☆KA TÂNA RUAT☆ - 12 By Dingdi Pachuau

☆KA TÂNA RUAT☆ - 12 By Dingdi Pachuau

Aizawl ka haw ațangin thla hnih deuhthaw a liam ve leh ta. Ka nu leh Nonoi an inawm nasa a, kei ai mahin ka nuin puak pawh a paw nasa ta hial mai. Kan duat  rawn a ni bawk a, amah pawh hian a hre ve kar a, phal loh thil lo khawih ta se, han lâksak ila, a pi hnênah emaw a putea hnênah emaw a han tlãn tàu zui nghâl a, nuih hi a tiza țhìn. U Mama hian a paw ngai lo nain pawm a peih êm êm a, lawm erawh a thiam hran lo ve khawp mai. A pawm peih bawk a, zanriah ei khamah, hmun ka tih fel laite hian an lo inpawm ve hman ziah tawh. An duat hi ka lãwm a, ka hmangaih ang bawk hian an hmangaih ve pawhin ka ring. Nonoi hi naute dang a ang lo ka tih tawh kha, mi mitah chuan naute duhawm tak a ni dâwn lo chiang tih ka hria, hei vàng hian ka nu leh U Mama pawh hian an khawngaihin an hmangaih zualin ka ring.

Pathiannu chawhnuah Chhani'n an ina lêng tùrin min rawn sâwm ve a, an car thar ngatin a nia min rawn sàwm ni. A zahawm ka ti khawp a, ka nu pawhin," Va lêng ngei teh u, ni leh lo, Nonoi hi chu ka lo awmpui mai dâwn em ni ang?" a lo ti ve a, Chhani chuan," A hruai loh te'n, ka nute'n an hmu châk ve alawm," a lo ti vat a, kei pawh chuan," Ka hruai ang, ka hruai loh chuan engtia rei nge ka va awm dâwn tih pawh a hriat si loh," ka ti ve a. Nonoi chuan kan lêng dâwn tih a hre thiam ve nge ni, min rawn hnaih a, ka kuta kàiin pâwna min chhuahpui a tum a," Aw le, aw le, kan lêng dâwn alawm, i thuamhnaw kan thlâk ang a, kan kal dâwn nia aw. Sâwtah, Ânuteite inah kan lêng ang a, nuam i ti viau ang, motor-ah kan chuang dâwn asin, min chêtsualpui loh hrâm erawh beisei ila," tiin, nui chung hian Chhani chu ka en phei a, a lo nui sûng a.

"Ka thiam tawh lutuk! License nei thlap tawh ka nih hi, min ring ngam viau mai teh," a rawn tih lêt chuan," Ka ring ngam lo che tiin ka sawi rêng rêng em maw ni? Chesual hauh lovin i rawn inkhalh thleng thei a, i khalh thiam tihte chu a hriat sa reng a," ka lo ti ve leh a. Ka nuin," In kal dâwn chuan muang suar suar lo la, kal thuai ula, in rawn haw leh thuai ang a, chutiang tùr chu a ni, tlai deuha rawn haw zawng, inngaihtuah a na țhìn a," a tih chuan Chhani chuan," Zanriah an ei nghâl dâwn. Kei pawhin ka rawn ei ve zauh zauh tho kha, i phal em, Nu? Phalsak teh, an nufa hian an la rawn lêng miah lo, an rawn lèn vawi khatna tùr chauh a nia," a ti a, ka nu chu a en ràn a.

Motor-a chuan chu nuam a ti leh ngang mai, a țê ruai ruai reng a, a chângin a lâm bawk a, nuam a ti lutuk chu keini pahnihin kan lo nuih ve thung. Chhani chuan," Ka hmu ngun ve deuh ta a, chhia pawh ka ti tawh vak lo, amah tê hi a lawmawm ve reuh tlat," a ti a, min rawn en zawk chuan ka lo ner khum vak a, za deuh hian a nui zui nghâl hawk hawk a. "Thil dang ngaihtuah lovin i car khalh chauh ngaihtuah rawh, min rawn en tawh suh, nuih pawh nui tawh suh," ka ti leh a, thinrima sawi ka ni lo va, Nonoi chhia a tih vànga sawi ka ni tih pawh a hre chiang viau ang. Nonoi lâm kual vêl chu ka en a, kei hi chuan chhia ka ti phal ve ngai lo ang.

A nu chiah a lo awm a, min lo làwm thiam khawp mai. "I lo lèn khàtzia leh kan inhmuh khàtzia hi, hei hi maw kan naute chu? A va hmêl țha ve a, a lo changkãng tawh bawk si. Nono, inchibai ila?" a lo ti vat a, a nui sâng zui a. Nonoi erawh chu a zak deuh nge ni, min nghèng chiala dingin a hmai chu ka kawrfual hák phènah chuan a thukru deuh țât țât a, a la nèl lohna hmuna kan kal chuan a heti ziah.

"Nono, Àpi hi chibai rawh le, naute fel i nia, i fel êm țhin kha, kei pawhin Àpi ka chibai dâwn," ka tih hnuah, ka chibai hnuah chauh a chibai ve duh, nakina
a la tlângnèl dàn tùr mitthlà rauh rauh chung chuan," Naute fel chu țha tak leh fel taka awm tùr a nia tiraw? Àpite, Àpute leh Ânuteite thu âwih tùr a ni, Ânutei hian a duat dâwn nasa che a nia, i la ti buai fo dâwn tih pawh ka hmu sa vek a ni," ka ti a, Chhani pawh chuan," Lutuk ringawt! Ani bâk duat tùr naute kan nei lo," a lo ti ve vat a.

A hnu deuhah naupang khalh tùr toys an neih ang ang an rawn dah chhuak a, Nu Zikpuii pawhin a besawm nasa bawk a, Nonoi pawh a zakzum rei thei ta bîk lo. Nuam a ti ta viau zâwk a, țawng la thiam lo mah se kan thil sawi a hre thiam ve hret hret zêl tih ka hria a, biak pawh ka be nasa țhìn rêng a ni.

Chhani nèn chuan an piah deuhah awmin zàwi tê tê hian kan titi a, Lalvâltea nèn an chanchin min hrilh a ni, tlêm lai khân bialpa angreng deuh a nei ve a; mahse, ani pawh a vànduai a, an inkawp ve deuh hnu, thla hnih hnuah Lalvâltea chuan zàn khat thilthu-ah a rawn țhen ta ringawt a ni àwm e, a țhen hnu lawkah mi dang nèn an inzui a hmu zui lehnghâl bawk. Keini țhian dùn hi ngaihzâwng lamah kan tluang ve hlawl lo a nih dâwn hi tih ka lo ngaihtuah, kan vànduai dùn bîk êm mai.

"Lalvaltea chu nimin pawh khân ka hmu a, ka tum loh deuha hmu ka ni bawk sia, min lo hmu ve kur niin, ka'n hawi sawn hmak kha! Ka rilru ti na viau lo mah se ka ngei ve hrim hrim a," a tih chuan ka nuih a za angreng a; mahse, nui duh lovin," A țha, phubâ i lâk theih ve dàn a nia, hmu lo ang hmak leh hre lo ang hmaka awm theih phei chuan a țha zual," ka ti ve zâwk a, min rawn enin," My Name-a i hmuh hunah ka tih ang chiahin ti ve ang che. Ni leh lo, My Name-a pawh a ni tawh lo, Chhanluliana a ni tawh zâwk. In inkawp lai khân a lu kha a lian vak pawhin ka hre ngai si lo va, tûn hnua ka hmuh leh țhin hian a lu hi lian ka ti, a țhang deuh em maw ni aw ka ti hial," tiin a nui zui a, kei pawh ka lo țhen ve sak a.

Zanriah kan ei a, Nonoi pawhin a ei tam khawp mai. Keimahniin chaw kan ei hmaa amaha eitîr hi ka duh lo va, a têt zual lai tih lohah chuan, a theih hrâm chuan ka bulah țhuttîrin ka kîlpui țhìn. Chaw a ei tam hian ka lãwm țhìn a, a thau phah ve deuh pawhin ka ring țhìn, a sèn lai deuh phei kha chuan naute tâna chaw țha nia an sawi, ka sumin a tlin phâk hi chu ka hmaih ngai lo ti ila a dik ang; mahse, a thau phah ngai chuang lo, naute hrisêl tak a ni lo zui lehnghâl a, tlâng hri lêng ni se a kâi hma si, a dam loh châng kha chuan ka mang kha a ang tak zet țhìn, Pathian bâk innghahna ka nei ngai lo rêng a ni; mahse, tunah zawng, Pathian zârah liau liau a hrisêl chho ve ta deuh a, damdawi pawh a ei tlêm ve ta, enkawl ngun erawh a la ngai viau tho.

Ka chhuak tam lo bawk a, Chhana hmêl ka la hmu lo va, a thãwm rîvâ pawh ka la hre hek lo. Kan in leh dàwr inkâr hi ka kal chhuah chhun a ni deuh mai a, a thui bawk si lo. Pathianniah kan inkhâwm leh tawp a, chu zawng chu. Beng pawh a vâr viau lêm lo va; mahse, pawi tihna ka nei chuang lo.

Naom-i'n min rawn bia a," Au Ruatpui, khawngaih takin tuition class min kalpui leh la? Ka duh aiin class-a min zirtîr hi ka man thiam țha lo va," a rawn ti a, ka thaw deuh hap a, chhuata Nonoi țhu diai chu en lehin," Mate, ka va hman tawh àwm lo ve aw," ka ti phawt a," Eng nge i tih? Mi dang i zirtîr tihna a ni em?" a rawn tih chuan," Aih, ni lo ve, mi dang zirtîr ka nei hauh lo. Chuan, zirtîr che ka duh loh vàng pawh a ni lo aw," a hriat thiam loh ka hlauh êm avàng chuan ka ti sawk sawk a.

"Chuti, rate i sàn duh tihna a ni em? A pawi lo, i inchhiar dàn dán kha a ni mai, Âpa pawhin a phal vek, nizànah ka sawipui tawh a," a rawn ti leh a, ka thaw leh hawk mai. Ka harsatna hi ka hrilh hriat loh chuan a hre thiam  thei dâwn lo a nih hi, hrilh tawp mai ang, a pawina a awm hlei nem.

"Naute enkawl tùr ka nei tawh a, tuition class pe tùr che khân ka chhuahsan thei tawh lo alawm, rei ka chhuahsan thei lo va," ka ti ta a," A ni maw?" a rawn ti phawt a, ngawi deuh vang vangin," A nih leh, in inah khân rawn panchilh ta che ila, min zirtîr hman thei ang em?" a rawn ti leh a. Ka lu ka thing nar nar tawp, hei hi chu ka hnial thei dâwn lo tawp tih ka hre chiang si. Amahin min rawn pan thei a nih chuan lo hnial zêl dàn tùr ka hre tawh lo; mahse, thil tihchi a ni pawhin ka hre lo, a nu leh pate pawhin rem a ti tawp nâng.

"Mate, chutiang ringawt chu a dik thei nâng. I pate pawhin an rem ti lo ang, mi dang zawng mai ta che, i lo lèn chângin i duh leh i hriat thiam loh laite chu min zâwt pah thei tho ang a," ka ti ta ringawt a, ani chuan," Mi dang chu ka duh lo, kan sir pawh a awm reng a, mi dang pawh a bulah chuan an kal nual; mahse, kei chuan ka duh ve lo va. Âpa bulah chuan ka lo dîl țha leh ang a, a phal chuan ka rawn kal ang aw, a țha ang tiraw?" a rawn ti leh a, chutianga a tih lehzêl avàng chuan hnial dàn tùr ka hre tawh lo, sumte chu ka duh a, ka mamawh alawm; mahse, min rawn panchilh tawp dâwn a nia. A, a pate thu tlûknaah innghat tawp phawt mai ang, an rem tih chiah phei chu ka ring lêm hlei lo va.

Ka chhûngte bulah pawh ka sawi lêm lo, zanriah ei khamah min rawn be leh a," Au Ruatpui, Âpa chuan a phal a, naktûk tlai ațangin ka rawn kal țan thei ang tiraw? Chuan, Âpa chuan class kal man pawh kha 'A tih ang ang a ni mai' a ti aw, ka lo kal châk tawh lutuk! Naute ka hmu châk tawh bawk sia, ka phûr tawh!" a rawn ti a, a aw chhuak ațang pawh chuan a phûr tak zet tih a hriat theih.

"Aw le, aw le; mahse, min rawn pan dâwn chu a ni sia, a va inthlahrunawm duh dâwn ve?" ka lo ti ve thung a, ani erawh chuan," Keimah deuh, i hman lo chung chung ka rawn ti buai dâwn che a nia; mahse, nangmah kher ka duh bawk si che a. Âpa pawhin 'A hman lo chung chung i va ti buai dâwn a nih chu' a tia; mahse, pawi ka ti vak lo, ka lo lêng ziah dâwn tihna a ni mai a," tiin a rawn nui hak hak zui a, ngeiawm a tih theih loh, a lawmawm êm êm a ni zâwk, ka ngei thei ngai lo ang.

A thuphungin a tûkah ka nu bulah ka sawi a, ani chuan," A, amah berin a rawn pan theih che chuan a țha nasa alawm, Nonoi chu ka lo awm mai thei dâwn a, a rei dâwn lo bawk a. I hlawh erawh chu a ngai aiin hniam deuh thei la chuan a țha khawp ang, a rawn pan dâwn che a ni si a," a ti a. Ni e, kei pawhin chu chu ka tum dàn a ni hrim hrim, a nu leh pate'n an ngaihtuah viau dâwn a, an ngaihtuah ngai lova țha taka lo zirtîr pawh ka tum, ka chungah nu ber Pi Mawitei phei chu a fel theih êm kha.

Chhùn thingpui in laiin Pu Rintea'n min rawn be ve nawlh mai a, a number pawh ka lo nei tawh lo nghe nghe. Amah a ni tih ka hriat hnu chuan mak ka ti a, a fanu vàng a nih ka ring nghâl tho nain Pi Mawitei zâwkin min rawn be ta se chuan ka hre thiam deuh ang.

"Nangmah kher kha a duh sia, i lo dawhthei leh hrâm hrâm mai a ni ang chu, ka ngaihtuah lo thei bawk si lo," a rawn ti sup sup a, kei chuan," Naom-i zawng a fel êm mai, ngaihtuahawmin a awm lo tawp ang," ka lo ti ve thung a. Ani chuan," A lung hi a lian si a, a duh zâwng tihhlawhtlinsak hrâm hrâm hi ka tum ve țhìn, a pa ka nihna angin. A rawn ti buai ang che tih chu ka hre tho a, a ti buai viau ta che a nih--" a sawi zawh hma chuan," Ti buai lo ang, țha takin ka lo zirtîr ang e, rawn ngaihtuah lutuk duh suh u," ka lo ti thuai a.

Eirawng kan bâwl hma deuh a, a chhan pawh Naom-i rawn kal laia lo buai nuai kha ka duh lo a ni. Eirawng bâwl chunga ka nuin Nonoi a buaipui lah ka duh hek lo, lo inhmakhua diam ila, buaina a awm lo mai ang.

Tlaia kawngkhàr a rawn rîk karh karh chuan ka lo chhàwn vat a, Naom-i ngei a lo ni, a rawn luha chhuata Nonoi lo vei târh târh a hmuh chuan," Hei hi em ni naute chu?" tiin min zâwt a, min rawn en pah bawk a, ka lo bu nghat ringawt. A ipte pawh dah chuang lo chuan Nonoi chu a pan a," Hi, Naute, inchibai ila? Naom-i ka nia," tiin a kut chu a phar chhuak nghâl a, Nonoi chuan a en rèn ráwn phawt a, min rawn en leh a,  engtin tak ti ang maw ka tih rûk lai chuan Naom-i chibai pawh tum lo chuan a pi hnên lamah a tlãn ta daih a.

"Au Ruatpui, i fanu a ni em? Mahse, in va inang lo êm êm!! A pa a ang zâwk a ni ngei ang; mahse, a lawmawm reuh ka ti, a mitmeng lah kha a zahawm reuh bawk sia," a ti nghâl bawrh bawrh a, a ipte dawhkàna dah tùra ka tih chuan a dah zui ve nghâl mai a; mahse," Min zirtîr hmain naute saw ka'n be leh lawk aw," a ti leh rih a, ka nu leh Nonoi awmna lam chu a pan phei nghãl a.

Chhang ei tùr a rawn keng niin," Naute pawhin a duh ang," a ti deuh tlat a, Nonoi induhtîr nân a hmang thei hlauh zui a, a uang khawp mai. Chhang a hmuhtîr hma kha chuan pawm chu sawi loh, chibai pawh a inchibaitîr thei lo a nia. A han pawm lah chuan," A zãng reuh mang e! Au Ruatpui, chaw a ei țha duh lo em ni?" a ti zui a," I duat dâwn sia, chaw chu i pêk țhat viau ka ring ngawt a. E, tih dàn ka hria, ka lo kal apiangin chhang ka rawn keng ziah ang a, a ei a ei chuan a rit thuai mai ang tiraw?" a tih zawm leh a, țawngkaa chhâng lêm lovin ka lu ka bu nghat a, ka nuih sak bawk.

A ni khatna a ni bawk a, kan inzirtîr tam lêm lo khawp mai; mahse, bung thar kaipui ka ni chuang lo va, an zir tawh bunga a hriat thiam loh lai min zâwt a ni ber. A hre thiam thuai a, a han tih chhin pawhin a ti dik thei leh nghâl mai. A rilru hi a chak a, a ngaihtuah hi chuan a thiam thei tih pawh ka hria a ni.

A tûk tlaiah pawh chuan nimin lama chhang a rawn ken ang bawk kha a rawn keng leh a, tûn țum chu naute ei tùr a rawn keng tel ta bawk. "Nimin kha chuan ka hre chhuak lo rêng rêng a, ka mãwl tak tak a ni," a ti leh rih a, Nonoi pawm pah chuan," Ei tùr ka rawn kensak ziah tawh ang che," a ti zui leh zat a. Kei erawh chuan," A ngai lo, i pawisa a hek mai mai, chhang pawh hi rawn keng tawh suh aw, i ei tùr erawh chu lei tho la," ka lo ti a, ani erawh chuan," Uncle John-ate hian bakery dàwr an nei thar ve a, min rawn pe ve ziah a, kei tih loh mi dangin an ei peih chuang lo," a lo ti leh mai a.

Kan inzirtîr leh mawp mawp a, tih tùr ka pêk a tih malh malh lai chuan ka ngaihtuahna a vâk vêl ruai mai. Ka lo ngaihtuah thui lo va, tunah chuan a u ka zirtîr tel tawh lo va, amah chauh niin ani lah hian min rawn pan vang vang a, amah chauh a nih tâk avàng hian tuna kan inzirtîrna man hi pahnih an nih laia min pêk zâtve vêlah a chhuk dâwrh lo thei lo, pahnih ka zirtîr lai ang khân a hlâwk tawh dâwn lo; mahse, hei hi chu hre sa tùra ngaih ka ni. A, a hahthlâkin a buaithlâk hran chuang lo va, sum ka lâk luh ve hlek chuan a țha a ni mai.

"Naom, i nu number ka va duh, han biak lawk ka duh deuh a," a chawlh lai chuan ka ti a, min rawn en a, nuam lo ti rilru deuh hlek chung hian," Ka phone hi ka thlâk avàngin number ka neihho a bo deuh vek a, i nu number pawh kha bo zîngah a tel a," ka ti leh a.

"Eng atân nge i biak duh deuh? Âpa a biak theih mai zâwk em?" a tih chuan," A, biak theih tho e, thil țûl tak pawh a ni chuang lo," ka ti a, ani chuan," Chuti a nih chuan Âpa chu be zâwk mai la tiraw?" a ti leh a, a lehkhabu chu a melh ràn a. Chutah, rawn hawi chhuaka min rawn enin," Nupui pasal nei tawh, inrinawm lohsan hi eng nge i ngaih dàn?" a rawn ti teh daih a!!



*MI TU EMAWIN PAWIMAWH VE TAK NIH A DUHNA AȚANGIN HARSATNA TAM ZÂWK HI A LO THLENG ȚHÌN*