☆KA TÂNA RUAT☆ - 10 By Dingdi Pachuau

☆KA TÂNA RUAT☆ - 10 By Dingdi Pachuau

Hun la tam mah se a rûkin ka inpuahchah chho ve bek bek a, a rûkin ka hlim veng veng. Ka duh aia hmain pasal nei dâwn mah ila ka hreh êm êm lo, heti ve mai hi ka ni a, kan chhûngkua lah pa uap loh niin kan khawsa ve nãw nãw a ni ber a; mahse, min iaina pakhat mah nei lovin Chhana'n a nupui atân min duh ve êm êm a, kan innei dâwn ta rêng bawk. Ka vànneihzia hi, ni e, ka vànnei ve thlâwt e, mite pawh hian vànnei min ti dâwn lutuk.

Chhani pawh a phûr khawp mai, phûr vet vet tak a ni. Min rawn tlawh ve ta zut a," Pasal min neihsan daih dâwn a, lungngai viau tùr ka nih laiin ka lãwm bawk si, ka lung erawh a lêng lâwk sa ve tawp. Chuan, ka rin aia nasain My name-a hian a lo duh hlarh hlarh che ka ti, palai a rawn tîr deuh zut mai a nia," tiin a nui kar kar a, țawng duh tih takah," Ka lawmpui khawp mai che, chutih rual erawh chuan ka mal tawh dâwn sia, chu vàng chuan, pasal i neih hunah pawh min be reng tho rawh aw, in inah pawh rawn lêngin chaw pawh ka rawn ei sek maithei a ni," a ti leh a, hma lam hun tùr chu sawiin a phûl barh barh reng a.

Pasal ka nei dâwn tih chu in hnuaite pawhin an hre lo thei bîk lo va, Diktei leh Tlani chuan," Au Ruatpuii chu pasal a neih nî chuan a hmêl țha ngawt ang, mo chu an chei mawi thei sia, ka hmu châk tawh," an lo ti ve ngei a, Peka erawh chuan," A fel sia, ka ui e," a lo ti ve thung, a nu rawn lêngin ka nu bula a sawi barh barh chu ka hria a, ka nui sak nghe nghe. Anni hi pasal ka neih hnuah pawh a theih hrâm chuan tlawh zeuh zeuh ka tum tho ang, țanpui theih dàn a awm  phawt chuan ka tlãn chhe ngai lo ang tih pawh ka hria a ni.

Chhana pawh a ngaih a ngam tawh deuh nge ni, a rawn lang khât ta deuh hlek a; mahse, eng nge mamawh ka nei em tih vêl min rawn záwt fo thung a, min ngaihsakna leh duatna a bànsan chuang lo chu nuam ka ti, tlaiah ni se a hman phawt chuan tuition pe tùra ka kal min hruai ziah a; mahse, min nghâk ngai meuh lo. Dàwr lamah a tam ve ta deuh a, bâkah, anni lam pawh an inbuatsaih chho ve hret hret tho bawk nèn, lo lêng tùr leh min hruai ziah tùr pawhin ka phût ngam lo, a remchàn chânga a rawn lan hian ka lãwm tâwk êm êm a ni.

Anni lam chu an hausa bawk a, an inbuatsaih dàn pawh keini ai chuan a hautak fê zâwk a, buai pawh an buai fê zâwk lo thei lo; chu vàng tak chuan an buai thu a sawi châng pawh hian ka thin a rim ngai lo, buaina țhain an buai tih ka hria a, kan pahniha tân an buai a ni, chhûngrilah ka hlim êm êm zâwk a ni.

"Naktûk chu ka hruai hman lo ang che aw, nuam ka ti lo viau nain kan kawt lamah buaipui tùr a awm dâwn a," a tih chuan," A ngai hlei nem, min ngaihtuah viau țhìn suh, kea kal hi chu ka tih țhan a nih bâkah in buai tih hi ka hre chiang ve a, ka phût rêng rêng lo che, nuam lo tih pawh a ngai lo," uar zet hian ka lo ti a, a nui sak a. Tûnlai hian hna a thawk nasain rilru a sêng nasa ve deuh bawk a, a lang chêr ve kuam maiin ka hria a, ka lainat ru hnûp hnûp viau mai. A lang bawrchhawr lek lek a, a hma aia a lu a buk deuh vàng pawh a ni maithei tho bawk, chhiat erawh a la chhe lo reng tho.

A tûkah chuan khua a duaiin ni pawh a lang zauh zauh a, khua a dur deuh bawk, nimin piah lama khawchin an rawn tàr lan kha a dik viau chu a nih àwm hi. Hna chu hna a nih miau avàngin khaw awm dànin zir vak lo mah se tuition class pe tùr chuan kein ka kal leh hnak hnak a, ka thlen chuan Pi Mawitei'n min lo chiauau thuai a; mahse, vawiin chu tlai dang ang lo tak leh amah ang lo takin Naom-i a ngernguai hlê mai a, en pawh min en mang lo, tlai dangah chuan hlim takin a țawng barh barh bâkah a nui sêng reng țhìn kha a nia, khaw awm dàn leh a awm dàn hi a inang ka ti, ani hi a damsam lo a ni chiang mai.

"I dam țha lo a ni maw?" ka tih chuan," Dam țha ve tho e," a lo ti mai a, Joel-a chuan," I dam țhat loh kha," a lo ti ve thung a, ka en vat a, min rawn enin," Vawiinah pawh school a kal lo, nizànah a khua a sik a," a lo ti vat a, Naom-i ka en leh vat a, chu vàng a lo nih chiah chu a ngernguai êm êm ni.

"Tunah i khawsik chu a reh tawh em?" ka ti thuai a, min chhâng lovin a lu a bu nghat ringawt. Ka khawngaih reuh mang e, a hlim theih tehlul nèn, zan khat thilthu-ah a awm dàn a danglam vek thei a nia.

"I thiam tawh tho sia, mut daih mai tùr a nia, i nuamsam si lo va," ngaihtuah ru tak hian ka ti a, ani chuan," Ka mu peih tawh lo, vawiinah ka mu reng tawh a," a lo ti leh mai a, min en chuang lovin dawhkàna a lehkhabu chu a en reng a, zawi taka țhuin a hmui a hup a, a zawi reuh lutuk leh a hlim lo hmêl lutuk chuan khawngaih thla a la tlat.

Chutah, inrin lâwkna awm hauh lo hian a rawn luak ta puat mai a, Joel-a a au nghâl chùl mai. Ka chî-ãi ngei a; mahse, a rei lo, a nu ko tùrin Joel-a ka hrilh vat a, Naom-i chu ka buaipui nghâl a, a luak leh bawrh bawrh a, a baw hawk hawk a ni ber mai, a luak chhuah chu tuirîl hlîr a ni, nichin khân a luak chhuah vàngin a hmui kha a lo hup ve a ni ngei ang. A luak tam bawk a, a zawh meuh chuan a taksa a zawi vek a, men pawh a meng lo, khawih ang angin a awm a ni mai.

Inzirtîrna chi tawh hek lo le, kan buai ta nuai a, Pi Mawitei chu a chî-ãi nasa bawk si, ka buaipui lo thei ta lo. Nu ber chu motor khalh tùr pawhin a buai mangang lutuk a, taxi ko vatin damdawi in hnai berah kan kalpui ta ringawt mai. In kan kalsan vek emaw ka tih laiin Joel-a kan hnutchhiah tih damdawi in thlen hnuah ka hre chauh.

Pi Mawitei rin theih a nih loh avàngin ka buaipui theih ang ang ka buaipui a, doctor leh nurse an che nghâl vat mai. Rei lo te hnuah Naom-i pa, Pu Rintea pawh a rawn lang thuai a, a hmêlah chuan buai chî-àina lang ve lo mah se a fanu chu a ngaihtuah hlê tih a hriat mai, a rawn lang rang êm mai.

Boruak a zia deuh hnu chuan țhutnaah țhuin thâwk ka la hawk hawk a, tunah chuan rilru tlëmin a zãngkhai ta. Pa ber a rawn thleng tawh a, amahin buaipui ngai la awm zawng chu a buaipui ta vek a, a nupui buai nuai, tih tùr hre lova țhu reng chu a hnungah chùlsakin a hnèm pah bawk a, pa leh pasal nih a tlin hmèl viau, a nupui leh fate tân a thlamuanpuiawm ngawt ang chu.

Doctor-in a țûl ang a ti vek tawh a, hlauhthàwnawm a awm loh thu sawiin zanin erawh damdawi ina a awm ngei a ngaih thu leh naktûk lamah test neuh neuh neih a ngaih dâwn thu chu a sawi a, ka lo ngaithla ve reng. Naom-i chu a chauh vàng a ni ang, a muhìl a, a kutah thisen chaw an pe bawk, tuna a lan dànah hi chuan na tuar hmêl a pu lo, muhìl tawp a ang ber.

An chhûngte ni ngei tùr nula leh nu upa lam deuh, nufa an ni ang tih hriat tak hi an rawn lang thuai a, Pi Mawitei chu an rawn hnèm nghâl a, chutia Naom-i awm thut chu mak an tih thu leh pawi an tih thute chu an rawn sawi nghâl sawt sawt a, Pi Mawitei chhûng lam an nih duh hmèl, an hmêl pawh a inang deuh.

"U Sang, in nufain lo awmpui lawk mai ta che u, hei Ruatpuii thlah pah hian damdawi ina mamawh tùr ka va la khâwm lawk ang e, Bawiha amah chauhin inah a awm bawk si a," Pu Rintea chuan a ti a, nu upa lam deuh chuan," Aw le, va haw rawh khai, hei a zia mai dâwn hi, Elpui-a pawh a lo mangang lutuk ang e," a lo ti ve vat a, Pi Mawitei aw leh Pi Sangi aw chu a inang khawp mai, unau chu an lo nih ngei hi.

Pawna kan chhuak chu ka rin aiin a lo tlai tawh niin, Pu Rintea chu enin," Thlah ka ngai hauh lo a nia, kein ka haw thei alawm," ka ti a, ani chuan," I awm lai a ni hlauh a, a tihzia viau rualin i lo buai phah ta nek si a nih kha. Ka lãwm hlê a ni, engkim i lo buaipui a," a ti leh a, car chu a hawng a, min rawn en nghâl bawk, ka thil sawi kha a ngaihtuah lêm lo a ni ang.

"A, buaipui tihah eng mah ka tih hman loh kha," ka ti phawt a, chutah," Thlah kher ka ngai lo ka tih tawh kha, inah Joel-a amah chauhin kan kalsan bawk si, a ngaihtuahawm, haw thuai zâwk rawh, kein ka kal thei," ka ti leh a, ani erawh chuan," Ni lo ve, lo lût rawh, rei a ni nâng, ani chu mipa a nia," a ti ve leh thung a, ka hnial zêl chuan amah ka tihkhawtlai mai mai bâkah kei ngei pawhin ka tlai phah tih ka hria a, hnial zui duh ta lovin a car-ah chuan ka lût ve ta a.

Kan tlàn chhuah hnu lawkah kan  hma lam kawng chhaka Chhana leh hmeichhe pakhat rawn phei chu ka hmu a, hmeichhia chu ka hmuh hnu a ni tih ka hria. E, a cousin Biakdiki kha maw le, a bânah a rawn chelhsak leh a, a chhe lo lehpek viau mai; mahse, a hma aiin a lo chêr zual tawh a, dam lo hmêl pawh a ang lek lek alawm le.

Ka en zui zêl lai chuan Chhana chuan a biangah a fawhsak zoh a, ka țhu khawng nghâl at mai, a kut lâksakin a áwmah a nem hnan a, eng emaw hi a beng bul sêtah nui chungin a hrilh pah zauh bawk. An lak ațangin mit lâk sawn duh viau mah ila ka thei lo, Biakdiki chuan melh chho vein a nui ve sak a, kan tlàn pèl ta, side glass ațangin ka en a, hnung lam ațang chuan innghèng rialin an kalin ka hmu, an lang thei lo zui ta.

Zànah chuan chu thil chuan min tibuai tlat a, thil dang ka rilruah a awm thei lo. Chhana a rawn lêng lo va, message-in vawiin lama a hna thawhnaah a thawh nasat deuh avànga a chauh deuh thu min rawn hrilh a, pawi a tih thu leh naktûk lama min hmuh theih tùr thu leh min hruai theih tùr thu sawiin thil min sawipui a duh thu a rawn sawi bawk. Ka chhâng lo, tunah hi chuan eng thil mah ngaihtuah loh ka duh; mahse, ka rilru a buai nuai nuai a, ka mitthlaah lah chuan innghèng riala an kal lai leh Chhana'n a bianga a fawh zoh lai mawlh kha a lang zêl a, duh lovin ka lu ka thing nawk nawk a; mahse, a reh mai thei si lo.

In ka thlen khân ka nuin min lo be vatin ka haw tlai êm avàngin thil awm dàn min lo zâwt vat a, ka chhâng mumal pawhin ka hre lo, Naom-i chanchin erawh ka sawi ve ngei tih chu ka hria. Chaw ei siam thuai a ni a, ka ei peih loh thu sawiin room-ah ka inkhung nghâl daih a, khumah ka țhu reng ringawt, tûn thlengin ka la țhu.

Ka nu a rawn lût a," Chaw chu va ei hlek rawh, chaw nghei a țha ngai lo," a rawn ti a, ka ei châk loh thu ka lo hrilh leh a, ka nuin ka hmêl ațangin ka awm dàn a hriat ka hlauh avàngin ka hmêl a hmuh theih loh nân inherin ka thuamhnaw dahna lam pani ka kal zui ta nghâl a," Ka'n insil teh ang," ka nu ngaihțhat nân chuan ka ti leh a, ka aw pawh zãngkhai thei tùr berin ka ti chhuak ve a ni.

Ka tlaivâr chiang khawp mai. Ka mit a thial ûrh mai a, a kham țhûm bawk. Pângngai takin ka tho chhuak a, tûk danga ka chêt dàn ngaiin ka che vek a, ka nute min rinhlelhna tùr leh thil eng emaw ka chunga thleng anga an ngaih ka duh lo.

School-ah min fiam leh zûrh zûrh a, za lo zet zetin ka nui liam mai mai. Ka thinlung chhûng hi hria se chuan hetiang hian min fiam àwm si lo, ka va tâwt tehlul êm! Ka mithlaah lah an pahnih mawlh kha a lang zêl a, nizànah pawh khân ka maimichhìn ngam loh phah tawh a ni, mit kham chung chungin ka men phah zêl.

Dawhkàn chunga ka phone dah a rawn nghawr dat chuan phûr lo tak hian ka la a, Pu Rintea a lo ni, Naom-i a zia viau tawh thu min rawn hrilh a lo ni a, ka chunga a làwm thu a rawn sawi tel bawk. Ka lo hrechang tawh miah lo chu niin! A va bengvâr loh theih tak! Nimina ka thil hmuh vàng vek a ni. An chanchin zâwt tùr ka nih tehlul nèn, mãwl min ti ngawt ang chu.

Ka hman veleh ka kan ve vat a, Pu Rintea a lo awm lo va, nimin lama Pi Sangi fanu Baby-i khân a lo awmpui a, Pi Mawitei chu in lamah a haw lawk a ni ngei ang. Naom-i chu a lo zawi leh viau a; mahse, min hmuh chuan a nui ve hrâm hrâm a, chutiangin kei pawhin ka nuih hrâm a ni. Ka nuihzat lohzia ka hria; mahse, ani dam lo chau tak bulah hian ka rilru ka ti lang tùr a ni lo tih ka hria a ni.

Rei pawh ka awm hman lo. Vawiin chu Joel-a tuition ka kalpui a ngai dâwn lo hlauh a, Chhana hmuh ngei ka duh, thil awmzia chiang takin ka zâwt ang. Rinhlelh ka duh ngai lo a nih kha, a cousin nèn hlauh phei chuan; mahse, nimin lama ka hmuh dànah kha chuan cousin lam a lang tlat lo, inngaizâwng an nih duh hmèl ber, Chhani'n a cousin Biakdiki leh Chhana a hmuh dun thu min hrilh zauh zauh kha ka hre chhuak uar uar a, min lo kawp tak tak a nih teh chuan...

A bike-a chuan leh a bula awm hreh viau mah ila biak ngei ka duh si, ani pawhin thil eng emaw min sawipui a duh thu min hrilh kha, hmun fâl deuh hlek, miin min chîm buai lohna tùr lai deuh ka ngaihtuah kual zung zung a, a vâng phian mai; mahse, amah zâwk chuan," Vawiin chu tuition i kalpui zawhah thil pawimawh deuh hrilh tùr che ka nei ka tih kha hrilh che ka duh ang," a ti a, a awka chhuak a danglam lo. Rang zet hian," Vawiin chu kalpui an ngai lo, sawi i duhna hmun lamah kan kal nghãl thei ang," ka lo ti vat a, ani pawh chuan eng dang sawi lovin a bike ti nungin kan tlãn chhuak ta nghâl a.

In chung zâwlah min kalpui a, tu mah an awm lo, an in a ni lo va, a chhûngte in a nih ka ring ve deuh ngawt. Tu inah pawh chuan inhmu ila pawi ka ti lo, kan thu sawi erawh mi dangin hre thei lo se tih chu ka duh a ni mai.

Amah en lovim ràl lehlam chu hmu miah lovin ka en reng a, eng nge ka sawi hmasak ber ang tih ka ngaihtuah. Ani pawh țawng lovin a ngawi phawt a; mahse, a ngawi rei hran lo," Vawiin chu i awm dàn a dang deuh tlat, nâ i nei chu a ni lo tiraw? Nizàn lam i mu țha lo em ni zâwk? Ka message lah min rawn reply si lo," a ti ta duah a.

"I thil min hrilh tùr chu min hrilh la?" ka ti ve thung. A sawi tùr chu sawi thuai se, kei pawhin ka zâwt thuai ang a, kal sawn thuai ka duh a ni.

"Ruatpui, min hre thiam rawh aw. A harsa viau ang tih chu ka hria a; mahse... tih dàn tùr ka hre thiam lo, mi tih loh dàn pawh a ni bîk chiah chuang lo, a thleng ve zauh tho; mahse, a thleng palh a ni zâwk, a nih tùr ang a ni vek tawh si a," a ti teh nuai a, hre thiam lovin a lam ka hawi ta vat a, eng thil nge maw a sawi ni?

"Eng nge i sawi awmzia?" ka ti a, min rawn en ve a; mahse, thlang lam a hawi leh thuai a, a khap sak sak a, ka en reng avàng chuan a sawi hreh deuh nge ni, a ngawi deuh reng a.

"Niminah Biakdiki nèn ka hmu che u a, i cousin a ni tak tak em? Nge, ni lovin in lo ingaizâwng zâwk?" ka ti ve ta hmiah a, zêp kual hnì hnè ka peih lo, sawi chhuah pawp hi a țha zâwk.

Min rawn en ta chiah a, a hmêl chu a buai deuh a, a mitmeng pawh chuti tho. A dik a ni ngei ang. He pa hi, tenawm mai mai chuan...

"Ni lo, thil thleng palh a ni zâwk, ka ngaizâwng lo, ka cousin a ni alawm. Khawngaihin, min hre thiam rawh aw, zêp nei hauh lovin ka hrilh vek ang che, min ring rawh, ka duh rêng vàng a ni lo tak tak!"

Mit pawh khap lovin a mitmengah chuan ka en a, ka rilruah hlauhthàwnna a rawn lût a, eng thil nge a tih? Eng nge ni thil thleng palh a tih chu?

A hmui a liak leh phawt a," Ka fa a nih chiah pawh ka ring lo, a rai tih min hrilh a, vawi khat chauh kan chesual si a. Ni lo, ka ti tak tak! Thil thleng palh liau liau a ni, ka ruih vàngin nangmah emaw ka ti a, amah a ni tih ka hre lo hrim hrim!" Thaw hawk hawk chung hian a ti a, eng thil nge a sawi tâk hi?!! A rai maw?! An lo chesual a nih chu!! Thâwk pawh thaw mang lo chuan râpthlâk ti fê hian ka en reng ringawt.




*HETI ZÂWNG HIAN I LO NGAIHTUAH VE NGAI EM ? MI DANG NÈN IN INLAICHÌNNAAH  NANGMAH KHA HARSATNA BUL BER I NI VE THEI A NI TIH HI*