☆KA TÂNA RUAT☆ - 19 By Dingdi Pachuau

☆KA TÂNA RUAT☆ - 19 By Dingdi Pachuau

A hma ațanga ka lo sawi sa tawh a nih avàngin Pathianni tlaia chaw ei tùrin Chhani chu ka sâwm ta tho a, min hnial nain ka ngaihthlâksak duh tlat lo va, bâkah, a rawn kal khât ve ta deuh bawk nèn, a ngaihawm ve tawh hrim hrim. Ani a awm hi chuan kan bengchheng a, hlim nui rî rawi rawi hriat tùr a awm țhìn bawk.

Nimin lama vawksa kan lei chu U Mama'n a siam a, keiin ârsa ka siam thung a, chawhmeh hi a țhing ai chuan a thar zêla ei kan duh țhin avàngin tlêm tê tê bâk hian kan siam ngai meuh lo, kan chhúngkua tê bâk kan ni ngai si lo va. Tunah chuan Chhani a rawn tel ve dâwn sia, belh hlek a ngai ve dâwn lo thei lo.

A rawn thleng chu a hriat lehpek khawp mai, a rawn ri lût nghâl bawrh bawrh a, Nonoi chu biain," Ka Nonote, ka duat, ei tùr ka rawn ken che a nia, i ei țeuh dâwn nia aw. Ka hmu lo rei che nge ni, i lo lian sawta ka hriat chu!! I hmêl pawh a țha tawlh tawlh mai, min chhùn a," a ti lehpek a, ka nu chuan," Nono, Ânutei hi chuan a va duat mang tak che êm! 'Ka lãwm e' tih zêl tùr aw," a lo ti ve a, an bulah rei awm lovin kan awmna lamah chuan rawn pheiin," Khuallian hmêl țhain chaw ka rawn ei dâwn meuh chuan buai chûk chûk a ngai a ni maw? Awi, a va tui dâwn ve!! Ârsa leh Vawksa, a tui dâwn lutuk!!" a rawn ti leh zat zat a. Remchâng ti zet hian," I lo kal remchâng bawk a, tui min lo leih nghâl mai teh," ka lo ti ve a, ner náng chung hian min rawn en a, hnial erawh min hnial bîk lo. A țûl țûlah min pui nghâl zung zung a, ani hi zawng a mawng a zãngin hna hi a sam a, a ti zung zung mai zêl a, ka tluk lo țhìn hlê a ni.

Kan titi a, kan infiam a; mahse, mak tak maiin U Mama chu a be ve lo rêng rêng nia!! Ka lo chîk ru reng a, U Mama'n a biak erawh chuan a chhâng tho a; mahse, be hmasatu zâwkah a țang lo hrum hrim. Engtizia nge ni le? Manuni'n a thîk vàng kha em ni ang? Manuni'n a rawn hmuin a rawn hre dâwn tihna pawh ni hlei lo chu ho ka ti angreng khawp a; mahse, a insùm reng theih ka rin lêm loh avàng erawh chuan ka sawi chhuak lêm lo.

Mahse, chaw kan ei lai leh a hnu lamah pawh, kan ina a awm chhûng chuan ti zâwk ang, be hmasatu a ni ta miah lo nia! U Mama pawh chuan a hre thiam ve deuh nge ni, a en leh rulh rulh  țhìn a, kei lo chîktu ngang chuan ka hmu leh țhìn. A... be hmasa lo mah se U Mama chu a hua tihna a ni chuang lo va, Manuni thîk loh tùra a awm thiam ve dànah ngai ila a țha ang.

Kan chaw ei lai leh a hnua kan inkawm khâwm lai thlalâk chu status-ah ka hmang ve chuai chuai a, Chhani chuan a lo hmu hmasa ber a," Ka'n hmang ve teh ang," a rawn ti a, a hmang zui ve zat bawk. Eng eng emaw sawiin kan in-text deuh reng a, kan thil sawi lah hi a ho ve thei bawk si a, Nonoi muhìl tawh a rawn chêt țalh țalh tâkah chuan ka mang țha ta thuai a.

Naom-i nèn kan inhmu khât a, a pawi ka ti tehchiam lo nain ka rilruah erawh a awm ve reuh reuh reng a, ngaihtuah chhuah loh ka tum pawhin a thil sawi mawlh kha ka ngaihtuah chhuak zauh zauh. Zahthlâk ka ti a, a pain min ngaih dàn tùr pawh ka ngaihtuah leh țhìn a, ka lu ka thing leh ringawt țhìn. Thil ni thei a ni tlat lo, duh pawh min duh dâwn loh bâkah ka tân pawh duh chi a ni hek lo. Nula pângngai pawh ka ni tawh lo va, nuthlawi fa nei, Mizo pawh ni lo, hnam dang fa nei ka ni. Mizo Society-ah phei hi chuan hnam dang fa nei hi chu khuuutah kan awm!! Kei pawh hi mipa melh ngam tùr, melh thei leh ngaihtuah ngam tùr ka ni lo hrim hrim, fanu ka nei a, engkim huama ka neih a ni a, ani hi ka dah pawimawh ber tùr a ni tawp mai.

Dàwra chhang ka han dah chuan rin loh deuhin Pu Rintea a lo țhu ve kur niin, vawiin chu a office lo teh rêng em maw ni, ka tum loh deuha hmu ka ni si a," E, i lo awm ve reng elo?" ka ti teh ngawt a, ani chuan," A nih hi, naute i rawn hruai ve lo a ni maw?" a lo ti a," Aw, hruai lo, a piin a lo awm thei tho sia," ka ti ve mai a, Naom-i thil sawi kha ngaihtuah chhuak leh thutin ka zak thar deuh thut a, a pa pawh hi a hrilh tawh a nih kha. Chhang chu ka rem fel a, U Mama chuan," Pu Rintea hian a duh a, pack thum kha a lâk tùrin lo dah hrang la aw," a rawn ti a, kei chuan," Aw... a lo ni maw? Lei lei a ngai lo, pawisa pêk a ngai lo aw, i hàwn tawp dâwn nia, Naom-i pawhin tui a tih êm kha," ka lo ti vat a, Pu Rintea lâk tùr chu ka dah hrang zui ta nghâl a. Pu Rintea erawh chuan," Ni lo ve, harsa taka i siam a thlàwna hawn ngawt chu thil tih chi pawh a ni lo, Bawiha'n a ei châk leh tawh nge ni, lei haw tùrin min rawn chah a," a lo ti a. A thlàwna a hawn duh ka rin loh avàngin U Mama hnênah pawisa a pêk luih pawha lâksak lo tùrin ka chah ru ta thung.

Dàwr ațanga ka chhuah chuan Chhana ka tâwk leh ta chiah mai. Kal pelh mai ka tum zet a; mahse, amah zãwk chuan," I chhang siam i rawn dah leh a ni maw? A tui ka ti riau, i lo siam thiam viau a nih hi, a hma kha chuan i siam ngai àwm pawh ka hre si lo va," a rawn ti nghâl a, ka nui ringawt, khatih lai kha chuan siam ngai nâng; mahse, thil rêng rêng hi pângngai rengin a kal lo va. Mihring rilru a danglam thei ang bawkin hun leh nun leh thil tih pawh a danglam ve zêl a, nun ngai rengin kan nung thei hek lo.

"I customer hlunte kâ ațanga ka hriat a ni nghe nghe a, mak ka ti asin aw... mahse, an lo sawi mai mai lo tih ka ei ațangin ka hre ve ta a, ka lei ta zauh zauh rêng a ni," a tih leh chuan," A làwmawm hlé mai, thil dang tih theih ka nei rih si lo va, sum kan mamawh ve tho bawk si, heti lamah hian țan ka han la ve a nih hi," ka tum aia thui chuan ka ti ve ta duah mai.

Haw kawngah chuan ka nui var var reng mai, keia chhang siam ve mai tui an ti chu ka lãwm a ni. Manipur lama ka awm khân ka zir ve pah hlek a, tuna ka siam tak hi chu keima hmuh chhuah liau liau a nia, chu vàng tak chuan nuam ka ti a, ka hlim a ni.

Zànah Naom-i'n min rawn be zãrh zãrh a, a pa chhang rawn hawn tui a tihzia chu a rawn report hmasa ber a, a hnuah lo lèn a châk thu a sawi leh a. Kei erawh chuan a zirna lam ka záwt thung, a hnuah erawh a lo lèn châk viau chuan kâr tàwpah a pa phalna a lâk zet hnua a lo lèn theih tùr thu chu ka hrilh ve ta chauh a.

Zanin chu Chhana a rawn lêng lo. Nizàn leh zàn hmasa khân a rawn lêng a, Nonoi pawhin a lo hre ve tawhin a nêl ve tawh hlê a, ani Chhana lah hian a besawm peihin a chhaih peih khawp mai a, ei tùr lah a rawn ken ziah ti ila ka sawi sual lo ang, chhaiha be peihtu na nâ nâ chu naupang tân pawh nèl loh theih ni hek lo le, ka duh aiin a nêl mah mah tawh chu a ni.

Dawhkàn chunga U Mama phone chu a ri ral ral a, bathroom-a a awm daih avàngin ka lo ensak a; mahse, Manuni hming ka hmuh avàng chuan ka lo chhànsak mai ang nge ka ring raltîr zâwk mai ang tiin ka rilru a insual a, rei erawh a ni lo, la kãngin ka chhâng ta vat a. U Mama a be duh chu a lo ni rêng a, bathroom-a a awm rih thu ka hrilh chuan eng dang sawi lovin a ti tàwp ta daih a! Ka hrilhhai deuh hlek avàng chuan ja beng bul ațanga phone chu la thlain ka en deuh reng phawt a, lungàwi lohna a nei a ni ngei ang chu, inngaizâwng kárah chuan thil thleng ngai lo leh awm ngai lo a ni lo; mahse, U Mama ka ni lo va," A lo chhuah hunah ka be mai ang," ti tala min thlah ka ring deuh a nia, a ti mak ve riau.

U Mama rawn chhuak chu," In nuin a rawn phone che a," ka lo ti vat a," Eng nge a rawn sawi a?" a tih chuan," Biak che a duh thu a sawi a, bathroom-a i awm thu ka hrilh a, a ti tàwp zui nghâl daih," ka ti ve leh a, bu nghutin a phone chu a la a, room-a a luh hma hret chuan," Lungawi lohna nei a ang ka ti," ka ti zauh a, min rawn en zawk a, phone chu a en leh a, min chhàn tum chuang lo chuan room-ah a lût zui ta daih a. An intilungawi lo chiang mai, eng vàng tak chu ni ang maw? Ka lo ngaihtuah tùr chu awm lo mah se ka hre châk mai mai. An kum a tam dun ve tawh nèn, naupang anga intilungawi lo rual pawh an ni tawh lo, inneiha fa neih thuai a hun tawh zâwk si a.

Room ațanga a rawn chhuak leh chu," Thil dik lo deuh a awm em ni?" ka lo ti vat a, chhuat ka nâwhna chu ka dah rih a, ani pawh chuan," A lungawi lo deuh a," a lo ti ve mai bawk, ka rin dàn kha a lo dik chiah a nih chu.

"A va zia lo ve! Hmeichhia chu kan pangchang ve țhìnin thlèm pawh kan ngaih châng a awm ve a nia, tilungawi vat teh khai," ka ti leh a, ani erawh chuan," Ka thlêm dâwn lo, thil nih dàn ka hrilh vek tawh a, a âwih loh chuan a tâwk a ni mai," a ti ve thung a, thlèm chu a tum hmél loh kher mai.

"Tláwm zâwka țan țum a awm ve ngai a nia," ka tih leh chuan," Ka hria alawm," a lo ti leh nghut a, sawi tùr a vâng duh ta viau mai. Țha takin awm se, tluang taka inkawpin innei se lo tih laia chutia an awm chu țha ka va ti lo tak!

A hnuah chuan an inbia a ni ngei ang, U Mama țawng bul bul ri ka hriat chuan duh lo teh mah ila ka ngaithla chhin châk tlat si a, ka zahawmna dah țhain ka beng chu a room bang sì chuan ka dah ta ràn a; mahse, a țawng rih lo va, ka hre lo, a hnu deuha ka hriatte erawh chu a dêngkhãwng hlawm viau mai.

"Ka hrilh vek tawh che a, i ngai kàwi lui zêl a nih chuan tih ngaihna ka hre tawh lo, sawi leh tùr chuang ka hre lo," a ti a, a tàwp vang vang hnua," E, i tih tlat chuan le, i tâna țha ber tùr chu i hria. Chelh theihna che ka nei lo, i zalèn--" lehlam țawng chu a ngaithla leh rih nge ni, a tàwp leh phawt a, a ngawih vang vang hnuah," Ani chu sawi tel miah suh! Ka duh hauh lo! Aw, a tâwk e, duh tâwk rawh, kumkhua atân mang țha!" dam tak hian a ti a, an inbe tàwp ta a ni ang, a reh ta vang vang mai. Ka dung sawn thuai a, tunah khân ințhenna thu an sawi chiang mai a, an inkâr a lo hnawk ru zêk a ni ngei mai, U Mama'n  'Ani chu sawi tel miah suh' a tih kha tu nge le? Chhani a ni thei ang em?



*I MAWINA CHANVE VÊL ZET KHA CHU MI DANG I TREAT DÀN AȚANG LEH I THINLUNG  CHHÛNGRIL LO CHHUAK AȚANGA TEH A NI*