☆KA TÂNA RUAT☆ - 9 By Dingdi Pachuau

☆KA TÂNA RUAT☆ - 9 By Dingdi Pachuau

"Min hmuh sual a nih dâwn chu," awlsam zeta a tih chuan," Nang hmu sual tùr êm chuan ka mit hi a la chhe lo asin," ka lo ti chang leh fak a. Dâwt a sawi chiang lutuk leh ka zawhna a ngai holam lutuk chuan ka nuih a ti za lo lutuk ringawt, ka thin a rim țùng mai a ni.

Kan ngawi dùn deuh reng a, ka thin a rimin ka lung a awi lo tih hre ve se ka tih êm avàng chuan," Mi dang nèn min kawp a nih chuan sawi la, ka lo inthiarfihlîm thei reng a nia," ka ti leh charh a, amah pawh ka en lo, ka thin a rim hi chu hre mah se pawi ka ti lo nasa; mahse, ka rilru a nâ a ni tih hi chu hre lo se ka duh.

A rawn nui hawk a, ka en nghâl vat. Ka thinrim laia a nui thei chuan ka thin a ti rim zual sauh mai, engah mah min ngai lo tihna a ni.

"Keimah ang chiaha rilru i pu hi ka lãwm. Nula dang thîkna thinlung i ti lang ve leh ta a nia, kan boruak hi a ngai teh pût lutuk a, a kal tluang pêt pêt reng a, hneawm lamah a kal lek lek tawh a ni; mahse, tunah chuan i thîkthu âwka ka hre ve leh ta a, hetiang boruak tawn hi a nuam ve a ni," a ti duah a, a thil sawi chuan ka nuih a ti za lo, mak ka ti deuh a, a hmêl nui deuh sâwng hmuh phei chuan min tham lo niin ka hre hial.

"Ka thîk lo, dâwt i sawi chiang lutuk khân ka thin a ti rim a ni, ka man chhuak chiang si che a," tiin ka chek pah hlak a, nui hmêl ka pu ve thei lo. Ani erawh chuan," Tum nei rànin dâwt ka hrilh che a nih kha. Ni e, vawiin khân ka chhuak, kei pawhin ka hmu reng che, ka hmu lo der che a nih kha, i thîkthu hi ka hre khât lutuk a, hetia min tih khauh khauh hi ka tawng khât bawk nèn, min duh tak tak lo emaw ka lo ti hman leh hial tawh a ni; mahse, tunah chuan i rilru ka hre chiang zual ta, ka ngaih a țha ta sawt e," hahdam hmêl tak hian a ti a, ka va en leh kher bawk si a, a hmêlah thinrimna a lang si lo, lungawi hmêl tak hian a țhutna hnung chu a nghèng ar ar a.

"Min hmuh loh tawp kha, ka man  chhuah chian vàng mai chein khatiang khân i sawi a nih kha," ka ti leh țâlh a, a lo nui leh hawk mai. Lu thing mãt mãt pah hian," Min va hre chiang lo tak! Ka test che a nih kha, min hmuh duh lo ila kha lamah khân ka rawn kal hauh lo ang, ka rawn kalpui khet chhan kha, i haw kawng a ni tih ka hre ve kar a. Ni lo'm ni? Kawp che ila min man chhuak hauh lo ang, teuh lo mai!" a ti leh malh malh a, ka en reng a, a hmëlah dâwt sawi hmêl a pu bawk si lo, min lo test tak tak zâwk em ni ang ka ti ta rauh rauh mai.

Lungawi takin kan inthlah leh ta chu a nia, ka rinhlelhna avànga ka thil zawh apiang fel fai takin min chhâng zêl thei a, dâwt sawi hmêl a pu bawk si lo. A sawi fiah fel fai si a, phone-a ka biak laite pawh khân a kalpuinu chu a lo nui char char tihte a a sawi a, a tàwpah min bum duh ka ring ta bîk lo a, țha takin kan inthlah thei ta a ni.

Chhani erawh chuan," Dâwt a sawi a ni ang, i man chiang mai si a, en ngun deuh tawh rawh," a rawn ti deuh tlat a, chanchin kha ka hrilh ve vek si a, nula a kalpui lai a hmu zing tawh bawk nèn, hetia min chah hi mak ka ti lo va, ka dem lo bawk. A țhiannu ka ni a, ka bialpain hmeichhe chhe lo deuh deuh a kalpui chuan lungawi taka a lo thlìr liam mai zêl hi a rinawm vak bîk lo ve bawk a ni.

Ka nuin in hnuaite an chhûngkuaa zanriah ei tùrin a sâwm a, kan ri nak nak mai. Hetiang boruak hi kan tawng khât a, bengchheng pawh ka ti phal lo, nu ber chauhin pawisa a la thawk chhuak thei si a, sa an lei khât ang tih lah a hriat a, hei vàng hian ka nuin a sâwm rêng a ni.

Zanriah ei khamah TV enin an țhu țhap a, nakkum lamah daih exam a ni tawh dâwn bawk a, zanin chu lehkha zir an tum lo a ni ang, nu ber pahnih erawh chu an titi pah a, an TV en chu an ngaihtuah hmèl vak loh. Kei erawh chu an pahniha thingpui ka pêk hnuah room-ah lûtin zirlaibu ka en lâwk leh daih a.

Mahse, ka en rei hman lo, ka phone a rawn ri a, Chhana a lo ni. Rei vak lo kan inbia a, vawiin tlai lamah kan inhmu tho nain zanina a lo lèn theih loh chhan sawiin a hmaa kan awm dàn ang chiahin naktûk lama a tih tùr min rawn hrilh leh thlap a, bialpa fel tak hi chu a ni chiang alawm.

Chhani'n min rawn be ve leh a, a nuteite ruala Mumbai lama zin ve a tum thu chu min rawn hrilh siam siam a," Awi, a nuam àwm mang e! Eng nge min rawn hawn ang?" ka'n ti zat a, ani chuan," A ngai em ni? Bialpa hausa tâwk i nei a, inleitîr mai rawh," a rawn ti thung. Ka nui hawk a," Bialpa hausa tâwk thil min lei ai chuan țhiannu fel deuh thil min lei hi ka duh zâwk a," ka tih chuan a rawn chek hlak a," Inla țawngkam thiam vêl lutuk! Ka ten zâwng tak!" a rawn ti a, a țawng laia a hmêl awm dàn tùr ka hmu thiam vek, han țawng vêl hlak hlak mah se kan inbiak rei hnuah erawh kan nui dùn leh hawk hawk mai.

Ka hlawh leh U Mama inhlawhna ațangin ka nuin pawisa tlêm tlêm a dah hrang zêl a, Pekate unauza Krismas thil leisak nân a ti ve a ni. Kan nufa thil tawn leh Pekate nufaza thil tawn hi a inang êm êm mai a, hei vàng hi em ni ang ka nu hian a khawngaih êm êm țhin ni ka ti țhìn, a sawi chhuak ngai lo nain a dik ngei pawh ka ring. Krismas lo thleng tùr hi an nu tân rilru hahna a ni thei tih hriain hetia ruahmanna siam hi kan ni; mahse, a bul ber chu ka nu a ni. Hmun danga țanpui ngaite va țanpui thei lo mah ila kan bul lawkah țanpui tùr an awm ve reng a, sum tam takin kan țanpui thei lo a nih pawhin an mamawh tlêm azâwng a lo phuhrûk chuan a zia tho tho.

Vawiin hi tuition class ka pêk tàwpna tùr ni a ni a, November thla ni tàwp nî tak a ni, hlawh a buai loh nân tiin kan inbe fel tawh a, December thlaah chuan thla chanve vêl chauh a ni tawh dâwn si a, Pi berin kalpui loh law law a tih deuh vàng a ni.

Kan inzirtîr leh mawlh mawlh a, kumina kan inzirtîr tàwpna tùr a ni tih a hre lo a ni maithei, a dàn ngai têin Naom-i a țawng leh rih țhìn a,a tih tùr a tih pah reng avàng chuan ka hau bîk lo. Bâkah, tuna kan en lai phei hi chu a thiam bel tawh a, ka enpui deuh mai mai a ni.

Chawlh lai chuan," School chawlh veleh kan zin dâwn asin, lo zin ve la?" a ti lehpek a, nui chung hian," A nuam ngawt ang, khawiah nge in zin dâwn?" ka ti vat a, rang zet hian," Shillong-ah," a lo ti a. Sawi zawm lehin," Âpite an awm a, Krismas pawh kan hmang nghâl maithei a ni," a ti leh malh malh a, a milem ziah chu țawng pah chuan a ziak reng tho. " A nuam ngawt ang; mahse, in ngaihawm àwm mang e," nui deuh chung hian ka ti leh a," Nia; mahse, Krismas hi chu Aizawlah hian nuam ka ti ber a, țhiante ka ngah a," a lo ti ve leh a. Kan ngawih dun hnu chuan an unau vànneihzia chu ka ngaihtuah kual a, kei hi chuan Mizoram hi ka la pèl lo hrim hrim a, hmun dang hi engtiang taka nuam nge a nih tih ka hre lo. Phone, TV leh thlalâk ațanga ka hmuh hi a ni mai a, nuam viau tùrah ka ngai vek mai.

Pi Mawitei'n thingpui tui tâwk leh chhang tui tak mai min rawn pe leh a," Vawiin hi kumin atân Au Ruatpuii lo kal tàwpna tùr a ni si a, chu vàng chuan thingpui 'cial' tak leh chhang tui tak ka rawn keng a nih hi, ni dang aiin a tui zak ang, ei țeuh r'u," a ti fiah kalh a. Naom-i'n min rawn en nghâl vat a," Tak tak a ni em? I lo kal tawh dâwn lo maw?!!" mak tih hmèl tak hian a ti a.

"Umm... tak tak e," ka lo ti a, a nu chu enin," Mahse, lo kal leh tùrin ka duh asin, engati nge a lo kal tawh dâwn loh a?" a ti leh a, a hmêlah chuan lungawi lohna langin țap mai tùr hmêl a puin ka hria ka ti. A nu chuan," Kumin atân chauh maw le, nakkum lamah dam chuan a lo kal leh ang," a lo ti vat a," Naute, a lo kal leh dâwn, thingpui leh chhang kha ei tawh rawh le, a tui teh a nia," tiin a fanu sam chu a chùl a, chhang leh thingpui chu Naom-i bulah chuan a dah hnaisak leh bawk a. Hmuhnawm ti takin ka lo en dùn reng mai, hmêl țha bawk, fel bawk, pian nalh bawk, hlim bawk, hausa bawk... aaa, a nuam ngawt ang!

Ka haw dâwnah hlawh min pe a," Bonus i phû êm mai kan tia," tiin ka hlawh bâkah a dang min pêk belh leh a, ka han hnial viau nain la tùrin min ti tlat a," Kan thiam hauh loh kan fate i zirtîr a, hma an sâwn phah êm êm tih kan hre bawk, i phú lutuk!" a ti tlat a, mi hnial ka thiam loh êm avàng leh zahthlâk ka tih deuh bawk avàng chuan ka hnial thui ta lo, rilru hlim takin gate pâwna min lo nghâktu Chhana lam chu ka pan a, ka nui sâng bawk.

"Mood chu țha hlê mai maw," a lo ti a, mawi ka tih dàn deuhin a nui zui a," Aw, teh rêng mai, ka hlim veng veng. I ril a țâm em? Hlawh ka la a, ka treat ang che," ka ti ham ham a, a nuam ve êm bawk a ni, ka rin loh lutuk thil ka dawng si a.

Ani erawh chuan," A, tuna thil kan ei leh chuan zanriah kan ei thei nâng! Zàna ka lo lèn hunah thingpui hâng tui tâwkin min lum la a tâwk mai ang," a ti ve thung a, a sawi dik ve reng nain han treat ve hrim hrim ka châk a," Chu te chu, kan ti tho ang chu," ka tih leh chuan min en leh vang vang a," A nih chuan, ei țeuh ila ni mai, zanriah atân hmang nghâl ila," a ti ve ta zâwk a.

Chhani pawh a zin tawh a, nuam a ti viau a ni, min rawn be zãwrh zãwrh reng a, a chângin min rawn video-call bawk a, thil țûl tia zin a ni lêm lo bawk a, a hman viau a ni. Kei lahin thil min lo hawn tùr ka chah kûr nguai a, min rawn biak apiangin ka chah zêl a, ka thil chah zawng zawng hi min rawn hawn dâwn ta se a pawisa kenin a daih lo tawp ang le! Min rawn hawn vek tak tak dâwn chuang lo tih hre tho mah ila hetia han tih kual vêl hi a nuam ka ti tlat a, ani lahin nui awr awr chungin," A hlawh nei zâwkin hlawh nei lo zâwk sum min eisak phêt i tum a, i phakar tlat," a rawn ti a, inngam takin kan inchhâng lêt bawrh bawrh zêl.

Min rawn hawn ve tak tak a!! Ka ring tho nain hetiang êm hi chu ka ring pha lo a ni, bag mawi ve tâwk tak, zahpuiawm lo tak leh vai chapal bun ang deuh chi leh kan pahnih tân kawr inang min rawn hawnsak a, kan kawr chu a design inang mah se a rawng erawh a inang lo thung. Mawi ve tak a ni, a mit a lérh loh teh rêng nèn, engtin nge maw hetianga mawi hi a rawn thlan ve ni ka ti rilru hial a ni.

School kal tàwp ni tlaia ka haw hma ve deuh chu Chhana nèn kan inhmu a, ina haw nghâl mai a phal loh avàngin kan lêng kual rih a. Ani pawh hi Krismas bazar tùrin a zin lawk dâwn a, a nu leh pa fapa duat a ni bawk a, zin pawh a zin hla dâwn viau a ni; mahse, Krismas hma chuan a rawn haw hman dâwn tho a ni àwm e.

In ka thlen hnu rei vak loah Pu Rintea'n phone a lo kal teh tlat a, a number ka save ve tawh a, an nupain ka nei ve ve a ni. Eng atân tak chuan min rawn biak tum ni maw ka ti rilru nauh nauh a, ka han chhàn chuan rin loh deuhin Naom-i a lo ni a.

"Au Ruatpui, school kan kal tàwp tawh a, vawiinah. Ka hmu khât tawh che sia, in ina lo lèn leh ka châk a, naktûkah ka lo lêng thei ang em?" a rawn tih chuan," Teh rêng mai! Lo lêng rawh, ka ngai tawh teh che a nia," ka ti ve a, a rawn nui hak hak a," Âpa phone ka lo hmang tawp a. Kârlehah khi chuan kan zin tawh dâwn sia, ka rawn lêng thei tawh dâwn si lo va," a rawn ti leh a. Kei pawh chuan," Nia, i zin hma ngeia i lo lèn leh ngei a ngai a nih chu," ka lo ti ve leh a, kan inbiak tàwp dâwn chuan," Âpain a be lawk duh che a," a rawn ti a," Aw le," ka ti sap thung, biak erawh ka hreh ru viau a ni.

"Ruatpui, a zin hmaa hmuh leh ngei che a duh si a, a rawn tih buai loh hrâm che ka beisei," a rawn ti thûm dût dût a," A pawi lo, min tih buaina tùr a awm lo rêng rêng," ka lo ti vat a. Ani chuan," A ngaina viau che a ni, lo lèn a châk thu hi a sawi reng mai a, hnialsak reng theih pawh a ni lo, i lo hre thiam hrâm hrâm zêl mai a ni ang chu. Krismas hmun danga kan hman phei chuan kan rawn be zut lo ang che tih pawh sawi a har ang," a rawn ti leh duah a. Mi țawng tam lo tak a ni tih ka hria a; mahse, chuti chung chung chuan a fanu hi a duatin a ngen tawh leh a duh tawh chu tihsak zêl a tum niin ka hria, a fanu tân a rawn țawng leh duah tawh a nia. Naom-i hi a vànnei tak zet a ni, hetianga pa, amah ngaihtuaha a duh tihsak zêltu a nei hi a vànnei thlâwt a ni, keini unau ve hi... ka ngaihtuah thui duh ta lo.

A tûka a rawn lèn chuan a pain a rawn thlah a; mahse, ani chu a rawn kal ve lo, tih tùr țûl dang a nei niin Naom-i chuan a sawi a, chhùna thingpui hmeh tùr chhang a rawn keng leh țeuh mai. A tui hmèl hlawm bawk a, a to hlawm ngawt ang chu.

Rei rial lovin in hnuaiah ka lèn thlâkpui a, a tìrah chuan Pekate unau nèn chuan an inzah tawn deuh a; mahse, a rei lo. Ka țawng bawrh bawrh a, Naom-i ni se a țawng duh a, rei lo te hnuah a be leh nghâl zung zung thei mai, ei tùr a rawn kente chu a pe ve hlawm a, Pêka naute pahnih, Diktei leh Tlanite chuan tui ti takin an ei hmiar hmiar a, Peka erawh a lian ve tawh a, a inthlahrungin a zak tih ka hria.

Chhùnah in chungah thingpui kan in vek a, naupang ber tih takah Tlani chuan," Chhang chu a tui hlê mai, ka ei reng châk," a ti a, a chhang chu tlêm té têin a keih pah a, a khêk deuh niin a lang.

"Hei a tam alawm, i ei țeuh dâwn nia, Naom-i hian a rawn keng a, a fel asin aw," ka ti a, Tlani chuan," Kan hausak hunah Ânu ka leitîr ve țeuh ang," a ti leh barh barh a, Peka chuan a melh ralh ralh țhìn tih ka hmu ru reng, han khap êm chu ka mitmei a vèn vàng nge, a ngam chiah lo niin ka hria.

"E, nakinah Krismas hunah kan ei țeuh dâwn nia, Krismas Putar kan dîl ang a," ka ti a, Diktei chu lo inrawlh vein," Kawr mawi tâwk ka dîl ang," a lo ti ve vat a, Tlani chuan," Kei chu Barbie," a lo ti ve a, Naom-i chuan," Kei pawh ka dîl ziah, ka duh záwng a hre thei lutuk!" a lo ti ve vat a.

Krismas hunpui kan thleng leh ta. Pekate unau pawhin kawr  thar leh pheikhawk thar an nei vek a, nuam an tiin an hlim hmêl chu hmuh a nuam tak tak a ni. An hlim hmêl chu pawisa tam taka lei theih rual a ni si lo va, ka nu thil ruahman chhuah chu țha ka ti tak zet a ni, a hlawhtlinzia mit ngeiin kan hmu a, anni unauza tâna hlimna thlentu kan ni thei chu ka lãwm tak zet a ni. Ka làwmna belhchhah nân Chhana hnên ațangin Krismas gift țha tak ka dawng bawk a, ka thinlung hi a hlim veng veng mai, kei pawhin gift chu ka pe ve tho a; mahse, Krismas gift ve ve mah ni se, a man a inthlau dâwn lutuk tlat.

A pa sawi angin Naom-i pawhin min rawn be zauh zauh a, min ngaih thu a rawn sawi ve ziah a, Shillong-ah Krismas an hmang ta daih si a, Kum thar erawh heta rawn hman ngei an tum thung.

"Thil ka lo hawn dâwn che a, lei pawh ka lei vek tawh asin. Ih maw, a mawi lutuk! Mahse, hrilh che ka duh rih lo va," phûr zet maia a rawn tih chuan," A ni maw?!! Ka va hmu châk tawh tak! Chuan, ka lãwm lutuk aw," ka ti ve nghâl a, ani chuan," Eng nge a nih ka hre rìn ràn mai siah!! I duh viau ang, a mawi sia," intithei awka lek lek hian a rawn ti leh a, chutah," Lo haw chhoh ka châk tawh! Dikteite unau pawh kha ka kàwm leh châk tawh a," a rawn tih chhunzawm leh a.

A thil min rawn hawn chu țhî a lo ni a, a sawi angin a mawi reuh phian a, to pawh a to reuh ngawt ang! Ani lah chuan a'n chhuang mai mai khawp a," Kan ina i lo kal apiangin rawn awrh ziah rawh aw," tiin min chah ngei a, lãwm takin ka 'aw' ve mai. Tlereuh hi ngaina lêm lo mah ila min petu a zahawm ka ti a, ka awrhsak ngei pawh ka ring.

Chhana'n a tuang a ti chhah a, kan inhniala kan inkar fê hnuah kum thar nî ațanga chhiara ni ngàna zànah palai an lo kal leh a, ka nu leh U Mama ka hrilh lâwk vek bawk a, Chhana nèna kan inbiak dàn zawng zawng pawh. Kumin chhûng ngeia inneih kha kan tum kha a ni tho a; mahse, kum chanve hnu vêla palai tirh chauh kha a nia kan tum dàn kha. Chhana'n," Innei tùr tho tho, palai tirh hma a pawi lo, a hun a fân deuh mai ang chu," a ti tlat a, hma taka palai rawn tirha a hun erawh July vêl daih pawh pawi a tih loh thu a sawi tlat a, mi hnial vak ka thiam si lo,  ka hnial deuh lahin," Min neih hi i lo tum tak tak lo a nih dâwn hi," a ti tlat bawk si a, tihngaihna ka hre ta lo a ni. Ni e, kumina pasal neih tum ka ni tho bawk a, kan lo ti fel hma deuh dâwn tihna a ni mai.

Chhûngte ràwn tùr kan nei chiam lo va, thingtlâng lama kan chhûngte an rawn kal hman bawk si lo, palai lo kal vawi hnihnaah ka nu chuan remthu a lo sawipui ta a," Anni tân inchhuang thei kan ni hlei nem," a ti a, a hun thu-ah erawh "Remthu sawi hnuah hun rei tak rial a țha ngai lo ve, kárah eng eng emaw buaina a awm duh" a ti tlat a, mipa lamin a hma thei ang ber an lo duh bawk si a; mahse, kan inbuatsaih hun a rei ve deuh nân tiin March thla tàwp lam emaw April thla țan tìr lam emaw lam an tin zâwn a, ka tum aia hmain pasal ka nei dâwn ta a nih chu; mahse, a pawi lo.

School țanin tuition class pawh ka pe leh tawh a, kan inneih hun chu exam zawh a nih tawh dâwn avàngin eng mah buaina tùr a awm dâwn lo a ni. Ka thawhpuite'n engtin nge pasal ka nei dâwn tih an lo hriat ka hre lo, min fiam nak nak a, a țhenin," I lo inthup thei hle mai," an ti a, a țhen lahin," Lawmpuiawm viau mah la pasal i neih hnu chuan i lo thawh chhunzawm thei tawh àwm si lo va, kan lung a lêng àwm mang e," an ti a, " Kan ui dâwn che êm mai, nei leh lo mai rawh," an ti bawk a, a hun lai a ni ve bawk a, ka nuih liam mai mai.



*MI DANGTE NÈNA INKHAIKHIN LOVIN NI TINA NANGMA HMASÂWN CHHOHNA ZÊL KHA TEHFUNG ATÂN I HMANG DÂWN NIA*