☆RINAWMIN☆ - 6 By Dingdi Pachuau

☆RINAWMIN☆ - 6 By Dingdi Pachuau

Ka lêng duh ta chuang lo. Rilru kalkhat deuh chi hi ka ni ve a, ka țanna lam hi a dik kher lo maithei a; mahse, ka țang laklawh ve tlat. Ka lèn duh miau loh avàngin Fela lah chuan," I duh reng tho bawk sia, engati nge hetia i awm tlat le? Luhlulah pawh hian a chintâwk hi a awm ve ngai a nia," mi ti chhên a; mahse, min sâwm chhuak thei chuang lo. "In ințhen hlauh chuan i màwl man i tuar dâwn tihna zuk ni a! Ka hnèm dâwn lo che a nia, i lunglêngin an ina lêng tùr pawhin min sâwm rêng rêng suh ang che," a ti leh a, a nuih sûng tho avàng chuan min fiam tih ka hria, ka nuih lêt ve tho. Ni e, fiamthu deuhin sawi mah se a sawi ang hian kan ințhen a nih chuan ka màwl man ka tuar ve mai a ni ang chu.

Vêngthlang lamah ka lêng nasa a, ka kawp țhinte'n zu in miau hek le, kei pawhin ka in ve ta zauh zauh a, ka inkhâwm erawh ka țhulh phah hran chuang lo. Inkhâwm zànahte chuan ka inkhâwm ve thlap zël a, kan bàn veleh vai vawih aia rangin ka chhuak a, ka lêng chhuak leh țhìn. Inah ka tawm cheuh cheuh peih lo, ina tawm ai chuan țhiante nèn nam deuh sak chunga nula rìm ka thlang zâwk.

Zàn khat chu ka rin loh lutuk tak maiin kan inkhâwm bâng chu bibo hman hauh loh hian amah zâwk chuan min rawn ko a, ka ding chat nghe nghe. Ka en duh lawk lo va, min rawn pan hnaiin," Kan awm dàn hi kan ințhen tihna a ni em? Chiang deuhin sawi ang, khawiah emaw sawi dùn ang," a rawn ti sap a. Ka hnungah a rawn ding a, kan bulah inkhâwm bâng haw lam an rawn kal ve nghâl avàng chuan han chhàn nghâl mai chi a ni rih lo.

Ka rilruah vêngthlang țhiante an rawn lang a, min lo nghâk leh reng tawh ang chu. Zanin phei chu kan nula rìm tùr awmna a hla deuh a, kal hma deuh kan sawi ve kha a nia, kei erawh inkhâwm phawt ka duh a. Mi fel tak ni lo mah ila inkhâwm hi chu ka țhulh vak bîk lo, ka damlo a nih ngawt loh chuan, ka fel vena ber pawh a ni.

"Hun dangah kan sawi thei ang em? Kalna tùr pawimawh deuh ka nei a," mi dang an kal kian deuh hnu chuan ka ti a, sual hi chu ka inti ve thlâwt. Ani chuan," Khawiah nge i kal dâwn? Sawi dùn phawt ila?" a ti leh a, țhian dang hmeichhiate'n gate bula an lo nghâk chu ka hmu reng, kan lam an rawn hawi deuh far nghe nghe.

"Hun remchângah dangah le, tunah chuan ka hmanhmawh tawh," ka ti leh a, ka sana chu ka thlêk pah zauh a. Kan inkhâwm rei hrep a,  Vêngthlang ka thlen meuh chuan a tlai ve riau tawh dâwn, tunah hian ka kal vat a ngai tawh a ni.

"A nih, kal rawh," a ti a, zawi muanga inherin a țhiante lam chu a pan a, ko lêt lo tùrin ka insûm hrâm hrâm a ni. Ka chapona ti thâm ral lo tùr chuan ka inhûm ruh a, mipa ka ni a, ka ko lêt lo ang. Aw, ka rilru, thîr lam chi chauh ngaihtuah rawh.

Zu ka in laiin duh lo teh mah ila Chhani ka ngaihtuah lo thei lo va, ruih hnáp ka duh avàngin ka in tam hle. Ka rùi khawp a, keimah phei chuan haw thei ziazâng ka ni lo hrim hrim, țhiante'n min paw haw a, duh lovin ka țang ve nasa hlê. A tûk  lamah zet zawng, tûkțhuan ei laiin chhûngte zilhna ka dawng nasa teh e, chaw ei tui lo rawk khawpin a nia min zilh rawn ni. Khati êm êma ruih kha ka tum bîk lo; mahse, Chhani ka ngaihtuah chhuah miau avàng khân ruih hnâp kha ka duh ta tlat a ni.

*******

Fùr a ral a, Favàng a rawn inher a, boruak a nuam țan leh ta.  Kohhran lamin salvation camping an buatsaih a; mahse, luh ka tum ve lëm lo. Ka nu chuan lût tùrin min duh tih ka hre reng; mahse, ka peih rih lo, hetia hun hman hi nuam ka la ti rih a ni ang.

Fela'n lût tùrin min sâwm a, țhian dangte  pawh an lût dâwn tih min hrilh tel kher a, za lo zetin ka nui ringawt. Anniho ka pàwl tam loh tâkzia leh an hmêl pawh ka hmuh khàt tâkzia ka ngaihtuah rauh rauh a, Fela hi chu ka hmuin kan inbe reng reng tho a, zàna lêng tùra min sàwmna erawh ka phatsan țhìn tih mai lohah chuan inkawm tâk loh pawh kan nei chuang lo.

Vla pawh Ruati lakah palai tîrin an insawi fel tawh a, a sawi ang takin November thlaah an innei dâwn ta a ni. Ka lawmpui khawp mai, ani hi zawng a rilru hi a puitlingin a dam thlup mai a, Ruati tân pasal țha tak a ni ngei bawkin ka ring.

Camp lût chu an tam phian a, ka țhalaipuite pawhin min rawn sâwm ve a, kohhran lama puipate pawhin min rawn sâwm bawk. An zahawm chu ka ti viau a; mahse, luh tumna ka nei chuang lo. Mamawh ber niin min ngai mah se kei zawng hetia nun hman hi ka lungawina a la ni rih e.

"Camp chu lût ve la, keini pawh kan lût dâwn asin, ka rawn sâwm nawn leh che," dàwra Alu ka bùk mawlh mawlh laiin Tei rawn lût chuan ka hnung rawn bêng thawk pah chuan a ti a, ka phu țêp a ni. A lian lêm lo na hian a kutthlâk hi a na reuh phian lawi a, inkut-elh pawh hi a thei zêkin ka ring a ni.

"E, lût rawh u, a nuam viau ang," ka ti a, ka nu chuan lo pui vatin," Tei, in lût dâwn maw? In va fel êm! Keini fapa hi zawng, a ngaihna a awm lo a ni. Han sâwm luai luai teh u, in sâwm hlawhtling mial thei a nia.  Nangni zawng in fel êm mai, luh in tum mai a, keini zawng tum chhinna pawh hi a awm hlawl lo," a lo ti nghâl bawrh bawrh a, ka lo îp deuh a, mi zînga hetia insawi bawrh bawrh chu a fuh chiah lo ka ti deuh a ni.

"A rinna a tlëm êm a nih hi," Tei chuan min rawn melh ralh pah chuan a ti a, za vak lo hian ka lo nui a.  "Kha, tuna i nuih dànte kha, rinna tlêm lutuk nuih a nih kha, a zahthlâk, i rinna a tlèm lutuk chuan malsàwmna i dawng thei lo palh hlauh ang e," a ti leh nghâl bawrh bawrh a. 

Aw ....kan Tei țhìn hi chu, mi dang mi hrang deuhte chu awm se chuan ka zak viau ta ve ang, ka nu nèn chauh kan awm lai tak a ni hlauh a, tlêmin a zia deuh; mahse, zia ka ti rei vak lo, ka nu chuan a lo tuipui nasa a, an pahniha țang dùnin min nawr ka ti mai, a hnuah chuan ka hmanhmawh thu chhuanlamin Alu kg 1 chu ka khai a, ka chhuak ta daih a.

"Min lo nghâk lawk teh!" tia Tei'n min rawn auh zui chuan ka ding a, ka hawi lêt chuang lo. Ka bul a rawn thlen chuan," Hmuh theih leh biak theiha awm chu i duh lo hlê mai maw? Eng nge in ințhen chhan dik tak hi ni rêng rêng a? Țhiani lah chuan a chhan a sawi fak thei si lo," a rawn ti leh zat zat a, kei chuan," Nia, chhan tehchiam a awm lo, in țhiannu hian min lo duh tak tak lo tih ka hria a ni mai e," ka ti ve ta a.

"Inhmu dùn teh u, rei deuh tawh mah se Țhiani khawngaihthlâkzia ka hmuh ațang hian eng emaw tak in tih dun a ngai. A hlim hmêl hmuh tùr a vâng si, in inkawp hma khân hetiang hian a awm ngai miah si lo. A thuhrimah nangmahin i try hmasa tê tê a, in induh tawn êm êm a, thil sawi chiang lovin i bànsàn leh ringawt a," a tih leh chuan," Min dem hlãwm vek bîk suh," ka lo ti thung a.

"Khawngaihin, sawi fiah fel dùn ang che u. Zaninah hun nei dùn r'u aw, khawngaihin. Zanin chauh a ni mai, biak in thlang kawngah khân dâr 7:30 -ah lo awm la, Țhiani pawh a rawn kal ve ang."

Lèn chhuah ka tum loh zàn a ni hlauh a, phûr zar lo mah ila ka kal ve poh a ni ang chu. A thuhrimah ka ba ve hrim hrim, hun remchânga inbiak kha Chhani bul ngeiah pawh ka sawi ve ngei tawh kha, ka hmuh chu a țha ang.

*******

Kawnga a rawn kal phei chu ka lo thlîr reng a, chiang takin hmu thei lo mah ila a vun chùl nawmzia ka hre chhuak thar leh a, a pianhmang fel ràn leh sexy ru tlat pawh chu ka hre chiang thar leh bawk. A pian leh a hmêl hi chuan min hîp chiang alawm, mipa ka nihzia ka chiang thar ngang mai.

Hmun fâl țha a duh miau avàngin Primary school lam panin kan kal a, thla a êng nuam a, a zia khawp mai. Favàng thla êng zet hi zawng a ëng nuam bïk țhìn a, rilruah pawh engtin emaw tak hna a rawn thawk bîk țhìnin ka hria.

Naupang tawlhpahrît-ah kan țhu a, mipa mah ni ila bul țan dàn ka hre lo khawp. Lungawi lo zâwk kha ka nia, țawng chhuah hmasak ka tum lêm lo, zanin ni se ka ruahmanna pawh a ni hek lo.

"Dika, kan ințhen tak tak em? Break lailâwk kan nei chauh a ni tiraw?" a rawn tih chuan nula zakzum tak ni lo mah se chu thu sawi tùr chuan a zah theih lohna a rawn sâwm khâwm ve nual a ni tih ka hre mai.

"Break lailâwk kan nei tih pawh ka lo hre lo," ka ti ve thung a, ani chuan thaw hak pah hian," A nih, kan ințhen tak tak tihna em ni? Min duh tawh lo tihna maw?" a ti ta sak sak a. A aw chu thunun tum viau mah se a pângngai lo tih a hriat viau bawk; mahse, min bum a tumna pawh a ni ve thei tho.

"Nangmahin min duh tak tak lo a nih kha, min duh tak tak lotu chu inthiarfihlìmsan ka tum mai chauh a ni," ka ti ve ta a, rang zet hian," Engtik laiin nge ka duh tak tak lo che tih ka sawi?" țah aw țiau hian a rawn ti vat a.

*KAN PAWN LAM LAN DÀN AIIN KAN CHHÛNG LAM NUN DÀN HIAN MITE-AH THU A SAWI RING ZÁWK*