☆RINAWMIN☆ - 3 By Dingdi Pachuau

☆RINAWMIN☆ - 3 By Dingdi Pachuau

Zanriah kan kîl laiin ka nuin," Duata, naktûk chu Pu Chhûngate ban khur laihnaah inhlawh ve ta che, ka lo sawi tawh a, i hman ang tiraw?" a tih chuan U Zovi chuan," A hahthlâk àwm, an in hmun a âwih si," a lo ti vat a. Ka mitthlain Pu Chhûngate in hmun ka suangtuah a, a âwih ve lah tak a; mahse, inhlawhna a vàn deuh bâkah ban khur laih chuan hlawh a sâng deuh dâwn a, țha ka ti ve tho mai.

Ka pa chuan," Tlangvâl tân hahthlâk a awm hlei nem, fîmkhur erawh a ngai ang a, chét phut phut loh tùr a ni," a lo ti ve chuar chuar a, ka nu chuan," Inhlawhna a vâng rih si a, țha ka lo ti viau asin," a ti leh a, min rawn en a, kei pawh chuan," A țha alawm, i lo sawi tawh tho bawk a, ka thawk ang e," ka lo ti ve a.

Inkhâwm zàn a ni lo bawk a, dàn ngai têin Chhanite inah ka chhuk leh a, Lma'n lehkha a lo chhiar làng láng a. Ka luh chuan Chhani chuan min lo chiauau vat a, vaihlo zial tùr a lo inchhawp nasa mai lo niin, chu chu ka hmuh veleh ka rilrua phûrna chu a tla hniam nghâl sawt, inmuah a rem dâwn tlat lo atin a ni.

"Inhlawh ve ka duh sia, chhùn lamah ka hman meuh si lo va, zàn lamah hian ka theih tâwka tam ka zial ang a, ka nuin min pui thei bawk ang a te ka lo tia," a tih chuan," I hah phah lutuk ang e," ka ti ve luam a, dik tak chuan zial lo se ka ti daih zâwk. Zial hi zu zauh zauh mah ila Vaihlo rim hi ka ngaina lo, ka hrawk a tiza țhìn.

A rim ngaina lo viau si hian a zûka zûk chuan ka duh leh tho si a, mak ka inti ţhìn.

"Hahna tùr a awm hlei nem, lo țhu rawh, thingpui ka lo thlit nghâl ang che, Fela a rawn tel ve ka ring deuh a nia," a ti leh a, thovin choka lam a pan a, Lma lah chuan uar zet hian a zirlai chu a chhiar zawt zawt reng a, a bengchheng lek lek ka ti. Lehkha a zir a ni ve bawk si a, bengchheng lo tihsak kha chu a fuh chiah lo ang.

"Vawiin chu ka nutei kawr ka țhuipui e ka tia, ka taksa a sil ţhûm maiin ka hria. Kawr pakhat tal hlawh chhuah ngei ka duh sia, chhùnah pawh ka chàwl ve hman lo," Chhani chuan ka thingpui no rawn chawi chung chuan a ti a, min pêk hnuah a dàr chu a'n chêt kualtîr a, ka lo en zui reng a. Ka khawngaih reuh tak tak! A theih ang ang hian hna hi a thawk ve a, a thatchhe lêm lo. Ani pawh hi keimah ang chiah niin lehkha kha a zir sãng bîk lo va, pâwl kua a nih kumin a damlo vak a, kum tàwpah a exam thei lo va, a zirna a chawlhsan zui ta a nih kha. Amah hi mi hrisël tak a ni lo sa ve hrim hrim bawk a, tûn hnu hian a hrisêl ve ta deuh zâwk a, damdawi in pawh a lût ngai ta meuh lo tih theih a ni tawh.

"I dàr chu ka lo hmet dâwn em ni ang?" ka lo ti vat a, ani erawh chu a lo nui sak a," Ngai lo mai rawh se, i chau palh ang. Kha, thingpui kha in rawh, a sa lutuk lo a nia," a ti leh siam siam a, room ațangin a nu a rawn chhuak a, Lma chu," Bawiha, i ute room-ah va chhiar ta che, hetah chuan kan titi ang a, i ngaihtuah thei lo zâwk ang," a rawn ti ta hlauh a, ka lo thaw deuh huai mai.

A nuin a rawn zialpui tâkah chuan kan titiho a, biahthu di inhlan rem hek lo le, vawiina kan hnathawh ațangin zirnaah kan lût a, chuta țang chuan kohhranah kan lût chho leh a, topic kan thlâk zing viau mai.

A pa lêng a rawn haw a, nu ber chu rawn kovin," Naktûk zîngah hna thawka ka chhuah a ngai dâwn a, eirawng i bâwl sa dâwn em maw ni le?" a rawn ti làng lâng a, Chhani chuan," Pa, eng hna nge thawh ngai a?" a lo ti vat a, a nu chuan," Pu Lala huanah a ni lehpek ang," a lo ti sap a.

A nuin min thawhsan tâkah chuan kan duh zãwng kan sawi dùn thei ta a, a bula awm ka thlâkhlelh țhin avàngin a bul hnai takah chuan ka insawn phei a, mipa tiha mawi lovin a phal lo chung a zial sa chu ka lo țàwnpui ve a, inah pawh ka ti ngai tawp si lo. Ka țhiante'n min lo hmu ta se min va fiam nasa dâwn êm!!

"Zanin chu kan inmuah thei dâwn lo tlatin ka hria," ka ti sap a, min rawn enin a nui deuh a," Engah ngawt chuan maw?" a ti a, kei chuan," Min hrechang duh meuh lo sia," ka lo ti a, min chhàn dâwn lai chuan a nu a rawn phei ta hlauh a," I pa hi chu a buaithlâk țhìn, a duhnaah hi chuan min nawr chûk zël a, naktûk zîngah chaw pawh ka chhùm hman daih àwm si a," a rawn ti nang nang a. Thlèng a rawn kenah chuan vaihlo chu a la chhuak țhen a, lehkha nèn, choka lamah a phei zui leh ta a.

"Naktûkah eng nge i thawh dâwn?" tia min zâwtin a han țhu țha a, ka ke chu a rawn dek zauh a. Nuam ka lo ti leh hman hle, a la sawn ang tih ka lo hlau viau a; mahse, a dah sawn ta bîk lo. Ani pawh hi keimah ang ve tho, min thlahlel ve tho a ni; mahse, ka thlâkhlelh ang êm ëm hi chuan a ni ve lo ang.

Lungrun takin kan induat thei lo, a nu mitmei rànin ka duat zauh zauh a, min lo hnial bîk lo. Ka haw dâwnah min thlah a, kan chhuak tùr chuan veranda light ka off hmak a, veranda-ah chuan lungrun takin kan infâwp thei ta thung. Infawh hi chu a zei sa a, ka fawh hma hian mi pahnih pathum vêl chu a fâwp tawh tih pawh ka hria, a luck ve tlat a ni. 

Duhthawh taka fâwp pah chuan a âwmbáwr chu ka dap zui nghâl a, ka kut a lo man chat thung. Kan kut chu a insual deuh a; mahse, ka chak zâwk tih ka hria, ani pawh chuan min hnial rei lo. 

"Kal tawh rawh, ka nuin rei min ti tawh ang," thaw hliai chunga a tih sap sap tâkah chuan veranda-ah chuan kan lo ding rei mah mah tawh a ni tih ka hre chhuak a, a tàwp nân äm takin fâwp lehin ka kut pawh a awm hlè hlé lo tawp mai, ka țhãm leh țâwk a, duhthawh a na duh ngat ngat viau a ni.

*******

"Chhani nèn khuan in inkawp a ni tiraw?" Room-a ka awm laiin U Zovi a rawn lût a, min rawn zâwt a ni. Kei chuan zêp pawh tum lovin," Aw, ka duh alawm," ka lo ti mai a. Min en tih ka hria, en ve duh lo chuan ka lehkhabu chhiar lai chu ka en pah reng tho a, chhiar erawh ka chhiar tawh lo.

"In inkawpna a rei tawh em? Țhian angin inkàwm emaw ka lo ti char char a," a ti leh a, ka khum bulah chuan a rawn ding hnai deuh a, kei chuan," Rei lutuk lo ti ila a rei ve deuh tawh tho, thla thum chu a tling ve tawh ang,"  ka lo ti leh a.

A ngawih vang vang hnuah," Ka nute hian an la hre lo a ni ang maw? " a ti leh a," Ka hre lo," ti chauhin ka lo chhâng. Anni hrilh hriat kher țûl ka ti lêm lo va, hrilh kher pawh ka tum hran lo, an hriat hun hunah hre ve mai rawh se.

"Duata, i rilru hi a kal khat ve sia, ka nute hian an duhpui lo ang che tih ka hlau mang e!" a ti leh sap sap a, ka en chho ta chiah. Min rawn en chhuk ve reng a, eng nge a ngaihtuah tih ka hre thiam lo.

"Eng nge min duhpui loh ngawt ang?" 

"A, ka sawi ve mai mai a nih kha, eng mah a ni lo, hlim deuhin inkawp r'u," a ti leh hnuhnawh a, nui lui sakin a inher a, ka room ațang chuan a chhuak zui ta nghâl a. A thil sawi chu ka ngaihtuah zui a, ka hre thiam lo lek lek a ni, engati nge ka bialnu chu min duhpui loh ngawt ang? Min duhpui lo thei dinhmunah kan ding em ni? Keiin ka duh êm êm a, ka try hmasak a ni nghe nghe bawk. A ho êm mai, ka bialnu a ni mai a, ka nupui pawh a la ni lo, kan la inkawp chho ve mëk chauh a nih hi maw, anni tân lo inrawlhna tùr a awm rih lo.

Fùr hunpui a rawn inher chho leh țan ta. Hunpuia ka nin ber hun lai a ni, ruah sûr hi chu thuhran, keini in awmna phei hi chu tlâng ve deuh lai a ni a, thli a tel deuh zêl a, zàn lamah phei hi chuan thli tenau a tleh hi a ni deuh zël mai, ka ning takzet țhìn.

Zanin pawh inkhâwm bàna lèn tum ka ni a,m; mahse, ka inkhâwm bâng ina ka luh veleh ruah a rawn sûr leh buan buan a, chhuah leh mai chi a ni lo. Thli a thaw tel zui a, zaninah a rawn inkhâwm si lo va, hmuh ka châk asin le! Dárthlalang ațangin páwn lam ka bih a, ka tih theih tâwk a rükin ruah chu anchhia ka lawh mawlh mawlh mai a ni.

"Duata, lèn chhuah i tum chu a ni lo ang tiraw? Lèn chhuahna khua pawh a nih loh hi a," Ka nuin a rawn tih chuan ka inher a, thingpui no hnih chawiin dawhkànah chuan a hûng a," Lo in rawh," a ti zui a, ka pa a thlit kêp a ni tih ka hria.

"Lèn chhuah theih pawh a nih loh hi," ka ti ve a, ka inkhâwmna thuam ka la inthlâk lo va. Hetianga khua a awm a nih chuan lèn chhuah pawh a nuam lo ang, Chhani pawhin min lo beisei ngamin ka ring lo.

Inthlâk tuma ka room lam ka pan chu," Lo țhu ve teh, thil lo sawi dùn lawk teh ang," a rawn tih leh avàng chuan ka ding deuh dat a," Aw, ka'n inthlâk lawk ang e," ka ti a, ka pên zui leh ta nghâl a. Eng tak min sawipui dâwn chu ni maw? Chhani nèn kan chungchâng min zâwt dâwn pawh a ni mahna, ka nu a nia, min zâwt thei alawm, min zâwt a nih chuan engkim ka hrilh vek ang.

Min záwt ta chiah a, kei pawhin zëp nei lovin ka hrilh mai. Bialnu chungchãng nu leh pate bula sawi chu nuam ka ti chiah lo nain min zâwt miau si a, ka hrilh mai loh nâkah.

"In induh viau em? Nge, nangmah hian i duh rum rût? A rilru dik tak i hria em?" ka nuin a tih chuan chiang inti fahran hian," Kan induh viau, chuti ni lo se kan inngaizâwng nâng, ka duh hlê tih ka hria a, ani pawhin ka duh tluk zetin min duh tih ka hre bawk," tiin ka chhâng a. Ka duh hlê tih chu ka chiang, ka duh ang chen zet hian min duh ve hlê em tih erawh ka chiang vak lo.

"Duata, sawisèlsak hrim hrim che hi chu ka duh miah lo va; mahse, nang pawhin i hria. Chhani hi chu a hrisêl lo va, tûn hnu hian a zia chho ta a ni mai a, bâkah, a nungchang pawh keini ai chuan i hre chiang ang. Hetia in inkawp chhoh zêl chuan, in ințhen loh chuan in hmabâk chu inneih a ni. Ngun takin ngaihtuah ang che aw, ngaihzâwng thlan hi fîmkhur a ngai a nia, kawp laklawh tih vànga tum vak loha innei ta daih hi an tam țhìn. Chutiang chuan thil țha aiin thil țha lo a hring chhuak țhìn tih hria la, ngun takin ngaihtuahna i hmang dâwn nia," ka nu chuan a ti leh dap dap a, kuhva rah a chep pah bawk a. Kan bula lo țhu ve reng ka pa erawh chuan newspaper a lo en daih thung, ka nu thil sawi chu hre ve àwm pawhin a lang lo.

"Chhani hi eng nge a țhat lohna? A hrisël lohna hi chu a duhthlan a ni bîk lo va, tunah phei chuan a hrisèl tawh êm hi, a țhat lohna lai àwm ka hmu ve lo rêng rêng," ka ngawih vang vang hnu chuan ka ti ve ta a. Ruahin bang leh dârthlalang a rawn theh ri țhat țhat a, khua pawh a ti vawt viau, current erawh a țha viau zêl e.

"I rilru zawng zawng pe suh ka tihna mai a nia, i rilru pêk dàn tâwk thiam la, in ingaizâwng mêk a, in la innei lo a ni. Eng thil pawh in inkârah thleng thei a la ni a, thil țha lo thleng palh ta se, i na leh dâwn a, chu chu kan duh loh vàng a ni aw. Chhani kan duhpui loh hrim hrim vàng cheah ngai lo la, puitling zâwk, tawn hriat ngah tawh zâwk kan nih avàngin thil awm thei ka hrilh mai che a ni. I nu leh pate hian i tâna țha ber kan duh zêl ang tih hria la, hrehawm leh rilru nâa i awm hi kan duh ngai lo ang tih pawh i hre dâwn nia," ka nu chuan a ti leh dap dap a.

Mut hmunah chuan ka nu thil sawi chu ka ngaihtuah lêt a, a sawi dànah kha chuan Chhani hi min duhpui chiah lo tih a lang reng mai, țhen tùrin min ti dawt lo na a, kawp lo tùr chuan min duh tihna a ni. A eng berah nge Chhani hi an duh loh ni? Chhe lo ka tih nèn, a felin a phâk tâwkah a taima tho si a, a hrisèl lohna lahin a kiansan ve viau tawh bawk si nèn, ka rilru ka pêk viau lohna chhan tùr ka hre ve lo. Ka duh a, ka thlahlel a, kuaha fawh vang vang pawh ka châk leh tawh tehlul nèn, ani laka rilru pêk loh hi chu ka tân chuan a har ve hret ang.

YMA Day zîngkârah hnatlâng an ko a, thlanmual kawng leh park kan sãm fai a, chawlh laiin kan țhianho pawh kan awm khâwm leh tal tal a, hmeichhehovin ei tùr an rawn ken min pe ve bawk. Khua a la hnâwng deuh nain hnim a nêm a, a la lian lo bawk a, a fai duh viau mai, 

"Tukin Lalfela ka ngei dàn kha! Ka tho tawh reng a, min rawn ko vak vak kher a nih pek kha, zak vak lo mah ila a tizahthlâk," Tei chuan a ti zat zat a, Fela nui ruh ruh chu ngei tih hriat tak hian a melh râm râm a.

"I tho tlai ngai lo hrim hrim tiraw?" Mamawii chuan a lo ti vat a, Fela chuan," Ka va kai tho chawp alawm le, a rawn tho chhuak phak ëm êm zui," a lo ti chuar chuar a, ani hi chu a țuan ang chiah hian a țawng pawh hi a muang a, a nghahhlelhawm ţhìn.

"Vawiin chu a nuam leh dâwn mang e! Volleyball kha ka châk tawh ber, min lo țan ang em?" Chhani beng bulah chuan ka ti sar sar a, ani pawh chuan min rawn en chho hau pah hian," Țan dâwn nasa! Ka lo au nasa ngawt ang," a lo ti ve a, a nui pah a, a hmui chhah lam lek lek, lang sexy zeta zu fawh ka châkzia mai chu, ka insûm zo lo țêp a ni. Ka kut ka hûm ruh a, ka insehruh tlat bawk. Kan awmna hmun hian zir mawlh hek lo, ît deuhin ka en tawp ringawt.

*KHUA HI A CHHE RENG LO A NIA. RUAH SÛRIN  KIAN HUN A NEI A, NÎIN LO LAN HUN A NEI VE BAWK ȚHÌN*