☆RINAWMIN☆ - 7 By Dingdi Pachuau

☆RINAWMIN☆ - 7 By Dingdi Pachuau

Khami zàn khân thil tam tak kan sawi lo va; mahse, ka phû lohin min lo duh ve viau zâwk a ni tih ka hria a, ka lãwm thar hle a ni.  A mittui kha a ti der mai mai lo va, a theih tâwkin kan inkâr a țhat leh nân țan a la a ni zâwk. Dik tak chuan ka rilru a têt vàng a ni zâwk mah a, ani kha kei anga rilru tê ni ve ta se chuan kan ințhen chiang ngawt ta ve ang, hmangaiha duat hliau hliau tùr ka ni zâwk, ka duh ëm avànga buai nasa zâwk ka nihziate kha...

A țhianteho chuan kan inkâr a țha leh ta tih an hriat hnu chuan min hau luai luai a, min ngam ve bawk a, ka haw lëm lo, an sawi dik thawkhat bawk si a, haw ngam tùr ni pawhin ka inhre lo.

"I rilru kha kalkhat viau tawh suh se, eng emaw hleka rilru ang ang kalpui ngut mai, buai hleka zu in tum nghâl bawk, ruih tawh chuan insualpui tùr zawng ruai bawk si. I che bon lo ve e, i bialnu rilru tùrte ngaihtuah ve la, nangmah chauh inngaihtuah lovin," tiin min zilh hrep hlawm a. Mahni tâwka inti-pà ve tak mah ni ila an thil sawi a dik ëm avàng chuan ka ngawi reng, chhàn lêt ka tum lo.

"Duh tâwk tawh teh u," Chhani'n a lo tih chuan ka lo thaw huai mai. Mahse, an zînga tê ber Tei chuan," Duh tâwk rih lo ang, a nuam ve rih alawm," a lo ti tlat a, puithû fé hian," Tûn hi a țanna a nih rualin a tàwpna ni bawk se. Dika, Chhani hi i țahtîr leh chuan e, kan vai hian kan kick rawn tawh ang che, kan khawngaih teh mai a nia," tiin Chhani chu a en a, min rawn en ve leh a, "Hlim takin awm dùn ula tih hi keini chuan kan duh ber, ințhêțhù tawh miah lo ang che u. Han inhnial chãng chu a awm lo thei lo, rilru na taka insiamte hi thil țha a ni lo a nia, tih miah loh tùr," a ti leh dap dap a, ngun takin ka lo ngaithla a, a sawi țha ka ti khawo mai, Tei hi a taksa têt anga en chi a lo ni miah lo mai, a thil sawi dàn a puitling tlat. A duh hunah chuan a lo puitling nasa a lo nih hi.

Camp kha chu ka lût lo tluan ta kha a nia; mahse, pawi ka ti hran lo. Ka buaina ber Chhani nèn kan hlim dùn leh tawh bawk a, vêngthlang lama lèn pawh ka tum tawh lo. Mut hmunah ka chêt dàn leh awm dàn kha ka ngaihtuah lêt reuh reuh țhìn a, zahthlâk ka ti, vêngthlang lama kal pawh a huphurhawm tawh ang, ka kawpho kha ka han hmu leh ang a, a zahthlâk dâwn êm asin.

Chhani'n," Kan buai deuh lai khân vêngthlangah kawp deuh i zu nei hman lo maw?" tia fiamthu ti tak deuha min zawh chuan," Nei e," ka lo ti mai a, ka nui duh miah lo bawk. Ka chhàn ran deuh vàng nge ni, min rawn enin a ngaihna a hriat loh hmèl khawp mai a; mahse, ka insûm thei ta lo. Ka nui hawk a, nuihzat hmèl vak lo hian," I nei... maw?" a ti ban deuh chat a, kei chuan," Nei nâng, ka fiamthu a nih kha, vëngthlanga nula rîma ka lèn lai pawh khân ka hre reng zêl che alawm, kha vàng tak khân a nia zu ka in tam țhin ni," tiin dik takin ka chhâng ve ta a.

"Mahse, lo star-tu che an awm tiraw? I luck teh e," a tih leh chuan ka en reng ringawt, thil a lo hre vek chu mak ka ti, engtin nge maw a lo hriat zâwk ni? Min lo chhui ru reng em ni ang? Aw.... ni dâwn tak, hmeichheho hi chu detective țha tak vek alawm an nih a!!

"Ka star ve chuang lo va, a pawi lo tiraw?" 

"Pawi ti pawh ni mah ila awmzia a awm tam dâwn lo êm mai," tiin a nui a, a nui hmël mawi tak hi engtin nge maw ka lo hmuh hmaih theih ni? A mawi tehlul nèn, ka lo hai dersan vêl a nia, ka lo mãwl hle a ni.

"Pawi ti miah suh, i fel kha. Ka thinlungah nangmah bâk a awm chuang lo va, ka tã i ni bawk a, chu chu a tâwk chiah a ni," tiin a biang chu ka chùlsak zauh a, a nui sêih a; mahse, piah lawka a nu a țhut ve reng avàng chuan thil dang ka ti ngam tawh lo.

"Ka nu i hlau," a rawn ti sar sar a, a nui pah bawk. Kei pawh chuan," Hlau ve tho e, tunah rih chuan," ka lo ti ve mai bawk a, ka thil sawi vàng chu a nih ka ring, a nui kar kar a. Han tih vak dàn ka hre si lo," Ka ru haw daih dâwn che," ka ti ve ta ngawt a, a rawn meng phâwk nasa mai!!

*******

Vlate inneih nî chu a nuam kher mai. Chhani nèn kan inzui a, buai lo pâwlah kan țang bawk a, kan nalh nilëng ti ila ka sawi sual lo ang. Thla pawh kan la dùn ve ngei a, a kâwngah ka kuah ngei bawk.

"Beer in mai mai tùr awm se," ka ti zauh pek a, ani chuan, "Lu sûk nâna mi min pêk ka nei asin," a lo ti ve vat bawk a, ka en hau mai.

"Nge... ka lei a ni lo aw, leina tùr pawisa pawh ka nei lo hrim hrim, mi min pêk tak tak alawm," a ti leh a, "Chuti, kan zu ti zuai dâwn em ni ang?" ka tih chuan a lo yes ve mai a.

Inah tu mah an lo awm lo remchâng bawk a, kan luh veleh ka kuah a, kan inkeih nghãl tàwn táwn mai.  Hun thâwl leh remchâng tak hi kan nei khât a, tûn hun tluka hlû hi a awm lo ang.

Beer ka hrechang tawh lo, ani pawh hian a hre kher lo ang. Kan infâwp mawlh mawlh a, inmamawhna leh inthlâkhlelhna a sâng ve bawk nèn, rilruin thil dang a ngaihtuah thei lo. A thuamhnaw ka phelhsak lai chuan," An lo haw palh hlauh ang e," a ti ve țâwk țâwk a; mahse, chu chuan awmzia a nei tampui lo khawp mai. 'Vawi khatin vawi hnih a hring' an tih hi chu a lo dik ngawt mai; mahse, kan thil tihah hian inthiam lohna êm êm pawh ka nei hran lo, kan inmamawh tawn a, kan induh tawn vàngah ka ngai mai.

Krismas dam tlâng tak leh hlim takin kan hmang a, țhalai ta na nâ nâ chu, zaikhâwm reng kan peih lo va, kan interek hrang ve a, hun ãwl leh remchâng kan hmu thei bawk a, kan inmamawhna leh inthlâkhlelhna  a pung nasa bawk nen, Primary school bathlàr kan chhawr țangkai viau mai. Kan awmna țhin lai tak hi a fianrial ve reuh a, bâkah, a biru ve bawk a, thlî a ûp țha viau bawk.

Indanna hmang ngai ta lo chu, February thla chawhnu lamah Chhani chuan a inrinhlelh thu min hrilh ta a, a nu leh pa mut hnuah min hrilh ve keuh keuh a ni. Ka lo ngaihtuah thleng ngai miah si lo va, ka lo va mãwl tak êm! Amah têin rilru nuam lo takin a lo awn reng tihna a ni si a, hrehawm a ti dâwn ëm asin.

"I rai i ring tihna?" ka tih chuan," A ni ngei ang, test kit ka lei ngam dèr si lo; mahse, ka rai a nih ngei chu ka ring bur, ka awm dàn ațang hian," a lo ti vat a. 

"Engtin nge ni ang? Palai ka lo tîr dâwn nge inrûk i duh zâwk? I duh thlang la?" ka ti ve ringawt, amah chauha zahna pal tlangtîr ka duh lo, miin ' A rai a, chuti khati..' tia an sawi khum ka duh lo, kan pahnih thil tih rah a nia, ka tuar tel ngei tùr a ni.

Palai tirh leh rih ai chuan inrûk a duh thu min hrilh chuan ka hlim kher mai, engtin nge ka chàwm ang tih lam ka ngaihtuahnaah a awm lo. Kan inru ang a, kan tlãnchhia ang. A nawmna tùr lam chauh ka ngaihtuah avàng chuan ka phûr viau ringawt.

Kan remruatna anga kan chêt zànah chuan Fela'n a bike a rawn khalh chhuak a, a hmain kan thuamhnaw țhenkhat kan la chhuak hlek hlek tawh bawk a, Mamawiite inah kan lêng phawt a, kan bag nèn. Fela'n Lunglei thleng min thlah thla a, naktük lamah Aizawlah kan phei ang.

"Che nasa lutuk lo ula," tia a haw dáwna Fela min fiamna chuan ka nuih a tiza khawp mai a, Chhani ka va en chuan a lo nui ve tho nain a zak deuh tih ka hre thei. Kei erawh ka zak lêm lo, kan inru a, inrûk zànah te chuan che na ve bawk ang chu maw le.

*KAN HRINGNUNA HARSATNA LEH BUAINA HIAN CHHÛNGRILA KAN CHAKNA THURÛK INTHUP MIN HAI CHHUAHSAK ȚHÌN*