☆KA TÂNA RUAT☆ - 21 By Dingdi Pachuau

☆KA TÂNA RUAT☆ - 21 By Dingdi Pachuau

Ka nu leh U Mama remtihpuina thlapin Naom-i awmpui tùrin ni tin an inah chuan ka va kal ta a, zàn erawh ka riak lo. A nat zualpui laiin ka awmpui rih mai dâwn a ni, in lamah ka nuin Nonoi a lo awmpui ve thung a, thla hnih khat chhûng vêl bâk ngai lo tùrah ka ngai.

Awmpui an lo nei ve ngei tawh a, an dinhmun enin àwm ka tihpui viau mai. An hman lo ve hlawm si a, in lo tifai tùr leh eirawng lo bàwl tùr lo awm ringawt pawh anni tân chuan a țha dâwn êm mai. Ani pawh chu zànah a riak bîk lo, zîngah a kal a, zanriah ei khamah, hmun a tihfel vek hnuah a haw ta chauh țhìn a ni àwm e. Ani awm tho mah se Naom-i buaipui ka hna a ni a,  ani'n a hna a thawk a, keiin ka hna, kan intibuai tawn lo. Biak erawh kan inbe zauh zauh a, a fel reng. Naom-i kaihhnawih thil chu ka kutah ka dah a, thil dang erawh ka khawihpui lo.

Kâr khat chhûng chu lehkha a zir peih lo phawt a, kan titi a, a duh dàn dánin ka awm ti ila a dik ang, a ei châk zâwng ka siamsak a, ka leisak a, nu a mamawh êm êm laia a nu a awm loh miau avàngin a dinhmun ka hriat thiam a ngai a, ka hre thiam rêng bawk; mahse, matric exam hmachhawn tùr a nih avàngin a inthlahdah reng thei lo ang tih chu ka ngaihtuah reng tho a, a duh dànin ka awmpui phawt ang a, a hnuah ka duh dànin ka awmtîr ve thung ang.

Kâr khat hnuah chuan tlêmin kan hun hman dàn ka her ta hret hret a, a nâ pawh a zia hret tih ka hria, lehkha zir thei tùrin a rilru ka buatsaihsak hret hret a; mahse, taksaa na nei a nih vàng erawh chuan a rilru hahtîr viau ka duh lo thung. Tlêm tê têin ka zirpui chho a, a rilru hi a chak ve hrim hrim bawk a, thil a harsa lo. Damdawi in lama a in-checkup chângin ka zui a, ka tel lova kal duh hek lo le, chu chu keiin amah kar nân hmangin a theih tâwk china țhaa lehkha zir tùrin ka ti ve thung a; mahse, ka nawr viau duh lo. Khumah chuan mu reng bîk lo mah se school kala class kal thei chi a la ni lo, a ke chu doctor-in hman a la phal lo va, in chhûng dungah pawh a kal tam lo.

Joel-a nèn kan inhmu zauh zauh lo thei lo va; mahse, min be ngai lo, ti ila ka biak hmasak hi chuan min chhâng tho a, chuti a nih loh chuan min be ngai lo, a nau erawh a ngaihtuah ve tho tih ka hria, a rawn haw laia a nau nèn kan awm dùn lo a nih chuan a nau be tùrin a nau room-ah a kal ve ziah tih pawh ka hria, ka awm erawh chuan a rawn dâk ngai lo.

Naom-i ei tùr leia an in piah dàwra ka va kal chuan mi min sawina ka hre ve ta chiah mai. Dàwr nghâktu, nu thau lam deuh, ngo zet mai chuan min lo nuih sângin," Pu Rintea'n Naom-i awmpui tùra a chhawr nuthlawi an tih kha i ni em? Nuthlawi a ni an ti mai zêl che a, hetia en tawp hi chuan nuthlawi pawh i ang lo," a lo ti bawrh bawrh a, a thil sawi chuan min ti zak viau mah se huata en chi a ni si lo va, za lo zet hian ka nui ringawt. Ka nihna dik takin a sawi a ni ve mai a, fa nei tawh si, pasal la nei bawk si lo kha ka ni miau a, huat chi a ni lo. Chutiang ngaihtuaha ka rilru ka sèn lai chuan," Nu ber a awm tawh bawk si lo va, hetia a hire che pawh hi àwm lo pawh ka ti hran lo, nula dang pawhin an rawn lènchilh nasa țhìn alawm, Pu Rintea hi chu; mahse, amah hian a ngaihtuah lo ve a, tu tute emaw anga ngaihtuah deuh hlek chu ni se chuan nupui pawh a nei leh daih thei tawh ang! Pu Rintea hi zawng a fel ve êm mai a, nupui țha deuh nei leh se ka ti asin, a khua lah a har dâwn hian ka hre khawp a, a la upa hran bawk si lo," a ti leh bawrh bawrh a, a țawng duh bawrh bawrh viau a nih àwm hi.

Miin min sawi ngei ang tih ring sain he hna hi ka thawk lui ta tho a, ka nuin," An mamawh che a, mi sawi vènthàwn vàng leh hlauh vàng maia Pu Rintea hnial ka duh lo. I rilru tikhauh sauh sauh la, mi sawi tih vêl mai maiah buai suh ang che, thu dik  chu thu dik a ni reng tho, miin dâwt an sawi avàngin thu dik kha dâwt a nih phah chuang lo," tiin min fuih kha a nia, ka rilruah ka vawng ru reng a ni. Pu Rintea hi ka hmu tam vak lo, Joel-a ai pawhin ka hmu tam lo zâwk. Hmuh châng erawh hi chuan țha tak leh nèlawm takin min bia a, dik taka sawi chuan kei hi chuan ka zah a, biak pawh hi ka hreh deuh țhìn, Naom-i thil sawi vàng hrim hrim pawh khân ka zah lo thei lo. Amah ka hmuh châng lah hian automatic-in kha thil kha ka hre chhuak zêl lehnghâl a, a hriat chhuah ve țhin ka hlau, a nuih a za dâwn êm asin, thil ngaihtuah chhuah nuam tak chu a ni miah lo.

Thla a ral ve leh ta. Naom-i pawh a zia chho zêl a, hmasâwn lam hi chu a chak vut vut thei țhìn lo va, thla khat dang han ral leh se rilru dam takin Naom-i pawh ka kalsan thei tawh ang chu, class pawh a kal chhunzawm thei ve tawhin ka ring bawk.

Lehkha ka zirtîr zawha a ei tùr ka siam laiin Chhani'n min rawn be teh tlat a," Zaninah ka rawn pêng lawk dâwn, kha lama rawn kal kha a ngai a," a rawn ti a, a rawn thaw zui ham ham a, chhùn lamah hi chuan kan inbe khât ta deuh a, hun ka neih lohzia, ka buaizia lah a hre chiang; zàn lamah erawh kan inbe zauh zauh, kan inbiak loh leh kan in-text bawk a.

"A nih tak chu, lo pêng ngei ngei rawh. Eng nge i tih a? I va hman teh tlat ve!" ka tih chuan," Hman vak lo, thuamhnaw ka țhui lawk a, inneihnaa hâk tùr," a rawn ti ve leh a. Innei tùrte chu ka zâwt leh a; mahse, ka hriat mi an lo ni lo.

"Puan rawn entîr che ka duh vàng a nia, a mawi sia, a tlâwm bawk sia, țha ka ti êm a ni," a rawn ti leh a, kei erawh chuan," Sum lam hi... min tumsak theih dâwn chuan," ka lo ti zauh a, ani chuan," Mai mai a! Kha, tunah pawh i inhlawh reng alawm, kei aiin sum i ngah daih zâwk," a rawn ti a, ka lo nui hak mai.

"Nula tlawngãwl leh nu chu kan sum khâwl a inang thei nâng, fa la nei ve lo tân erawh hriat thiam theih a ni lo maithei a, keini ang nu tawh tân chuan sum khâwl hi a har, engkim mai hi fate tân kan ti zêl tawh a," ka tih leh chuan," Tenawm! Fanu rawn inla nei viau suh, mi lah chu i rawn hmusit rawngkai deuh em? Ka ei lo viau che a ni, ka va ei lo tak che!" a rawn ti nang nang a, kei erawh ka nui hak hak thung.

Zàna a rawn kal chuan Nonoi thil a leisak chu a phawrh chhuak hmasa phawt a, a han duat kual vêl leh a, țûl lo czet hian a pawm leh rih bawk a, a chêt vêl dàn chu ka va ei lo tak! Hmanhmawh lo lutuk, samuang ang mai a ni.

"Hmanhmawh ve la?" ka tih chuan," I ninawm chêk chûk!" a lo ti hluk a, U Mama, a room ațanga a rawn chhuah lai tak chuan a hriat ngei tùrin," Khati khân min ti hauh suh, mo atân ka duh lo palh mai ang che aw, i hawi lawl lawl mai tùr asin!" ka ti a, Chhani chu a rawn hawi vat a, U Mama lam en lehin min rawn en leh a, a meng rum mai mai asin.

"Tu maw hawi lawl lawl ang?" U Mama chuan a rawn ti ve a, ka rin loh deuh hian Chhani chu  a sen țân țân a, zahzèlah Nonoi chu a be zui ta daih a. He nu tak hi chu aw...lài hma lutuk mai.

Puan chu a mawi hlawm khawp mai, a man pawh a to lo, a màwi dàn leh a puan țhat dàn ngaihtuah chuan a man chu tam lo tak a ni mai. Pawisa ka neih loh vàng erawh chuan a chuan awt ve deuh mah ila ka la ngam lo, ka mamawh viau pawhin ka hre lêm lo, a to loh vàng ngawta lâk ringawt zawng, mi hausa pawh ka nih loh hi.

"La ve mai mai teh, installment-in a lâk theih, a mawiin a tlâwm si, inren viau lo teh," Ka la dâwn lo tih a hriat chuan a ti leh a, U Mama chu enin," U Mam, puan hi i nau hi leisak teh, a țha si, ka ui," a ti leh ringawt a. Ani chuan," A duh lo a ni ang chu," a lo ti mai a, rang zet hian Chhani chuan," A duh!! A inthlahrung a, a sawi ngam lo a nih kha. Fanu a nei tawh bawk sia, leisak rawh aw," a ti leh vat a, nui chung hian U Mama chuan," Nu berin i tih tlat chuan ka hnial ngam nâng che!" a ti a, LalChhani hmai sen nasatzia mai mai chu, U Mama ngei pawh hian Chhani'n a star a ni tih a hre ngei ngei ang.

Naom-i class kal theih hnu chuan an inah ka kal ta lo. A chanchin erawh ka zâwt zauh zauh a, fîmkhura indìm viau tùr chuan ka chah ve bawk.

Pathian zâra dam chuan hun hi a kal chak a, Nonoi pawh a hrisêl chho ve zêl a, ka lãwm viau mai. Chhana pawh tlêm lai deuh khân a han reh deuh vang vang kha a nia; mahse, tunah chuan a rawn lang leh zauh zauh tawh. Ka haw lo va, mi ka biak dàn pângngaiin ka be mai. Amah hi ka beisei leh tihna a ni lo a, ka huat tlat chuan keima tân a hrehawm dâwn a, chu chu ka duh lo a ni. Amah vànga mahni tân harsatna insiam ka duh lo, hlim taka hun hman ka duh zâwk.

Pathianniah Naom-i'n min sàwm avàngin an inah kan nufain kan va lêng a, Joel-a chu a room-ah a awm lehpek a, Pu Rintea'n inlêng nula pahnih a lo nei bawk, ani hi a lo luck viau a nih chiah hi.

"Au Ruatpui, Ânuin min rawn bia a, rawn kal a tum a, ka lo hmu duh ang em?"

Mak ti tak hian ka en vat a, ani erawh chuan ka thu nghâkin min lo en kal mai. Chhàn dàn tùr ka ngaihtuah a, ka ngawi deuh reng phawt a, amah vêk chuan," Ka chesual tih kha a hre ve chauh a,  min rawn kan a duh a," a ti leh sap a.

"A pawi hlei nem, a ngaihtuah che a nih chu," tiin ka chhâng ta ringawt a, ani chuan," Âpa hi ka hrilh miah lo va, a thin a rim ang tih ka hlau a; mahse, Ânu chu ka ngai ve deuh tho bawk sia, hmuh ka châk tho," a lo ti leh a. Nâ a tuar a, nu uapna hnuaia awm a thlahlel ang tih ka hria, a nu bula pangchan pawh a châk dâwn asin. A hmuh lohna a rei tawh a, amah hringtu a nu a ni bawk a, thil ti sual mah se a nu a nihna a bo lo va, a ngaihna pawh a bo lo tawp ang.

"I pa chu ka lo sawipui dâwn em ni ang? Ka lo sawisak che i duh em?" min beisei deuh nia ka hriat vàng chuan ka ti leh a, a lu a lo bu nghat mai." Kan inhmuh laiin min hmu dùn ang tih ka hlau a, bâkah, kan ina a rawn kal chuan Âpa pawh a hmu ngei dâwnin a lang bawk sia," a ti leh a, a sawi dik viau mai.

A inlêngte haw hnuah, hun remcháng ka hmuh veleh chuan a pa chu ka sawipui ta chiah a, ani chu a ngawi reng a, a hmêl ațangin a rilru tùr ka hriatsak thei lo. Eng ang rilru pawh chu lo pu mah se Naom-i duh ka tihsak tawh tho a, ka hlawhtling tawh tho tho.

Pi Mawitei chu a rawn kal ta ngei a, a rawn nalh lehpek hlê mai. Kei chuan hmu mah ila ani chuan min hmu ve lo, a hma ang chiah thovin a lo la nalh! A hmêl pawh a upat hmèl chuang loh, a la ngai reng, a inenkawl uluk tih a hriat hlêin ka hria.

Naom-i'n a nu nèn an inhmuh laia kan haw  daih a phal si lo va, a room awmna lo lamah kan nufain pangpár kan en dùn a, ni hlimah kan țhu diai a, boruak a nuam khawp mai. Ka en loh lai takin Nonoi'n pangpâr chu a lo mal leh țhìn a, kan han inhau leh bawrh bawrh bawk a.

Naom-i'n min rawn bia a, a nu nèn an inhmuh zawh chiah thu sawiin a room lama kal tùr chuan min rawn ko a lo ni. Kan nufa chuan tho vatin a room chu kan pan vat a. Pi Mawitei chu a haw tawh ka rin tehrêng nèn, a lo la awm ve reng niin. Nonoi nèn kan inpawm bâwr si a, kan lût min lo hmuh chuan," E, Ruatpui, i lo la kal țhìn a ni maw? I va fel ve! Kha kha i fanu em ni?" a lo ti nghâl bawrh bawrh a.

Chutih lai chuan Pu Rintea chu Naom-i room kawngkaah chuan rawn dâkin Pi Mawitei biak lawk a duh thu chu a rawn sawi a, a kal sawn zui nghâl a. Pu Mawitei chu tho nghâl vatin nui sâng chung hian," Ka'n kal nghâl ang e, i pa hian min lo ngai viau a nih àwm hi, ka'n hmu ang e, kan inhmu leh thuai dâwn nia," tiin, Naom-i kut chu a hmersak vang vang a, min rawn enin," I lo enkawl a, ka lãwm lutuk aw," a ti leh a, a fanu a vawnna chu thlahin a chhuak zui ta nghâl a.



*HLAWHCHHAMNA HI HRINGNUNA BET VE TLAT A NI A, HLAWHCHHAMNA AȚANGIN HLAWHTLINNA A AWM THEI ȚHÌN*