☆KA TÂNA RUAT☆ - 15 By Dingdi Pachuau

☆KA TÂNA RUAT☆ - 15 By Dingdi Pachuau

Kan ina Naom-i a rawn kala a hmêl ka hmuh apiangin a thil min hrilh chu ka hre chhuak zêl a, ka khawngaih êm avàngin a titi barh barh laite hian ka lo en leh vawng vawng țhìn. Ka tawn ang tho a rawn tawng ve chu a nia, mihring hian kan hma hun kan lo hriat lohzia hi, hlim takin kan bulah hlim takin titi siam siam țhìn mah se chhûngrilah kim lo tlat a nei dâwn, keimah ang chiah tùr a ni. An khawsak dinhmun a țha pawh a ni thei, a pa leh a uin an khawngaihin an hmangaih viau ang a, tlâkchham a neih pawh an phal lo ngêi ang; mahse, chu chuan amaha kim lo tlat kha a hnawh khat chuang lo ang.

"Au Ruatpui, 'ti nge min en reng a?" a rawn tih chuan ka ngaihtuahna ram ațangin ka harh chhuak a, nuih sakin," Ka en êm êm che pawh a ni lo, thil ka lo ngaihtuah kual a, i ti zo tawh em ni?" ka ti zui zat a, tih tùr ka pêk a lo ti zo tawh a lo ni. Ka en dik zung zung a, a lo ti dik deuh vek niin, pakhat erawh a ti sual ve zeuh a, a puntîr sual vàng a ni nghe nghe.

Ka zirtîr zawh hnu chuan a haw nghâl mai lo va," Inah kawm tùr ka nei lo, Nonoi bula awm hi ka duh rih zâwk," a ti deuh tlat a, a haw nghâl vat khât ta viau, nuam a ti laklawh ve tawh niin ka hria. Nonoi lah hian a lo nêl êm êm tawh bawk si a, a remchàn țhìn avàngin chaw ei ve nghâl mai tùra sàwm ka chîng a; mahse, a duh bîk miah lo," Ka awm loh chuan Âpate chaw ei a tui lo ang," a ti deuh tlat zêl.

Manuni pawh a rawn lang ngun ve ta viau. Kan innêl ve tawh a, a fel ka ti a, awmthei pângngai tak an ni erawh a rûkin hrehawm ka ti deuh țhìn. Keini chu heti mai hi kan ni si a, an induh viaua inneih an lo duh phei chuan... kan in a tê ve si a, extend ngei chu a ngai ang, ka nu hi sawipui ran a ngai a ni.

Hun remchâng hmasa berah ka sawipui ta a, ani pawh chuan," Ni e, a dik alawm. Ka ngaihtuah ve rauh rauh țhìn asin. I u hian a sawi ve mai ka ring deuh a, kum lamah ni se a naupang tawh lo va, nupui hi nei thuai se pawi ka ti hauh lo; mahse, neih atân êm chuan Manuni hian a duh dâwn em ni ka ti deuh țhìn, ani zawng chhûngkaw pângngai tak ațanga chhuak a ni si a," a ti charh charh a, kei chuan," A, duh dâwn lo se a ngaizâwng duh dâwn em ni? Ani pawh a naupang viau tawh bîk lo va. A thuhrimah, an innei dâwn emaw dâwn lo emaw nakinah nupui chu a la nei ve tho tho tùrah ngai ila, in extend chu a țha tho ka la ti țâlh, inhmakhua a țha," ka ti leh a.

Khua a vâwt chho țan a, Nonoi birthday pawh a lo hnai ta. Thil ropui tihsak thei lo mah ila a vawi khat nân lawmsak ve ngei chu ka tum a, kum khat a tlinna kha ka lawmsak thei tawh si lo. Tunah chuan a pi leh pu bulah, thlamuang takin a awm tawh a, lawmsak a phû ve tawh a ni.

Chhani pawh a lo phûr nasa," A nuam ngawt ang! Chaw ei khâwm nghâl bawk ila, Ârsa ka lo tum ang," a rawn ti ham ham a, kei chuan," I insêng nasa lutuk palh ang, i rawn kal theih chuan a tâwk a ni mai," ka ti ve thung a. Ani hi a phûr ve thei a, ani bâk hi țhian țha tak ka nei lêm lo bawk a, a tel lo hi chuan ka kim țhìn lo.

Naom-i pawh a phûr ngang mai a," Yes, Nonoi present tùr pawh ka mitthlaah ka hmu thei nghâl! A va nuam dâwn tak! Birthday cake cial tâwkin aw ni ang, nuteite dàwrah order ila?" a ti nghâl a, a hmêl leh aw chhuak ațang chuan a phûr tih a hriat hliah hliah. A àwm tho e, hetiang vêl hi la naupang deuh nuam tihchi hi a ni ve hrim hrim a, kei aiin sâng zuah tawh mah se a la naupang ve êm bawk a ni.

Ka nu leh U Mama pawh an phûr ngang mai a, insèn pawh an inhuam viau. Mi sàwm tùr ka han dap kual ve a, in hnuaite awm loh lai a ni a, nu berte khaw lamah an chhûngte tlawhin an zin ve rih a ni. Chhani leh Naom-i ka sâwm a, U Mama'n Manuni. Naom-i chauh sàwm chu nuam ka ti leh chiah lo deuh a, an pafa thum chauh an ni ve bawk nèn, Naom-i bula ka sawi leh chuan," A, an duh ve lo ang, Àu phei chu mi inah chaw a ei khât si, Ânu awm loh hnuah phei hi chuan chaw ei chhuah chu sawi loh, school kal bâkin a chhuak tawh ngai lo, inkhâwm pawh a inkhâwm duh tawh lo," a ti leh barh barh a; mahse, chu pawh chu ni se sàwm ve hrim hrim a mawiin ka hria a, ka tum tho a ni.

November ni 4 a rawn inher chhuak ta ngei a, Naom-i tân School bàn hun nghah ngai lovin Inrinni a lo ni zêl bawk nèn, kei phei chu zîngkâr ațangin ka buai chho țan tawh a, Chhani pawh a rawn intihma ve a, tûkțhuan ei kham hnu lawkah a rawn thleng zui ve mai. Broiler âr lian țha tak a rawn thawh a, Scooty a rawn keng bawk. Scooty hi mamawh thil a awma tlàn zung zung nân a rawn ti ve ngei a ni, a felin a inpe zo thei a nia.

Naom-i a rawn thleng a, kan buai lai lai a, buaina nuam lam a ni bawk nèn, kan ri chèl chúl reng mai. Âr chu talhin kan puah a, kan chan sa vek a, kan erawh kan hmanhmawh lêm lo. U Mama a rawn haw har lutuk lo va, vawksa a rawn hàwn ve bawk. Thlai lam erawh tukinah kan lei fel vek tawh a, buaina tùr a awm tawh lo.

Mite angin làwm ropui thei lo mah ila kan tih theih tâwkah ka lung a âwi a, Nonoi ni se banga a birthday banner-a a thlalâk leh balloon kan tàr chu hmuhnawm a ti a, lãwmin a khêk rawi rawi reng mai. A hlim hmêl hmuh tùr awm reng chu nuam ka ti a, thla pawh ka lâksak nasa viau a ni.

Zanriah ei hma hretin U Mama'n Manuni a va hruai a, an rawn thlen hnu lawkah ka rin ngam phâk lohin Pu Rintea a rawn lang ve hlawl bawk a, kan lo chiauau vat. Ka sàwm lai khân a hman lo thut maithei tih a sawi kha a nia; mahse, a hman leh thut si tihna a nia, a làwmawm. Joel-a erawh Naom-i sawihmang ațang khân a rawn lan ka ring lo sa hrim hrim a, a rawn lang ta lo rêng a. A nu khawsak dàn vàngin mi zînga awm pawh nuam a ti lo tihna a ni a, ka khawngaih rualin ani chu mipa a ni a, upa zâwk a ni bawk a, Naom-i ai chuan ka ngaihtuah lo deuh. A len chhuah tam loh leh lehkha zirna hun a nei tam ang a, páwn lam sualna pawh a hre lo thei deuh bawk ang chu.

Tui takin zanriah chaw kan ei a, hun hmang rei lo tùr záwngin chaw ei kham hnu lawkah cake kan zai leh a, ka duh dàn taka ka order kha a ni bawk a, a tui 'cial' viau a ni. Nonoi pawhin a ei tam viau, Birthday present lah chu a dawng țha khawp a, kan mi sàwm rawn kalte chuan an pe vek, thil țha tak tak vek a ni an pêk ni.

U Mama bulah in extend chu ka sawi ri leh ta a, ani pawh chuan," Nia, kan chhûngkua hrim hrim pawh hi kan chép ve tawh a, bungrua kan lo duh belh ve zêl bawk nèn, ka room lamah hian extend ila ka lo ti rilru ve țhìn a," a ti a, extend-na chin tùr nia a lo ruahman chinte chu min hrilh a, a sawi china kan ti zau thei a nih chuan kan in pawh a lang zau ve hawk tawh ang a, room ni se a hma aiin a zau thei bawk ang a, a nuam tawh viau ang.

Pawisa a lo inkhâwl ve țên tawh bawk a ni ang, rei rial lovin kan ti ta thuai a. Thil harsa tak a ni lêm lo bawk a, hmanrua a awm sa vek bawk nèn, Krismas hma ngeia thawh zawh tum kan nia, kan zo hman ta rêng a, U Mama nèn room thar kan luah ta tihna a nih chu. Țhenawmte chuan," A tharin in ti mai lo a, in ti thei àwm reng sia," min ti a, a làwmawm thei țhìn hi ka tia. Sum nei lo mah ila neia min ngai hi a làwmawm hranpa ve tawp ma ti. Sum dinhmun chu a neitu kan nia, kan hre chiang, kan tih len mai loh chuan in sak țhatna tùr êm chu kan la khâwl tling si lo a ni.

Chhana pawh ka hmu zauh zauh a, ngei viauna pawh ka nei tawh lo. Ka lo duh ve hmasak ber leh pasal atân hial pawha ka lo thlan ve kha a ni ve a, ka hmuh châng pawh hian mi dang ang ngawt chuan ka en thei bîk lo tih ka hria; mahse, chutiang chu ni mah se amah va beiseina lam erawh kha chu ka nei lo chhiava, tum lah ka tum hek lo.

Krismas hmain Naom-i tuition ka pêkna hlawh chu ka dawng a, bonus ka dawng tel bawk. Amah ngei kan inah rawn kalin min rawn pe a, a làwmawm rual rualin zahthlâk ka ti a, inthlahrunawm ka ti bawk. Ani erawh chuan," Ka fanu hlim takin a awm theih phah a, ka lãwm hlê a ni," a ti mai a, thingpui hâng ka pêk in pah chuan," Ka fate hi ka tân an pawimawh a, an hlimna hi ka duh ber a ni, an hlim phawt chuan ka hlim a ni mai, nang pawhin fanu i nei a, i hre thiamin ka ring," a ti leh a, ka lu ka lo bu nghat a.

"Inzawh àwm a ni em ka hre lo va, min chhàn hreh chuan min chhâng lo mai la, Nonoi pa nèn hian in innei em?" tiin min zâwt ta thut a, a thil min zawh avàng chuan ka hamhaih ve deuh hlek a, ka chhâng lawk lo nghe nghe; mahse, a hnuah chuan," Nei lo ve, kan innei lo," tiin dâwt vâr deuh chu ka sawi ta ringawt a.

"A nih tak chu. Ka fanu ngainat ber ni ta chu i chanchin tlêma zâwng chu ka hre ve lo thei lo va. Hrehawm ti suh, mi min sawi dàn ang hi kan nun a ni vek lo a nia, min sawichhia an awm ang a, min fak an awm bawk ang, mi min sawi dànah hian buai miah loh tùr tiin ka fate pawh ka hrilh țhìn," a ti dap dap a, chutah," I thil pal tlang kha ka hria, i thiam loh pakhat mah a awm lo lehnghâl, engtin nge ka hriat tih chu min zâwt lo law law mai rawh, hriat dàn hi chu kawng zawn chuan a awm zêl a nia," a ti leh a. Kei chuan lo sawi ve tùr ka hre lo, ka en a, a thil sawi ka ngaithla tawp a ni mai.

"Mihring chuan ruahmannate kan siam a, chumi tipuitling tùr chuan kan thawk țhìn. Kan hmaa lo thleng tùr kan hre lâwk ngai lo, kan mihringpuite ațangin rin loh deuh deuh thil kan tawng nawlh nawlh a, vuia awmze nei miah lo thilte pawh a ni ang chu," a ti leh a, lu bu leh nghat nghatin," A dik alawm," ka lo ti sap a. Min rawn enin," Bawihtei hnên ațangin kan chhûngkaw thil tawn kha i lo hre tawh ngeiin ka ring a?" a rawn tih chuan," Aw..." ka lo ti ban deuh chat a.

"A țan tìrah khân ka hre thiam lo hlê a, ka indem a, hrehawm ka ti a, pasal tih tùr tih loh tam tak ka nei a ni ang tiin. Pathian hnênah ka vui bawk a; mahse, awmzia a awm lo. Fate ngaihtuah tùr ka nei a, hrehawm tia hun hmanga indema Pathian hnêna vui hman ka ni lo tih ka ngaihtuah chhuak ta hlauh a," a ti leh kalh kalh a, a rilru puthmang chu țha ka tih zâwng tak a ni. Amah aiin a fate ngaihtuah an ngai zâwk tih hriain amah aiin a fate hlimna a dah pawimawh hmasa a, hei hi pain a fa a hmangaihte chunga a tih tùr chu a ni rêng a ni.

Kan titi a inrual ta phian mai. Ka nu lo haw thlengin a lêng a, a haw hnuah ka nuin an chanchin chu min zâwt a, kan titi a rawn hre ve hlek hman tlat si a, pawi lo tùrah ngaiin kei pawh chuan ka hrilh ve ta a, ka sawi chhúng chuan ka nu chu a lo ngawi reng a.

"A patling khawp mai, a thil pal tlang a hrehawm dâwn tehlul nèn, a nunah zir tùr tam tak ka hmu chhuak, a fate a hmangaiha a dah pawimawh ang chiah khân kei pawhin ka fanu hi ka dah pawimawh ve ang," ka ti sap sap a, ka nu erawh chuan," Engati nge hetiang thil țha lo hian min hual tlat reng le? Kan thil tawn a inang hlawm bawk si a, mi dang daih ni lovin inhnaih tak vek kan la ni zui a," a lo ti vang vang a.

Krismas hlim takin kan hmang a, dam tlâng taka hman hi chuan kan hlim ni-ah ka ngai mai țhìn. Nonoi tân thil thar vek a ni a, a hlim thei viau, a hlim hi chuan ka hlim zual țhìn. Tunah hi chuan a thau ve deuh hlek tawh a, ka nu pawhin," I rit tawh reuh mang e! I hmêl pawh a mawi sâwt lutuk a nia," a ti țhìn. Naupang duhawm leh hmêl țha tak tia sawi tùr a ni lo ka tih tawh kha; mahse, ka tân chuan ani aia naupang hmêl țha leh duhawm hi an awm chuang lo.

Kum thar kan chuang kai a, kan inkhâwm a, kohhranin lawmna ruai an buatsaih a; mahse, kan nufa chuan kan tel leh ta lo. In lamah kan ei țeuh tho a, kan duh tâwk viau mai. Chhani pawh a rawn tel ve a, ruai țhen peih bîk lovin kan nufa min rawn kîlpui a ni.

"Kuminah i ute hi an innei tawh ang a?" a rawn ti chhuak hluai a, nui chung hian," Neih tùr hmu chuan nei zêl teh se, nang pawh nei ve tawh la?" tiin ka fiam zui a, ani erawh chuan," A, ka peih lo, ka duh ve deuh hlek leh ka star ve deuhte hian bialnu an lo nei zêl a, ka tui lo," a lo ti a, he nu thil sawiah hi chuan a nuih loh theih țhìn loh, amah nèna inrem êm êm hian a țawng fuk fuk zêl si a.

"Ngawi tak rawh, i la hmu ve êm êm ang, i duh zâwng tak i hmuh leh hunah chuan intiam rualin kan bawh thlu tawp ang a, i tân liau liau kan kidnap dâwn nia," ka tih chuan za zet hian a nui ta hawk hawk a, Nonoi lah chuan a en duh nasa mai a, mit la lo lêkin a en reng mai.

"Lalruatpui! Min tinawmnah viau suh, fa i neih tawh vàng maiin min hmusit suh, fa pawmna tùr hi ka hmu lo emaw i ti a ni ang e, ka hmu țeuh! Mahse, an hmêl chhe hlawm êm a ni," a ti lehpek a, kan inen a, kan nui dùn ta vak vak a.

Naom-i'n January thla chhûng chauh zirtîr leh hrâm tùra min ngèn avàngin tlai tin a rawn kal leh ta a, tlai khat chu a chawlh laiin," Au Ruatpui, Nonoi hian pa a nei lo va, kei leh Àuin nu kan nei lo bawk, Âpa nèn hian innei daih mai ula, nu leh pa nei kan ni thei mai ang a, a țha dâwn êm asin," a rawn ti chhuak ta mai a, a fiamthu emaw tiin nui chung hian ka en a; mahse, a lo nui ve miah lo, thutak fê hian min rawn en ràn a.

"Ka ti tak tak! I fel a, Âpa pawh hi a fel a, pathlawi pawh ni mah se a fel tho, in fel ve ve sia, in inneih hlauh chuan a nuam dâwn êm asin!" a ti leh a, chutah, a hma aia zàwi deuh hlek hian," En teh maw, nulaho zah lohzia chu, Âpa hmuh tumin kan inah an rawn kal țhìn a nih chu! Zak lo i ti ve em? A châng chuan doorbell ri pawh hi ka ning țhìn a, nula bâk an ni lo ang ka tia, an lo ni ziah bawk," a ti leh sar sar a.



*NGAIHDAMNA HIAN HUN KAL TAWH A THLÂK DANGLAM LO VA, HUN LO LA AWM TÙR A TI DANGLAM ZÂWK ȚHÌN*