdawi in lamah a mu țha lo bawk nèn, a chêr kuam nghe nghe. Kei pawhin ka nute min leisak ei tùr țha leh damdawi țha, Vitamin lamte chu ka pe ve bawk a, ani erawh chuan," A ngai lo, kei aiin i mamawh zâwk, kei chu ka dam țha alawm," a ti tlat thung a, ka khawngaih takzet țhin. Serchhipa ka phei hnuah pawh kâr tàwpah min rawn kan deuh ziah a, zàn erawh a riak ngai lo thung, hmingchhiat theihna tùr lakah min vêng ka ti mai a, mi min rinhlelh leh sawi theih tùr lakah a invêng tlat. Kan inhmangaih a, kan induh tawn a ni tih ka pain a hre chiang a, ka nu a lo sawipui țhìn bawk, chu chuan a rilru zàwi záwiin a lo hneh ve ta a ni chêk ang chu, bâkah, U Valpuia lah hian zu a nghei tâk ațang khân a nunphung a thlâk danglam ve bawk a, hre chiang miau hek, palai a rawn tirh leh pawhin rem lohna lam țawngkam a cheh tawh lo va, tûn hun hi kan thleng thei ta a ni. 

Hmangaih leh duat hi a phû ngawih ngawih ka ti a, ka theihtâwp chuan duat ve ka tum; mahse, amah zâwk hian min duat lutuk a, a laka han pangchan deuhte hi nuam ka ti tlat țhìn a, hrehawm tam tak lo pal tlang tawh a ni a, hmangaih leh duat a phu a ni tih erawh ka inhrilh leh mawlh mawlh țhìn bawk. Ka nu leh pate hi chu ka sawi thei lo; mahse, an fanu pasal, an mâkpa a ni a, an en hrang lo ang tih chu hre tho mah ila U Valpuia zâwk hi an laka a inthlahrun dûk ka hlau, ka nu rilru dang viau tawh mah se nuam lo tih rûkna a la nei ang tih ka hlauhpui a, a la nei ngei pawhin ka ring bawk, chu vàng tak chuan inpawh taka an awm ka duh rual rualin kan in hlui lamah erawh ka lèn pheipui reng chuang lo. Hun han kal se, ka nu hian ka hmangaih ang tho hian a mâkpa hi min hmangaihpui ngei ang tih ka ring a, chutih rual chuan U Valpuia pawh hian a nupui min lo chawi liana min hmangaihtu ka nu hi a hmangaih lêt ve tho ang tih ka ring tlat, ka hmangaihte ve ve an ni a, 'inkâr' nei lo se tih hi ka duh a ni. An nei ka ti pawh a ni chuang lo va; mahse, ka nu khân a duh lo ţhìn êm mai a, a lo awm ang tih ka hlau a ni.

"Eng nge i ngaihtuah?"

Ka biang tawn tawna a rawn dawm chuan ka ngaihtuahna ațangin ka harh chhuak nghâl a, khap hauh lo leh ngun zet hian min lo en reng tawh nghe nghe!! Nuih sakin," Thil kal tawh ka lo ngaihtuah kual a, min lo hmangaihziate leh ka tâna i awm reng țhinziate...ka hmangaih che, U Valpui, hmangaih hi i phû hluah hluah a ni," zãng vah hian ka lo ti vat a, a mitah tak chuan en lêt vein a bânah ka dawmsak zui bawk a.

A nui ve ta suk a," Min hrilh zin poh leh ka hre nawn châk zêl tho nia," a ti sup a," Kei pawhin ka hmangaih che, i hre vek tho a, țawngkaa ka sawi chhuah kher loh pawhin ka chêtzia leh thil tihin ka lantîr țhìn a tiraw?" ti lehin a rawn kûn hniam a, a hmuia ka hmui rawn tawk zauhin," Han inphih faiin innâwt fai ila, kan mu leh tawh mai a ni ang chu? Țan lâk kan ngai nasa bawk si a," a ti zui sup a.

*******

Hun a kal zêl a, kan inneih ațanga kum khat leh a chanve hnuah fapa duhawm tak kan nei ve ta a, a pa a chhùn nasa mai si a, hmuhnawm ka ti, ka thlîr ning thei lo, ka hmangaih ngawih ngawih a ni mai. Ka duat viau emaw ka tih laiin kei aiin a pain a duat zâwk zui a, zànah pawh a zun êk puan ka thlâk ve hman lo, hnute pêk hi ka hna chu a ni deuh mai. 'Pawm ngai lova a mut theih chuan a țha, taksa lum a hriat viau chuan a buaithlâk ang' tih te chu khawi lamah!! "Kan fapa a ni alawm le, ka pawm ang chu, ani bâk pawm tùr kan la nei hlei nem, a duhawmin a hmêlte pawh a țhat êm hi, duat taka pawm reng hi a phû ngawih ngawih, a buchip chhûng pawm a ngaih tâk leh ka pawm char char mai ang," a ti bur mai a, a pi leh pute ni se an rawn lawr zut reng bawk a, an inen chhâwk a, a muhìl nghet țhìn pawhin ka ring lo hial a ni. Kan țhiante pawh an rawn lêng reng reng a, min lawmpui takzet a ni. Kan vànnei ve ngawt mai, kan fapa min hmangaihpui vek hlawm si a, thla hi an timuang hliah hliah mai a ni.

Fa ka pai țantirh khân Lunglei lamah min sawn a, tihzia ka ti tak tak a ni. Tĕțanite vêngah inhlat lo têin in kan luah ve a, kan khua kan hnaih tawh a, hnaa kal loh kârin duh hun hunah kan haw thei bawk a, kâr laklawhah pawh ni se, U Valpuia tân pawh haw a buaithlâk loh. Kan in a ngaihtuah deuh ţhin avàngin a haw fo rêng a, tlai lama hna ațanga ka bàn erawh chuan inah a lo awm hman ziah tawh thung țhìn.

U Valpuia farnute erawh an rawn lawr ta miah lo va, kan inneih nî bâk kha hmuh pawh ka hmu leh tawh lo, an number hi chu U Valpuia hian a nei ngei tih chu ka hria a; mahse, an inbe ngai lo, ka hriat chinah chuan. A puteate nèn erawh kan inbe pawp reng a, Bawihtea en pawhin an rawn kal ve vang vang nghe nghe, an fel lutuk tlat.

Lungleia kan awm hnuah Mala pawhin min rawn tlawh a, kan fapa chu a rawn en ve a, walker țha deuh mai a rawn keng nghe nghe. Kan inneih hnu lawka Serchhipa kan awm lai khân Inrinniah min rawn tlawh a, kan inneih nî khân a rawn lang thei ta si lo va, a rawn theih loh tùr thu kha phone-ah min rawn hrilh tho a, amah ngei a rawn lan leh tâkah khân thuphâ chawi nawn lehin inneih thilpêk min rawn pe ve leh ngat kha a nia, tunah phei chuan a hnên ațang ngeiin thu làwmawm kan hre pah thei ta bawk e.

Thlaleh lawka nupui a neih tùr thu a sawi chuan ka nui var var a," A va làwmawm ve!!! Ka lawmpui lutuk che, i buai thei si a, a hun ve tawh viau rêng a ni, i nupui tùr chu a fel dâwn tih lah a hriat sa reng a," ka lo ti vat a, ani chuan," Fel a ni ang chu, kei meuh pasal atân min duh ve a nih chuan," nui chung hian a lo ti ve a, U Valpuia pawh ka bulah kan fapa  Abraham-a pawmin min si chêtin a lo țhu ngawi ve reng a, ani hi zawng Mala bulah hi chuan a țawng tam ngai lo ve hrim hrim a ni.

"In lo kal ngei ka phût tlat che u a ni, kei kha chu tihngaihna awm ngang loh vàng kha a nia, kan dam ngei ang a, in chhûngkuain in rawn lang ngei tùr a ni. Valpui, in rawn lang thei ang chu tiraw?" Mala chuan a han ti a, U Valpuia chu ka en vat a, ani pawh chuan min rawn en vein," Pathian zâra kan dam phawt chuan le," a lo ti ve sup a, ka nuih sak nghe nghe.

Kan va kal ta ngei a, a nupui Ruth-i pawh a takah a chhe lo reuh zual, a la naupang ve deuh na a, a felin a zaidam ngawt ang. A nù zêm reuh a, a sual lo tawp ang. U Valpuia ve ngialin pawhin," A tisualin ka ring lo," a ti ve sup a, a hmêl, mit meng leh hawiher, țawngkam ațang leh mite'n a chanchin an sawi dàn ațangin kan teh ve pawh a ni ang a; mahse, miin 'Fel' tia an fak na nâ nâ hi chu an fel tlângpui, hun han ral se, a hriat zual ang chu; a, sual lul suh se.

Abraham-a kum khat tlin champha chu kan theih tâwka ropuiin kan làwm ve a, Tĕțanite chhûng pawh an lo kal, U Puiite erawh an hla deuh a, an rawn tel thei lo. A pi leh puin," Vawk kan vulh alawm, a pianchama talh tùr liau liaua kan vulh a nia," an ti bawk si a, ruai kan țheh ta hial a ni. Hetiang êm êm hi chu ka ngaihtuah thleng pha lo va, a pa lah chuan," A pi leh puin an phal phawtte chuan," a ti awlsam êt mai a, miin 'over' min ti ang tihte pawh ka hlau zâwk hial a ni. A pi leh pute hian an duat lutuk a, ani pawh hian duattu zawng a lo hre ve nasa, anduat khawlo zo ang tih pawh a hlauhawm zâwk a ni. Lungleia kan awm pawhin an rawn kal reng reng a, zànte an riah phah hial a, ka nu leh U Valpuia pawh 'inkâr' an nei àwm pawhin ka hre lo, a fapa duata thlahlel êm êmtu chu U Valpuia pawh hian a nèl loha a ngainat loh theih ka ring ta bîk lo hial mai.

Kan inneih hma khân Zmi'n Tlabung lamah pasal min neihsan a, nikum khân Ruatpuii leh Feli'n an nei leh bawk a, Mampuii pawh hian a nei ve țêp tawh. A vànnei dâwn reuh tawp a, kan khuaa Health Worker rawn thawk thar( thar han ti ila kum hnih chu a tling ve dâwn ta) nèn an inzui ve a, Mampuii hi chuan a duh ngam lo zâwk a, a chhan pawh phû lo a intih lutuk vàng leh a duh tak tak a rin zawh loh vàng zâwk a ni; mahse, a mipa zâwk Bsa hian a birh tlut tlut mai a, Lunglei ațanga lânga rawn kal phâk lek a ni chung hian a haw ngai mang lo, thla têl têlin a châm mai a, Mampuii tân pawh hnial reng a harsa a, a nu leh pa leh ute nèn hlim takin awm tlâng dial dial mah se nuthlawi fa chàwm lai nei a ni a, a rûk chuan a inthlahrung ve lo thei lo va, an inhmangaiha an innei duh a nih phawt chuan kei chuan ka duhpui êm êm a ni.

Dama hrisèl țhat hi chuan kan ti nek nek a, kum khat hi a rei lo. Kum a thar a, Mampuii pawh chuan pasal chu a nei ve ta rêng a, ka dinpui a duh miau avàngin nau thla thum mi pai chungin ka dinpui a, U Valpuia lah chuan," Pheikhawk sâng deuh chu bun suh aw, i inbilh palh ang, i tlûk hlauh chuan," a lo ti ve chhên a, Mampuii'n bun sàn ve deuh a tum deuh a nia; mahse, keiin ka bun sàn dâwn loh avàng chuan sâng lo tê a bun ve ta ringawt a.

Tlai lamah chaw kan ei khâwm a, zàn lamah rei mawi ve tâwk tak kan awmpui hnuah kan haw ve leh a, ka chau nghulh mai. Nilêngin nuih luih a ngai a, chàu chung chung pawhin hlim nî chuan chàu lo hmêl put a ngai bawk si, mipui ni hulh hulh boruak hi ka zo thlâwt țhìn lo a ni e.

"I chàu ngawt ang, han inti fai thuai la, i mu thuai dâwn nia," Abraham-a a muttîr zo, ka dàra rawn dâwm pah hian a ti a, ka lo muthlu lek lek chu a ni. Ni e, ka chàu a ni, inphih fai pawh chu a peihawm loh takzet.

Ka inphih fai zo chu ka harh kâwk mai, inbualna ațanga ka chhuak chu khumah min lo nghâk reng tawh a, Abraham-a ka en fel leh tê tê phawt a, khumah chuan ka lâwn ve chauh a. Ka mut theih nân rizai a lo kêu kau sa a, min rawn kuah dâwn erawh chuan," Ka țawngțai ve phawt ang chu, i țawngțai tawh bîk em ni?" ka lo ti a, a lo la ti bîk lo a ni ang chu, kan han țawngțai leh rih a.

"Vawiin kha chuan Mampuii ai pawh khân ka mit i la zâwk a," kan mut hnu chuan a ti sar sar a, ka nui hak a," Min tlawn kher a ngai lo aw," ka han ti zui a, ani erawh chuan," Ka ti tak tak! Khatianga i inchei leh meuh kha chuan nula dik tak i la ang ka ti, ka en ning thei lo che a," a lo ti leh a, a tih dàn ngai têin min kuahin min khan leh thlap tawh.

"Ka lãwm e, Abraham-a pa."

"'Abraham-a nu' ka ti ve dâwn lo che, nang hi chu ka Nunui liau liau kha i ni tlat a," tiin a rawn kûn hniam zui a," I chàu viau ang tih chu hre tho mah ila, muttîr tawp che chu ka tum miah lo, vawiin pawh khân ka rilruah ka ngaihtuah reng a," a ti leh a, a thil duhah hi chuan sawi hreh a nei lo va, zahah pawh a la hek lo, tlang takin a sawi chhuak mai țhìn. A nupui ka nia, ka pasal a ni bawk a, sawi hreh tùr lah a awm hek lo, nupa niin pum khat kan ni tawh miau a.

Hmangaihna kan chen zawh hnua kan mut țhat hnu chuan a bân min lukhamtîr a, duat taka min kuahin," Țha tê têa nau i pai tluana i neih hnuah pawh indang miah suh aw, nang nèna kan rîla rah na nâ nâ hi chu eng anga chhang zing leh tam pawh ni se ka enkawl huphurh lo a nia, a tlêm berah panga ka tih tawh kha," a ti sar sar a, ka nuih a zâ a, ka nui sak rêng a; mahse, ka țawng peih tawh lo, ka chau, ka mut a chhuak tawh lutuk.

"Aw le, i chàu zual ang tih ka hria, muhìl tawh rawh le, naktûk zîng chu rei deuh i mu dâwn nia, mut tui le, ka nupui duh tak," tiin ka chalah a fâwp pah zoh a, ka hre deuh riai ruai, "Mut tui," ka ti chhuak ve sap chuan ka hria, mumang ram nèn a inchhunzawm nghâl avàngin a chiang lo, ka vài zo vek tawh.

*HAHDAM TAKA NUN HMAN I DUH CHUAN I NIHNA ANG KHA INPAWM NGAM LA, MI DANGTE PAWH AN NIHNA ANG ANGIN ZAH THIAM RAWH*

~~~~~~~THE END~~~~~~~

Kum thar chibai vek u, he kum hi in tân kum țha, a țha lama kum chhinchhiah tlâk lo ni mawlh rawh se... tiin ka duhsak vek che u. Love you all, muahhhh...