☆KA TÂNA RUAT☆ - 20 By Dingdi Pachuau

☆KA TÂNA RUAT☆ - 20 By Dingdi Pachuau

Chhang ka siam laiin Chhani'n min rawn bia a," Awi, ka thin a rim lutuk!!" a rawn ti nghâl teh ngawt a, ka nui hawk a," A va pawi țhìn ve! In țhenawmte ui in kawtah a rawn e leh em ni?" ka lo ti fiamthu a, a ninzia thu a sawi fo va, a thinrim țhinzia leh ui a ngainat loh phahzia pawh a sawi fo bawk a nih kha.

"Teuh lo mai! Ka rawn lêng lawk dâwn, i awm tiraw?" a rawn ti leh teh daih a," Aw, awm, lo kal tak teh, min pui thei nghâl ang a," ka lo ti vat a, a rawn kal chuan ka zo vat thei dâwn a ni.

A rawn thleng ve thuai a, a rawn luh veleh," Nonoi thil ka rawn lei theihnghilh daih! Ka thinrim lutuk vàng a ni, nakinah a ni mai," a rawn ti nghâl a," A ngai hlei nem, i thinrim bawk sia; mahse, tluang takin i rawn thleng thei tho a, a làwmawm," ka lo ti a, ka nui nain a nuih loh avàng chuan ka nui tàwp leh daih.

"Ngeiawm ve êm alawm, a hma kha chuan engah vak ka ngai lo va; mahse, tunah chuan ka ngawi mai mai tawh dâwn lo, ka ti lêt ve tawh dâwn, ka sual vein ka ngeiawm thiam ve tho, ka zia dik tak ka'n hmuhtîr ang e. Mai mai hian!" a ti leh bawrh bawrh a, ani thinrim ve hi chu, a țawng bawrh bawrh zêl tho a, a inâng thâwl țhìn niin ka hria, reh pawh a reh hma, inang lo tak kan ni.

Ka thil tih lai chàwlin amah chu ka en a," Hahdam phawt teh, chumi hnuah thil awm dàn chu min hrilh dáwn nia, tui i in duh em?" ka tih chuan," Min lâksak dâwn chuan in duh e," a lo ti ve mai a, ka kal nghâl vat a.

A hahdam vang vang hnu chuan," I U Mama bialnu kha maw le, tukinah min rawn àn khum tehrêng a nih kha! Ka chaw ei pawh a tui hlei nem, a hma pawhin ka hrilh tawh che kha. Engah vak ka ngai duh lo va; mahse, mi inkâr tibuaitu ka ni thei tih hriain rawn lèn pawh ka insûm a, U Mama phei chu biak pawh ka biak loh phah, inthiam lo chung chungin," a ti dap dap a, ngun takin ka lo ngaithla a. Sawi zawm zëlin," A țawngkam chhiatzia chu maw, sawi chhuah leh pawh ka duh tawh lo, miin hre ve lo se ka duh a ni tawp mai. 'Nangmah hiam huam vàngin kan ințhen, i tluang hauh lo ang' min ti a nih chu, an ințhen tak tak em ni?" a ti leh a, kei chuan," Ka hre lo, U Mama ka la záwt miah lo va, min hrilh bawk si lo," ka lo ti a, an inbiakna ka ngaihthlâk rûk thu erawh ka hrilh lêm lo.

"An lo ințhen tak tak a nih tâk leh a țha. Khatiang țawngkam chhe lutuk kha chu in mo atân pawh ka duhpui miah lo che u, nangni lah in dam ropui si, hrehawm in ti dâwn lutuk! A hmain ka hrilh tawh che kha, min thîk ka tih kha maw, heta chaw ka rawn ei zàna kan thlalâk ka status kha a lo hmu a, khatah pawh khân min rawn àn khum tawh bawk! Tukin khân ka bulah awm na se chuan ka kêk nawk nawk duh hialin ka ring asin. Lo inngaizâwngin kan inkârah eng emaw deuh chu awm se chuan ka hre thiam ang; mahse, U Mama lah Serafim ang maia thianghlim, bawlhhlawh kai lo a nia, hre chiang viau tawh tùr a nih tawh tehlul nèn! A hmuh lai ngeia U Mama fawh siah mai a nia ka nâp ni!" a ti leh barh barh a, a thil sawi dàn chu ka nuih a zat êm avàngin ka lo nui kar kar a. Ani lah chuan," Nui teh suh! Ka ti tak tak alawm, ka ngeiin ka thin a rim ve êm a ni, vawk ni lovin mihring ka ni ve a, mi ã ka ni bîk hlei nem," a ti leh a, a hmêl a tak si a, lo thinrimpui tùr ka nih tehlul nèn a thil sawi zawng zawng chuan ka nuih a ti za tlat a, ka inhmuam ûp hlei thei lo. Thinrim hmêl deuhin min rawn en a, kei ka lo nui zêl si, a hnuah phei chuan a thinrim rei thei ta bîk lo, kan pahnih chuan kan nui dùn ta vak vak a.

Chhang dah tùr chuan min thlah chho a; mahse, a tlãn zui nghâl daih. U Mama hmuh duh lovin hmuh a hreh tih a ni a, ka hriat thiam rual rualin ka khawngaih a, amah hi ni ve ta ila a awm dàn  ang tho hian ka awm ve thoin ka ring. A sawi ang tak taka Manuni'n a va àn khum a nih chuan Manuni pawh a thinrim hlê tihna a ni ngei ang a, Chhani tân lah a lungawithlâk loh viau bawk a, an dinhmun ațangin thlîr ve ve ila, ka thiam lo dùn lêm lo. U Mama hi la záwt chiang ila a țha ang, kumin ngeia nupui neia fate nei ve tawh se ka tih tawh tehlul nèn, a tlawlh a nih hmel ta si.

Zanriah kîl laiin ka zâwt ta chhin a, ani pawh chuan an ințhen thu chu min hrilh ve mai bawk a, ka nu chuan," Kan duh dàn ang vek hian thil hi a kal thei si lo va," a lo ti vang vang a, U Mamate ințhen chu pawi a tih hmel viauin ka hria, ani hian nupui nei tùrin kei aiin a duh záwk tih ka hria a, a àwm ve tho mai.

Pathianni chawhnuah Naom-i a rawn lêng a, a uin a rawn thlah a; mahse, a rawn lût ve lo thung. A lo lèn khàt tawh avàngin nuam a ti khawp mai a, a la naupang ve bawk nèn, zêp nei lêm lova thil sawi bawrh bawrh chi tih takah ka chhang siam a ei châk thu a sawi leh mauh mai a, siamsak loh chi rual a ni lo. Ka siamsak a, min lo pui ve bawk a,  Nonoi lahin a lo ko ve chhên a, kawm tùr a neihchhun a ni miau mai si a, pakhat lahin a chhawnchhaih thiam bawk si.

Zanriah ei tùra ka sàwm chuan a duh leh tlat lo," Âpate an khua a har ang," a ti leh mauh mai a, ka chawhmeh siam erawh chu a ei chhin a ei chhin a, tui a tih thu a sawi chuan," Hàwn ve rawh aw," ka ti a, chu erawh a lo hnial a, a pa eirawng bàwl tlai a nih avàngin hmun danga chaw ei daih chu a duh chiah lo niin a sawi bawk. "A țha tho a; mahse, Pathianni tlai tin i ei ziah tho a, i pa chu heta chaw ei ka'n dìlsak dâwn che em ni? Chaw ei kham veleh U Mama'n a thlah che ang a," ka tih leh pawh chuan min hnial tho, sawi chian fak nei lo chuan a nè nè kual a, lunglohah la chuang lovin ka sâwm nawn ta bîk lo. A haw tùr U Mama'n thlah a tum chuan," Min rawn hruai dâwn alawm," a lo ti leh mai a, a phone chu a hmet pah mawlh mawlh a," A rawn tlãn mêkin ka ring, khitah kawngpui pângngaiah khian ka han nghâk ang e," a ti leh a, Nonoi nèn kan thlah a.

Zanriah ei hma hretin Pu Rintea phone call ka dawng a, ka han chhàn chuan Naom-ite chêtsual chanchin min rawn hrilh ta mai a, hlauhthàwnna avàngin ka thâ a rawn khùr nghâl dar dar bawk. Civil Hospital lama an awm thu leh Naom-i nikhaw hre lova a la awm reng thu min rawn hrilh phei chuan bang ka nghèng deuh rawk rawk a, phone erawh ka hûm nghet hlê thung.

Ka nuin Nonoi a lo awm theih tho avàngin U Mama nèn Civil Hospital lamah chuan kan tlãn ta thuai a, Naom-i awmpuitu pawh an lo awm nual mai, a pain min lo chiauau vat a, Naom-i hmêl ka han hmu zet chu insùm har ka va ti tak! Ka khawngaih lutuk a ni. Natna khumah muin nikhua a hre lo chu a ni si a, ka mittui a tlâk loh nân ka mit chu ka khap sak sak a, inchhìrna nasa takin min tuam hlup hlup mai, engati nge ka lo hawtîr mai mai le? Ka inthiam lo tak zet, sawi ngaihna pawh ka hre lo, lo chelh lui tlat ta ila chuan tunah pawh hian natna khumah a mu kher lo tùr. A pawi êm mai, tih theih lah chu a awm tawh dèr mai si lo. Engtin nge maw an chêtsual rêng rêng ni? An tlãn chak lutuk tihna a ni thei ang em? Nge an vànduai ve hrim hrim? Engati nge chaw eia ka sàwm lai khân ka lo sàwm luih țàwng țáwng mai loh aw? Min hnial țhìn tih kha ka hre sa tho si a, a rem tih hma kha chu lo sâwm tùr ka ni asin le.

Nonoi riahsan thei ka ni si lo va, ka haw mai loh chuan. Naom-i lah a mut ngai rengin a la mu a, tih theih lah chu kan nei dèr si lo, rilru a buai, hrehawm ti tak leh inthlahrung ru dûkin ka awm a, ka rilru a ipik ngawih ngawih a ni ber mai.

Ka muhìl chuang lo, Nonoi eng mah hre ve lova a muhìl thaw ri sâk sâk chu ka ngaithla reng a, a u Naom-i chesualin damdawi inah nikhaw hre lovin a mu reng a ni tih hre thiam ve ta se, a mu thei bîk ang em? A, ani ang rual hi nih daih theih ka va châk tak!

Engtikah tak Naom-i chu rawn harh chhuak thei ang maw? Na tak a nih loh hrâm ka beisei. Pu Rintea ka text dâwn em maw ni? Mahse, a buai ang, a rilru pawh a hah ve dâwn asin, lo va text buai ve sek chu a tihchi loh ang.

Buai ka sawi thei bîk lo, damdawi in lamah ka kal ve lo thei lo va, ka nuin in lamah Nonoi a lo awm a, U Mama'n damdawi inah min thlah a, ani pawhin a hma angin dàwr a nghâk mumal thei bîk lo. Min kalpui thùl a, Naom-i rawn harh chhuah tâk hnuah erawh a kal ngun ta lo deuh. Naom-i hi chu kan chhûngkaw tân mi bîk a ni ve tlat si a, kan ngaipawimawh lo thei lo a ni.

Naom-ite accident dàn chu anmahni tâwk zâwnga rawn tlãn bolero khân side a la lo lutuk a, a rawn tlãn chak ve deuh bawk a, driver a rui pah deuh bawk nèn, a fîmkhur zo lo va, Naom-ite chu a rawn su ta ni àwm tak a ni. Naom-i rawn hruaitu(Scooty khalhtu) a cousin Ngaihsanga kha chu vànneihthlâk lutukin a na vak lo hlauh a, a bân leh a keah pilh nian nuan neiin a bân dinglam ruh a ti na deuh bawk a, chu zawng chu. Naom-i erawh a phurh zâwk a ni a, a invawrh lawp lo thei lo va, a tlâkna lamah a ke veilam ruh a tliak ta a ni. A chal a tauh bawk a, kha kha a thî duh hle a, an accident zàna kan han kal pawh khân a kawr vêlah pawh khân thisen a lo la kai nghe nghe a nih kha, a chal tauh kha doctor-in a ngai serious khawp mai a; mahse, a lo serious lutuk lo hlauh a, a tihzia tak tak a ni. A harh chhuah hnu khân ka awmpui a ngen tlat mai a, ka hnial ngam lo. Pu Rintea inthlahrunzia mai chu, a fanu chu a han thlëm a; mahse, a fanu hi hmeichhe luhlul ve tak mai a ni a, keiin ka lo hnial bawk si lo va, a pa thlèmna chuan awmzia a nei lo. Ka huphurh viau a nia; mahse, Nonoi a piin a lo riahpui thei ve mai a, a tihzia tak tak a ni. Ni hnih hnuah cabin-ah kan insawn thei ta hlauh a, rawn tlawhtu pawh an awm nak nak reng mai, chhûngkhat laina an ngah tehlul nèn, ka awmpui a duh tlat mai hi mak ka ti. A nu Pi Mawitei chhûngte lam pawh an rawn lang ve tho, a nu chhûngte an ni a, an inpawhin an innêl viau bawk sia; mahse, anni aia kei min thlang tho hi eng ka nih loh tehlul nèn, min lo ngaina ve tak zet a nih hi ka tih phah ta.

Damdawi in lamah a awm rei a, thla khat a tling țhelh ang chu, in lama a awm hnuah pawh min la lam zêl a, an inah lehzêl va lan chu ka hreh ve deuh a. Lianin nula ve uaih tawh mah se nâ a lo tuar ve bawk nèn, nu a nei tawh si lo va, a rilru no a chhuak a ni chêk ang chu, zànah țap chungin min rawn phone a, an inah ka va kal phah ringawt nghe nghe.

"Au Ruatpui, hetah pawh min awmpui leh tho la? Âpa leh À-u hi chu mipa an ni bawk sia, min buaipui tùrin ka duh lo, min hre thiam lo," a ti deuh tlat a, a pa leh a u awm loh lai a ni hlauh a, ka inthlahrung lo deuh. A thil sawi chu an lo hria ang tih ka hlau.

"Âpa bulah pawh ka sawi tawh a, i thu thu a nih thu min hrilh a. Lehkha zir ka ngai dâwn bawk si nèn, home tutor-ah i țang pah thei ang. A thlàwnin ka ti miah lo a nia," a tih leh chuan," Naom, ngun taka ngaihtuah a ngai a ni, awlsam taka 'aw' pawh nghâl zung zung theih a ni lo," ka lo ti ringawt a. An in thleng thlenga awmchilh chu a fuh ka ti chiah lo deuh a, mi pawhin min sawi duh lutuk ang, an pafaza ni se miin an sawi duh an nia, kei lah hnam dang laka fanu nei, mi sawi duh êm êm bawk. A, ngaihtuah tùr a tam lutuk.

Ni hnih chu ka tlawh ta lo. Phone-ah erawh ka va be reng tho a, țawng erawh a țawng țha duh vak lo. A rilru ka hliamsak em maw ni ka ti rilru deuh a, nuam lo ka ti ru khawp mai; mahse, a duh dàn anga awm ringawt kha chu thil țha ber a ni lo tawp ang, ka chhûngte bulah pawh ka sawi chhuak duh lo, rem pawh an ti bîk lo ang.

Damdawi in ațang khân Ningàniin kan chhuak a, ni hnih chhûng ka tlawh ta lo kha a nia. Ka dam chuan Pathianni inkhâwm bàn lamah Chhani nèn va tlawh ila ka ti rilru a; mahse, lêng tùra Chhani ka lo nghah dar dar laiin Pu Rintea hmêl ka hmu thut mai! Ka lo chiauau vat a.

Ka nuin a lo hmuh chuan lo be ve vatin kei chu thingpui buaipuiin ka kal nghâl daih a, Nonoi'n min zui avàngin ka chhaih a, thingpui ka siam lai chuan a lo ngèn ve a. Nichîna kan in lai khân a in mang lo va, a ril a la tâm lo a nih kha ka ring deuh ngawt kha a nia.

Thingpui ka pêk hnu lawkah Chhani a rawn thleng ve a, a rawn ri leh nghâl hlut mai. A in tùr siam tùrin ka kal sawn leh nghâl a, ka va pêk chuan Chhani chuan," Awi, i va fel tak! Thingpui pawh ka in hman lo alawm, min rawn tur sek bawk sia," a lo ti a, ka nu chuan," I țhiannu hi chuan a va tirethei țhìn tak che êm!! I fel hnûp hnúp țhìn teh e," a lo ti ve a, ner nâng chunga Chhani ka va melh chuan nuam ti zet hian a lo nui sûng a.

A hnu deuhah Pu Rintea chuan a lo kal chhan chu sawi chiangin ka nu a biak dàn chu a sawi a, a tàwpah," Chutiang chu thil awm dàn chu a nia. Ruatpui, thil mawi leh àwm lo ngaihin i ngai tih pawh ka hria a ni, a dik reng tho mai, inthlahrun pawh ka inthlahrung tawh khawp mai; mahse, tihngaihna dang ka hre lo a ni, Naom-i rilru lenzia leh luhlulzia chu i hriat kha, ka rawn ngèn tawp mai che a ni," tiin a hmaa Naom-i'n min ngenna ang tho kha a rawn sawi chhuak a. A fanu awmpuia an ina awmchilh tùr leh a fanu school kal theih loh chhûnga a zirlai zirtîr tùrin min rawn bia a lo ni, ka nu a rawn sawipui phawt a, a dawtah keimah.

Chhàn dàn tùr pawh ka hre thiam mai lo; mahse, ka thu tlûkna tùr erawh hre sa ruakin ka inhre thung. Hnial duh teh mah ila ka theih ka ring lo va; mahse, keimah thu pawhchah erawh ka tum lo, ka nu thu thu ni mai teh se.

"Ka nu tih dàn dán a ni mai."



*HMANGAIHNA CHANCHINA THIL HLAUHAWM BER CHU KHA HMANGAINA KHA A TAK NGE A DER TIH I HRIAT LOHNA LAI TAK KHA A NI*