☆KA TÂNA RUAT☆ - 14 By Dingdi Pachuau
An lo innei a nih chu. A fa kha a pai miau a, mipa a nih chuan a mawhphurhna kha a hlen ngêi tùr a ni tlat a ni, hemi kawngah kher hi chuan a tih tùr dik tak a ti ve tlat, mipa chu a lo ni ngei e. Fa pawh kha tluang takin an nei ngei bawkin ka ring a, Nonoi aiin a upa zâwk lehnghâl a, a lian ve tawh ngawt ang; mahse, a nu leh pate an ințhen leh ta si a, fahrah nun a rawn tem chho ve dâwn ta a ni. He thil hi ka va haw tak!! Ka huat avànga bo hmak thei ni se, khawvêl ata hi a hming mai ni lo, a rim arã hriat tùr pawh a awm tawh lo hial ang maw le!
"A nu leh pa ngei viau mah ila han ngaihtuah cheuh cheuh hi chuan an fa a khawngaihthlâk ka ti, nu leh pa kâr lovah a rawn sei lian dâwn tihna a ni si a," ka ngaihtuahna hria ni àwm tak hian a rawn ti leh a, ka lo bu nghat mai. Nu leh pa kâr lova sei lian dinhmun ka hriat chian êm avàngin khawngaihthlâk ka ti ve tho, chutiangin Nonoi pawh. A mak ngawt mai, engati nge hetiang thil hian min hual vêl tlat mai le?
Kan ngawih vang vang hnuah, "Nonoi pa kha i hre chiang em kha?" a rawn ti thut mai a, chháng mai lovin ka en hrâ ringawt phawt, a țawng ring chuang miah lo nain mi dangin a thil min zawh chu an lo hre mai ang tih ka hlau pawh a ni mahna, hetia hlauhthàwnna rilru ka put thut tâk ni.
"Hre chiang nâng!"
A thaw hak a," Ni khân ka hre deuh rêng a! A nih leh.." tiin min rawn hnaih deuh a, a hma aia zàwi hian," A nih, a nu kha? A thî i ti em ni kha?" a ti leh a, kei erawh chuan," A nu alawm ka nih, ka fanu a nih hi," ka lo ti ve thung a.
"Ni tho e, a nu i ni lo ka ti lo che. A nu i ni, ka hria. Amah hringtu kha a nia ka sawi chu," a rawn ti leh a, ka chhàn hmain ka hawi kual tê tê phawt. U Mamate kan bulah awm lo mah se an awmna ațangin kan țawng chu an rawn hre pha ang tih ka hlau, he thil hi sawi nawn ka duh ngai lo ang.
"Aw, a hringtu chu boral tawh e. Ka hrilh tawh che kha, a hrisêl lo va, rilru hah leh hrehawm rêng rênga nau pai chho a ni bawk nèn, a taksain a tuar lo thei lo va. Bâkah, tualchhûngah buaina a lo awm lehzêl a, inkahna hial a thlen kha, vànduai berah țangin thihna hial a chungah a thleng ta a ni. A nu kalsan naute chu ka fa tùr liau liaua Pathian min pêk ka ti lo thei lo, a nu ka ni a, ka fanu a ni bawk, hei hi thil danglam ngai lo tùr chu a ni," ka ti dap dap a, ka țawng chu a zàwi khawp a, ka hrilha pawhin a hre thei chang chang chauhin ka ring.
"Phone-a min rawn hrilh țum khân mak kha ka ti khawp a, i thei chiah dâwn em ni aw ka lo ti rilru nghe nghe; mahse, hei i hrin a ni lo tih hriat loh tùr khawpa țhain i enkawl thei a, ka chhuang lutuk che. Kei chuan ka thei ve miah lo ang tih ka hria, amah lah hi heti zawng hi a ni ve a, ngo bawk si lo, a sèn têt deuh lai phei kha chu a..." a tih chuan," Lalchhan!!" ka lo ti țhat a, rum deuh hian ka melh bawk.
A lo nui hawk a, a kut pharin," Ka tih palh! Ka tlâwm, ka sawi tawh lo ang," a ti vat a, chutah,"I fanu hi chu i țan ve teh mang e tiraw? I beng hriatah sawisèl chhin theih pawh a ni lo, a vànduai vànnei ve ngawt mai, nang kher a lo tawng che hi chu naute vànnei ber a lo ni!" a ti leh nang nang a.
Ni e, a vànnei pawh chu a lo ni ang, kei pawh ka vànnei ve tho. Ka la tem chhin ngai loh hlimna min thlentu a ni a, amah vànga ka buaina leh hahnate kha, ni e, a buchip zual lai phei kha chuan ka hah alawm, ka taksa mai ni lovin ka rilru thlengin a hah a nih kha; mahse, thil dang ngaihtuah hman lêk lovin ka rilru a la pêng a, kha tak kha ka tân a lo țha si. Chhana ngaihtuah hman miah lovin min siam a, ka hah viau nia ka hriat lai pawh khân mak takin a tân chak takin ka awm thei zêl a nih kha. Kei bâk enkawltu nu a nei lo tih hre rànin khawngaihna nèn ka theihtâwp chhuahin ka enkawl chho a, khawngaihna ațangin hmangaihna, tûnah phei hi chuan a tel lovin ka awm thei tawh lo ang ti ila a dik ang, min tihlim bertu a ni ka tih tawh kha, tûn dinhmun hi kan lo thleng chho ve ta a ni. Kan chanchin hi tu vak ka hrilh lo, Manipur-a ka zu awmnate chhûng, ka nu leh U Mama leh Chhani bâk hian Nonoi hi ka hrin a ni lo tih pawh an hre kher lo ang, kei hi chuan hrin hah kher ngai lova Pathianin fa min peah ka ngai hmiah. A lo len deuh hun ka nghahhlelh viau rualin Mizote hi chu thil sawi kan peih si a, kan lo inchhùn lo ve viau bawk si nèn... a, he lam hi chu ngaihtuah rih lo ang, sáwtna awm lo thil țangkai lo ngaihtuah hi ka sim hmak a hun tawh.
Hun a ral a, zanriah kîl laia U Mama'n Scooty lei ve mai tawh a duh thu leh chhûngkua pawhin a mamawh tawh nia a hriat thu a sawi chuan ka lo bu nghat a, ka nu pawh chuan," E, sum thawk chhuak berin mamawh nia i hriat chuan lei mai tùr, lei i ti har ka lo ti viau tawh zâwk asin," a lo ti ve bawk a, naktûk lama a va ngaihven tùr thu a sawi chuan nuam ka lo ti veng veng mai, a thawh chhuah ngeiin a lei ve thei dâwn chu a ni si a, Scooty thar kan nei ve ngei dâwn ta e.
A tûk tlaiah chuan Scooty vâr ngei mai chu a rawn la ve ta ngei a, Scooty-ah chuan a vâr hi mawi ka tih ber a ni a, hei pawh hi a mawi zek zawk viau, kan tân chuan thil thar làwmawm tak a ni bawk a, kan hlim chhûngkua ngei mai. Chhani ka hrilh ve vat a, ani pawh a rawn lang zui nghâl zat nghe nghe, zanriah ei tùrin ka nuin a sâwm ve nghâl a, ani pawhin a hnial lo. Chaw ei hmain ka nuin Pathian hnênah Scooty thar chu hlànin làwm thu sawia a țawngțai hnuah chaw ei kan siam zui ta nghâl a.
Chaw ei lai chuan," U Mama chu, Manuni i phur zing àwm mang e! I chhûngteho zawng zawng ai hian a chuang zing ber tak tak ang!" tiin Chhani chuan U Mama chu a fiam lehpek a, ka nu chu a lo nui nghâl hak hak a, U Mama ve thung chuan," Phurh pawh phur ve ang chu, mi pawimawh a ni miau a, nang pawh ka tân mi pawimawh ni ta ang la, ka phur zing viau ang che," a lo ti a, a nui duh miah lo lehnghâl. Chhani chu ka en a, a lo nui ve sûng a, min rawn melh zohin," A tenawm vêl e! A țawng thei zawt zawt bawk si," a ti sap a, ka lo nui ve hak mai.
"U Mama tân mi pawimawh lo ni ta hlauh la chuan e, kan scooty-a i chuan zin dâwn mai bâkah kan in pawh hi i tã vek tùr a ni dâwn a nia, i nihlawh dâwn lutuk! Kan mo i ni dâwn a nia, keini lah kan fel dâwn si, sawi pawh kan sawisêl ngai dâwn lo che, nuam i ti ngawt ang!" ka ti ve duah a, ka nu pawh chuan," Ni chiah e," a lo ti ve vat bawk. Ani lah chu a lo dang titih ve tehrêng em maw ni, a ngawi kur a, min en kual ruk ruk ringawt.
"Manuni hi ka țhen ang a, lo lút mai la, chuan, Scooty-ah ka phur zing viau ang che," U Mama'n a rawn tih leh tâkah phei chuan," Nangni chhûngkua hi in ninawm lutuk! In țang rual țhâm zui a," a ti a, a hmêl lan dàn nuihzatthlâk tak avàng chuan tu mah insûm thei awm lovin kan nui chhuak ta vek a, chaw ei lai mah ni se kan insûm thei hlawl lo a ni ber.
Inrinnia dàwr ka kal dâwn chuan Nonoi ka hruai ve a, ka nuin a lo awm hman tlat lo. Kal chak thei lo chuan muangchângin kan kal a, puak hi a duh lo ve țhìn a, páwna chhuah hi chuan amaha kal hi a tum ve tlat țhìn.
Dàwrah rin loh deuhin Manuni a lo țhu ve leh a, U Mama'n Nonoi a lo hmuh veleh ko vatin a pawm zui zat bawk. A duat ve bawk a, a dàwrah ka kalpui khât ve bawk nèn, a Pu Puia bulah chuan a thil duh a kâwk kual nasa mai.
"I lo awm ve reng a?" tiin Manuni chu ka bia a, ani pawh chuan," Nia, sawti laiah sâwn ka kal lawk a, a remchâng êm a, ka awm ta rih a nih hi," a lo ti ve a, Nonoi leh U Mama inpawm chu a en vang vang a, a rilrua a ngaihtuah tùr àwm ang chu ka lo ngaihtuah ve a, U Mama nèna an inneih huna fa an neih huna U Mama pawm dàn tùr vêl a suangtuah a ni ngei ang chu. Ka nui sak a, kei hi ka lo ngaihtuah thui deuh mah mah chu a ni; mahse, an induh chuan innei ngei se chu ka ti, U Mama hian bialnu a nei ngai bík si lo va, an ințhen hlauh chuan a nei har leh tawh àwm êm mai.
Rei awm lovin kan nufa chuan kan haw leh thuai a, pawm a duh miau loh avàngin kan kal chak thei lo va, a châng lahin a ding tlat bawk a, kan kal rei dùn viau a ni. In kan thlen hma deuh hlek chuan kan in kawta bike ding chu ka zu hmu thei a, tu bike nge tih ngaihtuah ngai lovin a neitu pawh a lo la chuang nghe nghe. Ka ding deuh chat a, Nonoi pawh a ding ve nghâl dat, ka kài miau si a.
Eng nge maw a rawn tih dâwn ni? Min hmuh tumin a rawn kal a ni ngêi àwm si a, chuti ni lo se kan in kawta din thu a awm lo. Inah ka nu a awm ve dâwn si lo va, țhenawm hnai leh hmêl hriatte'n min hmuh dun phei chuan... ka duh lo, kan chanchin an hre vek bawk si, haw thleng rih lovin khawiah emaw thên kual rih ila a țha zâwkin ka ring; mahse, ka hminga min ko ri ka hriat tâkah chuan ka hawi vat a, kawmthlangnu a lo ni a, dàwrah a kal ve a ni ngei ang. Chhàn loh theih ni bawk si lo chu kan han inbe leh rih a, kan inbe zo thlang lam ka hawi thla chu ani pawh chu a rawn hawi chho reng tawh, kan țawng rî kha a lo hre ve a ni ngei ang, duh lo viau mah ila pumpelh erawh ka tum ta lo.
Pèn kàwina tùr lam ngaihtuah lovin, Nonoi nèn chuan step-ah chuan kan chhuk thla ta chhak chhak a, Chhana lam erawh ka en lo. Ka fanu a hmu dâwn ta, a pawi lo, thuhrûk ngai pawh ni hlei lo, ani pawhin fa a nei a, kei pawhin ka nei ve a ni mai.
A bul hnai kan thlen chuan Bike ațanga lo chhukin," U Mama'n nupui a nei tawh em ni?" tiin min zâwt teh ngawt a," Nei lo," tiin ka chhâng a, ka ipte ațanga chahbi phawrhin kawngkhàr ka hawng zui ta nghâl a, Nonoi ka kai lût a, ka rin ang ngeiin ka sàwm pawh ni lo chuan a rawn lút zui ve zat bawk.
"A nih chuan, hei hi tu fanu nge ni?" a tih leh chuan," Ka fanu a nih hi," tiin dik takin ka chhâng leh mai a, Nonoi lah chuan a hmuh ngai loh kan ina a hmuh avàngin ka bul chêtah a rawn awm leh tawh a, kan țawng chu min en tawn ve zêl bawk a.
"Dâwt min hrilh tum suh, i fa a ni lo, U Mama fanu pawh a ni lo ang, inanna pakhat mah in nei lo tlat," inti hre fê hian a ti leh a, țhu tùrin ka sâwm lo nain ama thuin a țhu zui nghâl a, lëng rei lo se ka tih vàngin țhu tùr pawhin ka sáwm duh lo a nia.
"Inanna neih kher a ngai lo, nufa inang lo tak tak he khawvêl ram zauah hian an tam ve chiang êm mai a!" uar zet hian ka ti a, ani lah chuan," Ngai kher pawh ka ti chuang lo, a nih leh, khawnge a pa hi? In inah i awm bawk sia, in innei lo tihna em ni?" a lo ti leh a, hetia min zawh hi ka ring rêng a, ka dâwt vár sawi chuan dâwt dang a hring chhuak zêl dâwn chu a nih hi maw.
"Chumi thu sawi tùr chuan em ni i rawn kal vang vang a?" a zawhna chhâng duh lo leh zah duh lo chuan ka ti lêt ta sak a, ka fanu a nih loh a ring thei nghâl mai kha thil àwm lo tak a ni hran lo. Mit fing deuh hlek tân chuan ka fanu a ni tih rin a har ve dâwn êm asin. Amah hringtunu sawi dàn khân a pa lam a chhùn fuh ve reuh êm a, a vun rawng a han deuh bâkah a meng kuau bawk si.
"Ni chuang lo ve; mahse, ka han hmuh dun thut che u khân mak ka ti ve deuh hlek a, min déng deuh dat a ni ber ang chu. Âwih lo viau mah ila i fanu nia i chhàl miau chuan ka âwihsak mai ang che," nui chung hian a ti dam ta thluam a, a țawngkam dam teh thluam lutuk chu ka ngei zâwk! Ka fanu chungchâng lam sawi duh lo chuan," Eng nge i rawn tih dâwn?" tiin ka be ve ta thung a. Nonoi bulah lungawi lo hmêl leh lãwm lo țawngkam neih ka duh loh avàngin chutianga awm lo tùr leh țawng lo tùr chuan ka insûm nasa viau a ni.
"Ka rawn lêng maw le, inhmuh a khât tawh êm mai a. Chanchin ni se hriatpawh theih lohvin i awm daih bawk si; mahse, tunah chuan ka nupui nèn kan ințhen tawh a, ka duh duh ti thei tùrin zalènna ka nei leh tawh a ni," a hma ang bawka dam thluam chuan a lo ti leh a," I fanu chu tu nge a hming ni rêng rêng a? Min hlau deuh em maw ni? Ka seh dâwn hauh si lo," a ti zui leh zat a.
"Nonoi a nih hi," tiin Nonoi chu ka han en a, min rawn en vein ka nuih sak a, a bân a phar avàng chuan ka pawm a duh tih hre nghâlin ka pawm zui leh zat a, a pawi ka ti lo, ani bulah hi chuan tlângnêl lo mah se ka vui ngai lo ang.
"A pâwn lam lan dànah naupang duhawm leh chum tak ni lo mah se nu leh pa mit ațang chuan a duhawm êm êm tho ang a, ani aia hmangaih tùr leh hmangaih phû pawh an awm chuang miah lo ang le," ka rin loh deuh chuan a rawn ti chhuak leh a, chutiang țawngkam chu a ka ațanga chhuak tùr chuan ka beisei lo hrim hrim.
Ka țawng ve dâwn lai takin ka phone a rawn ri a, ka en vat a, Naom-i a lo ni a. Ka han chhàn chuan," Au Ruatpui, ka lo lêng dâwn a, inah in awm em? Nonoi pawh a awm em?" a rawn ti nghâl làng láng a, kan awm thu hrilhin lo lêng tùr chuan ka sâwm zui zat bawk.
A rawn thleng har lo. A rawn phûl lût zui hlut a, Nonoi pawhin a lo pan vat a, a ei tùr a rawn kensak a phawrh laite chuan hlim takin a lo tê ve chùl mai," Âpain cake min leitîr a," tiin a bag ațang chuan a rawn phawrh chhuak leh a, cake lian țha tak, tui hmel lutuk tak mai hi a lo ni nghe nghe.
"A va làwmawm tak! Mahse, a ngai lo asin, ka chhang siam pawh a awm reng a," ka lo tih chuan," Chu chu ka hàwn țhen leh thei ang tiraw? Âpa leh Àuin tui an ti thei sia," a lo ti vat a, kei pawh chuan," Thei tuk e, i hàwn țeuh dâwn nia," ka ti ve leh a. Kan țawng chhûng chuan Chhana chu a lo ngawi kur a, awm ve lo ang hmak a ni, keini pahnih lahin kan be bawk si lo va, ngawi kur tùr a ni tlat.
*A ÊNG ZÂWNGA THLÎR ȚHÌN MITE HIAN THIL ȚHA LO LAM AN NGAIHTUAH NGAI LO A NI BÎK LO, AN NGAIHTUAH CHÂNG A AWM VE THO; MAHSE, CHÛNG THIL CHUAN INTIHCHHIATTÎR DUH LOVIN AN NGAIHTUAHNA ATA AN PAIH CHHUAK DAIH ȚHÌN*
An lo innei a nih chu. A fa kha a pai miau a, mipa a nih chuan a mawhphurhna kha a hlen ngêi tùr a ni tlat a ni, hemi kawngah kher hi chuan a tih tùr dik tak a ti ve tlat, mipa chu a lo ni ngei e. Fa pawh kha tluang takin an nei ngei bawkin ka ring a, Nonoi aiin a upa zâwk lehnghâl a, a lian ve tawh ngawt ang; mahse, a nu leh pate an ințhen leh ta si a, fahrah nun a rawn tem chho ve dâwn ta a ni. He thil hi ka va haw tak!! Ka huat avànga bo hmak thei ni se, khawvêl ata hi a hming mai ni lo, a rim arã hriat tùr pawh a awm tawh lo hial ang maw le!
"A nu leh pa ngei viau mah ila han ngaihtuah cheuh cheuh hi chuan an fa a khawngaihthlâk ka ti, nu leh pa kâr lovah a rawn sei lian dâwn tihna a ni si a," ka ngaihtuahna hria ni àwm tak hian a rawn ti leh a, ka lo bu nghat mai. Nu leh pa kâr lova sei lian dinhmun ka hriat chian êm avàngin khawngaihthlâk ka ti ve tho, chutiangin Nonoi pawh. A mak ngawt mai, engati nge hetiang thil hian min hual vêl tlat mai le?
Kan ngawih vang vang hnuah, "Nonoi pa kha i hre chiang em kha?" a rawn ti thut mai a, chháng mai lovin ka en hrâ ringawt phawt, a țawng ring chuang miah lo nain mi dangin a thil min zawh chu an lo hre mai ang tih ka hlau pawh a ni mahna, hetia hlauhthàwnna rilru ka put thut tâk ni.
"Hre chiang nâng!"
A thaw hak a," Ni khân ka hre deuh rêng a! A nih leh.." tiin min rawn hnaih deuh a, a hma aia zàwi hian," A nih, a nu kha? A thî i ti em ni kha?" a ti leh a, kei erawh chuan," A nu alawm ka nih, ka fanu a nih hi," ka lo ti ve thung a.
"Ni tho e, a nu i ni lo ka ti lo che. A nu i ni, ka hria. Amah hringtu kha a nia ka sawi chu," a rawn ti leh a, ka chhàn hmain ka hawi kual tê tê phawt. U Mamate kan bulah awm lo mah se an awmna ațangin kan țawng chu an rawn hre pha ang tih ka hlau, he thil hi sawi nawn ka duh ngai lo ang.
"Aw, a hringtu chu boral tawh e. Ka hrilh tawh che kha, a hrisêl lo va, rilru hah leh hrehawm rêng rênga nau pai chho a ni bawk nèn, a taksain a tuar lo thei lo va. Bâkah, tualchhûngah buaina a lo awm lehzêl a, inkahna hial a thlen kha, vànduai berah țangin thihna hial a chungah a thleng ta a ni. A nu kalsan naute chu ka fa tùr liau liaua Pathian min pêk ka ti lo thei lo, a nu ka ni a, ka fanu a ni bawk, hei hi thil danglam ngai lo tùr chu a ni," ka ti dap dap a, ka țawng chu a zàwi khawp a, ka hrilha pawhin a hre thei chang chang chauhin ka ring.
"Phone-a min rawn hrilh țum khân mak kha ka ti khawp a, i thei chiah dâwn em ni aw ka lo ti rilru nghe nghe; mahse, hei i hrin a ni lo tih hriat loh tùr khawpa țhain i enkawl thei a, ka chhuang lutuk che. Kei chuan ka thei ve miah lo ang tih ka hria, amah lah hi heti zawng hi a ni ve a, ngo bawk si lo, a sèn têt deuh lai phei kha chu a..." a tih chuan," Lalchhan!!" ka lo ti țhat a, rum deuh hian ka melh bawk.
A lo nui hawk a, a kut pharin," Ka tih palh! Ka tlâwm, ka sawi tawh lo ang," a ti vat a, chutah,"I fanu hi chu i țan ve teh mang e tiraw? I beng hriatah sawisèl chhin theih pawh a ni lo, a vànduai vànnei ve ngawt mai, nang kher a lo tawng che hi chu naute vànnei ber a lo ni!" a ti leh nang nang a.
Ni e, a vànnei pawh chu a lo ni ang, kei pawh ka vànnei ve tho. Ka la tem chhin ngai loh hlimna min thlentu a ni a, amah vànga ka buaina leh hahnate kha, ni e, a buchip zual lai phei kha chuan ka hah alawm, ka taksa mai ni lovin ka rilru thlengin a hah a nih kha; mahse, thil dang ngaihtuah hman lêk lovin ka rilru a la pêng a, kha tak kha ka tân a lo țha si. Chhana ngaihtuah hman miah lovin min siam a, ka hah viau nia ka hriat lai pawh khân mak takin a tân chak takin ka awm thei zêl a nih kha. Kei bâk enkawltu nu a nei lo tih hre rànin khawngaihna nèn ka theihtâwp chhuahin ka enkawl chho a, khawngaihna ațangin hmangaihna, tûnah phei hi chuan a tel lovin ka awm thei tawh lo ang ti ila a dik ang, min tihlim bertu a ni ka tih tawh kha, tûn dinhmun hi kan lo thleng chho ve ta a ni. Kan chanchin hi tu vak ka hrilh lo, Manipur-a ka zu awmnate chhûng, ka nu leh U Mama leh Chhani bâk hian Nonoi hi ka hrin a ni lo tih pawh an hre kher lo ang, kei hi chuan hrin hah kher ngai lova Pathianin fa min peah ka ngai hmiah. A lo len deuh hun ka nghahhlelh viau rualin Mizote hi chu thil sawi kan peih si a, kan lo inchhùn lo ve viau bawk si nèn... a, he lam hi chu ngaihtuah rih lo ang, sáwtna awm lo thil țangkai lo ngaihtuah hi ka sim hmak a hun tawh.
Hun a ral a, zanriah kîl laia U Mama'n Scooty lei ve mai tawh a duh thu leh chhûngkua pawhin a mamawh tawh nia a hriat thu a sawi chuan ka lo bu nghat a, ka nu pawh chuan," E, sum thawk chhuak berin mamawh nia i hriat chuan lei mai tùr, lei i ti har ka lo ti viau tawh zâwk asin," a lo ti ve bawk a, naktûk lama a va ngaihven tùr thu a sawi chuan nuam ka lo ti veng veng mai, a thawh chhuah ngeiin a lei ve thei dâwn chu a ni si a, Scooty thar kan nei ve ngei dâwn ta e.
A tûk tlaiah chuan Scooty vâr ngei mai chu a rawn la ve ta ngei a, Scooty-ah chuan a vâr hi mawi ka tih ber a ni a, hei pawh hi a mawi zek zawk viau, kan tân chuan thil thar làwmawm tak a ni bawk a, kan hlim chhûngkua ngei mai. Chhani ka hrilh ve vat a, ani pawh a rawn lang zui nghâl zat nghe nghe, zanriah ei tùrin ka nuin a sâwm ve nghâl a, ani pawhin a hnial lo. Chaw ei hmain ka nuin Pathian hnênah Scooty thar chu hlànin làwm thu sawia a țawngțai hnuah chaw ei kan siam zui ta nghâl a.
Chaw ei lai chuan," U Mama chu, Manuni i phur zing àwm mang e! I chhûngteho zawng zawng ai hian a chuang zing ber tak tak ang!" tiin Chhani chuan U Mama chu a fiam lehpek a, ka nu chu a lo nui nghâl hak hak a, U Mama ve thung chuan," Phurh pawh phur ve ang chu, mi pawimawh a ni miau a, nang pawh ka tân mi pawimawh ni ta ang la, ka phur zing viau ang che," a lo ti a, a nui duh miah lo lehnghâl. Chhani chu ka en a, a lo nui ve sûng a, min rawn melh zohin," A tenawm vêl e! A țawng thei zawt zawt bawk si," a ti sap a, ka lo nui ve hak mai.
"U Mama tân mi pawimawh lo ni ta hlauh la chuan e, kan scooty-a i chuan zin dâwn mai bâkah kan in pawh hi i tã vek tùr a ni dâwn a nia, i nihlawh dâwn lutuk! Kan mo i ni dâwn a nia, keini lah kan fel dâwn si, sawi pawh kan sawisêl ngai dâwn lo che, nuam i ti ngawt ang!" ka ti ve duah a, ka nu pawh chuan," Ni chiah e," a lo ti ve vat bawk. Ani lah chu a lo dang titih ve tehrêng em maw ni, a ngawi kur a, min en kual ruk ruk ringawt.
"Manuni hi ka țhen ang a, lo lút mai la, chuan, Scooty-ah ka phur zing viau ang che," U Mama'n a rawn tih leh tâkah phei chuan," Nangni chhûngkua hi in ninawm lutuk! In țang rual țhâm zui a," a ti a, a hmêl lan dàn nuihzatthlâk tak avàng chuan tu mah insûm thei awm lovin kan nui chhuak ta vek a, chaw ei lai mah ni se kan insûm thei hlawl lo a ni ber.
Inrinnia dàwr ka kal dâwn chuan Nonoi ka hruai ve a, ka nuin a lo awm hman tlat lo. Kal chak thei lo chuan muangchângin kan kal a, puak hi a duh lo ve țhìn a, páwna chhuah hi chuan amaha kal hi a tum ve tlat țhìn.
Dàwrah rin loh deuhin Manuni a lo țhu ve leh a, U Mama'n Nonoi a lo hmuh veleh ko vatin a pawm zui zat bawk. A duat ve bawk a, a dàwrah ka kalpui khât ve bawk nèn, a Pu Puia bulah chuan a thil duh a kâwk kual nasa mai.
"I lo awm ve reng a?" tiin Manuni chu ka bia a, ani pawh chuan," Nia, sawti laiah sâwn ka kal lawk a, a remchâng êm a, ka awm ta rih a nih hi," a lo ti ve a, Nonoi leh U Mama inpawm chu a en vang vang a, a rilrua a ngaihtuah tùr àwm ang chu ka lo ngaihtuah ve a, U Mama nèna an inneih huna fa an neih huna U Mama pawm dàn tùr vêl a suangtuah a ni ngei ang chu. Ka nui sak a, kei hi ka lo ngaihtuah thui deuh mah mah chu a ni; mahse, an induh chuan innei ngei se chu ka ti, U Mama hian bialnu a nei ngai bík si lo va, an ințhen hlauh chuan a nei har leh tawh àwm êm mai.
Rei awm lovin kan nufa chuan kan haw leh thuai a, pawm a duh miau loh avàngin kan kal chak thei lo va, a châng lahin a ding tlat bawk a, kan kal rei dùn viau a ni. In kan thlen hma deuh hlek chuan kan in kawta bike ding chu ka zu hmu thei a, tu bike nge tih ngaihtuah ngai lovin a neitu pawh a lo la chuang nghe nghe. Ka ding deuh chat a, Nonoi pawh a ding ve nghâl dat, ka kài miau si a.
Eng nge maw a rawn tih dâwn ni? Min hmuh tumin a rawn kal a ni ngêi àwm si a, chuti ni lo se kan in kawta din thu a awm lo. Inah ka nu a awm ve dâwn si lo va, țhenawm hnai leh hmêl hriatte'n min hmuh dun phei chuan... ka duh lo, kan chanchin an hre vek bawk si, haw thleng rih lovin khawiah emaw thên kual rih ila a țha zâwkin ka ring; mahse, ka hminga min ko ri ka hriat tâkah chuan ka hawi vat a, kawmthlangnu a lo ni a, dàwrah a kal ve a ni ngei ang. Chhàn loh theih ni bawk si lo chu kan han inbe leh rih a, kan inbe zo thlang lam ka hawi thla chu ani pawh chu a rawn hawi chho reng tawh, kan țawng rî kha a lo hre ve a ni ngei ang, duh lo viau mah ila pumpelh erawh ka tum ta lo.
Pèn kàwina tùr lam ngaihtuah lovin, Nonoi nèn chuan step-ah chuan kan chhuk thla ta chhak chhak a, Chhana lam erawh ka en lo. Ka fanu a hmu dâwn ta, a pawi lo, thuhrûk ngai pawh ni hlei lo, ani pawhin fa a nei a, kei pawhin ka nei ve a ni mai.
A bul hnai kan thlen chuan Bike ațanga lo chhukin," U Mama'n nupui a nei tawh em ni?" tiin min zâwt teh ngawt a," Nei lo," tiin ka chhâng a, ka ipte ațanga chahbi phawrhin kawngkhàr ka hawng zui ta nghâl a, Nonoi ka kai lût a, ka rin ang ngeiin ka sàwm pawh ni lo chuan a rawn lút zui ve zat bawk.
"A nih chuan, hei hi tu fanu nge ni?" a tih leh chuan," Ka fanu a nih hi," tiin dik takin ka chhâng leh mai a, Nonoi lah chuan a hmuh ngai loh kan ina a hmuh avàngin ka bul chêtah a rawn awm leh tawh a, kan țawng chu min en tawn ve zêl bawk a.
"Dâwt min hrilh tum suh, i fa a ni lo, U Mama fanu pawh a ni lo ang, inanna pakhat mah in nei lo tlat," inti hre fê hian a ti leh a, țhu tùrin ka sâwm lo nain ama thuin a țhu zui nghâl a, lëng rei lo se ka tih vàngin țhu tùr pawhin ka sáwm duh lo a nia.
"Inanna neih kher a ngai lo, nufa inang lo tak tak he khawvêl ram zauah hian an tam ve chiang êm mai a!" uar zet hian ka ti a, ani lah chuan," Ngai kher pawh ka ti chuang lo, a nih leh, khawnge a pa hi? In inah i awm bawk sia, in innei lo tihna em ni?" a lo ti leh a, hetia min zawh hi ka ring rêng a, ka dâwt vár sawi chuan dâwt dang a hring chhuak zêl dâwn chu a nih hi maw.
"Chumi thu sawi tùr chuan em ni i rawn kal vang vang a?" a zawhna chhâng duh lo leh zah duh lo chuan ka ti lêt ta sak a, ka fanu a nih loh a ring thei nghâl mai kha thil àwm lo tak a ni hran lo. Mit fing deuh hlek tân chuan ka fanu a ni tih rin a har ve dâwn êm asin. Amah hringtunu sawi dàn khân a pa lam a chhùn fuh ve reuh êm a, a vun rawng a han deuh bâkah a meng kuau bawk si.
"Ni chuang lo ve; mahse, ka han hmuh dun thut che u khân mak ka ti ve deuh hlek a, min déng deuh dat a ni ber ang chu. Âwih lo viau mah ila i fanu nia i chhàl miau chuan ka âwihsak mai ang che," nui chung hian a ti dam ta thluam a, a țawngkam dam teh thluam lutuk chu ka ngei zâwk! Ka fanu chungchâng lam sawi duh lo chuan," Eng nge i rawn tih dâwn?" tiin ka be ve ta thung a. Nonoi bulah lungawi lo hmêl leh lãwm lo țawngkam neih ka duh loh avàngin chutianga awm lo tùr leh țawng lo tùr chuan ka insûm nasa viau a ni.
"Ka rawn lêng maw le, inhmuh a khât tawh êm mai a. Chanchin ni se hriatpawh theih lohvin i awm daih bawk si; mahse, tunah chuan ka nupui nèn kan ințhen tawh a, ka duh duh ti thei tùrin zalènna ka nei leh tawh a ni," a hma ang bawka dam thluam chuan a lo ti leh a," I fanu chu tu nge a hming ni rêng rêng a? Min hlau deuh em maw ni? Ka seh dâwn hauh si lo," a ti zui leh zat a.
"Nonoi a nih hi," tiin Nonoi chu ka han en a, min rawn en vein ka nuih sak a, a bân a phar avàng chuan ka pawm a duh tih hre nghâlin ka pawm zui leh zat a, a pawi ka ti lo, ani bulah hi chuan tlângnêl lo mah se ka vui ngai lo ang.
"A pâwn lam lan dànah naupang duhawm leh chum tak ni lo mah se nu leh pa mit ațang chuan a duhawm êm êm tho ang a, ani aia hmangaih tùr leh hmangaih phû pawh an awm chuang miah lo ang le," ka rin loh deuh chuan a rawn ti chhuak leh a, chutiang țawngkam chu a ka ațanga chhuak tùr chuan ka beisei lo hrim hrim.
Ka țawng ve dâwn lai takin ka phone a rawn ri a, ka en vat a, Naom-i a lo ni a. Ka han chhàn chuan," Au Ruatpui, ka lo lêng dâwn a, inah in awm em? Nonoi pawh a awm em?" a rawn ti nghâl làng láng a, kan awm thu hrilhin lo lêng tùr chuan ka sâwm zui zat bawk.
A rawn thleng har lo. A rawn phûl lût zui hlut a, Nonoi pawhin a lo pan vat a, a ei tùr a rawn kensak a phawrh laite chuan hlim takin a lo tê ve chùl mai," Âpain cake min leitîr a," tiin a bag ațang chuan a rawn phawrh chhuak leh a, cake lian țha tak, tui hmel lutuk tak mai hi a lo ni nghe nghe.
"A va làwmawm tak! Mahse, a ngai lo asin, ka chhang siam pawh a awm reng a," ka lo tih chuan," Chu chu ka hàwn țhen leh thei ang tiraw? Âpa leh Àuin tui an ti thei sia," a lo ti vat a, kei pawh chuan," Thei tuk e, i hàwn țeuh dâwn nia," ka ti ve leh a. Kan țawng chhûng chuan Chhana chu a lo ngawi kur a, awm ve lo ang hmak a ni, keini pahnih lahin kan be bawk si lo va, ngawi kur tùr a ni tlat.
*A ÊNG ZÂWNGA THLÎR ȚHÌN MITE HIAN THIL ȚHA LO LAM AN NGAIHTUAH NGAI LO A NI BÎK LO, AN NGAIHTUAH CHÂNG A AWM VE THO; MAHSE, CHÛNG THIL CHUAN INTIHCHHIATTÎR DUH LOVIN AN NGAIHTUAHNA ATA AN PAIH CHHUAK DAIH ȚHÌN*
Comments
Post a Comment