☆KA TÂNA RUAT☆ - 33 By Dingdi Pachuau

☆KA TÂNA RUAT☆ - 33 By Dingdi Pachuau

Dàwr ațanga kan chhuah dâwn pawh chuan min rawn zui ve zêlin," Pasal i neih tâk ațang khân kan inhmu khât tawh si a, kan inhmu leh lawk tawh lo maithei a ni, chu vàng tak chuan restaurant-ah kan chàwlho dâwn em ni ang? Ka treat ang che u," a ti leh a, ngawiin ka inngaihtuah vang vang phawt a, ka thutlûkna tùr erawh a tìr ațangin ka hre nghâl sa vek, min sàwmna hi rem ka ti lo ang tiin. Amah hi lo normal ta rêng pawh ni se ka pawm chuang lo ang, ka bialpa hlui a ni a, mi min lo hmuh dàn tùr ngaihtuahin a dik thei lo hrim hrim, ka fate nèn kan nia, ka fate tel lo pawhin ni ila, ka duh chuang lo ang, ka pasal hriat loh laia ani hmuh hi thil dik a ni lo.

Ka hnial hnu pawh chuan min rawn zui zêl a," A mak e, pasal i neih hnu hian hmêlma enin min en ta tihna a ni thei em? Nge in pain a lo hria ang tih i hlau deuh zâwk? I fate an awm ve reng hi, eng thil mah kan ti thei nâng. A thuhrimah, eng thil nge ti se min tih? Mi sual tak anga min en ta ngawt mai hi hriat thiam a har hlê mai," a rawn ti leh a, ka ding ta dat mai.

"Duh tâwk teh ang, inhnial buai ka duh miah lo a nia, naupang an awm hi," zàwi, fiah deuh tak sî hian ka ti a, chutah," Bâkah, haw nghâl mai kan tum a, duh aiin kan rei tawh bawk nèn, chàwl hman kan ni tawh lo," ka ti leh a, tlémin hawihhàwm ka chhuah ve a ni. Hawihháwm lo lutuka biak chu ka duh chiah bîk lo va; mahse, a zuam theih tùra biak leh awm chu ka tum miah lo.

Haw kawngah chuan Naom-i leh Nonoi chu an țawng barh barh reng a, an țawng ngaithla pah tho chuan Chhana min biakna kha ka ngaihtuah chhuak a, heti êm êma mihring lo danglam chak theihzia hi, kan inkawp lai khân tlangvâl fel ber a ni chu ka ti hauh lo; mahse, tunah zawng a nungchang a mak ta êm mai.

Naom-i'n a pa bula kan thil tawn kha a sawi chhuah leh khut ka hlau ru angreng viau a; mahse, a sawi chhuak miah lo teh tlat! A țawng bawrh bawrh reng a, a pa pawh hian a khap ngai lêm lo a ni ngêi ang chu; mahse, a titi hi ngaihthlâk a nuam ve a, a țawng ri hriat tùr a awm loh hi chuan a khawharthlâk tlat tawh zâwk a ni.

Dec 31 a rawn inher chhuak a, zàn lama kum hlui thlahna tùr ei tùr eng ilo leiin Naom-ite pafa an chhuak a, keiin an rawn haw huna chhùn thingpui hmeh tùr ka buaipui a, Nonoi erawhin TV a en thung. 

Ka buai rak rak lai chuan Nonoi țawng ri ni àwm tak hi ka hria a, ka dinna ațanga kal sawnin ka han ngaithla chiang a, mi biak a nei tih ka hriat chian tâkah chuan TV awmna lam chu ka pan ta vat a, ka rin loh deuha Joel-a ka hmuh tâkah chuan insûm hman lovin," I lo haw tawh maw? I kal leh ang em? I kal dâwn a nih pawhin thingpui in zawhah kal la tiraw?" tiin ka be nghâl a, a lo luh lai ka lo hre miah lo a nih hi. 

Ani erawh chu ding nghâl vatin," Ka awm rei dâwn lo," a ti sup a, inherin a room lam pan chuan a kal zui ta daih a, ka va be fuh lo viau em maw ni, lo va be lovin Nonoi nèn khân lo inbiaktîr ta mai mai zâwk ila... ka hmui chu lungawi lo ru tak chuan ka han béng a, țawng hi insúm ve țhìn tùr ka ni asin le.

A pate lo haw hmain a chhuak leh hman a, ka thil siam pawh a ei ta chuang lo. Beidawng tùr ka la ni hauh lo tih hre mah ila a rûk tak chuan ka beidawng deuh, ka fa hrin a ni lo lai tak hian ka duh angin a lakah min ti ngampa thei lo va, hei hi hrehawm ka tih ber a ni; mahse, chutih rual chuan ka pasal fa chu ka fa a ni a, hei hi ka hre reng tùr a ni tiin ka infuih ru reng tho bawk.

Dam takin kum thar kan chuangkai a, kum thar nî-ah kan inkhâwm vek a, Joel-a erawh a nu hnên lamah a la awm thung. A pa nèn rei vak lo chu an inbe ngei a, dam takin an hmang ve tùrah ka ngai, ka zâwt hran lo. A pa hian sawi chhuak kher lo mah se a ngaihtuah a ni tih ka hria a, ngaihtuah tùr pawh a ni, a fapa a ni tlat a, nakinah chuan a nu hnêna awm tlat tum lova kan inah ngei hlim taka kan awmho theih ngei ka beisei a ni.

Kum thar ruai țheh tùr kan nih laiin pa berin a peih lo deuh tlat a, kan țheh ta lo va, in lamah kan ei ta mai. Ruai țheh peih lo ve ti lo chuan phûr takin eirawng ka bâwl chu min pui a, a țawng mang lo nain a chângin min rawn kuah thuak a; a awm dàn chu ka sawisêl lo nain mak ka ti deuh a, ka va en apiang lahin nui si lo hian min lo en leh vung vung țhìn a, eng thil nge maw a ngaihtuah țhin ni.

Tunah hi chuan awmpui kan nei tawh rih lo va, keiman ei ka siam bâkah a hman chângin Naom-i'n min pui a; mahse, ka rem ti vak lo țhìn zâwk. A pa hian a office loh ni tlai lamah min pui leh a, ho tê angin lang mah se a nuam ve riau. 

Nonoi leh Naom-i chaw ei tùrin room ațangin an rawn chhuk a, an rawn nui thla dùn awr awr a,  rilru hlim takin chaw eina pindana an rawn lût chu ka lo thlîr reng a, fate hlim hmêl hmuh hi chu a hrehawm lo ve chiang êm a ni.

"I mit kha a tla ang e," tia pa ber a rawn țawng chhuah chuan hawi sawnin ka en vat a, min lo en rengin a mit chu a siai vei zoh a, chu chuan min ti lài deuh ringawt a nih chu! Lài rual pawh ka nih tawh loh tehlul nèn.

Chaw ei khamah thlèng ka sil a, Naom-i'n țawng siam siam pahin hmun a ti fel ve bawk a, exam a châk tawh thu leh țha taka a pass ngei a rin thu a sawi leh hmiah tawh bawk! Ani hi chu a inringtâwk a, zirna lamah kher hi chuan ka ngaihtuah lêm lo; mahse, chutih rual chuan ka ngaihsakin ka ngaihven êm êm tho, a țha thei ang bera zirin țha takin pass se ka duh.

Eng eng emaw ka tih zawh meuh chuan dâr pawh a lo kal duai ta mai! Nonoi ni se a pa mal chungah a lo muhìl dèr tawh mai. Ani hi zawng, pa hi a nei hliah hliah țhìn a, khati chen duattu pa nei lova lo khawsa tawh kha a ni a, Pu Rintea nèn kan inneih ațangin tìmna nei lovin a pa ang tak takah a ngai a ni ber ang chu, ina a rawn haw ve tawh hi chuan a bulah hian a awm chawt a ni ber mai.

"Ka lo mut ang e," tiin ka pan hnai a, ani chuan," Zàn dang zawng aiin a muhìl hmain i hre lo maw?" a lo ti a, kei chuan," Aw, vawiin inkhâwm bàn khân a tlãn kual nasa êm a ni, a chau a ni ngei ang," ka ti a, ka pawm dâwn chuan," Khawi, keiman ka zo zâwk ang," a ti sup a, a thawhpui zui ta nghâl a, a kal chu ka zui ve ta ringawt.

A room tê reuha ama khum ngeia a muttîr hnu chuan a puan sin tùr a siamsak zui a, a chala a fawhsak leh zauh hnuah êng a ti thim a, a rawn chhuak ta a, keiin kawngkhàr bul lawka switch chu on-in Nonoi room chu a êng dul ta raih a.

"Zanin chu inbual dùn ang aw," kan room-a luh pah chuan a ti a, khua a la vâwt ve tho a nia; mahse, a kawr hâk lai chu a hlîp zui nghâl daih a, țawng lovin a chezia chu ka en zui reng ringawt, ka pasal mah ni se a pian hi chu mawi ka ti ve thlâwt a ni. A sek viau lo va, a chér hran lo va, thau pawh a ni chuang lo, a tâwk chiah a ni mai.

"Ka hmuhnawm viau a ni ang maw?" a rawn tih chuan ka lo en reng a ni tih ka hre chhuak chiah, ka hawi sawn a, ani lah chuan," I duh tâwkin min en thei, min en hian nuam ka ti a," a lo la ti zui, ka beng a sa hat hat mai.

A duh dàn angin kan inbual dùn a, ka zak ru deuh nain 'nupa kan ni tawh a, ka zah rùn tùr a ni lo' tiin ka infuih ru mawlh mawlh a, a mitah tak erawh ka en ngam chiah lo. Ka rilru kàwm paha tui lum ngei maia ka inphuhtîr sar sar lai chuan a kut pahniha ka bek tawn tawn dawma amah en thei tùra min kawih dâk tâkah chuan min lo bia a ni tih ka hre chiah! Kei hi ka dik tlat lo, ka beng a ngawng pawh a ni si lo va.

"Eng nge i ngaihtuah? He i thluak te reuh tê chhûngah hian keimah nge awm i fate? Nge, mi dang? Mahse, a châng chuan ka awm ve țhìn tho tiraw? A pawi lo, ka nupui i ni a, i rilru zawng zawng ka neih theih nân ka theihtáwp ka chhuah zêl ang."

Ka rilru leh ngaihtuahnaa ka la suangtuah phâk ngai lohin Shower hnuaiah chuan nupa nun kan chèn dùn ta tehrêng a nih chu! A hlimawm dàn a dang zak mai! Kan fate erawhin an hriat chhuah loh hrâm ka beisei.

Mut tak tak hmain Naom-i ei tùr ka pe a, zàn a la rei lo va; mahse, meng rei vak lo tùrin ka hrilh thung. Rei tak meng tùrin ka duh lo, a la naupang a, zîng lamah harh hma tùrin ka duh zâwk a ni. A zirlai a hnehsawhin a hre bel viau tawh tih ka hria a; mahse, chuti chung chung pawh chuan zir tlêm tùrin ka hrilh duh chuang lo, amah pawh a țang êm êm tho a ni.

Zàn mutnaah min kuahin min kherh chual a, Naom-i lehkha zir dàn chungchâng ka hrilh sep sep nain a ngaihtuahnaah a awm ve lo nge ni, ka nghâwng a rawn nûl thuak thuak a," I rim a tui, ka duh chi tak!" a ti sup sup a, a hmuiin ka nghâwng a rawn nùlna avàng chuan ka mûr leh ar ar tawh.

Nupa nun hlimawm zetin kan chèn dùn leh a," Kan țan a ngai, Nonoi'n naute neih a châk tawh a," a la ti zui a, a bânpuamah ka sehsak zauh phah kha. Induha inngaizawnga innei ni lo mah ila nupa nun, khumlaizâwl nunah hi chuan kan inmil êm êm a, induh vànga innei kan ni lêm lo tih a hriat miah loh.

A tûkah Chhani amahin a rawn lêng ve ngâwih a, min rawn hrilh lâwk bawk si lo va, mak ka lo ti viau. U Mama a rawn tel ve bawk si lo, inhmuh thiam lohna deuh an nei em maw ni chu aw ka ti rilru hial.

"I rawn lêng a, i va fel ve!" tiin pa berin a lo be ve a, ani lah chuan," Inneiah chuan in innei ber àwm e, mi pawh hi in rawn hrechang tawh lo rêng rêng! Rawn lèn in tum loh miau chuan ka lung a léng ve țhìn tho sia, ka rawn lang leh ta mai a nih hi, ka fel vàng chu a ni chiang alawm," tiin a lo la chhâng lét zui a! 

Țhiannu ber a ni bawk a, zakzum tak a ni lo bawk nèn, an in ang maiin min chêtpui nghâl bawrh bawrh a, a țawng pah reng bawk a, ka rin ang deuhin U Mama chungah a lo lungawi lo ve deuh a ni àwm e, a sawi dànin.

"I u hi chu lo star viau țhìn lo ila chuan ka thinrim khum ang a, ka țhen daih tawh ang maw le! Ka lo duh êm zâwk a, heti êm êma ka lo duh thei hi ka inhaw țhìn tak tak a ni," thaw deuh halh pah chuan a ti a, a hmêl hlim tak țhìn chu a nguai ve deuh raihin ka hria. Nonoite pafa chhang lei tùrin an chhuak a, Naom-i erawh a room-ah awmin lehkha a zir thung a, kan țawng hre pha an awm lo.

"Engtizia nge? Ka lo hau ang aw?" tiin ka han hnèm ve phawt a, ani chuan a lu thingin," Aih, a ngai lo, a duh tâwkin kha nu kha han phur kual phawt teh se, an inkârah eng êm a thleng lo tírah ngai ila, ka thîk a ni tih a hriat loh vàng pawh a lo ni maithei. Ka hrilh ang a, ka hrilh hnu pawha a ti leh a nih chuan a duh tihna a ni mai," a ti hmarh hmarh a, a lung a awi vak lo tih a hmêl leh mitmengah a hriat theih si a, nuam lo ka tihpuiin ka khawngaih reuh tak tak.

"Tu nge chu nu chu? Ka zâwt dâwn em ni ang?" ka ti leh a, ani erawh chuan," A ngai lo ka tih chu, ka sawi fel thei alawm. A sawi fel duh lo a nih erawh chuan..." a ti vang vang a, U Mama chuan tu tak lo phur ve ang maw? 

Nonoite rawn haw hnuah erawh thil dang sawiin a țawng bawrh bawrh a, rilru hah leh lunghnûr hmél pawh a pu lo. Nonoi chu a fiam a," Ânu pum chhûngah i nau tùr lo awm tawh se i ti em? Nau atân mipa nge i duh hmeichhia le?" tiin thil nuihzatthlâk deuh deuh a zâwt a, pakhati lah chuan a lo chhâng țha duh nasa mai.

Zanriah ei tùrin pa berin a sâwm bawk a, ani pawhin a lo hnial lo. Tui takin zanriah kan ei a, kan hlimin kan țê leh teng tung tawh, U Mama lam chuan ngaihtuahna a luah phâk leh tawh lo.

Mahse, hun remchâng hmasa berah ka va be tho a, thil awmzia ka zâwt zui nghâl a. Ani pawhin zêp leh i nei chung lovin tu emaw phurh a nei thu chu a sawi tho a; mahse, tu nge a nih erawh sawi lovin a hmêl hriat hlui a nih thu erawh a sawi thung.

"Lalchhani'n a hmu dùn che u em?" tiin ka zâwt ta khawl a, ani chuan," Hmu lo ang, min lo hmu pawh ni se thîkna chhan tùr a awm lo, ka hmêl hriat hlui a nia, hmeichhia angin ka en lêm lo," a rawn ti duah a. Chhani lungawi lohna chu ka hrilh hran lo nain 'ngaihzáwng a nei sa reng a, chu vàng chuan hmeichhe dang phur mai mai lo tùr leh hmeichhia chu kan rilru a nat hmazia leh kan rilru a hrehawm theihziate chu ka hrilh ta zâwk a.

Joel-a a lo la haw lo fo mai, a pa hian a ngaihtuah tih ka hre ru kar mai si a, ka khawngaih ru angreng záwk, a nu nèn hlim taka hun an hman zawhah lo haw ve tawh se  ka ti, a pa vàng tal pawhin, dam téin an awm tùrah ngai ila...

Class țan a ni țêp tawh a, Naom-ite school chu an zirtîrtute an țang bawk a, study camp neih a nih dâwn vàngin Naom-i pawh an exam hma chu an school-ah a awm rih dâwn a ni. Ka va ngaihtuah phâk lo tùr chu ka rilru a nuam lo khawp ; mahse, an zirtîrtute'n an zirtîr țhain an vil peih ang a, țha takin a zir thei zâwk ang tih ka ring, a nau, amah han ti buaitu ber a awm tawh dâwn bawk si lo.

Ni 9-ah Joel-a chu a rawn haw ve tawh dâwn a, a room chu ka tih faisak thuak thuak a, a bàl lo hrim hrim a; mahse, en felsaka tih fai kha ka duh a ni. Zanriah hmeh tùr atán a tui ber ber chi hlîr siam bawk ila... fapa neihchhun a rawn lêt leh dâwn tlat si a.

Chhani'n min rawn biain," I u hi chu aw... thlah zalèn mai ka duh viau rualin mi dangin an han chang bîk tùr lai tak hi ka ngaihtuah hian tlâwm viauin ka inhre si a. A rilru tih buai ve nân ka thlah zalèn rih lo ang," a rawn ti a, an inkâr a lo ka fuh miah lo tih ka hre chiang ta. U Mama pawh chu a va ti ang lo tak! Ka hau hrep ang, duh leh loh tùr si, eng atán nge a kawp rêng rêng ni?

Zànriah ei tùr bâwla ka buai ve viau lai chuan Nonoi'n phone chu min rawn pe a, Pu Rintea a lo ni a, eng atân chuan min rawn biak tum ni ang maw? Chhùn thingpui in hun a ni tawh si lo.

Ka han chhàn chuan," Ruatpui, hei Joel-a a chesual tlat mai a, ka lo haw har deuh maithei aw. A serious viau em tih pawh ka la hre lo, police lam ațangin call ka dawng a, ka hre ve chauh a, ka rawn hrilh nghâl che a ni.  Lo chîãi viau lo la aw, a țha leh vek mai ang," a rawn ti dap dap a. Kei erawh chuan sawi mai tùr ka hre lo, ka rilru a mang muih maiin ka hria, phone chu nghet zetin ka vuan reng ringawt.

Joel-a a chesual. Engtin nge? Engin nge ni ang? Bike-in a ni ngei ang chu, a na viau ang em? A rawn haw nî tùr tak a ni si a, a peih lo lutuk ang a, chesual lui a ni thei ang em? Keimah vànga a seilenna in ngeiah pawh awm peih lo a ni si a, kei hian eng thil pawi nge ka khawih tâk le?!! A chétsual chhan hi keimah vàng a ni chiang.

Ka rawn dah hma thei lo va, a pawi ka ti, ka B'DAY min duhsakna thu min thawntute zawng zawng chungah làwm thu ka sawi mawlh mawlh e. In fel ka ti a, phunnawi hauh lova min lo nghâk ngar ngar maite hi, ka zak tawh záwk!!!

TOSODiP chhúngkaw zînga mi Athui (muang takin chàwl mawlh teh se) awm ve ta lo erawh pawi ka ti, ka ui tàwp thei lo, he chapter pawh hi a tân liau liau ka hlàn e.

Sawi hmaih theih loh, a bîk takin Bki chungah ka lãwm êm êm bawk. A hna thawhnaah Pathianin malsàwmnain vûr se, hrisêlin dam reng rawh se tih hi ka țawngțaina a ni e.