☆RINAWMIN☆ - 8 By Dingdi Pachuau

☆RINAWMIN☆ - 8 By Dingdi Pachuau

Tuna kan tlànna, kan riahna tùr hi Nu Tlanite in a ni a,  ka hrilh lâwk miah lo va, kan zu thleng rãwih mai kha a nia. Mak min lo ti deuh nain min lo hre thiam viau a, Aizawl lama phei kan tum pawh chu rem a ti vak lo.

"Hetah awm mai rawh u, an rawn zawng kher lo maithei che u a, an rawn zawng ta che u a nih pawhin bihrúkna tùr chu a awm zël mai ang," a ti deuh tlat a, ka rilrem tak a ni nain Chhani'n hrehawm a tih ka hlau deuh sia, 'aw' ka pawh ngam rih lo. Ka rin ang ngeiin mut hmuna kan sawi dun chuan a pa a hlauh ber thu min hrilh ta a, kan tum anga a hla thei ang ber tlàn dun chu a duh ber a ni tih a sawi bawk. Ni e, a duhna hmunah ngei chuan kan tlãn ang, a rilru himna a pawimawh a ni.

Nu Tlanite sitting room-a kan mut miau avàngin inrûk zàn pawh a hot viau thei lo, bâkah, rilru a muang zân lo deuh a. Kan inkuah a, khua a la vâwt ve bawk nèn, kan in-rizai a ni mai. A tûk zîngah sumo kan chãng risk ve tawp a, kan vànnei viau zêl rih e.

Aizâwla kan tlànnate hi U Duatate an ni a, kan khuaa mite an ni tho nain Aizawla pêm tawh ti mai ang, an fate phei chu la tê ve tak tak an ni a, kan va thleng ve rãwih a, an lo la fel êm êm zui, kan chanchin kan sawi chuan min lo hre thiam khawp mai a; mahse, an in chu a chêp ve reuh êm a ni, inthlahrun a na duh khawp mai. An fa upa ber room-ah min awmtîr a, kan inthlahrung viau nain tih vak ngaihna awm hek lo le, kan indah lût ve a. Room lah chu a han chêp reuh khawp a, khum erawh a zau ve deuh, bang leh khum inkâra kalna a zîm lutuk a, mu tùr pawhin pakhat a kal hmasak phawt a ngai, inzeh phei deuh têt têt a ngai a nih ber chu.

Thlâ a muang deuh tawh a, zàn pawh kan mu tui ve thei ta e. Nizàn lam kha chuan kei ngei pawhin hlauhthàwnna kha ka nei ru a, Chhani chhûngte'n thinrim zetin min rawn kai tho ang a, zahthlâk takin Chhani kha min chhuhsak ang tih kha ngaihtuahnaah a awm ve tlat a, Chhani lahin a hlauthãwng nasa bawk si, mut tui kha a har ve a ni.

Kan inrûk dâwn zàn khân U Zovi bulah khân kan thil tum kha ka hrilh zuai zuai kha a nia; palai, ngaihdam dîl tùr pawh an kal tawh ngei ang chu. Chhani chhûngte an thin a rim viau ang em aw? Ka chhûngte pawh hian eng angin nge min ngaih ang? Ka nu chuan min hre thiam vak lo maithei a; mahse, U Zovi kha chuan min hre thiam deuh chuan ka hria, ka pa erawh a țawng tam hran lo va, a sawi ve vak lo ang a, a duh dàn tak a nih erawh ka ring bîk lo.

Kâr khat kan awm hnu chuan in neitute phone hmangin ka chhûngte ka be ve a, U Zovi'n min lo chhâng hlauh mai. Chanchin ka han zâwt a, Chhani pa a thinrim viau tih a sawi lai chuan Chhani chuan min lo hmer vak a, mitmeiin ka han hnèm a. U Zovi chuan," Thinrim mah se, eng a ti thei chuang lo va, lo hlauthãwng viau duh suh u. In awmna pawh an hre chuang lo, palai an kal nawn leh tawh a, chanchin chu ka rawn hrilh leh dâwn che u nia," a rawn ti leh a, thu làwmawm tak chu ni lo mah se chanchin kan hre tawh a, a zia tho e ti mai ang.

Ina awm bâk tih tùr vak awm hek lo le, nilêngin inah kan awm a, rawng kan bâwl a, chhuat kan nâwt a, kan insu a, ina ka chêt ngai lohna zawng zawng dah țhain pasal țha ber chêtin ka che sûrh sûrh mai. Nakin lawkah Pathian zâra dam chuan kan fa a lo piang dâwn a, mi țha ber ni lo mah ila kan fa lo piang tur tân erawh pa țha ber nih ka tum ve tlat. Ka theihna chinah Chhani pawh ka àwl ve a, a rem ti lo viau nain a pum chhûngah kan inhmangaihna rah a țiak mêk a ni a, a puitling lo palh hlauh ang tih ka hlau a ni; mahse, zàn lamah erawh ka dìm lutuk bîk lo.

Kâr hnih kan awm tling țêp tihah kan haw phei leh ta a, ka pain," Mi ina awm reng zawng fel viau mah se a inthlahrunawm, lo haw phei ula, a pa pawh a sârhù lai ang chu a ni tawh lo a nia. Chhani pawh a rilru kha a lo hrehawm lutuk palh ang e, a pa remtih hma zawng kan inah a awm dâwn nia. Eng pawh ni se, rawn haw phei phawt mai teh u," a rawn tih vànga haw phei ta kan ni. 

Kan thlen zànah țhiante an rawn lang țak țak a, eng sawi vak lo chuan kan innuih leh suk suk țhìn. Ka room lamah awmin khumah hmeichheho an țhu khâwm a, Fela nèn erawh tukverh bulah kan țhu dùn thung. Tei lehpek chuan," En teh u, Lalchhani rai ngeihzia hi, a rawn haw no sûrhin ka hria. Nge, Aizawl i va ngeih viau zâwk ni?" a ti làr lár a.

"I ninawm! Ngeihna hun pawh a la awm hman lo, a rei lo lutuk!" Chhani chuan a ti lêt vat a, Mamawii chuan," I ngeih thei tho alawm, nge in pa hian a chãwm țha viau zâwk che ni?" a lo ti ve leh a, nuih za tak, nui ring ngam si lo chuan an nui dîr tlak tlak hlawm a, Chhani chuan," In ninawm mang e!" a ti ringawt a, nui duh lovin a tûm lui deuh a, a zak ve deuh a ni tih ka hre thei mai.

A pa thinrim chhûng chu kan inah chuan a awm ve ta zêl a, ka duh dàn takah chuan a pa chu thinrim zél se, thinrim tàwp thei lo se ka ti. Zan tin ka bulah a mu thei a, kan fa lo țhang lian ve zêl bulah hun ka hmang thei bawk a, hei lo liama damlai pialràl ka ti mai, ka bulah awm reng tawh se ka ti a ni.

Ka bula hun a hman ațang hian ka hmangaih tih ka hre chiang tawh a, ka khawngaih a, ka thlahlel telh telh mai. Ka nu tûm leh deuh țhìn hmêl a hmuh chãnga a inthlahrunzia pawh ka hmuh hmaih lo, a tih theih apiang a ti zung zung a. A che ve reng sia, nau a pai bawk si nèn, a hah viau ka hlauh țhin avàngin ka theihnaah ka pui vat țhin. Chhùn lama a chêt ve nasat țhin avàng hian zàn lamah hi chuan ka khawngaih ve țhìn viau a, hahdam taka muttîr ka duh ve viau țhìn nain ka taksa si chêta mu reng ta chu kei mipa hi ka insûm zo lo leh țhìn a, chutiang hunah pawh chuan phûr takin min lo chhâng lêt vat zêl, ka duh hliah hliah reuh êm asin.

Thla khat hnuah an inah a haw a, a haw zàn chuan ka ruak huai mai. Thla hnih deuhthaw zàna ka bula mu țhìn a han mu lo ta chu khum hi a ruak huai maiin ka hria a, mipa mah ni ila ka lung a lêng veng veng mai; mahse, rei a ni tawh lo tùrah ngai ang. Ka nupui leh ka fate nu ni tùrin he khumah ngei hian a rawn mu leh thuai tùrah ka beisei a, inremna thu kan sawi thuai tùrah ka ring bawk.

Nau hial a pai tawh avàngin Chhani pa pawh a țang rei vak thei bîk lo va, rei nghah ngai lovin inremna kan nei thei ta thuai rêng a, kan dinhmunin zir tawh hek lo le, mawihnai taka mite inneihna ang kha chu kan tlin loh bâkah kan beisei pha tawh lo hrim hrim. A awlsam thei ang berin, ho têin kan ti ta thuai a, ka nu erawh a lungawi vak lo tih ka hria, a fapa neihchhun kha ka ni ve a, àwm ka tihpuina chin a awm ve tho; mahse, a fapa hian ka zir miau si lo va.

Nau pawh a lian ve zêl a, Chhani dul pawh a puar lang ve viau tawh. A inhmeh reuh hi ka tia, ka chùlsak nasa țhìn. Ka theihtáwpin ka duat a, mi duat thiam tak ni lo mah ila ka theihtâwp chhuahin ka ti lang ve a, a hah lutuk ang tih hlauin ka chêtpui zêl a, kan ina awm hi hrehawm a ti ang tih ka hlau a ni. U Zovi nèn hi chuan an inbe bawrh bawrh thei mai a, ka pa pawh țawng tam lo mah se a ko bawrh bawrh thei mai bawk a, ka nu ber hi, a tûkchhuak țum a fuh loh châng hi chuan ka lo inthlahrung țhìn. Kan upa ber hmeichhia, Champhaia pasal nei nèn hian an zia a inang deuh a, mi hrang tân hi chuan pawh an har ve ngawtin ka ring. Chhani pawh ka hrilh nasa a, ani pawh chuan," Ka hre thiam alawm, hrehawm ka ti lo a nia," a lo ti ve mai zêl a, ka nu hi zawng en rem hi a ngai ve țhìn ëm a ni.

*******

Hna ka thawk hah deuh a, thâwk lain ka chàwl rih a. Ka huan sàm chu ka en kual a, ka zo thuai tawh dâwn tih hriain rei chàwl duh lovin tui ka in hnu chuan ka sàm chhunzawm leh ta a, tunah hi chuan a hma ai ngawt chuan țhahnem ka ngai thiam ve tawh a, a hma kha chuan helai pawh hi ni 3 vêl sãmah ka hmang țhìn a nih kha. Thei kung leh thlai an puitling țhuau tawh nain a kârah puitling lo deuh an la awm ve a, ka pa hian a lo phun belh ve zauh zauh bawk nèn, hêng hi kan sàm chhan chu a ni ber țhìn.

Ka zo hma angreng a, ka ril pawh a la țâm viau lo nain kan nu thingpui min siamsak ngei ka in châk leh tawh ngei mai. Phûr takin ka pên sauh sauh a, tunah hi chuan patling ve ta riauin ka inhria. Ka ngaihtuah lêt a, Chhani nèn kan inneih hma leh kan inneih hnua ka danglam chakzia hi, ka rilru pawh a puitling sawtin ka hre nghe nghe a ni. Pa ka nih thuai tawh dâwn vàng pawh hi a ni maithei, heti êm êma ka danglam chak hi. Fela pawhin," Fa i neih hma ațangin i patling nghâl ruih mai a nia," min ti nghe nghe. Nia, nupui ka nei tawh a, fa kan nei thuai dâwn a, 'patling ruih' intih pawh hi pawi ka ti lo, 'patling lo e' tih ai chuan ka duh daih zâwk.

Ka duhthusàm ang ngeiin in ka thlen chuan thingpui min lo siam vat a, chhang nèn min lo chhawp a," I hahin i ril a țâm tawh àwm sia, ei țeuh rawh," a ti a. A kal sawn tùr chu a kutah ka mansak a, ka bulah țhuttîrin a hmêl chu chiang fahran hian ka en a, lum a ti tih hriat tak hian a thlan a tla hliam a, a biang a tài têk zui a, a lang duhawm ngei mai. A sam chu sâng deuh hlekah a țâwn khâwm a, a rài-kawr hâk pâr deuh chiai lah chu a inhmeh êm êm bawk.

'I lo che hah viau a ni maw?" ka ti phawt a, ka lama pawh hnaih ka tum chuan," Thingpui inin inbual fai ve phawt la," nui sak chung hian a ti sap a," Chu, ka inbual hma chu min ten deuh a ni maw? Ka bula awm pawh i duh lo," tiin ka han lungawi lo lui deuh a. Ani erawh chuan," Ten nâng aw; mahse, intifai thuai la ka ti zâwk, i hahdam zâwk bawk ang a," tiin," Le, in rawh le, a dai zo ang e, i bula ka awm thuai i duh chuan in thuai thuai mai chi," a tih zawm leh a, mitko sàn ãk ãkin a nui pah bawk a, hrilh nawn ka ngai lo kher mai.

Kan inthlahlel a, kan inkham lo va, kan duh aia hmain fa kan pai zâwk a, chuti chu ni lo se chuan kum khat tal hi chu fa pai rih lovin inlàwm tawn ila tih hi ka duhthusàm a ni țhìn; mahse, fa pai lo se, kan la innei kher lo ang, thil a nih dàn tùr ang a ni vek tawh a, duhthusàm dang ka nei tawh, kan fa lo piang tùr hian hlimna tam tak min siamsak zâwk ngei ang.

Chhani hi hmeichhe che fel tak ni tho mah se ka nu hian sawisèl tùr hi a hre ve a," Ka sawisêl ngawr ngawr che a ni lo a nia," tiin a duh dànte a sawi chhuak a, Chhani chêt dàn a duh tâwk lohnate chu a sawi mai țhìn, a rükin ka lo îp nasa țhìn. Keini unau chungah pawh a duh dàn chu a sawi chhuak mai zêl a; mahse, keini chu a fahrinte kan ni a, min hauin min sawisêl bàwng báwng mah se a pawi lo; mahse, Chhani bulah hi chuan insûm ve deuh se ka ti țhìn, a nuam dâwn lo êm mai a.

Tûk khat chu kan in piaha dàwra Chhani kal hlànin ka nu chuan," In nu hi lo zilh deuh teh, mi bulah min lo sawi a ni àwm a, kan in chhûngah kan duh dàn kan sawi ve a ni mai a, àncheh leh hau ang dâwn dâwnah te min lo chhuah a, ka duh miah lo. Mi bula kan chhüngkaw chanchin sawi hi a ngai lo hrim hrim, lungawi lohna a nei a nih chuan in chhûngah hian sawi chhuak mai rawh se, pâwn lam mite hriata sawi kher a ngai lo," a ti ta bawrh bawrh a, mak ti takin ka nu chu ka en hau ringawt!

*HLAWHLINNA CHANG TÙR HIAN VÀNNEIH KHER A NGAI LO, DAWHTHEI TAKIN THAWK RIM LA, CHU CHU A TÂWK*