☆RINAWMIN☆ - 12 By Dingdi Pachuau

☆RINAWMIN☆ - 12 By Dingdi Pachuau

Kâr khat a ral a, mite pawhin an lo hre ve zêl lo thei lo va, min fiam zuk zuk ta mai. A nuam hran miah lo, za lo deuhin ka nui ka nui ringawt mai a ni. Ka pa chuan vawi hnih vawi thum lai koh a sawi ri tawh a, ka ngaihsak duh rih lo thung. Koh loh erawh ka tum lo, kârah fa a piang ve țëp tawh bawk; mahse, inngaihtuah harh ve se ka ti a ni, U Zonuni hi kei ngei pawh hian awka vînin ka be ngai lo tluk a nia, mi fel ber ni lo mah ila aia upa a nihnaah hian ka zah ve ţhìn. Ka nupui mah ni se Chhani kha ka thiam hauh lo va, a lo haw leh hunah chuan thil awmzia ka hrilh dap dap tawh ang. Kawng lehlam takah chuan ani pawh hi ka khawngaih ve tho, mo a ni a, mahni ina nuam ti taka a awm ang khân a chhûngkaw thar inah chuan a awm thei tawh bîk lo va, mitmei vèn tùr an lo awm bâkah tunah phei chuan a rai puar lian ve tawh bawk si a, hêng thil hi a tawn ngai loh thil a ni a, hrehawm a tiin a hlauthãwng ve ang a, țawng chhuah lamah a lantîr ve ta pawh a ni thei tlat.

Hna thawka ka chhuah lamah Tei ka tâwk hlauh mai a, biak loh theih loh a ni, a țhiannu chanchin kan sawi ngei ang tih pawh a hmêl ka hmuh veleh khân ka hre nghâl daih tawh a, a dik rêng bawk.

Amah zâwk chuan min be hmasain," Eng nge i thawh dâwn? I hmanhmawh viau em? Inbe lawk teh ang," a rawn ti nghâl a, hêl tum lam a lang thei lo. Ka hnial der ve deuh pawh chuan ka bânah a chelh tlat a," Thil sawi lawk a ngai, a rei lo ang," a ti leh tlat a.

Ka rin ang chiahin a țhiannu nèn kan chanchin chu min zâwt nghâl a, a țhiannu chu hre thiam hrâma be fel tùrin min ngèn leh bawk. Hna ka thawk dâwna chelh rei theih ka ni lo tih hriain a sawi zung zung a ni ber, an țhian zîngah tê ber mah ni se a rilru erawh a tê ber miah lo a nia.

"Chhani pawh ka hauh hrep kha. 'I aia upa chu i zah tùr a nia, i thiam lo hulhual a nih chu. A bëng hrep lo che a, i vànnei zâwk lutuk. I pasal u a nia, zah viau tùr i ni asin,' ka tia, ani pawh kha a inchhîr viau tawhin ka ring, kan hau luai luai alawm. A chhuah chhan chu eng pawh lo ni se, fa nei mai tawh tùr in nia, fahrah mai tùr chuan a lo pian chhuah i phal ka ring bîk lo va. A màwlnaah ngaidam hrâm la, inhruai hrâm ula tiraw?" tiin.

Nilêngin ka ngaihtuah a, a chhuah ațang khân ka la hmu miah lo va, an inah pawh ka lêng hek lo. Thinrim viauah pawh min lo ngai maithei a, chutiangin U Zovi pawh. Ka thinrim viau pawh ka hre hran lo, chutiangin U Zovi pawh. Ani pawh a inthiam lo viau a, insûm hrâm hrâm lova kut a thlâk kha nuam lo a tih thu a sawi nghe nghe a ni. 

Ka pain koh thuai a tih tlat avàngin kan inko leh ta a, a rawn haw zum ve viauin ka hria. U Zovi chuan a lo be êm êm lo nain ka pa nèn kan be sawm deuh a. Ka rin loh lutukin ka nu pawhin a lo làwm ve a," Fanu tlãn bo zawk pawh a lo haw ta alawm," tiin a ko fiam ve a, ka pa pawh chuti bawk. A zah an hlau ni ngei tùr a ni.

Kan chhûngte leh țhiante pawh rawn lêngin an rawn fiam bawrh bawrh a, a țhenin," Khawi maw, kan mo thar chu? E, a va puar lian tawh ve! In pûk lâwk chiang mai," an ti a, min ngam zual deuh phei chuan," Zanin chu lawițhat zàn a ni sia, in mu hma duh palh ang, haw thuai ang u," an ti a, min fiam reng mai. An fel ka tihna chu Chhani be peih lo hmël leh ngei hmël an pu lo chu a ni, mi dang zawng ai chuan ka nu ka fak ber.

*******

Kan kohhranin khawmpui kan dawng dawn a, keini nau kan nei tawh ang a, inkhâwm lam pawh a ngaihtuah theih loh ang. Chhani a han che țha thei lo ngei ang a, keiin ka chêtpui loh chuan hrehawm  a ti viau dâwn si a.

Ber thla țantìr tëah nau chu kan nei ta a, hmeichhia niin a vunah a nu a chhùn a, a ngo ser mai a, a hmêlah pawh kei ai chuan a nu a chhùn zâwk a ni chêk ang chu, lo en apiangin," A nu a va ang tak!" "A pa pawh a ang viau tho nain a nu a ang mah zâwk," an ti a, kei pawhin a nu chu a chhùn ka ti ve tho, ka hmangaihna erawh a kiam phah lo. Naute kut chu ka en țhin a, a tê reuh si a, a bân ni se a la vuai êm êm zui, a phar ve hiang hiang țhìn a. Nakinah he bân ngei hian ka nghâwngah a la kuah țai ang a, ka àwi mu ang a...  A nih loh pawhin a kutah hian kaiin ka la lènpui ve ngei àwm si a tihte ka ngaihtuah kai a.

Ka țhianteho an rawn bengvâr a, naute en nân tiin naute mamawh tùr tak tak hlîr min rawn pe a, kan țhianho zînga fa nei hmasa ber kan ni bawk a, min lawmpui thiam liam liam hlawm khawp a ni.

Vànneihthlâk takin kan naute chu a fel a,  ka nuin," Ani hian kan hlimna leh làwmna a ti sángin a ti zual a ni," tiin, a hmingah Làwmsângzuali a sa a; mahse, a hming tak pawhin kan ko phal lo," Bawihte," ti vekin kan ko. A nî phei chuan a duat khawp mai a, a nuin pawm phal lo mah se," Ho mai mai! Pawmtu tùr hlîr kan nih hi, kan naute neihchhun a nia, kut lum a hriat pawhin pawmtu tùr kan awm alawm," a ti tlat a, Chhani nèn pawh an inbakkaih phah lek lek țhìn.

Naute a leikãng deuh a, thla hnih hmêl kan hmu țan tihah khâwmpui hun chu a rawn inher chhuak ve ta a, naute leh a nu an fel tawh a, kei pawh ka inkhâwm ve thei dâwn e. U Zovi'n," Naute leh a nu ngaihtuah lovin inkhâwm rawh khai, zàn lamah pawh ka lo awmpui thei alawm," a ti thên a, khâwmpui țan zànah mikhual pahnih kan nei nghâl a; mahse, kan buai hran lo, anni hi kan bial chhûnga khaw hla ve deuh bera awm an ni a, motor kalna a harsat deuh avànga riak tùr an ni bawk. Mi dang khâwmpui palai riak lût tùr erawh an awm meuh lo ang, vêng hnai tê tê kan ni hlawm a, inkhâwm bàna haw lehnghâl mai kha a nei deuh tân chuan a awlsam ve deuh bawk nèn, mikhual riak tùr dang chu kan thlen belh tawhin ka ring lo.

Kan mikhualte chu an zakzum ve hlê mai a, nula ve ve an la ni zui a, an la upa lo viau tih erawh a hriat. A naupang zãwk nia lang chu a țawng ve mang lo, chawhlui kîl pawh chu a zak a, dawhkàn a lo lian lo bawk nèn, a inchâwi daih zêl. A u chuan," A tih ve dàn a nia, engah mah ngai s'u," a tih chuan ka nu chuan," A va ho mai mai tak! A ei puar lo ang tih a hlauhawm a, mikhual nih avàngin zah duh miah loh tùr a ni. Ei țeuh tùr aw, Tluangte, ei țeuh rawh aw," a tih zawm zat a,  Dãl hâng tui chu a hâwp ri zui khawlh a.

Khawmpui boruak a nuam a, khua a la vâwt lo bawk nèn, boruak a nuam hlê a ni. Pathianni zîngah kan inkhâwm vek a, thuhriltu thu sawi a ngaihnawm a, a țha êm êm bawk. Lâm hup hup lam chu ka en a, hlim hmêl taka an lãm dawrh dawrh ka hmuh phei chuan làm ve ka chãk zo vek; mahse, khâwmpui a țiak ang a, chumi hnuah chuan tûn ang boruak hi kan phâk tawh dâwn si lo ang a, ka lâm leh thei dâwn si lo. Miin min sawi sep sep ang a," Mikhual awm lai chauha lâm peih," min tih phei chuan... Bâkah," A nupui nèn pawh tlêm laiin an intih-tlàn kha," tiin min sawi sep sep ang a, a zahthlâk duh dâwn em mai.

Inkhâwm a rei lutuk lo a, inkhâwm bànah țhianho an rawn kal khâwm a, an infiam a, naute an rawn chhaih pah bawk a. Chhani chuan," In ninawm hèl hùl hlawm ngawt mai, a mut inti suakbãk vek ang," a lo ti khar khar a, Tei chuan," Lo suakbãk suh se, kan naute duat hi," a ti a, a bianga piai a châk țhìn a, a nuin a muhìl lai tihharh a phal lo țhìn nen, an invìn leh bawrh bawrh țhin.

"En teh u, Fela nuih dàn hi, hetiang hi alawm 'rin tlêm nuih' an tih țhìn chu," Tei chuan a ti làng láng a, kan lo nui hak hak hlawm.a. Fela chuan nui vùn chung hian," Rin tam nuih leh rin tlêm nuih pawh i hre hrang lo chu a nia, ka nuih dàn hi ngun deuhin en la. Chhinchhiah kar ang che, tuna ka nuih dàn hi 'rin tam nuih' dik tak a nih hi," a ti a, Tei âwih loh lutuk chuan a dàrah a bensak a," Nasa bawk siah! Hnial hneh theih pawh hi i ni lo," a ti a, ani lah chuan," Rin tlêm nuih i hriat duh chuan saw, țhianpa Dika nui ang saw a nia, a nihna dik tak pawh a ni," a rawn ti kher a, 

Kan mikhualte hi zakzum viau mah se an fel dùn a, hmun phiah leh thlèng sil an chuh nghâl chat a, an rawn thlen tûkah pawh chhuat an nâwt nghãl a ni. Kan mikhual ni tùr hliah hliah an lo nih hi, ka nu an àwl hneh a, Chhani leh U zovi lah chuti bawk, awm reng se, haw tawh lo se tih mai a awl.

Bawihtei han fel vezia hi chu aw!! Mikhual kan neih chhungin a țap bengchheng miah lo va, a nuin hnute a pêk har deuhin țah a tum țhìn a; mahse, thil dang ti laklawh lo tùrin ka hrilh a, a zàwm chuang hlei lo va.

Inkhâwmpui a țiak a, reh viau tùra ka ngaih laiin a reh lêm lo. Ka ute chhûng Champhai lam ațangin an rawn zin a, a takah naute an la hmu lo va, an rawn zin vang vang a ni. Kan upa ber leh ka nu hi chu  an zia a inang ka tih tawh kha, in a rawn luh veleh ațangin sawi tùr a rawn nei nghâl pang a, inhnialna eng emaw tak a rawn paipàwn haw loh hrâm ka beisei, an chàm rei lutuk loh pawh beisei tel bawk ila...

Vànneihthlâk takin an chàm chhûngin inkhikkhakna a thleng lo hlauh a, Chhani 'n a be ve siam siam bawk a, ani tãn lo biak duh loh thu a awm bawk si lo a ni ang, naute thil tùr pawh an leisak nghe nghe.

 

Chhani ka rûk hmaa innei Vlate nupa kha chuan nau an la keng miah lo. Keini'n kan kêu tawh a nia, kan vànneihzia hi. Vlate pawh doctor hnênah chuan an kal tawh a; mahse, doctor-te pawhin tih vak ngaihna an hre bík lo. An nupain an hrisêl țha a, ruihtheihthil an ti lo bawk si a, an tân chuan hriat thiam pawh a har ve ang.

"Zanin chu min hnial lo la aw, naute pawh a lian ve tawh bawk alawm," tia naute nu ka tlawn chuan ani chuan," Mi tlawn lah hi i thiam nasa mai si a," nui chungin a lo ti ve a, min hnial dâwn lo tih erawh ka hre nghâl. Dik tak chuan chaw bêl bulah ka țàmchhàwl lo chauh țhìn a, tunah chuan naute a neihna a inhliamna pawh a dam tawh tùrah ka ngai, thil pawi tùr kan khawih lo tùrah ngai ang.

*ROPUIA LANSARH KAN TUM HMASAKNA HMUNAH HIAN HNUH HNIAMIN KAN AWM FO ȚHÌN*