☆KA TÂNA RUAT☆ - 31 By Dingdi Pachuau

☆KA TÂNA RUAT☆ - 31 By Dingdi Pachuau

Chumi ni, nilêng mai chuan ka awm a nuam thei miah lo. He inah hian ka la awm rei vak lo nain Joel-a hian min nêl lo mai ni lovin min làwm lo a ni tih ka hre chiang viau tawh a, țawng duh tak a lo ni lo bawk nèn, min la be hmasa lo va, ka be hmasa hrâm hrâm zâwk a ni. Min làwm miah lotu tih tih hriat reng biak hmasak hi ka tân pawh thil nuam tak chu a ni bík miah lo; mahse, upa zâwk, rilru puitling zâwk pu ka ni a, a nuhrawn ka ni bawk tih ka hria. A lakah ka rilru dang êm êm lo mah se a tân chuan nu-a pawm chu har ve tak tùr ka ni tlat tih ka inhria a, a rilru put dàn tùr pawh hi han hriat thiam ve deuh ruak chin chu ka nei ve tho a ni. Ani, tlangvâl chho țan, rilru luhlul chhoh hun lai a ni bawk a, lehlamah a nu nèn an lo inpawh țha leh tawh bawk nèn, a rilru a hrehawm ve țhìn dâwn êm asin, kei lahin a pa ka lo nei tawh bawk si a.

Tlaiah pawh Joel-a chu a rawn haw ta lo va, a pa hnênah a hrilh lâwk a nih ka ring deuh ngawt, eng mah a sawi si lo va. Chaw kan eisan a, Naom-i chuan," Ânu hnênah chaw a ei leh tawh a ni ang, a tìr lama a thinur tehlul nèn, a rem thei ta hi a țha e," a ti vei roh a. Ani hi zawng, naupang chhe deuh chung hian a rilru hi a țha a, a u ai pawh hian a puitling daih zâwkin ka hre țhìn nghe nghe.

Nonoi leh a pain TV an en a, keiin Naom-i lehkha ka zirpui ve thung a, kan inhrilh malh malh a, Naom-i chu a rilru a chak a, ka ngaihtuah lutuk lo nain ka fuih sauh sauh reng thung. Țha taka pass tùrin ka duh a ni, a fail hi ka ring chhin ngai lo hrim hrim a; mahse, chuti chung pawh chuan țha takin, a duh duh zir thei tùr khawpa țhain pass se ka duh a ni.

Dâr 9-ah ei tùr ka siamsak a, ka pêk hnua TV awmna lama ka kal chuan Nonoi, a pa mal chunga lo muhìl bâm chu ka hmu nghál a, ka lâksak ta vat a, ani erawh chuan," A rit hlei nêm, ka zo ve lutuk asin," a lo ti a, kei erawh chuan," A, khuma mut a châk tawh zâwk ang, ka'n mut nghâl ang e," ka ti a, room lam panin ka  kalpui zui ta a.

Kan bulah a mu tawh bîk lo va, kan room dawt chiahah a pain room a siamsak a. Naom-i'n a chângin a mutpui bawk; mahse, a lehkha zir a ti buai ang tih ka hlau țhìn a, mutpui tam lo se tih ka duh zâwk.

Ka muttîr zawha puan ka sintîr vek hnu chuan thãwm dìm takin ka chhuak zui leh țhem țhem a, room pâwn ka chhuak chiah chu Joel-a țawng ri ni àwm tak ka hre zui nghâl a, a rawn haw ve ta a ni chiang. Chutah, a pa țawng ri bul bul ka hre zui leh a, a sawi erawh ka hre thei lo.

An awmna lam pan chuan ka kal zui nghâl a, Joel-a rawn kal chak angreng tak nèn chuan kan insu țhelh chu a ni! A hmêlah chuan lungawi lohna nasa tak chhiar theiin ka inhria, ani erawh chuan min melh hauh lo, a room lam chu ding zetin a pan nghâl a, a hmêl kha, engtizia nge a pa nèn an lo inhau hman em maw ni le? A pa nèn kan intâwk zui leh zat a, ani chuan," Ka'n be lawk ang e," a ti sup a, men zàu deuh hlek pah hian," A thinrim em ni?" a kuta chelh chung chuan ka ti sap a, tlêmin ka hlauthãwng deuh; mahse, ani chuan," Hlauhthàwn tùr a awm lo ve," a ti ve thung a, ka chelhna ka thlah hnuah Joel-a room lam panin a kal zui ve ta a.

Ka rilru a nuam thei meuh si lo va, TV en pawh ka peih lo. Țhut tlawk tlawk ai chuan tiin Naom-i room lamah ka kal ve ta daih a, a lo la zir uluk khawp mai. Ei tùr a lo ei zawh tawh avàng chuan a thlèng chu ka lâksak a; mahse, kal nghâl mai lovin ka awm ve ta rih a.

Mutnaah chuan zin chungchâng chu a sawi chhuak leh a, ka duh leh duh lohte chu min zâwt a. Ka duh thu ka sawi rualin hman lo chung chung leh chhûng kim lo leh rilru nuam kim zân lova zin luih hrâm ka duh loh thu erawh ka sawi lang tel ta tho a, nu ber ka ni ve a, sawi thei ve tùr niin ka inhria a ni.

"Bawiha hian zin a duh ve tlat lo va, eng a hria chu ni maw? Min la hnial ngai miah lo asin le, ka thin a ti rim lek lek hial a ni," a tih chuan a hmêl chu ka en vat a, chung lam enin a mu át a, a mit pawh a khap lo.

"Thinrim lo ve, tûn țum chu a peih lo ve tlat ni maiah ngai mai ila, a peih loh chhan lah a nu awmpui a duh vàng a nia, thil dang vàng a ni chuang hlei nêm," tiin Joel-a lam chu ka'n țang ta theuh a, ani chuan," A chungah i thinrim nange?" a rawn ti ve thung a, en vatin kei chuan," Eng nge thinrimna chhan tùr ka nei em ni?" ka lo ti há a, ani chuan," Nei maithei asin," a lo ti mai a, chutah," Zanin chu ka thin a rim ve deuh hlek a, a awm dàn hi ka hai emaw a ti a, a be ngai lo che tih pawh ka hria, fapa sual ang maiin a khawsa deuh tlat a," a ti leh sup sup a, a chawlh deuh dat hnuah," Chhûngkaw kim ngeia han zinho ka duh vàng a nia, hun pawimawh tak thlen dâwna kim lova zin chhuah hi ka duh ngai loh thil a nia; mahse, ni e, i ngaih dàn ang khân ngaih ka lo tum ve ang e," a ti ve leh ta a, nui sukin a hmêl tak rùn pawh chu a inthlâk zui ta nghâl a, hmuh a nuam leh ta. Khua a vâwt ve tawh bawk a, mut pawh a nuam tawh viau, mut ti nuam zual tùrin min rawn kuah zui ta nghâl a.

Engtiangin nge an pafa chuan an inbiak ka hre lo nain Joel-a hmêl hlim lo zual lutuk ațang chuan an inbiak dàn a fuh viau lo a nih ka ring deuh ngawt a, pawi ka ti a, a chhan bul ber lah ka hre ve kar bawk si.

Pa berin chhûng kim lova zin a duh si lo va, kan zin ta lo. Pawi ka ti lo, hmanhmawhna rilru nei lovin Krismas lo thleng tùr atân kan lo inbuatsaih thei ang a, zin loh tâk rau rauah chuan pawi ka ti lo rêng rêng. Krismas tree chei kan la ngai a, hûng chhuak tawh mah ila cheina hmanrua pakhat tê mah a la inkhai lo. Naom-i hian a chei châk tawh a, a sawi ve ziah; mahse, mawi takin, a mawi thei ang bera chei ka duh avàngin a cheina hmanrua lei belh ka la duh a ni, tuna kan neih sa hi chu a beitham êm mai.

Naupang Siamsiami nu leh pate lam ațang khân thu thar a rawn awm leh ta miah lo va, ka rin aiin an ngawi rei, reh hlen daih se ka ti. Joel-a awm dàn vàngin rilru a nuam lo tawh a, mahniin kan inhre kur a, mi dang hnên ațanga rilru buaina tawn leh zêl zawng, ka zuam lo.

Keimah ngeiin tree cheina tùr en ka duh avàng chuan kan nufaho chuan kan chhuak a, Nonoi phùr fàlzia chu, a uin a kai a, pawm a duh miau si lo va. Inah pa ber a lo awm ve thung a, lo kal ve a duh viau nain in nghâktu awm lova chhuahsan vek chu a dik meuh si lo va.

Naom-i'n nalh a lo hre ve ngang mai bawk a, kan lei nual mai. Dàwr tâwt ve tak takahte chuan kan inhnawh ve tâwt tâwt zêl a, kan inkhai bâwr ve țan tawh bawk nèn, a hahthlâk ve lek lek. Chutih rualin Nonoi nuam ti lah chu a lo rãk ve chèl chúl bawk a, ka chhuahpui khât a, a àwm ve tho, mipui zi nuai nuaite hi a hmu khât ve si a.

Ina kan haw chuan a tlai ve deuh ruih tawh a, in chhûng kan lút chu rin loh lutukin Pi Mawitei ka hmu thut mai! Hahdam hmél fê hian a lo țhu ãwn diai a, a hma dawhkànah chuan thingpui leh a hmeh tùr a lo inchhawp bawk. A hma aiin tlêmin a lang chêr ta deuh a; mahse, a chhiat loh ngaiin a la chhe lo reng tih chu ka en thuak pawhin ka hmu thei nghâl vek.

"Ânu... eng nge i lo tih?!" tiin Naom-i chuan a be vat a, a nu a hmu thut chu hmuh a inring vak lo a ni ngêi ang, mak a tih hmèl riau a; mahse, rei erawh a ni lo, a nuin," Hmuh che ka châk a, kan inhmu lo rei tawh bawk sia, min rawn tlawh duh si lo. En teh,  thilpêk ka rawn ken che a, i duh viau ang," a tih tâkah chuan hlim tih hriat tak hian a au nghâl chùl a, a pa pawh a rawn lang zui thuai a.

Kan thil leite kan dah fel rih a, dàwra kan chawlh loh avàngin ril a țâm ve tawh si a, chhang chu phawrhin thingpui siam ka han tum a, Pu Rintea chuan," In hah dâwn nèn, in ril a țâm tawh viau tak ang chu, ka lo siam ang che u," a rawn ti vat a, a buaipui zui nghâl a, kei pawhin ka hnial lo.

Naom-i chu a nuin pheikhawk mawi tak leh jacket mawi zet mai hi a rawn leisak a lo ni. A han ha chhin chu a lo inhmeh phian mai a, inhmeh kan tih thu kan hrilh nak nak a, amah pawhin inhmeh a inti ve ngang mai, inhmeh tak a ni. A nu chu làwm thu a hrilh mawlh mawlh a, he nau hi chu a rilru hi a țha a nia.

Thingpui kan in zawh veleh no chu ka lâk khâwm hmain Pu Rintea bawk chuan a la khâwm leh a, ka sil pawh phal lovin amah chuan a sil leh vek bawk. Thil thar chu a ni lo nain Pi Mawitei hmuh laia siltîr kha ka duh vak lo va; mahse, a phal tlat si lo.

Naom-ite nufa inkawm hlàn chuan tree chu ka chei ta a, ka ban phâk loh lai tùr chu pa berin a lo buaipui ve a, chutih pah chuan kan bula awm ve mual mual reng Nonoi chu a chhaih pah a, an nui dùn leh hak hak țhìn.

Eirawng bàwl a hun zui mai avàng chuan ka chei rei hman lo. Cheina hmanrua chu tree bulah chuan ka dah kháwm vek a, nakinah ka hman huna chhunzawm leh mai tùrin ka ti a ni, bâkah, Naom-i pawhin min pui thei tawh bawk ang a...

Ka bulah zêl pa ber chu a awm ve zél a, chawhmeh siam ngai pawh min pui vek. Naom-i duh zâwng takin Alu ka kang a, sei sîn sing sengin ka zai a, mawi a tih țhin êm avàngin hetiang hian ka zai țhìn.

Chutih lai chuan Naom-i a rawn kal hnai a," Âpa, Ânu bulah chaw ka ei dâwn aw," a rawn ti a, a pa chuan," i nu hi díl la?" a lo ti zauh a. Kei chuan," I duh phawt chuan le, dìl kher ka ngai hlei nêm," ka lo ti zung zung thung a. Naom-i erawh chuan min dîl tho a, ka lo phalsak nghâl thlap bawk.

"A nu chu ka'n be ve lawk ang e, rawn haw hma deuh thei se tihte pawh ka'n hrilh ang e," tiin a tho zui nghâl a, ka thîk phâk rual loh mah ni se chutia a nupui hlui be tùra min kalsan chuan ka rilruah thîkna chuan hmun a rawn khuar zui ta nghâl a, ka va duh lo tak!

Naom-i insiam zo rawn kal chuan Alu kan a rawn hmuh chuan," Awi, a tui dâwn lutuk! A rimte chu. Ânu kha lo kal lovin thil kha min leisak lo se chuan a inah chaw ka ei duh miah lo ang maw le," a ti sar sar a, chutiang lam sawipui ka duh loh avàngin," Ni dangah Alu chu kan hmeh leh thei tho alawm. I nu bulah chuan hlim deuhin hun i va hmang dâwn nia, a duhsak êm che kha," ka ti a. Ani chuan," Aw le, ka lo haw hunah tree chu kan chei chhunzawm dâwn nia. Nu, nangmah chauh chuan lo khawih tawh miah suh aw, i rawl vek mai ang, a nih loh pawhin i chêtsual phah palh hlauh ang, i tê ve bawk sia maw," a ti a, a thil sawi chu ka haw lo hrim hrim, ka nuih a ti za zâwk.

Zanriah hma takah kan ei a, tui taka ei a har. Naom-ite unau an awm lo nèn, kan tlêm rak rak si a, Joel-a nèn inbe tam lo mah ila țawng duh ber Naom-i nèn an han awm loh meuh chuan a reh tlawk tlawk ni berin ka hria, an ngaihawm ru riau mai.

"I chaw ei a tui meuh nange?" a rawn tih chuan ka ngaihtuahna ram ata harh chhuakin ka han nuih sak a," Naom-ite an awm lo va," ka lo ti ringawt. Ani chuan," Ka awm ve reng laiin... i fate pahnih awm lo chuan i khua a ti har nghâl ngawt a maw? E khai, kei chu eng mah lo mai ka lo nih àwm hi," a ti leh a, nui chuang lo mah se a aw chhuakah chuan lungawi lohna leh làwm lohna ka hre chuang dèr lo.

"An awm khân kan chhûngkua kan kim țhap a, kan kim loh hi chuan engtin emaw ni tak hian rilru a vâk kual țhìn a," ka ti ve leh a, a dik chiah bawk. Joel-a a awm loh châng pawh hian rilru a nuam miah lo, min hua emaw min ngei emaw pawh ni se a chhûngkaw bulah hian awm reng thei se ka duh, ina a awm peih loh chhan ti mai ang, hei lah hi ka hre chiang mai si a.

"A țha, a pawi lo, i fate an ni alawm, nu ngaihtuahna dik takin i ngaihtuah a ni," a ti dam dap a, min rawn enin," Mahse, tunah tak hi chuan i rilrua i ngaihtuah buai zawng zawng kha dah bo hmak rih la, kan pahnihin hlim tak leh tui ti takin ei dùn teh ang, kan pahnih chauha ei dunna hun kan neih khàt êm hi," a ti a, tlangvâl chimawm tak ang maiin dawhkàn hnuaiah a ke chuan ka ke a rawn tawk zoh a, khap hauh lo chuan min en reng bawk sia, ka nui leh ringawt tawh. Ka pasal hi ka zah a, ka tân a fel êm êm a, sawisèlna tùr ka hre lo. Ka rin loh deuha min chhaih leh zauh țhìn lah hian min ti hlim thei phian lehnghâl a, a lak ațang hian nichina a chêt dàn angte kha ka beisei phâk lo hrim hrim.

"Nangmah mai chuan i ei tam thei dâwn tlat lo, khawi maw," tiin min rawn țhut hnaih a, fian leh fork hmang chuan chawhmeh chu a suak a," Âng la," a ti leh a, a chêtzia vànga ka hamhaih avàngin ka lo en reng ringawt a, àn pawh ka âng lo. Mitko sàn deuh ãka âng tùra zaizira min hrilh leh tâkah chuan ka lo âng ve ta a, chawhmeh chu min rawn barh a. Chu chu Nonoi chuan a rawn hmuh chuan a pa hnênah amah chu barh ve tùrin a han ngèn zui zat a, ani pawh chuan Bean leh Alu kan pawlh chu a barh zui ve mai bawk a.

"Nichin ațang khân ngaihtuahna thar ka nei a, ka chhuahpui ngai lo che tih leh hun thâwl tak ka neihpui ngai miah lo che tih ka hre chhuak a, i tân pasal țha tak angin ka awm hauh lo tih pawh ka hre chhuak bawk. Nang, kan chhûngkaw tâna mi pawimawh ber tân hian kei hian hun thâwl ka insiamsak ang a, kan pahnihin thil ei dùnin emaw bazâr tùrin emaw pawh ni se kan chhuak dùn zauh zauh tawh ang tiin rilru ka lo siam fel vek tawh a ni, i duh zâwng a ni em?" A hnu deuhah chuan a ti leh ta a, fiana a thil suah chu min barh thei tùrin a inring leh dèr tawh.

"Hna lamah i buai a, chutiang ka phût rêng rêng lo a nia. Inah fate nèn lo awma thil țûl lo thawh hi nuam ka ti; chutih rual erawh chuan i thil sawi kha ka hnial che tihna a ni chuang lo aw," ka ti ve thung a. A buai a, a hnà thawhna lam ațangin hma takah a rawn haw thei lo tih pawh ka hria, a hna lam ngaihthaha rem lo chung chunga hun thâwl min siamsak țâlh a tum ang tih ka hlau.

"Ka lâwm e," a ti sup a, chaw ei lai lai e ti lo chuan fian chu dah thlain ka kut a rawn vuan a," Nu țha leh nupui țha tak i nih tehlul nèn, i tân pasal țha tak angin ka awm ve si lo, min ngaidam mawlh ang che. Tûn hun, tûn dârkâr ațang ngei hian pasal țha tak, i innghahna nih ka tum tawh ang, ka tiam che a ni," ti tak tih hriat tak hian a sawi charh charh a, thu hriat nuam tak chu a va ni tehlul êm!!

A thil sawi chu a tûk ațangin a ti nghâl. Min chhuahpui a; mahse, kan pahnih chauh chuan kan ni thei lo, Nonoi a lo tel ve lo thei lo va, chutih rualin Naom-i pawh a bäng thei chuang lo. Tree kan chei zo tawh a, zàna a êng de sep sep hi Nonoi làwmah a tla a, Boney M-in Krismas hla an sak kan play a, a lâm nasa thei viau a ni, a u Naom-i'n a fuih phûr thiam thei bawk si.

Chhûngkuain Krismas hunpui hlim takin kan hmang tlâng ang chu tih laiin Joel-a'n a nu bula hman a duh tlat a, a pain a rem ti chiah si lo, ani lahin a tum ruh bawk si, kan chhûngkua boruak a fuh hlei thei meuh lo chu a ni. Anni an hlim loha lungawi lo hmêl an tih lan miau chuan chhûngkua min nghawng vek lo thei lo va, boruak a hahthlâk khawp mai. Keia tân lah lo inrawlh vena chi a ni meuh bawk si lo va, ka mang a ang ru tak tak a ni. Joel-a lah luhlul ve tak niin a luhlul hun lai tak a ni bawk a, a pa chu kan hriat ve lai chuan a chhâng ngai miah lo nain a rilru lamah erawh a nu hnêna hman tumin a rilru a siam vek tawh a ni ngei ang.

Mahse, tlai khat chu a rawn haw hma ve teh tlat a, a pa awm loh lai tak a ni bawk nèn, lo biain in tùr a duh leh duh loh ka lo zâwt a, a duh loh thu min hrilh ve mai a, ka rin aiin min chhâng bung lo tlat. Chu chuan huaisenna min pein," Krismas chu i nu hnêna hman i duh tlat si a maw?" ka ti leh a, ani chuan," Ka nu a ni miau a," a lo ti leh a, ka rin loh deuhin min chhâng duh leh ta, ka zâwt chhunzawm zêl châk tlat.

"I pa hnêna lo sawipui che i duh em? Nute hlutzia leh an bula awm thlâkhlelhawmzia ka hre chiang ve a nia," ka ti leh a, ani erawh chuan min rawn enin," Sawipui ka ngai lo, lo inrawlh duh suh, phal lo mah se ka kal dâwn tho," a ti leh ta a, a mitmenga tumruhna leh luhlulna chu ka hmu chiang a, a kal ngei ang tih pawh ka ringhlel lo.

"Aw le, i kal a nih chuan hlim deuhin hman in tum dâwn nia," ka ti a, ani chu kal sawn deuhin," He in hi nuam ka ti tawh lo," a ti leh nghut a, a room lam pan chuan a kal zui ta nghâl a, ka en zui deuh reng. Rilruah hrehawm tihna ka nei tho nain ka biakna min chhâng duh chu ka lãwm tho tho, min chhàn lêtna kha heta ka awm chhúnga a țawng tam ve ber țum a ni tih pawh ka hria.

A nu chuan kan inbia tih a lo hria em maw ni, min rawn bia a," Ka fate chungchângah lo inrawlh ve hauh suh, i fanu chauh kha ngaihtuah rawh," a rawn ti a, kei chuan inti-luhlul luiin," Ka fate vek alawm an nih," ka ti ve thung a. Chu chuan a thin a ti rim a ni ngei ang," I fate an nihna pakhat tê mah a awm lo, zak hlê teh!! Joel-a'n in nuam a tih loh chhan pawh hre chiang bertu i ni, fing hlê si i mãwl ru tlat, calibre hniam deuh hi chu in lo hriat deuh chu a lo nih hi. An nunah khân inrawlh lovin inthiarfihlîm hmak ang che," a rawn ti leh ta bawrh bawrh mai.

Ka thaw hawk ringawt.



*HUN KAL TAWH A THLÂK DANGLAM THEIH LOH, HMA LAM HUN LAH HRIAT LÂWK THEIH A NI HEK LO, CHU VÀNG TAK CHUAN TÚNA KAN HUN HMAN MÊK HI A PAWIMAWH, KAN HMA LAM HUN ATÂNA KAN LO SUANGTUAHTE, A TAK RAMA CHANTÎR THEI TÙRA DUHTHLANNA KAN HMAN THEIH HUN LAI A NI, FING TAK LEH TAIMA TAKIN LE*