☆RINAWMIN☆ - 13 By Dingdi Pachuau

☆RINAWMIN☆ - 13 By Dingdi Pachuau

Hun a ral ve zêl a, kum 9 hial a vei hnuah pawh chuan Bawihtei chuan chhang a la nei lo va, a nu lahin han insawisèlna leh hrisèl lohna êm êm a nei chuang bawk si lo. A thla tin hunbi chhiar lah a fel fai tho bawk si a, Pathianin rem a la ti rih lo-ah kan ngai tawp mai. Rem a tih hunah zawng kan ri ve leh hlut ang chu, Bawihtei hi a lãwm ber berah a țang ngei ang, a chhan chu nau neih a châk ve țhìn a, a nu bulah nau neih a châk thu a sawi fo tlat a ni. In lama a kawm ve ber, kan țhenawm hnai ber Rda hian fanu pahnih a nei a, a u zâwk hi Bawihtei aiin thla 4-in a upa a, chu chuan chhang 2 lai a nei tawh bîk a, chu chu a awt ve êm êm țhìn a ni.

"Naktûk chu, kan hnatlâng ang chu tiraw?" tiin Fela chuan a kut a tuai nuap nuap a, a bulah Bawihtei'n a nautelem leh inkhualtelemna a chhawp hnawk nuai bawk a, school chawlh nia a tih dàn a ni ve a, hmun tihnawk viau țhìn mah se kan hau ngai lo.

"Rokhawlhna khawlh tak a awm a nih lohte chuan hnatlâng ang chu maw le," ka lo ti ve a, Chhani'n puan pho a seng a, keiin Alu kan vil pahin Anțam ka thian pah bawk. Ka nu dàwr lamah a awm a, ka pa erawh a dàn ngai têin a lêng a la rawn haw lo thung. U Zovi'n nikum hmasa khân pasal min neihsan ve tawh a, nula ber awm ta lo chu chhûngkhur chêt tùr a lo tam a, kan buai ta viau a ni, ina awm hi chuan buaina tùr tâwk hi chu a awm ve reng, ãwl takin a țhut dar dar theih bîk loh. Tihian, pa ber pawhin a țûl țûlah kan nu ka pui ve char char a nih ber hi.

"Ngaih dàn hrang a tam leh teh ang chu aw...!" Fela'n nui chunga a tih leh chuan," Umm... hnatlànnaah hi chuan mi hrang vek kan nihna hi a lang chhuak duh rêng asin, hmël pawh inang lo, rilru inang lo, ngaih dàn pawh inang chuang lo. Hrebera leh Hrevekite kha kan tam leh dâwn a," ka lo ti ve a, kan pahnih chuan kan nui dùn hawk hawk a.

Nupui ka neih hnu kha chuan Biak in lam kha ka hawi ta vak lo kha a nia, Bawihtei pian hnu ațang erawh kha chuan kohhran ka bèl chho a, nuam pawh ka ti viau. Ka nuin chhûngkaw  inkhâwm kan hman țuma a thu sawi 'Kristian nun dàn tùr' tih a sawi khân min hneh tlat a, zawi zawiin ka rilru siam chhovin ka inngaihtuah harh chho zêl a, inkhâwm zàn apiangin ka inkhâwm ta zêl a, biak in kan hlat lêm lo bawk nèn, tûn thlengin ka la inchhîr lo va, ka dam phawt chuan țhulh ka tum ngai lo. Ruah pawh sûr se ka țhulh ngai lo rêng a, Pathian zârah dam pawh ka dam thei viau.

A tûka kan hnatlâng chu sawi lâwk ang ngeiin ngaih dàn hrang hrang a ri leh ta luai luai a, Hrebera leh Hrekima an tam leh khawp mai. Fela lah chuan," A nuam ve alawm, ngaih dàn hrang hrang an sawi hian thil ţha a chhuak duh," a ti leh thên a, kei chuan," Ni tho mah se a hma ațanga an lo rèl fel vek tawh a nia, rèl tawh hnua sawisèl chu awmzia a awm lo êm mai, a hun tawh lo," ka lo ti ve thung.

Zàn mutnaah chuan," Ka period mumal lohzia hi aw..!! Tûn thlaah pawh vawi hnih ka nei leh tawh. Thla hmasa lah khân vawi hnih tho kha ka nei bawk a, tunah thla laihãwl chauh a la nia, țawngthu chhe lovah, ka vawi thum hialin a nia ka rin ni," a ti sep sep a, Bawihtei a muhìl tawh a, țawng kan dìm ve tawh a ni 

"A nih chu, a va mak àwm ve aw!! Mahse, hlauhawm lo tùrah ngai ila, nge i inentîr duh em? Thla hmasaah pawh chutiang i nih si chuan inentîr mai a țhain ka ring," kuah pah chuan ka ti a, ani erawh chuan," Thla hmasa hmasaleh khân ka period mumal lo viau thung kha a nia, kha vàng pawh kha a ni maithei a ni," a lo ti ve thung a. Hmeichhia hi chu an thla tin hunbî hi ka chhiarpui thiam ve vak lo, ka hriat thiam ve erawh chu an period dawn hian an mood a inthlâk danglam ve țhìn tih hi a ni deuh mai a, chu pawh chu U Zovi ațanga ka hriat a nia, Chhani erawh hi chu a ni ve pawhin ka hre lo, a pangngai reng ni maiin ka hria.

Kâr tàwpah inentîr tùrin a kal ta a, ka kalpui pek lo. Inhlawhna țha deuh ka hmu a, a laklawh lutuk a, hna hahthlâk tak a ni lo bawk si nèn, kalsan ka ui a, Chhani lahin amaha inentîr chu a lo hreh êm êm bawk si lo va, ka kalpui ta lo a ni.

Chawlh laiin phone la chhuakin ka bia a, a chanchin ka zawh chuan a țhat thu leh lo haw thuai a tum thu chu min rawn hrilh ve mai a; mahse, a aw zãngkhai lo deuh riaua ka hriat avàng chuan," I țha tak tak em?" ka ti leh a, a țhat thu a sawi leh hnuah chuan ka hriat sual a nih ka ring ta deuh a, kei hian ka hlauhthàwn deuh avàngin ka hmehbel mai mai a nih ka ring ta zâwk.

Zàn mutnaah chuan min kuahin ka áwmah a hmai a thukru a," Vawiina ka hlauhthàwnzia kha, min kalpui tùra ka ti ta lo che kha ka inchhîr lutuk a," a ti sap sap a, kei chuan," A nih chu maw le, i kal leh hunah ka kalpui tawh dâwn che nia, eng mah hlauhthàwn tùr a awm lo. Pathian zârah eng êm i ti dâwn lo, ka phal lo," ka lo ti a, ani chuan," Ka hmaa inentîr kha chhùl cancer a nih an ring a, min tihlauthãwng zo vek alawm," a ti leh a.

Doctor-in kal leh tùra a tih avàngin kâr tharah ka kalpui ve ta a, ka kut a vuan a, ka bulah a lungmuang a ni tih ka hria, hetiang hian ka muan a ni tih hre chiang ngat ila chuan a hma pawh khân ka kalpui ngei ang.

Mahse, hemi ni ațang hian mihring hian kan hma hun kan hriat lohzia hi ka ngaihtuah chhuak vawng vawng a ni. A chhùl lamah chiang lo a awm a, bâwk a lo awm niin, chu chu an zir chian hnuah cancer a lo ni!!  Ka nupui duh tak hi chhùl cancer a lo nih chu. Ka rin phâk loh leh ka lo ngaihtuah ngai loh thil a ni a, ka hriat tirh phei chuan ka bîng chûk chûk a, ka thaw a tàwp mai dâwnin ka hria! Ka rilru a tâwt a, awm dàn ka thiam lo, ka nupui chu a thi thuai dâwn ni-ah ka ngai nghet hmiah a, ka buai zo vek a ni.

Ka nu leh pate ka hrilh hmasa ber a, lungchhe êm êmin a ni ka hrilh ni, anni pawh a dêng dawt ve tho ang; mahse, puitling zâwk na nâ nâ chu, kei angin an awm ve lo, dam dapin ka pa chuan," Mi natna ni tùra kan dah hi kan natna a lo ni ve reng a, kan tawrh atâna kan duh loh kha mi dang pawhin an duh bîk miah lo va; mahse, khawvêlah kan la awm miau mai a, mite natna tawrh ang kha kan tuar ve a ngai țhìn a ni," a ti a, a ngawi zui vang vang a. Ka nu lo țawng vein," Lungngai mah ta che, Pathian a awm alawm, ani bâk hi innghahna kan nei lo, engkim ti thei a ni alawm," a ti a, kei erawh chuan zàwi deuh tak hian," Hrehawm ka ti êm mai, ka rilru a mangang a ni," ka lo ti ve thung a.

"E, Bawiha, intipachang ta che, i nupui hi a thi nghãl dâwn tihna pawh a ni êm hlei nêm. A hmuh lai phei chuan a rilru tihnual zâwngin awm miah suh, hlim hmêl i put a ngai nasa dâwn a nia. Kan theihtâwp kan chhuah ang a, a țha chhuak êm êm ang," ka nu chuan a lo ti vat a, ka pa pawh chuan," Engkim Pathian kutah hlàn ila, Ani'n a rël fel vek mai ang. Thil ngaihtuah vak vak lo la, i nupui enkawltu tùr i ni a, i chak țhat a ngai nasa dâwn a nia. I beidawng hmêl leh mangang hmël a hmuh chuan a țha dâwn miah lo tih pawh i hre reng dâwn nia," a lo ti ve leh a.

A rang lamin Aizawlah  kan phei a, cancer a ni tih kan hriat chian tawh avàngin Zemabawk lam kan chan tùr a ni. Ka tãn chuan hetih hun lai hi hun thim ber chu a va ni chiang tak êm!! Hrehawm ka ti thlâwt a ni, ni tin hian hlauthãwng rêng rêngin ka hun ka hmang a, Chhani zãwk hian min hnèm leh țhin. Nupuite hnèma thlamuantu tùr ka nih laiin damlo zâwk, natna nei zâwkin min han hnèm chu a nia, pasal lâk tlâk loh tak chu ka lo ni.

Mite lo felzia leh chhelzia ka hriat thar phah. Ka nupui ang thoa cancer tuar mêkte chu lungngaia kun ngawih ngawih tùra ka rin laiin an ni hauh lo! Min lo be tlãngnêltute an lo ni zâwk a, hmêl hlim sângin min lo bia a, engtin nge an rilru/ thinlung a hlim theih bîk aw ka ti hial. 

A chhul chu an paih daih a; mahse, hmun dangah a lo țai darh hman tho niin, ka rilru hrehawmzia chu sawiin a siak lo. Kohhran leh mimal țhahnemngaite'n min țawngțaipui reng a, Pathian hian a ngaithla duh lo a ni ngei ang. Kei pawhin ka thlen ziah a, ni tin vawi 5 hi chu ngei ngeiin ka țawngțai a ni; mahse, chhànna kan dawng chuang lo.

Bawihtei pawh ka ngai tawh khawp mai. Kan haw phei thei rih si lo va, phone-ah erawh kan inbia kan inbe thung a, a nu bula kal ve a châk thu a rawn sawi ziah bâwk. A School kalnaa an miss-te'n Pathian hnêna a nu tân damna an thlen thu min hrilh lai phei chuan ka insûm thei lo, ka mittui a tla nghâl zãwih a; mahse, tu mahin min hmu lo hlauh.