☆KA TÂNA RUAT☆ - 35 By Dingdi Pachuau

☆KA TÂNA RUAT☆ - 35 By Dingdi Pachuau

Ka tih luih deuh tlat avàng chuan ka awmpui ta nge nge a, ka sawi tìrh lamah kha chuan ka fiamthu emaw a ti a, min chhâng țha duh lêm lo, ka awmpui duh kha a ring chiah lo a ni maithei. A cousin-te lam hman an inti pawh bîk chiah lo va, a nu kha a rawn lang ve leh tawh bawk nèn, a nu kutah an dah ta deuh a; mahse, ani lah chu eng emaw thilah a hman lo leh thut ni àwm tak a ni.

Mak ka ti ve deuh hlek a, a fapa thih hlauhthàwnawma a awm laia awmpui hman lo leh thuta a awm chu eng thil pawimawhah tak ni ang maw he ka lo ti ve mai mai a; mahse, U Rintea'n a zin hma zàna min hrilh leh tâk chu Joel-a accident hma ni hnih kalta khân a nu kha a lo zin chhuak tawh a lo ni. A chêtsual thu kha amah U Rintea ngeiin Pi Mawitei chu a hrilh a, ani chuan a zinna ațanga a la rawn haw theih loh thu a rawn hrilh a. A rawn haw hnuah a awmpui ta char char a, kâr khat deuhthaw a awmpui tihah eng emaw thilah a zin chhuah leh a ngai a ni àwm e.

U Rintea zin chhûng chuan Joel-a chu ka lo awmpui ve char char a, amah harh ve tawh tho mah se eng a la ti thei lo vak lo va, min ngeiin ka bula awm a duh lo tih leh ka awmpui chu a duh lo hlê a ni tih a awm dàn ațangin ka hre thei reng; mahse, engah mah ka ngai duh bîk lo. Ka biak pawhin min chhàn chu sawi loh, en pawh min en duh lo hrim hrim a; mahse, ka luhlul thiam ve tlat, ka be lui ve tlat zêl a. Min chhàn loh pawhin min melh tal tùr a ni tih rilru ka pu a, a nin tàwpah min en ve zoh a, chu chu min chhànnaah ka ngai mai. Ka pasal fapa a nih miau avàngin a chungah rilru ka pu chhe lo va, min ngeiin min be peih hlawl lo mah se a chêt kual theih loh lai tal hi chuan min mamawhin ka țanpuina a mamawh ve a ni tih hriattîr ka duh a ni.

A tìr lamah kha chuan, "Hei hi i ei tùrin ka lo siam ang che aw," ka tin loh leh, " Ei rawh aw, i ei tam chuan i châk hma ang a, i dam hma thei ang," tiin ka thlêm țhìn a; mahse, a hnuah chuan ka tih dàn ka thlâk a, a thlèmna thlèm lam chu duh tawh lovin ka duh ang ang ka siam ta tawp a. In lama a ei duh ang chite ka hre ve nual tawh bawk nèn, chu chu ka hmang țangkai a, a ei duh loh leh ka ei daih zêl mai. Doctor leh nurse ka hrilhru sauh sauh a, chuta țang chuan anni chuan ei tùr ei țha viau tùrin an chah ta ziah a, keia thu sawi ai chuan awmzia a nei ta deuh e.

In lamah ka nuin Nonoi a lo awm ve thung a, ngaihtuah ru viau mah ila tihngaihna a awm dèr lo, min awmpuitu nula kan nei tawh si lo va, ka nu chu a lo che buai mai ang tih ka hlau deuh a nia; mahse, chutiang lam chu kan inbiak chângin a rawn sawi ngai miah lo thung.

Chhùn lamah harsatna nei vak lo mah ila zàn lam hi a mu țha thei vak lo thung a, ka harhvãng ka ti mai, a chêt deuh hlek chuan ka harh ziah a, nâ a nei em tih ka zawh lahin a sawi duh ngai si lo; mahse, a ke leh a kâwngbâwrte chu kham a ti țhìn tih ka hria, a hmêl leh a chêt dànah a lang reng. Min tîr duh miah lo mah se, "Ka lo hmehsak ang che," tih leh hmeh ka rual țhìn a, min hnial hman ngai lo. Zànah ka mu țha fahran lo va, a tìrah chuan ka chàu ve dâwn dâwn a; mahse, thil ka ei țha a, kâr khat hnuah chuan engah vak ka ngai tawh lo. A pain a hman hunah min rawn be ziah a, Joel-a nèn pawh  an inbe ziah bawk, a bula ka awm lai chuan a țawng țha duh lo khawp mai a; mahse, ka hre thiam ve a, an inbiak tawh hi chuan ka kal sawn ve mai zêl bawk.

U Rintea rawn haw hmain a nu zâwk a rawn haw ta tlat a, a fapa ka awmpui a ni tih a hre miah lo a ni ngei ang chu, min rawn hmuh chuan," Nâng hi, eng nge ka fapa bulah hian i tih a?!!" a rawn ti phawt a, a hnuah," A nâ tizual tùrin a bulah i awm duh zêl tihna maw?! I va zak lo ve!! I chungah eng nge tih sual a neih? Ka pasal min chhuh a, chu chu duh tâwk lovin tunah ka fapa hrehawmna belhchhah tùrin damdawi inah pawh i la rawn ûm zui zêl duh a maw?! Eng mihring nge maw i nih le!!" a rawn ti phiar phiar mai a, dâwt sawi paha eng mah hre chiang lova chutia min rawn àn khum chu ka țhìn a rim deuh thut a; mahse, ka insúm hman hrãm.

"A la che țha hlei thei si lo va, i awmpui chu duh viau mah se i hman tlat si lo va, ka lo awmpui rih a nih hi. Bâkah; ka fapa a nia, ka awmpui ve bawk ang chu," ka ti lêt ve salh a, ka zãm duh bîk teuh lo; mahse, a lakah thinrim awki leh lungawi lo aw erawh ka chhuah lo.

"Zahna hi i nei hlawl lo a lo nih hi. I lakah hi chuan zahna pawh hi a zak zâwk ta ve ang, eng thil nge a bulah i lo sawi? Min lo rêl char char a ni ang maw? Ni leh lo, min demin min lo sawi chhe char char zâwk ang chu. Ka fapa rilru hi i hneh ngai dâwn lo tih lo hre tawh ang che. A thuhrimah, amah hringtu, a nu ngei ka awm a, nang tlangvâl pawh ni lo, mi pa kuai lunglêngtu, zahna rêng rêng nei lo hi ka fapa bula awm atân ka duh ngai lo che. I fanu, tu nge a pa pawh hriat loh kha enkawl mai mai rawh, i inhmeh ber," min hmusit tih hriat taka a tih leh bâih bâih tâkah chuan insúm duh ta bîk lo chuan," Duh tâwk teh! I kamchhe tleuh nân ka fate hmang ngai hauh suh. Thil awmzia hre chiang bertu i ni a, tu mahin thil thleng kha an hai hek lo," ka ti ve ta chawm a, ka thil sawi vàng nge, ka chhâng lêt chu mak a ti zâwk, a ngawi deuh reng a. Joel-a hriata inchhàna han insawi thiam kual vêl hi chu ka duh hauh lo; mahse, ka insûm thei ta bîk lo a ni.

A ngawi rei hran lo. "I lo țawng thei reuh hlê mai! Mi nasa tak chu i lo nih chiah hi, ka fate zirtîrtu atâna hlawh neia ka rawih ve mai mai khân heti hian min han țawng khum ngam chu a ni si a, lo chhawr miah lo tùr che hi ka ni asin le! An hnaih a ka lo awmtîr che kha ka tih sual lian ber chu a ni," ti leh tùn túnin," Ka fapa accident chhan pawh hi nangmah ngei i ni, thil dang vàng a ni lo, i lo lan ațang khân thil engkim a dik lo țan vek! Keimah leh ka pasal, ka fate hi min dàwi a nih hi, Setana fanu, ramhuai dik tak i lo ni," a ti leh ta phiar phiar mai a, a hmêl leh a thil sawi dàn chu a inhmeh ka ti a, hmun dang ka en duh bîk țhak lo. Joel-a chuan," Nu..!!" a lo ti vat a, kan en dùn vatin ka hria, amahin thawh a lo tumna lamah khum ațangin a lo tla țêp tawh hi a lo ni.

U Rintea'n min rawn bia a," A nu a lo haw leh tawh niin ka lo hria a, a riahpui theih tawh dâwn tho chuan haw tawh mai la tiraw? I tân pawh a nuam zâwk ang," a rawn tih chuan," Nia, a pawi lo. Joel-a pawh a zia ve viau tawh alawm," ka ti ve mai a, kei aia a mamawh zâwk amah hringtu a nu ngei a thlahlelin a tân pawh a țangkai zâwk ang tih sawi erawh ka tum duh miah lo thung.

Ka lunghnûr ru angreng khawp a,  Joel-a hian min ngaina lo a nih pawhin awmpui a mamawh hun laiin ka awmpui ve a ni tih tal hi hre chhuak se ka ti. A nu ai erawh ka awh zo thei ngai lo ang tih ka hriat bâkah a ai awh tumna ka nei chuang lo. A nu a ni a, a sèn têt ațanga chawi liana enkawltu a ni, a ai ka awh zo ngai dâwn lo tih ka hre chiang; mahse, min haw kher lo se tih hi ka duh ber a la ni fan.

U Rintea lo haw chuan kan nufaza thuamhnaw tùr min rawn hawn țheuh a, U Mama ta tùr pawh tiamin, ka nu tân erawh puan lum leh pheikhawk bun nuam tak tùr a rawn hawnsak thung. A bengvârin a ti țha ka ti khawp a, keini nufaza min rawn hawnsak hi chu ka hre thiam thei mai a, ka nu leh ka u a rawn hre tel tlat hi, mâkpa rangkachak tih loh rual a ni lo.

Kan inneih hnuah a zin khât a, a thang rei ve deuh bawk nèn, zàn mut hmunah chuan min thlah phal lovin min kuah reng mai a," Ka ngai che a, zan tin hetia kuah che hi ka suangtuah ziah a," a tih loh leh," Ka kuah phâk chu sawi loh, i hmêl pawh hmu thei lovin ka awm a nia," a ti leh țhìn a, kei chuan," Nia; mahse, chuti êm êm tùr em ni dâwn? Kan inbe țhìn tho sia," ka lo ti ve thung a. 

"Inbiak leh hetia kuah theih che hi chu dang tak a ni!" a ti sup a, ka nghâwng a rawn nawr pah a. A rilru hi ka hre thiam ve lutuk tlat! Kei pawhin ka ngai alawm, Joel-a'n ka rilru a la pêng êm zâwk a, chuti ni lo se chuan ka lung a lêngin ka ngai hlê ang.

"Ummm, a dik lutuk e," ka tih leh tâkah chuan," Khati tùr kha," a ti sup a, min kuah nghet leh sauh a, a thâ ka ti zã a ni chêk ang, ka bânah chuan na lo tê hian a seh a," Ka insûm zo lo țêp tawh," a ti leh sup a, kei ka lo nui hak a.

"Zanin chu ka che na dâwn! Ka ngai tawh lutuk che a, ka dìm zo chein ka ring lo," a ti a, a sawi dik chiah; mahse, pawi tihna ka nei hauh lo. "Nonoi'n nau neih a duh tawh a, a duhna tihhlawhtlinsak ka duh tawh a ni," thaw halh pah hian a ti leh sup sup a, a fanu duhna tihpuitlin tum chuan țan a la sauh sauh a, keiin uar zet leh a thu âwih zetin țan ka lo lâkpui ve sauh sauh bawk a. 

Joel-a chu ka rin aiin a tlangvâl chak a, a nuin a awmpui ta bawk a, kâr khat dang a ral leh hnuah a rawn chhuak thei ta mai a. A pa erawh chuan damdawi inah la awm tih se, awm dam zual se a la ti viau mai a; mahse, amah berin chhuah a duh miau si. A nu bula a awm daih ka rin nèn, kan ina an rawn luh chuan mak ka ti viau.

A room ka ti fai vek tho a, a nuin a rawn awmchilh loh hrâm erawh ka beisei. U Rintea hian a hawi tawh bau lo tih hre mah ila ka duh lo, a nupui hlui kha a ni miau mai a, a fate nu ni se a a ni reng bawk a, a ni zêl bawk ang.

*******

"Damdawi inah khân a àn khum leh hrep che em?" a ti sup a, ka en vat a, min lo en hran chuang lo, a phone chu a hmet mawlh mawlh pah a. Kei chuan," Àn khum nasa hran lo; mahse, dáwt a sawi kher kha chu ka thin a rim ve, Joel-a hriat laiin a ni zui a," zêp duh bîk lo chuan ka ti ve a.

"Ani tihduhdah che hi ka rem ti hauh lo, a àn khum tùr pawh i ni lo rêng rêng. A lo lan leh hunah ka hrilh ang, a fapa tlawha a lo kal hi chu khap thu a awm lo va; mahse, a duh ang anga ka nupui a àn khum che hi chu ka rem ti thei ngai lo," a ti ta nghut nghut a, a ti ngei ang ka ring. Pawi ka ti lo, ka ngei ve tawh êm mai, zak ve deuh se, a duh ang anga min àn khum tùr a nih bîk lohzia hre ve tawh rawh se.

Chhani leh U Mama pawh an rawn bengvâr khawp a, Sunday-ah Joel-a an rawn kan dùn ngei a. U Rintea'n zanriah ei tùrin a lo sâwm nghâl chat a, Chhani pek chuan," Ka hre sa vek alawm, tui leh dâwn lutuk!!" a lo ti vat a, a va han over thei tak! Huat theih si loh hian a over thiam a, a zak vak si lo nèn, a nun hi a hmang nuam bîk țhìn teh e.

"Ka pi pawhin rawn ei ve nghâl rawh se, ka va hruai nghe nghe teh ang, ka hruai loh chuan a rawn kal duh lo palh ang," a ti vut a, Nonoi bânah kàiin," Àpi hruai ang aw," a ti a, thovin car chahbi a ban zui zat a. U Mama chuan," Zàn inkháwm a duh leh ang a, a duh kher lo maithei a ni," a lo ti a, ani lah chuan," A inkhâwm hman êm êm ang, ka thlah leh mai dâwn nia," a lo ti awlsam leh êt a.

Joel-a chu a țhiante'n an rawn kan ve bawk a, a room lamah an ri lai lai a, ei tùr pawh ka han pe hlawm nghe nghe. An reh deuh țhap a, min en chík hlawm viau tih ka hria. An hmêl hre hlawm lo mah ila Joel-a țhiante an ni miau a, ka biak luam hlawm hnuah ka chhuak a, kawng ka khãr chiah tihah an nui chhuak hawk nghâl tih ka hria. Thil țha lo lam an lo sawi lai a ni ngei ngei ang, mipa awm khâwm lah hi a... eng eng emaw hi an sawi a, sawi chhuah tlâk leh puitling hriat chi lah a ni ngai mang si lo.

Chhani leh U Mama'n eirawng an bâwl suah suah a, an inrem leh tawh bawk a, infiamin an nui a, min ngai lêm lo viau. 

"Engtikah nge in tih huk dâwn? Ti ve tawh mai teh u, eng hi nge maw in nghah chuan le?" ka ti a, Chhani chuan," I u hi alawm, han tur teh, engtia rei nge ka nghah dâwn ni?" a lo ti vat a, U Mama chuan zàwi têa a chala va tuksak pah hian," Tu nge 'min nghâk lawk rawh' titu kha? Ka nghâk mêk che a nih hi," a ti ve thung a. Ani chuan," E, ka ti tak alawm! Chuti a nih chuan, thlaleh lamah khian palai chu rawn tîr la, i tân chuan ka inpeih reng tawh," a lo ti awlsam thën a.

Zanriah chu hlim takin kan kîlho a, kan ei hma deuh hlek a, ka nu pawh a awm rei ve thei deuh. A inkhâwm tùr chu U Rintea'n a va thlah leh thlap a, ka nuin ngai ti lovin a han sawi nãwi deuh naa," Lal ber kha i ni tlat a, thlah ngei ngei i ngai," a lo ti deuh tlat a, Nonoi hian," Âpa, tu nge kan chhûngkua zawng zawngah lal ber?" tiin a zâwt țhìn a, ani hian," I pi a lal ber a, a thu ber bawk. A dawtah i nu leh keimah," a ti mai zêl a, hei hi a sawi chhuah chhan a nih ka ring.

Chhanite pahnih erawh an lêng ve reng a, Joel-a kan tùrin a țhiante, team dang an rawn léng ve leh a, ka han ngaihven zauh zauh. Nu ber ka ni a, ka ngaihven a ngai tlat, an chanchin leh titi han thlîthlãîah erawh min ngaih loh hrâm ka beisei.

An thil inna seng tùra ka han kal lai chuan an lo nui ham ham a, Joel-a pawh a lo nui ve sâng mai. A nui hmêl ka hmu khât a, chutia a nui hmêl ka hmu ve chu a pa nui nèn an inang takzet tih ka hre ve chiah, nui reng thei se, a nui leh a hmêl a inhmeh ka ti.

Ka chhuak dâwn chiah tihah chuan pakhat chuan," I nu tak tak ni lovin i nuhrawn a ni tiraw kha? Tuition class rawn pe țhìntu che u kha?" a lo ti zauh a, chu thu chuan min dêng dawt mai, lo nui hawk hawk an awm zui bawk a, an nuih dàn chu min dêusawh nui ka ti mai.

"Ni e," Joel-a'n a lo tih chuan pakhata bawk chuan," A chhe vak miah lo, a tê nain, ka hreh miah lo mai ka ti," a lo ti leh a, chu zet chuan min dêng na kher mai, ka hre sual emaw ka ti hial. Thil eng emaw a ri chhuai a, ka phu nasa lutuk a, ka tray chawi lai pawh ka thlauh lo chauh a ni.

*LAL ISUA, MI FAMKIM, THIL TIHSUAL NEI MIAH LO PAWHIN DIRIAM LEH SAWISÈLNA HRANG HRANG A TAWH CHUAN NANG, FAMKIM LO LEH TIHSUAL NEI PHENG PHUNG KHA CHUAN DIRIAM LEH SAWISÈL CHU TÂWK NGÈI NGÈI TÙRAH INNGAI HMIAH RAWH*