☆KA TÂNA RUAT☆ - 26 By Dingdi Pachuau

☆KA TÂNA RUAT☆ - 26 By Dingdi Pachuau

A bulah ka duh dàn tlang takin ka sawi tawh a, ka nute pawhin min rem tihpui ve ni maiin ka hria kha a nia; mahse, ani hi, a rawn hmanhmawh ta chûk a, ka duh dàn kha min zahsak ve ang chu ka lo ti asin, kumin chhûng ngêia inneih a duh thu kha a sawi ngèi mai a; mahse, keiin Naom-i exam zawh lam, nakkum kum tìr lamah ni se ka ti ve deuh thung a, tunah lah nakzàn lama palai lo tirh a tum thu min rawn hrilh ta thut a nia, eng a hria chu ni maw? Min duh viau vàng chu a ni lo tawp ang a, eng emaw, an nu hlui chunga phuba lâk nân emaw han intihtheih khum nân emaw min duh te hi a ni lo mai maw? Engati nge a hmanhmawh zual tâk viau? Ngaihtuahnaah a rawn inkahpupchaw zut zut mai.

Keimah chauh min rawn hrilh hauh lo niin, tûkțhuan ei laiin ka nuin a sawi chhuak a," Bawihi, a rawn hrilh che chu ka ring tho a, nakzàna palai rawn tirh a tum kha, a duh dàn hi kan zàwm mai dâwn em ni ang? A sawi ngun si a," a tih chuan U Mama chuan," A mak ngawt mai, Matei hi a duh viau che a ni chiang mai, mâkpa țha tak neih pawh a châkawm ve tawh tho a," nui chung hian a lo ti ve a, kei erawh chuan engtik laiin nge ka chhûngte bulah chuan a lo sawi ngun bîk ni tih daih ka lo ngaihtuah, ka duh dàn vawi khat ka hrilh hnu khân a hun tùr lam phei hi chu kan sawi dùn chhin leh tawh lo hrim hrim kha a nia.

"An nu hlui khân a tlangvâl ûm kha a țhen leh tawh asin," ka lo ti ve thung a, U Mama chuan," Chu chuan eng nge inzawmna a neih ang?" a lo ti vat a, kei chuan," An nu hluiin a tih buai a hlau ang a, a hmanhmawh ta chûk a ni ang," ka ti ve leh a. Ka nu erawh chuan a aw lo thianin," 'A ni ang' 'Ni lo ang' tih lam ai chuan nupui atân a duh che a, palai hial rawn tirh a duh tawh a, nangin i neih ve duh leh duh loh kha a pawimawh ber, i duh dâwn loh chuan palai tirh buai kher pawh kha a ngai dâwn lo va," a lo ti charh charh a.

Palai chu an rawn kal ta ngei a, dik tak chuan ka hnial duh bîk lo a ni. Nonoi tân pa țha tak a ni ang tih min hrilh a, hei hi keini nufa tân chuan a pawimawh êm êm mai a, a thusawi kha ka ringhlel hauh lo bawk. Chu vàng tak pawh chuan hnial ka duh lo a ni, Naom-i pa a lo ni leh bawk a, bâkah, amah hrim hrim hi ka en dàn a dang zo tawh, a hma ang khân ka en thei tawh lo, a lakah ka rilru a dang zo tawh tihna nih chu, tunah pawh ka hnial luih theih miah loh hi, thil eng emaw ka thinlungah hian a awm tawh tlat a ni.

Chhani'n chanchin a hriatin min rawn bia a, a rawn au chùl mai. "Kei aiin pasal i nei hmasa leh dâwn ta chu a nia, a vawi khatna tlawlh mah se a vawi hnihna hi chu a hlawhtlin ngei ring tawh ila. Ka lawmpui lutuk che, chutih rual chuan min tih khalh tùr hi ka ngei che! Nang aia tih hmasak ka tum tehlul nèn, i u vàng vek!" a rawn ti lehpek a! Ka nuih a za angreng, chutih rual chuan U Mama hian inneih a la duh rih lo tihna a nih hmèl, ka zâwt ngai lêm lo va, Chhani nèn an nih tâk hnu hian. Ti hmasa se pawi ka tih loh dáwn tehlul nèn.

Hun a kal ve nek nek a, inneih hun tùr pawh ni tlêm tê chauhin a dang ta. Min hretu, ka hmêl hriatte pawhin an lo hre lo thei bîk lo va, min lawmpuitu an awm rual rualin min sawi zui pawh an awm ve tho. Hei hi chu thil awm ngêi tùr a ni tih ka hria a, mak ka ti lo va, ka dem chuang lo. Min lawmpuitu aiin min sawitu an tam zâwk ang tih ka hria a, an sawi theih tùrin nuthlawi sâwn pawm kha ka ni miau mai a, ka pasal tùr lah kei aia upa daih, ka phû loh lutuk a ni si a. A, min sawina tùr hi a tam dâwn êm mai a, ka ngaihtuah thui peih lo zâwk, rilru tih hrehawm phah viau nân erawh ka hmang duh lo. Chhani'n min fuih reng a, chutiangin ka nu leh U Mama pawhin.

Nu Mawitei'n engtin nge ka number a neih ka hre lo, min rawn be teh tlat a, a pasal hlui nèn kan innei dâwn tih a lo hre ve niin," Khâng hun lai khân hetiang rilru hi i lo pu ang tih rin ngaihna ka lo hre ngai lo rêng rêng! A rûkin i lo ruahman reuh reuh țhìn tihna a lo ni àwm si a, ka chhuak ta pawh kha i lo làwm àwm mang e ka ti! Mahse, ngawi tak rawh, nuamsa tak chuan ka awmtîr hauh lo ang che, eng nge ka tih theih chu i hria ang. Thang kamin i taksa màwina hmangin zei takin i lo thlêm țhìn tihna a ni a, ani chu a âwk ta chaih a, fel tak angin i lang a, i lo râpthlâk hlê si, chinghne beràm vun sin i lo noh chiah hi," a rawn ti nghâl bawrh bawrh mai a, râpthlâk ka tih êm avàng leh mak ka tih êm avàng chuan țawng nachâng ka hre lo va, ka ngaithla mãwl tawp a ni ber mai.

"He thil i lo tum ngar ngar vàng hian Naom-i pawh i kàwm ngeih a, a nèl theih dàn tùrin i awm char char a, ka fanu hi engtik lai mahin i fanu a ni thei ngai dáwn chuang lo tih hria ang che. An pa nèn in lo innei ta a nih pawhin ka fate kher hi chu i fate an ni lo tih hria la, nang a hminga an nu ni mai chauh tùr ai chuan kum tam tak lo enkawla lo ngaihsaktu, an nu dik tak, a hnute tuia lo chàwm sei liantu, an thisen zawmpui dik tak ni bawk hi chu an hmangaih fê zâwk ang tih pawh ring tlat ang che. Fanu..e taka, fanu i nei ve tak alawm, hnam dang laka i neih ngei kha, khata țang khân i hre chiang viau ang chu, thisen zawmpuite nèna kan inzawmna ngheh theihzia chu. Eng emaw rah palh sual zeuh vàngin inzawmna chutin a chat ngawt thei hlei nêm," tiin, ngeiawm zet hian a rawn nui zui ar ar a, râpthlâk ka tih êm avàng chuan kut khùr dar dar chungin phone chu ka off ta daih a.

A hnu daihah chuan ka rilru ka siam fel a, a hma aia nasain, ka tum a ruh zual ta sauh a, a pawi lo rêng rêng, ani vàng hian pasal ka neih loh phah lo ang. A pasal hlui, tlangvâl dang a ûmsan ngêi chu ka nei ang a, ani aia duat leh țha leh ngaihsakna țha zâwkin ka pasal chu ka enkawl ang a, chutiang chiah chuan Naom-ite unau pawh. An nu ber tih chhiat zawh loh tùr khawpa nasain ka theihtâwp ka chhuah ang a, ngaihsakna, hmangaihna leh lainatna dika ka enkawl phawt chuan ka chungah rilru chhia an pu thei lo tawp ang, an thisen zawm ni lo mah ila.

Pu Rintea pawhin a hman chângin thil pawimawh tùr min buaipui ve tho a; mahse, hun ãwl a nei tam thei lo va, Chhani a țangkai leh ta êm êm mai a ni. Ani hi awm lo ta se aw... ka va buai dâwn tak!! Inneihna ropui taka buatsaih ka duh lo va, nula leh tlangvãl pângngai tak innei tùr kan nih tawh loh avàngin. Ka lo suangtuah ve țhìn mo kawr lace vâr sar, a fual ngei mai hâk ka tumna rilru pawh ka dah bo daih, simple taka țhui lace leh puan vâr țhui pawlh kawr hain  Puanchei ka bih mai ang ka ti a ni.

Pu Rintea'n thuam chhawm vak rem a ti lo va, ka nu pawhin," Dàn a awm ve a, chumi aia uchuaka tih tùr a ni ngai lo," a lo ti ve a, a àwm tâwk hi a awm ve bawk a, chutiang tâwk chuan kan ti ve ang chu. Amah Pu Rintea tih dàn ang ngawta thuam chhawm vak loh tih ngawt pawh, thil mawi chin leh àwm tâwk chin hi a awm ve a, min vènthàwn vàng a nih chu ka ring sa tho nain ka theih anga mawi thuam chhawm chu ka duh tho.

Naom-i a phûr khawp mai a, min rawn biaknaah pawh inneih nîa a hâk tùr kawr a țhuitîrte chu min rawn hmuh a, pheikhawk erawh a la rawn thleng lo niin a sawi.  Nonoi pawh a phûr viau nain ani hi chuan la hre thiam ve rih hek lo le, a u Naom-i nèna kan inbiakna boruakah chuan a lo phûr ve êm êm ringawt mai a ni.

Chhana pawh a rawn lêng ta lo. A hriat hnuah phone-in vawi khat min rawn bia a," Ka rin phâk loh thil a ni! Ka lawmpui che tih ka duh viau a; mahse, ka lawmpui thei si lo che a, min hre thiam mai rawh aw. Ka lama i lo lêt leh theih ka ring țhìn a, beiseina mei a la alh ve teng teng țhìn. Ka tih dik loh a ni tih ka hria, ka dem miah lo che; mahse, ka tih sual kha min hmangaihtu chuan hre reng lova min nawh rehsak mai duhna rilru a put ka lo ring țhìn a, ka lo ring sual a ni. Beiseina chhe tê ka lo neih țhin kha awmze nei lo, keima lama ka lo insiamchawp mai a ni tih ka hre chiang tawh. Ni e, i hlim dâwn nia, hlim i phû alawm, kwi zaeng ka thil tih sual khân ka dam chhûngin min vaw chàu zo dáwn ta a nih hi, min ûm zui reng a, ka tân beiseina hian awmzia an nei ve tawh lo va, beiseina nei lova nun hman chhoh râpthlâkzia ka hre chho zêl dâwn a nih hi," a rawn ti a, chu chu kan inbiak tàwpna a ni. Eng emawti zâwng tak chuan ka khawngaih ve riau. An laka beiseinate kan neihte kan beisei ang an nih loha rilru hrehawm theihzia ka hre chiang ve tawh bawk a, ani pawhin a tuar chho ve rih mai a ni ang chu; mahse, tàwp mai lo se, a beiseina mei êng chuai tawh chu rawn chhèm alhsaktu a tawn erawh ka beisei tlat thung ang.


(A tãwi. Ka mit a na lutuk tlat, thlan a lût nasa lutuk a maw, tih dànte in hre mial lo maw? A fiah lo ruai mai bawk a)