☆KA TÂNA RUAT☆ - 13 By Dingdi Pachuau
Ka ngawi vang vang phawt a, ani lah chuan mit khap hauh lo hian min en reng a, Chhana nèna kan chanchin kha a hre ve a ni ang a ka ti hial a ni; mahse, ka hrilh si lo va, ka ring chiah lo deuh bawk si.
"Thil țha lo tak a ni," ka ti ta ringawt a, ka chhànna chu a duh khawp em ka hre lo, min en leh deuh reng hnuah a lehkhabu lam en ta daihin," Nia, thil țha lo tak a ni," a ti nawn ve leh sap a, eng emaw hi a lehkhabuah chuan a ziak a ziak a.
A awm chhûng chuan chutiang lam chu a sawi chhuak leh tawh miah lo va, a haw dâwnah Nonoi chu chhaihin," Ka hawsan rih ang che aw, min lo ngai viau lo la, ka lo kal leh hunah chhang tui lutuk tak mai ka rawn ken ang che, a tui 'cial' viau ang. Țha deuhin lo awm la, chaw ei pûk pûk la, i lian thûr thûr mai ang," a ti a, a chhuak chu kan nufaa thlahin two-wheeler taxi-a an tlàn liam thleng chuan kan thlîr a, a țawng duh bawrh bawrh țhìn bawk a, a awm loh hi chuan a hriat viau, a reh nghâl ruai mai a ni.
Kan inhmuh ngai tawh loh hi ka ring ngai lo va, a dik chiah bawk. Mizoram hi a zau lo va, Aizâwlah kan awm ve ve a, kan la dam ve ve bawk a nih chuan inhmuh hun hi chu kan la nei dâwn tih ka ring a, ring mai pawh ni lovin ka hria. U Mama dàwr ațanga ka chhuah hnu lawkah min tâwk zâwng ngei maiin a rawn tlãn niin, ka lo en lêm lo va; mahse, hmuh loh theih loh leh en loh theih loh hian horn a rawn hmet a, ka phu chiang bawk nèn, kan inhmu chiang ta mah mah a ni. Hmuh tawh loh vang vang chu duh viau mah ila duh ang ngawtin thil a kal thei bîk lo tih a chiang, min tlàn pelh ka rin mai lai chuan motor parts an zawrhna dàwr kawtah chuan dingin min rawn ko zui zat a.
"I dam maw? Inhmuh a va khât ve!" a rawn tih chuan ka chhâng ang nge chhâng lo ang tih ka ngaihtuah phawt a, min betu han chhàn duh loh ngawt chu thil dik a ni ber lo tih hre chhuakin," Nia.. dam alawm," ka ti ringawt a.
"I ngaihawm hlê mai," tiin min rawn pan hnãi deuh hlek a, kei erawh chu amah hlat zâwngin ka lo tawlh ve hret thung. Chu chu a hmuh chuan a mitko sàn ãkin," Hlauhawm ka ni lo a nia, engtin mah ka ti dâwn lo che," a ti a, a kut pahnih chu a phar pah bawk. Za lo zeta nui lui sakin," A țha a nih chu," ka ti sap a, nuam ti lo ru takin ka hawi kual deuh a," Ka hmanhmawh deuh sia, ka kal tawh ang e," tiin, hawihhâwm thei ang bera thlahin ka kalsan zui ta nghâl a, ani pawh chuan min rawn be zui bîk lo, min en zui erawh ka ring khawp mai.
Ngaihtuah zui ka duh lo viau nain a hmêl ka hmu thut kha mak ka ti a, ka hmuh tum loh dàn deuh takin a lo chêr ta deuh bawk nèn, ka mitthlaah ka hmu zui rauh rauh a. A chanchin pakhat tê mah ka hre zui duh ta lo kha a ni a, engtin nge a awm tâk zêl tûn thleng hian ka hre lo. Biakdiki kha a rai zui ta zêl em tih leh an innei hial em tih pawh ka hre lo. Biakdiki kha a cousin chu a lo ni ngei a, inchhûng hnaih tak an nih pawh ka ring, a rai avàng khân an awm dàn ka hriat chhuah phah ta si a, inneih kan țhulh chhan pawh kha kha vàng kha a ni chiah rêng a, a hun lai khân ka rilru kha a nâin zàn ka mu thei lo va, eng thil mah ka ti hlei thei lo chu a nih kha. Ka tawn ang kha tawng ve ta ula, keimah ang tho kha in nih ve ka ring. Han ngaihtuah mah teh, i pasal tùra i thlan leh in inneih nî tùr pawh in tih fel vek tawh, i rin êm êm kha a cousin ni ngêia i hriat nèn lo mu dùnin lo rai ta se, engtin nge i awm ang?
Ka rilru kha a na ngawih ngawih a, ka zak êm êm a, țhenawm khawvêng, țhiante chu sawi loh, ka nu leh ka u hmêl ngei pawh kha ka hmu hreh hial a nih kha. Room-ah ka inkhung chawt a, thil thlengah khân eng nge tih sual ka neih aw tiin thil țûl miah lo ka ngaihtuah zan tin mai a nih kha. Ka zah êm êm rualin ka nu leh ka u ka khawngaih a, mi min sawinaah Chhana vàngin ka hming a ri tel ve lo thei si lo va, ka hming a rîk tel rualin anni pawh an ri tel zêl bawk si, keimah chauh kha chuan ni ila a zia deuh tùr, bo daih kha ka châk ngawih ngawih a nih kha.
Ka lo inngaihtuah nasa deuh a ni ang, ka inpal țawk a, ka tlu lo chauh a ni, ka kezungpui a na nghâl vawng vawng a, thil țúl lo tak ka ngaihtuah leh vàng vek. Inthing harhin ka piah dàwra thil lei tùr ka lei haw a, in ka thlen chuan ka nuin Nonoi a lo àwi mu deuh chiah bawk.
"Nichin deuh khân Peka nuin min rawn bia a, inentîra lo kal a tum a ni àwm e. A hman theih chuan min rawn tlawh lawk a tum bawk a, inhmuh lohna a rei ve ta bawk a, an ngaihawm riau ka ti," a lo ti dap dap a, ka thil lei dawhkàna dah pah chuan," Nia, an vaiin hmuh an châkawm vek ka ti. Chuan, a eng lai nge rawn inentîr a tum?" tiin ka zâwt a," A ke a thak a, a bawl nasa ni àwm a ni, a bân leh a hnungte pawh a bawl țan ni àwm tak a ni," ka nu chuan a lo ti leh a. Huan an sãm țhìn a, chuti a nih chuan vun ngeih loh zâwng tak hnim hnah leh thing hnai ațangin a kai palh a ni maithei a ni. Ni e, inentîr ran hi a țha, thil pawi zâwk a thlen hma ngei hian inentîr zung zung mai ila.
Pi Tei chu inentîr tùr chuan a rawn kal ta ngei a; mahse, a haw lehnghâl hman ta lo a ni. Kan inah chaw a rawn ei a, fanu ka lo nei dèr tawh tih a hmuh chuan mak a ti ngang mai; mahse, nu fel tak a ni a, thil min zâwt chîk duh miah lo. A tân thil țangkai tak a ni lo tih a hria pawh a ni mahna, Nonoi chu a bia a bia a, ani lahin mak tak maiin a lo nêl ve nghâl mai reuh a ni chêk ang chu, a bulah chuan a tawlh a tawlh mai a, a hmuh ngai loh a nèl nghâl thuai ngai loh tehlul nèn! Chaw ei khama hmun ka tih fel laiin ka nu nèn Nonoi chu an lo chhaih a, uang zet zeta a han zuang kual vêl chu an nuih dùn hak hak a, an thãwm chu nuam ti takin ka lo ngaithla ve reng a.
Ka intih fel hnuah thingpuite ka pêk fel hnuah chuan Pêkate unau chanchin chu ka zâwt ve a, ani pawh chuan min hrilh ve melh melh a. An nufa thil tawn leh kan nufa thil tawn hi a inang êm mai a, chu vàng tak chuan kan inhre thiamin kan inpawh zual ni pawh hian ka hre țhìn. Ka nu pawh hian nau ang tak takin a en niin ka hria, a tawn ang kha a rawn tawng ve si a, a harsatzia hre chiangtu a ni a, fuihna thu tam tak pawh a hrilh ngeiin ka ring.
Kan inah zàn a riak a, a tûkah a thisen en dikna result a chhuak dâwn miau si a, rawn kal nawn leh ai chuan riah mai kha a țhain a awlsam zâwk a ni. Tûkțhuan ei khamah muangchânga insiamin a chhuak a, a rawn lêt leh tawh àwm si lo va tiin Pekate unau ei tùr chhang ka siam tharlâm tak chu ka kentîr nghâl bawk. An tân tih theih kan nei tam lo, an pa hnên ațangin ngaihsakna dawng lo mah se ngaihsak an ni tih leh hmangaih an ni tih hi hria se ka duh, keini pawhin ngaihsaktu leh hmangaihtu kan mamawh êm țhin kha.
Zirtàwpni a ni a, zîng lamah ruah a tla sep a, boruak pawh a nuam viau; mahse, chaw ei khamah chuan ni a rawn sa ve leh mai a, chawhnu lamah erawh a rawn duai deuh a, chhûm pawh a rawn tam. Ni dang zawng aiin Naom-i a rawn kal hma a, Nonoi nèn an inchhaih nui leh hawr hawr mai. Thla khat a chuang ve ta bawk a, innêl tawh tak an ni, Nonoi hian a lo hmuh veleh a lo pan vat țhìn a, a lo chhaih hmasa ngei ngei hi a ni mai. Naom-i lah hian in hnuai lama chêngte ngaihtuah miah lo hian a'n ûm kual ta țhìn a, kan inhau zing viau rêng a ni, kan inhauhna erawhin zawm a hlawh lêm lo thung.
Kan inzirtîr lai chuan ruah mal a rawn tla ta phuar phuar a, ka nuin tukverh a khãr ta vat bawk. A rawn sûr zui ta buan buan a, tukin lama tla hlek kha chu a aitechhinna a lo ni. Sana ka en a, a lo la hma angreng, kan inzirtîr zawh hun, Naom-i haw hunah chuan a hàn ve mai ang chu maw.
Mahse, bàn zâi a rêl dâwn lo a ni ang tih tùrin ruah chu a sûr buan buan reng a, kan inzirtîr zawh hnu lamah pawh chuan a tlêm chuang lo, a hma aiin a tam sauh emaw tih tùrin kan in chung chu a ri ring sauh in ka hria! Tukverhte chu a rawn theh țhawt țhawt a, Naom-i chuan Nonoi pawmin pâwn lam chu a thlìrpui a, ruah sûr chu a hmuhnawm viau ta emaw tih tùr khawpin an thlîr uluk a. Hetiang chuan U Mama tân pawh rawn haw a buaithlâk ve khawp ang le, nihliap chu a nei ngei a; mahse, a rawn huh vek tho ngei ang.
"Chaw ka chhum kêp ang che aw, i haw thei àwm chuang si lo va," tia ring taka ka biak chuan a lu a lo thing a," A ngai lo, Âpain min rawn lam mai ang, tunah pawh hian min ngaihtuah tawh dâwn lutuk!" a tih chuan," A tân rawn kal pawh a buaithlâk ang, a sûr tam êm mai. Chaw i ei ang a, chaw ei kham lamah te chuan ruah sûr pawhin zia awm lam a pan tawh ang a," ka ti ve leh a; mahse, a lu a thing tlat tho.
Ruah a sùr nasat avàng chuan boruak a váwt sûk mai a, Nonoi pawh chuan vâwt a ti a ni ang, min rawn pan a, ka paw lum zui ta daih a. Ka nuin thingpui min rawn pe a," A váwt sûk sia, in in lum r'u," a tih chuan Naom-i chuan," Vâwt pawh ka lo ti vak hlei nem, thisen ka ngah deuh a ni ang," nui chung hian a ti a.
Thingpui kan in țan tihah chuan," Hei, en la, min rawn lam mai ang ka tih kha, fanu rangkachak ve tho kha ka nia," nui hak hak chunga tiin a phone-a message chu min han hmuh a, a pain a rawn hruai dâwn thu a rawn hrilhna a lo ni. Mak pawh ka ti hran lo, a fanu chu a duat tih ka hria a, tûn ang khuaah Scooty-a chuan a tihchi loh, a rawn hruai mai loh chuan a haw thei dâwn lo tih pawh hre chiang bertu a ni ngei ang chu.
Rei a rawn thang lo, kawta motor ding ri erawh kan hre miah lo va, kawng rawn kik ri pawh kan hre chuang lo; mahse, Naom-i a rawn message a, veranda-a a din tawh thu a rawn hrilh chuan kawng chu a va hawnsak ta vat a, ruah a sûr tam bawk a, a pheikhawk a rawn huh hman tho a, a kawr pawh a huh deuh hlek tho bawk.
Min rawn en a, nau ka lo paw ût si a, mak a ti ve a ni ang, min en deuh reng a. Biak tuma ka àn zuau laiin ka nuin min rawn țawng khalh a, ruah sûr nèn, țawng a ring țha duh khawp mai. Thingpui in tùra a tih chuan a lo hnial a, ding ùl chunga ina Joel-a a rawn kalsan thu leh haw thuai a țhat zâwk thu a sawi chuan ka nu pawh chuan," A nih tak chu, in lam i ngaihtuah bawk si a. Ni e, haw mai teh u, a sûr nasa si a, muangchâng leh fîmkhur takin in tlãn dâwn nia," a ti ta zâwk a, kei erawh chu ka lo ngawi reng tawp; mahse, an chhuah dâwn chuan," Chaw ei tui u, fîmkhur takin," ti chuan ka thlah ve hrãm.
U Mama pawh a kâwng achin hnuai lam huh vekin a rawn haw a," Ka rawn haw hma mai, ruah a sûr duh si a, tu mah an rawn kal thei chuang lo ang," a ti a, ka nu chuan," A pawi lo, i rawn haw har mah mah a, a vâwt dâwn si. Kan lo ngaihtuah viau tawh che a," tiin a lo hnèm vat a, a thuamhnaw huhte a inthlâk hnuah chaw ei kan siam zui ta nghâl a.
Pathianni chawhnuah hma deuh takah Chhani a rawn lêng a, Nonoi lawm tùr eng eng emaw a rawn kensak rualin a ei tùr pawh a rawn hmaih lo. A chhaih nui uar uar phawt a, nuam an la ti viau, a mut hun a suakbàk avàngin a tlei reiin ka ring lo sa a, ka ring dik chiah bawk. Chhani'n puak a han tum chuan a duh lo nasa mai a, an intițê ruai ruai mai. Ka pua a, rei lo te hnuah a muhìl zui ta nghâl mai a, Chhani lah chuan," Ka paw châk emaw te a la ti zui a, a nu hah ka chháwk theih ka beisei vàng mai mai, ka puak duh lo na nâ nâ chu ka paw lo tawp ang! Ngawi tak rawh, ka fanu ka puak ve hun a lo la thleng thuai ang," a ti zui hmarh hmarh a, ka nuih zui nasa.
Thingpui kan in zawh hnuah U Mama leh Manuni an rawn inzui lût a, a rawn phûl lût hlut zui a. Chhani chuan," Thingpui in ve nghâl r'u aw? Ka lo siam ang," a lo ti vat a, Manuni chuan," A ngai lo ang, nakin deuhah duh leh kan lo insiam zâwk mai ang, siam buai lo mai rawh," a lo ti a, U Mama pawh chuan," Nia, kan inna a la rei vak lo va, kan châk lo rih ni mai teh se," a lo ti ve a.
Mama room luh hlàn chuan," Inzawh àwm a ni em chu ka hre lo va, Ruatpui, i puak lai kha i fa em ni? Pasal i nei lo niin ka hre si a," a rawn ti sar sar a, nui deuh chung hian," Pasal nei lo pawhin fa chu a neih theih tho alawm, ni lo'm ni?" ka lo tih chuan," Ni ve leh tho mai," a ti ve mai bawk a. Chhani chu lo inrawlhin," A fanu lah hian a han chhùn lo lailêng khawp a, keini ang âk zát hnih pawh tluk pha lo phei hi chuan a fa a ni thei lo ang kan ti hial ang chu," a lo ti ve a, a nui sûng bawk a.
"Inngaitlâwm chapo!" ka lo ti hlak a, ani lah chuan," Eng nge, a ni reng alawm. A pa lah hian a rawn ngaihsak si lo, ka ngei a nia. Mipa ve si, fa siam chauh thiam, ngaihsak chhunzawm tum lo hi chu mipa nêp ber an ni ka ti lo thei lo," uar zet hian a lo ti leh a, Chhana ka hre chhuak ram ram mai. Ani khân Biakdiki nèna an fa kha a ngaihsak em? A pa a nihna angin pa mawhphurhna a la ngam em? Mipa nêp tak anga a awm chhunzawm loh beisei ang, khawvêlah fahrah kan tam tawh êm hi.
Kan pahniha kan awm hnuah Chhani chuan," Chhanluliana ka hmu a, nimin khân. I chanchin min zâwt ve ngawt a, ka chilh nek kha, i chanchin eng mah phei chu ka hrilh law, mipa nêp tak anga awm a tum lai khân ka zilh teh êrh kha a nia, ka thu sawi vàng a nih kher chu ka ring chuang lo va. An innei ve ngei a; mahse, rei an awm dùn thei ta chuang lo a lo nih kha, an ințhen thu min hrilh a," tiin Chhana chanchin chu a sawi sep sep a.
*HMANGAIHNA HI A MAWI A, A HLÛ KAN TI ȚHÌN; MAHSE, THIL HLAUHAWM TAK CHU A DER NGE A TAK TIH I HRIAT LOHNA TAK KHA A NI*
Ka ngawi vang vang phawt a, ani lah chuan mit khap hauh lo hian min en reng a, Chhana nèna kan chanchin kha a hre ve a ni ang a ka ti hial a ni; mahse, ka hrilh si lo va, ka ring chiah lo deuh bawk si.
"Thil țha lo tak a ni," ka ti ta ringawt a, ka chhànna chu a duh khawp em ka hre lo, min en leh deuh reng hnuah a lehkhabu lam en ta daihin," Nia, thil țha lo tak a ni," a ti nawn ve leh sap a, eng emaw hi a lehkhabuah chuan a ziak a ziak a.
A awm chhûng chuan chutiang lam chu a sawi chhuak leh tawh miah lo va, a haw dâwnah Nonoi chu chhaihin," Ka hawsan rih ang che aw, min lo ngai viau lo la, ka lo kal leh hunah chhang tui lutuk tak mai ka rawn ken ang che, a tui 'cial' viau ang. Țha deuhin lo awm la, chaw ei pûk pûk la, i lian thûr thûr mai ang," a ti a, a chhuak chu kan nufaa thlahin two-wheeler taxi-a an tlàn liam thleng chuan kan thlîr a, a țawng duh bawrh bawrh țhìn bawk a, a awm loh hi chuan a hriat viau, a reh nghâl ruai mai a ni.
Kan inhmuh ngai tawh loh hi ka ring ngai lo va, a dik chiah bawk. Mizoram hi a zau lo va, Aizâwlah kan awm ve ve a, kan la dam ve ve bawk a nih chuan inhmuh hun hi chu kan la nei dâwn tih ka ring a, ring mai pawh ni lovin ka hria. U Mama dàwr ațanga ka chhuah hnu lawkah min tâwk zâwng ngei maiin a rawn tlãn niin, ka lo en lêm lo va; mahse, hmuh loh theih loh leh en loh theih loh hian horn a rawn hmet a, ka phu chiang bawk nèn, kan inhmu chiang ta mah mah a ni. Hmuh tawh loh vang vang chu duh viau mah ila duh ang ngawtin thil a kal thei bîk lo tih a chiang, min tlàn pelh ka rin mai lai chuan motor parts an zawrhna dàwr kawtah chuan dingin min rawn ko zui zat a.
"I dam maw? Inhmuh a va khât ve!" a rawn tih chuan ka chhâng ang nge chhâng lo ang tih ka ngaihtuah phawt a, min betu han chhàn duh loh ngawt chu thil dik a ni ber lo tih hre chhuakin," Nia.. dam alawm," ka ti ringawt a.
"I ngaihawm hlê mai," tiin min rawn pan hnãi deuh hlek a, kei erawh chu amah hlat zâwngin ka lo tawlh ve hret thung. Chu chu a hmuh chuan a mitko sàn ãkin," Hlauhawm ka ni lo a nia, engtin mah ka ti dâwn lo che," a ti a, a kut pahnih chu a phar pah bawk. Za lo zeta nui lui sakin," A țha a nih chu," ka ti sap a, nuam ti lo ru takin ka hawi kual deuh a," Ka hmanhmawh deuh sia, ka kal tawh ang e," tiin, hawihhâwm thei ang bera thlahin ka kalsan zui ta nghâl a, ani pawh chuan min rawn be zui bîk lo, min en zui erawh ka ring khawp mai.
Ngaihtuah zui ka duh lo viau nain a hmêl ka hmu thut kha mak ka ti a, ka hmuh tum loh dàn deuh takin a lo chêr ta deuh bawk nèn, ka mitthlaah ka hmu zui rauh rauh a. A chanchin pakhat tê mah ka hre zui duh ta lo kha a ni a, engtin nge a awm tâk zêl tûn thleng hian ka hre lo. Biakdiki kha a rai zui ta zêl em tih leh an innei hial em tih pawh ka hre lo. Biakdiki kha a cousin chu a lo ni ngei a, inchhûng hnaih tak an nih pawh ka ring, a rai avàng khân an awm dàn ka hriat chhuah phah ta si a, inneih kan țhulh chhan pawh kha kha vàng kha a ni chiah rêng a, a hun lai khân ka rilru kha a nâin zàn ka mu thei lo va, eng thil mah ka ti hlei thei lo chu a nih kha. Ka tawn ang kha tawng ve ta ula, keimah ang tho kha in nih ve ka ring. Han ngaihtuah mah teh, i pasal tùra i thlan leh in inneih nî tùr pawh in tih fel vek tawh, i rin êm êm kha a cousin ni ngêia i hriat nèn lo mu dùnin lo rai ta se, engtin nge i awm ang?
Ka rilru kha a na ngawih ngawih a, ka zak êm êm a, țhenawm khawvêng, țhiante chu sawi loh, ka nu leh ka u hmêl ngei pawh kha ka hmu hreh hial a nih kha. Room-ah ka inkhung chawt a, thil thlengah khân eng nge tih sual ka neih aw tiin thil țûl miah lo ka ngaihtuah zan tin mai a nih kha. Ka zah êm êm rualin ka nu leh ka u ka khawngaih a, mi min sawinaah Chhana vàngin ka hming a ri tel ve lo thei si lo va, ka hming a rîk tel rualin anni pawh an ri tel zêl bawk si, keimah chauh kha chuan ni ila a zia deuh tùr, bo daih kha ka châk ngawih ngawih a nih kha.
Ka lo inngaihtuah nasa deuh a ni ang, ka inpal țawk a, ka tlu lo chauh a ni, ka kezungpui a na nghâl vawng vawng a, thil țúl lo tak ka ngaihtuah leh vàng vek. Inthing harhin ka piah dàwra thil lei tùr ka lei haw a, in ka thlen chuan ka nuin Nonoi a lo àwi mu deuh chiah bawk.
"Nichin deuh khân Peka nuin min rawn bia a, inentîra lo kal a tum a ni àwm e. A hman theih chuan min rawn tlawh lawk a tum bawk a, inhmuh lohna a rei ve ta bawk a, an ngaihawm riau ka ti," a lo ti dap dap a, ka thil lei dawhkàna dah pah chuan," Nia, an vaiin hmuh an châkawm vek ka ti. Chuan, a eng lai nge rawn inentîr a tum?" tiin ka zâwt a," A ke a thak a, a bawl nasa ni àwm a ni, a bân leh a hnungte pawh a bawl țan ni àwm tak a ni," ka nu chuan a lo ti leh a. Huan an sãm țhìn a, chuti a nih chuan vun ngeih loh zâwng tak hnim hnah leh thing hnai ațangin a kai palh a ni maithei a ni. Ni e, inentîr ran hi a țha, thil pawi zâwk a thlen hma ngei hian inentîr zung zung mai ila.
Pi Tei chu inentîr tùr chuan a rawn kal ta ngei a; mahse, a haw lehnghâl hman ta lo a ni. Kan inah chaw a rawn ei a, fanu ka lo nei dèr tawh tih a hmuh chuan mak a ti ngang mai; mahse, nu fel tak a ni a, thil min zâwt chîk duh miah lo. A tân thil țangkai tak a ni lo tih a hria pawh a ni mahna, Nonoi chu a bia a bia a, ani lahin mak tak maiin a lo nêl ve nghâl mai reuh a ni chêk ang chu, a bulah chuan a tawlh a tawlh mai a, a hmuh ngai loh a nèl nghâl thuai ngai loh tehlul nèn! Chaw ei khama hmun ka tih fel laiin ka nu nèn Nonoi chu an lo chhaih a, uang zet zeta a han zuang kual vêl chu an nuih dùn hak hak a, an thãwm chu nuam ti takin ka lo ngaithla ve reng a.
Ka intih fel hnuah thingpuite ka pêk fel hnuah chuan Pêkate unau chanchin chu ka zâwt ve a, ani pawh chuan min hrilh ve melh melh a. An nufa thil tawn leh kan nufa thil tawn hi a inang êm mai a, chu vàng tak chuan kan inhre thiamin kan inpawh zual ni pawh hian ka hre țhìn. Ka nu pawh hian nau ang tak takin a en niin ka hria, a tawn ang kha a rawn tawng ve si a, a harsatzia hre chiangtu a ni a, fuihna thu tam tak pawh a hrilh ngeiin ka ring.
Kan inah zàn a riak a, a tûkah a thisen en dikna result a chhuak dâwn miau si a, rawn kal nawn leh ai chuan riah mai kha a țhain a awlsam zâwk a ni. Tûkțhuan ei khamah muangchânga insiamin a chhuak a, a rawn lêt leh tawh àwm si lo va tiin Pekate unau ei tùr chhang ka siam tharlâm tak chu ka kentîr nghâl bawk. An tân tih theih kan nei tam lo, an pa hnên ațangin ngaihsakna dawng lo mah se ngaihsak an ni tih leh hmangaih an ni tih hi hria se ka duh, keini pawhin ngaihsaktu leh hmangaihtu kan mamawh êm țhin kha.
Zirtàwpni a ni a, zîng lamah ruah a tla sep a, boruak pawh a nuam viau; mahse, chaw ei khamah chuan ni a rawn sa ve leh mai a, chawhnu lamah erawh a rawn duai deuh a, chhûm pawh a rawn tam. Ni dang zawng aiin Naom-i a rawn kal hma a, Nonoi nèn an inchhaih nui leh hawr hawr mai. Thla khat a chuang ve ta bawk a, innêl tawh tak an ni, Nonoi hian a lo hmuh veleh a lo pan vat țhìn a, a lo chhaih hmasa ngei ngei hi a ni mai. Naom-i lah hian in hnuai lama chêngte ngaihtuah miah lo hian a'n ûm kual ta țhìn a, kan inhau zing viau rêng a ni, kan inhauhna erawhin zawm a hlawh lêm lo thung.
Kan inzirtîr lai chuan ruah mal a rawn tla ta phuar phuar a, ka nuin tukverh a khãr ta vat bawk. A rawn sûr zui ta buan buan a, tukin lama tla hlek kha chu a aitechhinna a lo ni. Sana ka en a, a lo la hma angreng, kan inzirtîr zawh hun, Naom-i haw hunah chuan a hàn ve mai ang chu maw.
Mahse, bàn zâi a rêl dâwn lo a ni ang tih tùrin ruah chu a sûr buan buan reng a, kan inzirtîr zawh hnu lamah pawh chuan a tlêm chuang lo, a hma aiin a tam sauh emaw tih tùrin kan in chung chu a ri ring sauh in ka hria! Tukverhte chu a rawn theh țhawt țhawt a, Naom-i chuan Nonoi pawmin pâwn lam chu a thlìrpui a, ruah sûr chu a hmuhnawm viau ta emaw tih tùr khawpin an thlîr uluk a. Hetiang chuan U Mama tân pawh rawn haw a buaithlâk ve khawp ang le, nihliap chu a nei ngei a; mahse, a rawn huh vek tho ngei ang.
"Chaw ka chhum kêp ang che aw, i haw thei àwm chuang si lo va," tia ring taka ka biak chuan a lu a lo thing a," A ngai lo, Âpain min rawn lam mai ang, tunah pawh hian min ngaihtuah tawh dâwn lutuk!" a tih chuan," A tân rawn kal pawh a buaithlâk ang, a sûr tam êm mai. Chaw i ei ang a, chaw ei kham lamah te chuan ruah sûr pawhin zia awm lam a pan tawh ang a," ka ti ve leh a; mahse, a lu a thing tlat tho.
Ruah a sùr nasat avàng chuan boruak a váwt sûk mai a, Nonoi pawh chuan vâwt a ti a ni ang, min rawn pan a, ka paw lum zui ta daih a. Ka nuin thingpui min rawn pe a," A váwt sûk sia, in in lum r'u," a tih chuan Naom-i chuan," Vâwt pawh ka lo ti vak hlei nem, thisen ka ngah deuh a ni ang," nui chung hian a ti a.
Thingpui kan in țan tihah chuan," Hei, en la, min rawn lam mai ang ka tih kha, fanu rangkachak ve tho kha ka nia," nui hak hak chunga tiin a phone-a message chu min han hmuh a, a pain a rawn hruai dâwn thu a rawn hrilhna a lo ni. Mak pawh ka ti hran lo, a fanu chu a duat tih ka hria a, tûn ang khuaah Scooty-a chuan a tihchi loh, a rawn hruai mai loh chuan a haw thei dâwn lo tih pawh hre chiang bertu a ni ngei ang chu.
Rei a rawn thang lo, kawta motor ding ri erawh kan hre miah lo va, kawng rawn kik ri pawh kan hre chuang lo; mahse, Naom-i a rawn message a, veranda-a a din tawh thu a rawn hrilh chuan kawng chu a va hawnsak ta vat a, ruah a sûr tam bawk a, a pheikhawk a rawn huh hman tho a, a kawr pawh a huh deuh hlek tho bawk.
Min rawn en a, nau ka lo paw ût si a, mak a ti ve a ni ang, min en deuh reng a. Biak tuma ka àn zuau laiin ka nuin min rawn țawng khalh a, ruah sûr nèn, țawng a ring țha duh khawp mai. Thingpui in tùra a tih chuan a lo hnial a, ding ùl chunga ina Joel-a a rawn kalsan thu leh haw thuai a țhat zâwk thu a sawi chuan ka nu pawh chuan," A nih tak chu, in lam i ngaihtuah bawk si a. Ni e, haw mai teh u, a sûr nasa si a, muangchâng leh fîmkhur takin in tlãn dâwn nia," a ti ta zâwk a, kei erawh chu ka lo ngawi reng tawp; mahse, an chhuah dâwn chuan," Chaw ei tui u, fîmkhur takin," ti chuan ka thlah ve hrãm.
U Mama pawh a kâwng achin hnuai lam huh vekin a rawn haw a," Ka rawn haw hma mai, ruah a sûr duh si a, tu mah an rawn kal thei chuang lo ang," a ti a, ka nu chuan," A pawi lo, i rawn haw har mah mah a, a vâwt dâwn si. Kan lo ngaihtuah viau tawh che a," tiin a lo hnèm vat a, a thuamhnaw huhte a inthlâk hnuah chaw ei kan siam zui ta nghâl a.
Pathianni chawhnuah hma deuh takah Chhani a rawn lêng a, Nonoi lawm tùr eng eng emaw a rawn kensak rualin a ei tùr pawh a rawn hmaih lo. A chhaih nui uar uar phawt a, nuam an la ti viau, a mut hun a suakbàk avàngin a tlei reiin ka ring lo sa a, ka ring dik chiah bawk. Chhani'n puak a han tum chuan a duh lo nasa mai a, an intițê ruai ruai mai. Ka pua a, rei lo te hnuah a muhìl zui ta nghâl mai a, Chhani lah chuan," Ka paw châk emaw te a la ti zui a, a nu hah ka chháwk theih ka beisei vàng mai mai, ka puak duh lo na nâ nâ chu ka paw lo tawp ang! Ngawi tak rawh, ka fanu ka puak ve hun a lo la thleng thuai ang," a ti zui hmarh hmarh a, ka nuih zui nasa.
Thingpui kan in zawh hnuah U Mama leh Manuni an rawn inzui lût a, a rawn phûl lût hlut zui a. Chhani chuan," Thingpui in ve nghâl r'u aw? Ka lo siam ang," a lo ti vat a, Manuni chuan," A ngai lo ang, nakin deuhah duh leh kan lo insiam zâwk mai ang, siam buai lo mai rawh," a lo ti a, U Mama pawh chuan," Nia, kan inna a la rei vak lo va, kan châk lo rih ni mai teh se," a lo ti ve a.
Mama room luh hlàn chuan," Inzawh àwm a ni em chu ka hre lo va, Ruatpui, i puak lai kha i fa em ni? Pasal i nei lo niin ka hre si a," a rawn ti sar sar a, nui deuh chung hian," Pasal nei lo pawhin fa chu a neih theih tho alawm, ni lo'm ni?" ka lo tih chuan," Ni ve leh tho mai," a ti ve mai bawk a. Chhani chu lo inrawlhin," A fanu lah hian a han chhùn lo lailêng khawp a, keini ang âk zát hnih pawh tluk pha lo phei hi chuan a fa a ni thei lo ang kan ti hial ang chu," a lo ti ve a, a nui sûng bawk a.
"Inngaitlâwm chapo!" ka lo ti hlak a, ani lah chuan," Eng nge, a ni reng alawm. A pa lah hian a rawn ngaihsak si lo, ka ngei a nia. Mipa ve si, fa siam chauh thiam, ngaihsak chhunzawm tum lo hi chu mipa nêp ber an ni ka ti lo thei lo," uar zet hian a lo ti leh a, Chhana ka hre chhuak ram ram mai. Ani khân Biakdiki nèna an fa kha a ngaihsak em? A pa a nihna angin pa mawhphurhna a la ngam em? Mipa nêp tak anga a awm chhunzawm loh beisei ang, khawvêlah fahrah kan tam tawh êm hi.
Kan pahniha kan awm hnuah Chhani chuan," Chhanluliana ka hmu a, nimin khân. I chanchin min zâwt ve ngawt a, ka chilh nek kha, i chanchin eng mah phei chu ka hrilh law, mipa nêp tak anga awm a tum lai khân ka zilh teh êrh kha a nia, ka thu sawi vàng a nih kher chu ka ring chuang lo va. An innei ve ngei a; mahse, rei an awm dùn thei ta chuang lo a lo nih kha, an ințhen thu min hrilh a," tiin Chhana chanchin chu a sawi sep sep a.
*HMANGAIHNA HI A MAWI A, A HLÛ KAN TI ȚHÌN; MAHSE, THIL HLAUHAWM TAK CHU A DER NGE A TAK TIH I HRIAT LOHNA TAK KHA A NI*
Comments
Post a Comment