☆KA TÂNA RUAT☆ - 24 By Dingdi Pachuau

☆KA TÂNA RUAT☆ - 24 By Dingdi Pachuau

Thil dangin ka rilru a luah thei lo, inneih chungchâng mawlh chu, fiamthu chu a ni si lo maw... Ani patling meuhin ka nu hnênah fiamthua inneih chungchâng a sawi chu thil rinawm tak a ni thei lo, eng vàng nge ni ang? A fanu duh dàn zàwmin inneih chu a rawn duh ta mai tihna a ni thei ang em? A ni thei mai lo'ng maw? Mahse, nupui pasala inneihna chu kalpah thil mai mai a ni lo, ngun tak leh fîm taka ngaihtuah ngai, phùr thut vànga tih mai mai chi a ni lo; mahse, ani ang patling, thiamna leh finna lamah pawh pa vàntlâng chung lam chin chuan a hre sa vek tawh a, a fate pawh an nula tlangvâl rual tawh a nia...

Ka thaw leh hawk țhìn. Awmzia nei lovin ka ngaihtuah a, thil țha ngaihtuah chhuah lah ka nei hek lo. Ngaihtuah loh ka tum lahin ka thei dèr bawk si lo va, a enga mah hmain ka rilru a buai nghâl dèr chu a nih àwm hi. Min duh ni se chuan ka hre thiam deuh hlek ang a; mahse, min duh àwma a awm leh min duh tùr àwma min en ka la hre lo va, min duh lah ka ring hek lo, heti mai hi ka nih hi... mahse, heti chung hian min neih a duh tho tihna chu a nih hmèl bawk si a, ni lo'm ni? A... ka hre thiam lo, ka ning! Ka ngaihtuah chhuak dâwn chuang lo, ka lu a na zo vek tawh!!

U Mama'n a hriat ve chuan," Mâte, in lo induh tawn reng tihna em ni?" tiin min zâwt a, uar zeta lu thin pah hian," Teuh nâng! Min neih a duh chhan hi ka hre thiam hlawl lo," ka lo ti vat a. A ngawi deuh vang vang a, ka melh zauh zauh avàngin min en deuh reng tih ka hria, min ringhlel chu a ni êm lo'ng maw.

"Pu Rintea hi eng nge i hmuh dàn ni rêng rêng? Ani chuan neih che a duh tih a a nia, inneihna chu fiamthu thawh nâna rawt chhuah chi a ni mang si lo va," a ti dam leh thlap a. Tháwk ka la hak phawt a, țawng sual hlau ru tak chung hian," Naom-i pa a nihna angin ka en tawp, chutiang chu ka hmuh dàn a ni bawk," ka ti a. Naom-i'n inneih chungchâng a sawi tawh tih leh chuta țanga Pu Rintea ka zah thar deuh tlat thu erawh ka sawi lang duh lêm lo.

A ngawih leh vang vang hnuah," Pu Rintea hi pa fel tak leh fate pawh ngaihtuah tak niin ka hria a, ka hmuh dàn a nih chu. Kan chènpui kan laina hnai emaw kan țhenawm hnãi emaw a nih loh miau avàngin a nungchang tak tak chu kan va hre thei bîk lo va; mahse, mi sual tak a nih chu ka ring lo. A țawng tam lo nain a nèlawm ru riau ka ti bawk a, mi fel tâwk tak chu a ni ngêi ang; mahse, chutih rual chuan thil dang daih, engtin nge an nu khân a kalsan theih aw tih ka ngaihtuah rauh rauh țhìn," a rawn ti teh daih a! A thil rawn sawi chhuah avàng chuan ka en vat nghe nghe.

Ni e, kha thil kha, a chhan tak chu hriat a har deuh maithei, amah Pi Mawitei berin a chhâng thei ang. Pu Rintea pawh hian a hre tho maithei bawk, khatiang boruakah kha chuan a hma deuh ațang pawhin an inkârah rinhlelh theih tùr thil, han hmehbel theih tùr a lo awm ve deuh tawh ngei ang, nge ni, Pu Rintea hian a nupui kha a duh êm avàng leh khatiang lam kha a ngaihtuah chhin ngai loh thil a nih avàngin a ringhlel chhin ngai lo zâwk? Lo rinhlelh ve chhin tùr hi a ni ngai a; mahse.. mi rinawm leh mi dikte hi chuan mi hi a pâwnga takin an ringhlel ngawt ngai lo tih ka hre chhuak leh vat a. Ka nu pawhin ka pa kha a ringhlel ngai bîk tawp lo ang le, rinhlelh kai lo tùr khawpa thianghlimin an kawppuite mit hmuhah an khawsa thiam pawh a ni mahna, sual fing phakar over deuhte hi chuan mi hi an bum thiam ve chiang êm mai.

Ka ngaihtuah kual zêl a, ka pain keini aia nula dang thlangin min kalsan a, Peka pain nula vàngin a nupui fanaute a kalsan a, Pi Mawitei'n tlangvâl dang vàngin a pasal fanaute a kalsan bawk a, chu mai a la ni lo, kei pawh ka pasal tùr ngèi ngèiin kan inneih hma lawkin hmeichhe dang, a cousin ngawih ngawih lakah min rinawm lohsan bawk a, mak ve deuh chu a tawngtute kan hnaih kual vek mai hi a ni. Ngaihtuah neuh neuh hian keini chhûng hian chhiatna hrî hi paiin kan bula mite-ah kan theh darh ta em maw ni le tih tùr hial a ni.

Ka țhian țha ber mah ni se Chhani chu ka la hrilh duh rih lo va, ka bulah a la sawi lêm lo bawk a, thu tling tak a la ni chiah lo ka ti deuh. U Mama'n a hrilh ka ring lo va, ani hi chu a țawng tam lo ve êm mai a, țûl ka tih chuan ka hrilh hun a nghâk mai ang, a hriat hunah erawh a țêk leh nasa teh ang chu.

Pu Rintea nèn khami nî, dàwra kan inhmuh nî ațang khân kan la inhmu leh tawh miah lo va, phone-ah pawh kan la inbe chuang lo. Hmu ta chiah ila a hma ai khân ka zah lehzual tawh dâwn tih ka hre sa reng a, chu vàng chuan ka hmu thut mai ang tih ka hlau a, dàwra ka han kal châng pawh hian ka țhu khawmuang ngai lo, inah lah hian kan nufa chauha kan awm laite hian a rawn kal leh khut ang tih hlau rêng rêng hian hun ka hmang ti ila a dik ber ang chu.

Mahse, dam ve ta reng chu, hêl reng theih ni lo chuan! Zàn khat chu kan chhûngkuaa kan awm kim țhap laiin a rawn lêng a, ka nuin a lo chiau-au vat a, mâkpa lawm takin a lo làwm ni berin ka hria! 'Mâkpa'. Chu thu ka han ngaihtuah chhuak chu ka zak nghâl reuh reuh a, chhûngril lamah a rûkin ka lài nghâl êm êm ringawt bawk.

Mahse, vànneihthlâk ka ti dâwn nge vànduaithlâk ka ti dâwn pawh ka hre thiam lo, rei a țhut hma chuan Chhana a rawn lût ve leh khauh mai. Kan lo be ve thuai a, Chhana leh Pu Rintea pawh chu hmêl inhre sa tawh an ni bawk a, Chhana'n a be hmasa ve ngei a, Naom-i chanchin a zâwt ve a ni. Anni hi mimal tak chuan an va inhre kher lo maithei, kan inah hian an inhmu a, chuta țanga inhre chho ve mai chu an nih ka ring. Hmêl erawh hmun dangah pawh an inhmu zauh zauh thei tho a, Pu Rintea pawh hian ka bialpa hlui a ni tih a hre chiang ve ngawt ang, hmânah Naom-ite unau tuition ka pêk lai khân gate páwna a ding kha a hmu tawh tlat a ni.

Ngaihtuah inang lo tak veka kan titi ka ring. TV volume ring vak lova tiin thil hrang hrangte chu kan sawi ve ngei a, kan in a lian lo ka tih tawh kha, kan ințhut hnaih hlawm lo thei si lo va, awm dàn tùr a vâng ka ti tak tak a ni. TV lam thlìr reng thu a awm si lo, kan in a lian fahran lo bawk nèn, awm nuamin ka awm thei lo, in neitu ber mah ni ila nuam ti lo ber ka nih ka ring.

Thingpui in zawh hnu deuh lawkah Chhana'n phone call a dawng ta hlauh mai a, rei vak lo a bia a, a pawimawh bawk a ni ang, haw a tum ta thuai a, kawngka thleng ka thlah ve a, ka tih dàn a ni ve hrim a. A chhuah dâwn chuan," A pawi ka ti hlê mai, thil hrilh che ka duh asin le," a ti deuh sap a, chutah ring deuh zâwk hian," Ka rawn bia ang che," a ti leh a, eng thil nge maw min hrilh a tum ni? A hma anga awm leh a duh thu min hrilh a tum a ni ang e, teuh lo mai!!

Nonoi ka nuin a pawm muthilh tawh avàngin thawh remchàn lai tiin ka sawn a, khumah ka va mut a, Pu Rintea pawh chu a haw ve nghâl mai ka ring deuh a nia; mahse, ka va chhuah leh pawh chuan haw tum hmêl a pu pawhin ka hre lo, ka nu nèn an lo la titi dùn a, U Mama a lèn loh zàn mah ni se a room-ah a awm daih tawh thung.

Tui ka in phawt a, an bula ka va țhut leh chuan Pu Rintea chuan aw a lo thian kharh a," Zanina ka rawn lèn chhan tak hi a tlai tak tak hmain thu khuh lovin ka han sawi nghâl ang e, zêp tùr a awm chuang lo bawk a," a ti tê tê a, a sawi tùr àwm ka lo hriat tawh avàng chuan thâwk pawh ka lo thaw țha ngam mang lo.

"Ruatpui, inneih ka duh a, ka nupui ni tùrin ka duh che a ni."

A thil sawi dàn teh tlawng chu, a tlang leh lutuk a, min tihrilhhai zo vek alawm! Ka zak a, ka nu ka zah rualin amah pawh chu ka zah êm êm bawk. Chuti lo deuha pehhêl deuh hleka a sawi ka rin ve trhlul nèn!

"Ka pi bulah hian ka sawi tawh a; mahse, i bulah ngei, a hriat lai ngèia sawi leh ka duh avàngin ka sawi leh a ni. Nula fel tak i ni tih ka hria a, i chanchin, i chunga thil thlengte pawh ka hria, nang pawhin ka chanchin pawh i hre ve tho bawk."

Sawi tùr ka la hre chuang lo, ka thin phu a su dup dup a, ka nuin min hrilh laia min den dàn ai mah khân tuna a thil sawiin min den dàn hi a dang zâwk.

"Naom-i'n kan inneih a duh thu hi a hrilh tawh ngei che tih ka hria a, fiamthuin ka sawi lo a nia. A țhâwng deuh che a nih pawhin ka hre thiam che, min chhâng nghâl tùrin ka beisei lo che a, inngaihtuah nân hun ka pe ang che; mahse, hun rei tak erawh ni lo hrâm se."

Zàn muthilh chu khawi lamah. A hma ang bawk khân ka rilru a luah leh a, awmzia nei si lovin a buai leh nuai mai a ni. Phone chu hmetin a haw hnua a thu min rawn thawn chu ka chhiar leh ringawt a,  *Min nei a nih chuan rilru hrehawmin ka siam lo ang che a, ka rinawm lohsan ngai lo bawk ang che*  a rawn ti a nih kha. Rilru siam dàn tùr ka hre hlawl lo.

Tihian ngaihtuah chhin teh ang, innei tùr angah lo indah ta ila, inngaizâwng hauh lova han inneih ngawt dâwn pawh chu, kan inkârah induhna leh inîtna takngial pawh a awm si lo. A fanuin kan inneih a duh avàngin a rawn bawhzui deuh tihna a nia,  min duh vàng ni lova fel min tih vàng ngawta min neih a tum chuan... thil kalphung chu a ni lo maw le!

Mi fel tak chu a ni ngei ang, kei nuthlawi fa pawm nei hi nupui atân min duh tihna a nia, thil mak tak a ni. Naom-i'n min duh vàng pawh chu lo ni tehrêng se, amah berin min duh tak tak si loh chuan... hrehawm tia min siam lovin min rinawm lohsan dâwn lo mah se nuam ka ti thei ngai dâwn em ni? Nupa kan nih chuan mut dunte a ngai ngèi ang a... Ka lu chu ka thing nawk a, ka ngaihtuah thui lutuk tawh a ni. A, ka hre thiam tawh lo, ka rilru a buai zo dâwn.

Chhana haw chhan kha a pa vàng a lo nia, khum ațanga a chhuk tùr a che sual palh a, chhuatah a tla thla a lo ni àwm e; mahse, ngaihtuahawm tak chu a ni chuang lo va, a hrisèl loh chhoh lai a ni nèn, a káwng a tih nat belh chuan a nâ a tizual leh sawt a nih ber chu. Kan ve tùrin min ngèn ngam lo tih ka hria a, a rûk tak erawh chuan min phût vein ka ring deuh, a hma pawh khân a sawi deuh thuak tawh a, natna lam a ni bawk nèn, hun remchângah chuan ka la kan ve ang chu.

Ka nu leh U Mamate nèn pawh Pu Rintea thil sawi kha kan sawi chhuak leh tawh a, anni chuan," I thu thu alawm, 'nei rawh, nei suh' kan ti lo ang; mahse, ngun takin ngaihtuah la, i dinhmun zawng zawng a hre sa a, heti chunga neih a duh che hi a mak, i tâna Pathian ruat pawh a lo ni zâwk maithei a ni," an ti a, an thil sawi dàn ațang hi chuan nei tùrin min duhpui deuh zâwk niin ka hria.

"Pa fel tak a nih ka ring, Nonoi tân pawh pa țha tak a ni thei ngei ang," ka nu chuan a ti leh a, U Mama chuan," In inneih chuan Nonoi hi chu kan lo awmpui daih ang chu ka lo ti asin, kan khua a har dáwn si a, a ti buai mai mai ang che u," nui deuh chung hian a lo ti ve thung a, a chiang ta viauin ka hria, ka neih ngei an duh tihna. Kan inneih hnua kan awm dàn tùr thlengin an lo suangtuah tawh a nia.

*******

Ka ngaihtuah a, Naom-i'n min rawn biak khàt tákzia hi. A hma deuh kha chuan min rawn biak zin ve theih nèn, lehkha a zir ngawrh viau a ni ngei ang. Amah vàng liau liauin a pain min neih a duh tihte hi a hre tawh ang em? A pain a hrilh ang em? A pa ka nei a nih chuan ani pawh ka fanu a ni dâwn tihna a nia, a mak dâwn e.

Ka ngaihtuahna a hria nge ni, Inrinni zànah min rawn be teh tlat a! Ka lo vui der ve a, ani erawh chuan," Nia... mahse, Âpa hian biak buai chiam che a phal lo va, i rilru ka ti buai ang a ti tlat zêl a, buaina i nei em ni? Ka rawn ti buai lo che ti raw?" a rawn ti làr lár a, kei chuan," Buai lo ve, min biak khàt bâkah i rawn lêng khât tawh sia, lehkha i zir ngawrh viau a nih ka ring a, a dik em?" ka ti ve a. Ani pawh chuan," Zir ngawrh ve tho, ni tinin exam kan hnaih telh telh sia, țha taka exam-naa ka pass loh chuan i lung a âwi lo ang tih ka hlau," a rawn ti ve leh duah a.

Kan inbe rei ve pângngai a. Kan inbiak tàwp dâwna," Au Ruatpui, Âpa nèn chuan in innei dâwn em? Âpa hi i nei duh ang tiraw? A fel lutuk, a duat ang che, Ânu pawh kha a duat thei lutuk! In inneih chuan maw, Nonoi pawh a duat viau ang, keimah min duat ang chiah hian a duat ang. Kei pawhin ka duat dâwn, ka nau a ni dâwn sia, Âpa chu neih duh rawh aw," a rawn tih chuan ka biang a sa hat hat thei nia! Ka rin aiin a lo ngaihtuah thui daih mai. Naupang chhe hmuh leh la ã buang hmuhin kan hmu a, lang lo lam, a rilru chu a lo naupang chhe lutuk miah lo a lo nih hi.

Thutlûkna lian tham siam tùr ka nih miau avàngin Lalchhani ka râwn ve chhin a, ka rin ang chiah! A lo phùrzia mai chu, a han meng lian kual vêl a, a kut pahnih insì-a a hmui bula la chhovin," Ka lo suangtuahpui țhin che chu a lo thleng dik thei dâwn ta! A va țha tak! Lalpa, ka lãwm e, ka țhiannu hi thutlûk dik tak siam tùrin pui mawlh ang che!" a ti mawlh mawlh a, a maimichhîng a, chutah, menga min rawn enin," 'Yes' ngèi ngéi ang che, a țha lutuk! Ka duhpui che aw, pasal țha tak a ni ngéi ang. Pu Rintea han pàzia chu, ka va duh tak! A frank bawk si," uar zet hian a tih zawm leh vang vang a. Kei chuan," I duh leh nangman nei la ti nia," ka lo ti thung a.

"Màwli! Kei min duh loh chu maw le, mãwl rêng rêng suh ang che. Ani ang pathlawi, hmêl țha leh pà tho bawk si, chutah, a la hausa zui! Lalpa leh! Nulate duhthusàm ber ... ka tih chuan ka ti dik chiah lo maithei a, lo nui suh! Ani angin a duh phawt che chuan nei dàwr dáwr ang che, i u hi e, lo tawng lo ngat ila chuan maw, ka kherh ang a, min neih khalh kher lo maithei a ni," a ti leh bawrh bawrh a, a thil sawi chu amah ber pawh chuan a âwih lo tih ka hria, ka hre chiang, chu vàng tak chuan za zet hian ka lo nui chhuak hawk a, ani pawh a insûm zo ta bîk lo a ni ang chu, kan nui dùn leh ta vak vak a.

A hnu deuhah chuan," Tak tak chuan, Mâte, i thu thu a ni e. Kei chuan ka duhpui mai che a, i tih sual pawh ka ring lo, pa fel tak a nih ka ring, a ti sual tawh a, tih sual leh chu a hlauh dáwnzia han ngaihtuah la, nu vànnei tak niin ani pawh pa vànnei takah han siam teh khai," thutak zet hian a ti leh ta thung a, kan han infiamin kan nui dùn bãwk bãwk țhìn tak na a, a fiamthu reng bîk lo va, a ho reng bîk lo, thu țha tak tak, puitling tak tak sawiin min fuih ve țhìn tho bawk a ni.

Ka thutlûkna tùr chu a lang ruak ta mai; mahse, chhànna ka pêk hmain thil eng emaw sawipui erawh ka duh khawp mai, eng eng emaw sawi a ngai ve ang chu. Min hmangaih leh min duh vànga innei tùra min sâwm a ni lo bawk a, inngaihzàwnna kan inkârah a awm lo bawk nèn, ani pawhin min hre thiam ngeiin ka ring.

A hman hun zâwtin ka be hmasa ta a, thil eng emaw sawipuia biak duh miau hek i. Ani pawh chuan a lo hre thiam ve a ni ang chu, a hman theih hun sawiin kan inhmuhna tùr hmun pawh kan sawi nghâl a.

A hunah leh hmunah chuan kan inhmu ta ngéi a, keimah chauha kal ka ni bawk a, ka lài angreng khawp mai, tih lan loh erawh ka tum ve hrâm hrâm thung. Kan thil sawi tùra kan luh tak tak hmain ei tùr a order hmasa phawt a, kan awmna hi a hmêl hriatte restaurant nuam takah a ni a, ka vawi khat kalna a ni nghe nghe.

A țhutna hnung nghen ar ar pah chuan a han meng zîm deuh a," Le, min hmuh i duh chhan chu han sawi la," a ti ta sup a, min rawn en pah bawk a. Kan inen hnai deuh bawk nèn, a hmêl pà tak chu ka hmu chiang bawk a, tunah tak hian Naom-i pa ni lovin mipa puitling tak, pà tak leh chhe lo zet hmuhin ka hmu ta tlat mai! Mit khap hauh lovin ka en reng a, ka hmuh dàn avàng chuan sawi mai tùr pawh ka hre ta lo.



*I AWMNA HMUNIN A ZIR LOHA, A DIK TLAT LOH CHUAN ENG ANGA ȚHA PAWH NI LA, HLUTNA NEI LO, ENG MAH LO MAI I NI ANG*