☆RINAWMIN☆ - 10 By Dingdi Pachuau

☆RINAWMIN☆ - 10 By Dingdi Pachuau

Boruak țha lo a thleng zui hran lo va; mahse, kan hlim zui êm êm chuang lo. Ka nu hi chu a harsa ve tih ka hrie chiang a, Chhani chungchâng han sawipui viau pawhin," Ka fate in nia, ka hau bawrh bawrh dâwn che u. Ka hau theih loh nih tum suh u, in tâna țha tùr ka ngaihtuah a, hma sâwn zêl tùr che u a ka duh vàngin ka hau che u a ni. Chutiang chu in ngaithei lova min hrawn peih lo a nih chuan..." a ti daih a, ka tân pawh sawi zui tùr a vâng. A thil sawi hi a dikna chen a awm ve tlat a, lehlam taka ngaihtuah erawh chuan hre ngai lo leh hrawn ngai lo tân chuan a bula awm a hrehawm viau ang tih ka hre tho bawk.  Keini a fahrinte ngei pawhin 'àncheh' kan tih chuan a fahrin lohte tân phei chuan 'àncheh over' an tih tùr ang hi a ni tlat; mahse, amah hi chuan àncheh a inti lêm lo.

Tûkțhuan ei khamah ka nu chu U Zovi dàwr nghâk thlâk tùr chuan a kal a, huana kal ka tum ve viau nain ka țhulh ta. Ka insiam laiin Chhani a rawn uak nasa a, kawr pawh ha țha hman lovin ka pan vat a, tui dehnaah a âwm dawmin a lo uak vak vak hi a lo ni a. A chal ka dawmsak vat a," Engtizia nge ni?" hlauthãwng deuh hian ka ti zui a.

A nawmsam loh hmèl êm avàng chuan ka kalsan duh ta lo va, a dul a puar ve tawh tho bawk nèn, eng eng emaw tih a lo tum leh ang a, U Zovi a lo la thleng bawk si lo, ka awm ta rih a ni. Ani erawh chuan," Ka țha a nia, huanah chuan kal rawh," a ti thung a; mahse, kal ka tum chuang lo. A hmêl dâng deuh del chu ka en deuh reng a, ka khawngaih reuh a ni.  Nula harh țha ve pângngai tak kha a ni a, tunah erawh chuan a rai avàngin a kal lei lei a, ûm ta ila tlàn pawh a tlän thei lo ang tih tùr a ni tawh, a inzo lo tlat. Inzo lo êm êm tùr a la ni lo, vawiin tlai ațang chuan exer ka lâkpui tawh ang, heti chuan nau a har lutuk ang tih a hlauhawm tlat.

Nilêng deuhthawin ka muttîr a, tih tùr țûl a sawi ka ti vek a, ka insu a, chhuat ka nâwt a, chhùna ei tùr siam erawh ka thiam loh avàngin dàwra mi ka lei tawp thung. Thingpui in dâwnah ka pa lêng a rawn haw a, zo artui a rawn hûm haw ve țât niin," Hei hi Chhani'n hîp se a țha ang," a ti ve ngei a, nachâng a hria ka ti tak tak. Țha ber tùr nia hriain Chhani tân chuan ka half-boil a, thingpui pawh keiman ka siam vek.

Thingpui in tùra ka kaih thawh dâwn chuan khumah a lo țhu fel dèr tawh a," I lo tho tawh a ni maw? Eng nge i an? I muhìl thei tiraw?" ka han ti a, a chalah chuan ka fawhsak zoh a. Ani pawh chuan," Ka zia hawk mai, tukin ka thil ei kha a ni thei ang em aw ka tia; mahse, tunah chuan ka pum let but but pawh kha a reh fel ta," a lo ti ve a, chawhma chhûng zawng a mu bawk a, a zia phah tak tak ka beisei takzet a ni.

U Zovi a rawn haw ve a," Chaw ei tùra i rawn haw ka ring deuh a nia," ka lo ti vat a, ani chuan," Nia, ka tum ve reng; mahse, Bda Aizawl kal tùr a rawn pêng pek a, tûkțhuan a la ei lo bawk nèn, thingpui leh rice ka lâkpui a, ka ei ve ta a nih kha, hnial theih ni hek lo," a lo ti vat a, ka pa chuan," A pawi loh chu, Bda chuan eng nge a tih dâwn a, Aizawlah chuan?" tiin a lo zâwt chhunzawm zui nghâl a.

Tlaiah hma deuh hlekah eirawng bâwlin Chhani chu ka pui a, zawh hma leh exer kan la hma thei dâwn tihna a ni a, ruah sùr tak tak hmaa kan tih loh chuan hun a awm leh lo ang. Exer lâkpui tihah khân kawnga kalpui kha a ni deuh ber a, tlànpui a chî si loh a, hah vak lova thui vak lo kalpui kha a ni deuh ber mai.

A vawi khatna a ni bawk a, kan kal thui vak lo. Kal dun chu nuam a ti a ni ang," In chhûng ni lo, pâwna han kal kual vël chu a nuam hlê mai. Boruak hi a tâwk reuh sia, ka dam sawng sawngin ka hria," a ti vang vang a, thlanmual kawng lamah ka kualpui a, helai kawng hi a nuam lah tak a, thing lian leh sâng tak tak a ding khup a, a reh deuh raih bawk si nèn, a boruak lah a nuam ve thlâwt.

Ina kan thlen chuan a lo tlai ve deuh tawh a, ka nu pawh a lo haw tawh niin, vawiin chu ni dang zawng aiin s lo haw hma a nih hi, eng a hria chu ni maw? A nawmsam loh loh hrâm ka beisei.

"Chhani leh Zovi kawr tùr ka rawn hawn kha, va en chhin teh u, kan room-ah khân ka dah," rin loh lutuk tak maiin ka nu chuan a rawn ti a, a tìrah phei chuan a ti der emaw ka ti hial a ni; mahse, U Zovi chuan a va la thuai a, incheina kawr a lo ni a.

"Hei hi a lian deuh a, Chhani'n a ha thei ang, a raipuar bawk sia," U Zovi chuan tiin, kawr senno mawi,țhui mawi tak hi Chhani lamah chuan a rawn theh phei a, amah chuan kawr eng chu zâr pharhin," Ka ha tâwk chiahin ka ring," a ti zui a. A han ha chhin chu a lo tâwk chiah mai nghe nghe a, han sawisèlna lai tùr a awm miah lo.

"Han ha ve chhin teh, i ngo sia, i inhmeh ngawt ang," Chhani hnênah chuan a ti zui a, kei pawh chuan," A rawng kha i inhmeh dâwn lutuk tlat, han ha thuai teh, ka hmu châk tawh che," ka lo ti ve a.

Ka rin ang ngeiin a lo inhmeh. A kawr tùr ni àwm tak a ni, tlêmin a bân a thâwl deuh tih lohah chuan sawisèlna tùr ka hre lo, a rawng ni se a fuhin a inhmeh êm êm mai si.

"I inhmeh lutuk tlat!"

"Tak tak maw?" tiin a inthlêk kual ve a, U Zovi ai chuan a inhmeh ka ti fê zâwk. A rawng pawh hi a mawi, a eng hi chu nau êk ka hre chhuak zêl, mawi ka ti tak tak thei lo.

"Dàwra an rawn ken luhin khâng pahnih khân ka mit a la nghâl chat a," ka nu chuan a lo ti a, ka pa pawh chuan," In inhmeh dùn hlê mai, in vànnei bîk teh e. I nuin kawr thar a leisak che u a nia," a lo ti ve a.

Zàn mut dâwnah chuan ka hâk chhintîr leh a," I inhmeh ka ti êm mai, i mawi takzet a ni," tiin ka fak mawlh mawlh a, a inhmeh ka ti takzet a, mawipui ka ti takzet. Ani aia inhmeh tùr dang ka hre lo, a siam chhuaktute, a țhuitute hian a hâk tùr rënga an duan a nihte ka ring rum rum hial mai.

"A rawng hi ka duh ai chuan a no mah mah ka tia, U Zovi kawr kha a țhui dàn a mawi ka ti, hei hi chu a simple mah mahin ka hria," tiin a inthlêk kual a, kei erawh chuan," I kawr hi a mawi daih zãwk! U Zovi kawr kha chu nau êk rawng a nia, a mawi lo," ka lo ti ve thung a. Inhmeh ka tih ëm avàng chuan thlìr nin a har ka ti, a vun ngo chu a tilangsàr zual ka ti a, a lang duhawm hliah hliah ka ti bawk.

Kawr thar an nei chu an läwmin an hlimpui viau emaw ka tih laiin rin loh deuhin chu kawr thar chuan kan chhûngkuaah buaina a rawn siam tlat mai!

Inrinni zàn, zanriah kîl laiin ka nuin," Kawr ka leisak che u kha in duh lo a nih chuan in ha lo thei ang, mi ka pe dâwn," a rawn ti chhuak nghut a, a thil sawi chu ka hre sual emaw ka ti a, ka en vat nghe nghe; mahse, ka hre sual lo tih a hnua U Zovi hmêl ka en leh chuan ka hre thiam chiah.

"Ka nu, ka hâk tawh reng kha, engah nge kan duh loh ngawt ang?" U Zovi chuan a lo ti a, Chhani chu a ngawi reng thung. 

Ka pa chuan," Ni ngawt tak mai! Eng thil nge maw i sawi hi ni? I leisak a, an ha chhin a, an duhin an inhmeh êm kha maw," a lo ti ve a, ka nu erawh chuan," Thil rêng rêng hi țha takin sawi mai tùr a nia, duh loh chuan duh loh thu sawi mai tùr, 'ka duh lo' tih hi sawi a harsa lo. Chhûngkua kan nia, mi bula kan chhûngkaw chanchin sawite hi thil țha a ni ngai lo, mahni mawng hlîm mai kan ni, kan hnunglamah miin min nuih tet tet țhìn," a ti leh a, a tho zui nghâl daih a. A ngaihna ka hre lo, a thil sawi awmzia pawh hi eng vànga sawi chhuak nge a nih ka hre thiam chuang lo.

"Eng nge a sawi awmzia kha ?" tiin U Zovi chu ka zâwt sar sar a, ani pawh chuan a hriat bîk loh thu a lo sawi ve a, Chhani ka en chuan hnuai lam bihin a lo ngawi ràn a, ani hian kâr liama Pathianni khân a ha a, a inhmeh êm ëm bawk a nih kha.

Inkhâwm tùrin ka nu leh U Zovi chu an chhuak a, ka pa erawh chuan," Ka kâwng a nuam lo êm mai," tiin rei pawh țhu lovin room lam a pa zui nghâl a, nupui ka neih hnu hian kei hi chu ka thatchhe ta deuh a, Pathianni zîng leh zàn tih loh hi chu ka inkhâwm vak tawh lo.

Inkhâwm chhûng chu TV kan en dùn a,insi rialin kan țhu a,a kut ka malis a, nuam a ti nasa. " I thiam sia, ka ke pawh min hmehsak rawh aw," a ti siam siam a, ka hnial phal dér lo.

Inkhâwm bàn hmain kan room lam kan pan a, zànah hian mu tam se ka tih țhin avàngin ka mutpui hma țhìn a, ka lêng chhuak ngai lo tluk a ni, thil țûl bîk takah lo chuan.

Mahse, kan muthilh hma chuan tui in tùr la tùrin ka chhuak leh rih a, ka nu chu sitting room-ah amahin a lo țhu ngar mai niin, TV pawh a lo en chuang lo, ngawi rengin a lo țhu a ni ber.

"I mut a la chhuak thei nange?" tia ka zawh chuan," Thil ka ngaihtuah a nih hi," a lo ti hmuk a, biak zawm zêl huphurhawm tak a ni; mahse, ka nu a nia, bâkah, ka nupui tân kawr thar a leisak ve bawk a, làwm thu pawh ka la hrilh lo. A thinrim lai hian làwm thu chu hrilh ila a țha tak ang.

"Nu, kawr thar kha, Chhani a lãwm lutuk a nia, khatiang i ti kha kei pawh ka lãwm lutuk aw," ka ti a, ani erawh chuan min chhâng lo. Ka ding deuh reng a, a țawng ta bawk si lo chu, a lung ka tiawi zo dâwn lova hriain ka kal sawn hret a, chutah chuan," A duh tak zâwk ka thlantîr loh avàngin Chhani khân min lo ngaidam teh se, a sen no kha a duh zâwk ka rin sa a nia, bâkah, a inhmeh dâwn tih hriain mawi ka ti zâwk daih bawk a," a rawn ti chhuak ta a.

A ngaihna ka hre lo kher mai. Chhani'n kawr thar kha a duh reng kha, a duh loh thu a sawi em ni?  A țhui dànah erawh U Zovi kawr țhui dàn kha mawi a ti ngei mai a, min hrilh chiang, a rawng pawh a no mah mah a ti leh bawk e; mahse, a duh loh thu a sawi lo.

Chu mai mai chu mut hmunah ka ngaihtuah ta reng a, a awmzia tak chu a tûkah ka hre ve ta chiah. Pi Chali'n ka nu bulah kawr thar chungchãng a lo sawipui leh a, C

'Chhani'n a sawi dàn' tiin a lo hrilh leh nual a ni àwm e.

Engah vak ka ngaih loh nèn, rin aiin a kàngkai thui tlat. Chhani kha zawh rnah pawh ka en lo kha a nia, ho ka tih êm avàng leh a sawi ka rin loh êm avàngin; mahse, a lo sawi ngei a lo ni chêk ang chu, U Zovi'n," Chhani, kawr eng chu i duh zâwk chuan kan inthleng thei reng alawm, i kawr kha a lian deuh zâwk nia hriain ka pe che kha a nia, i hâk tâwk chuan ka thlan kha i nei zâwk dâwn nia," a tih chuan ani chuan," Ka duh lo, kan ha ve ve tawh a, miin an hre vek tawh," tiin a lo chhâng ta a nih chu.

"Ni tho mah se, i duh zâwk chuan a pawi chuang--" a la tih lai mêk chuan Chhani chuan," Ka duh zâwk lo, i duh i thlang a, i nei ang chu," a lo ti hmak a, a țawngkam chu ka hre sual a nih ka ring lek lek a ni. Mak ti takin Chhani chu ka en reng ringawt a, hetianga U Zovi a chhàn duh leh a chhàn ngam hi ka ring ngai lo.

*HNÂWLNA, HLAWHCHHAMNA LEH LUNGNGAIHNATE HI HRINGNUNA BET VE TLAT AN NIA, I MIMAL THILA HLAWHCHHAM ȚHAKNAAH NGAI BÎK SUH, I TÂN KAWNG SIALTU AN NI CHAUH ZÂWK*