☆KA TÂNA RUAT☆ - 2 By Dingdi Pachuau

☆KA TÂNA RUAT☆ - 2 By Dingdi Pachuau

A tûk tlaia Pi Mawiteite in ka va thlen lai chuan an nufa thum bâkah tlangvâl pakhat hi a lo awm ve a, an chhûng hnai a ni ngei ang, Naom-ite unau chuan an nêl êm mai. Nu ber chuan min lo làwm vat a, Naom-i pek chuan," Au Ruatpui, minute nga lawk aw, U Freddy-a hi a lo kal khât sia, a bula awm rih lawk ka duh," a lo ti a, ka kut chu rawn vuanin," Chu aia rei chu ka ngèn lo ang che, rei lo tê chauh a nih chu, aw...??" tiin min ngèn tak lawm lawm a, a rilru tih hrehawm ka hlau si, nuih pahin ka lu ka bu ta zauh ringawt. Ani lah chu a la hlim êm êm zui a, hlim taka tlãn kualin," Yesss... U Freddy, minute nga chiah kan nei, badminton chu aw," tiin a au lauh lauh a, phûr zetin a room lam panin a tlãn zui ta nghâl bawk, kei pawh lehkha ka zirtîrna hmun, an lehkha zirna pindan lam panin ka chho zui ta nghâl a.

Minute nga hnuah thaw sa phungin a u nèn chuan an rawn lût a, lum an ti viau a nih hmèl, ceiling fan chu Joel-a chuan a on zui nghâl zat a, zir hmain rei lo tê ka chawlh hahdamtîr leh rih bawk. Vawiin chu bung thar kan kai lo va, ka en nawnpui mai mai a, thiam pawh an thiam tawh viau mai.

Chawlh laiin," Au Ruatpui, exer i la ve ngai em?" tiin min zâwt a," Lâk ka ngai ve hlei nem, ka fit sa reng a," ka lo tih chuan a nuih a za a ni ngei ang chu, a nui pût pût a," Ka âwih lo deuh e; mahse, i tê reuh tho a, ka ring ve deuh tho bawk si; keini chu Âpa lo haw veleh exer kan la țhìn a, badminton kan khelh loh chuan kan tlãn țhìn, km 3-te kan tlãn țhìn maw le!! Arlo hian tlàn nuam a ti țhìn a, khua a țhat loh deuh pawhin Âpain a tlànpui tho țhìn," a ti leh barh barh a. Arlo a tih hi an ui dum a ni a, ka hmu ve tawh, an ina mi lo kalin an hlauh palh an rin avàngin in chung veranda lamah an awmtîr țhìn a ni.

"A nih chu, Fùr, ruah sùr bur bur laiin a hrehawm țhìn dâwn a ni maw?" ka ti ve a," A, kan ti țhang ve tawh a; mahse, ni tinin kan tlãn ngai chuang lo. I tlãn ve duh em? In in awmna min hrilh la, kan rawn sâwm ve țhìn ang che," te chu a la ti tak deuh deuh a, ka nuih a za ngei mai. Joel-a erawh chuan," Naom, i duh duh hi sawi phawng phawng zêl suh ka tih țhin kha, insûm ve țhìn rawh," a lo ti bung vut a, ani pawh hi chawlh hun chhûng, minute nga chhûng lek hi chuan a kal sawn ngai bîk lo, a țhu ve kur zêl.

"Au Ruatpuii hi hei aia lian tùr hian ka duh alawm, nakinah chuan ka țhan khalh daih dâwn asin; mahse, exer a lâk țhat chuan a țhang sawt sawt dâwn a!" ani lah chuan a lo la ti, min duhsak vànga sawi mah ni se ka nuih a zat êm avàng chuan ka nui ta kar kar a, ka nui lo thei lo a ni, tê chu min lo ti ve àwm hlê mai.

"Naom..!!" ti hrãwkin Joel-a chuan a lu-ah a va kuksak fawk a, ani chuan," A naaa..!!! I va sual tak! Âpa hnênah ka sawi vek dâwn," a lu tuai nauh nauh pah chuan a ti nang nang a, a tûm vuau zui nghâl bawk. A fuh lo chho dâwna hriain Joel-a chu ka han en a," Aw le, aw le, duh tâwk ang u. Joel, i nau chuan a duh duh sawi rawh se, engtin pawhin min sawi mah se ka haw lo, lian tùra min duhsaknaah khân ka lãwm hlê zâwk a ni," ka han ti a, Naom-i lam en lehin," Naktûkah kan chawlh laiin paper hmanga thil siam dàn dang ka zirtîr ang che, kan têt lai khân kan siam țhìn a," ka han ti sauh sauh a, min rawn en vatin," A ni maw?!! Ka va châk tawh tak!" tiin, hlim hmêl puin a phûr zui leh nghâl thei mai a; mahse, rawn thle hnaiin," À-u chu zirtîr ve miah suh aw, a sual si, min kuk ve ziah," a rawn ti zui leh sar sar a, awmze nei tak hian min melh ralh bawk a, nuih hi a tiza thei a nia.

Vawiin chu thingpui kan in lo teh tlat mai, Pi Mawitei kha a buai viau a ni ngei ang, in ațanga ka chhuah pawh chuan Naom-i'n min thlah ve ngei a," Naktûka paper hman tùr chu naktûk school kal pahin ka lo lei ang aw, mawi deuh deuh hlîr ka lo lei ang, Âpa leina tùr ka dîl ang a," a ti siam siam a, a phûr tawh viau a ni tih a hriat. Kei pawh chuan ka lu ka lo bu nghat a, gate ka chhuah hma deuh chuan Pi Mawitei ka tâwk a, chhang a va lei a ni chiang, polythene-in a khâi tlat.

"I haw tawh dâwn elo? E khai! Hun a lo kal duai tawh a nih hi. Chhang ka va lei a, lei sa kan lo nei tawh lo niin. Hawh, a la hma tho alawm, thingpui in leh rih rawh," a ti nghâl zung zung a, a nui pah sâng bawk; mahse," A ngai teuh lo mai! Ka lãwm lutuk e," tiin ka nuih ve sak a," Ka haw zâwk ang e, sawtah sâwn ka țhiante'n min nghâk a," ka ti leh a, ani pawh chuan," A nih tak chu a. A nih chuan, naktûk tlai lamah tui tâwkin i in țeuh mai dâwn nia, chaw ei tui le," a ti zui zat a, kei pawh chuan," Chaw ei tui ule," tiin, kan inkalsan zui ta nghâl a.

Chhana nèn chuan kan inphur haw leh ta a; mahse," Ka ril a țâm, ei nân hun ka nei thei ngang lo va, chàwl lawk ang aw?" a tih chuan hnial ka hreh a, ka ril erawh a țâm êm êm lo; mahse," Aw le, Boss berin i tih tlat chuan ka hnial thei nâng!" tiin ka lo chhâng a, a nui leh hawk mai.

"I va sweet thei tak!! Nangmah zâwk hi ka ei zâwk dâwn che em maw ni le!!" ti paha sîr lam a rawn hawi chuan," Uang suh, i bike khalh kha ngaihtuah mai mai rawh," tiin a kokiah chuan ka sehsak vâwt a, a kâwngah ka kuah nghet sauh bawk. Ani lah chuan," Che sexy sâwt ve!!" tiin min fiam zui leh zat a, a nui zui hawk hawk bawk, tihngaihna hre hek lo i, a malah ka chumsak leh vak ringawt. 

Rilțâm lêm lo mah ila ei tùr tuihnai tak hmaa a han inchhawp leh tâkah chuan ka ril a țâm chawpchilh leh thei mai a, Chhana chuan," Ei țeuh ang aw, an siam tui nasa a nia," tiin a han ei țan nghâl a, a tui dâwn tih ka hria, a rim pawh a tui vawng vawng tawp.

A sawi chu a dik chiah. A tui viau a ni, ka puar ngei mai. Ka dul chu ka zût ka zût mai a, zanriah ka ei peih kher pawh ka ring lo hial. Ani lah chuan," Kan lam belh leh dâwn em ni ang?" a la rawn ti zui a, lu lo thing vatin," Kei chu ka puar over, ka duh tawh lo, i puar loh chuan lam belh tho rawh," ka lo ti vat a, mipa a ni a, kei nèn chuan ei lamah zawng kan inthlau lo thei lo a ni.

Mahse, a lam belh ta lo. Ka duh ve tawh si lo va, ei man chu a pêk leh tlat avàngin a zûk tùr Cigarette ka leisak lui ve a, a nui var var mai. Zêp lohah chuan zial hi a duh ve hleuh hleuh êm mai a, a hrisêl lo tih hre tho mah ila a bialnu ka nih vàng ngawtin sawisèlsak ka tum hran chuang lo, a duh hunah nghei mai rawh se, U Mama pawh nghei tùrin kan ti kher lo va, hun a tihah a nghei ve mai.

"Zanin chu ka lo lêng hman dâwn lo aw, Basketball tournament lo awm tùr chungchângah inhmuh khâwm a ngai dâwn a," Bike-a kan chuan leh hnu chuan a ti a," Umm... ka khua a lo har deuh dâwn tihna a nih chu," nui chung hian ka ti a, ani chuan," I khua a har viau chuan ka thlalâk i lo en mai dâwn nia," a lo ti ve a, kan nui dùn a.

A thîkthu chhiat ang ai hian nula lamah hian a lêrh hran lo va, kei pawhin han thîk êm êm ka nei ngai lo; nikuma an vêng Miss (an vêng YMA-in kum tinin Mister leh Miss an thlang țhìn) Essy ka thîk deuh kha a ni deuh mai; mahse, ani pawh kha a star hran pawh a ni lo, Essy zâwk khân a ngaizâwng ém zâwk a. Ka thîk phâk a ni lo tih hre reng chung khân ka bialpa a nihna laiah ka thîkthu ka pe chhe ve ngam a, ani lah khân," Ka duh ve lo," a ti tlat bawk si, a dik ngei tih a hnuah ka hre chiang a, ka ngaih pawh a țha ta chauh a ni. Ka phû loh êm êm mah ni se min duh ve tlat avàng hian a lakah ka pangchang ve ngamin thîkthu pawh ka pe chhe ve ngam țhìn a, chu chu ani làwmah lah hian a lo tla ve tumhrang bawk; mahse, phû loh chungchâng leh dinhmun inthlau chungchâng hi chu a bula sawi chhuah erawh a phal lo bur thung; mahse, ka phù lohzia leh kan chhûngkaw khawsak dinhmun inan lohzia leh inthlauh sizia erawh ka ngaihtuah chhuak fo a, a tân ka insit ru leh țhìn lo thei lo.

Kan school pâwl ruk mipa naupang zîngah buaithlâk deuh deuh pahnih hi an awm ve a, Sawmsaka zâwk hi a thiam loh chu thuhran, zirlai hi a ngaihtuah hlawl lo a ni ber, a la harh êm êm zui a! Peka ve thung hi chu zàwiàwi deuh niin, biak loh chuan țawng pawh a țawng ngai meuh lo, fiamthu sawi zauh chânga mi dang an nuih dar dar pawh hian a nui ve ngai lo tih theih a ni. 

Vawiinah pawh homework an rawn ti lo ve ve a, mi dang chuan an rawn ti dik vek. An pahnih chuan dintîrin homework an tih loh chhan chu ka zâwt a, Sawmsaka chuan," Miss, ka ti ve reng, ka tihna lehkhabu ber ka rawn keng lo a ni, ka hriat chhuah khân la tùra haw leh ka tum deuh a; mahse, a tlai tawh sia, dár a ri dâwn tawh bawk sia," a ti zat zat a, ka en deuh reng phawt. Chutah, Peka chu ka han zâwt leh a, ani erawh chu a ngawi deuh reng phawt a, en pawh min en lo, a kûn deuh tlat bawk.

A hnu deuhah chuan," Miss, ka ti lo, min hrem mai rawh," a ti ta sap a, min chhàn dàn avàng chuan ka hamhaih a, țawng mai nachâng pawh ka hre lo; mahse, a rei vak lo hlauh thung a, a hnênah chuan," Hrem che ka tum hlei nem," ka ti phawt a, mi dang chu en kualin," Kan thil zir in hriat thiam leh thiam loh test-na a ni a, in lo tih ve chhin hrim hrim kha ka duh chu a ni, tidik vek tùrin ka beisei lo che u, in lo tih ve hrim hrim kha ka duh chu a ni," ka tih zawm leh a, Sawmsaka leh Peka chu," Homework ngai kha in lamah in lo ti leh ang a, naktûkah in rawn submit dâwn nia aw," tiin ka țhuttîr a, an țhut fel hnuah," In lama vawiina kan thil zirte in lo en zuia in lo chawh ve khân in rilruah a nghet bîk dâwn a, in lo chawh zui si loh chuan kan chawh dàn kalphung kha in theihnghilh mai ang a, next class-ah a bul tê ațanga kan inhrilh țhat leh a ngai dâwn a maw, chutiang chu in duh hauh lo ang ti r'u?" ka han ti leh a, an lo 'Yes, Miss' dial a.

Chawlh laia Office-a kan titi chuan vawiina ka class chungchâng chu ka sawi chhuak a, Miss Rudy chuan lo tuihnih vatin," Peka hi, ni e, a mak ka ti ru deuh țhìn, a châng hi chuan mut hi a kham loh hmèl thei ka tia, a mit hi a rawn lang bui leh tlat țhìn, in lo chîk ve țhin em maw, a nungchang hrim hrim pawh hi a khawngaihthlâk, natna eng emaw tak a vei a nih te ka ring hial asin," a lo ti ve a, Sir Puia ve thung chuan," Ka class-ah hi chuan zawhna ka zawh ve chângte hian a chhâng țha viau țhìn ka lo ti asin, amah hi a țawngmawh ve hrim a," a lo ti a," A, zawhna zawh châng chuan min chhâng tho e, vawiina min chhàn dàn kha chu mak ka ti êm a ni, a lo ti lo a nih pawhin chhuanlam a siam ve mai kha ka ring a ni ber ang chu," ka ti ve thung a. Miss Rudy chuan," Han chhuanlam mai tùr a hre lo te pawh a ni mahna le!" a lo ti a, Sir Mka chuan," Hrem a duhte chuan hrem mai tùr a nia, kei ni ve ta ila chuan ka hrem chiang viau ang," nui kur kur chung hian a lo ti ve bawk a, kan ho zo leh ta vek mai.

Naupang hrem hi chu ka duh miah lo, ka hrem ngai lo bawk, an rilru hneh phawt ka duh záwk țhìn. Hrem ringawta an rilru hneh chuan si loh chuan awmzia a awm lo ka ti, an rilru kan ti hel a, class nuam an tih loh phah dâwn bâkah school mai ni lo, in lama an zirna thlengin a tuar thei a, chu chu ka duh lo a ni. 

Chhana a hman loh avàngin tuition pe tùr chuan kein ka kal a, tihian exer ka la ve a ni mai. Naom-i thil sawi ngaihtuah chhuakin ka nui sak a, miin 'tê' min tih hian ka haw ngai lo, thu dik an sawi miau a, len miau loh chuan 'tê' nih ka hlawh lo thei lo a ni; mahse, hmusit rawngkaia min fiam nân an hman erawh hi chuan nuam ka ti ngai lo thung, ka pian dànah hian thu ka nei lo êm mai a, ka thu hi chu ni se zawng, ka nalh ve zeih zawih viau ang chu!

Vawiin chu Naom-i a helhhawlh tlat a, tih tùr ka pêk pawh a ti zung zung a, a ti dik vek zêl mai." Au Ruatpui, ka thiam sia, chàwl tawh mai ila?" a ti deuh reng mai a, Joel-a chuan," A hunah i chàwl mai ang," a lo ti sup a, Naom-i erawh chuan," Chawk ve thuai thuai mai teh, Satel ang mai, țuan muang leh lutuk!" tiin a lo tur thung a, nuih hi a tiza thei a nia.

Kan chawlh veleh a room lamah a tlãn vat a, colour paper leh Bakcheh kengin a rawn lût leh thuai a," Âpa pawisa ka dîl a, hemi leina tùr hi," tiin a thil ken chu min pe a," Le, siam tawh rawh le," a ti zui zat a.

Kan naupan laia țhiante nèna kan siam țhin Uțawk, sava, Ball, Lawng leh Fawng chu ka han siam hlawm a, Lawng siam chu a lo thiam ve tawh a, a dang chu a lo la hre ngai lo. Paper ka thleh dàn chu ka entîr zêl a, Uțawk a siam zo chu nuam a ti nasa, phûr zet hian," Âpa lo haw veleh ka hmuh ang, siam dàn ka zirtîr ve bawk ang a, thiam chu min ti ve ngawt ang le!" a ti siam siam a, inti thiam tak hian a lu chu a thle nghel nghel a, hlim tih hriat tak hian a nui sâng bawk si, zirtîrtu mah ni ila naupang ngaina tak ka ni lêm lo va; mahse, Naom-i hi chu ngainat loh a har ka ti ve deuh tlat tawh. 

Pi Mawitei'n thingpui leh a hmeh a rawn châwi lût a, a chhe lo lehpek hlê a ni. Naom-i chuan a thil siam thar chu lo hmuh vatin," A mawi i ti em? Ka siam liau liau a nih hi, Au Ruatpuii'n siam dàn min hrilh a," a lo ti siam siam a, dawhkàna tray dah pah chuan ani chuan," A ni maw? I va thiam ve! Min la zirtîr ve la? À-u hian a thiam ve em?" a lo ti ve vat a, Naom-i chuan," Ani chuan a thiam ve lo, ka thu a âwih chuan ka la zirtîr ve maithei," ner deuh chunga a u en pah hian a ti a, Joel-a ka en a, hmui pet fun chung hian a nau chu rum deuh hian a lo melh a.

"Ho êm mai! Ka thiam duh lo," a ti hmuk a, Pi Mawitei chuan Joel-a hnung va chùl pah hian," I nau a nih hi, khati'n u zâwkin an ti ngai lo," a ti ru sap a, Naom-i lam hawi lehin," Ka naute, i zirlai i thiam maw? Har i ti em?" a ti leh daih a, ani chuan uar zet hian," Ka thiam vek! Ka chawk dik vek bawk, kan exam leh hunah Mathematics-ah chuan mark ka hmu sâng ber tawh ang," a lo ti mai a, Uțawk lem a siam chu a lek valh valh bawk a.

Tukverh a inhawn avàngin pâwn lam thãwm a hriat theih a, motor thãwm ri ham ham a awm tâkah chuan," I pa a lo thleng a nih chu, ka kal ang e. Țha deuhin zir r'u aw, ka duatte u," tiin a ding mar a, ka lam rawn hawiin," Ruatpui, thingpui kha in rawh, a dài ang," a ti leh a, pindan ațang chuan a chhuak zui ta nghâl a, a hnung lam ațang pawhin a chhe lo, a hmêl leh a pianah hian sawisèl lai tùr ka hre lo a ni ber, a lo fel tel lehzêl bawk si, a pasal tân pawh nupui duhawm tàwp a ni ngeiin ka ring.

Minute nga aia rei hret kan chawlh avàng chuan dârkâr khat aia tam hret hun ka hmanpui leh a, tuna an thil zir hi chu an man dùn ve viau tawh a, anmahni pawhin nuam an tih avàngin ka tân pawh a nuam a, hetiang hi ni reng se ka ti viau a ni.

Ka haw tùr, in hnuaia ka chhuk chu Naom-i'n min zui thla ve nghâl a, ka kuta vuan chung chuan," Au Ruatpui, i lo kal leh hunah milem siam ka zirtîr ve tawh thung ang che aw, kan class-ah kan siam țhìn a, nuam ka ti, thil lem siam hi ni reng se ka ti țhìn," a ti sârh sârh a, nui chung hian ka en a," Thil lem siam chu nuam viau mah se subject hrang hrang kha kan zir a ngai ve miau sia tiraw? Zir hrâm hrâm a ngai a ni, zir nasat chuan a inzir tui theih teh a nia. Nakinah, i zir sàn chhoh zêl hunah nuam i tih ber subject kha a malin i la zir bing thei ang," ka ti duah a, a thil sawi ngaihtuah lét lehin," Milem siam min zirtîr tùr chu, ka phûr khawp mai. Ka thiam ve miah si lo va," ka ti leh a, a phûr ta ngang mai.

"Colour pawh ka nei țeuh alawm, awi, ka châk tawh lutuk! Vawiin hi ni tawh mai se, a nuam dâwn sia," a ti leh bawrh bawrh a, țawng duh hi ka inti ve viau țhìn a nia, ani zet hi zawng ka tluk lo deuh chu a ni, a țawng duh dàn lah hi ngeiawm lam a ni bawk si lo.

Kan chhuak tùr chu pa ber ni ngei tùr, rawn lût ve chiah nèn kan intâwk ta chiah a," Âpa, thil hmuhtîr tùr che ka nei, thiam min ti ngawt ang!" ti chhuak hliaiin min chelhna chu a thlah a," Au Ruatpui, bye aw, Âpa thil hmuhtîr tùr ka nei sia, ka la dâwn," tiin ka chhàn hma chuan a tlãn zui nghâl ta daih a.

"Nang hi maw Ruatpuii chu?"

"Aw..." ka ti ban chat a, sawi zui tùr a va vâng tak! Kalsan mai ka tum deuh kha a nia, ka din dàn posi lah chu a țhing ngawt ang chu! Hetiang boruak tak hi alawm hrehawm ka tih țhin chu, la inhre ngai lo inbiak chhoh kual vêl dàn tùr tak hi, ka fel lohna a lang leh țhìn. Kei aia upa ni lo se chu thuhran, a lang zahawm ru riau bawk si.

"Kan fate zirtîr chu harsa i ti em? A hrehawm em?" a aw thûm chhaka a rawn tih leh chuan," Harsa lo ve, a hrehawm lo, an thiamin an fel lutuk tlat," ka lo ti leh thuai a, inbiak chu nuam ka ti lo, ka hna thawhna pa ber a nih avàng chuan ka zah ve bawk nèn, kan intawh zawka ka en bâk kha a hmêl pawh chu ka en leh tawh lo, a nuam lo ve a. Veranda chhuat chu ka en kual vêl mai mai zâwk a ni.

"A țhat chu," a ti sup a, ka awm dàn ațang chuan nuam ka ti lêm lo tih a hria a ni maithei," Aw le, ka be rei lo ang che, kal tawh rawh, i țhianpa pawhin a nghah reng tawh che kha," a tih leh chuan mak ti deuh tak hian a hmêl chu ka en vat a; mahse, ka hawi sawn leh thuai. Nèlawm taka a nui ka hmuh avàng erawh chuan ka nui ve ringawt a, ka lu ka bu nghat a, ka kalsan zui ta nghâl bawk. "Chaw ei tui u," han tihmawihnai ve pawh kha a țha viau a nia, mãwl chu min ti ve ngawtin ka ring. Hriat chu ka hre ve reng tho a; mahse, ka ti lo mai a ni. Chhana'n min lo nghâk tih te kha min hrilh a, engtin nge maw a hriat ni? 

Zanriah ei laiin ka nu chuan tuition ka pêk chungchâng chu min zâwt chiang ve a, thil awm dàn ka sawi chuan," I vànnei khawp mai, mi fel tak i tawng a. Țha takin awm la, fîmkhur bawk la, hmingchhiatna leh inhmuh thiam lohna hi thil ho tê ațangin a lo awm thei tih hre reng ang che. An fel luatah awm loh lohte hian i va awm palh anga, hna thawka ruaitu che mit tikhamin i va awm palh hlauh ang e, naupangte zirtîr kha i hna pui ber a ni tih hria la aw," tiin min fuih sauh sauh a, a tih ve dàn a nia, ka lu ka lo bu nghat nghat ringawt. U Mama chuan," Nau zâwkin pawisa hlawh chhuah nân school kal zawha hna dang i han thawk țauh țauh hmuh hi chuan ka ke hi vuak pawp pawp ka châk țhìn, dam țha ver vawra duh tâwka hna thawh theih tawh ka châk êm mai," a lo ti ve thung a. Rang zet hian," E, i dam țêp tawh alawm, i dam chian var hunah i thawk leh țàwng țáwng dâwn nia. Awm mai mai emaw te kha i lo inti ang e, hei kuhva pawh i lo thel leh țeuh tawh hi," ka lo ti vat a, ka nu pawh chuan," Nâ neih hi chuan dawh theih leh nghah theihte hi a ngai ngai a nia, i indim thiam leh a dam hma ang an tih tawh kha, kârleh lamah chuan i zia viau tawhin ka ring," tiin a lo hnèm ve a. U Mama hian a awm dàn hi hrehawm a ti tih ka hria, ni e, tlangvâl țhalai nilêng lênga ina awm ringawt mai chu a hrehawm ngei ang, ani ang mi taima tak tân phei chuan. Kan titi ațanga a rilru kaih pèn vat a ngai tih hriain vawiin lama ka class-a mipa naupang pahnih chanchin chu ka sawi zui ta daih a.

*HRINGNUNA HARSATNA HIAN HMA LAM PAN ZÊL THEI TÙRIN MIHRING A CHHER HRIAM ȚHÌN*