☆KA TÂNA RUAT☆ - 34 By Dingdi Pachuau

☆KA TÂNA RUAT☆ - 34 By Dingdi Pachuau

Chanchin chiangkuang taka ka hriat ve meuh chuan a tûk lam a ni tawh! A țhianpain bike-in a phur a, an tlãn chak deuh a ni ang, truck lian lehpelh an tumna lamah an chesual a, a țhianpa phei chuan a nunna a chân hial a, Joel-a erawh a vànduai vànnei hlauh a, nunna êm chân lovin a ruh a sawh tliak nual thung, a hmu hmasate phei chuan an thi ve ve emaw an ti hial a, a àwm ve tho. Nikhua a hre lo miau a, thisenin a bual nasa bawk nèn, thi ngei tùrah an ngai a ni àwm e. Tukin dâr 7 vêlah a rawn meng a, a chiang vak lo a ni ngêi ang, biak pawhin mi chhànna châng a hre lo, biak a hre lo pawh a ni maithei, chutiang vêl chu, a vài ruai a ni ber ang; mahse, a rawn meng zawk tawh a, a nunna a chân lo va, a làwmawm tho tho e.

Nizàn lamah a cousin pathumin an tlaivàrpui a, pa ber nèn. Chhùn lama kan han tlawh ve lai chuan patling pahnih ka hmu ve thung a, a lan serious ve deuh avàng chuan mi tlawh vak an lo phal chiah lo a lo ni.

Ka han hawi kual ru deuh a, a nu hmuh ka inrin tehlul nèn, ka hmu miah lo nia! Nizàn lam khân a riahpui ve ang a, a hlauthãwng lutuk khân chhìn khat pawh a chhîng thei tawp nâng, intifai tùra in lama a haw ve zawk chu dem theih a ni lo. A fapa duh tak kha a ni a, chhìn khat mah chhîng thei lo pawh ni se a àwm hliah hliah, a ngaihtuah dâwn êm asin. Kei meuh pawh ka muhìl thei bîk lo a nia! Amah hringa cháwi seiliantu a nu leh pate rilru tùr ngaihtuah phei chuan chhìn khat chhìn pawh a theih loh ang.

Kan buai ve ta nak nak mai. Nitinin Naom-i exam a hnai chho ve zêl bawk nèn, lehkha zir nasa tùrin ka duh si, a u a ngaihtuah ve tho bawk si nèn, lehkha lama a rilru a pe lutuk thei lo chu ka hriat thiampui ve reng tho mai. Ka țhutpui reng thei bîk lo va, ka țhutpui châng lah chuan," A dam leh thuai ang em le? Damdawi ina a awm reng a ngai ang a..?" a tih loh leh," Ânu hnênah khân awm lo se chuan a accident lo ang a..? Kan bulah awm se chuan a himdamin a la awm ngei ngei ang," a ti leh ringawt țhìn a, chhàn dàn tùr a vângin rilru a buai ve duh map map viau. A pa ni se a hna lama a buai chhoh a ngai ve ta bawk a, a duh angin a fapa chu a awmpui tam hman lo, Joel-a cousin mipate leh a nuin an riahpui theiin an awmpui thei tho nain a fapa hi a ngaihtuah tak zet tih ka hria a, in lamah pawh a awm tam lo viau rêng a ni. Ka nu leh U Mama pawhin an ngaihvenin chanchin min záwt ve reng a, kan zutin awmpui ve thei lo mah se an ngaihsakna an ti lang ve reng reng a; mahse, tihsak theih an nei lo, ka nu erawh chuan min rawn biak apiangin a dam thuai theih nãn a țawngțaipui reng thu min hrilh ve ziah thung.

Zanriah ei laiin Naom-i'n," Âpa, eng tikah nge damdawi inah chuan kan kal leh theih ang? Kan ngaihtuah ve tho a, kan kal ve duh, ani lah a lo la chhuah har hmel ropui si!" a tih chuan a pa chuan," Hun remchâng a awm veleh in kan dâwn nia. Ngaihtuahawm a ni lo a nia, lehkha kha țha takin i zir ang a, ani pawh a dam har lo tùrah ngai ila. Lehkha i zir țha thei tiraw?" a lo ti ve thung a, ani chuan," Aw, ka zir țha; mahse, À-u chu ka ngaihtuah ve reng zêl tho," a lo ti ve leh mai a.

A chau ve thawkhatin rilru a sêng nasa a ni tih ka hria a, chaw ei khama room lama a kal chu a reh vang vang mai. Hmun kan tih fel hnuah pawh thãwm a rawn nei chuang lo, a chau tawngkhawng a muzâl lawk a nih ringin ka tibuai duh lo va, Naom-i lehkha zir ka vil hmain Nonoi chu ka buaipui rih a. Vawiin lamah làm a zir a chau ve deuh a, a mut a chhuak hma viau mai. TV lama naupang lâm a en țhìn a, an làm dàn apiangin a lâm ve zêl a, a chângin ka làmpui ve dàwrh dáwrh bawk a.

A reh rei sia, ka han ngaihven chuan khumah tui ëm êm hian a lo muhìl bawrh bawrh lo niin! A bawk mai mai a muhìl zui a ni tih hriat tak hian a thuamhnaw hâk lai zawng zawng nèn a lo ni nghe nghe, a chàu tak zet a nih hi. Zanin hi damdaw in lamah riah a tum lo em ni le? Ka lo zâwt hran lo va, a sawi miah lo bawk a, mi dangin an lo awmpui ve thei rih a ni maithei bawk.

Ka ngaichãng reng a; mahse, thãwm a rawn nei miah lo, room ațangin a rawn chhuak lo tih ka hre chiang a, zanin chu a kal tlai deuh dâwn pawh a ni maithei, nge a mu nghet lutuk ang a, a harh thei lo záwk ni ang?

Naom-i ka zirpui zawh hnu pawh chuan thãwm a la rawn nei chuang lo, a mu nghet lutuk a nih chiah hi. Mu tùrin room ka pan a, ka luha ka va en chuan a mut dàn a lo thlâk tawh tih ka hmu nghâl. Thãwm ka dim ve tehlul nèn, a hmêl ka en chuan a lo meng tawh a, min lo en reng niin.

"I lo harh tawh elo??? Nge ka tiharh che em ni zâwk?" Inthiam lo ru angreng tak chuan ka han ti a, min chhâng lo chuan a bán a rawn phar a, ka kaih thawh a duh a nih ringin a kut chu zu vuanin pawh thawh ka tum a; mahse, ka pawt tho lo nasa. Amah zâwk chuan min pawt mu a, a áwmah ka zu bawh thlawp a, min kuah nghet nghâl viau bawk.

"Hetia awm hi ka châk tawh a," a ti sup a, kei chuan," Zaninah i kal dâwn lo em ni? A tlai tawh viau a nia," ka lo ti ve thung a, min thlah dul chuang lo hian," Um, dâwn lo, zanin chu i bulah ka riak dâwn, kum sàwm chuang zet i bula mu tawh lo angin ka inhria," a ti leh a, a thil sawi a uar leh lutuk chu ka lo nui hak hak a. 

"Nge, thil sawi sual ka nei em?" a tih chuan," Nei lo ve, ka nui mai mai a nih kha," ka lo ti vat a, thãwk la huaiin," Ka han inti fai ve lawk ang e, nang chu i fai bîk tawh sia," ka ti leh a. La mut chhuah hmèl zeta," Khawngaihin, rei suh aw," a rawn tih thàm leh deuh sup chuan," Aw le, rei lo ang, ka'n ti vat vat ang e," ka ti a, min thlah zui ve mai bawk a.

Mu tùra khum ka pan chuan a rizai sin chu lo kêu kauin ka mu zui nghâl a, a lo lum nuam ham ham khawp mai. Thâwk lo la ham hamin," I rim a tui!" a ti sup a, kei chuan," Tak tak maw!?Shower Gel ka lei thar kha a nia, a rim hi a na lo viauin ka lo hria asin," ka ti ve thung a, ani chuan," A rim kha i inhmeh, a nù hnâp mai a," a ti leh a, ka nui ringawt. A sawi dik ka tia, a rim a nat loh bâkah mipa hman atân chuan a rim a sweet deuh mah mah ang.

Min kherh betin ka âwmbâwr chu a rawn zen a," Zanin chu aw, chuti lo chu ka muhìl thei lo ang," a tih chuan," I chauh êm kha, i mut pawh a la chhuah êm kha maw," ka lo ti vat a. "Ka chau lo, ka mut sek tawh kha, ka harh vek tawh zâwk," tiin ka ngháwng chu a fâwp nghâl dan dan a, ka taksaa danglamna a thlen ranzia chu a mak zâwk!! Min fâwp fo a; mahse, zanina min fawh dàn anga ril, rilțâm leh duhthawh hian min la fâwp meuh pawhin ka hre lo, min lo ngaiin min lo thlahlel viau tak tak a ni chiang.

Min kuai hera ka hmuia an rawn fawh tâkah phei chuan rei tak inhmu ngai tawh lo, inhmu leh hlawl anga duhthawhin, innei hlim ang maiin a ni kan chêt ni. Kan che sawn a, kan insiam rem pah zêl a, ka chunga a chêt dàn mil zêl chuan ka lo che ve zêl a, lo dawngsawng țha tak hi ka ni ringawt; mahse, nupa kan nia, ka zak tawh bîk teuh lo mai! Min mamawhna phuhrúksak chu ka duh ber a ni.

"Ruatpui, min hmangaih rawh aw!!"

"U Rinte..."

A lo chàu tak tak lo a nih ka ring ta hial!! A duhthawh viau nain min duat thiamin min dìm tho a, kei pawh zak duh bîk hauh lovin chêt laah pawh ka țang ve hial a,  a nui deuh tih pawh ka hre reng, ka hai der lui ve tlat.

"Ka Lalduhawmi i nih hi!" 

Khaw vawh lai a ni tih hriat miah lohin kan thlan a tla phung mai a, ka intleuhna la rei lo viau mah se thlan a tlâk leh miau chuan mut a tui thei dâwn lo, mut dâwn tak takah chuan kan pahnihin kan intleuh dùn leh rih a, nghei rei a inti viau nge, a ráwp ngang ni zâwk dâwn ni, ka intleuh lai chuan ka âwmbâwr a rawn fâwp leh rih a, kei lah ka lo danglam leh nghâl vat bawk a. Tum loh deuhin a vawi hnihna chu shower hnuaiah kan hmang a nih chu. Rem loh hmèl deuhin lang mah se a hahthlâk chuang miah loh, min chêtpui dàn a thiam lutuk tlat! Lalchhani'n hre ta se chuan aw... mak a tiin a va khêk ring dâwn tak! 

Joel-a a lo harha Naom-i nèn kan kan ve leh hnuah Naom-i chu hostel-a lût tùrin a pain a hruai a, (study camp han tih khân exam hma leh exam chhûng zawng chu school hostel-ah an awm dâwn a ni)a kal tùr chu Nonoi nèn kan thlah ve a, a huphurh ve deuh a ni ang," Study Camp ti kher lo pawhin ka pass thei àwm tho sia," a ti nang nang a, min enin," Nu, min rawn tlawh la tiraw? Nonoi nèn," a ti leh a, nui chung hian," Tlawh dâwn lutuk! Ei tùr tam tâwk, tui tâwk tâwk a nia kan rawn ken ang," ka lo ti vat a, ani lah chuan," Chumi ni chu naktúk khi ni nghâl se ka ti mang e!" a lo la ti zui a, a peih lo ve viau a ni chiang. Camp lût tùr hi an lût vek tawh zâwk a, Naom-i hi chu a u Joel-a vàng liau liauin a pain school principal a biaksak kha a nia, Joel-a a lo harha tlêma a zia tâkah chuan tihian, min luhsan ve dâwn ta a ni. 

Naom-i tel lo chuan in chhûng a reh nghâl ngawih ngawih mai. Ka hawi kual ruk ruk lai chuan Phone a rawn ri a, min rawn biak tumtu hming ka hmuh chuan ka thaw hawk mai.

"Khawiah nge Joel-a pa? Ka lo be teh ang," a rawn ti nghãl tãwng a, kei erawh chuan," A awm lo, i duh leh a number-ah be mai la?" a aw chhuak ang maia chang chuan ka ti lêt ve salh a, ka inchhîr zui deuh zat mai. A fapa vàngin rilru pângngai tak put a har dãwn nèn, a chau ve viau dâwn asin. A aw chang fal pawh chu a hah rimtawng vàng a ni ngei ang chu!

"Ka biak loh i ring em? Ka try nasa lutuk tawh! Min chhâng duh lo vêl em maw ni? Ngawi tak rawh, in hre khawp ang, ka fapa hi ka enkawl ve thei aw, in rawn kan pawh a ngai lo," a rawn ti leh bawrh bawrh mai. Ka thinrim viau dáwn a, a hun tawn ja ngaihtuahpui a, ka insûm ta hrãm hrãm a ni. Han inàn thàwl a duh ve pawh a ni maithei asin, a thàwl phah ngêi ring ta bawk ila...

A tãwi záwngin, a nu (Pi Mawitei) chuan a awmpui ta châwt a, pa ber pawhin riahpui a tum tawh hran lo a ni ang, bâkah, chhûngkhat laina hnai an ngah a, a cousin-te pawhin an awmpui thei, a dinhmun a ngaihtuahawm lutuk tawh lova, rilru pawh a veng țan deuh e.

Zanriah kan kîl laiin ka nuin min rawn bia a, a dàn ngai têin Joel-a chanchin min rawn zâwt leh a, rei min be lo, rei inbiakna hun pawh ni nghâl lo chuan! Kan inbiak zawh chuan pa berin phone call a dawng ve leh a, ani erawh chuan a chhâng duh lo."A pawimawh chuan an rawn ti nawn leh mai ang," a ti deuh tlat a, rawn biak tumtu lah chu ka en zawk khân Joel-ate nu(Pi Mawitei) a ni tih ka hria.

A hnuah an inbe ta a ni ngei ang chu, a hmêl ațangin a lungawi vak lo  tih ka hre thei, eng tak chu sawi dùn ang maw, Joel-a chanchin an sawi a nu ngei ang.

"Nakzàn lam chu ka riahpui leh a ngai dâwn a nih chu," a ti charh a, kei chuan," A nih tak chu, ani (Pi Mawitei) pawh a chau tawngkhawng tawh a ni ngëi ang," ka lo ti vat a. Ani chuan," Chutiang lam a ni lo," a lo ti ta nghut mai, han sawi leh mai tùr ka vàn ta tlat mai.

Chanchin chu min hrilh ta a, Pi Mawitei chu a zin chhuah a ngai dâwn a nih àwm chu. A fapa accident lai pawhin biakpawh tumin an bei nasa a; mahse, an be pawp thei lo ni àwm tak a ni. Damdawi ina kan va kan ve laia a hmêl hmuh tùr lo awm miah lo pawh kha a lo àwm hliah hliah, awm miau hek lo le. Amah Pi Mawitei insawi dàn chuan a zin chhuah daih lai a nia, a rawn haw veleh a fapa chanchin hriain a rawn riahpui nghâl ni àwm a ni.

"Tuna a zinna tùr pawh hi a fapa aiin a pawimawh zâwk miah lo tih ka hria; mahse, a nun a nia. Va inrawlh ka tum lo hrim hrim, Joel-a hi awmpui reng theih ka duh alawm; mahse, ani nèna awm dun kha ka duh tawh lo," a ti ta nghut nghut a," Ka riahpui loh zàn chu i hriat kha. E, taka, nau pai tawh la ka ti ngawt mai, țan kan lâk nasatna khân rah țha chhuah tawh se tiraw?" Ka rin loh deuh chuan a rawn ti chhuak a, ka nuih a za deuh si, tlêmin ka zak deuh bawk si chuan," Kan thu lo êm mai," tiin ka chhâng ta ringawt a.

Chhani a rawn lêng a, kan titi dùn nasa. Anni pawh an lo inbe țha leh tawh a, kan buaina avàngin an chanchin ka ngaihven táwk lo chu ka inthiam lo ru viau nain lehlamah ka inthiam chawp leh tho bawk a, ani pawh hian a hriat thiam tho chu ka ring, an inhawisan tawp theih kha ka ring lo hrim hrim bawk a ni.

"Innei ve tawh mai ula, a țha ang," ka tih chuan," Sawi teh suh, tlangvàl hi nuam a la ti êm!! A la kham thei lo. Inneih lam hi chu a hawi rih lo hi a ni tawp mai. Kei lahin ka sawipui duh dèr lo va, a upat ve tawh nèn, kum 50 hnua fa pawm leh puak tih vêl a peih zâwk a ni ang chu ka ti mai," a lo ti zãrh zãrh a.

"Ka'n sawipui ang e, remchâng hmasa berah," ka tih chuan a mita phùrna lo lang chu ka hmuh hmaih miah lo; mahse, phùr hmèl loh deuh hian," Eng i sawi kaw àwm lo êm mai, a luhlul ropui si, ka lo duh viau kha ka inngei tak tak a ni, ani lo pawh ka hmuh ve tho nèn, min ti buai rilru hah!" a'n ti leh hlap hlap a, a thil sawi chu a inhmeh hlawl lo,  a rilru a hah loh hmèl bawk si.

Hun a kal hret a, U Rintea chu a hna lamah zin a ngai ta tlat mai. Ka va buai dáwn tak! Mahse, a bulah chuan ka sawi chhuak duh miah lo, loh theih loh vànga zin chhuak tùr a ni si a, puitling tak leh nutling taka in leh kan fate ka lo uap tùr thu ka hrilh ve ngial a, ani pawh chuan," Ka ngaihtuah lo che asin, kan in leh kan fate i lo enkawl țha ang tih ka hria a ni; mahse, Joel-a ber hian min tibuai, ka awmpui loh chuan tuin nge awmpui ta ang le? A khirh si a, a duh dàn an hriatpui dâwn si lo," a ti sup sup a, Joel-a chuan a rilru a tihah hlê a ni tih ka hre mai.

"Lungngai mah ta che, ka lo awmpui thei mai ang."