☆RINAWMIN☆ - 2 By Dingdi Pachuau

☆RINAWMIN☆ - 2 By Dingdi Pachuau

A tûkleh zànah pawh Chhanite inah ka lêng lo va, țhianpa Fela nèn vëng thlang lamah kan lêng thla a, nula in lènna tùr hual bîk pawh nei lo chuan kan âr kawh chhuah ve tawp a; mahse, lènna tùr zawng kan hmài bîk lo. Fela nî fapa kan hmu fuh a, chu chuan lènna tùr min hrilh a, rin aiin kan lêng rei phian lehnghâl.

Kan haw kawngah chuan," Lèn zauh zauh tùr a nih kha tiraw? A chhe lo ka ti riau mai, min rawn melh zing viauin ka hre lehnghâl," Fela chuan a rawn ti chhuak bul bul a, ka melh phei rulh a," Zak ve deuh teh, nang aiin min rawn melh zing fé zâwk," ka lo ti thung a. Ani lah chuan," Ka bula i țhut vàng mai mai a nih kha, min en tùrin a rawn en tel ve zêl che a ngai lo thei lo a nih kha," awlsam zet hian a lo ti leh a. Chutiang chuan kan infiam chho a, rilruah Chhani hre rauh rauh mah ila ka sawi chhuak chhin eih lo.

"Nangni pahnih kha, lo ding teh u, khawiah nge in kal a?" Kawng sîra  chawlhna in tê ațang chuan rùi aw pàwr zet hian a rawn ti a, ka chhàn hmain Fela chuan," Kan chhûngte inah kan kal lawk a," a lo ti vat a," Lo țawng ve miah suh," zàwi sup hian a ti zui zat bawk.

"In va haw har si ve?! Kan vêng nula in rawn rîm a ni zâwk lo maw?" Zu- rùia chuan a rawn ti leh a, ka thin rawn tâwt deuh at at chu ka hre chiang kher mai, buaina rim a nam deuh țan tih pawh ka hria; mahse, eng mah ka sawi rih lo. Chu in têa awm chu mi pali an nih hmèl, an awmna a thim deuh hlek a, ka hre sual maithei bawk.

"Nia, duh aiin kan rei ta deuh a," Fela vêk chuan a ti ve leh a, Zu-rùia bula țhu ni ngei tùr chuan," Kan vëng nula rìm kan remti hlei nem, in vêng nula rîm ta che u," a rawn ti a, ani chu a aw chhuak ațang chuan a rùi vak lo a ni ang, a aw chhuak a fel fai deuh tlat.

Fela'n ka kuta rawn dawm pah hian," Aw le, kan lo hre reng dâwn nia," a ti leh a, min kài zui nghâl a, ka țang nasa kher mai. Tlàwm thlâk ka ti lutuk tlat, khatiang zu rùi satliah kha chu ka ngam ve chiang êm mai a, bâkah, khatia min tham lo lutuk kha pài daih a harsa ka ti.

"Kal ang, buaina pumpelh a țha, ka thu âwih mai teh, tûn chauh chu," a ti sup sup a, a chak angreng si, kei aiin a lian zâwk a, min pawt hneh viau a ni. Ka thaw hawk hawk a, eng tikah emaw ka la lëng leh ang, Fela tel lovin. Chutih hunah chuan hetia kaih hi ka ni tawh lo ang a, tûn ang hian ka ngawihsan mai mai tawh hek lo ang. 

Kan vêng chin kan thlen chuan," I fel e. Zu rùi mai an nia, khin tlâk an ni lo, buaina pumpelh theihna kawng hnai ber ka zawhpui ta che a nih kha, tlànsan hian kan him ber țhìn a nia," a ti a, a thil sawi tàwp lamah chuan a nui zui huk huk a. Kei erawh chu ka thaw halh a, a thil sawi hi dikna chen awm mah se ka rilrem zâwng a ni ve lo. Zu rui hi khin tlâk lohah ka ngai tehchiam lo, an pàwr tulh tulh duh ka ti a, khin loh hian an zah phah lo va, an chapo duh zâwk ka ti ve tlat.

"Nakzàn chu Chhanite inah lêng ila?" a rawn tih chuan," Ka lêng dâwn lo, ka peih lo," ka lo ti hmak a, ka thinrim a la kal tluang ve rih bawk a, lèn ka la tum rih lo bur.

"Nangni pahnih hi in intitau deuh tih ka hre reng alawm. A chhan a ho leh ngawt ang chu, i thîkthu vàng a ni leh ngei bawk ang." Ka țhianpa hi chuan min hre chiang ve a, ka thîkthu chhe lutuk avànga ka ngaihzawng hlui nèn pawh kan buai țhinzia kan hre chiang ve ve e.

"A chhan chu amah zâwt ta che, a hre chiang viau ang chu," ka lo ti leh a, hrilh ka duh viau nain ani hi chuan dam dupin thil a sawi zêl a, ka thinrim viau pawhin ka thinrim rei thei țhìn lo, dam dapa thil awmzia a sawi a sawi chuan ka thiam lohna ni miah lo pawh hi ka thiam lohah a chang zêl, chu vàng tak chuan ka hrilh duh rih lo.

Kan ințhen dâwn chuan," Nakzàn chuan lêng tùrin ka rawn sâwm ang che, thil eng emaw hlek awm hi chu inhrilh fiah zung zung tùr, buaina hi chu a awm lo thei lo ve a; mahse, hetia awm tlat hi a ţha ngai lo a nia," a ti leh dap dap a, chhàn vak ngaihna ka hriat loh avàngin," Nia..." ka ti ban deuh chap a, kan ințhen zui ta nghâl a.

A tûk zànah chuan lêng tùr chuan min rawn sâwm ta ngei a, ka châk tho nain châk lo ang takin ka vialchial ka ti muang lui a, ani lah chuan," Kal thuai teh ang, tlaiah khân ka hmu a, kan lèn tùr thu pawh ka hrilh kha," tiin min turtu-ah a țang ve ta zâwk a,  lèn loh tum pawh awmzia a awm ta lo.

"Mi dang lêng an awm ve chuan ka haw daih dâwn a nia," ka ti sa a, ani chuan," Teh rêng mai," a lo ti awlsam leh êt a, ka ti mai mai lo tih a hria a, Chhani hnênah kan buaina pawh hi a zawh tawh ngei ka ring; mahse, Chhani ngei pawhin a hre kherin ka ring lo.

Kan zu thlen chuan Chhani'n min lo chiauau vat a, a nu leh pate erawh chu an țhenawmpate nèn TV en pahin an lo țhu kháwm a. Fela chuan Chhani chu," I awm chiang maw? Nangmah i ni tak tak em? Mi dang daih te hi i lo ni ang e," tiin Chhani chu a fiam zui a, ani chuan," Ni lo chiang, keimah ngei kha ka la ni," a lo ti ve a.

Choka lamah kan țhu a, Fela remruatnain. Kan luh ațangin ka la țawng duh miah lo va, ka lungawi lohna hi hria se ka duh a ni. Ka lungawi lo tih zawng a hre chiang dâwn lutuk tlat, hun dang chu ni se ka țawng leh nual tawh ngei ang.

Chhani'n thingpui hâng min rawn pêk hnuah Fela chuan," Naupang ang maia titau leh lungawi lo kual vêl lo khân in inkâra thil thleng a awm chuan sawi fel rawh u, zanin hian sawi fel vek ang che u, sawi fela hriat fiah hi a țha ber," a ti sup sup a. 

Chhani chuan," Titau leh lungawi lo an awm chuan kei chu ka ni lo chiang mai a," a lo ti vat a, rang zet hian kei chuan," I lungawi rêng ang, ka lakah lungawi lohna i nei tawp nâng!" ka lo ti vat a, mak tih hmél leh a ngaihna hriat loh hmél taka min rawn en chuan ka lo nuih sak a, eng nge ka nuih chhan erawh ka hre lo; mahse, ka nuihzat vàng erawh a ni lo nasa. Kei hi chu ka lungawi lohna hi ka insûm thiam ve tawh țhìn lo va, ka puitlin lohna lam tak pawh a ni.

Fela chuan ka hnunga rawn bêng thap thap pah hian," Țhianpa, thinrimna kha chu dah țha rih la aw," a ti sup a," In inkâr buaina hi ka hre ve lo va; mahse, zanin hian in sawi fel ngei ka beisei," a ti leh a, a thingpui no chawiin," I pate news en kha ka va en ve teh ang, vawiin lam chanchin thar ka la ngaithla miah lo," a ti a, a kal zui ta nghâl a.

Kan pahnih chuan kan țhu ta ràn mai a, kan ngawi dùn ràn bawk. A hnu deuhah erawh in neitunu zâwk chu țawng chhuak hmasaah rawn țangin," Dika, a ngaihna ka hre lo mai, i lungawi loh tih a lang reng mai si a," a rawn ti sap a, ka la ngawih tho avàng chuan," Ka lo ngaihtuah reng che a, i rawn lêng si lo va, thinrimna eng emaw tak i nei a nih ka ring rêng a, a lo dik chiah a nih hi," a ti a, a chàwl dat a," I thinrimna chhan chu han sawi la, ka lo ngaithla ang," a ti leh a.

"Keia lungawi loh leh thinrim ve mai zawng i tân engtihna mah a ni nâng," ka ti lêt ta sak a, en lo mah ila min rawn en tih ka hre tho. En ka tum rih lo, ka thin a la rim alawm le.

"Chutiang a ni ngawt thei bîk nâng, i rawn lèn ták lohah khân i buai em ni chu aw ka ti a; mahse, chhùn lamah buai deuh pawh chu lo ni la, zànah tal chuan i rawn lèn chu ka ring tho a, i rawn lang thei si lo. I chanchin rawn zâwt tùr chea in ina rawn kal chu ka zak ve deuh bawk sia," a ti leh sap sap a.

"I hre duh tak tak lo a nih chu," ka lo ti leh a, ani erawh chuan," Ka hre duh alawm, rawn biak che pawh ka duh viau laiin ka zak a, i chhûngte khi ka zah alawm. An puitlingin an fel sia, kan inkawp tih an hriat phei chuan min ngei ngawt ang, keini chu heti zawng hi kan ni sia," a ti teh daih a.  

Ka chhûngte ka la hrilh miah lo tih ka hre chhuak hnuhnawh. Han hrilh kher kha ngai ka ti lo ve bawk a, an hre miah lo ang. Kan țhianho hi chu kan inkàwm nasa hlawmin kan inzui kual nasa ve hlawm a, kan inkawpin an ring pha lo tawp ang. Zànah ni se ka kalna/lènna min zawh thu a awm bîk lo va, tlangvâl ka nia, ka lènna thlenga min zawh chhuah kher kha chu a ni chiah bîk lo rêng a ni.

"Lalpuia nèn khân eng thil nge in sawi? In inkal hnaih bawk a," ka ti ta nge nge a, ani chuan min rawn en vat a, kei pawhin chiang takin ka lo en tawh. A mitmeng ațangin thu dik nge a sawi dáwt tih hriat ka duh, dâwt min hrilha min bum a nih teh chuan ka kalsan vang vang ang.

A chal chuar deuhin a mit a han meng nûr deuh a," Lalpuia kha maw? Dàwra ka kal lawk kha min lo hmu a, min kovin kan in bula kal a tum thu min hrilh a, min rawn ûm pha ta a nih kha. Ka kal hnaih lo, min rawn hnaih zâwk a nih kha. Chuan, eng thil vak mah kan sawi lo, inbiakna pangngaiin kan inbia," a rawn ti ta a.

Mit khap lovin ka lo en ràn a," Insi deuhthawin in kal a nih kha. Bákah, nangmah lo star țhìntu che kha a nia," ka ti leh a, ka sawi zawm duh tawh lo, a hre thiam dáwn tih ka hre sa.

"Min rawn kal hnaih zêl a, a hnu deuhah phei chuan ka nam sawn nghe nghe alawm, zu rim kha a nam deuhin ka hria a; mahse, ani lah khân fiamthu-ah a ngai zêl a," a lo ti leh a, chutah, ka kut rawn vuanin," Dika, ani kha ka ngaizâwng lo, ka duh hauh lo bawk. Kal dùn satliah mai kan ni,  kalsan daih kha chu a mawi lo ve deuh a, chu vàng chauh chu a ni e," a ti dap dap a.

"Eng mah in inkârah a awm lo maw? Min kawp lo maw? Ka duh miah lo a nia," ka tih chuan," Awm lo, eng mah kan inkârah a awm lo, Pathian pawhin a hria ang," uar zet hian a lo ti ve leh a, a hmêl leh a mitmeng ka en a, dáwt sawi duhin ka hmu thei lo, an kal dùn ka hmuh chian êm avàng leh ka thîk êm avàng khân ka thin a lo rim mah mah a nih ka ring ta zâwk. Thîkthu vàngin rinhlelhna mitin ka en tlat a, thil awmzia hre chiang si lovin. Kei chauh ni lovin ani pawh ka lo tihrehawm reng a lo ni.

"Dika, ka ti tak tak, kan kal dùn min hmuh vàng mai chuan min ringhlel ta tihna a nia, ka lo lêrh viau tihna a ni ngei ang," a ti leh sap sap a, inthiam lo ru deuh hlek chung hian," Lêrh lo; mahse, ka duh êm che avàngin thîkthu ka lo ti chhe deuh a nih hmèl; mahse, nang chuan min hriat chian tawh kha, ka thîkthu a chhiat êm avàngin Hlimi nèn pawh ințhen kan ni rêng a, kan chungah erawh thleng ve suh se," ka ti ve ta duah a.

Kan boruak a dik leh ta. Zàn ka lèn loh chhûng zawnga ka fawh theih lohna pawh zanin chu a rùl vek mai, lungmuang taka induat erawh a har deuh, a chhûngte thãwm kan ngaichãng pah reng lo thei si lo va, thãwm a rawn awm deuh nia kan hriat chuan kan inthlah leh rih țhìn.

*I HMAN HMAIN HLAWH CHHUAK HMASA PHAWT RAWH*