☆RINAWMIN☆ - 11 By Dingdi Pachuau

☆RINAWMIN☆ - 11 By Dingdi Pachuau

Room-a kan awm dun laiin," I kawr chu i duh chiah lo em ni? I inhmeh ka tih tehlul che nèn," tiin ka zâwt a, ani chuan," Duh lo ila ka ha dâwn em ni?" tiin min lo chhâng thung. Ka en deuh reng a, en pawh min en ve lo chuan sîr lam a hawi tlat a," Engati nge ka nu hian min ngei êm êm a? Pi Chali bulah pawh min lo sawi hrep tawh bawk. A sawi angin chhûngkua kan nia; mahse, min en dàn chu i hre ve vek tho, nèl ka tum a, ka be lui hrâm hrâm țhìn. Harsa ka ti ve asin, ka rai a, hrehawm ka ti ve êm êm a," a ti leh a, lungchhia tih hriat tak hian a inhnît hraih bawk a.

Hnaih sauhin," Engtin maw? Ka nu chuan Pi Chali bulah i chanchin a lo sawi maw?!!" ka ti vat a, ani chuan," A, sawi sawi a ngai lo. Sawi lo ang, awmzia a nei dâwn chuang lo," a ti leh daih a; mahse, a ngawih deuh vang vang hnuah amah vêk chuan," Thil tam tak ka ngaihtuah chhuak a, engati nge mo leh a nu inkârah hian 'awm' hi a awm tlat zêl le? A mak ngawt mai," a rawn ti leh a.

"A, hmeichhia hi chu in mizia hi a ni ve a, in sual êm êm bîk vàng pawh a ni chuang lo, in nunah hian a bet tlat tawh a nih ka ring. Inhre thiam tawn viau tùr in nih tehrêng nèn hian, in inhre thiam mawh ngawt mai," ka ti ve a, a huat ka rin nèn, ani erawh chuan," Nia tiraw?" te chu a lo ti leh lawi a, a rilru hi hriat thiam a har ve țhìn. Mi sual tak chu a ni lo maw le, ka nu hi a khirh ve a, a fahrinte pawh a duh dàn ang diak diaka kan awm theih loh laia mi fahrin daih a duh anga awmtîr a tum hi chu a fuh lo, hre thiamin zilh vak kher lo se, s lo zilh a nih pawhin hmangaihna aw tak takin zilh se, a lo dawngsawngtu pawhin hre thiamin inhre thiam tawn se, a upa zâwk hian a naupang zâwk tlin lohna hi hai derin  hlim takin awm ho ila... 

"Ka nu âng hi chu mênah thlâk thiam la ka ti, a zilh che a nih pawhin lo dawnsawn dàn tâwk thiam la. I fel êm kha, ka sawi dàn chu i hre thiam tiraw? Inngeih takin chêng tlâng ila, miin eng eng emaw an hrilh che u pawhin min duhsak vànga min hrilh an nih lam aiin kan inkârah inrem lohna awm se an tih vàng a ni tlângpui, mi hi inrem lovin awm se pawi an ti miah lo. Chu chu hre reng rawh aw, rilru tak taka min duhsaktu hi an vâng teh a nia, mi bulah kan chhûngkaw chanchin emaw kan mimal chanchin emaw pawh sawi duh miah loh tùr," ka ti leh dap dap a.

Kan ngawih vang vang hnuah," U Zovi pawhin min lo rêl a, 'kawr ka duh zâwk ka thlang a ni mai a, a lo vui ngam a ni àwm a! Mo leh fanu dinhmun chu a inang thei lo hrim hrim, zak lo lutuk' te min lo ti. Nia, mo leh fanu chu kan inang lo tawp ang; mahse, min lo sawi duh kha mak ka ti ve deuh a, min en dàn pawh hi a dik tawh lo, min ngei hmêl thei sia, nuam pawh ka ti lo," a rawn ti leh a.

Manganthlâk hi ka va ti tak! Tuin nge maw chutiangte chu lo hrilh ni le? U Zovi hian Chhani chungchâng hi a sawi tak tak ang em? Lo sawi ni ta se, kawr thar chungchâng hria chu a ni ngei ang a, ngamtlâk taka an hrilh a ni ngei ang, tu tak ni ang maw? U Zovi leh Chhani hi a hrilh tawn ve ve niin a lang a, kan tân mi țha chu a ni lo tawp mai.

A lèn chhuah ve deuh apiang hian mi chanchin sawi tùr hi a rawn hre haw thei khawp a, mutnaah hian min hrilh sar sar ţhìn. Mak hi ka ti zâwk țhìn a, Pi Chali bawk chuan chûng thil chu a lo hrilh țhìn a nih ka ring, hmeichheho tak hi chu aw...!Hriat thiam hi an va har țhìn tak! Mi chanchin sawi tùr hi an hre thei nasa si!! Mi chanchin țha lai sawi duh si lo hian an chët chhiatna lai tak hi an sawi duh lehnghâl a, eng lai tak chu nge maw sawi nuam an tih êm êm chhan ni ang? An thil sawi lah hi a ho thei si. "A țawng paha a nuih dàn hi a lérh ka ti," tih angreng, " A mit men dàn rilh relh hi ka ngei chi," tih vëlte," Kal paha a mawng sâwi dàn hi a ti lui chiang," tih vël mai maite hi an khel reng peih a, an taimâkna lam hi a ho ve thei țhìn khawp chuan ka hria.

Hun a ral ve zêl a, kawr chungchãng kha chu sawi chhuah a awm leh tawh rih lo va, a tàwp hlen tawh dâwn a nih ka ring, làwm pawh ka lãwm viau mai. Eng emaw a awm hian a hrehawm țhin a, chhûngte hlim lo hmêl hi chu thuhran, nupui hlim lo hmêl hmuh hi a hrehawm ka ti ber, zan tin ka bula mu a ni si a.

*******

"Helaia mautuai bàwl ka dah kha khawnge maw a awm le?" tiin U Zovi chuan a fridge chu a hawng leh țhìn a, chhuar lam a va hawng leh țhìn bawk a, kei pawh chuan," Zîng lamah kha chuan ka hmuh reng kha maw le, chhùnah hian an ei zo a ni lo maw?" ka lo ti ve a. A zawn nasat êm avàng chuan ka zawnpui ve ngial a; mahse, kan hmu lo.

Piah deuha Chhani țhutthleng hru fai chu," I lo hmu mial lo maw, dear?" tiin ka zâwt a, ani chuan," Eng chu maw?" tiin min rawn en a, ka hrilh chuan," A rimchhe lutuk a, ka paih daih," awlsam zet hian a lo ti leh mai a, a hrûk chhunzawm leh nghâl daih bawk.

"Mautuai kha maw? A rimchhe hman em ni? A hîng hman lo ang, tukinah pawh kan ei reng kha," U Zovi'n a rawn tih chuan," A hìn leh hìn loh ka hre lo, a rimchhia tih chiah ka hria, chuan, ka paih daih," a ti liam leh puat a. U Zovi hmêl chu hmuh a nuam ta vak loh.

"Engati nge maw i lo paih le? Ka la ei duh asin, a tui tehlul nèn, ka ui êm mai," a ti nuah nuah a, Chhani chu a rawn ding ve ta phat mai.

"Vawkchaw țìnah ka paih a, i ui viau te chuan va chhar la ni mai alawm," a rawn ti ta a nih chu. Mak ti takin Chhani chu ka en deuh reng phawt a, U Zovi hmêl ka en leh a, thinrim hmël chu lang tho mah se a rilru a nâ tih a mitmengah ka va hmu thei.

"Vawkchaw țîna paih tawh hnu chu chhar duh tawh lo ve," a ti zàwi sap a, a insûm viau a ni tih ka hre thei. Chu chu hre ve lo ni àwm tak hian Chhani chuan," Chuti si, engah nge 'Ka paih' ka tih hnuah pawh i ui thu i la sawi cheu ni? Paih tawh na nâ nâ," a rawn ti leh a, U Zovi chuan," I râpthlâk e a!" a ti chang ta bàng mai. 

Ka rin loh lutukin Chhani chuan," In râpthlâk ve tho! Kan inang vek! I mautuai bàwl ka paih vàng maiin i thin a rim a, a rimchhiat tehlul nèn," a ti ta êrh a, U Zovi chu a chek tlak tlak a," I va han mak êm êm!!" a ti ta ringawt a. Ani lah chu a lo diau duh țhak lo," A mak lo zâwk pawh eng nge i nih bík?" a rawn ti leh âr âr a. Hetiang thil hi ka la hriat ngai loh, kan la tawn ngai loh a nih avàngin mak ti lutuk, eng mah tih nachãng hre lovin an pahnih chuan ka en dùn mãwl tawp ringawt!!

"I mizia tak tak a lang chhuak e!" U Zovi'n a tih leh chuan," In bulah hi chuan tu mah an awm rei peih lo ang e,' fanu' min ti reng chunga mo leh fanu thliar hrang tlat,induhsak nikhya chuan mo ni leh daih, kawr duhthlantîr nachãng pawh hre lo!" a ti leh hmarh hmarh a.

"I zak lo reuh mang e aw!" tiin U Zovi chuan a hmaiah a va bëng ta sawk a, a bianga a va bensak rî-ah chuan ka harh chhuak zawk mai; mahse, thil thleng tùr chu a lo thleng vek tawh a, siam țhat theih a ni lo.

"Kut min thlâk maw?!! Ka chhuak vang vang ang, ka nu leh pate pawhin kut min la thlâk ngai lo," țap țuau chung hian a ti a, room lamah pawh kal tawh chuang lovin a chhuak nghãl a, kawng a khãr ri țhuai zui a.

Ka ûm zui miah lo. Ka duh lo. Ka nupui chu ka farnuin kut a thlâk a, a lungawi lo chhuak a ni ve a, a duh chen chen chhuak rih phawt rawh se, phalsak phawt teh ang.

Ka nu leh pa lo haw chuan kan boruak chu an hre nghãl mai lo va, ka pain," In peih tawh tho chuan kan ei hma dâwn em ni ang? Chhani ko la," tiin min rawn melh a, U Zovi chu a ngawi reng a, a thinrim a la reh fel lo a nih ka ring. 

Kan boruak tawn ka hrilh chuan," E khai! A va zia lo ve! A chhuak tùr chu i chelh miah lo maw?" ka pa chuan a ti a, ka nu erawh chuan," Ani chelh a ngai hlei nem, a duh hunah rawn haw mai rawh se. Koh a ngai miah lo a nia, an inah inawm dam se, a thinrim a reh hunah a rawn haw mai ang," a lo ti thung a.

Ni e, Chhani kha ka chelh duh lo. A thinrim êm a, kutthlâktu zâwk ni lo mah se U Zovi kha țawngkamin kut a thlâk hmasa ka ti ve tlat. Dik tak chuan U Zovi khân a ben khân a bêng na lo zâwk ka lo tia; mahse, ni dangah an inchhâng tawn ngai hran si lo va, engtizia nge maw ni le? Chhani hian lungawi lohna sa emaw nâ eng emaw tak a nei em maw ni zâwk aw ka ti hial. Khatiang khân U Zovi a la chhãng ngai miah si lo.

Zàn thum a liam hnuah pawh Chhani chu kan la ko lo. A thinrim reh fel phawt se, naute pawh a pãi puar ve viau tawh nain a neih hun a la hla deuh a, an inah thlamuang rakin zu awm ve rih phawt rawh se kan ti a ni. Ka nu nèn koh rih loh kan duh laiin ka pain koh tawh a duh thu a sawi a, U Zovi erawh a ngawi reng thung, Chhani chanchin rêng rêng a sawi ngai tawh lo.

Țhianpa Fela a rawn lêng a, anniho hi chuan engkim an lo hre vek tawh a, hmeichheho erawh an la rawn lang lo.

"Engtikah nge Chhani chu koh in tum a?" tiin a thuphungin min zâwt a, kan la sawi loh thu ka hrilh chuan," A nih tak chu, a thu bulbãl kan hre rih si lo va, tu thiam loh nge tih pawh kan hre lo va, zilh ve ve erawh in ngai," a ti ta êrh a.

"A duh chen chen awm phawt se, a lunglèn hunah kan ko tawh mai a ni ang chu, hmeichheho hi chu thinrim deuhin an tlãn tàu a, lunglêng hmasa zâwkah țangin ,'min rawn ko tawh rawh,' an ti chhên mai a ni," ka tih chuan a nuih a lo za ngang mai, kan nui dùn hawk hawk a.

*NGAWIH CHUH ȚHÌN RAWH, NGAWIH HI INSAWI FIAH BUAI NUAI AIIN A ȚHA DAIH ZÂWK*