☆RINAWMIN☆ - 5 By Dingdi Pachuau

☆RINAWMIN☆ - 5 By Dingdi Pachuau

Rei pawh ka țhut hmain a pa a rawn lût a, min rawn hmuh chuan," E, i lo lëng a ni maw? Khua a va nuam lo ve maw le," a rawn ti nghâl a, kei pawh chuan," Nia, a nuam lo khawp mai," ka lo ti ve a. Kan bulah rawh țhuin thingpui a in ve a, khawiah nge a kal tih pawh ka zâwt hran lêm lo. Ka bialnu pa a ni si a, țhian anga lo titipui ringawt chi a ni lo; mahse, amah zâwkin min bia a, vawiin lama ka thawhte min zâwt a, a thingpui in chhûng chu kan titiho a. A in zawhah erawh chuan pa fel tih dànin a tho a," I nu a rawn haw har àwm si a, ka'n lo mu lum daih teh ang. Dika, lêng reng rawh aw," a ti a, mu tùr chuan an room lam a pan zui ta nghâl a.

"Thlaleh khian ka cousin, Lungleia mi khân pasal a nei dâwn a," tiin a cousin Lalrami'n pasal a neih dâwn thu chu min hrilh barh barh a, a nu leh pate'n a bialpa chu an duh lo viau țhìn ni àwm a ni, mipa lamin palai pawh vawi hnih lai an tîr tawh a; mahse, a nu lung a awi thei hlawl si lo va. Chuvàng chuan an inrù ta a, a râi leh ta bawk sia, a nu leh pate remti fahran lo chungin pasal a nei dâwn ta a nih chu.

"A nih, nang tunah hian pasal neih i inhuam tawh em?" tiin a thuphungin ka zâwt chhin a, ani chuan," Kan hmu zo ve nâng," a lo ti thung a. Min chhàn dàn chu ka rin loh lam daih a nih avàng chuan ka thaw hawk a," I duh leh duh loh a niang chu, i hmu țeuh ang, tunah pawh..." ka ti a, sawi zo duh lo chuan ka ngawi ta daih a.

"A nih leh, nang nupui neih i duh tawh em?" a rawn ti ve ta thung a, rang fahran hian," Min duh phawt chuan," ka lo ti vat a, min rawn en a, ka lo en lët ve kar a. 

"Nupui nei tùr chuan i la naupang alawm, i tlangvâl chho țan ve chauh a, kum 20 i pèl chho ve țan dêk dêk a nia, nupui i neih daihte chuan i uiawm dâwn lutuk asin. Nupui pasal neih hma leh lutuk pawh hi a țha lo, nulât tlangvàl an kham lo duh asin," a rawn ti leh daih a, zanin zet chu ka chàn loh khànah zêl a ni min chhàn ni. Ka thin a rim ka tih chuan a rim chiahin ka hre lo va; mahse, eng emaw chu a awm. Chuvàng chuan," Chu, pasal neih i la duh lo a ni maw? Tunah hian neih duh che pawh ni ila min nei duh dãwn lo tihna a nia, i neih duh miah loh hi min lo kawp reng tihna a ni maw?" ka ti ve ta a, ka rilru a na lo ka tih chuan dâwt ka sawi chiang tihna a ni. Tunah hian kum 23 ka ni tawh, ka la upa vak lo tih chu ka hre ve alawm; mahse, ka kum ang ruala nupui nei hi ka hre ve țeuh, ka hriat pakhat phei chu kum 19 a nihin nupui a nei a, tûn thlengin an la innei nghe nghe. 

"Chutiangin ka sawi loh chu," a rawn ti a, kei erawh chuan," Ni e, pasal atân chuan  ka tlâk loh, kei chu eng mah ka ni lo, hna thawh ka nei lo va, kan chhûngkua ni se eng mah kan ni lo," ka lo ti hmak a. 

"Ka thu sawi a bawplawkah i la a ni, tuna i sawi anga ngaih theih tùrin eng thil mah ka sawi loh kha, i man thiam lo a ni," a ti leh a, thovin," Ni e, kei chu ka mãwl êm mai a, ka man thiam lo a ni ang e, i mut a chhuak tawh ang, mang țha le," ka ti a, ka chhuak zui ta nghâl a. Min ko zui miah lo maw le! Min lo duh vak lo tak tak a nih chiah hi, a zahthlâk ka tiin thinrimthlâk ka ti hlê bawk. Min lo duh miah lo hian ka rilru a tina takzet a ni. Zàn danga duat taka 'induat' țhìn kha zanin zet chu, a dik lo vêl vek.

Mutnaah ka thinrim chu ka insawh ka insawh a, ka rilru a na thar leh a ni. Kum chanve deuhthaw ka lo kawp tawh leh ka lo mutpui hial tawh hian pasal atân, neih atân chuan min lo duh miah lo tihna a lo ni si a, ka tlâwm ka ti dâwn nge ka chan a hniam ngawih ngawih ka ti a ni. Kei chuan mutpui mai mai tùr leh kawp mai mai tùrin ka ti lo, ka nute pawhin min hrilh zauh zauh tawh a, amah vàngin chhûngte zilh ka tâwk tawh a, engah mah ngai duh lovin ka la kawp char char a nia, amah ka duh avàngin ka chhûngte thu pawh ka zàwm thei lo hial a nia...

A tûkah inkhâwmnaah kan inhmu lo thei lo va, țhiante chuan min be ve ve nain keini pahnih chu kan inbe lo, min en duh miah lo bawk. Kei erawh chuan ka mitmei zauh zauh avàngin a awm dàn ka hre thei. Nuam a ti lo tih ka hre thei a, kei erawh chu ka dàn ngaitêin ka nui leh thei mai a, za tak tak si lova nuih hi zawng ka thiam ve alawm; mahse, a lem mah mahin ka ring. Kan inkawp a ni tih hretu kan țhiante tân pawh kan boruak chu hai chi rual a ni lo ang, hmeichhiate phei hi chuan an hre dáwn nasa, detective țha lutuk an ni bawk a.

Ka tih loh dàn deuhin zànah erawh ka inkhâwm lo va, tlaia țhiante'n in tùr an neih thu an sawi kha ka hre reng a, an awmna lamah ka kal ve daih a ni. Inkhâwm hi ngaipawimawh ve viau țhìn mah ila in lam hi chu ka ti ve zauh zauh tho a, ka rùi ngai hran lo va, ka chhûngte pawh hian an hre ngai lêm lovin ka ring.

Vengthlang lamah kan lêng thla a, Lalpuia pawh ka hmu hlawl mai, kan lènna inah a nia kan inhmuh ni. Min be hran lo va, ka be bîk lo. Fiamthu a thawh a, mi dang nèn chuan an nui tlâng ham ham a, ka țhiante pahnih pawh an nui ve, kei erawh chu ka nui ve thei lo. A fiamthu thawh dàn hi ka ngainat zâwng leh lawm zâwng a ni ve lo.

Zàn dâr 10 rîk dâwnah kan chhuak a, ruah a sii seng seng zui a, do rei chuan kan hnâwng ve chup ngei ang; mahse, tihngaihna dang awm tawh hek lo, kan haw duh miau sia.

A hmaa Fela nèn kan lèn țuma zu rùiin min lo koh buaina ngei maiah khân mi an lo awm leh a, min lo ko ding leh ngei bawk. Kan lo ti ve sek bawk nèn, thisen lum papin aw pawh a pàwr țha nghâl duh viau.

"Nangni hi a hma pawha min lo ko dingtute kha in ni chiang mai, in aw-ah ka hre thei!" ka ti ve khai khai a, ka aw chuan ngaihno a bei tehchiam lo.

"Min hlaua tlãnchhiate zînga mi kha maw i nih? Engtin nge i la rawn lèn ngam zâwk a? Khawih deuh hlek chu i lo ngai a nih hi, i tlãnchhe hman dâwn tawh lo," rui aw pàwr zet hian a rawn ti lùng lúng a. Chu pa awmna lam ka pan tùr chu ka țhiante pahnih chuan ka bânah min chelhin," An tam mah mah a ni," an ti sar sar a, kei erawh chu ka thil inin hna thawk țha bawk nèn, zãng huaiin ka inhria a, ka inthazoin ka cho êm êm vek a ni.

Kan insual chu a ni ta. Ka theih tâwka nâin ka tumpuite chu ka hnek chawrh zêk zel a, a remchâng apiangah ka hnek mawlh mawlh ti ila a dik ber ang. Kei pawhin an hnek vawi hnih chu ka dawng ve a, a la na reuh phian zui,naktûk lamah chuan a vûng maithei a ni.

Chau zetin țhiante kuahna azárah in ka thleng a, U Zovi a lo la meng a, ka lût hnâwng nasain ka bàl a, ka kamsîr leh hmui ni se a thî ve nian a, ka hmui phei chu a thîp vang vang. Min hnek fuhtu zungbun kha a hriam êm a ni.

"Insil la, ka nute hriat chhuah hmain intifai vat rawh," U Zovi chuan a ti sar sar a, ka peih lo takzet, ka room lamah ka chho hnuang hnuang a, ka hnungah U Zovi'n min rawn zui chho ve bawk.

"Tute nèn nge in insual a? I hmuite kha a nâ em? Mut tum ringawt lovin  insîl fai phawt ta che," awki tisâng ngam si lo hian a ti a, ka chungah a lungni vak lo tih ka hre thei.

"Ka peih tawh lo!" tih leh pheikhawk tlawh phelhin khuma lehthlâk ka rual nghâl zat a, ka jacket hâk erawh in hnuai lamah, kan luh tirh khân min hlihsak tawh a ni.

"A va buaithlâk țhin tak! Pawnchhe huhin ka hru dâwn che nia, mu rem deuh la," tiin U Zovi chu a chhuak a, kei erawh chuan ka ngaihven lo. Ka hmui, nâin a tur deuh at at chu tuai zauhin ka thin a rawn rim thar leh deuh a, hetia ka awm chhan hi mi pakhat vàng a ni, amahin mawh a phur ang. Tih tak êmah chuan ka lakah inchhuang thei a ni lo, a taksa pawh ka chèn tawh a, a chhûngril thlengin ka luhchhuak a nia.

U Zovi chuan min rawn hru ta ngei a; mahse, ka hre mumal lo. Ka muhil daih a, ka mumangah ni se kan lo insual leh a, ka sualpuipa chu ka lo la hneh lo êm êm zui a, Chhani'n min lo nuihsawh êm êm bawk, ka mumang mai mai mah ni se ka harh rual rualin ka thin a rim tûk mai a ni.

*******

"Chhani nèn hian in ințhen tihna em ni?" 

Ka ngawi vang vang a, chhàn mai dàn tùr ka hre lo. Ințhenna thu ka sawi chiah pawhin ka hre lo va, ani lahin a sawi hek lo. A thil sawiin ka thin a tihrim avàngin an ina ka lèn zàn khân ka chhuak ta daih kha a nia, khami zàn ațang khân ka lêng ta miah lo. Chawlhkâr hnih zet a liam tawh a, Chhani nèn pawh kan inhmu mumal tawh lo bawk.

"Nizàn khân Chhani'n a sawi ve keuh keuh a, i awm dàn a hriat thiam loh thute, i lèn ngai tawh loh thu leh hmuh pawh in inhmuh ngai tawh loh thute kha a sawi a," Fela chuan a ti leh chuar chuar a, a sawi hi a dik vek, thu dik tak a ni. Chhani chuan min hre thiam kher lo ang, kei pawh hi ka inhre thiam chiah lo, ka inngaihtuah ka inngaihtuah hnu hian. A thil sawi kha huathlala tak a lo ni rêng em tih leh lungawi lova chhuahsan nghâl hialna tham a tling takzet em tihte pawh ka ngaihtuah vek tawh.

"Lêng ngai tawh lo," tiin Fela chu ka chhâng a, chhàn loh aiah ka chhâng a ni ber ang chu. Chhani nèn kan inkâr min la zâwt miah lo va, hetia kan awm ațang hian. Zanin erawh a țül a ti ngang a ni ang e.

"Vêngthlang tlangvâlte nèn in insual thute kha a lo hre ve a, a rilru a nat thu a sawi ve keuh keuh a," a tih leh chuan," A rilru a lo nat ve daih chhan ka hre lo ve," ka lo ti ve thung a. Ani min khawngaih hi ka duh lo va, ka chanchin a lo hre ve erawh eng emaw ti takin nuam ka ti thung.

"I duh viau ni khân ka hria a," a tih leh chuan zêp tum buai lo chuan," Duh e," ka lo ti vat a, Fela hmêl erawh ka en duh lo, a lam ka hawi duh lo hrim hrim.

"Thil awmzia sawi fel a ngai a nih hi,  heti ringawt hi zawng a fuh ngai lo ve, i duh êm êm a, ani pawh khuan a duh ve viau che niin ka hria. Duh leh duh inkâr chu sawi fel thuai tùr," a ti leh chuar chuar a.

*VÀNNEIHNAAH INNGHAT TLUT SUH LA, VÀNNEI THEI TÙR ERAWH CHUAN THAWK NASA ANG CHE*