☆KA TÂNA RUAT☆ - 32 By Dingdi Pachuau

☆KA TÂNA RUAT☆ - 32 By Dingdi Pachuau

Zanriah ei lai hi chhûngkaw inzilhna hun leh thil inhrilhna hunah kan chhûngkua khân kan hmang țhìn a, ka nu khân min zilh bâkah thu țha tinrêng min hrilh țhìn a ni, a châng chuan kan ning ve lek lek tho; mahse, ani erawh chuan," Pa ber uap lohna hnuai ațanga sei lian in ni a, hun remchâng ber nia hriain ka sawi lo thei lo. Thu țha hrilha ka zilh loh che u chuan tu mah zilhtu tùr che u in nei ve lo, mi ang ve tùr leh mi pângngai tak ni tùrin ka duh che u, mi zînga in mualpho hlauh loh nân. Hun dangah thil țûl  hrang hrang tiin kan chhuak a, kan awm khâwm țhep thei lo, chaw ei hunah erawh kan kim thei a, hun remchâng ka la lo thei lo a ni," a ti țhìn. A sawi dik ka ti a, tuna ka ngaihtuah lêt pawh hian a lo sawi dik ka la ti tho, khatih hun lai khân min lo zilh lo ta se, tûn hi kan tia lo maithei a ni. Thu țha inhrilha inzilh hi chu a lo țha êm mai, tu pawh mai hian kan mamawhin ka hria, tungchhoa kal zîngah hian mamawh lo kan awm lo ti ila a dik ber ang.

Ni dang anga pângngai taka chaw kan eia ka rin laiin, Naom-i'n," U, Ânu hnênah chuan i kal dâwn ta em?" tia a zawh tâkah chuan ani chuan," Aw," tiin a lo chhâng nghut a, hawi pawh a rawn hawi chhuak chuang lo. A hlim lêm lo tih ka hre sa tawh a, Naom-i khân khati lam hawi kha chu rawn sawi chhuak lo se ka tih tehlul nèn, ka lo îp ru deuh nghe nghe.

"Hmang tlâng vek thei ila... a nuam ngawt ang!" Naom-i chuan a ti leh a, țawng chhunzawm awm lovin a reh ta vang vang a, a hnu deuhah," Krismas hunpui hi ka fate nèn hian kan hmang hrang ang tih ka lo la ngaihtuah ngai hauh lo," Pa ber chuan a rawn ti ta a, a țawng chhuah dàn chu pângngai tak angin lang mah se 'eng emaw' a tel a ni tih ka hria, anni pahnih phei hi chuan an hre chiang dâwn lutuk tlat. Kei aiin an lo chêngho rei tawh a, an hre lutuk ang. Naom-i ka melh a, hrehawm tih hmel tak hian a chawthlèng bihin a lo kûn ngar tawh a, ka khawngaih roh zâwk, rawn sawi chhuaktu a ni si a. Ani hi zawng a thil sawiin a nghawng tùr hre lo leh ngaihtuah chiang lova sawi chhuak phawng phawng chi a la ni tlat.

"Ka nu awmpui ka duh alawm, a khua a har a," Joel-a chuan a lo ti a, a awka chhuak hrim hrimah chuan a pa chu zah lo taka chhàn a tum ni pawhin a lang lo. Ni e, a pa hi a zah ngei ang, kum heti chen lo enkawl tawhtu leh a pa ngêi a ni a, an inkârah inhmuh thiam lohna leh inhnialna mai mai pawh a thleng ngaiin ka ring lo. A nu leh pa ințhen tâkah leh a pain nupui dang a lo neih tâkah chuan in nuam ti lovin a nu, amah hringtunu ngêi bulah a awm châk ve taah ka ngaihsak a, a rilru tùr hi ka hriat thiam phâksak deuh ruak tlat a ni.

"A țha, i duh chuan i kal thei ang, ka duh dàn i hria a, ka thu i âwih loh chuan ka lak ațangin eng mah i beisei thei lo ang," pa ber chuan a ti muangchâng ta raih a,   hrehawm ka lo ti. Joel-a rilru ka hre thiam a, a pa rilru tùr pawh hi ka hre thiam pha ve tho, Naom-i ni se a kun deuh ngar reng tawh mai. Kan boruak a hrehawm si a, chaw chu an ei puar lo ang tih ka hlau bawk si, Pu Rintea keah chuan ka va tlawhsak ta zauh a.

"Puar takin chaw ei phawt ang u le, in puar loh chuan nakinah in ril a țâm thuai dâwn a nia," ka lo ti a, Naom-i chawhmeh duh ber Alu kan chu a bula hùn hnaih pah hian," A tui teh a nia, a thar sar sar bawk a," ka ti a, Joel-a bulah ve thung chuan vawksa kawchhûng kan pawlh nuai chu hûng hnaiin," A tui reuh lutuk! Tui i tih ngei ka ring," ka ti ve thung a. Dik tak chuan hetiang boruak hi kan la tawng ngai si lo va, ka buai ru tlat a ni, an pafa inkâr a chhiat phah ka hlau bawk nèn, ka rilru a hrehawm lutuk tlat.

"Chaw ei tùr nei lo tam tak an awm laia lungawi loh avànga chaw ei loh tih kha ka duh hauh lo a nia, chaw hi zah tùr, puar taka ei tùr a ni," Pu Rintea pawh chuan a rawn ti leh a, amah chuan a ei chhunzawm nghâl a. A fate an fel ka tihna chu an pa thu chu hnial hauh lo chuan chaw chu an ei chhunzawm ve nghâl mai, an châk emaw châk lo emaw an tih țhin dàn a ni ngêi ang chu.

Room lama a awm laiin ka lût ve vat a, Nonoi a u Naom-i room-ah thil lem siamin a awm ve rih bawk a, hun remchâng chu ka chuh ve a ni. Khum mawng lamah lo țhuin a ke chu khum mawng lama kan hùn țhutnaah chuan a lo khang duai a, phone a lo khawih mawlh mawlh bawk.

Inthlahrung angreng tak chuan a bulah chuan dingin," Ka lo ti buai lawk che, thil sawi lawk ka duh a," ka han ti a, ani chuan phone chu dah thla nghâlin," Yes..??" a lo ti vat a, a țhutna bul chu țhu tùra min tih nân a bêng zui nghâl thap thap a.

"Ih, Joel-a hi rilru dam takin a kal phalsak la ka ti, a nu bulah, a nu khawhar hnèm tùrin kal a duh a ni mai a, a nu tân a nuam dâwn êm asin, a nu a hmangaihna a ti langin a ngaihsak tihna a nia, fapa fel tak a ni. Tuna in awm dànah hi chuan in hlim lo ve ve si a, in hlim loh chuan keini pawh kan hlim thei bîk lo va, in rilru a nawm lohin kan rilru a nuam thei bîk chuang lo. Lo sawi ve tùr chu ka ni lo maithei; mahse, rilru hlim taka Krismas a hman theih ka duhpui a," ka ti dap dap a, ka la ding reng tho. A thin ka tih rim êm chu ring lo mah ila ka lo inrawlh ve chu a duh lo ang tih erawh ka hlau ru angreng viau thung; mahse, an pafaa rilru hrehawma an awm ka duh si lo a ni.

"'Ka nu' tiin a ko tawh che em?" a rawn ti teh daih a, min zâwt thut si a, dâwt sawi ngawt lah ka hreh deuh si, chhâng lovin ka hmui ka liak huh zoh phawt a, a hnuah erawh chuan," A, min koh ka phût hran lo, a har ve dâwn êm asin, ka hre thiam a ni," ka ti ta thuai a.

"A luhlul tlat," a lo tih sup chuan," A luhlul hun lai tak a tawng chho ve a nih hi, hriat thiamna thui tak neih a ngai ve alawm," ka ti leh thuai a, Krismas hunpui, hlimna hunah hian nuam lo taka hun kan hman ka duh lo a ni.

"A nu hi haw tùrin ka duh hauh lo; mahse, a bula hun hmang tam lo tùrin ka duh thung, tunah pawh a rilru a danglam tawh êm hi," a tih leh chuan sawi tùr ka hre ta mai lo. A sawi dikzia erawh ka hre chiang, ka chiang lutuk. A nu a belhbul ațanga Joel-a awm dàn danglam chakzia hi hmuh hmaih chi a ni lo.

A tûk chawhnuah Joel-a chu a nu hnêna kal tùrin a chhuak ta a, a pa khân a be ta em, kal chu a phalsak ta em ka hre lo, pawisa hman tùr lam a nei êm ang chu maw. Ani ang tlangvâl ve tawh tân chuan tûn ang hunpui laia pawisa nei lova chhuah zawng a hrehawm dâwn êm asin, a pain a pêk hrâm ka beisei.

*******

"Engtikah nge naute hmêl thar kan hmuh theih ang aw?" Kan țhut khâwm țhap lai chuan Chhani chuan a rawn ti a, ka va melh rum nghâl vat. Ka nute in, ka in hlui ni ta-ah chaw eiin kan phei a, U Mama'n a lo sâwm ve niin, a lo phùr êm êm dàn kha, hetiang hi sawi chhuah a lo duh vàng a lo nih dâwn chiah hi. A duhnaah hi chuan a chimawmin a țawng thei țhìn a nia, min ti zak țhìn.

"E, kan nghâk rei viau lo tùrah ngai ang, chanchin làwmawm hre thuai tùra țan kan lâk nasat zual a ngai dâwn a nih chu," ka dàra a kut rawn nghah paha a tih chuan Chhani a lo khêk țhat a, a nui zui nghâl awr awr mai. Kei erawh chu ka rin loh lutuk thil a rawn sawi avàng leh ka dàra a kut a rawn nghah reng avàng chuan awm dàn ngaiin ka awm thei lo. Nupa niin nupa nun pawh hlim takin kan chèn dùn tawh țhìn ngei mai a; mahse, mi dang bula hetiang thil fiamthua a sawi chhuah hi ka lo ring ngai miah lo, ka zak leh deuh ringawt tawh a, bâkah, a hmêl en hian a sawi duh loh hmèl êm mai a, rin loh deuhin a rawn sawi thut bawk.si a.

"In nu kha a zak leh ringawt tawh a nih àwm kha, zak thei leh lutuk mai! Min chhùn lo lutuk!" Chhani chuan a ti leh zat zat a, a nui sûng bawk si. A awm dàn, a thawven dàn hi a nawm hmel ka ti, a țawng bawrh bawrh a, han zah țît țêt leh han thup êm êm pawh hi a nei lo, a nuam ngawt ang.

U Mama'n Nonoi a pawm muhìl leh tawh a, chawhnu lam khân kawtah a u Naom-i nèn an inûm kual nasa a, chawma lamin ka bual tawh kha a nia; mahse, a thlan a tlâk nasat êm avàngin bual leh loh theih loh a nia, tuilumin ka bual leh ta thuak thuak a ni.

"Nia, a zakzum reuh khawp a, amaha a awmte hian a zak leh ringawt țhìn hian a nia ka rin ni," Pu Rintea pawh chuan a lo ti leh a, mi dang chu an lo nui țha hlawm a. Chutah, thutak deuh hlek hian," Urlâwk zàn chu kan in lamah kan hmang khâwm ve ang chu ti r'u? Kan rawn kal ziah bîk a, in rawn kal ve tawh ang," a ti leh a, ka nu chuan," Ni e, kan rawn tih buai dâwn loh che u chuan. Nonoi pawhin nuam a ti ve deuh ang chu, kan rawn chîm huk dâwn che u nia," a lo ti ve a. "Lalchhani'n nuam a ti ngawt ang," ka lo ti ve vat a, ani lah chuan," E, khual țha lawmin min lo làwm ang che. Ei tùr tui tâwk tâwk chi hrang hrang, tìmna leh inthlahrunna awm hauh lova duh tâwka ei tùr kha lo lei vek ula. I hria maw? Ka ei țeuh duh dâwn a nia," duhthawh zet hian a lo ti ve thung a, kan inchhâng tâwk riau mai.

"E, kan lo lei khâwl țeuh ang. Ei duh bîkte in nei em?" Pu Rintea'n a tih leh chuan," Duh bîk êm êm nei chuang lo ve, a tui zual deuh ho kha chu kan ei thei vek," tiin Chhani chuan a lo chhâng leh a, a chhàn dàn leh a hmêl a inhmeh lutuk a, kan nuih nasa mai.

Dec 24 chu kan han thleng ta ngei a, Joel-a awm loh vàngin rilruah kim lo deuh awm mah se sawi chhuah ka duh bîk lo va, mi dang hlimna ka ti chhia ang tih ka hlau a ni. Joel-a pawhin a nu bulah hlim taka hun a hman ka ring ve tho a, hmang se tih pawh ka duhsak hlê a ni. Pawisa hman tùr erawh a nei lo ang tih ka lo ngaihtuah mai mai a, a pa khân a pe lo a nih chuan aw...

Ka phone a rawn rîk chuan ka ngaihtuahna ram ațanga harh chhuakin phone chu ka ban vat a, Pi Mawitei a lo ni. Ka chhâng vat a, ani chuan," Ka fapa hian i pawi eng nge a sawi? A hlim lo hmêl hmuh hi nuam i ti em? Heti taka retheia ka hnên a rawn pan chhan hi i hria tiraw? Nangmah vàng a nih kha, engtin nge a pa kha i lo hmin? Eng thu nge i fah a hetianga a fapa pawh awmtîr thei nge a nih? Ka haw hlê mai che u, mihring pawh in ni lo, ramhuai in nih kha," a rawn ti leh ta phiar phiar mai. Eng mah sawi lovin a thu sawi chu ka ngaithla a, heti êm ëma min han ring chhe thei mai hi thil mak tak chu a ni. Joel-a'n engtin nge a nu bulah thu a thlen chu ka hre lo va, min lo puh chhe viau pawh a ni maithei e; mahse, an chungah  rilru chhia ka pu lo a ni tih hi hre ve se aw ka ti rilru vawng vawng.

"A nu i inti a, a nu i nihna chu engah nge i lantîr? Kut ruaka rawn kaltîr hi maw? A nu i nih chuan ngaihsak tum ta che. A thu chauha 'nu', inti-nu chawp mai i ni," a rawn tih leh chuan," A dam țha em? In hlim dùn maw?" tiin awka dam thei ang ber hian ka zâwt a, ka kut erawh ka hûm ruh nasa, thinrima àn khum ve ka châk viau nain ka ti duh lo va, ka insûm nasa viau ve rêng a ni. Hmeichge zaidam tak ka ni lo va, thinchhe êm êm pawh ka ni chuang lo. Thinrim viau mah ila ani hnêna àn hi ka tum duh lo.

"I hriat a ngai lo ang, i fanu chauh kha ngaihtuah rawh," a rawn ti leh a, ka nui deuh sak. Churah," Naom-i maw? Ka ngaihsak asin, ka ngaihsak țhinzia chu i hriat chian tawh viau ka ring. Ka pasal leh a fate hi ka hmangaih a, an tân nu țha ber chu ka ni thei kher lo maithei; mahse, nu țha ber dawttu erawh ka ni bîk kher lo ang," ka ti ve ta kalh kalh a.

Min hmusit tih hriat zet hian a rawn nui lui ar ar a," I lo ropui e. Chawimawina nopui dawm tlâk i ni, i ti ropui êm mai!" Uar zet hian a rawn ti leh a, phone a ti tàwp zui daih mai. Han țawng leh ka châk asin le, ka la kham lo.

Urlâwk zàn hlim takin kan hmang ta a, a tûk lamah erawh kan hlim tho nain kan kim tlat lo va, hlim a kim thei lo. Chhûngkuaa mi pakhat lek pawh an awm loh hian a ruak huai tlat, Joel-a erawhin hlim taka  a hman ka ring tho. A rilru hi dik lo ka ti thei tlat lo, a nu chu sawi sep kai pawh ni se a hmangaih reng tho a, han hel ve deuh ut ut mah se mahni hringtunu nge nge chuan tih ngaihna a lo hre ber a nih àwm hi.

Krismas kan han hmang zo va, chhùn lamah nuam takin hun kan hmang a, zànah erawh Naom-i lehkha zir ka țhutpui a, ka chawhpui a, ka zâwt a, ka theih ang angin ka tihpui lo thei lo. Kei aiin lian úr mah se ka hmu naute laklawh a, ka lo en naupang chhia leh țhìn.

Kum thar hma hretin Naom-i leh Nonoi nèn kan chhuak a, kum thar lama ei tùr eng eng emaw lei kan tum a, kan luhna dàwrah chuan rin loh deuhin Chhana ka hmu thut mai. Ani pawhin min rawn hmu ve nghâl a, kan inmelh chiang si a, uh loh der theih pawh a ni tawh lo.

"In dam maw? Nonoi chu a va lian tawh ve? Krismas-te in hmang nuam em?" tiin min rawn be nghâl bawrh bawrh a, a êl leh mitmeng chiang taka en chuan a normal chiah lo tih a hriat theih; mahse, rim a nei hran lo va, chîk deuh leh lo hre sa tân lo chuan hriat a har deuh maithei.

A zawhna chu ka chhâng a, kalsan thuai ka duh nain chanchin min zâwt sia, an chanchin ka zâwt mawihnai ve leh a, min hrilh ve mai bawk. Chutah," Kan ințhen hnu ațang khân i chhe lo telh telh maiin ka hria. Ka lo ã ngawt mai ka ti! Engtin nge nang lo mi dang kha ka lo melh theih ni? Ka inchhîr ngawih ngawih, tûn thleng hian ka inchhìr hian bân a pèl," a ti ta vang vang a.



*THIL DANG ZAWNG AIIN I THINLUNG VÊNG ȚHA RAWH, NUNNA LO CHHUAHNA A NI SI A*