☆KA TÂNA RUAT☆ - 25 By Dingdi Pachuau

☆KA TÂNA RUAT☆ - 25 By Dingdi Pachuau

Ka ngawih reng tâk sî-ah chuan," A hmanhmawhthlâk hlei nem ti raw? Ei tùr lo thleng phawt se muangchângin kan sawi dâwn nia," a rawn ti leh sup a, nuam tih hmèl zet hian a chair hnung chu a la nghèng ar ar a, chutih pah chuan a hawi kual a," Helai hmun hi chu a nuamin a fuh reuh asin, siam a nih hma khân țhiana nèn khân kan hisàp dùn ve nasa țhìn a, a chêp deuh ka ring kha a nia; mahse, hei a lo tâwk tiu teu viau mai, a building leh a chhûng an cheibàwl dàn hrim hrim hian mit a la ve bawk a," tiin a țawng ta bawrh bawrh a, kei pawh lo inngaihtuah harh ve deuh tawhin ka lo bu ve nghat nghat a, hmuh ka duh chhan ber ka sawi chhuah tâk si lohah chuan titi dang a vawrh rih a ni tih ka hria, a fing ka ti.

Ei tùr an rawn dah hma chuan a titi chho ta zél a, ka rin aiin a lo țawng ve duh roh! Sawi tùr a hre hlê a, a titi ngaihthlâk a nuam a, a titi ka tih hian a țawng char char reng tihna erawh a ni lo, min ngaichãngin tàwp hun a hria a, ka țawng chhuah ve ngeina tùra titi dàn, mi kawm dàn a thiam hlê. Kei pawhin zah rùn bîk lovin ka țawng ve zauh zauh tho a, a mit takah erawh ka en vak ngam lo chu a ni.

Ei tùr lo thlen hnuah chuan kan titi a chàwl ta deuh a, ei pahin kan țawng zauh zauh tho, kan ei zawh hnuah, a hmui a hŕûk fài tê tê hnuah chuan," I hlauthãwng a, mak i ti a, min chhàn i hreh tih ka hria alawm. Ka hre thiam che ka tih kha, chutih rual chuan ka thil hrilh che kha, kha kha ka ti mai mai lo, ka hrilh mai mai lo che, khatiang lamah kha chuan hlauhthàwn tùr i nei hauh lo. Kan la inhre chiang tâwk lo nia i ngai a nih chuan thuhran; mahse, kei chuan harsatna ka nei lo, nupui atân duh tùr khawp chein ka hre chiang tawh che," thutak zet hian a ti leh ta duah a, chutah," Le, i thil sawi tùr chu han sawi tawh rawh le," a tih zawm leh a.

Ka chil ka lem dak phawt a," Kan inkâra eng mah awm lo chung hian min neih i duh hi ka la hre thiam thei lo a ni, min hre thiam la, engati nge neih min duh tlat a?" ka ti ve ta khawl a, a hmêl ka en zawk a, min lo en reng tih ka hmuh chuan ka melh sâwn zui nghâl vat a.

"I fel ka tih tawh kha, nupui țha tak i ni ang tih ka hria a ni," tia min chhàn chuan ka thaw hak a," Chutiang i hre ngawt lo," ka ti ve thung a, ka rin loh deuhin a lo nui hawk a, mak ti takin ka en nghâl vat bawk. A lo nui tak tak a! A nuihzat hmèl êm êm mai lehnghâl, a ngaihna ka hre lo khawp a; mahse, a hnu deuhah erawh za lo deuhin ka țhen ve sak ringawt.

"Ka fanu tân nu țha tak i ni ang tih ka hria, a ngaina êm êm che a, nang pawhin i ngaina, ni lo'm ni? A nun hi a ruak êm êm a, nu a mamawh ngawih ngawih ni berin ka hria, a nun ruak ti khata a nu nia enkawl chho tùr atân chuan nang hi i țha ber ang tih ka ring a ni. 'A nu kha a țha ber ang chu' tiin i lo ngaihtuah a ni maithei, a dik lo, a hlimna tùr chauh ngaihtuaha a hrin ngei ngei a fanu kalsan theitu hi nu țha berah ka ngai ve thei ngai lo ang," a rawn tih leh chuan a thil sawi chu a sawi mai mai lo tih a hriat viau, a aw a chang țha a, a sehchilh deuh bawk. Pi Mawitei kha a mitthla suangtuahnaah a hmu pah rauh rauh a ni ngei mai.

Naom-i vàng chauhin min nei duh a nih chu. Kan inkârah eng mah a awm lo ka tih rêng kha, ka thinlungah zawhna a la awm țeuh. Inneihna hial awm thei tùr chuan a fanu tân chauh ni lovin kan pahniha kâra eng emaw tal chu a awm a ngai ve dâwn lo'm ni? Kum hnih khat hnua ințhen leh mai tum kan nih loh chuan. Fîmkhur a ngai asin, kei aiin ani hian a hre fiah tawh zâwk daih àwm sia, engati nge a hriat thiam loh tlat le? Nge a hre thiam lo der zâwk? A pawimawh si, pasal ka nei a nih chuan vawi khat bâk neih ka tum miah hlei nêm.

Ka zah theih lohna zawng zawng sâwm khâwmin," Naom-i vàng chauhin min neih i tum tihna a nia, ka tân a fair lovin i hre ve em? Nangma tân pawh a fair lo tho bawk a," ka ti ta a, chapona ka la neih ve țêk țêk avàngin tlâwm lutuk tak chuan ka țawng duh bîk lo. Inneih rawttu ka ni lo va, a thu hnuaia awm ka nih loh miau avàngin ka duh duh ka sawi ve ang chu.

"Naom-i vàng chu ni tho mah se Nonoi nu i ni a, i fanu chu pa nei lova țhang lian tùrin i duh bîk lo ang, min nei a nih chuan keiin 'pa' ka pe ang a, nangin Naom-i 'nu' i pe thei thung ang. Min nei a nih phawt chuan kan fate tân pa țha ber ka nih loh pawhin a dawttu tal nih ka tum ngêi ang," a lo ti leh duah a, a țawng tuitam ve lutuk chu mak ka ti rilru țhìn.

He thil hian ka nunkhua a sâwi danglam dâwn miau avàngin ka tân chuan a serious a, inneihna hi thil mai mai a nih loh miau avàngin. Ani hi pasal innghahna tlâk tak a nih ngei chu ka ring alawm; mahse, Naom-i vàng chauh ni lovin inneih dâwn chuan keimah min duhna tlêm tal nei ve tal se ka la ti hrâm a ni.

A tàwp nân," Induhtawnna emaw inhìptawnna emaw, eng pawh chu lo ni se, chutiang kan inkâra awm miah lova inneihna hian a daih rei theiin i ring em?" ka zah lohna sâwm khâwmin ka ti leh a, hei hi ka zawh duh ber kha a ni tlat a, ka hmuh duh chhan pawh a ni tlat a ni, zawh chhuah ngei ka duh si a.

Min rawn en reng tih ka hriat avàng chuan a mit tak chu ka en ngam lo va, a țhut dàn siam remin ka lamah a rawn kûn hnai deuh a," Chutiang chuan i lo ngai a maw? Mipa ka ni a, hmeichhia i ni bawk a, min hîp loh i ring tih sawi miah suh, nula chhe lo tak i ni alawm," a rawn tih chuan ka melh zawk a, min lo la en reng avàng chuan ka melh sawn leh vat bawk. A thil sawi chu ka rin loh lam daih a ni!

Min thlah a tum nain chhuanlam siamin kalna tùr dang ka la nei tih ka hrilh ta ringawt a, a bul ațanga kal sawn vata a thil sawi chu ngaihtuah ka duh vàng a ni. Ka tih tlat loh avàng chuan min thlah lui ta bîk lo va, keimah chauha ka kal hnu chuan a thil sawi chu ka ngaihtuah zui ta rêng a, kei hian ani kha ka hîp tih a sawina a ni, a ni chiang mai. Chutiang chuan min lo en țhìn tihna em ni ang? Mahse, ka hre ngai miah lo, ka ngaihtuah lêt vang vang pawhin ka hre chuang lo. Hmeichhia ka nihna ațangin amah chu ka hîp ve tihna a lo ni a, a mak a ni! Âwih a har ka ti, a ti lang ngai bawk si lo. Amah neih ka duh nân, min hnem nân leh ka ngaihțhat nâna sawi a ni thei mai ang em?

Kan inhmuh fàl ațang chuan a rawn lêng ve ta zauh zauh a, min rawn rîm a ni ve ber ang chu; mahse, min kawm fàl a tum ngai lo va, tlangvâl nula ina rawn lêng pawh hi a ang chiah lovin ka hre țhìn. A rûk têin keima tâwkah ka lo chîk ve țhìn a, heta țang hian a laka ka rilru puthmang pawh a dang chho hret hret tih ka inhria! Mak ka inti, Chhana vànga ka thinlung a inkhàrkhip tawh tehlul nèn, min neih a duh thu a sawi vàng mai kha a ni ang te ka ti țhìn. Tlangvâl hawklak mai mai a ni tawh lo bawk a, a lo lèn châng hian ka nu leh U Mama pawhin an lo be țha thei khawp, lo tlawn leh ti huam ni chuang chuang si lovin. A puitling a, titi tùr a hria a, ka nu titipui dàn tâwk lah chu a hre khawp mai, țawng duh over ni si lo hian ka nu bulah chuan a titi thiam a. U Mama bulah erawh a dang leh daih thung, U Mama hi chu a cool deuh hlek țhìn bawk a, an mizia inang tihna chin ka nei țhìn. A bula awmte mizia leh awm dàn mila kawm dàn a thiam ka ti tawp, a lehkha thiam niin a fing bawk a, ka belh chian telh telh hian ka phù lohzia ka hre chiang telh telh mai.

Min nawr a duh lo nain a duh dàn erawh tlang takin kan bulah a sawi a, inneih thuai a duh; kei erawh chuan hriat chian lehzual ka la duh tho a, pasal ka nei dâwn rau rau a nih chuan ani aia țha tùr hi chu an awm lo ang tih hi ka pawm dàn chu a ni tawh tho, a laka ka rilru danglam hret hret ang hian a rilru hi danglam ve hret hret se, hmeichhia ka nihna anga hîp lo hian min duh vàngin hîp thei zâwk ila, min nei duh a nih rau rau chuan tiin ka ngaihtuah ru ta fo.

Chhana pa pawh ka va kan ve ta a, min lo làwm thiam khawp mai, ka hmuh tum dàn aiin a pa chu a lo chêr roh tawh a, pa fel tak a ni si a, a hmêl han hmuh chiah chuan khawngaih loh theih a ni lo; mahse, a lo harh țha a, min be hluttu pawh amah tho a ni. Nonoi ka hruai ve lo bawk a, nula pângngai angin min ngai tih ka hre mai. An fapa hian fanu ka nei a ni tih kha a la sawi lo a ni ngei ang chu, hrilh erawh ka tum lêm lo. Chhana hrilh lova kal ve tawp ka ni a, inah pawh a lo awm miah lo, ka duh daih zâwk. An fapa nèn inzui lehah te min ngai rêu rêu palh ang.

Mi dang lêng ve pawh an awm a, Chhana fapa pawh a lo awm ve bawk, school a la kal lo a ni maithei, a hmêl a țhain a ngo phuk mai a, a nausèn lai chum kha a la reh lo a ni chêk ang chu, a la duhawm khawp mai. Nonoi ka mitthlaah ka hmu rauh rauh a, ani zawng a chum lo va, a ngo lo bawk; mahse, ka hmangaih ve chiang êm a ni, nu hian a fate hmangaih tùr hian an chum lam leh an vun ngo lam kher hi a lo mamawh lo tih ka hre chiang viau mai.

Ka haw thuai an phal loh vàngin ka duh aiin ka awm rei ve ta deuh a," I rawn kal khât si, i lo kal chhunah chuan awm rei deuh ang che," pa berin a ti tlat a, damlo ber a ni bawk si a, ka hnial duh bîk lo a ni. Chhana pawh a rawn lang ta thuai a, a nuin a hrilh a ni maithei, a fapa pawm nawlh pah chuan min rawn enin," Nonoi i rawn hruai ve lo a ni, inkàwm se, nuam an tih dun dâwn nèn!" a rawn ti a.

"Nia.." ka lo ti ringawt a, a pa chuan," Tu nge chu chu?" a lo ti vat a, ka fanu a nih thu ka hrilh chuan," Uai, fanu i lo nei tawh a ni maw? Engtia upa nge? Hmuh a va châkawm ve!" a lo ti leh vat a, nuam ti takin Nonoi chanchin chu ka hrilh ve a, thil dang sawi tawh lo chuan ka lèn chhûngin Nonoi chanchin kan sawi chu a ni ta mai.

Ka haw dâwna Chhana'n min thlah a tum chuan ka hnial a, pâwnah kan inhnial leh rih a, inthlahtîr erawh ka tum hauh lo. Ka lakah beisei neihtîr ka tum lo va, a neih pawh ka ring chuang lo nain a fâla awm dun ka tum lo, ka dam a nih chuan pasal nei mai tùr ka nih tawh hi.

Zànah Chhana a rawn lêng a, a rawn luh ațanga rei vak lo-ah Pu Rintea a rawn lang ve leh bawk a. Chhana erawh a lêng rei lo va, min rawn rîm pawh a ni lêm lo, vawiina a pa ka kan avànga a làwm thu min rawn hrilha rawn kal a ni deuh ber.

Ka nu kal sawn lawk hlàn chuan," Vawiinah a pa i va kan maw?" Pu Rintea chuan a ti sup a, ka melh zawk a," Aw..." tiin ka chhâng ban deuh hlek. Țawng zawm lova a ngawih leh tâk daih avàng chuan a thinrim em maw ni ka ti deuh ngawt a; mahse, thinrim chhan tùr a awm lo tih ka ngaihtuah leh vat thung.

A tûk tlaiah Naom-i'n min rawn bia a," Au Ruatpui, Ânu a lo kal a, a zinna ațanga thil min rawn hawnsak min rawn pe a," a rawn ti làr lár a, kei chuan," A ni maw?" ka ti ringawt. Sawi chhunzawm mai tùr ka hre lo, ani chuan," Aw, ka duh lo deuh dâwn a; mahse, Ânu a ni bawk sia, a rilru a nâ ang a, a thin a rim ang tih ka hlau a, ka lâksak ta chauh. Ka duh hlawm reuh lutuk! A cute hlawm sia maw," a rawn ti leh a, a rilru tak hi chu aw... ka ti rilru vang vang mai. Matric a zir ve tawh a, a rilru erawh naupang rilru dik tak a la ni, chutih rual chuan a nu rilru tih natsak chu a hlau viau tho bawk si, a rilru hi a thianghlim ni berin ka hria.

"En teh maw, Ânu chuan a pasal ûm kha a țhen leh tawh tih Âpa bula a sawi ka hria, Âpa leh kan unau min khawngaih vàng niin a sawi nghe nghe, an țawng ka hre ru a, ngaihthlâk rûk chu ka tum miah lo; mahse, ka hre ru palh a," a rawn ti leh sar sar a, zëp lah hi a nei si lo va.

"Ânu chu a haw tawh em ni?" ka ti ve thung a," Aw, nichînah khân a haw tawh. À-u hmuh ve a tum a; mahse, ani chuan a hmu duh miah lo, a room-ah a inkhung bo tlat maw le, a la thinrim reng a ni ang. Ih maw, Ânu kha a haw thei lutuk a," a rawn ti leh a. Joel-a awm dàn, a rilru tùr hi ka hre thiam pha ve ruak, kei pawh ka pa chungah ka thinrim ve tho, ka hua alawm, tunah pawh hian hmu leh ta ila ka la haw tho maithei a ni.

Kan inbiak zawh hnu chuan ka ngaihtuah zui rauh rauh a, Pi Mawitei chuan a fate chu a la rawn hre ve reng tihna a nia, a àwm lo chuang lo. A rîla rah, a hrin chhuahte ngei an ni a, a ngaihsak reng ang, thil a tih sual vàng ngawtin khân a hmangaih lo ta tihna a ni dâwn em ni? Ni lo ang, hei a la rawn ngaihsak tal alawm. Keini ve hi, ka pa hmêl kan hmu lo ta vang vang a nia, keini chu min hmangaih ve lo tihna a ni. Pu Rintea pawh hian a nupui hlui hi duhna rilru chu a la nei ngeiin ka ring, a tìrah thinrim mah se, 'fate nu nge nge chu' tih rilru a put deuh tho ka ring tlat, tunah a ûmpa nèn an ințhen leh tawh phei chuan...

Chhani text ka chhâng a, Nonoi a mut tawh avàng erawh chuan a thil rawn sawi chu ka nuih ring ngam lo. Mu mai mai pah chuan kan in-text reng a, vawiin lama a thil tawn nuihzatthlâk min rawn hrilh a ni, sawi dàn hi a thiam ve a, a țawngkam hman hi a nuihzatthlâk ve țhìn bawk a, kan inang lo viau a ni.

Mut tak tak tuma ka țawngțai laiin ka phone message tone a rawn ri leh a, phone ka lo mute lo tih ka hre chhuak chiah. Ka țawngțai zawh veleh ka en leh vat a, ka mute zui nghâl bawk. Chhani a nih ka ring kha a nia; mahse, Pu Rintea a lo ni zâwk.

*Hring rei ve!*  tih tê mai hi a lo nia, ka chhiar nawn leh a, hetiang thu min rawn thawn ve hi mak ka ti lo thei lo, Chhani nèn khân kan in-text rei si a, min lo hmu ve a ni ngei ang chu.

Ka chhâng lêm lo va, online zui pawh ka tum chuang lo. Mut țhat tuma ka inher laiin phone chu a rawn êng ta, phone call a ni a, ka han en vat a, Pu Rintea bawk a lo ni; mahse, a tàwp zui leh thuai a, WhatsApp message a rawn thleng zui leh thung.

*Nakzànah palai ka rawn tîr tawh dâwn, beidawnga an rawn haw loh ka beisei bawk ang*  tih hi a lo ni a, ka chhiar zo chiah chu ka thin a phu nghâl dawt dawt mai.


*MIHRING HLUTNA HI A SUM THAWH CHHUAH ZÂT AȚANGA TEH CHI A NI LO*