☆RINAWMIN☆ - 1 - By Dingdi Pachuau

RINAWMIN☆-1  By Dingdi Pachuau

Khumah zâlin ceiling ka en a, ka nui leh țhìn, ka chhûngril hi a hlim ëm a ni. Kum chanve chuang kan inkawp ve hnuah vawiin khân a vawi khatna atân a hmuiah ka fâwp ve ta chauh kha a nia, ka duh dàn tâwk chiahin a zei lo zui a, a zei loh dàn kha a tâwk tiu teu ka ti, ka ngaih a țha hliah hliah hi a ni tawp mai. 

"Duata, lo chhuk teh, hei kuhva rah pêk tùr an awm a nia," tia ka nuin in hnuai lam ațanga min rawn koh chuan ka inperh tho at a, ka tha pawh a za țha zak zak khawp mai, ka vawiina hun hman dàn fuh lutuk vàng vek a ni. 

Scooty la chhuakin kuhva rah pe tùr chuan ka tlãn chhuak zui ta nghâl a, kawnga ka tlàn lai pawh chuan ka nui leh suk țhìn. Vawiina kan hun hman kha koh kìr leh theih se ka va ti tak!! Hun kha ral thei lo se ka ti a nih kha, nuam ka ti a, ka tân hian a hlu êm a ni, tûn ang kumah nula hmui virgin ka fâwp kha a nia, a hlu dangdai vet vet êm asin. 

Kohhran lamah inkhâwm zàn a ni lo bawk a, zànriah ei kham hnuah ka room-ah ka chho zui nghâl a, ka phone charge chu phawiin 'Ka duati' number chu ka hmet chhuak zui leh a, thlèng a sil zo tawhin ka ring, kan inbe hman tawh ang, ka ngai leh tawh tlat, kuhva rah cheh hmain be leh rih teh ang.

~~~~~~~~~~~~~~~~~~~~

School kal lai ațang tawhin kan inhmuin kan inkàwm reng reng țhìn kha a nia, tûn ataka ka hmu danglam ta viau hi mak ka ti a ni. Amahah sawn eng emaw tak ka hmu tlat, ka sawi thiam chiah lo, a hmêl ka en apiangin engtin emaw tak ka awm. Ka en nawn leh țhìn a, hmêl țha ka ti thut em ni zâwk ni, ka thlîr ning thei tlat lo. Ani chuan min rawn en ve miah lo va, a zai dàn ngai rengin a zai a, hetiang tak hian a zai lai hi a lo hmuhnawm a ni tih pawh nichîn ațang khân ka hre chiah!

Inkhâwm bàna ka chhuah chuan a dàn ngai têin pâwnah a țhiante nèn an lo ding leh țhâm tawh a, an țhianza zínga tê ber a nih vàng êm êm pawh ni chuang lova a hming a nih vàng zâwka 'Tei' tia an koh chu a lo țawng leh zat zat tawh a, an lam panin ka pên chiah tihah Fela aw hian ka sîr lam ațang hian," Țhiana, he lamah ka awm," a rawn ti dût a, ka pên lai ka chàwl dat a, maimichhîngin ka phun zui sap bawk. He pa hi, a hun lo thei lutuk!

Chumi zàn ațang chuan Chhani chu vei tak têin ka vei chho ta a, inkàwmho reng, kohhran țhalai thil tih nikhua pawha inzui kual reng kan ni a, kan inhre chiang mah mah a ni; mahse, hre chiang viau e ti lo chuan kha zàn, a zai lai hmêl hmuh nuam ka tih ațang chiah khân ka thinlungah sawi thiam theih loh hian hmun a chang chho a, ka vei chho ta êm êm a ni.

Khami zàn ațang khân kâr hnih chuang a ral leh tawh a, kan inhmu reng reng a, kan inbia a, a hmaa min biak dàn ang thovin min bia a; mahse, kei chu ka danglam tawh, mipa mah ni ila ka lài deuh tlat em maw ni ka ti hial a ni; mahse, biak chu nuam ka ti tho si, a hma ai mahin min biak chuan nuam ka ti, zanin pawh an inah kan lêng dâwn a ni. Lêng dâwn ti ila a birthday kan làwm dâwn a ni zâwk, kan inah Fela ka lo nghâk mêk a, ani lah hi a pa len bîk loh nèn, țuan rang phat phat àwm tê si hi, a Saipui chêt ruih mai țhìn a, nghâktu nih chuan dawhtheih a ngai țhìn khawp mai. Ka hmaa TV chu ka en ve ngei a; mahse, ka hmu lo, ka ngaihtuahnaah chuan Chhani hlîr a awm, dik tak chuan ka hmu leh châk tawh a, ka za et et tawh a ni ber, heti taka min tidanglam thei mai hi a mak ve ngawt mai.

Dârkâr khat zet ka nghâk ni maiin ka inhria, mawnga hawlh ang maiin ka țhu hlè hlè thei lo va, ka tho a, ka vei sek mai a ni. A rawn thlen veleh," Rei thei lutuk mai! Kal nghâl ang," ka lo ti vat a, ani lah chuan," Kan inah thingpui hâng ka in hman lo va, in rih ila?" a la ti zui a, kei erawh țhu duh lovin," Kal thuai zâwk teh ang, khutah i in mai dawn nia," ka ti a, in ațanga chhuah ka rual zui ta nghâl a, a phun bul bul chu ka hre zui, engah vak ka ngai duh lo.

An in hi a zau fahran lo va, Assam type-a sak niin kan in nèn a sak dàn a inang viau a; mahse, keini chu a zau deuh thung; mahse, nula pahnih awm ta chu an in chu a fel fai zâwk em maw ni ka ti, hnawk deuh hlek hmuh tùr a vâng. Keimahni ang thovin kawngpui bul hnai takah an awm bík lo va, motor lian tlãn thãwm erawh a ring pha ve tho.

Chhanite chhûngkua hi chhüngkaw inngeih tak an niin ka hria, awmthei tak ni bîk lo mah se an inngeih tlâng a, an chhûngkaw nun hi ka awt ve hial țhìn, ka hmuh leh hriat theih chinah hi chuan. Chhûngril tak chu zu hre këlh lo mah ila an pâwn lam lan dàn ațang hi chuan an awhawm, a dera an nun peih hi ka ring lêm lo.

Dàn ngai têin nu berin min lo chiauau leh hmasa ber a, pa ber leh Chhani nuța neihchhun, an tê ber ni bawk Lma erawh chuan TV an lo en a, an lo ti ring êm êm zui. Chhani ber ka hmuh loh avàng chuan," Nu Siam, khawnge mi dang hi? An lo la kal nange?" tiin ka zâwt ve zaih a, ani chuan," Kal e, Tei leh Mamawii an rawn kal tawh a, Bawihi sâwmin an chhuak leh ta rih a nih kha, lo țhu r'u, an rawn lêt țêp ang," a lo ti ve mai a,  ka rilru a down nghâl rawih maiin ka hria.

Mahse, kan țhu rei hman lo,  Chhanite țhianho chu an rawn lang ta thuai a, an rawn inhnial lût nghâl bàwng báwng nghe nghe. Min hmuh veleh Chhani chuan," In lo thlen tawh ka ring rëng a! In lo țhu rei tawh em?" a rawn ti vat a, a nui leh sâng tawh. 

"Rei lo ve," ka lo ti a, Fela chuan," Rei tawh mai. Chhani, thingpui hãng in hmasa ber teh ang u, kan rawn in hman si lo va," a lo ti ve thung a, ani chuan," Tehrêng mai," a ti a, Tei lah chuan," Thingpui hâng ti reng mai! I in peih lutuk a, i țuan pawh a muan vek tawh kha," a lo ti a, mi dang chu an lo nui hak a.

Têt tê ațanga inhre chho, vêng khat leh biak in khata lawi kan ni bawk a, zah êm êm ka tum lo, zanin ngei hian ka vei thu ka hrilh dâwn a ni tawp mai. Min lo hmuh dàn erawh ka hre ve lo va; mahse, min huat viau chu ka ring lo ve tawp, ka ring sual pawhin ka ring lo.

Hun a chêp ém avàngin hrilhna hun erawh ka nei thei lawk lo va, a fâla awmna hun lah a awm thei lo bawk a; mahse, ei tùr an siam zo, choka lama a phei chu zui ve zatin thil eina tùr thlèngtê a lâk laiin a beng bulah ka hrilh ru ta zoh a, ka kalsan zui nghâl daih, min en zui a nih ka ring, a thãwm hriat tùr a awm miah lo.

Hmeichheho hian ei tùr hi an siam tui thiam a, an duh tâwka an sâwngbàwl a ni bawk a, a tui khawp mai. A tam bawk a, kan ei țeuh hnu pawh chuan ei fê tham a la awm, naktûk zîng chawhmehah an la ring thei ang. 

Țhianho ngang kan ni bawk a, kan innêl tlâng a, kan țawng ring tlâng viau bawk. Chhani chhûngte pawh hian min dãwl țhang a, kan thãwm a rin deuh châng pawh hian min khap ngai lëm lo, hei tak hi a nia fel ka tih êm êm țhin chhân chu ni, an inah hian kan thla a ngam, mahni in ang maiin kan en vek ni maiin ka hria.

Zàn a rei tak tak hmain haw tùrin kan chhuak ta hlawm a, in hla bera awm kan thlah hmasa ber a, chuti ang chuan kan inthlah kual zêl a, kan inhlat loh avàngin Chhani chu ka thlah tùrah an dah a, ka zuk kual thla leh dâwn a ni; mahse, pawi ka ti lo nasa, hun rangkachak hi bawhpelh ka tum lo.

Kan inthlang step-ah chuan pawt ding deuhin a thim deuh laiah chuan ka dinpui a," Țhian angin ka en tawh lo che, engtin nge min en ve?" ka ti tawp a, a hmêl ka hmuh chian theih loh avàng chuan a hmêl awm dàn tùr pawh ka hmu thei lo.

Min chhàn loh avàng chuan," Chhani, ka duh che, hmeichhia i nihna angin ka duh che a, ka vei bur che a ni," ka ti leh a, a kut chu ka vawnsak tlat a, a la sawn bîk lêm lo. Zanin hian ka hrilh vek dawn, ka vei rei tawh êm mai, zahna intihbuaitîr ka tum lo rëng rêng.

"Dika, țhian kan nih hi, chutiangin i awm lo tawp ang," a rawn ti chhuak ve rât a, a zãm tih a aw chhuak ațang chuan ka hre thei mai. 

Kei erawh chuan," Ka thinlung i hmu thei lo aw, hmu thei la chuan  ka veizia che hi i hmu chiang ngawt ang, ka duh hluah hluah che a ni," ka lo ti leh vat a, khua a vawh ve deuh vàng nge ka țawng zâwng chuan ka khabe chu a inkhâwng ru deuhin ka hria, ka zãm ni chuan ka hre lo.

"Țhian kan nih hi, engtin nge i țhian chu min duh theih?" a rawn tih leh chuan," Mipa leh hmeichhia alawm kan nih, mipain hmeichhia a duh ang hian ka duh che a ni tawp mai, engtin nge min chhàn dâwn?" ka ti ve leh a, a kut ka chelhsak chu a pawhthlâk bîk loh avàng chuan ka ngaih a țha ve tlat, min duh loh bîk hi ka ring lo, kan têt laia kan inkhuallem țhin pawhin nupa kan nih loh pawhin a ţhianpa ka ni ziah țhìn.

"Hun min pe rih la, chhàn nghãl mai dàn tùr che ka hre rih lo. Chuan, min duh tak tak hian ka ring lo va," a rawn tih chuan ka din hnaih ta sauh a," A nih, ka duh tak tak che tih ka proof ang aw," ka ti a, ka țawng zàwi ta khawp mai. Ani chu hnung lamah a tawlh deuh hret nain a kâwngah ka va kuah a, ka lamah ka pawt hnai ta nghâl a.

Ka mu nui vur vur reng mai. Zanin zet chu ka hlim bawk a ni, muhìl thei lawk lo chuan ka let ka let a, zanina kan awm dàn leh ka chêt dàn kha ka ngaihtuah lêt a, ka hlim, nuam ka ti takzet. Hmeichhia hi, ani kher lo pawh ka fâwp ve tawh tho; mahse, zanin tluka nuam tih kha ka la nei lo.

Ka vei hmasak zâwk a ni bawk a, ka duh zâwk a ni tih pawh ka hria. Ani min duhna ai chuan amah ka duhna a nasa zâwk tihna a nih chu. Zàn tin deuhthaw an inah ka lëng a, zàn dangah pawh ka lêng thla fo tho a, a chhûngte'n min ringhlel chuang pawhin ka hre lo, țhian inkàwmah min ngai tho a nih ka ring. Keini pahnih erawhin chu hun chu hun remchângah kan hmang thiam viau thung.

Rei lo te hnuah țhiante chuan kan inngaizâwng tih chu an hre ve zui a, kan hrilh nghâl loh avàngin min hau dùn nasa. Kei kha chuan hrilh nghâl vek kha ka duh a; mahse, aman zëp rih kha a duh tlat a, a hrilh zànah kan hrilh har avàngin wai wai 4 min chàwitîr nghe nghe; mahse, kan ei leh vek tho.

Țhiante nèna awmho pawhin chance zawn a ngai hran tawh lo bawk a, nuam ka ti ţhìn. Chhani hi a bula ka awm tam poh leh ka ngaih a zual a, ka thlâkhlelh a zual ka ti mai,  ka hmuh loh rei chuan tlangvâl dang an inah an lo lêng palh ang tih ka hlau a, chhùn lama hna ka thawh hah viaua ka chauh viau pawhin zànah rei lo tê tal ka chhuk thla leh nge nge țhìn.

Ni khat chu dàwr ka kal haw lamah vêng thlang lama school kan kalpui țhìn, Lalpuia nèn an in kawnga an inzui phei chu an hnung lam ațangin ka hmu a, an inkal hnaih êm avàng  chuan ka thin a sa nghâl phat mai. An ina pèn lawk ka tum rilru kha a nia; mahse, a tih chi loh tih ka hre zui nghâl a, ka lêt zui nghâl vat bawk. 

In ka thlen veleh Alu chu dawhkànah dahin room-ah ka lût tlang nghâl a, khumah țhuin Chhanite pahnih chu ka ngaihtuah zui nghâl bawk. Ka maimichhîng a, ka mitthlaah chiang takin inhnaih taka an kal dùn chu a lo lang leh uar uar a, thinrim zetin ka thaw hawk a, ka rizai ka chùm nghâl pawp pawp bawk. Min lo kawp ru reng em ni ang? Min lo kawp a nih teh chuan e, a châk lo ngawt ang!

Chhani hi a chhiat lêm loh avàng leh a vun nung sar vàng hian a lang ngo a, mipa mit a la ve viau țhìn. Hei vàng hian ka thîkthu pawh ka pe chhe lo thei lo. Nula tâwk tak a ni a, a hmêl pawh hi a tâwk tiu teu viau, a hmui chhah lam lek lek hi a sexy tâwk chiahin a pawrh deuh zui a, a âwmbâwr lah amah phû loh hian a pãwng țha bawk a, ka mit latu ber pawh a âwmbâwr hi a ni țhìn, ani pawh hian a chhuang ru ve deuh țhìn chuan ka hria. 

Zànah ka lêng duh ta lo va, thinrim ru viau mah ila lèn chu ka chãk reng; mahse, ka duh lo. Mipa ka nia, khatia mipa dang nèn insi deuhthawa an kal dùn khân min ti na ëm asin. Phone lo tùrin ka insûm ngar ngar a, ani chuan min rawn be dâwn lo tih ka hria, thla khat vêl chu kan inkawp ve tawh a, kan inkawp ațang hian phone kal tlangin min rawn be ngai lo, ka chhûngte'n an lo chhâng ang tih a hlau tih min hrilh tawh. Chuvàng chuan, ka beisei lo.

*BEISEINA HI ENGKIM HNEHNA A NI*