☆KA TÂNA RUAT☆ - 11 By Dingdi Pachuau

☆KA TÂNA RUAT☆ - 11 By Dingdi Pachuau

_______

Ka mal chunga naute kum khat leh a chanve mi, tui taka muhìl sâk sâk chu ka en reng a, ka en ning thei lo. A mit hmul sei seng sawng, er zet mai hi hmuhnawm ka ti țhìn, a sam buang deuh lek lek, kir deuh chiat, lapua anga nêm zet, naute sam tih hriat tak chu ka țàwnsak loh avàngin a lang hnawk deuh niai a, khawi emawa ka chhuahpui zauh châng hi chuan ka țàwnsak mai a; mahse, tunah hi chuan khua a lum hran lo bawk a, țàwnsak ka khawngaih ve a, a nih ang angin ka dah tawp a ni.

Motor-ah kan chuang rei bawk a, ka taksa a rawl țhûm mai. Nonoi ka pawm reng bawk nèn, muthilh duhin mamawh viau mah ila ka muhìl ngam lo a ni ber ang chu, ka muthilh ve palh hlauh chuan a lo harh ang a, mi dang a ti buai ang tih ka hlau.

In kan thleng chu hah a damin rilru pawh a thlamuang ta. Mahni pianna leh seilenna ram ngeiah, chutah pawh mahni inah ngei mai han awm leh theih chu nuam siai siai tak a ni. Hlauthãwng leh rilru thlamuang lo rêng rênga hun hman kha thil nuam a ni rêng rêng lo, rilru zalèn, nun zalèn leh thlamuang taka hun hman theih hi khawvêlah a lo nuam ber a nih hi ka tih phah hial a ni.

Zànah Chhani a rawn lang nghâl a, Nonoi a hmuh chuan," Ah, a va mak reuh!" a ti teh ngawt a, ka en vat a, a lo nui sûng zui, ka va ngei tak! Min nghèng chiala țhu, ka phone khawih neuh neuhtu ka fanu chu ka leh en a, kei chuan mak reuh pawh ka ti ve lo, ka hmangaih a, min ti hlim a, Chhana vànga hrehawm ti êm êma hun ka hman laia min chhanchhuaktu a ni ka ti lo thei lo, amah vàng hian thil dang ka ngaihtuah tak tak thei lo va, ka engkim hi a ni tawp mai. Ani Chhanite ang, vun ngo apiang hmêl țha ti ringawt zêl chuan țha chu a ti vak lo rêng ang.

"Nu nih i ngeih hle mai, i țha hmuah mai alawm. Chuan, thu làwmawm lam, tunah chuan hmuh i nuam tawh e," a rawn ti charh charh a, amah pawh en duh lo hian," Chuti maw? A va làwmawm ve!" ka ti mai a, ani lah chuan," I sawi dàn kha! I thin ti rim thei tùr sawi ka nei em ni? Làwmawm pawh i tih hmel loh," a rawn ti leh a, kei erawh chuan," Nei lo ve, a làwmawm lutuk!" ka lo ti leh mai a. Nonoi 'mak reuh' a tih avàng khân ka thinrim der mai mai a nia; mahse, a hnuah deuhah erawh chuan eng eng emaw sawiin kan nui a, kan nuih vàng chuan Nonoi pawh uar zet hian a lo nui ve a, ka han chhaih a, a uang kual vêl chu kan nuih dar dar a.

Ka rin ang chiahin ka nu leh U Mama'n Nonoi an duat a, ani pawhin amah duattu zawng a hai bîk lo va, a nêl nghâl êm êm. Kei ang lo takin a vun a hàng tlat a; mahse, a hàng ka tih avàng chuan a vun a thim ta viau tihna erawh a ni lo, naute vun pângngai aiin a hàng deuh e tih a ni mai. Chubâkah, naute vun na nâ nâ chu a lo no a, a mawi êm êm tho, a mit meng a lian kuau a, a uk kharh bawk. Sawi tawh angin a sam a dum hlarh lo va, naute dang sam ang thovin a buang deuh thar a ni. A mithmul erawh a sei er sang a, a hnâr pawh a zum dik nghâl êm êm. A nuihin a biangsum chu a khuar kelh țhìn a, máwi ka tih țhin êm avàngin ka chhaih nui reng țhìn. Mi mitah chuan naute hmêl țha tak leh duhawm tak chu a ni kher lo maithei, a chhan pawh naute chum leh ngo vir ver ang kha a ni ve tlat lo va; mahse, ka mitah leh hmangaihtute mit ațang chuan khawvêla naute hmêl țha ber leh duhawm ber, min ti hlimtu a ni tho tho.

Kan in hnuai luahte, Pekate kha an awm tawh lo va, tunah hi chuan nupa rekin an luah a, man chawiin an luah ve nghe nghe. Pekate kha chu Lêngpui lamah huan enkawla awmchilh nghâl tùrin an kal daih tawh a, an nufaa hna thawk theiin thla tin sum fai pawh țha ve tâwk tak an hlawh thei dâwn a, an tân chuan hnar a har ve dâwn êm a ni, in luah man chàwi a ngai dâwn bawk si lo. An lawmpuiawm ka ti a, huan neitute school-ah Peka naute pahnihin lehkha an zir chhunzawm thei dâwn tho bawk nèn, an vànnei ka ti tak zet. 'Tûnlaiah mi an sual tawh' han ti ve țhìn mah ila mi țha hi an lo la awm țeuh a, mi țha tawngtute zînga Pekate chhûng an tel hi ka làwmpui êm êm a ni tawp mai.

Kâr khat vêl ina kan inawm nèl hnuah Nonoi chu U Mama dàwr lamah ka chhuahpui ve ta a, pâwna ka chhuahpui ve ta chu nuam a ti khawp mai a, a thiam ang tâwk tãwkin a țawng ve nasa a ni. Kawng laka kan vêng mite leh hmël hriat ka hmuhte chuan min be lûmlãm ve zêl a, a țhenin Nonoi chu tu fa nge tih min záwt a, a țhenin," E, fa i lo nei reng tawh a ni maw?" an ti bawk a, min en zui duh viau tih ka hre bawk, hei hi chu ka tawn tùr a ni tih ka hria a, ka tawng țan ta rêng bawk a, ka nu thu min hrilh kha ka hre chhuak nghâl vang vang mai.

U Mama'n min lo hmuh veleh," E, in lo kal ve a ni maw? Nono, lo kal teh, ka lo pawm teh ang che," a lo ti vat a, ani pawh chuan a pan ve vat a, an inpawm ngjâl hlù hlú a. Ka hawi kual a, dàwr chu a lian hran lo nain bungrua a muk ve reuh a, a inrem muk ve țân mai. Helai bàwrah hian dàwr tê, nepnawi deuh han zawrhna mai a lo awm lo hi U Mama tân vànneihna a ni.

A awmna a fuh ve bawk a, kan awm chhûng, rei vak lo chhûng pawh chuan rawn dàwrtu an awm ve nak nak reng a, an putu chuan pawm pawh an inpawm rei hman lo, kei lahin a thil zawrh man zât ka lo hre ve hlawm si lo va.

U Mama hian kan in piah deuha kan ram ãwl, âwih ve deuh hlek chu a hralh țhen a, a hralhna pawisa chuan dàwr tê hi a siam ta a ni. Chu kan ram leitupa chu a hausa ve bawk a ni ang, in a sa zui nghâl a, pawisa a awm miau hi chuan tih theih loh tak tak pawh hi a lo awm lo a nih hi, in sakna chi ni pawha kan hriat lohah khân in chhãwng thum sàin chhûngkaw hnihin an luah tawh nghe nghe.

Tunah chuan Pathian zârah kan khawsak a zia ve viau tawh a, hna thawh tùr han zawn nghâl chûk chûk pawh ka tum lêm lo. Ka nu leh U Mama pawhin an phal lo, Nonoi chauh ngaihtuah rih tùrin min ti a, ka ngaih dàn pawh a ni ve tho. Ni e, ani hi han changkãng deuhin kum thum/kum li han tling ve phawt se, hna tùr chu ka la ngaihtuah ve leh ang chu.

Ina awm hi chuan min hmu tùr leh min sêl tùr an awm lo va; mahse, Pathiannia inkhâwm hi ka va hreh țhìn tak! Nuam lo ka ti viau bawk. Miin min sawi dâwn tih hi chu hre sa tho mah ila, a hun a lo thlen meuh hi chuan bo vang vang ka châk țhìn, rilrua ka lo intihpaukhauhnate khân min tlàn bosan vek ni maiin ka hre țhìn, hemi nî kher hi chuan. Kan nufa hian min en hrek hrek reng a, kan hmuh theih si, kan hriat phâk si lohah hian an phun leh sep sep a, kan chanchin an sawi tih lah a hriat reng si a, hei vàng hian Pathianni hi nuam ka ti lo va, inkhâwm bàn veleh kan haw nghâl vat zêl rêng a ni.

Mahse, Nonoi awma ina awm ngawt ngawt ringawt hi chu ka tum lêm lo, in chhûnga awm paha Nonoi ei tùr leh a mamawh leisakna tùr sum thawh chhuah dàn ka ngaihtuah a ngai. Engtin nge ni ang? Ka ngaihtuah kual nasa a, ngaihtuah chhuah mai tùr ka hriat loh avàng chuan ka nu leh U Mama bulah chuan ka sawi chhuak a, ka nu chuan," A ngai lêm em ni? Buai lovin awm ve rih mai mai teh, naute hi țha takin enkawl mai la, kei leh i u kan thawk thei a," a lo ti mai a, U Mama ve thung chuan," I rawn sawi chhuah tâkah chuan dàwr ka siam tirh lam khân min rawn dàwrtute khân chhang tharlâm zuar tel tùrin min ràwn nasa a, kei atân tihngaihna awm hek lo le, ka ngaihtuah zui duh lo va. Kan bulah electronics, damdawi, pheikhawk, lehkhabu, pangpâr leh motor parts lam an zuar a, chhang han lei mai tùr a vângin, lei dâwn chuan kal ve deuh hlek a lo ngai  bawk nèn, puitling lam hian paratha tharlâm leh jelebi tharlâm tak lei tùr an duh thu hi biscuits rawn lei pah hian an sawi ve ziah a," a lo ti ve thung a, ka lo bu nghat nghat a, hei hi a tihchi ngawt ang, in chhûngah Nonoi awm pahin a thawh theih a, ngaihtuah chian deuh chu a țha dâwn a nih hi.

Chhani rawn lêngin," Awi, ka duh loh deuh thil ka rawn hmu a, min la be zui! Hmuh tawh miah loh hi ka duh asin le," a ti bawrh bawrh a, a hmêl ka en vat a, min rawn en ve chuang miah lo. Dawhkàn chunga jelebi hmawm zoh pah hian," My Name-a a nia, ka hmuh pawh hian ka biak peih loh avàngin ka hêl ziah a, vawiin chu min rawn hmu hmasa zâwk tlat a," a ti leh a, Chhana hming sawi ka duh lohzia leh ka peih lohzia a hre chiang a, ani pawh hian min thinurpui viauin Chhana pawh a ngei êm êm a nih kha; mahse, tuna a rawn sawi chhuah tâk zârah hian ka ngaihtuahnaa Chhana chèn tam tâk lohzia ka hre chhuak vang vang mai. A tìra harsa ka tihzia kha...mahse, tunah chuan thil a danglam ta, rilru, ngaihtuahna thinlung hian a lo tum ve hi a ngai êm a lo ni, ani ngaihtuah hman lo lêkin Nonoi ka ngaihtuah a ngai ta a, ka naute hi a lo awm lo ang tih ka hlau tak zet tawh a ni.

Inrinni a ni a, chhang kan tharlâm tak tak kengin dàwr lam ka pan a, ka han thlen chhoh lai chuan U Mama leh nula pakhat hi an lo țhu dùn a, min hmuh veleh U Mama chuan," E, i lo kal tawh maw? Nichîn khân nu pakhatin a awm tawh leh awm tawh loh a rawn en a," a lo ti vat a, kei chuan," Ka hman veleh ka rawn kal a nih hi," ka ti ve vat a.

"Manun, hei hi ka nau Ruatpuii a nia. Mate, hei hi Manuni, nula fel êm êm a nih hi," tiin nula chu min  han hmêl hriattîr a, ka phu zawk lo chauh a ni!! Nula min hmêl hriattîr vawi khatna a ni miau mai a, a bialnu a ni ngei ang tih pawh ka ring nghâl thlap.

Kan inchibai lai chuan," Ka hmu che chu ka lãwm hle mai," ka ti sap a, ka nuih sak bawk. Ani pawh chuan," Kei pawh le, hmuh che hi ka châk thei lutuk a," a ti ve bawk a, ka rilru a hlim nghâl sârh a ni. A țawngkam a felin a ngilneih hmèl si a, hmeichhe țha tak a nih ka ring, a hmêl pawh a chhe lo. A lan dàn ațanga lo judge tùr ka ni lo tih hre tho mah ila a pâwn lam lan dàn hian thui tak a hril ve tho si. U Mama'n hetiang mi a han tawng ve nawlh mai hi mak ka ti a, an intawn dàn leh an inkawp chhoh dàn hriat ka châk zek zek bawk.

Haw tùrin ka chhuak thuai a, kan in ka thlen hma deuh chuan min ko rî ni àwm tak ka hria a, chu lam chu hawi vatin ka ding dat nghâl bawk. Min rawn pana rawn pên hlawk hlawk ka hmuh rual chuan ka rin loh deuh mai a nih avàng chuan ka lo en hau mai.

"Naom..!!! I dam em? I lo va lian tawh êm êm ve!!" ka ti chùl a, ani pawh chuan nui sâng hian," Aw, ka dam alawm, i dam zâwk maw? Kan va inhmu khât tak tiraw?" a ti nghâl bawrh bawrh a, kan inchibai a, kan han ding dùn chiah phei chu, a koki ka chen țâwk tawh, a lo va sâng tawh tak!! A lo sàn tawh chu thuhran, a hmêl pawh a lo țha zual tawh a, a lo tleirãwl chho ve tak tak tawh bawk a, a vun pawh a nalh, a hmai erawh a bawl ve hlek chu a nih hi.

"Inhmu khât khawp mai," ka ti a, ka kokia min rawn kuah chuan," Tunah hian pâwl eng zât nge i zir tâk? Ngawi teh, pâwl kua a ni tùr a ni, a dik tiraw?" ka ti leh a, ani chu a lo bu nghat a, a sam dum hlap chu a beng hnuai zâwnah a tan rual phei hmarh a, a inhmeh phian a ni.

"Samuel-ate inah hian ka lêng a. En teh, ka phone tlang thei ngai miah lo che a, ka ngaihzia che chu e... Rawn lèn ka châk țhìn a; mahse, hrilh lo chea rawn lèn tawp chu ka hreh ve bawk sia, ka ngai lutuk che a ni tawp mai," a ti leh hliam hliam a, min ngai bawk a ni ang, min kuah nghet a, min thlah hlei thei lo.

"Hawh, lo lêng ve rawh, kan ina lo lèn i châk kha," ka ti a, ani pawh chuan min hnial lo. Kan kal pawh chuan min kuahna chu a la thlah chuang miah lo va, kei pawhin phelhsak ka tum lêm lo, min ngai ve a nih hi ka ti mai.

Ka nu pawhin a lo hmuh chuan," E, he nula chu ka hriat hnu kha a ni chiang mai, i lo va lian tawh êm êm ve! I dam em, Naom?" a lo ti vat a, inchibaiin an titi dùn nghâl bawrh bawrh a. Kei erawh chu ka room-ah lûtin khuma Nonoi lo muhìl bâm chu ka en a, ka bual fai zo chiah tihah ka nuin a paw nghâl kha a nia, a muhìl nghâl a ni ngei ang. A puan sin ka siam țhatsak hnuah rei awm lovin ka chhuak a, rei tak ka hmuh tawh loh Naom-i a rawn lêng ve sia, awm bosan rei ka duh lo.

"Au Ruatpui, Pekate hi an awm em? An awm lo nge ni, an reh riauin ka hria," Naom-i'n a tih chuan," An awm tawh lo, Lengpui lamah an awm tawh a," tiin ka lo chhâng vat a, ani chuan," A ni maw? Awi, a va'n pawi, ka hmu châk hlawm asin le. An lian ve tawh hlawm ngawt ang," a ti leh a, kei pawh chuan," Nia, lian tawh viau ang, nang pawh khati chena sâng kha i ni tawh a nia," nui chung hian ka ti a.

Thingpui lumin chhang ka siam, chhùn hmeh atâna ka dah chu kan hmeh a," Au Ruatpui, hei hi i siam maw? I va siam tui êm êm! A tui ka ti tawp," a tih chuan," A va làwmawm êm êm! Chutia tui i tih viau chuan i hàwn țhen dâwn nia, ka siam țeuh alawm," ka lo ti vat a, ani lah chuan," A va'n làwmawm dâwn tak! Ka ei țeuh dâwn aw," a lo ti leh a, a ei tak țân țân a, tui a ti viau a ni angêi ang, chhang ei ngai lo te pawh a ang dâwn alawm le, ka nuih a tiza reuh tak tak! U ang tak taka min en hi ka lãwm a, min lo ngai ve viau pawh hi ka lãwm hlê a ni.

Ka number min dîl ve ngei a, ka pe ve mai bawk. A haw har ta lo. A haw hnu chuan ka nu nèn kan titi chhunzawm a, Naom-i lo puitlin tawhzia leh a nungchang lawmawmzia chu sawi zêlin a nunze tlang tak chu paih bo lo se tiin kan sawi zui a. Joel-a pawhin pâwl sàwm pahnih a lo zir ve ngei tawh a, ani pawh a lian viau tawh ngêi dâwn, hmuh ve a châkawm, a inla tlangvâl chho ve tawh ngei bawk ang a...

Zanriah ei laiin U Mama chu ka fiam zauh a, ani pawh chu a nui suk suk mai. Ka nu hnênah chuan," Mo chhe lo deuh i nei dâwn e, vawiinah ka hmu bîk bîk tawh a. Ka hmuh dànah kha chuan mi sual tak chu a niin ka ring lo, a fuh ngawt ang," ka ti a, ka nu pawh chuan," A țhat nasat chu. Kawppui thlan sual hi a hlauhawm êm êm a, fîmkhur viau tluk hi a awm lo, chutia ka tih avàng erawh chuan fîmkhur leh lutuka kawppui neih duh loh chungchâng erawh ka sawi lo a nia, engkim hi Pathian kutah thlen ila, a fuh ber mai. Mama, hei i farnu hian nau a pawm tih hria la, nang bâk hi innghahna kan nei lo va, kan mipa neihchhun i ni a, i lakah hian kan innghat vek a ni tih hi i hre reng dâwn nia," a ti zui charh charh a.

Ka rin loh lutuk zanriah ei kham hnu lawkah Naom-i'n min rawn call a, Nonoi'n ka phone a en mai mai laiin a nia, a putea bul ațanga rawn kalin min rawn pe vang vang reuh, a bianga fawh zoh pahin phone chu ka laksak a, number ringawt a ni a, ka ngaih a țha lo deuh nain amah ka hriat si, a number ka neih si loh pawh a lo ni thei tiin ka chhâng ta hrâm a ni.

"Hello?" tîm deuh hleka ka tih chuan," Au Ruatpui, keimah Naom-i," a rawn tih tâkah chuan ka thaw deuh huai a," Chhang min hawntîr kha ka chhûngte'n tui an ti lutuk a, an lãwm lutuk aw," a rawn ti leh siam siam a, kei chuan," A va làwmawm tak êm! Chutia tui in tih viau chuan i lo lèn apiangin ina ei tùr i hàwn zêl thei ang, ei ngun i duh deuh leh i lo lèn ngun a ngai a ni mai," nui chung hian ka ti a.

"Ka hman hun apiangin rawn lèn ka tum ang; mahse, weekend-ah chauh, hun dangah chuan school kal ka ngai țhìn sia."



*INLAICHÌNNAAH RÊNG RÊNG HIAN HMANGAIH NASA ZÂWKTU LEH CARE NASA ZÂWKTU AWM ȚHÌNIN CHU MI CHUAN A TÀWPAH NÂ A TUAR NASA ZÂWK BAWK ȚHÌN*