☆KA TÂNA RUAT☆ - 3 By Dingdi Pachuau

☆KA TÂNA RUAT☆ - 3 By Dingdi Pachuau

Khami nî ațang khân in lama tih tùr ka pêk apiang chu Sawmsaka leh Peka pawh chuan an rawn ti ve ta zêl a, kei hi ka khirh ka ti dâwn nge, in lama tih tùr ka pêk rêng rêng hi an vai hian ka ensak thlap ziah a, an țhiante tih an la chhãwng em tihte thleng hian ka zâwt peih, an ti dik emaw ti dik lo emaw an phùr nân fak hi ka peih thung a, mahni ngeia tih a țhat bîkzia leh a hlâwkna ka hrilh fo bawk. 

Pêka nungchang chu ka chîk ru chho ta deuh deuh a, Miss Rudy sawi vàng pawh kha a ni maithei a, a chhan pawh class-ah hian a ngui theiin a mut a chhuak viau țhìn nia ka hriat leh tâk vàng a ni. A châng chuan a mitte hi a rawn bui deuhin a ngui ngawih ngawih ni berin a lang a, a hmêl leh mitmengah lah a hlim lo țhìn tih hi a hriat theih viau bawk si. Kan hriat loh hian a rûkin natna a lo nei reng em ni zâwk? Chu chuan a tihlim lo a ni maithei; mahse, ni tina nat reng thu lah a awmin ka hre si lo. Bâkah, a natte chuan sawi ve àwm tak. Nge, ani tê hi, a lo rùi țhìn em ni zâwk ang? Ãih, ni lo, hei hi chu a ni lul lo ang, ngaihtuahna ata paih bo vang vang chi. Naupang hlim thei rual leh enghelh nei lo rual, harh êm êm rual chauh a la ni a, engtiziaa hlim lo leh ngui êm êm reng țhìn nge a nih hi chu hriat chhuah a ngai a ni. Harsatna eng emaw tak a lo nei ru reng thei si a.

Chu chuan ka rilruah hmun a luah nasa bawk a ni, zanriah ei laiin ka nu leh U Mama bulah chuan ka sawi leh a. U Mama chuan," A zirlaiah a tui hlawl lo te pawh a ni ve ang chu, a ninawm ve theih êm hi. Chuan, i class a ning lutuk pawh a lo ni thei tho bawk a," a lo ti mai a, ka en hau ringawt. Chutiang lam chuan ka rilru ka lo la sêng ngai hauh lo, ka class hi a lo boring viau țhìn em ni ang tih chu ka ngaihtuah chhunzawm ta nghâl a, nuam an tih theih dàn tùr leh boring an tih loh tùr berin, ka theihtáwp chuan zirtîrna ka pe ve țhìn chuan ka hria asin le. Ka lo ngaihtuah rei deuh nge ni, ka nu chuan," Chaw kha han ei tùn tún phawt mai teh, chaw ei kham lamah kan la sawi dáwn nia," a lo ti ve thung a.

Chaw ei kham, thlèng ka sil zo deuh chiah tihah Chhana a rawn lût ve leh chiah a, kei aiin ka nuin a lo chhàwn hmasa bawk. Kan inzui rei ve tawh a, ani pawh hi ka chhûngte lakah inthlahrung lovin a zak tawh lo va, ka nu leh U Mama pawh hian an nêlin an en hrang lo, thingpui ka lumsak a, ka pêk hnuah țhu khâwm lehin kuhva rah chu kan thel zui leh ta a. 

Rei kan thel hma chuan ka nuin zanriah kan ei laia kan thil sawi kha a rawn sawi chhuak leh a, U Mama ngaih dàn lo ang deuhin," An chhûngkaw lamah harsatna an nei pawh a ni thei, in lama boruak a dik tâwk loh chuan naupang pawh hi an hlim lo ve ţhìn a nia," a tih chuan U Mama chuan," I subject hi a ning a nih ka ring ber, kei pawh ka têt lai khân Chhiarkawp hi chu ka nin ber subject kha a ni ve a, ka hre thiam viau a ni," a lo ti ve leh a.

Chhana chuan thil awmzia a hre thiam lo deuh tih ka hmuh chuan thil awmzia chu ka hrilh nghâl a, ani pawh chuan," A ngêng chho ve deuh tawh a ni zâwk lo maw? Nge ruih a nei ru țhìn zâwk le?" a lo ti ve a, kei chuan," Ruih a neih chu ka ring chiah lo, țawng tam lo pawh ni lo hian a țawng ngai lo ti ila a dik zâwk ang, țhian a nei pawhin ka hre lo, pâwna mi dang an infiam châng pawh hian ani chu hmuh tùr a awm ve ngai lo, chutiang mi chu a nia," ka ti leh dap dap a.

"An chhûngkaw lamah harsatna a nei a nih ka ring, chhûngkaw buaina hian an rilruah nghawng a nei nasa thei êm mai a, chu chuan inkiltawihna neihtîrin mi dang bula awm châk lohna leh mal tlat nun duhna a hring thei țhìn a ni," ka nu chuan a lo ti leh a, U Mama chuan," A ni thei tho; mahse, kei chu ka dinnaah khân ka la ding. I class a ninawm a ti a nih ka la ring ber," a lo ti ve thung a, Chhana chuan aw thian kharh pah hian," A chunga rilru put chhiat viau chu duh lo hlê mah ila a rui țhìn a nih chu ka la ring tho, tûnlai naupang hi chu rin phâk bâk hian an khawsa a nia," a lo ti ve leh a, ring êm êm hran lo mah ila a thil sawi hi thil ni ve thei chu a ni; mahse, an thil sawi zawng zawng zîngah hian eng ber nge rin tùra eng ber nge dik ang tih erawh ka ring thiam lo thung.

Pathianni chawhnuah Chhani a rawn lêng ve hlawl a, kan inhmu chu kan țê dùn hlut mai. Ani hian a pute khua Kolasib lamah min zin bosan vang vang kha a nia, nimin piah khân a rawn haw ve chiah a, ani zawng scooty nei a ni bawk a, min rawn tlawh leh nghâl vat mai.

"En teh, ka zu lérh tawp! Star ka rawn nei haw!" Nui hawr hawr paha a tih chuan ka nui hak a, mi hlim thei, nui hawr hawr reng mai leh țawng duh barh barh tak a nih vàng hian mi pawhin an ngaina thei nghâl mai zêl a, bialpa lam erawh a neih àwm ka la hre lo, hmãn deuh khân Star pakhat chu a nei ve tawh. Keiin Chhana ka kawp tâk hnu hian kawp tùr zawng ve tùrin ka ti țhìn a," Ka peih lo," tia min chhàn loh leh," Ka duh tak zet ka tawn ve hunah bialpa chu ka nei ve chauh ang," a ti țhìn a, a duh tak zet hi tawng ve tawh se ka tihpui ţhìn hlë a ni.

"Kolasib lamah min làwisan vuah vuah dâwn tihna a nia, kan va inhlat tawh dâwn ve!" ka tih chuan," Awi, sawi lo teh, anite chuan bialnu chhe lo deuh a nei, ka chang pha teuh lo mai!" a lo ti ve thung a," Nula luck lo tak chu ka lo ni, mi duhlai lo star ve tlat mai chu, a luck lohthlâk ngawih ngawih êm mai," tiin nui chung hian a insawisa chhunzawm leh zat a.

Chutiang mai mai chu sawi chuan kan phûl hlut a, thingpui ka siamsak laiin U Mama a rawn tho chhuak ve a," U Mam, i ke chu a dam chiang tawh maw?" tiin a lo be nghâl vat a, ani chuan," Aw, dam tawh e. I reh tlawk tlawk hlê mai, i dam maw? I chhûngte an dam em?" tiin a zâwt lêt zui ve nghâl a.

A lêng ve ta reng a, Chhana a rawn lêng hman lo bawk nèn, haw a tum deuh pawh chuan ka phal tlat lo va, zanriah ei ve nghâl tùrin ka sâwm ve ta nghe nghe. A ngawih deuh vang vang hnuah," Ka rawn haw hnuah kan inah vawi khat chauh chaw ka la ei! Mahse, a pawi lo, ka ei ve leh mai ang e, chaw erawh ka hehzia chu i hriat kha," nui pah hian a ti a, kei chuan," No khat thlâk belh kha a ni mai a, a harsa lo êm mai, i chhûngte chu ka hrilh mai dâwn nia, i ngaihawm alawm," ka lo ti vat a. Ani erawh chuan," Ka hrilh thei alawm, keiman ka hrilh ang," a lo ti thung a.

Kan vêng chhûnga mi pitar damlo kanin ka nu a lêng chhuak daih a, U Mama pawh thingpui a in zawh hnu khân a chhuak zui ve daih bawk. Mi dang awm lo ta chu kan zalèn khawp a, pahnih chauh awm e ti lo chuan kan bengchheng dùn khawp mai, pâwn lam ațangin min lo hria awm se chuan pahnih lek kan nih chu an ring lo tawp ang le. Chaw a lo ei dâwn bawk si a, rei rial lovin titi bawrh bawrh pah chuan rawng bàwl lam kan tintuah zui ta nghâl a.

"In inzui rei ve tawh tho sia, innei tawh mai ula?" a rawn tih chuan ka melh vat a, nui hmêl a pu lo. Ka lu ka thing deuh nar nar phawt a, chutah, nui pah hian," Bialpa i neih hunah le," ka ti ta a, ani chuan," I ho! Ka nei mai mai dâwn lo, ka peih lo tih i hriat kha," a lo ti mai a. Kei lah chuan," Chuti, pasal ka nei har deuh dâwn tihna a nih chu," ka lo ti leh a.

A ngawi leh rih a, a hnuah, "Kumkhuaa inzui ringawt in tum tak tak em ni? In inzui rei tawhzia hi! Ţhiana din pawh ka châk ve tawh a," a hma aia thutak zâwk hian a ti leh a, a thutak éma ka hriat avàng chuan kei pawh thutak zui ve nghâl zatin," Tunah chuan a la hma êm mai, kan la naupan dun êm hi, bâkah, inneih lam hi kan la sawi dùn chhin lo rêng rêng, duh pawh a la duh bîk lo tawp ang, nakîn deuhah... kan dinhmunte hi han siam rem ve deuh phawt ila," ka lo ti ve leh a, Alu kan tùr chan mawlh mawlh pah chuan," In induh tawn phawt te chuan chhûngkaw dinhmun leh kum tihte mai mai chu e, eng mah a ni hlei nem," awlsam zet hian a ti leh mai a, chhâng tawh lovin ka thaw hak ringawt. Sawi mai hi chu a awlsam alawm; mahse, a taka han tawn hi chuan awlsam taka sawi ang mai hi a lo ni țhìn lo.

Zanriah kan ei laiin ka nu chuan," Zanin chu Mama, Pi Chhûngite inah in unauin va lêng ve ula aw, țhenawm hnai tak chu ni lo mah se kan vênga mi a nia, ka va lèn lai pawh khân nula leh tlangvâl țhenkhat pawh ka hmu nual, in va lan ve kha a țha," a ti a, U Mama chuan," A pawi hlei nem, kan va lêng dâwn nia," a lo ti vat a, kei erawh chu ka lo ngawi kar ringawt. Chhani a awm ve rih bawk nèn, min rawn tlawh ve êm êm a, kan lêng dâwn a nih chuan chaw ei kham veleha a haw a ngai dâwn asin; mahse, amah Chhani zâwk chuan," Haw vat ka peih dâwn si lo va, lo kal ve ila a mawi lo viau ang em?" a rawn ti a, ka chhàn hma chuan ka nuin," Mawi lohna awm lo ve, i peih ve a nih phawt chuan in va kal dial ang a, a țha khawp ang chu," a lo ti a, kei pawh chuan," Mawi lohna a awm lo hrim hrim! I peih a nih phawt chuan... ka mal dâwn lo tihna a nia," hlim tak hian ka lo ti ve vat a.

Pi Chhûngite inah chuan kan va lêng ve ta a, ka rin aiin țhalai an lo tam daih mai. U Mama chuan thingpui lum a pui nghâl daih a, keini hmeichhia erawh in chhûng lamah kan țhu thung. Mi hi kan lo fel tawh hi ka tia, kan țhu ve țhup nain țawng bengchheng leh han titi hlut pawh kan awm lo, kan thil tihah leh kan awmna hmunah kan chiang tlâng a ni ber ang chu. Dâr 9 pelh hretah Chhani'n hàwn a duh thu min hrilh ru sar sar a, thlah ka duh avàngin ka chhuahpui zui nghâl bawk. U Mama'n min lo hmuhin min lo ko vat a," Ka va thlah ang che u," a tih avàng chuan kan inzui haw țhâm țhâm a, kan hlauh a hlau nge min vêng deuh zâwk pawh ka hre thiam lo. "Ani a haw chuan nang pawh lo kal ve a ngai tawh lo ang, kei erawh ka va kal leh ang," a ti a, ka lo hnial lêm lo, naktûka zirtîr tùr ka la bih lâwk zo lo tho bawk si a.

*******

"Vawiinah My Name-a ka hmu a," Chhani'n a rawn tih chuan," Hmu ang, in vêngah khân a rawn kal tih ka hria," ka lo ti vat a. A tlak karh ri ka hre zui nghâl zat a," In tenawm dùn mai mai teh e! In kalna tùr lehzêl pawh in inhrilh vek zêl tihna a nia. Ka duh lo tawp mai," a rawn tih leh chuan," Engah nge i lo duh ve ngawt ang? Ka phal teuh lo mai!" ka lo ti ve leh a.

"Ka chuhpui dâwn lo che! Nei vek rawh," a rawn tih leh chuan nui chhuak lo tùrin ka insûm hrâm hrâm a, ka nui ri a hriat chuan a lungàwi loh belhchhah sauh ang tih ka hria a ni, fiamthua lungawi lo der mai mai mah ni se min rawn be ve vang vang sia, lèn pawh a rawn lêng duh tawh lo ang tih ka hlau, a rilru a lian bawk si a. 

"A kalpui pawh i hriat dâwn chu!" A hnu deuha min ei lo leh min ti-el deuh taka a rawn tih chuan ka insûm thei ta lo, ka nui chhuak ta hawk hawk a," Hre ta hauh lo mai, ka hmu ve si lo va. Min han hrilh la... tiraw?" tlawn titih leh thlêm pah deuh chuan ka ti ve thung a, a rawn țeu nasa ta mai.

"A hrilh tel lo palh hlauh che a nih dâwn chu. Teh hlauh chuan!" a rawn ti ta a, a rawn tih dànah chuan min hrilh a tum hmèl loh bawk a,  kei pawhin zawh nawn kher ngai ka ti hran lo, kalpuite pawh a nei ve ang chu, a țhiante emaw a chhûngte emaw pawh an ni ve ang, ngaihțhat loh nâna hman ka duh lêm lo. Cousin hmeichhia a ngah a, chhe lo deuh deuh pawh an tam mai, Chhanite vêngah pawh hian an chhûngte pawh an awm nghe nghe tak alawm.

"Engtikah nge i lo lèn leh ang?" ka ti ta daih a, ani chuan," Ka hman tawh lo, lo lêng ve tawh rawh. E taka, pitar damlo kan kan kha, a thi tawh em?" a rawn ti leh daih a, ka nui leh hawk mai. Nuih hi a tiza ve țhìn êm asin, lungawi lo dâwn dâwn hian awm ve țhìn mah se kan inbe rei deuh a, kan nui leh ngê ngê zêl.

"Eng nge, hun a kal leh deuh tawh a, ka lènna lama damlo ka kan kha a ni ve a, a thih tawh leh thih tawh loh ka hre châk ve a ni mai a," a rawn tih leh phei chuan ka insûm thei lo," Lalchhan!!" ka ti a, ka nui ta chiam a, ani pawh a insûm rei thei bîk lo," Kan kan hlum thei lo chu a nia, fuat a nei a nih kha, a daih rei êm mai," te chu a la rawn ti deuh deuh a! A ngaihna hi a awm hlawl lo.

A ni lah tak a. A kal mai dâwn emaw tih laiin tûn thlengin a la thi lo chu a nia, 'chawte pawh a ei leh thei tawh' te an tia, tak tak ni maw? Kan va kan lai kha a dam țhat loh zual lai tak a lo ni ve a ni ang ka ti ta ringawt.

Zàna a rawn lèn hman dâwn loh thu text message-in min rawn hrilh a; mahse, ka open lêm lo, notification ațangin ka chhiar thei tho sia, Chhani thil sawi khân ka rilru a tibuai lêm lo nain ka open lo ve rih mai mai a ni, thil pawimawh tak a ni lêm bawk si lo va.

Ka open loh leh ka chhàn loh avàng chuan dârkâr chanve hnu vêlah min rawn be ta nge nge a, min rawn be leh ngei ang tih ka hriat vàng a nia ka chhàn duh miah loh ni. Nui sak chunga," Hello?" ka tih chuan," I buai viau a ni maw? Ka message i chhâng thei lo va," a rawn ti ta ngei a," Um, buai ve deuh tho," ka ti ta ringawt a.

"Zaninah ka rawn lêng hman dâwn lo, a chhan chu i hriat kha," a rawn ti a, "Engati maw?" ka lo ti bung vut a. Thaw hawk chung hian," Tournament chungchâng vêl vàngin ka buai tih i hriat tawh kha, theihnghilh der tum kher lo la," a rawn ti a. Ka theihnghilh lo chiang lutuk, ka hre lo der mai a ni zâwk.

"Aw, ka hria," ka ti ve leh mai a, ka țawng dàn chuan a ngaih a ti țha lo a ni ang," Lungawi lohna i nei lo tiraw? I nei em?"a rawn ti leh a," Engah nge ka lungawi loh ngawt ang?" nui hawk chung hian ka ti ve thung a, a ngaih țha lovin a rilru a buai telh telh ang, chhaih buai dàn hi chu ka hre ve tawh alawm.

"Puii, eng nge i lungawi lohna? Ka rilru i tinuam lo a nia, eng nge ka tihsual?" a rawn ti ta chiah rêng a, ka nuih a tihzat rualin ka khawngaih zâwk, a ti der lo ang tih ka hre chiang bawk si.

"Lungawi lohna ka nei lo," ka tih leh chuan," Min hrilh teh, ka hriat hma chuan rilru nuam lovin ka awm reng dáwn a nia, tunah pawh a nuam lo tawh," a rawn ti leh a, a hmêl awm dàn tùr ka mitthlà chhin a, ka khawngaih avàng chuan ka nui chhuak ta nge nge a.

A thaw hawk a," I va sual tak! Min tihrehawm hman alawm le, naktûk tlaiah min tihhrehawm man i pêk a ngai ang aw," a rawn tih chuan," Aw le, Boss," ka ti a, ka nui hak hak bawk. "Tunah tak hian ka bulah awm la chuan, i va châk lo dâwn tak!" a rawn tih leh phei chuan,'" Ka tlâwm, ka tlâwm chiang lutuk!" ka ti a, a rawn nui ve hawk mai.

*******

Ka nuin chawhmeh zawrh tùr a phur chhuak leh a, kan vêng in tin maiah a va zuar kual leh dâwn a ni. Bazâr lamah pawh a țhutpui ve țhìn tho nain hetia a zawrh chhuah hian a hralh zo rang a, a hlâwk zâwk bawk niin a sawi. Thingtlâng lama thlai tam lai hian kan chhûngte'n thlai hnah leh rah zawrh tùr min rawn thawn ve țhìn a, ka nu nuam tih zâwng tak a ni a, an rawn thawn tam deuh châng hi chuan kan vêng chhûngah hian a zuar kual lâwp lâwp mai zêl, a hralh theiin hlêp a lo țha ve bawk nèn, thingtlâng lama thlai thar tam hun lai hi chuan a zuar kual ziah ti ila ka sawi sual lo ang.

U Mama a rawn lût a," Mate, zaninah ka chhuah a ngai dâwn a, eirawng kha bâwl thuai thuai rawh aw. Ka nu kha a chhuak leh ta a ni maw?" a rawn ti a," Aw, chhuak leh ta e, a phur chhuak tam angreng si a, a va inhralh zo thei êm ang chu maw?" ka ti zui ve zat a, ani pawh chuan," Thei leh mai ang, mite hi an țha a, sum lamah an buai loh bâkah mi tin mamawh thil a lo ni bawk a," a lo ti ve leh a. Ni e, chhûng tin mamawh a nih vàng hian ka rin aia hma hian a rawn hralh zo ve țhìn mai bawk.

Rin aia hmain a rawn hralh zo leh tak tak a!!! Hah hmèl viau mah se a inhralh țhat vàng a ni ang, a rawn hlim lût viauin ka hria," Pi Parteite saw chu an fel ve tak tak a ni, min duhsak ve a, min leisak leh țeuh tâk kha," a ti nghâl bawrh bawrh a. Kei pawh chuan," Nia, sumah an buai lo bawk a, keini tân malsàwmna an lo ni țhìn bawk," ka lo ti ve a.

Room ațanga U Mama rawn chhuak chuan," Nu, i hah em? Han țhu hahdam deuh la, chaw ei hma deuh ang u aw? Zànah chhuahna tùr ka nei a," a rawn ti a, ka nu chuan," A ni maw? Ka hah hran hlei nem. Bawihi, i inpeih chuan ei siam nghâl mai ila?" a lo ti ve mai a, kei erawh chuan," A, chàwl hahdam ve phawt rawh, a la tlai hran hlei nem," ka lo ti ve thung.

Zanriah ei kham hnu lawkah U Mama a chhuak a, ka nu a insil zawhah TV a en zui nghâl a, kei pawhin kuhva rah thel tùr ka la chhuak ve bawk. Chhana a rawn lêng a, min thelpui ve nghâl mai a; mahse, ka thelpui rei lo. Thil min sawipui tùr a neih avàngin bathlàr lamah ka țhut chhuahpui ta daih a.

"Ka la sawipui ngai miah lo che a; mahse, zanin chu sawipui ngei che ka duh a ni," a ti phawt a, eng tak min sawipui ang maw ka lo ti rilru rauh rauh a, ka ngawi ràn mai. A ngawih deuh hlek hnuah," Kan lo inzui rei ve ta, kan induh tawn a, inneih lam hi sawi ve tawh ila ka tia," a rawn ti chhuak ta a, ka rin loh lam daih a rawn sawi chhuah avàng chuan a hmêl ka en vat nghe nghe. A thil sawi chuan min țhâwng a, chutih rual chuan min tihlim viau bawk, hetiang lam hi a sawi ka lo ring pha lo êm a ni.

"Min chhâng la? I duh lo em ni? I la duh loh chuan sawi la? Kei chuan nupuia neih tawh che hi ka duh a ni."

*A TÂNA I PAWIMAWHNA AIA I TÂNA A PAWIMAWHNA BÙK A RIH ȚHIN VÀNG ZÂWKIN I THINLUNG NGEI KHA NANGMAH NGEI KHÂN I TI KEH SAWM ȚHÌN. INLAICHÌNNAAH CHUAN MI PAHNIH PAWIMAWHNA HI A INBÙK TÂWK TÙR A NI SI A*