☆RINAWMIN☆ - 4 By Dingdi Pachuau

☆RINAWMIN☆ - 4 by Dingdi Pachuau

Kum danga YMA Day ang lo takin khua a țha teh tlat a, a âwihawm loh zâwk hial a ni. Chaw ei khamah mual lamah kan chhuak a, infiamna chi hrang hrang hmangin section tinte kan inel dâwn a, ka țang ngawt ang. Volleyball hi infiamna zînga nuam ka tih ber niin ka thiam ve a, tlangvâl sâng tak ni hran lo mah ila kan vêngah na nâ nâ hi chuan ka induhkhawp ve tho, huphurh ka nei bîk lo. Keima tâwkah ka zuang ve thei a, ka duhnaah ball ka vaw thei ve a, tâwk ka ti viau.

Kan khua hi thingtlâng khaw lian ve tak a ni a, țhalai kan tam a, kan vêng bîk Electric vêngah hian kan tam zual a, nawm pawh a nuam tham ve hlê a ni. Vêng thum kan awm a, keini Electric vêng. Vêngthlang a awm leh a, vêngthlang hi a tìrah chuan Chawnpui vêng tih a ni țhìn an ti; mahse, engtik lai ațangin nge Vêngthlang tih a lo nih tâk ka hre lo. Kan vêng piah tlângah Zotlâng a awm leh a, anni hi chu an awm darhsarh deuh a, hetia han en mai chuan kan vêng aiin in ding a tam hmèl zâwk na a; mahse, a tam lo zâwk.

Nilêngin infiamna hun kan hmang a, mipa chauh ni lovin hmeichhe lam pawh an infiam ve a, section tê têa inel kan ni bawk a, a nuam tâwkin țan a na ve hlê a ni. Chhani nèn section khatah kan awm dùn a, ka inkhelh laiin min lo ko a, kan section hmeichhe dang nèn an lo au nasa khawp mai. Min tiphûr a, a nuam ka ti. Ni dang zawng aiin ka khèl țha bawk nèn, inkhelh zawha Chhani bula ka țhut chuan," Ka lo țang lutuk a," hlim nui sâng hian a lo ti sar sar a, a biangah ka piaisak hlak, ka insûm hman lo. A biang a tài tãk sia, a inhmehin a lang sexy êm a ni, kan bulah mi awm lo phei se chuan a hmuiah tak  ka fâwp chiang ngawt ang! A bulah, amah se chêtin ka țhu a, ka bialnu hi ka intineitu hliah hliah, mipa tam zâwk hian min thîk tih ka hre chiang ve êm! Kan ngaihzâwng a ni tih hre vek se ka ti.

Zànah hall-ah hun kan hmang zui leh a, vêng chhûnga zai thiam hrang bâkah Mizoram huapa zai thiam lãr pahnih an zai tel ve bawk a. A nuam khawp mai, rùi tâwk chu lo awm ve tho mah se rùi nãwi an awm lo va, zai thiamte chawkphûr tâwk lekin an zài laiin an lo lãm dâwrh dâwrh zêl a, boruak an tinuam ve riau. Kei pawh a phûr tâwk lekin khulh ve na ila zawng ka lâm nasa khawp ang.

Haw lamah chuan țhiante'n chance min pe ve ngei a, thlah an ngaih loh thu an sawi tliar tliar, fel ka ti hlawm hlê mai, an ti țha hlawm ka tih ber țum a ni chiang alawm. An sawi ang takin hawpui tùr an lo nei ve hlawm tak tak a, mi haw sung sung kârah keini pahnih pawh inkài dùn rialin hmanhmawh vak lovin an in lam panin kan kal dùn a.

"Ka hàwnpui daih mai dâwn che em maw ni le," tiin ka han fiam a, a lo nui hak a. "I chhûngte'n mak an lo ti nasa àwm mang e!" a lo ti zui ve mai a, kei chuan," Ka chhûngte mak tih zãt zetin kei ka lãwm thung ang," ka lo ti vat a.

An in thlen hma kawng kãwi zau laiah ka muangchànpui ta rih a, kan hnunga kalte'n min rawn lehpèl a, " A nuam lo e, a ualau si, miin min hmu ang," tiin a țang deuh a, kei erawh chuan," A thim deuh a, min hmu pawh ni se tu kan nih an hre lo ang," ka ti ve thung. An ina ka luh ve leh chuan a tlai tawh mah mah ang a, eng mah ka tihpui thei dáwn lo, a chhûngte lo mu tawh pawh ni se.

Khua a chhe lo hlauh hi kan vànnei a ni. Ruah sûr bur bur ta se, tuna chance kan neih ang pawh hi kan nei dáwn hauh si lo. Kan hun neih tlêmchu  hre rànin ka kuah a, eng sawi lovin ka fâwp zui nghâl a, tukin lam ațanga ka chãk tawh kha a ni bawk a, ka duhãm khawp mai. Ani pawhin min lo chhâng zui ve zat a, ka duhna tizual tùr lah hian a uar thiamin a zei ve bawk si, nichin lawka a thil sawi kha a hrechang tawh lo a ni ngei ang, insiam remin ka nghâwngah a bân pahnih chuan min rawn kuah hnâp a, a áwmbâwrin min rawn chhoh nèk bawk nèn, ka thisen a va lum rang tak!

Kan inthlah meuh chuan kan thaw a rang dùn tawh khawp mai. Ka kut ni se an lo awm mai mai tawh lo va, an hùm tùr dik tak an lo hûm ràn tawh mai. "Duh tâwk ang, a ualau êm mai," thaw sâng sâng pah chuan a ti sep sep a, ka ban rêkah a rawn chelh bawk; mahse, a awm dàn chu ka hre thiam ve chiang a, ka thlah duh chuang lo. 

"Tu mahin min hmu lo ang ka tih kha," ti sapin a taksa lâwng chu ka han chûl a, a mám nãl hen mai. Deh nuam tak a ni, chùl a remchàn zâwk nân ti ni àwm taka inherin min hnungchhawn a, zei zet hian ka tukkhumah dawmin min fâwp pah a, duhthawh taka chhâng lêtin a áwmbâwr chu ka duh tâwkin ka chûl kual thei ta a. Hei hi alawm mipa duhthusàm hmeichhe chêt dàn tùr chu, ka ngampa sawt a, a taksa nãl han lah chuan min hîp ngawih ngawih, chùl kual chhuah vek ka châk.

Mahse, a tàwp kan thleng lo. Kawng sîra infawh leh inchùl kual vêlah kan tlâk ta mai. Kan taksa awm dàn chu ka hre chiang a, keimah ang thovin ani pawh hian a tàwp thlen a inpeih tih pawh ka hria; mahse, helai kawng sîra hmangaihna chenpui hi ka tum lo hrim hrim, nakinah hun remchâng leh hmun remchâng kan hmuh hunah hmangaihna chu ka la chenpui dâwn khawp. A zei reuh si a, min tihlàwm dàn a thiam dâwn lutuk. Ka haw dâwnah erawh uar tâwkin kan han induat leh rih a, a duhtâwk hunah ka la duh tâwk ve si lo va, ka hmui min la sehsak zui a, ka thlah ve ta chauh a ni.

*******

"Duata, ka hrilh nawn leh ang che. Chhani hi ka duhpui ve thei lo che a ni, nupui chu sawi loh i ngaihzâwng atân pawh hian dik tak chuan ka iai a ni. 'I fel ber a, kan chhûngkua hi min phû lo' ka tihna a ni lo, mi sawi dàn i hriain ka ring, dik tak chuan nu leh pa tam zâwk hian an fapa bialnu emaw nupui emaw atân an duh bîk lo ang, mi sawi kan hria, nula zei ve tâwk tak a ni a. Hetia in inkawp zêl chuan engtin nge i thlah theih tehlul ang? Thui tak in kal hma hian thlah thei la ka ti tak tak a ni," tûkțhuan ei laiin ka nuin a rawn ti chhuak leh a, engtin ka chhâng lo, chaw chu ka bâr mawlh mawlh a.

"Nia, duhthusàmah chuan kei pawh ka duhpui vak lo che," U Zovi'n a lo ti ve khauh a, ka pa erawh chu keimah ang thovin a ngawi ve reng mai. Mipa inrawlhna chi-ah a ngai lo deuh nge, engah vak a ngai lo zâwk ni, kei pawh ngawi ve reng rih ang.

"Tlêm lai deuh pawn sawi deuh hat a nih tawh kha, a fel lo ka ti lo, a fel lutuk; mahse, 'mahse' tih hi a awm țhìn, i tâna țha kan duhpui vàng che a ni tih hria la tiraw? Hmeichhia hi chu hmingchhiatna kan neih tawh chuan siam țhat hi a har tawh țhìn a, ser hi a awm rei țhìn a ni. Mi hian kan lo theihnghilh mai țhìn si lo va, nakinah i rilru natna a thlen zâwk ang che tih ka hlau a ni," ka nuin a tih leh chuan," Mi chanchin țha lo lai lah hi in hre thei mang e!" ka lo ti ve ta a.

"Mihring hi chuan mi chanchin țha lai aiin țha lo lam hi alawm kan hriat duh zâwk țhin," ka pa pawh chuan a lo ti ve chuar chuar a, ka nu erawh chuan," Sawi hat a awm tawh chuan thu dik a ni tlângpui, 'pân loah tho a fu lo' an tih kha, sawi a awm chuan awm a awm tihna a ni mai," a lo ti ve thung a, ka bialnu vàngin kan chhûngkaw rilru ka tibuai tih ka hria; mahse, chutin ka bànsan ngawt thei lo, ka duh êm asin, nizàna kan awm dànte kha ka ngaihtuah lêt a, ka la feel thei, tunah pawh hian ka ngai leh veng veng tawh.

Nizàn khân hun remchâng tak ka hmu fuh a, ka bawhpelh lo chiang khawp mai. A nuteite inah zanriah a ei a, a haw ka lo chãng a, in a thlen hmain hmun dangah ka pènpui ta zauh a. Kan inkawp ațanga a vawi khat nân kan mu dùn ta a nih kha, hmeichhia ka la mutpui tam lo nain ka duhthusàm ang zânin a zei, min tilãwm thiam tak zet, a thianghlim kha chu ka ring pha tawh bîk lo va, ka ring dik chiah bawk, kei pawh ka thianghlim tawh chuang lo va, engah vak ka ngai lo. Kan inmamawhna kan inphuhru tawn a, induh leh ãm takin hlimna kan insiamsak a, chu tluka hlu a awm hlei nem. Hun thâwl hek hawk hnuaiah mitmei vèn ngai lova awmpui leh ngei pawh ka tum ruh viau bawk. Ka nu leh U Zovi hi chu hmeichhia an nia, an duh duh an lo sawi ve ang chu, zawm erawh ka tum hran lo.

Ruah a sûr lo va, chhûm erawh a zîng deuh chuai a, Nu Hluite huan kan sãm pawh chu a lang nung hrú mai. Ni chu sa se chuan a uai chak àwm hlê si a tih ka ngaihtuah a, Vla nèn kan ni a, tlangvâl tha chak lai kan ni bawk a, kan sãm chak ve viau mai.

"Chhani nen in la inkawp tluang zêl maw?" tia min zawh chuan," Umm, tluang e, nangni?" tiin ka zâwt zui ve zat a. Ani chuan," Tluang a ni mai, tlêm hian a thîkthu a pe chhe ve țhin a, i hriat angin Mami nèn lah kan lo inkawp rei ve tawh a. Ințhen tawh mah ila inhmuh châng a awm lo thei lo va, biak in khatah kan lâwi tlâng bawk nèn, a thîk pawh hi a àwm tih châng ka nei tho, ka dem lo, a kum a la nau ve deuh bawk a," tiin min chhâng ve duah a. A țawng tam hran lo va; mahse, ka cousin-te zîngah chuan ka nêl ber a, ka pawh ber bawk.

"Engtikah nge in tih huk ang?" tia ka zawh leh chuan," Kan ti har tawh lo ang, Favàng chawhnu lamah palai tirh mai ka tum a, kumin Krismas hma ngeia neih ka duh si a, la nau deuh mah se a puitling reuh zêk tih ka hria a ni," a lo ti ve leh a. A bialnu Ruati nèn pawh hian an inkawp rei ve leh tawh a, kum hnih chuang zet a ni leh tawh, innei tawh teh se, an inhmeh dùn êm asin. 

"I chhûngte'n Chhani hi an duhpui lo che em?" Kan chawlh lai chuan a rawn ti chhuak hlawl a, ka melh zawk nain ka hawi sawn leh vat. Ka nuin a hrilh anga, min zilh tùrin a ti a ni ngei ngei ang, ka nu lah hi a.

"Duhpui lêm lo; mahse, kei berin ka duh a, ani pawhin min duh a, țhen ka tum lo," tiin tlang takin ka sawi nghâl a, ani pawh chuan," Chhani hi chu a chhe lo va, fel pawh hi a fel riau ka lo tia, eng emawah khân a hming kha a han hliau ve deuh mai kha a nia, i enkawl thiam chuan hmeichhia chu mi țha tak an ni thei a nia," a lo ti ve a.

Chawhnu lamah chuan eng eng emaw kan sawi a, hun kal tawha lama kan chêt chhiatnate kan sawi chhuak a, hmãn deuha Krismas laia a chêt chhiatna kha a rawn sawi chhuak a, kei lahin ka lo hre chiangin ka lo hmu chiang ve bawk nèn, mithlaa hmu lêtin kan thil tih tùr pawh ti hlei thei lo chuan kan nui dùn nghek nghek a. Kan nui nasa bawk a ni, kan mittui a tla pùr thei!

Haw kawngah chuan," Ka nuin Chhani chungchâng kha a rawn sawi em ni?" tiin ka zâwt a, ani chuan," Tukina a rawn pèn khân a sawi luam a, eng hè hù-ah vak ka lo ngai lo va," a lo ti ve mai a, chutah," Chhûngte duhpui vak loh kawp chu a nuam vak lo maithei; mahse, mipa i nia, thu tlûkna siam thei rual leh mahni tâna țha hre rual i nia, kha lamah kha chuan ka ngaihtuah lo che," a rawn ti leh dap dap a. Kei aiin kum 2 chauhin upa mah se a puitling bîk hi ka tia, zahawm ka ti țhin. Sawrkâr zêm zen a la ni zui a, a nupui tùr Ruati hi chu a vànnei ve ngawt mai.

Kan chhûngkua hi chhûngkaw khawsak harsa tak chu kan ni hran lo, sawrkâr zêm zen, kan upa berin hmun dangah min awmsan mah se hna kan thawk thei a, huan kan neih bâkah ka nu hian a hmingin eichawp dàwr a siam ve a, rin aiin a hlâwk ve phian a ni, rethei bakberhin kan awm lo. Kan dàwr hian kan ni tin ei khawp chu a thawk chhuak ve a, U Zovi leh kei hian a rem rem kan thawk a, a chângin dàwr ka nu a nghah chhâwk a, Pathian zárah mite awt ngawih ngawih chuan kan awm bîk lo.

Zànah ruah a sûr seng seng deuh nain ka inkhâwm a, a hnuah ka lêng chhuak zui leh bawk. Chhani chuan mei a lo zial leh a, a nauin room lamah lehkha a lo chhiar bawk, a nute erawh ka hmu lo. A inkhâwm loh chhan ka zawh chuan," Vawiin khân ka nutei ka pui kha duh aiin kan tlai sia, ka inbual hman si lo va, ka inkhâwm lo ta ringawt a ni," a lo ti ve a. 

A hmêl chu ka en țhìn, ka duh hliah hliah. A lu chu a la huh deuh a, sexy tâwk lekin a thlah kàwi deuh ngiai a, a hmuiah lipstick tlêm a hnawih tih ka hria, ka fâwp leh chãk tawh.

*ȚAWNGKAMA SAWI AI CHUAN KAN NUN HMANG NGEIA THIL KAN SAWI HIAN HNA A THAWK NASA ZÂWK*