☆KA TÂNA RUAT☆ - 30 By Dingdi Pachuau
Ka nuin chaw eia min sàwm avàngin Zirtàwpni tlaiah kan kal ta dial a, Joel-a pawh a insiam ve kha a nia; mahse, a nuin a rawn be leh tlat mai a, a damlo ni àwm tak a ni, a pa bula a sawi chuan kal a phalsak a, a tel lovin kan kal ta a ni.
A pi a han hmu chu Nonoi a phûr khawp mai a, an inpawm a, U Mama pawh chuti tho. Ani hian chaw kan ei dâwn vàngin ni dang zawng aiin dàwr a lo khãr hma ve a, eirawng pawh ka nu a bàwlpui vek a ni. Ka fiam a," In nu i sâwm ve mai lo a nih kha," tiin, ani chuan," Chhûngkaw zînga mi a la ni ve hlei nêm," a lo ti thung a. "A la ni thuai ang chu, ni lo'm ni?" ka lo ti leh țâlh a.
Ka nu chuan chaw ei hmain hun a hmang a, Pathian thu chhiarin thu țha, min zilhna thu a sawi leh a, Pathian hnênah a țawngțai a. A țawngțai lai chuan ka nu felzia leh kum naupang têa hmeithai ni chunga a rilru lo puitlin sîzia ka lo ngaihtuah daih pek. Tuna ka kum ang a nih hian pasal nei tawhin U Mama nèn kan piang tawh ngei a, ka pa pawhin min chhuahsan țêp tawh. Pasal kha a nei hma deuh a; mahse, a rilru kha a lo puitling bîk êm a ni, kei hian ka chhùn lo takzet.
Kan chaw ei chu ka puar khawp mai a, ka nu chawhmeh siam ngei mai ka han ei leh chu ka puar lo thei lo hi a ni tawp mai. Chaw ei kham lamah thingpui hâng dawm pahin an titi leh rih a, awm rei vak pawh ka duh lêm lo. Naom-i'n lehkha a zir hman lo ang tih ka hlau deuh a a ni; ani lah chu Nonoi nèn ka room hlui ni taah khân awmin lem an ziak a, an ngawi reng a, an reh lutuk avàng chuan ka ngaih a țha lo deuh nghe nghe. Ka va en ru dêk dêk a, an lem ziak chu an lo uluk dùn ngang lo niin, pakhatin dawhkànah lehkha a lo pharh dang a, pakhat lahin chhuatah, an inbe lo va, rilru an pe dùn ngang a ni ang, ka thãwm pawh chu an hre lo ni tùr a ni, an rawn hawi miah lo bawk.
Ka nute ka va pawh leh hnu chuan," Ka thu hriat hi a dik meuh em? Hmeichhe naupang pakhat kut i thlâk tih hi?" ka nuin a rawn tih chhuah chuan mak ti takin ka en nghâl vat a, min lo en ve reng niin. U Mama ka en leh a, ani pawh chuan min lo en ve reng tho, chhàn mai ngaihna ka hriat loh avàngin ka nu chu ka en leh a, ka hnunga Pu Rintea'n a kut a rawn daha dìm têa min chùlsak tâkah chuan," Aw... mahse, engtin nge i hriat!!? Tuin nge hrilh che?" ka ti chhuak ta hrâm a, U Mama hi chuan a hre lo va, a hrilh thei lo. Chhani ni se, a hre dâwn lo. Chuti a nih chuan Pu Rintea, ani hian a lo hrilh em ni ang?
"I kutthlâk naupang nu nia insawiin min rawn bia a," a rawn tih tâkah chuan ka thaw hawk a, engtin nge ka nu number chu an lo neih ni? Lo nei pawh ni se, engati nge ani kher hi an va biak ni? Keimah min rawn biak mai àwm, an fanu kutthlâktu chu ka nu ni lovin keimah ka ni alawm.
"Naupang kum tling lo buaina ho têah i lo inrawlh a, a fanu chu i bêng ta niin a sawi a, school pawh a kal theih loh phah niin a sawi nghe nghe. Mak ka ti a, thu dik a ni ngei em tih zawh fiah che ka duh pah a, chaw eiah ka rawn sâwm ta che u a ni. Engati nge naupang chu kut i lo thlâk mai theih le tiin ka lo ngaihtuah ka lo ngaihtuah a," dam tê hian ka nu chuan a ti leh dap dap a. U Mama chuan," Ka nau i ni a, ka hre chiang viau che tih ka hria. Kut i thlâk a nih chuan i thinrim tàwp a nih ka ring, a chhan dik tak han sawi teh," a lo ti ve a, a hmaa kan hlim nui hmêl kha chu a bo vek tawh, kan tak rùn tawh mai a, kan mûk tlâng hlawm viau tawh a ni.
"Han sawi vek rawh le," tiin Pu Rintea chuan ka kut chu a rawn vuan a, chu chuan eng emawti takin huaisenna leh chakna min pe niin ka hria, a hmain min vawnsak ngai hauh si lo, ka kut a vawn chu ka en deuh reng phawt a, a hnuah thâwk la lehin thil thleng chu ka nu leh U Mama chu ka hrilh ta vek a.
Ina kan lêt leh hnu thleng pawh chuan ka rilruah chu thil chu a awm ta reng a, Siamsiami nu chuan eng vànga ka nu chu va phone kher nge a nih ang tih mawlh chu ka ngaihtuah a ni. Kan chhûngkua chu min lo hre chiang àwm hlê mai ka ti rilru a, ka nu khân sawi chhuah duh loh a neih ngei pawh ka ring, thinrim taka a rawn àn khum ngei ka ring bawk, a thil sawi laia ka nu nuam lo tih hmêlte kha... ka maimichhîng vang vang a.
"Ka nu khân thil dang sawi chhuah duh loh a nei niin i hria em?" Ka ti mãwl tawp a, min chhàn mai loh avàng chuan ka han meng a, kut inkuangkuah thûn hian min lo en reng tawh lo niin.
Ka men chhuah tâk vàng nge," Nei maithei, lo nei ta se?" tiin a rawn țawng chhuak ve ta a, khap hauh lovin a hmêl pawh hmu chiang chuang lo chuan ka en reng leh phawt a, ka hmai bulah a kut chu rawn vaiin," I bulah ka awm ve reng a nia, duh tâwk teh le, kha i thluak bûr te reuh têah khân thil i ngaihtuah nasa mah mah a nih kha, kei chuan hmun ka chang ve àwm hauh si lo," a rawn ti leh ta a, ka mit chu khap sak sakin a hmêl chu ka hmu chiang leh ta a, min fiam emaw ka ti deuh a nia; mahse, a hmêl leh mitmengah chuan fiamthu hmël a lang miah lo.
"Hmeichhe sual leh nunrãwng tak ka niin ka hre ta. Naupang ka bêng ringawt a nia; mahse, mi kutthlâk chîng erawh ka ni lo," ka ti leh ringawt a, amah chu ka bia ni kher pawhin ka hre lo, ka sawi ve mai mai zâwk niin ka hria.
Ka hmaah chuan rawn țhingțhi hniamin ka kut chu a rawn vuan a, zanin atân a vawi hnih vawnna a ni ta. Eng a hria chu ni maw? A kut lum thar tharin ka kut vawt ngiai a rawn tawk chu nuam ka ti, ka lum nghâl ham hamin ka hre bawk.
"Shh... Chutiang sawi suh, i ni hauh lo, i ni ngai hauh lo bawk ang. Eng pawh tâwk la, i hmaa ding tùrin i pasal ka awm alawm, engtin mah an ti dâwn lo che, an tih che ka phal dâwn lo. Le, duh tâwk ila, mu tawh ang aw?" dam zet hian a ti leh a, a awka dam zeta min hnemna chu hriat a nuam tak zet.
"Mi kutthlâk chîng chu ka ni lo tiraw?" ka ti leh sap a, a lu thin pah hian," Ni hauh lo mai! I ni ngai lo bawk ang. A fanu chhan nân nu țha chuan eng pawh a ti thei a ni, thil țha lo lakah hlauh phei chuan a fanu chhan chu a tih tùr zâwk a ni, kan fanute'n hetiang nu huaisen an nei hi ka lãwm," a lo ti dam leh thluam a, a hmêl ka en chuan fiamthu hmêl a pu lo va; mahse, tlêmin a nui deuh tih erawh ka hria.
"Kawlh min ti a nih kha," ka ti ve thung a, a nui ta hawk mai. Ka kutah chuan chelhin min kài ding a," He ka nupui te reuh tê hi kawlh ka la ti chhin hauh lo mai, i kawlh lo bawk a, ni lo'm ni?" a ti leh a, kei chuan," Keimah vàngin kan buai ta êrh a nih hi, i zahna mai bâkah chhûngkaw buaina ka thlen bawk si a," ka ti leh a, hei hi a dik chiah a ni. Ka nute lamin keimah vàngin phone call tuihnai vak lo an dawng a, helamah lah chhûngkaw mualphona ka thlen belh leh bawk a, thil ka lo ngaihtuah thui lo nge, insùm theihna ka lo tlachham viau zâwk ni?
"Khatiang ngaihtuahna kha a hrisêl lo a nia," tiin ka kutah chuan chelhin min kài ding a," I pasal hi min ring tiraw? Ka fate pa ka nih rualin i pasal ka ni a, ka fate'n min ring tâwk ang bawkin nang pawh hi an ring tâwk che. Chutih laia inrîng tâwk lo zeta awm tùrin ka duh miah lo che a nia, min ring la, nang pawh inring tâwk bawk rawh, a țha em?" thutak zetin, muangchâng leh aw ki hniam ruih hian a ti ta charh charh a, a hmêl thutak rùn mai chu ka en vang vang a, ani hi ka ring lo phal teuh lo mai, ka ring ang, ka ring bur ang.
Buaina êm êm nei lo chuan hun chu kan hmang chho ve zêl a, kha thil thlen ațang khân Nonoi nèn a school bâng kan lo hmuak ta ziah a, buaina erawh a awm tawh hauh lo, Siamsiamite kha helai hnaia awm an lo ni miah lo va, khatia han tih kual vêl an duh vàng chauha Naom-i pawh rawn zui haw an lo ni. An la naupan nèn, râpthlâk ka ti telh telh mai.
A hma zawng aiin Naom-i chuan min pawhin ka hre ta thung. A thil tawn eng eng emaw min hrilh ve seuh seuh reng a, min ko reng a, ei tùr ni se a nau nèn kan ta tùr min rawn hawnsak ziah a, ka tân en hran theih a ni lo rêng rêng. Ka thisen zawmpui ni lo mah se Nonoi nèn en hranna ka nei lo va, ka nei thei ngai lo bawk ang. Heti khawpa min en 'nu' thei chungah hi chuan rilru chhia pawh ka pu thei ngai lo ang tih ka hre chiang a ni.
*******
"Naom-i nu chuh! I lo inzêp thei hlê mai, thil thleng pawh min hrilh ve duh lo va," lungawi lo lek lek aw tih hriat taka Chhani'n a rawn tih chuan," I lo hre ve a ni maw?" ka ti ringawt thung a. Ani chuan," Hre lo thei nâng, news-ah kan hmu lo chauh che a nih àwm hi!" a rawn ti leh a, ka lo chek tlak tlak ringawt.
A hriat dàn chu min hrilh a, kei pawhin thil thlen dàn chu ka hrilh ve bawk a, Siamsiami nuin ma nu a lo va biak thute pawh ka hrilh nghâl bawk. Ani hi zawng ka țhiannu ngang a ni bawk a, a thin a rim țan leh bâkah min țan leh nghâl bur mai.
"A nu chu a va zak lo tak! A fanu, mi hmuhsit chîng, aia upa zahna châng pawh hre lo chu a la țan ve êm êm chu a ni si, a sualna a hmu duh țhak si lo! Kei ni ve ta ila chuan a samah kêkin ka hnûk dàwr dáwr duh hial ang chu, zak lo reuh lutuk mai!" a ti leh piap piap mai a, a duhthawh ve thei bawk a, thinrim lam aiin nuihza lamah a thusawi hi chu a kal țhìn; mahse, min thinrimpui ve êm êm laia lo nuih chu ka duh bîk miah lo.
Ka rin loh lutukin Pi Mawitei'n min rawn bia a, Joel-a hnên ațangin Naom-i țhiante laka ka chêt dàn chu a lo hre ve ngei a lo ni, làwm thu min rawn hrilh a nih chu! Mak ka ti lutuk ringawt! Mahse, a thu sawi tàwp lama," I chêt dànah khân demna che ka neih loh vàng leh làwm thu ka hrilh che vàng maiin Naom-i nu atân ka pawm che tihna a ni lo aw, ka pawm ngai chuang lo ang che. A laka mark tih țhat nân leh a pa laka i tlâktlum lehzual nân kha thil kha i ti tih ka hria, i mark pawh a țha ngawt lo maw? I ngaih lo ti țha viau chuang suh, ka awm mai mai lo tih hria la," a rawn tih chuan làwm thu min hrilh kha mak ka ti leh ta lo. A rilru a kal dik lo laklawh tawh a, min ngei a la kal tluang ve rih a ni, a ngei theih tùrin kei lahin a pasal hlui pasalah ka lo nei ve chiah bawk nèn, hemi kawngah hi chuan thiam loh ka pe hran lo; mahse, thil chu a nih tùr ang a ni vek tawh tho a, ka fanu thlavàng ka hauh avàngin khatiang khân ka chê tih pawh a hre ve tho si a.
Naom-i chu ka zâwt chhin a, an school lamah chhaih a tâwk lo tih leh school kal pawh hrehawm a tih loh thu min hrilh chuan ka thaw a veng deuh huai mai, dik tak chuan kan chhûngkua kan chhe làr tawh tih ka hria a, a țhenin min țan a, a țhenin min țan lovin 'naupang buainaa nu pui lo inrawlh ve' tiin thiam loh min pe bawk; mahse, pawi pawh ka ti lo, ka fate'n tihnawmnah an tawrha an rilru hliama a awm ai chuan 'naupang buaina' an tiha lo inrawlh zêl mai pawh ka duh zâwk.
Siamsiami leh a țhiante pahnih erawhin an school chu chhuahsanin school dangah an zir zawm daih tih ka hria a, pawi ka ti deuh dâwn a; mahse, ka ti leh ta lo, an phû tâwk an hmu-ah ka ngai. Thil thleng chungchâng sawiin an nu leh pate chuan kan fanu Naom-i leh an fate chu school khata kaltîr an ngam tawh loh thu an lo sawi a, Naom-i chu hnawt chhuak mai tùrin an lo ti a nih chu. Principal ngaih dàn a lo ni lo va, an thu a inhmu ta lo deuh ni àwm tak a ni. An chhuak daih chu an ui loh thute an sawi a, an sawi zêl dàn chuan School-ah ngèi ngéi pawh mi dang, an aia dinhmun hniamte chu hmuhsit an chîng a, an aia naupang lah tihduhdah an hrát bawk, zirtîrtute zilh pawh an lo tâwk tawh nghê nghê ni àwm tak a ni, an mark chu a lo țha vak bîk lo a nih chu.
Ka theihtâwpin Naom-i chu ka zirpui a, harsatna êm êm nei lo mah se board exam hmachhawn tùr a ni si a, țha taka a pass ka duhpui a ni. Joel-a erawh zirpui ngai lovin amahin a inen thei vek tawh a, zàna a lehkha zir thil ei tùr han pêk ve erawh ka duh țhìn a; mahse, a room kawngkhàr chhûnglama a inkalh țhin bâkah ei tùr a duh leh duh loh ka zawh chânga a duh loh thu hlîra min chhàn țhin vàngin ka ngaihven thiam vak lo, Naom-i angin min nêl ve bawk si lo.
Mahse, zàn khat erawh a room bula ka kal lai takin kawngkhàr a rawn hawng ve chiah a, kan inen chiang ngang mai. Nèlawm taka nuih pahin," Lehkha i zir țha thei em? Mamawh i neih chuan min hrilh hreh lo la aw," ka ti a, ani erawh chuan min chhâng lovin hmun dang a en ta daih a, chuti chung chuan a room chu khãrin min kalsan zui ta nghâl a.
Hetiang hi kan awm dàn chu a nia, Joel-a hian a pa nupui ni tùr hian min duh lo va, min làwm lo tih ka hria. A hma pawh khân mipa țawng duh tak a ni lo sa ve hrim hrim a, tunah phei chuan... a ngaihna a awm lo, min lo ngei hlé a nih ka ring ta hial mai. Nge a nu hian a lo fuihpawrh țhìn ni ang? An inhmu ngun viau mai lehnghâl a, tûnlai chho vêl hian. Ka lu thing nakin ka kal sawn ve ta nghâl a, an lakah rilru chhia ka pu tùr a ni lo. A nu a nia, a hmu ve bawk ang chu, nufa inhmangaihna chu a thûk êm hi.
Tunah chuan Naom-i pawhin school a chàwl ta. Krismas a hnai ve tawh a, rilru pawhin chuti lam chu a hawi ve țan tawh a, han inbuatsaih viau dàn erawh ka hre lo. Naom-i a phûr a, Nonoi a han sawi hot-pui ve sateh a, ani lahin a lo hre thiam lutuk si lo, nuih an ti za thei khawp mai.
Pa berin Krismas lo thlen hmain Shillong lama zin a han rawt a, Naom-i a lo phûr leh nasa. A phûr lutuk hmêl chu hmuh a nuam ka ti a, engkim mai hian a ti phûr êm êm vek ni maiin ka hria; mahse, Joel-a ve thung chuan zin a peih loh thu a sawi ve ta thung a. A chhan a pain a han zawh chuan," Ka nu ka lo awmpui ang," a ti sup ringawt.
"Awmpuina hun chu a awm tho ang chu, kan zin haw hnu lamah i awmpui mai ang a," a pain a tih chuan," Ka zin peih chuang lo," a lo ti leh nghutin chaw ei dawhkàn chu a thawhsan zui ta nghâl a, rilruah nuam tih lohnain min rawn tuam nghâl hlup hlup mai.
*FEL LEH ȚHA KAN INTIHNA HIAN MI DANG FELNA LEH ȚHATNA HMU THEI LO TÙRIN KAN MIT A LO TI DEL FO ȚHÌN*
Ka nuin chaw eia min sàwm avàngin Zirtàwpni tlaiah kan kal ta dial a, Joel-a pawh a insiam ve kha a nia; mahse, a nuin a rawn be leh tlat mai a, a damlo ni àwm tak a ni, a pa bula a sawi chuan kal a phalsak a, a tel lovin kan kal ta a ni.
A pi a han hmu chu Nonoi a phûr khawp mai a, an inpawm a, U Mama pawh chuti tho. Ani hian chaw kan ei dâwn vàngin ni dang zawng aiin dàwr a lo khãr hma ve a, eirawng pawh ka nu a bàwlpui vek a ni. Ka fiam a," In nu i sâwm ve mai lo a nih kha," tiin, ani chuan," Chhûngkaw zînga mi a la ni ve hlei nêm," a lo ti thung a. "A la ni thuai ang chu, ni lo'm ni?" ka lo ti leh țâlh a.
Ka nu chuan chaw ei hmain hun a hmang a, Pathian thu chhiarin thu țha, min zilhna thu a sawi leh a, Pathian hnênah a țawngțai a. A țawngțai lai chuan ka nu felzia leh kum naupang têa hmeithai ni chunga a rilru lo puitlin sîzia ka lo ngaihtuah daih pek. Tuna ka kum ang a nih hian pasal nei tawhin U Mama nèn kan piang tawh ngei a, ka pa pawhin min chhuahsan țêp tawh. Pasal kha a nei hma deuh a; mahse, a rilru kha a lo puitling bîk êm a ni, kei hian ka chhùn lo takzet.
Kan chaw ei chu ka puar khawp mai a, ka nu chawhmeh siam ngei mai ka han ei leh chu ka puar lo thei lo hi a ni tawp mai. Chaw ei kham lamah thingpui hâng dawm pahin an titi leh rih a, awm rei vak pawh ka duh lêm lo. Naom-i'n lehkha a zir hman lo ang tih ka hlau deuh a a ni; ani lah chu Nonoi nèn ka room hlui ni taah khân awmin lem an ziak a, an ngawi reng a, an reh lutuk avàng chuan ka ngaih a țha lo deuh nghe nghe. Ka va en ru dêk dêk a, an lem ziak chu an lo uluk dùn ngang lo niin, pakhatin dawhkànah lehkha a lo pharh dang a, pakhat lahin chhuatah, an inbe lo va, rilru an pe dùn ngang a ni ang, ka thãwm pawh chu an hre lo ni tùr a ni, an rawn hawi miah lo bawk.
Ka nute ka va pawh leh hnu chuan," Ka thu hriat hi a dik meuh em? Hmeichhe naupang pakhat kut i thlâk tih hi?" ka nuin a rawn tih chhuah chuan mak ti takin ka en nghâl vat a, min lo en ve reng niin. U Mama ka en leh a, ani pawh chuan min lo en ve reng tho, chhàn mai ngaihna ka hriat loh avàngin ka nu chu ka en leh a, ka hnunga Pu Rintea'n a kut a rawn daha dìm têa min chùlsak tâkah chuan," Aw... mahse, engtin nge i hriat!!? Tuin nge hrilh che?" ka ti chhuak ta hrâm a, U Mama hi chuan a hre lo va, a hrilh thei lo. Chhani ni se, a hre dâwn lo. Chuti a nih chuan Pu Rintea, ani hian a lo hrilh em ni ang?
"I kutthlâk naupang nu nia insawiin min rawn bia a," a rawn tih tâkah chuan ka thaw hawk a, engtin nge ka nu number chu an lo neih ni? Lo nei pawh ni se, engati nge ani kher hi an va biak ni? Keimah min rawn biak mai àwm, an fanu kutthlâktu chu ka nu ni lovin keimah ka ni alawm.
"Naupang kum tling lo buaina ho têah i lo inrawlh a, a fanu chu i bêng ta niin a sawi a, school pawh a kal theih loh phah niin a sawi nghe nghe. Mak ka ti a, thu dik a ni ngei em tih zawh fiah che ka duh pah a, chaw eiah ka rawn sâwm ta che u a ni. Engati nge naupang chu kut i lo thlâk mai theih le tiin ka lo ngaihtuah ka lo ngaihtuah a," dam tê hian ka nu chuan a ti leh dap dap a. U Mama chuan," Ka nau i ni a, ka hre chiang viau che tih ka hria. Kut i thlâk a nih chuan i thinrim tàwp a nih ka ring, a chhan dik tak han sawi teh," a lo ti ve a, a hmaa kan hlim nui hmêl kha chu a bo vek tawh, kan tak rùn tawh mai a, kan mûk tlâng hlawm viau tawh a ni.
"Han sawi vek rawh le," tiin Pu Rintea chuan ka kut chu a rawn vuan a, chu chuan eng emawti takin huaisenna leh chakna min pe niin ka hria, a hmain min vawnsak ngai hauh si lo, ka kut a vawn chu ka en deuh reng phawt a, a hnuah thâwk la lehin thil thleng chu ka nu leh U Mama chu ka hrilh ta vek a.
Ina kan lêt leh hnu thleng pawh chuan ka rilruah chu thil chu a awm ta reng a, Siamsiami nu chuan eng vànga ka nu chu va phone kher nge a nih ang tih mawlh chu ka ngaihtuah a ni. Kan chhûngkua chu min lo hre chiang àwm hlê mai ka ti rilru a, ka nu khân sawi chhuah duh loh a neih ngei pawh ka ring, thinrim taka a rawn àn khum ngei ka ring bawk, a thil sawi laia ka nu nuam lo tih hmêlte kha... ka maimichhîng vang vang a.
"Ka nu khân thil dang sawi chhuah duh loh a nei niin i hria em?" Ka ti mãwl tawp a, min chhàn mai loh avàng chuan ka han meng a, kut inkuangkuah thûn hian min lo en reng tawh lo niin.
Ka men chhuah tâk vàng nge," Nei maithei, lo nei ta se?" tiin a rawn țawng chhuak ve ta a, khap hauh lovin a hmêl pawh hmu chiang chuang lo chuan ka en reng leh phawt a, ka hmai bulah a kut chu rawn vaiin," I bulah ka awm ve reng a nia, duh tâwk teh le, kha i thluak bûr te reuh têah khân thil i ngaihtuah nasa mah mah a nih kha, kei chuan hmun ka chang ve àwm hauh si lo," a rawn ti leh ta a, ka mit chu khap sak sakin a hmêl chu ka hmu chiang leh ta a, min fiam emaw ka ti deuh a nia; mahse, a hmêl leh mitmengah chuan fiamthu hmël a lang miah lo.
"Hmeichhe sual leh nunrãwng tak ka niin ka hre ta. Naupang ka bêng ringawt a nia; mahse, mi kutthlâk chîng erawh ka ni lo," ka ti leh ringawt a, amah chu ka bia ni kher pawhin ka hre lo, ka sawi ve mai mai zâwk niin ka hria.
Ka hmaah chuan rawn țhingțhi hniamin ka kut chu a rawn vuan a, zanin atân a vawi hnih vawnna a ni ta. Eng a hria chu ni maw? A kut lum thar tharin ka kut vawt ngiai a rawn tawk chu nuam ka ti, ka lum nghâl ham hamin ka hre bawk.
"Shh... Chutiang sawi suh, i ni hauh lo, i ni ngai hauh lo bawk ang. Eng pawh tâwk la, i hmaa ding tùrin i pasal ka awm alawm, engtin mah an ti dâwn lo che, an tih che ka phal dâwn lo. Le, duh tâwk ila, mu tawh ang aw?" dam zet hian a ti leh a, a awka dam zeta min hnemna chu hriat a nuam tak zet.
"Mi kutthlâk chîng chu ka ni lo tiraw?" ka ti leh sap a, a lu thin pah hian," Ni hauh lo mai! I ni ngai lo bawk ang. A fanu chhan nân nu țha chuan eng pawh a ti thei a ni, thil țha lo lakah hlauh phei chuan a fanu chhan chu a tih tùr zâwk a ni, kan fanute'n hetiang nu huaisen an nei hi ka lãwm," a lo ti dam leh thluam a, a hmêl ka en chuan fiamthu hmêl a pu lo va; mahse, tlêmin a nui deuh tih erawh ka hria.
"Kawlh min ti a nih kha," ka ti ve thung a, a nui ta hawk mai. Ka kutah chuan chelhin min kài ding a," He ka nupui te reuh tê hi kawlh ka la ti chhin hauh lo mai, i kawlh lo bawk a, ni lo'm ni?" a ti leh a, kei chuan," Keimah vàngin kan buai ta êrh a nih hi, i zahna mai bâkah chhûngkaw buaina ka thlen bawk si a," ka ti leh a, hei hi a dik chiah a ni. Ka nute lamin keimah vàngin phone call tuihnai vak lo an dawng a, helamah lah chhûngkaw mualphona ka thlen belh leh bawk a, thil ka lo ngaihtuah thui lo nge, insùm theihna ka lo tlachham viau zâwk ni?
"Khatiang ngaihtuahna kha a hrisêl lo a nia," tiin ka kutah chuan chelhin min kài ding a," I pasal hi min ring tiraw? Ka fate pa ka nih rualin i pasal ka ni a, ka fate'n min ring tâwk ang bawkin nang pawh hi an ring tâwk che. Chutih laia inrîng tâwk lo zeta awm tùrin ka duh miah lo che a nia, min ring la, nang pawh inring tâwk bawk rawh, a țha em?" thutak zetin, muangchâng leh aw ki hniam ruih hian a ti ta charh charh a, a hmêl thutak rùn mai chu ka en vang vang a, ani hi ka ring lo phal teuh lo mai, ka ring ang, ka ring bur ang.
Buaina êm êm nei lo chuan hun chu kan hmang chho ve zêl a, kha thil thlen ațang khân Nonoi nèn a school bâng kan lo hmuak ta ziah a, buaina erawh a awm tawh hauh lo, Siamsiamite kha helai hnaia awm an lo ni miah lo va, khatia han tih kual vêl an duh vàng chauha Naom-i pawh rawn zui haw an lo ni. An la naupan nèn, râpthlâk ka ti telh telh mai.
A hma zawng aiin Naom-i chuan min pawhin ka hre ta thung. A thil tawn eng eng emaw min hrilh ve seuh seuh reng a, min ko reng a, ei tùr ni se a nau nèn kan ta tùr min rawn hawnsak ziah a, ka tân en hran theih a ni lo rêng rêng. Ka thisen zawmpui ni lo mah se Nonoi nèn en hranna ka nei lo va, ka nei thei ngai lo bawk ang. Heti khawpa min en 'nu' thei chungah hi chuan rilru chhia pawh ka pu thei ngai lo ang tih ka hre chiang a ni.
*******
"Naom-i nu chuh! I lo inzêp thei hlê mai, thil thleng pawh min hrilh ve duh lo va," lungawi lo lek lek aw tih hriat taka Chhani'n a rawn tih chuan," I lo hre ve a ni maw?" ka ti ringawt thung a. Ani chuan," Hre lo thei nâng, news-ah kan hmu lo chauh che a nih àwm hi!" a rawn ti leh a, ka lo chek tlak tlak ringawt.
A hriat dàn chu min hrilh a, kei pawhin thil thlen dàn chu ka hrilh ve bawk a, Siamsiami nuin ma nu a lo va biak thute pawh ka hrilh nghâl bawk. Ani hi zawng ka țhiannu ngang a ni bawk a, a thin a rim țan leh bâkah min țan leh nghâl bur mai.
"A nu chu a va zak lo tak! A fanu, mi hmuhsit chîng, aia upa zahna châng pawh hre lo chu a la țan ve êm êm chu a ni si, a sualna a hmu duh țhak si lo! Kei ni ve ta ila chuan a samah kêkin ka hnûk dàwr dáwr duh hial ang chu, zak lo reuh lutuk mai!" a ti leh piap piap mai a, a duhthawh ve thei bawk a, thinrim lam aiin nuihza lamah a thusawi hi chu a kal țhìn; mahse, min thinrimpui ve êm êm laia lo nuih chu ka duh bîk miah lo.
Ka rin loh lutukin Pi Mawitei'n min rawn bia a, Joel-a hnên ațangin Naom-i țhiante laka ka chêt dàn chu a lo hre ve ngei a lo ni, làwm thu min rawn hrilh a nih chu! Mak ka ti lutuk ringawt! Mahse, a thu sawi tàwp lama," I chêt dànah khân demna che ka neih loh vàng leh làwm thu ka hrilh che vàng maiin Naom-i nu atân ka pawm che tihna a ni lo aw, ka pawm ngai chuang lo ang che. A laka mark tih țhat nân leh a pa laka i tlâktlum lehzual nân kha thil kha i ti tih ka hria, i mark pawh a țha ngawt lo maw? I ngaih lo ti țha viau chuang suh, ka awm mai mai lo tih hria la," a rawn tih chuan làwm thu min hrilh kha mak ka ti leh ta lo. A rilru a kal dik lo laklawh tawh a, min ngei a la kal tluang ve rih a ni, a ngei theih tùrin kei lahin a pasal hlui pasalah ka lo nei ve chiah bawk nèn, hemi kawngah hi chuan thiam loh ka pe hran lo; mahse, thil chu a nih tùr ang a ni vek tawh tho a, ka fanu thlavàng ka hauh avàngin khatiang khân ka chê tih pawh a hre ve tho si a.
Naom-i chu ka zâwt chhin a, an school lamah chhaih a tâwk lo tih leh school kal pawh hrehawm a tih loh thu min hrilh chuan ka thaw a veng deuh huai mai, dik tak chuan kan chhûngkua kan chhe làr tawh tih ka hria a, a țhenin min țan a, a țhenin min țan lovin 'naupang buainaa nu pui lo inrawlh ve' tiin thiam loh min pe bawk; mahse, pawi pawh ka ti lo, ka fate'n tihnawmnah an tawrha an rilru hliama a awm ai chuan 'naupang buaina' an tiha lo inrawlh zêl mai pawh ka duh zâwk.
Siamsiami leh a țhiante pahnih erawhin an school chu chhuahsanin school dangah an zir zawm daih tih ka hria a, pawi ka ti deuh dâwn a; mahse, ka ti leh ta lo, an phû tâwk an hmu-ah ka ngai. Thil thleng chungchâng sawiin an nu leh pate chuan kan fanu Naom-i leh an fate chu school khata kaltîr an ngam tawh loh thu an lo sawi a, Naom-i chu hnawt chhuak mai tùrin an lo ti a nih chu. Principal ngaih dàn a lo ni lo va, an thu a inhmu ta lo deuh ni àwm tak a ni. An chhuak daih chu an ui loh thute an sawi a, an sawi zêl dàn chuan School-ah ngèi ngéi pawh mi dang, an aia dinhmun hniamte chu hmuhsit an chîng a, an aia naupang lah tihduhdah an hrát bawk, zirtîrtute zilh pawh an lo tâwk tawh nghê nghê ni àwm tak a ni, an mark chu a lo țha vak bîk lo a nih chu.
Ka theihtâwpin Naom-i chu ka zirpui a, harsatna êm êm nei lo mah se board exam hmachhawn tùr a ni si a, țha taka a pass ka duhpui a ni. Joel-a erawh zirpui ngai lovin amahin a inen thei vek tawh a, zàna a lehkha zir thil ei tùr han pêk ve erawh ka duh țhìn a; mahse, a room kawngkhàr chhûnglama a inkalh țhin bâkah ei tùr a duh leh duh loh ka zawh chânga a duh loh thu hlîra min chhàn țhin vàngin ka ngaihven thiam vak lo, Naom-i angin min nêl ve bawk si lo.
Mahse, zàn khat erawh a room bula ka kal lai takin kawngkhàr a rawn hawng ve chiah a, kan inen chiang ngang mai. Nèlawm taka nuih pahin," Lehkha i zir țha thei em? Mamawh i neih chuan min hrilh hreh lo la aw," ka ti a, ani erawh chuan min chhâng lovin hmun dang a en ta daih a, chuti chung chuan a room chu khãrin min kalsan zui ta nghâl a.
Hetiang hi kan awm dàn chu a nia, Joel-a hian a pa nupui ni tùr hian min duh lo va, min làwm lo tih ka hria. A hma pawh khân mipa țawng duh tak a ni lo sa ve hrim hrim a, tunah phei chuan... a ngaihna a awm lo, min lo ngei hlé a nih ka ring ta hial mai. Nge a nu hian a lo fuihpawrh țhìn ni ang? An inhmu ngun viau mai lehnghâl a, tûnlai chho vêl hian. Ka lu thing nakin ka kal sawn ve ta nghâl a, an lakah rilru chhia ka pu tùr a ni lo. A nu a nia, a hmu ve bawk ang chu, nufa inhmangaihna chu a thûk êm hi.
Tunah chuan Naom-i pawhin school a chàwl ta. Krismas a hnai ve tawh a, rilru pawhin chuti lam chu a hawi ve țan tawh a, han inbuatsaih viau dàn erawh ka hre lo. Naom-i a phûr a, Nonoi a han sawi hot-pui ve sateh a, ani lahin a lo hre thiam lutuk si lo, nuih an ti za thei khawp mai.
Pa berin Krismas lo thlen hmain Shillong lama zin a han rawt a, Naom-i a lo phûr leh nasa. A phûr lutuk hmêl chu hmuh a nuam ka ti a, engkim mai hian a ti phûr êm êm vek ni maiin ka hria; mahse, Joel-a ve thung chuan zin a peih loh thu a sawi ve ta thung a. A chhan a pain a han zawh chuan," Ka nu ka lo awmpui ang," a ti sup ringawt.
"Awmpuina hun chu a awm tho ang chu, kan zin haw hnu lamah i awmpui mai ang a," a pain a tih chuan," Ka zin peih chuang lo," a lo ti leh nghutin chaw ei dawhkàn chu a thawhsan zui ta nghâl a, rilruah nuam tih lohnain min rawn tuam nghâl hlup hlup mai.
*FEL LEH ȚHA KAN INTIHNA HIAN MI DANG FELNA LEH ȚHATNA HMU THEI LO TÙRIN KAN MIT A LO TI DEL FO ȚHÌN*
Comments
Post a Comment